𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑑄 𑐡𑐵𑐣𑑂𑐫𑐴𑐶𑐬𑐵 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑐰𑑄𑐐𑐸 𑐱𑐸𑐎𑑂𑐬𑐰𑐵𑑅 𑐠𑐣𑐫𑐵 𑐀𑐱𑑀𑐎 𑐥𑐵𑐬𑑂𑐚𑐷 𑐥𑑂𑐫𑐵𑐮𑐾𑐳𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐡𑐵𑐣𑑂𑐫𑐴𑐶𑐬𑐵 𑐖𑐷𑐰𑑄𑐎𑐵𑑅𑐕𑐶 𑐳𑐶𑐬𑐥𑐵𑑅, 𑐡𑐵𑐣𑑂𑐫𑐴𑐶𑐬𑐵 𑐳𑑄𑐐𑐷𑐟 𑐳𑐶𑐬𑐥𑐵𑑅 𑐰 𑐡𑐵𑐣𑑂𑐫𑐴𑐶𑐬𑐵 𑐰𑐶𑐖𑑂𑐘𑐵𑐣 𑐥𑑂𑐬𑐰𑐶𑐢𑐶 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐊𑐎𑐾𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑑅𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐥𑐸𑐮𑐵𑑄𑐩𑑂𑐴 𑐩𑐣𑑂𑐟𑑂𑐬𑐷𑐮𑐶𑐳𑐾𑑄 𑐫𑐮 𑐩𑐴𑐵𑐣𑐐𑐬𑐫𑐵 𑐥𑐸𑐮𑐵𑑄𑐩𑑂𑐴 𑐥𑑂𑐬𑐩𑐸𑐏 𑐧𑐸𑐡𑑂𑐢𑐶𑐬𑐵𑐖 𑐰𑐖𑑂𑐬𑐵𑐔𑐵𑐬𑑂𑐫𑑄 𑐄𑐐𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐩𑐡𑐸𑐩𑑂𑐴 𑐰𑐵𑐒𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐫𑐵𑐟 ‘𑐡𑐵𑐣𑑂𑐫𑐴𑐶𑐬𑐵 𑐖𑐷𑐰𑑄𑐎𑐵𑑅𑐕𑐶 𑐳𑐶𑐬𑐥𑐵𑑅’ (𑐮𑐵𑐂𑐦𑐚𑐵𑐂𑐩 𑐊𑐔𑐶𑐨𑐾𑐣𑑂𑐚), 𑐣𑐵𑑄𑐖𑐵𑑅𑐩𑑂𑐴 𑐰𑐬𑐶𑐲𑑂𑐛 𑐳𑑄𑐐𑐷𑐟𑐎𑐵𑐬 𑐩𑐣𑐬𑐵𑐖𑐵 𑐣𑐎𑑅𑐩𑐶𑐫𑐵𑐟 ‘𑐡𑐵𑐣𑑂𑐫𑐴𑐶𑐬𑐵 𑐳𑑄𑐐𑐷𑐟 𑐳𑐶𑐬𑐥𑐵𑑅’ 𑐰 𑐜𑐵. 𑐎𑐾𑐱𑐬𑐷𑐮𑐎𑑂𑐲𑑂𑐩𑐷 𑐩𑐵𑐣𑐣𑑂𑐢𑐬𑐫𑐵𑐟 ‘𑐡𑐵𑐣𑑂𑐫𑐴𑐶𑐬𑐵 𑐰𑐶𑐖𑑂𑐘𑐵𑐣 𑐥𑑂𑐬𑐰𑐶𑐢𑐶 𑐳𑐶𑐬𑐥𑐵𑑅’ 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐰𑐫𑑂𑐎𑑅𑐥𑐶𑑄 𑐳𑑂𑐰𑐩𑑂𑐴𑐾𑐳𑐶𑐟𑑄 𑐣𑑂𑐫𑐫𑑂𑐡𑑂𑐰𑑅 𑐟𑐎𑐵 𑐡𑐵𑑄 𑐰 𑐡𑐳𑐶𑐥𑑁𑐮𑐶𑐳𑐾𑑄 𑐄𑐐𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐳𑐶𑐬𑐥𑐵𑑅 𑐊𑐎𑐾𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐢𑐵𑐏𑑂𑐰𑐵𑑅 𑐳𑑂𑐰𑐣𑐵𑐡𑐷𑐐𑐸 𑐏𑑅 𑑋

𑐊𑐎𑐾𑐡𑐾𑐩𑐶𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬𑑄 𑐠𑑅𑐐𑐸 𑐖𑐷𑐰𑐣 𑐊𑐎𑐾𑐡𑐾𑐩𑐶𑐫𑐵 𑐣𑐶𑑄𑐟𑐶𑑄 𑐥𑐵𑐣𑐵𑐡𑐷𑐐𑐸 𑐣𑐵𑐥𑑄 𑐊𑐎𑐾𑐡𑐾𑐩𑐶 𑐡𑐸𑐣𑐾 𑐴𑐾 𑐎𑐮𑐵𑐎𑐵𑐬 𑐀𑐬𑐣𑐶𑐎𑑀 𑐐𑑂𑐫𑐵𑐮𑐬𑐷, 𑐣𑐾𑐰𑐵𑑅 𑐊𑐦𑐊𑐩𑐫𑐵 𑐳𑑄𑐔𑐵𑐮𑐣, 𑐣𑐾𑐰𑐵𑑅 𑐏𑑃𑐐𑑂𑐰𑑅 𑐢𑐸𑐎𑐹𑐫𑐵 𑐥𑑂𑐬𑐎𑐵𑐱𑐣 𑐠𑐾𑑄𑐖𑑂𑐫𑐵𑑅𑐐𑐸 𑐖𑑂𑐰𑑅𑐩𑐡𑐸𑐐𑐸 𑐫𑑀𑐐𑐡𑐵𑐣𑐫𑐵 𑐎𑐡𑐬 𑐫𑐵𑐳𑐾𑑄 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐖𑑀𑐱𑐷𑐫𑐵𑐟 𑐖𑐷𑐰𑑄𑐎𑐵𑑅𑐕𑐶 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐀𑐠𑐾 𑐴𑐾 𑐳𑑄𑐐𑐷𑐟𑐎𑐵𑐬 𑐣𑐎𑑅𑐩𑐶𑐫𑐵𑐟 𑐣𑐾𑐥𑐵𑐮𑐵𑐨𑐵𑐲𑐵 𑐳𑑄𑐐𑐷𑐟 𑐏𑑂𑐫𑐮𑐫𑑂 𑐧𑐶𑐫𑐵𑐡𑐷𑐐𑐸 𑐫𑑀𑐐𑐡𑐵𑐣 𑐰 𑐜𑐵. 𑐩𑐵𑐣𑐣𑑂𑐢𑐬𑐫𑐵𑐟 𑐣𑐾𑐥𑐵𑐮𑐫𑑂𑐣𑑂𑐴𑐵𑐥𑐵𑑄𑐏𑐸𑐳𑐷 𑐩𑑂𑐴𑐸𑐎𑑄𑐔𑐵 𑐏𑐾𑐟𑐷 𑐰 𑐣𑑂𑐴𑐹 𑐣𑑂𑐴𑐹𑐐𑐸 𑐥𑑂𑐬𑐰𑐶𑐢𑐶 𑐡𑐸𑐟 𑐴𑐫𑐵𑐡𑐷𑐐𑐸𑐮𑐶𑑄 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐖𑑀𑐱𑐷𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐳𑐶𑐬𑐥𑐵𑑅 𑐰𑐫𑑂𑐎𑑅𑐫𑐵 𑐎𑐵𑐫𑐥𑐶𑑄 𑐀𑐣𑐸𑐬𑐵𑐖 𑐖𑑀𑐱𑐷, 𑐴𑐾𑐩𑐣𑑂𑐟 𑐖𑑀𑐱𑐷 𑐰 𑐩𑑂𑐴𑑂𑐫𑐵𑐫𑑂 𑐐𑑄𑐐𑐵 𑐩𑐸𑐮𑑂𑐩𑐷𑑄 𑐮𑑅𑐮𑑂𑐴𑐵𑐣𑐵 𑐎𑐫𑐵𑐡𑐷𑐐𑐸 𑐏𑑅𑐳𑐵 𑐜𑐵. 𑐩𑐵𑐣𑐣𑑂𑐢𑐬𑑄 𑐠𑑅𑐟 𑐮𑑅𑐮𑑂𑐴𑐵𑑅𑐐𑐸 𑐳𑐶𑐬𑐥𑐵𑑅𑐫𑐵 𑐡𑐵𑑄 𑐣𑐾𑐥𑐵𑐮𑐨𑐵𑐲𑐵 𑐥𑐬𑐶𑐲𑐡𑑂𑐫𑐵𑐟 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐵𑐲𑑂𑐚𑐫𑐵 𑐥𑑂𑐬𑐵𑐖𑑂𑐘𑐶𑐎 𑐡𑐸𑐖𑑅 𑐜𑐵. 𑐡𑐶𑐣𑐾𑐱𑐬𑐵𑐖 𑐨𑐸𑐖𑐸𑑄 𑐮𑐶𑐳𑐾𑑄 𑐠𑐷𑐠𑐷 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑑄𑐳𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐣𑐬𑐵𑐖𑐵 𑐣𑐎𑑅𑐩𑐶, 𑐬𑐟𑑂𑐣𑐱𑑀𑐨𑐵 𑐩𑐴𑐬𑑂𑐖𑐣, 𑐳𑐬𑐶𑐟𑐵 𑐱𑐵𑐴𑐷 𑐮𑐐𑐵𑐫𑐟𑑄 𑐳𑐵𑑄𑐐𑐷𑐟𑐶𑐎 𑐥𑑂𑐬𑐳𑑂𑐟𑐸𑐟𑐶 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐎𑐵𑐟𑑂𑐟𑐶𑐎 𑑖 𑐐𑐟𑐾 𑐮𑑅𑐮𑑂𑐴𑐵𑐫𑐾𑐐𑐸 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐳𑐶𑐬𑐥𑐵𑑅 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐖𑑀𑐱𑐷 𑐩𑐡𑐸𑐐𑐸𑐮𑐶𑑄 𑐮𑐶𑐕𑐫𑐵𑑅𑐐𑐸 𑐏𑑅 𑑋

NepalBhasa