𑐫𑐾𑑃 – 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑑂𑐠𑐵𑐣𑐷𑐫 𑐟𑐴𑐮𑐫𑑂 𑐧𑑂𑐰𑐎𑐾𑐐𑐸 𑐥𑐵𑐛𑑂𑐫𑐥𑐸𑐳𑑂𑐟𑐎 𑐡𑐫𑐾𑐎𑐾𑐟 𑐳𑐩𑐶𑐟𑐶 𑐳𑑂𑐰𑑄𑐐𑐸 𑐡𑐸𑑋 𑐫𑐾𑑃𑐩𑐣𑐥𑐵 𑐱𑐶𑐎𑑂𑐲𑐵 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐩𑑂𑐴𑐶𑐐𑑅 𑐔𑑂𑐰𑑄𑐐𑐸 𑐧𑐿𑐛𑐎𑑄 𑐠𑑂𑐰 𑐳𑐩𑐶𑐟𑐶 𑐐𑐛𑐣 𑐫𑐵𑑅𑐐𑐸 𑐏𑑅 𑑋

𑐕𑐐𑐹 𑐟𑐐𑐶𑑄𑐣𑐶𑐳𑐾𑑄 𑐔𑑂𑐫𑐵𑐐𑐹 𑐟𑐐𑐶𑑄 𑐟𑐎 𑐋𑐔𑑂𑐕𑐶𑐎 𑐰𑐶𑐲𑐫𑐫𑐵 𑐬𑐸𑐥𑐫𑑂 𑐡𑐸𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐵𑐛𑑂𑐫𑐎𑑂𑐬𑐩 𑐡𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐩𑐣𑐥𑐵𑐫𑐵 𑐱𑐶𑐎𑑂𑐲𑐵 𑐀𑐢𑐶𑐎𑐵𑐬𑐷 𑐣𑐶𑐬𑑂𑐩𑐮𑐵 𑐎𑐾𑐳𑐷𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐕𑐐𑐹 𑐳𑐩𑐶𑐟𑐶 𑐳𑑂𑐰𑑄𑐐𑐸 𑐡𑐸𑑋 𑐄𑐐𑐸 𑐳𑐩𑐶𑐟𑐶𑐂 𑐥𑑂𑐬𑐵.𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐴𑐬𑐶𑐨𑐎𑑂𑐟 𑐱𑑂𑐬𑐾𑐲𑑂𑐛 𑐰 𑐳𑐡𑐳𑑂𑐫 𑐳𑐔𑐶𑐰𑐫𑑂 𑐩𑑀𑐟𑐶𑐬𑐵𑐖 𑐏𑐣𑐵𑐮 𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋

𑐄𑐎𑐠𑑄 𑐴𑐾 𑐀𑐐𑑂𑐬𑐾𑐖𑐷 𑐰 𑐣𑐾𑐥𑐵𑐮𑐷 𑐰𑐶𑐲𑐫𑐫𑐵 𑐣𑐶𑑄𑐟𑐶𑑄 𑐣𑐷𑐳𑑂𑐰𑑄𑐐𑐸 𑐩𑐾𑐐𑐸 𑐳𑐩𑐶𑐟𑐶𑐂 𑐎𑐾𑐳𑐷 𑐴𑐾 𑐀𑐢𑑂𑐫𑐎𑑂𑐲 𑐖𑐹𑐐𑐸 𑐡𑐸𑐳𑐵 𑐡𑐸𑐖𑐮𑐫𑑂 𑐥𑑂𑐬𑐵.𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫, 𑐩𑐡𑐣𑐬𑐵𑐖 𑐩𑐵𑐣𑐣𑑂𑐢𑐬, 𑐩𑐵𑐢𑐰 𑐑𑐶𑐩𑐶𑐬𑐾, 𑐣𑐵𑐟𑐷𑐎𑐵𑐖𑐷 𑐩𑐴𑐬𑑂𑐖𑐣 𑐰 𑐖𑑂𑐘𑐵𑐣𑐧𑐴𑐵𑐡𑐸𑐬 𑐀𑐢𑐶𑐎𑐵𑐬𑐷𑐥𑐶𑑄 𑐔𑑂𑐰𑐣𑐵𑐡𑐷𑐐𑐸 𑐡𑐸𑑋 𑐳𑐡𑐳𑑂𑐫 𑐳𑐔𑐶𑐰𑐫𑑂 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐀𑐢𑐶𑐎𑐺𑐟 𑐟𑐵𑐬𑐵𑐥𑐟𑐶 𑐏𑐬𑐾𑐮 𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋

𑐄𑐐𑐸 𑐳𑐩𑐶𑐟𑐶𑐫𑐵𑐟 𑐫𑐾𑑃 𑐩𑐣𑐥𑐵 𑐡𑐸𑐣𑐾 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐳𑐵𑐩𑐸𑐡𑐵𑐫𑐶𑐎 𑐰 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫𑐫𑐵 𑐟𑐐𑐶𑑄 𑐕𑐐𑐹 𑐣𑐶𑐳𑐾𑑄 𑐔𑑂𑐫𑐵𑐐𑐹 𑐟𑐎𑐫𑐵 𑐥𑐵𑐛𑑂𑐫𑐎𑑂𑐬𑐩 𑐡𑐫𑐾𑐎𑐾𑐐𑐸 𑐖𑐶𑐩𑑂𑐩𑐾𑐰𑐵𑐬𑐷 𑐧𑐶𑐄𑐐𑐸 𑐡𑐸𑑋 𑐳𑐦𑐹 𑐔𑑂𑐰𑐫𑐾𑐐𑐸 𑐖𑑂𑐫𑐵 𑐎𑐵𑐬𑑂𑐟𑐶𑐎𑐫𑐵 𑐣𑐶𑐐𑐹𑐐𑐸 𑐰𑐵𑐮𑑄𑐣𑐶𑐳𑐾𑑄 𑐱𑐸𑐬𑐸 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐀𑐢𑐶𑐎𑐺𑐟 𑐏𑐬𑐾𑐮𑑄 𑐱𑐿𑐎𑑂𑐲𑐶𑐎 𑐳𑐟𑑂𑐬 𑑒𑑐𑑗𑑖 𑐣𑐶𑐳𑐾𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐥𑑂𑐬𑐟𑑂𑐫𑐾𑐎 𑐰𑐶𑐡𑑂𑐫𑐵𑐬𑑂𑐠𑐷𑐫𑐵 𑐮𑑂𑐴𑐵𑐟𑐫𑑂 𑐠𑑂𑐫𑐣𑐷𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸 𑑋

𑐰𑐂𑐐𑐸 𑐱𑐿𑐎𑑂𑐲𑐶𑐎 𑐳𑐟𑑂𑐬𑑄𑐣𑐶𑐳𑐾𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑐵𑐟 𑐣𑐶𑑅𑐱𑐸𑐮𑑂𑐎 𑐰 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫𑐫𑐵𑐟 𑐱𑐸𑐮𑑂𑐎 𑐥𑐸𑐮𑐵𑑅 𑐳𑐦𑐹 𑐄𑐥𑐮𑐧𑑂𑐢 𑐫𑐵𑐎𑐾𑐐𑐸 𑐏𑑃 𑐣𑑄 𑐏𑐬𑐾𑐮𑑄 𑐎𑐣𑐵𑐡𑐶𑐮 𑑋

𑐏𑐬𑐾𑐮𑐫𑐵 𑐎𑐠𑑄 𑐥𑐵𑐛𑑂𑐫𑐎𑑂𑐬𑐩 𑐡𑐫𑐾𑐎𑐾𑐟 𑑖𑑐 𑐣𑑂𑐴𑐸 𑐎𑐵𑐂 𑑋 𑐱𑐶𑐎𑑂𑐲𑐵 𑐳𑐩𑐶𑐟𑐶𑑄 𑐄𑐎𑐶𑐫𑐵𑐟 𑐥𑐵𑐳 𑐫𑐵𑐣𑐵𑑅 𑐎𑐵𑐬𑑂𑐫𑐥𑐵𑐮𑐶𑐎𑐵𑑄 𑐀𑐣𑐸𑐩𑑀𑐡𑐣 𑐫𑐵𑐫𑐾𑐢𑐸𑑄𑐎𑐵𑑅 𑐥𑐵𑐛𑑂𑐫𑐥𑐸𑐳𑑂𑐟𑐎 𑐔𑑂𑐰𑐫𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐂 𑑋 𑐥𑐵𑐛𑑂𑐫𑐎𑑂𑐬𑐩𑐫𑑂 𑐫𑐾𑑃𑐫𑐵 𑐥𑐾𑐱𑐵–𑐰𑑂𑐫𑐰𑐳𑐵𑐫, 𑐢𑐬𑑂𑐩, 𑐎𑐮𑐵, 𑐳𑑄𑐳𑑂𑐎𑐺𑐟𑐶, 𑐨𑑁𑐐𑑀𑐮𑐶𑐎 𑐀𑐰𑐳𑑂𑐠𑐶𑐟𑐶, 𑐰𑐵𑐳𑑂𑐟𑐸𑐎𑐮𑐵, 𑐩𑐹𑐬𑑂𑐟𑐶𑐎𑐮𑐵, 𑐥𑐬𑑂𑐫𑐚𑐣 𑐠𑐾𑑄𑐖𑑂𑐫𑐵𑑅𑐐𑐸 𑐰𑐶𑐲𑐫𑐫𑐵𑐟 𑐡𑐸𑐠𑑂𑐫𑐵𑐎𑐷 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑑖𑑐 𑐰 𑐳𑑂𑐰𑐣𑐶𑐐𑑅𑐫𑐵 𑑔𑑐 𑐥𑑂𑐬𑐟𑐶𑐱𑐟 𑐰𑐶𑐲𑐫𑐰𑐳𑑂𑐟𑐸 𑐎𑑅𑐑𑐵𑐣𑐵𑑅 𑐥𑐵𑐛𑑂𑐫𑐥𑐸𑐳𑑂𑐟𑐎 𑐡𑐫𑐾𑐎𑐾𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋