𑐧𑐶𑐳𑑂𑐎𑑄 𑐧𑐶𑐱𑐾𑐲𑐟𑐵𑑄 𑐖𑐵𑑅𑐐𑐸 𑐧𑑀𑐜𑐾𑐫𑐵

#𑐥𑑂𑐬𑐾𑐩 𑐎𑐾 𑐣𑐶𑐜𑐬

𑐗𑐷 𑐣𑐾𑐰𑐵𑑅𑐟𑐫𑐐𑐸–𑐐𑑁𑐬𑐰 𑐴𑐾 𑐗𑐷𑐐𑐸 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶 𑐀𑐮𑐾 𑐗𑐷𑐐𑐸 𑐟𑐖𑐶𑐮𑐖𑐶𑐏𑑅 𑑋 𑐗𑐷𑐐𑐸 𑐥𑐸𑐬𑑂𑐏𑐵𑐟𑐳𑐾𑑄 𑐣𑑂𑐴𑑂𑐫𑐵𑐎𑐵 𑐠𑐎𑐹𑐐𑐸 𑐗𑐷𑐐𑐸 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶 𑐗𑐷𑐳𑑄 𑐁𑑅𑐟𑐮𑐾𑑄 𑐩𑑂𑐰𑐵𑐎𑐵 𑐟𑐫𑐾 𑐦𑐸𑐐𑐸 𑐴𑐾 𑐗𑐷𑐐𑐸 𑐐𑑁𑐬𑐰𑐫𑐵 𑐏𑑃 𑐏𑑅 𑑋 𑐗𑐷𑐐𑐸 𑐐𑑁𑐬𑐰𑐥𑐹𑐬𑑂𑐞 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶 𑐀𑐮𑐾 𑐳𑐩𑑂𑐥𑐡𑐵𑐟 𑐫𑐎𑑂𑐰 𑐡𑐸 𑑋𑐄𑐎𑐷 𑐩𑐢𑑂𑐫𑐾 𑐗𑐷𑐐𑐸 𑐐𑐞 𑐥𑑂𑐫𑐵𑐏𑑄𑐟 𑐣 𑐕𑐠𑐷 𑐏𑑅 𑑋 𑐋𑐟𑐶𑐴𑐵𑐳𑐶𑐎 𑐎𑐵𑐮𑑄𑐣𑐶𑐳𑐾𑑄 𑐣𑑂𑐴𑑂𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐥𑑂𑐫𑐵𑐏𑑄𑐟 𑐩𑐢𑑂𑐫𑐾 𑐏𑑂𑐰𑐵𑑅𑐥𑐵𑑅 𑐥𑐸𑐫𑐵𑑅 𑐮𑑂𑐴𑐸𑐂𑐐𑐸 𑐀𑐣𑐳𑑂𑐠𑐵𑐣𑐶𑐎 𑐰 𑐮𑑁𑐎𑐶𑐎 𑐥𑑂𑐫𑐵𑐏𑑄 𑐩𑐢𑑂𑐫𑐾 𑐀𑐣𑐸𑐲𑑂𑐛𑐵𑐣𑐶𑐎 𑐥𑑂𑐫𑐵𑐏𑑄𑐫𑐵 𑐋𑐟𑐶𑐴𑐵𑐳𑐶𑐎 𑐩𑐴𑐟𑑂𑐰 𑐡𑐸 𑑋

𑐋𑐟𑐶𑐴𑐵𑐳𑐶𑐎 𑐩𑐴𑐟𑑂𑐰𑑄 𑐖𑐵𑑅𑐐𑐸 𑐰 𑐀𑐣𑐸𑐲𑑂𑐛𑐵𑐣𑐶𑐎 𑐥𑑂𑐫𑐵𑐏𑑄𑐟 𑐏𑑅 𑐴𑐬𑐶𑐳𑐶𑐡𑑂𑐢𑐶 𑐐𑑄 𑐥𑑂𑐫𑐵𑐏𑑄 , 𑐥𑐔𑐮𑐷 𑐨𑐿𑐬𑐰 𑐐𑑄 𑐥𑑂𑐫𑐵𑐏𑑄 𑐨𑐡𑑂𑐬𑐎𑐵𑐮𑐷 𑐐𑑄𑐥𑑂𑐫𑐵𑐏𑑄, 𑐎𑐶𑐥𑐹𑐫𑐵 𑐧𑐵𑐑𑐨𑐿𑐬𑐰 𑐐𑐞 𑐥𑑂𑐫𑐵𑐏𑑄, 𑐣𑑂𑐫𑐟𑐫𑐵 𑐱𑑂𑐰𑐾𑐟 𑐨𑐿𑐬𑐰 𑐥𑑂𑐫𑐵𑐏𑑄, 𑐏𑑂𑐰𑐥𑐫𑐵 𑐣𑐰𑐡𑐸𑐬𑑂𑐐𑐵 𑐐𑑄𑐥𑑂𑐫𑐵𑐏𑑄, 𑐧𑑀𑐜𑐾𑐫𑐵 𑐣𑐷𑐮𑐧𑐬𑐵𑐴𑐷 𑐐𑑄𑐥𑑂𑐫𑐵𑐏𑑄, 𑐀𑐮𑐾 𑐠𑐶𑐩𑐶𑐫𑐵 𑐨𑐿𑐮𑑅𑐥𑑂𑐫𑐵𑐏𑑄 𑐁𑐡𑐶 𑐏𑑅𑐳𑐵 𑐳𑑂𑐰𑐣𑐶𑐐𑑅𑐫𑐵 𑐠𑐾𑐔𑑀 𑐮𑐸𑐨𑐸𑐫𑐵 𑐩𑐴𑐵𑐮𑐎𑑂𑐲𑑂𑐩𑐷 𑐐𑑄𑐥𑑂𑐫𑐵𑐏𑑄 𑐣𑑄 𑐏𑑅 𑑋

𑐧𑑀𑐜𑐾𑐫𑐵 𑐣𑐷𑐮𑐧𑐬𑐵𑐴𑐷 𑐐𑑄𑐥𑑂𑐫𑐵𑐏𑑄 𑐢𑐵𑑅𑐳𑐵 𑐩𑐮𑑂𑐮𑐎𑐵𑐮𑑄 𑐣𑐶𑐳𑐾𑑄 𑐁𑑅𑐟𑐎𑑄 𑐀𑐟𑐸𑐟 𑐬𑐹𑐥𑑄 𑐎𑑂𑐫𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐡𑑃𑐡𑑃 𑐥𑐟𑑂𑐟𑐶𑐎𑑄 𑐳𑐵𑐥𑐵𑐬𑐸 𑐰𑐣𑐵𑑄 𑐎𑐣𑑂𑐴𑐫𑑂 𑐏𑐸𑐣𑑂𑐴𑐸 𑐧𑐴𑐣𑐷𑐣𑐶𑐳𑐾𑑄 𑐳𑑂𑐰𑐣𑑂𑐴𑐸 𑐎𑑂𑐫𑐣𑐶𑐐𑐸 𑐰 𑐐𑑄𑐥𑑂𑐫𑐵𑐏𑑄 𑐐𑐸𑐐𑐸𑑄 𑐡𑑃𑐫𑑂 𑐣𑑄 𑐡𑐶𑐟 𑐀𑐠𑐰𑐵 𑐎𑑂𑐫𑐣𑐾 𑐩𑐦𑐸𑐟 𑐢𑐂𑐐𑐸 𑐣𑑂𑐫𑐣𑐾𑐩𑐡𑐸 𑑋 𑐗𑐷𑐐𑐸 𑐩𑑂𑐴𑐡𑑂𑐫𑑅𑐟 𑐥𑑂𑐫𑐵𑐏𑑄 𑐮𑑂𑐴𑐸𑐂𑐐𑐸 𑐰 𑐐𑑄𑐥𑑂𑐫𑐵𑐏𑐣𑐫𑑂 𑐨𑐿𑐬𑐰 𑐕𑐩𑑂𑐴 𑐧𑐵𑐬𑐵𑐴𑐷 𑐥𑑂𑐫𑐩𑑂𑐴 𑐎𑐸𑐩𑐵𑐬𑐷 𑐥𑑂𑐫𑐩𑑂𑐴 𑐳𑐶𑑄𑐴 𑐥𑑂𑐫𑐩𑑂𑐴 𑐐𑐞𑐾𑐱 𑐥𑑂𑐫𑐩𑑂𑐴 𑐀𑐮𑐾 𑐡𑑂𑐰𑐵𑐬𑐥𑐵𑐮 𑐣𑐶𑐩𑑂𑐴 𑐡𑐸 𑑋

𑐣𑐷𑐮𑐧𑐬𑐵𑐴𑐷 𑐐𑑄𑐥𑑂𑐫𑐵𑐏𑑄𑐫 𑐂𑐟𑐶𑐴𑐵𑐳 𑐳𑑂𑐰𑐫𑐾𑐧𑐮𑐫𑑂 𑐠𑑂𑐰 𑐥𑑂𑐫𑐵𑐏𑑄 𑐳𑐸𑐰𑐬𑑂𑐞 𑐩𑐮𑑂𑐮𑑄𑑄 𑐣𑑂𑐴𑑂𑐫𑐵𑐎𑐵𑐠𑐎𑐸𑐐𑐸 𑐏𑑃𑑄 𑐧𑑄𑐱𑐵𑐰𑐮𑐶𑐂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐥𑑂𑐫𑐵𑐏𑑄 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐟 𑐧𑑄𑑃𑐸𑐫𑐵 𑐧𑑂𑐫𑐰𑐳𑑂𑐠𑐵 𑐣𑐵𑐥 𑐣𑐵𑐥𑑄 𑐩𑐵𑑅𑐩𑐵𑑅𑐐𑐸 𑐖𑑂𑐰𑐮𑑄 𑐣𑑄 𑐧𑐶𑐫𑐵𑐠𑐎𑐸𑐐𑐸 𑐢𑐵𑐥𑐹 𑐡𑐸 𑑋 𑐏𑑂𑐰𑐥𑐫𑐵 𑐣𑐰𑐡𑐸𑐬𑑂𑐐𑐵 𑐐𑐞𑐥𑑂𑐫𑐵𑐏𑑄 𑐣𑑂𑐴𑑂𑐫𑐵𑐎𑐾 𑐢𑐸𑑄𑐎𑐵𑑅 𑐣𑐷𑐮𑐧𑐬𑐵𑐴𑐷 𑐐𑐞𑐥𑑂𑐫𑐵𑐏 𑑄𑐣𑑂𑐴𑑂𑐫𑐵𑐎𑐵 𑐠𑐎𑐹𑐐𑐸 𑐏𑑃 𑐧𑑄𑐳𑐵𑐰𑐮𑐶𑐂 𑐔𑑂𑐰𑐫𑐵𑐟𑑅𑐐𑐸 𑐡𑐸𑐳𑐵𑑄𑑄 𑐳𑑂𑐠𑐵𑐣𑐶𑐫 𑐖𑐣𑐢𑐵𑐬𑐞𑐵 𑐢𑐵𑑅𑐳𑐵 𑐧𑐶𑐳𑑂𑐎𑑄 𑐡𑐸 𑑋

𑐣𑐷𑐮𑐧𑐬𑐵𑐴𑐷 𑐡𑑂𑐫𑑅 𑐠𑑅𑐴𑐾 𑐩𑐣𑐹 𑐬𑐹𑐥 𑐎𑐫𑐵𑐧𑐫𑐵 𑐢𑑂𑐰𑑄 𑐏𑐮𑐎𑐫𑐵 𑐩𑐣𑐹𑐫𑐵𑐟 𑐳𑑂𑐫𑐣𑐵 𑐣𑑂𑐴𑑂𑐫𑐵𑐖𑑂𑐫𑐵𑐎𑐵 𑐠𑐎𑐹𑐐𑐸 𑐢𑐂𑐐𑐸 𑐢𑐵𑐥𑐹 𑐡𑐸 𑑋 𑐎𑐶𑐰𑐡𑐣𑑂𑐟𑐶𑐎𑐠𑑄 𑐧𑑀𑐜𑐾𑐫𑐵 𑐳𑑂𑐠𑐵𑐣𑐷𑐫 𑐢𑑂𑐰𑑄 𑐏𑐮𑐎𑐫 𑐕𑐩𑑂𑐴 𑐩𑐣𑐹 𑐣𑐷𑐮𑐧𑐬𑐵𑐴𑐷𑐫𑐵 𑐐𑐸𑑃𑐳𑐶𑐠𑐫𑑂 𑐔𑑂𑐰𑑄𑐐𑐸 𑐔𑐸𑐮𑐶𑐔𑐵 𑐢𑐵𑑅𑐐𑐸 𑐠𑐵𑐳𑐫𑑂 𑐧𑐵𑐥𑐸𑐳𑐵 𑐟𑑅𑐰𑐣𑐵 𑐔𑑂𑐰𑑄𑐐𑐸 𑐂𑐮𑐫𑑂 𑐣𑐷𑐮𑐧𑐬𑐵𑐴𑐷 𑐠𑑅𑐴𑐾 𑐰𑐫𑐵𑑅 𑐳𑑅𑐟𑐵𑑅 𑐧𑑂𑐰𑐣𑐵 𑐫𑑄𑐎𑐵𑑅 𑐥𑑂𑐫𑐣𑑂𑐴𑐸𑐟𑐎 𑐟𑐫𑐵𑑅 𑐥𑑂𑐫𑐵𑐏𑑄 𑐮𑑂𑐴𑐸𑐫𑐾𑐐𑐸, 𑐧𑐵𑐖𑑄 𑐠𑐵𑐫𑐾𑐐𑐸 𑐳𑑂𑐫𑐣𑐵𑐴𑑅𑐐𑐸 𑐢𑐵𑐥𑐹 𑐡𑐸, 𑐣𑐵𑐥𑐣𑐵𑐥𑑄 𑐥𑑂𑐫𑐵𑐏𑑄𑐫𑐵 𑐣𑐶𑐟𑐶𑑄 𑐩𑐵𑑅𑐩𑐵𑑅𑐐𑐸 𑐖𑑂𑐰𑐮𑑄 𑐟𑐎𑑄 𑐧𑐶𑐫𑐵𑐴𑑅𑐐𑐸 𑐢𑐂𑐐𑐸 𑐢𑐵𑐥𑐹 𑐡𑐸 𑑋

𑐄𑐎𑐶𑐫𑐵 𑐥𑑂𑐬𑐩𑐵𑐞𑐫𑐵 𑐬𑐹𑐥𑐫𑑂 𑐡𑑃𑐫𑑂𑐡𑐳𑑄 𑐥𑑂𑐫𑐵𑐏𑑄 𑐮𑑂𑐴𑐸𑐫𑐾𑐟 𑐨𑐿𑐮𑐵𑐡𑑂𑐫𑐰𑑄 𑐎𑑂𑐰𑐏𑐵𑐂𑐐𑐸 𑐎𑐵𑐔𑐶𑐩𑐵𑑄 𑐣𑑄 𑐧𑐫𑐵𑐴𑑅𑐐𑐸 𑐏𑑅 𑐢𑐂𑐐𑐸 𑐢𑐵𑐥𑐹 𑐡𑐸 𑑋 𑐣𑐷𑐮𑐧𑐵𑐬𑐵𑐴𑐷𑐡𑑂𑐫𑐰𑑄 𑐧𑐶𑐫𑐵𑐴𑑅𑐐𑐸 𑐩𑐾𑐩𑐾𑐐𑐸 𑐖𑑂𑐰𑐮𑑄𑐟 𑐢𑑂𑐰𑑄 𑐏𑐮𑐎𑐫𑐵 𑐩𑐣𑐹𑐫𑐵 𑐕𑐾𑑄𑐫𑑂 𑐁𑑅𑐟𑐎𑑄 𑐎𑑁𑐳𑐷 𑐢𑐵𑑅𑐐𑐸 𑐠𑐮𑐫𑑂 𑐡𑐣𑐶 𑑋 𑐕𑐸 𑐕𑐸𑐖𑑂𑐰𑐮𑑄𑐟 𑐡𑐣𑐶 𑐢𑐂𑐐𑐸 𑐳𑐸𑐣𑐵𑑄 𑐢𑐵𑐫𑐾𑐩𑐦𑐸 𑑋 𑐕𑐵𑐫𑑂𑐎𑐶 𑐟𑑂𑐰𑑅𑐥𑐸𑐸𑐫𑐵 𑐟𑑅𑐐𑐸 𑐰 𑐠𑐮 𑐳𑑂𑐰𑐫𑐐𑐸 𑐁𑑃𑐟 𑐳𑐸𑐣𑐵𑑄 𑐫𑐵𑐫𑐾𑐩𑐦𑐸 𑑋

𑐳𑑂𑐰𑐫𑐾𑐟 𑐳𑐣𑐎𑐶 𑐩𑐶𑐏𑐵𑑄 𑐕𑐸𑑄 𑐏𑐣𑐾𑐩𑐡𑐫𑐵𑐰𑐣𑐶 𑐐𑐸𑐧𑐮𑐾 𑐧𑐾𑐴𑑀𑐳 𑐟𑐎𑑄 𑐖𑐸𑐫𑐵𑐰𑑄𑐣𑐶𑐐𑐸 𑐢𑐵𑐥𑐹 𑐡𑐸 𑑋 𑐥𑐸𑐬𑐵 𑐟𑐵𑐣𑑂𑐟𑑂𑐬𑐶𑐎 𑐧𑐶𑐢𑐶𑐧𑐶𑐢𑐵𑐣𑑄 𑐀𑐮𑐾 𑐣𑐶𑐫𑐩𑐧𑐡𑑂𑐢 𑐬𑐹𑐥𑑄 𑐔𑐮𑐫𑑂 𑐖𑐸𑐂𑐐𑐸 𑐰 𑐐𑐞𑐥𑑂𑐫𑐵𑐏𑑄 𑐩𑐣𑐹𑐟𑐳𑐾𑑄 𑐡𑐿𑐧𑐷𑐱𑐎𑑂𑐟𑐶𑐫𑐵 𑐬𑐹𑐥𑑄 𑐴𑐾 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐏𑑂𑐰𑐵𑑅𑐥𑐵𑑅 𑐥𑐸𑐫𑐵 𑐮𑑂𑐴𑐸𑐂𑐐𑐸 𑐥𑑂𑐬𑐳𑐶𑐡𑑂𑐢 𑐀𑐣𑐸𑐲𑑂𑐛𑐵𑐣𑐶𑐎 𑐐𑐞𑐥𑑂𑐫𑐵𑐏𑑄𑐟 𑐖𑐣𑐩𑐵𑐣𑐳𑐫𑑂 𑐩𑐣𑑀𑐬𑑄𑐖𑐣𑐫𑐵 𑐣𑐶𑐟𑐶𑑄 𑐀𑐮𑐾 𑐡𑐾𑐰𑐡𑐾𑐧𑐷𑐫𑐵 𑐩𑐴𑐶𑐩𑐵𑐧𑑀𑐢 𑐫𑐵𑐫𑐾𑐐𑐸𑐎𑐠𑑄 𑐣𑑂𑐴𑑂𑐫𑐵𑐖𑑂𑐫𑐵𑐎𑐵 𑐟𑑅𑐐𑐸 𑐏𑑅 𑑋

𑐢𑐵𑐬𑑂𑐩𑐶𑐎 𑐁𑐳𑑂𑐠𑐵 𑐧 𑐥𑑂𑐫𑐵𑐏𑐣𑐫𑑂 𑐥𑐸𑐂𑐐𑐸 𑐏𑑂𑐰𑐵𑑅𑐥𑐵𑑅 𑐡𑐾𑐧𑐡𑐾𑐧𑐷𑐫𑐵 𑐏𑑂𑐰𑐵𑑅 𑐗𑐮𑑂𑐎𑐾 𑐫𑐵𑐣𑐵𑑅 𑐟𑐵𑐣𑑂𑐟𑑂𑐬𑐶𑐎 𑐧𑐶𑐢𑐶𑐧𑐶𑐢𑐵𑐣𑐎𑐠𑑄 𑐖𑐷𑐰𑐣𑑂𑐫𑐵𑐳 𑐫𑐵𑐣𑐵𑑅 𑐡𑐫𑐾𑐎𑐵𑐟𑑅𑐐𑐸 𑐖𑐹𑐐𑐸𑐮𑐶𑑄 𑐰 𑐏𑑂𑐰𑐵𑑅𑐥𑐵𑐮𑑄 𑐫𑐵𑐣𑐵𑑅 𑐖𑐣𑐩𑐵𑐣𑐳𑐫𑑂 𑐢𑐵𑐬𑑂𑐩𑐶𑐎 𑐥𑑂𑐬𑐨𑐵𑐰 𑐫𑐎𑑂𑐰𑑅 𑐮𑐵𑐎𑐹𑐐𑐸 𑐏𑐣𑐾𑐡𑐸 𑑋 𑐠𑐸𑐖𑑂𑐰𑑅 𑐐𑐸 𑐏𑑂𑐰𑐵𑑅𑐥𑐵𑑅 𑐥𑐸𑐫𑐵𑑅 𑐥𑑂𑐫𑐵𑐏𑑄 𑐮𑑂𑐴𑐸𑐂𑐥𑐶𑑄𑐟 𑐟𑐎 𑐡𑑂𑐫𑑅𑐫𑐵 𑐥𑑂𑐬𑐟𑐶𑐎𑐫𑐵 𑐬𑐹𑐥𑐫𑑂 𑐎𑐫𑐵𑑅 𑐥𑐸𑐖𑐵 𑐫𑐵𑐫𑐾𑐐𑐸 𑐣𑐵𑐥𑐣𑐵𑐥 𑐥𑑂𑐫𑐵𑐏𑑄 𑐮𑑂𑐴𑐸𑐂𑐩𑑂𑐴 𑐩𑐣𑐹𑐫𑐵𑐟 𑐟𑐎𑑄 𑐡𑑂𑐫𑑅, 𑐥𑑂𑐬𑐨𑐸 𑐀𑐮𑐾 𑐃𑐱𑑂𑐰𑐬 𑐢𑐎𑐵𑑅 𑐩𑐵𑐣𑐫𑑂 𑐫𑐵𑐫𑐾𑐐𑐸 𑐔𑐮𑐣 𑐡𑐸 𑑋

𑐩𑐵𑐬𑑂𑐎𑐞𑑂𑐜𑐾𑐫 𑐥𑐸𑐬𑐵𑐞, 𑐡𑐾𑐰𑐷𑐨𑐵𑐐𑐰𑐟 𑐀𑐮𑐾 𑐠𑐷𑐠𑐷 𑐥𑐸𑐬𑐵𑐞𑐎𑐠𑑄 𑐠𑐷𑐠𑐷 𑐡𑐾𑐰𑐷𑐡𑐾𑐰𑐟𑐵𑐟 𑐬𑐵𑐎𑑂𑐲𑐳𑐟 𑐣𑐵𑐥𑑄 𑐮𑑂𑐰𑐵𑐥𑐸 𑐖𑐹𑐐𑐸𑐸 𑐎𑐣𑐵𑐟𑑅𑐐𑐸 𑐡𑐸𑐸 𑑋 𑐀𑐠𑐾 𑐴𑐾 𑐣𑐰𑐡𑐸𑐬𑑂𑐐𑐵𑑄 𑐩𑐴𑐶𑐲𑐵𑐳𑐸𑐬 𑐳𑑂𑐫𑐵𑑅𑐐𑐸 𑐧𑐵𑐬𑐾 𑐎𑐣𑐵𑐟𑑅𑐐𑐸 𑐡𑐸 𑑋 𑐀𑐣𑐸𑐲𑑂𑐛𑐵𑐣𑐶𑐎 𑐥𑑂𑐫𑐵𑐏𑑄𑐟 𑐣𑑄 𑐡𑐾𑐧𑐡𑐾𑐧𑐷𑐫𑐵 𑐩𑐴𑐶𑐩𑐵𑐫𑐵𑐟 𑐧𑑀𑐢 𑐫𑐵𑐫𑐾𑐐𑐸 𑐬𑐹𑐥𑑄 𑐎𑑂𑐫𑐣𑐵𑐟𑑅𑐐𑐸 𑐥𑑂𑐫𑐵𑐏𑑄𑐟 𑐏𑑅 𑑋 𑐣𑐰𑐡𑐸𑐬𑑂𑐐𑐵 𑐥𑑂𑐫𑐵𑐏𑑄 𑐣𑑄𑑄 𑐩𑐴𑐶𑐲𑐵𑐳𑐸𑐬 𑐣𑐵𑐥 𑐫𑐸𑐡𑑂𑐢 𑐫𑐵𑑅𑐐𑐸𑐫𑐵 𑐬𑐹𑐥𑐫𑑂 𑐎𑑂𑐫𑐣𑐵 𑐟𑑅𑐐𑐸 𑐏𑑅𑐳𑐵 𑐩𑐴𑐵𑐎𑐵𑐮𑐷 𑐥𑑂𑐫𑐵𑐏𑑄 𑐬𑐵𑐎𑑂𑐲𑐳𑐟 𑐣𑐵𑐥 𑐫𑐸𑐡𑑂𑐢 𑐫𑐵𑐫𑐾𑐟 𑐫𑐸𑐡𑑂𑐢 𑐀𑐨𑑂𑐫𑐵𑐳𑐫𑐵 𑐬𑐹𑐥𑐫𑑂 𑐎𑑂𑐫𑐣𑐵 𑐟𑑅𑐐𑐸 𑐥𑑂𑐫𑐵𑐏𑑄 𑐏𑑅 𑑋

𑐄𑐎𑐶𑑄 𑐰 𑐥𑑂𑐫𑐵𑐏𑐣𑐫𑑂 𑐠𑐷𑐠𑐷 𑐡𑐾𑐧𑐷𑐟𑐳𑐾𑑄 𑐴𑐟𑐶𑐫𑐵𑐬 𑐖𑑂𑐰𑐣𑐵𑑅 𑐥𑑂𑐫𑐵𑐏𑑄 𑐮𑑂𑐴𑐸𑐂𑐎𑐵𑐟𑑅𑐐𑐸 𑐏𑐣𑐾𑐡𑐸 𑑋 𑐥𑑂𑐫𑐵𑐏𑑄𑐫𑐵 𑐏𑑂𑐰𑐵𑑅𑐥𑐵𑑅, 𑐥𑑂𑐫𑐵𑐏𑑄𑐫𑐵 𑐴𑐵𑐄𑐨𑐵𑐄 𑐀𑐮𑐾 𑐰𑐳𑐟𑑄 𑐣𑑄 𑐧𑐵𑑄𑐮𑐵𑐎 𑐎𑑂𑐫𑑄 𑑋 𑐧𑑀𑐜𑐾𑐫𑐵 𑐣𑐷𑐮𑐧𑐵𑐬𑐵𑐴𑐷 𑐐𑐞𑐥𑑂𑐫𑐵𑐏𑑄 𑐣𑑄 𑐡𑐾𑐧𑐷𑐥𑑂𑐫𑐵𑐏𑑄𑐫𑐵 𑐣𑐵𑐩𑑄 𑐣𑐵𑑄 𑐖𑐵𑑅 𑑋 𑐟𑐧𑐶 𑐩𑐾𑐩𑐾𑐐𑐸 𑐡𑐾𑐧𑐷𑐥𑑂𑐫𑐵𑐏𑑄𑐫𑐵 𑐳𑑂𑐰𑐨𑐵𑐰 𑐰 𑐧𑐶𑐱𑐾𑐲𑐟𑐵 𑐣𑐵𑐥𑑄𑑄 𑐕𑐸𑑄 𑐣𑑄 𑐧𑐶𑐱𑐾𑐲𑐟𑐵, 𑐴𑐵𑐄𑐨𑐵𑐄 𑐀𑐮𑐾 𑐏𑑂𑐰𑐵𑐥𑐵𑑅𑐫𑐵 𑐥𑑂𑐬𑐎𑐺𑐟𑐶𑐟𑐎 𑐣𑑄 𑐩𑐶𑐮𑐫𑑂 𑐩𑐖𑐹 𑑋

𑐣𑐰𑐡𑐸𑐬𑑂𑐐𑐵𑐫𑐵 𑐕𑐥𑐵𑑅 𑐟𑐶 𑐕𑐥𑐵𑑅 𑐏𑑂𑐰𑐵𑑅𑐥𑐵𑑅 𑐎𑑂𑐬𑑀𑐢𑐶𑐟 𑐏𑐣𑐾𑐡𑐸𑐳𑐵 𑐣𑐷𑐮𑐧𑐬𑐵𑐴𑐷 𑐐𑐞𑐫𑐵 𑐥𑑂𑐬𑐟𑑂𑐫𑐾𑐎 𑐏𑑂𑐰𑐵𑑅𑐥𑐵𑑅 𑐣𑑂𑐴𑐶𑐮𑐵𑐏𑑂𑐰𑐵𑑅, 𑐀𑐮𑐾 𑐱𑐵𑐣𑑂𑐟 𑐏𑐣𑐾𑐡𑐸 𑑋 𑐥𑑂𑐫𑐵𑐏𑑄 𑐮𑑂𑐴𑐸𑐂𑐐𑐸 𑐴𑐵𑐄𑐨𑐵𑐄𑐣𑐶𑐳𑐾𑑄 𑐎𑐫𑐵𑑅 𑐥𑑂𑐫𑐵𑐏𑑄 𑐥𑐶𑐴𑐵𑑄 𑐰𑐂𑐧𑐮𑐫𑑂 𑐮𑐵𑐂𑐣𑑄 𑐥𑐶𑐴𑐵𑑄 𑐰𑐂𑐐𑐸 𑐮𑐎𑐳𑑄 𑐣𑑄 𑐠𑑂𑐰 𑐥𑑂𑐫𑐵𑐏𑑄𑐫𑐵 𑐩𑐹𑐮𑐩𑐬𑑂𑐩 𑐠𑐸𑐂𑐎𑐾𑐟 𑐠𑐵𑐎𑐸 𑐩𑐖𑐹 𑑋 𑐣𑑂𑐴𑑂𑐫𑐵𑐏𑐶𑑄𑐫𑐵 𑐟𑐵𑐮𑐫𑑂 𑐥𑐶𑐴𑐵𑑄 𑐰𑐂𑐧𑐮𑐫𑑂 𑐡𑐎𑐮𑐾 𑐣𑑂𑐴𑐵𑐥𑐵 𑐢𑑂𑐰𑐵𑑃𑐫𑑂, 𑐀𑐮𑐾𑑄 𑐳𑑃𑐫𑑂 (𑐏𑐜𑑂𑐐 𑐰 𑐝𑐵𑐮) 𑐰𑑄 𑐮𑐶𑐥𑐵 𑐕𑐵𑐟𑐶 𑐎𑐠𑐶 (𑐬𑐵𑐖𑐡𑐞𑑂𑐜 ) 𑐔𑐶𑐬𑐵𑐐 𑐀𑐮𑐾 𑐡𑑂𑐫𑑅𑐟 𑐨𑐿𑐮𑑅, 𑐧𑐵𑐬𑐵𑐴𑐷 , 𑐎𑐸𑐸𑐩𑐵𑐬𑐷, 𑐳𑐶𑑄𑐴 , 𑐡𑑂𑐰𑐵𑐬𑐥𑐵𑐮 𑐰𑐂 𑑋 𑐡𑐎𑐮𑐾 𑐮𑐶𑐥𑐵 𑐐𑐣𑐾𑐡𑑂𑐫𑑅𑐟 𑐮𑐵𑐂𑐣𑑄 𑐥𑐶𑐴𑐵𑑃 𑐰𑐂𑐐𑐸 𑐡𑐺𑐱𑑂𑐫 𑐳𑑂𑐰𑐫𑐾𑐧𑐮𑐫𑑂 𑐠𑑂𑐰 𑐕𑐐𑐹 𑐖𑐸𑐮𑐸𑐳 𑐠𑐾𑑄 𑐔𑑂𑐰𑑄 𑑋

𑐫𑐸𑐡𑑂𑐢 𑐮𑐶𑐥𑐵 𑐴𑐬𑑂𑐲𑑀𑐮𑑂𑐮𑐵𑐳 𑐫𑐵𑐣𑐵𑐰𑑅𑐐𑐸 𑐕𑐐𑐹 𑐧𑐶𑐖𑐫 𑐄𑐟𑑂𑐳𑐧 𑐠𑐾𑑄 𑐔𑑂𑐰𑑄 𑑋 𑐠𑑂𑐰 𑐥𑑂𑐫𑐵𑐏𑑄 𑐏𑑅, 𑐀𑐫𑐣𑑄𑑄 𑐕𑐵𑐫𑑂 𑐖𑐸𑐮𑐸𑐳 𑐠𑐾𑑄 𑐥𑐶𑐴𑐵𑑄 𑐰𑐮 ? 𑐥𑑂𑐫𑐵𑐏𑐣𑐫𑑂 𑐕𑐵𑐫𑑂 𑐦𑐸𑐎𑑂𑐎𑑄 𑐡𑐾𑐰𑐡𑐾𑐧𑐷𑐟 𑐕𑐐𑐹 𑐴𑐾 𑐟𑐵𑐮𑑄 𑐮𑑂𑐴𑐸𑐮 𑐢𑐂𑐐𑐸 𑐩𑐹𑐮𑐩𑐬𑑂𑐩 𑐠𑐸𑐂𑐎𑐾𑐟 𑐠𑑂𑐰 𑐥𑑂𑐫𑐵𑐏𑑄𑐫𑐵 𑐥𑑂𑐬𑐟𑑂𑐫𑐾𑐎 𑐗𑐶𑑄𑐣𑐶𑑃𑑄𑐫𑑂 𑐕𑐎𑑅 𑐮𑑂𑐴𑐸𑐂𑐎𑐶𑐐𑐸 𑐧𑐶𑐱𑐾𑐲 𑐥𑑂𑐫𑐵𑐏𑑄 𑐏𑑅 𑐟𑑂𑐫𑐮𑐶𑐐𑐸 𑐥𑑂𑐫𑐵𑐏𑑄 𑐩𑐳𑑂𑐰𑐳𑐾𑑄 𑐩𑐐𑐵𑑅 𑑋 𑐨𑐿𑐮𑐵 𑐡𑑂𑐫𑑅 𑐳𑐾𑐣𑐵𑐥𑐟𑐶 𑐖𑐸𑐫𑐵𑑅 𑐀𑐠𑐰𑐵 𑐨𑐿𑐮𑐵𑐡𑑂𑐫𑑅𑐫𑐵 𑐣𑐾𑐟𑐺𑐟𑑂𑐰𑐫𑑂 𑐳𑐶𑐡𑑂𑐢𑐶𑐡𑐵𑐟𑐵 𑐐𑐞𑐾𑐱𑐫𑐵𑐟 𑐡𑐎𑐮𑐾 𑐣𑑂𑐴𑐵𑐥𑐵𑑄 𑐁𑐎𑑂𑐬𑐩𑐞 𑐫𑐵𑐫𑐾𑐟 𑐧𑑂𑐰𑐣𑐵𑐫𑑄𑐎𑐷 𑑋

𑐰𑑄 𑐮𑐶𑐥𑐵 𑐴𑐵𑐣𑑄 𑐨𑐿𑐮𑐵 𑐡𑑂𑐫𑑅 𑐣𑑂𑐴𑑂𑐫𑑅𑐣𑐾 𑐔𑑂𑐰𑐣𑐵𑑅 𑐡𑐾𑐧𑐷𑐟 𑐧𑐵𑐬𑐵𑐴𑐷 𑐎𑐸𑐩𑐵𑐬𑐷𑐟 𑐧𑑂𑐰𑐣𑐵𑑅 𑐫𑑄𑐎𑐷 𑐀𑐮𑐾𑑄 𑐳𑐶𑑄𑐴 𑐰 𑐡𑑂𑐰𑐵𑐬𑐥𑐵𑐮 𑐧𑑂𑐰𑐣𑐵 𑐫𑑄𑐎𑐷 𑑋 𑐕𑐠𑐷 𑐕𑐠𑐷 𑐥𑐔𑑅 𑐫𑐵𑐣𑐵𑑅 𑐬𑐵𑐎𑑂𑐲𑐳𑐟 𑐣𑐵𑐥 𑐮𑑂𑐰𑐵𑑅𑐰𑑄𑐐𑐸 𑐎𑑂𑐫𑐣𑐵𑐟𑑅𑐐𑐸 𑐰 𑐥𑑂𑐫𑐵𑐏𑑄 𑐮𑑂𑐰𑐵𑐣𑐵𑐰𑐫𑐾 𑐢𑐸𑑄𑐎𑐵𑑅 𑐕𑐐𑐹 𑐠𑐵𑐳𑐫𑑂 𑐩𑐸𑐣𑐷 𑐀𑐮𑐾 𑐦𑐸𑐎𑑂𑐎 𑐩𑐶𑐮𑐫𑑂 𑐖𑐸𑐫𑐵𑑅 𑐕𑐎𑐮𑑄 𑐟𑐶𑑄𑐣𑑂𑐴𑐸𑐫𑐵 𑐥𑑂𑐫𑐵𑐏𑑄 𑐮𑑂𑐴𑐸𑐂 𑑋 𑐰𑐠𑐵𑐫𑑂 𑐟𑑂𑐫𑐵𑐎𑐵𑑅 𑐩𑐾𑐐𑐸 𑐠𑐵𑐫𑑂 𑐟𑑂𑐫𑐮𑐾𑐟 𑐰𑐣𑐶𑐐𑐸 𑐁𑐨𑐵𑐳 𑐧𑐶𑐫𑐵𑑅 𑐮𑑂𑐴𑐸𑐂𑐎𑐵𑐟𑑅𑐐𑐸𑐥𑑂𑐫𑐵𑐏𑑄 𑐢𑐵𑐟𑑂𑐠𑐾𑑄 𑐴𑐾 𑐳𑑂𑐰𑐳𑑂𑐰𑑄 𑐣𑑂𑐴𑑂𑐫𑐵𑐂𑐥𑐸𑐐𑐸 𑐥𑑂𑐫𑐵𑐏𑑄 𑐏𑑅 𑑋

𑐏𑑅𑐟𑑂𑐫𑑅𑐮𑐶𑐐𑐸 𑐥𑑂𑐫𑐵𑐏𑑄 𑐢𑐎𑐵𑐢𑐫𑐵𑐟𑑅𑐐𑐸 𑐰 𑐣𑐷𑐮𑐧𑐵𑐬𑐵𑐴𑐷 𑐐𑐞𑐥𑑂𑐫𑐵𑐏𑑄 𑐕𑐐𑐹 𑐧𑐶𑐖𑐫 𑐖𑐸𑐮𑐸𑐳𑐫𑐵 𑐬𑐹𑐥𑐫𑑂 𑐣𑑂𑐴𑑂𑐫𑐵𑐎𑐵𑐟𑑅𑐐𑐸 𑐥𑑂𑐫𑐵𑐏𑑄 𑐢𑐵𑐫𑐾𑐟 𑐩𑐕𑐶𑑄 𑐩𑐖𑐹 𑑋𑐣𑐷𑐮𑐧𑐵𑐬𑐵𑐴𑐷 𑐐𑐞 𑐥𑑂𑐫𑐵𑐏𑑄𑐫𑐵 𑐠𑑅𑐐𑐸 𑐴𑐾 𑐕𑐐𑐹 𑐧𑐶𑐳𑑂𑐎𑑄 𑐧𑐶𑐱𑐾𑐲𑐟𑐵 𑐡𑐸𑐐𑐸 𑐐𑐞𑐥𑑂𑐫𑐵𑐏𑑄 𑐏𑑅 𑑋 𑐣𑑂𑐴𑑂𑐫𑐵𑐏𑐶𑑄 𑐣𑐵𑐥𑑄 𑐥𑑂𑐫𑑄𑐐𑐹 𑐟𑐵𑐮𑐖𑐎 𑐡𑐸𑐐𑐸 𑐰 𑐥𑑂𑐫𑐵𑐏𑐣𑐫𑑂 𑐳𑑂𑐰𑑄𑐐𑐹 𑐟𑐵𑐮𑐫𑑂 𑐦𑐸𑐎𑑂𑐎𑐡𑑂𑐫𑑅𑐟 𑐕𑐐𑐹 𑐴𑐾 𑐢𑐂𑐠𑐾𑑄 𑐔𑑂𑐰𑑄𑐎𑐵𑑅 𑐴𑐵𑐄𑐨𑐵𑐄 𑐥𑐶𑐎𑐫𑐵𑑅 𑐥𑑂𑐫𑐵𑐏𑑄 𑐮𑑂𑐴𑐸𑐂 𑑋

𑐩𑐾𑐩𑐾𑐐𑐸 𑐀𑐣𑐸𑐲𑑂𑐛𑐵𑐣𑐶𑐎 𑐐𑐞 𑐥𑑂𑐫𑐵𑐏𑐣𑐫𑑂 𑐠𑐾𑑄 𑐡𑐾𑐧𑐷𑐟 𑐰 𑐧𑐾𑐟𑐵𑐮, 𑐎𑐰𑑄 𑐀𑐮𑐐𑐀𑐮𑐐 𑐥𑐸𑐔𑑅𑐫𑐵𑐣𑐵𑑅 𑐥𑑂𑐫𑐵𑐏𑑄 𑐮𑑂𑐴𑐸𑐂𑐎𑐵𑐟𑑅𑐐𑐸 𑐩𑐡𑐸 𑑋 𑐦𑐸𑐎𑑂𑐎 𑐢𑐂𑐠𑐾𑑄 𑐡𑐾𑐧𑐷𑐥𑑂𑐫𑐵𑐏𑐣𑐫𑑄 𑐧𑐾𑐟𑐵𑐮 ,𑐎𑐰𑐵𑑄 𑐏𑑂𑐫𑐵𑑅𑐫𑐵𑐨𑐸𑐩𑐶𑐎𑐵𑐡𑐸𑐳𑐵𑑄𑐠𑑂𑐰𑐣𑐷𑐮𑐧𑐬𑐵𑐴𑐷 𑐐𑐞 𑐥𑑂𑐫𑐵𑐏𑐣𑐫 𑐧𑐾𑐟𑐵𑐮, 𑐎𑐰𑐵𑑄 ,𑐏𑑂𑐫𑐵𑐫𑐵 𑐕𑑄 𑐣𑑄𑑄𑐨𑐸𑐩𑐶𑐎𑐵𑐩𑐡𑐸 𑑋𑑄 𑐀𑐳𑐸𑐬𑐟 𑐣𑐵𑐥𑑄 𑐮𑑂𑐰𑐵𑐣𑐵𑐟𑑂𑐫𑐵𑐎𑐵𑐰𑐫 𑐢𑐸𑑄𑐎𑐐𑐸𑐖𑐸𑐐𑐸𑐮𑐶𑑄𑑄 𑐀𑐳𑐸𑐬𑐟𑐫𑑂𑐐𑐸 𑐨𑐹𑐩𑐶𑐎𑐵 𑐩𑐡𑐸𑐐𑐸 𑐖𑐸𑐫𑐾𑐩𑐵𑑅 𑑋

𑐟𑐬 𑐧𑐶𑐖𑐫 𑐫𑐵𑐣𑐵 𑐰𑑅𑐳𑐵𑑄 𑐡𑑃𑐫𑑂𑐡𑐳𑑄 𑐮𑑂𑐴𑐸𑐂𑐐𑐸 𑐕𑐐𑐹 𑐟𑐵𑐮𑐫𑑂 𑐢𑐵𑑅𑐳𑐵 𑐥𑑂𑐫𑐩𑑂𑐴 𑐳𑐶𑐴𑑄 𑐟𑐶𑑄𑐣𑑂𑐴𑐸𑐫𑐵 𑐮𑑂𑐴𑐸𑐂𑐐𑐸 𑐥𑑂𑐫𑐵𑐏𑑄 𑐬𑐴𑐳𑑂𑐫𑐩𑐫 𑐏𑐣𑐾𑐡𑐸 𑑋 𑐳𑐶𑑄𑐴𑐫𑐵 𑐄𑐐𑑂𑐬 𑐳𑑂𑐰𑐨𑐵𑐰 𑐎𑑂𑐫𑐣𑐵𑑅 𑐮𑑂𑐴𑐸𑐂𑐐𑐸 𑐠𑑂𑐰 𑐥𑑂𑐫𑐵𑐏𑑄 𑐧𑐵𑐖𑑄𑐫𑐵 𑐄𑐟𑑂𑐟𑐾𑐖𑐎 𑐳𑐮𑐫𑑂 𑐥𑑂𑐫𑐩𑑂𑐴 𑐕𑐎𑐮𑑄 𑐟𑐶𑑄𑐣𑑂𑐴𑐸𑐫𑐵 𑐥𑑂𑐫𑐵𑐏𑑄 𑐮𑑂𑐴𑐸𑐂𑐐𑐸 𑐳𑑂𑐰𑐳𑑂𑐰 𑑄𑑄𑐩𑐣𑐸𑐟 𑐣𑑂𑐴𑑂𑐫𑐵𑐂𑐥𑐸 𑐟𑐵𑐫𑐾𑐎𑐷 𑑋 𑑋 𑐠𑑂𑐰 𑐣𑑂𑐴𑑂𑐫𑐵𑐃𑐥𑐸𑐐 𑐸𑐥𑑂𑐫𑐵𑐏𑑄𑐫𑐵 𑐧𑐵𑐬𑐾 𑐖𑐣𑐩𑐵𑐣𑐳𑐫𑐵 𑐢𑐵𑐥𑐸𑐎𑐠𑑄 𑐩𑐴𑐵𑐮𑐎𑑂𑐲𑑂𑐩𑐷 𑐧𑑀𑐜𑐾𑐫𑐵 𑐂𑐲𑑂𑐚 𑐡𑑂𑐫𑑅 𑐏𑑅 𑑋

𑐳𑐶𑑄𑐴 𑐩𑐴𑐵𑐮𑐎𑑂𑐲𑑂𑐩𑐷𑐡𑑂𑐫𑑅𑐫𑐵 𑐧𑐵𑐴𑐵𑑄 𑐖𑐹𑐐𑐸𑐮𑐶𑑄 𑐧𑑀𑐜𑐾𑐫𑐵 𑐖𑐣𑐟𑐵𑐟𑐫𑑂𑐟 𑐬𑐵𑐎𑑂𑐲𑐳 𑐰𑐵 𑐳𑐸𑐣𑐵𑑄 𑐡𑐸𑑅𑐏 𑐧𑐶𑐮 𑐢𑐵𑑅𑐳𑐵 𑐖𑐶𑐩𑐶𑐳𑑄 𑐠𑐠𑐾 𑐁𑐎𑑂𑐬𑐩𑐞 𑐫𑐵𑐫𑐦𑐸 𑐣𑑂𑐴𑐿 𑐢𑐎𑐵𑑅 𑐟𑐶𑑄𑐣𑑂𑐴𑐸𑐫𑐵𑑅 𑐏𑐰𑐬𑐡𑐵𑐬𑐷 𑐧𑐶𑐫𑐵𑑅 𑐥𑑂𑐫𑐵𑐏𑑄 𑐮𑑂𑐴𑐸𑐂𑐎𑐵 𑐟𑑅𑐐𑐸 𑐏𑑅 𑐢𑐂𑐐𑐸 𑐢𑐵𑐬𑐞𑐵 𑐡𑐸 𑑋𑐣𑐷𑐮𑐧𑐵𑐬𑐵𑐴𑐷 𑐐𑐞𑐥𑑂𑐫𑐵𑐏𑑄 𑐟𑐵𑐣𑑂𑐟𑑂𑐬𑐶𑐎 𑐧𑐶𑐢𑐶𑐧𑐶𑐢𑐵𑐣 𑐫𑐸𑐎𑑂𑐟 𑐥𑑂𑐫𑐵𑐏𑑄 𑐏𑑅 𑑋 𑐥𑑂𑐫𑐵𑐏𑑄 𑐳𑐸𑐬𑐸 𑐖𑐹𑐳𑐵𑑄 𑐣𑐶𑐳𑐾𑑄 𑐀𑐣𑑂𑐟𑐟𑐎 𑐟𑐵𑐣𑑂𑐟𑑂𑐬𑐶𑐎 𑐧𑐶𑐢𑐶𑐧𑐶𑐢𑐵𑐣𑐎𑐐𑐠𑑄 𑐴𑐾 𑐖𑐸𑐂 𑑋

𑐧𑐶𑐢𑐶𑐧𑐶𑐢𑐵𑐣𑐎𑐠𑑄 𑐩𑐖𑐹𑐳𑐾𑑄 𑐣𑑂𑐴𑑂𑐫𑑅𑐣𑐾𑐮𑐵𑑅𑐠𑐾 𑐖𑐸𑐮 𑐢𑐵𑑅𑐳𑐵 𑐕𑐸𑑄 𑐣𑑄 𑐕𑐸𑑄 𑐧𑐶𑐑𑑂𑐣𑐖𑐸𑐫𑐵𑑅 𑐥𑑂𑐬𑐟𑐶𑐎𑐺𑐫𑐵 𑐎𑑂𑐫𑐣𑐾 𑐢𑐸𑑄𑐎𑐷𑐐𑐸 𑐏𑑃 𑐖𑐣𑐩𑐵𑐣𑐳𑐫𑑂 𑐡𑐸 𑑋 𑐖𑐣𑐩𑐵𑐣𑐳𑐫𑑂 𑐏𑑂𑐰𑐥𑐫𑐵 𑐣𑐰𑐡𑐸𑐬𑑂𑐐𑐵 𑐐𑐞𑐥𑑂𑐫𑐵𑐏𑑄𑐫𑐵 𑐡𑐾𑐧𑐷𑐟𑐫𑑂𑐎𑐾 𑐐𑐸𑐮𑐶 𑐱𑐎𑑂𑐟𑐶 𑐡𑐸 𑐄𑐮𑐶 𑐴𑐾 𑐱𑐎𑑂𑐟𑐶 𑐣𑐷𑐮𑐧𑐵𑐬𑐵𑐴𑐷 𑐐𑐞𑐥𑑂𑐫𑐵𑐏𑑄𑐫𑐵 𑐡𑐾𑐧𑐡𑐾𑐧𑐷𑐟𑐫𑑂𑐎𑐾 𑐡𑐸 𑐢𑐵𑐂 𑑋 𑐠𑑂𑐰 𑐧𑐶𑐲𑐫𑐮𑐫𑑂 𑐕𑐐𑐹 𑐎𑐶𑐰𑐡𑐣𑑂𑐟𑐷 𑐡𑐸 𑐣𑐷𑐮𑐧𑐵𑐬𑐵𑐴𑐷 𑐐𑐞𑐫𑐵 𑐐𑐞 𑐴𑐶𑐮𑐾 𑐢𑐸𑑄𑐎𑐵𑑅 𑐕𑐎𑑅 𑐐𑐞 𑐥𑑂𑐫𑐵𑐏𑑄 𑐏𑑂𑐰𑐥𑐫𑐵 𑐨𑐿𑐮𑐵𑐡𑑂𑐫𑑅𑐫𑐵 𑐠𑐵𑐫𑑂 𑐮𑑂𑐴𑐸𑐂𑐎𑐾𑐟 𑐫𑑄𑐎𑐾 𑐩𑐵𑑅 𑑋 𑐀𑐣 𑐥𑑂𑐫𑐵𑐏𑑄 𑐮𑑂𑐴𑐸𑐫𑐾𑐟 𑐟𑐫𑐵𑐬𑐷 𑐖𑐸𑐮 𑐟𑐬 𑐡𑑂𑐫𑑅𑐟𑐫𑐎𑐾 𑐥𑑂𑐫𑐵𑐏𑑄 𑐏𑑂𑐰𑐵𑑃𑐫𑑂 𑐩𑐰𑑅 𑑋 𑐮𑑂𑐴𑐸𑐸𑐫𑐾 𑐩𑐦𑐸 𑑋

𑐐𑐞𑐫𑐵 𑐦𑐸𑐎𑑂𑐎 𑐩𑐣𑐹𑐟 𑐀𑐖𑐹 𑐔𑐵𑐫𑐵𑑅 𑐩𑐏𑐸𑐠𑐾 𑐖𑐸𑐮 𑐢𑐎𑐵𑑅 𑐁𑐟𑑂𑐟𑐾 𑐔𑐵𑐮 𑑋 𑐥𑑂𑐫𑐵𑐏𑑄 𑐮𑑂𑐴𑐸𑐫𑐾𑐐𑐸 𑐠𑐵𑐫𑑂 𑐫𑐵𑐎𑐥𑐵 𑐔𑑂𑐰𑐫𑑂 𑐟𑐫𑐵𑐟𑑅𑐐𑐸 𑐕𑐐𑐹 𑐂𑐮𑐵𑐩𑐫𑑂 𑐣𑐰𑐡𑐸𑐬𑑂𑐐𑐵 𑐐𑐞 𑐥𑑂𑐫𑐵𑐏𑑄𑐫𑐵 𑐥𑐾𑐩𑑂𑐴 𑐡𑐵𑐐𑐷𑐟 𑐠𑑅𑐐𑐸 𑐟𑐵𑐣𑑂𑐟𑑂𑐬𑐶𑐎 𑐱𑐎𑑂𑐟𑐶 𑐧𑑂𑐫𑐵𑑃𑐔𑐵 𑐖𑐸𑐫𑐵 𑐥𑑂𑐫𑐏𑐾 𑐥𑑂𑐫𑐩𑑂𑐴 𑐔𑑂𑐰𑐣𑐵 𑐥𑑂𑐫𑐵𑐏𑑄 𑐏𑑂𑐰𑐵𑑃𑐫𑑂 𑐩𑐰𑐫𑐾𑐎𑐵𑑅 𑐧𑐶𑐫𑐵 𑐔𑑂𑐰𑑄𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐳𑑂𑐰𑑅𑐧𑐮𑐫𑑂 𑐂𑐮𑐵𑐩𑐫𑑂 𑐧𑑂𑐫𑐵𑑄𑐔𑐵 𑐏𑐣𑐾𑐰𑑄 𑐰 𑐴𑐾 𑐧𑑂𑐫𑐵𑑄𑐔𑐵 𑐖𑐸𑐂 𑐢𑐎𑐵𑑅 𑐡𑑂𑐰𑐬𑐥𑐵𑐮𑑄 𑐏𑐜𑑂𑐐𑑄 𑐎𑐫𑐵𑑅 𑐳𑑂𑐫𑐵𑐣𑐵 𑐧𑐶𑐫𑐰𑑄 𑐟𑐶𑐣𑐶 𑐥𑑂𑐫𑐵𑐏𑑄 𑐏𑑂𑐰𑐵𑑃𑐫 𑐰𑐫𑐾𑐎𑐵 𑐥𑑂𑐫𑐵𑐏𑑄 𑐮𑑂𑐴𑐸𑐫𑐾𑐦𑐟 𑐢𑐵𑑅𑐐𑐸 𑐎𑐶𑐰𑐡𑐣𑑂𑐟𑐷 𑐡𑐸 𑑋

𑐣𑐷𑐮𑐧𑐵𑐬𑐵𑐴𑐷 𑐐𑐞𑐫𑐵 𑐡𑑂𑐫𑑅𑐟𑐫𑑂𑐎𑐾 𑐡𑐸𑐐𑐸 𑐱𑐎𑑂𑐟𑐶 𑐏𑐣𑐵𑑅 𑐣𑐰𑐡𑐸𑐬𑑂𑐐𑐵 𑐐𑐞 𑐧𑑀𑐜𑐾 𑐥𑑂𑐫𑐵𑐏𑑄 𑐮𑑂𑐴𑐸𑐂𑐎𑐾𑐟 𑐰𑑅𑐳𑐵𑑄 𑐩𑐴𑐵𑐮𑐎𑑂𑐲𑑂𑐩𑐷 𑐡𑑂𑐫𑑅𑐫𑐵𑐠𑐵𑐫𑑂 𑐩𑐰𑑄𑐐𑐸 𑐏𑑅 𑐢𑐂𑐐𑐸 𑐢𑐵𑐥𑐹 𑐡𑐸 𑑋 𑐋𑐟𑐶𑐴𑐵𑐳𑐶𑐎 𑐣𑐷𑐮𑐧𑐵𑐬𑐵𑐴𑐷 𑐐𑐞 𑐥𑑂𑐫𑐵𑐏𑑄𑐫𑐵 𑐧𑐶𑐱𑐾𑐲𑐟𑐵 𑐫𑐎𑑂𑐰 𑐡𑐸 𑑋 𑐡𑐿𑐧𑐷𑐱𑐎𑑂𑐟𑐶𑐫𑐵 𑐬𑐹𑐥𑐫𑑂 𑐖𑐣𑐩𑐵𑐣𑐳𑐫𑑂 𑐥𑐸𑐖𑐵 𑐫𑐵𑐣𑐵𑐔𑑂𑐰𑑄𑐐𑐸 𑐋𑐟𑐶𑐴𑐵𑐳𑐶𑐎 𑐐𑐞 𑐥𑑂𑐫𑐵𑐏𑐣𑐫𑑂 𑐥𑑂𑐫𑐵𑐏𑑄 𑐮𑑂𑐴𑐸𑐂𑐥𑐶𑑄 𑐩𑐣𑐹𑐟 𑐠𑑁𑑄𑐎𑐣𑑂𑐴𑐫𑑂 𑑖𑑕, 𑑗𑑐 𑐡𑑃𑐫𑐵 𑐧𑐸𑐬𑐵𑐥𑐶𑑄 𑐖𑐸𑐫𑐾 𑐢𑐸𑑄𑐎𑐮 𑑋

𑐋𑐟𑐶𑐴𑐵𑐳𑐶𑐎 𑐰 𑐢𑐵𑐬𑑂𑐩𑐶𑐎 𑐁𑐳𑑂𑐠𑐵 𑐀𑐮𑐾 𑐰𑑀𑐜𑐾 𑐡𑐾𑐫𑐵 𑐂𑐖𑑂𑐖𑐟 𑐥𑑂𑐬𑐟𑐶𑐳𑑂𑐠𑐵𑐫𑐵 𑐧𑐶𑐔𑐵𑑅 𑐫𑐵𑐣𑐵 𑐁𑐟𑐎𑑄 𑐣𑑂𑐴𑑂𑐫𑐵𑐣𑐵 𑐔𑑂𑐰𑑄𑐐𑐸 𑐐𑐞𑐥𑑂𑐫𑐵𑐏𑑄 𑐐𑐞𑐫𑐵 𑐳𑐸𑑄 𑐳𑐡𑐳𑑂𑐫 𑐳𑐶𑐟𑐎𑐶 𑐖𑐎 𑐳𑐷𑐩𑑂𑐴 𑐳𑐡𑐳𑑂𑐫𑐫𑐵 𑐠𑐵𑐳𑐫𑑂 𑐳𑐷𑐩𑑂𑐴 𑐩𑐣𑐹𑐫𑐵 𑐖𑑅𑐩𑐢𑑂𑐫𑐾 𑐳𑐸𑑄 𑐕𑐩𑑂𑐴 𑐥𑐮𑐶𑐳𑑂𑐠𑐵 𑐫𑐵𑐣𑐵 𑐔𑐮𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵 𑐏𑐣𑐾𑐡𑐸 𑑋

𑐠𑐸𑐖𑑂𑐰𑑅𑐐𑐸 𑐋𑐟𑐶𑐴𑐵𑐳𑐶𑐎 𑐐𑐞𑐥𑑂𑐫𑐵𑐏𑑄𑐟 𑐫𑐎𑑂𑐰 𑐩𑐡𑐫𑐾 𑐢𑐸𑑄𑐎𑐮 𑑋 𑐐𑐸𑐐𑐸𑑄 𑐴𑐵𑐣𑑄 𑐔𑐮𑐫𑑂 𑐫𑐵𑐣𑐵𑐴𑑅𑐐𑐸 𑐣𑑄 𑐡𑐸 𑑋 𑐠𑑂𑐰 𑐣𑐷𑐮𑐧𑐬𑐵𑐴𑐷 𑐐𑐞 𑐥𑑂𑐫𑐵𑐏𑑄 𑐱𑐸𑐬𑐸 𑐖𑐹𑐳𑐵𑑄 𑐣𑐶𑐳𑐾𑑄 𑐁𑑅𑐟𑐎𑑄 𑐩𑐡𑐶𑐎𑑂𑐎 𑐔𑐮𑐫𑑂 𑐫𑐵𑐣𑐵𑐟𑐫𑐾 𑐦𑐸𑐐𑐸 𑐧𑑀𑐜𑐾𑐫𑐵 𑐖𑐣𑐟𑐵𑐟𑐫𑐐𑐸 𑐐𑑁𑐬𑐰𑐫𑐵 𑐏𑑃 𑐏𑑅 𑑋