𑐰𑐶𑐖𑐫𑐎𑐺𑐲𑑂𑐞 𑐱𑑂𑐬𑐾𑐲𑑂𑐛 𑐣𑐾𑐥𑐵𑐮 𑐳𑑄𑐰𑐟𑑂 𑐢𑐂𑐐𑐸 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐳𑑄𑐰𑐟𑑂 𑐩𑐏𑐸𑑋 𑐠𑐠𑐾 𑐢𑐎𑐵𑑅 𑐣𑑂𑐴𑑂𑐫𑐵𑐎𑑂𑐰 𑐨𑐵𑐲𑐞 𑐧𑐶𑐄𑐳𑐵 𑐣𑐾𑐰𑐵𑑅 𑐖𑐣𑐩𑐵𑐣𑐳𑐫𑑂 𑐖𑐎 𑐩𑐏𑐸, 𑐐𑐿𑐬 𑐣𑐾𑐰𑐵𑑅 𑐖𑐣𑐩𑐵𑐣𑐳𑐫𑑂 𑐣𑑄 𑐠𑑂𑐰 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐳𑑄𑐰𑐟𑑂 𑐏𑑅 𑐢𑐎𑐵𑑅 𑐡𑐂𑐔𑑂𑐰𑐣 𑑋 𑐄𑐎𑐠𑑄 𑐴𑐾 𑐢𑐵𑐥𑐹 𑐥𑐶𑐴𑐵𑑃 𑐰𑐂𑐐𑐸 𑐰 𑐎𑑂𑐬𑐶𑐫𑐵 𑐥𑑂𑐬𑐟𑐶𑐎𑑂𑐬𑐶𑐫𑐵 𑐖𑐸𑐂𑐐𑐸 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐸𑑋 𑐀𑐠𑐾 𑐴𑐾 𑐁𑑅 𑐳𑐵𑐫𑐵𑑅, 𑐩𑐟𑐫𑐵𑑅, 𑐫𑑃𑐫𑐵𑑅 𑐣𑑄 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐏𑑅 𑐢𑐂𑐐𑐸 𑐀𑐨𑐶𑐰𑑂𑐫𑐎𑑂𑐟𑐶 𑐠𑐷𑐠𑐷 𑐳𑐘𑑂𑐔𑐵𑐬 𑐩𑐵𑐢𑑂𑐫𑐩𑐫𑑂 𑐏𑐣𑐾𑐡𑐸𑐐𑐸 𑐡𑐸 𑑋 𑐗𑐷𑐳𑑄 𑐣𑐾𑐥𑐵𑐮 𑐨𑐵𑐲𑐵, 𑐣𑐾𑐥𑐵𑐮 𑐳𑑄𑐰𑐟𑑂, 𑐣𑐾𑐥𑐵𑐮 𑐮𑐶𑐥𑐶 𑐢𑐂𑐐𑐸 𑐏𑑃𑐐𑑂𑐰𑑅 𑐴𑐾 𑐕𑑂𑐫𑐮𑐵 𑐰𑐫𑐵𑐔𑑂𑐰𑐣𑐵𑐐𑐸 𑐡𑐸𑑋 𑐗𑐷 𑐀𑐐𑑂𑐬𑐖𑐥𑐶𑐳𑑄 𑐣𑑄 𑐄𑐎𑐠𑑄 𑐴𑐾 𑐕𑑂𑐫𑐮𑐵 𑐰𑐫𑐵𑐔𑑂𑐰𑑄𑐐𑐸 […]
