𑐳𑐸𑐬𑐾𑐱 𑐎𑐶𑐬𑐞 𑐳𑑂𑐩𑐺𑐟𑐶 𑐐𑑂𑐬𑐣𑑂𑐠 𑐥𑐶𑐴𑐵𑑃 𑐰𑐮

𑐣𑐾𑐥𑐵𑐮𑐨𑐵𑐲𑐵𑐫𑐵 𑐧𑐬𑐶𑐲𑑂𑐛 𑐥𑐟𑑂𑐬𑐎𑐵𑐬𑐮𑐶𑐳𑐾𑑄 𑐨𑐵𑐲𑐵 𑐁𑐫𑑀𑐐𑐫𑐵 𑐩𑐵𑐣𑐣𑐷𑐫 𑐡𑐸𑐖𑑅 𑐳𑐸𑐬𑐾𑐱 𑐎𑐶𑐬𑐞 𑐩𑐵𑐣𑐣𑑂𑐢𑐬 𑐩𑐡𑐸𑐐𑐸𑐮𑐶𑑄 𑐰𑐫𑐎𑑅𑐫𑐵𑐟 𑐔𑐷𑐬𑐎𑐵𑐮𑐟𑐎 𑐮𑐸𑐩𑑄𑐎𑐵𑑅 𑐟𑐫𑐾𑐐𑐸 𑐮𑐎𑐳 𑐧𑑂𑐰𑐮𑑄𑐎𑐵𑑅 𑐨𑐵𑐖𑐸 𑐳𑐸𑐬𑐾𑐱 𑐎𑐶𑐬𑐞𑐫𑐵 𑐖𑐷𑐰𑐣𑐐𑐵𑐠𑐵𑐫𑐵 𑐮𑐶𑐳𑐾𑑄 𑐰𑐫𑐎𑐮𑑄 𑐡𑐾𑐫 𑐰 𑐳𑐩𑐵𑐖𑐥𑑂𑐬𑐟𑐶 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑑅𑐑𑐵𑐣𑐵𑑅 𑐳𑐸𑐬𑐾𑐱 𑐎𑐶𑐬𑐞 𑐳𑑂𑐩𑐺𑐟𑐶 𑐐𑑂𑐬𑐣𑑂𑐠 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐡𑐸 𑑋

𑐣𑐾.𑐳𑑄. 𑑑𑑑𑑔𑑖 𑐧𑐕𑐮𑐵𑐠𑑂𑐰 𑐥𑑄𑐔𑐩𑐶 𑐧𑐿𑐱𑐵𑐏 𑑙 𑐐𑐟𑐾 𑐧𑐸𑐢𑐰𑐵𑑅 𑐥𑑂𑐬𑐖𑑂𑐘𑐵 𑐨𑐰𑐣𑐫𑑂 𑐖𑐹𑐐𑐸 𑐠𑐸𑐐𑐸 𑐳𑑂𑐩𑐺𑐟𑐶 𑐐𑑂𑐬𑐣𑑂𑐠 𑐨𑐶𑐎𑑂𑐲𑐸 𑐎𑑀𑐞𑑂𑐜𑐣𑑂𑐫 𑐩𑐴𑐵𑐳𑑂𑐠𑐰𑐷𑐬, 𑐀𑐐𑐷𑐰 𑐰𑐣𑐾𑐥𑐵𑐮𑐷, 𑐬𑐱𑑂𑐩𑐶𑐮𑐵 𑐥𑑂𑐬𑐖𑐵𑐥𑐟𑐶, 𑐜𑐵. 𑐥𑐸𑑂𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐣𑐺𑐥𑐾𑐣𑑂𑐡𑑂𑐬𑐮𑐵𑐮 𑐱𑑂𑐬𑐾𑐲𑑂𑐛, 𑐳𑐸𑐬𑐾𑐣𑑂𑐡𑑂𑐬𑐨𑐎𑑂𑐟 𑐱𑑂𑐬𑐾𑐲𑑂𑐛, 𑐳𑐸𑐬𑐖𑐰𑐷𑐬 𑐧𑐖𑑂𑐬𑐵𑐔𑐵𑐬𑑂𑐫, 𑐱𑑂𑐬𑐷𑐎𑐺𑐲𑑂𑐞 𑐩𑐴𑐬𑑂𑐖𑐣, 𑐳𑐰𑐶𑐣𑐵 𑐩𑐵𑐣𑐣𑑂𑐢𑐬, 𑐗𑐥𑐾𑐣𑑂𑐡𑑂𑐬 𑐨𑐸𑐳𑐵𑐮, 𑐮𑐎𑑂𑐎𑐷 𑐔𑑁𑐢𑐬𑐷 𑐮𑐐𑐵𑐫𑐟 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑐣𑑂𑐳𑑄 𑐳𑐵𑐬𑑂𑐰𑐖𑐣𑐶𑐎 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐡𑐧𑐹𑐫𑐵 𑐣𑐵𑐫𑑀 𑐣𑐺𑐥𑐾𑐣𑑂𑐡𑑂𑐬𑐮𑐵𑐮 𑐱𑑂𑐬𑐾𑐲𑑂𑐛𑐫𑐵 𑐳𑐨𑐵𑐣𑐵𑐫𑑀𑐳𑐸𑐂 𑐣𑑂𑐴𑑂𑐫𑐵𑑅𑐐𑐸 𑐠𑐸𑐐𑐸𑑂 𑐖𑑂𑐫𑐵𑐗𑑂𑐰𑐮𑐫𑑂 𑐡𑐧𑐹𑐫𑐵 𑐣𑑂𑐰𑐎𑐸 𑐳𑐸𑐬𑐾𑐣𑑂𑐡𑑂𑐬𑐨𑐎𑑂𑐟 𑐱𑑂𑐬𑐾𑐲𑑂𑐛𑑄 𑐮𑐳𑐎𑐸𑐳 𑐣𑑂𑐰𑐔𑐹 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑑅𑐫𑐵 𑐧𑐵𑐬𑐾 𑐡𑐧𑐹𑐫𑐵 𑐩𑐾𑐩𑑂𑐴 𑐣𑑂𑐰𑐎𑐹 𑐳𑐸𑐣𑐶𑐮 𑐩𑐴𑐬𑑂𑐖𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐟𑐶𑐳𑐬𑐵 𑐳𑐵𑐫𑐩𑐶 𑐰 𑐬𑐖𑐣𑐷 𑐩𑐶𑐮𑐵𑑄 𑐔𑐶𑐣𑐵𑐏𑑃 𑐰𑐵𑐔𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐠𑐸𑐎𑐠𑑄 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐨𑐸𑐥𑐾𑐣𑑂𑐡𑑂𑐬 𑐨𑐸𑐳𑐵𑐮, 𑐦𑑀𑐣𑐶𑐖𑐫𑐵 𑐣𑐵𑐫𑑅 𑐮𑐎𑑂𑐎𑐷 𑐔𑑁𑐢𑐬𑐷, 𑐄𑐡𑐾𑐣 𑐣𑑂𑐴𑐹 𑐳𑐵𑐫𑐩𑐶, 𑐥𑑂𑐬𑐵𑐖𑑂𑐘 𑐀𑐐𑐷𑐰 𑐰𑐣𑐾𑐥𑐵𑐮𑐷, 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐬𑐱𑑂𑐩𑐶𑐮𑐵 𑐥𑑂𑐬𑐖𑐵𑐥𑐟𑐶, 𑐬𑐵𑐖𑐾𑐣𑑂𑐡𑑂𑐬 𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛, 𑐨𑐶𑐎𑑂𑐲𑐸 𑐎𑑀𑐞𑑂𑐜𑐣𑑂𑐫 𑐩𑐴𑐵𑐳𑑂𑐠𑐰𑐷𑐬 𑐮𑐐𑐵𑐫𑐟𑐥𑐶𑐣𑑂𑐳𑑄 𑐩𑐡𑐸𑐩𑑂𑐴 𑐳𑐸𑐬𑐾𑐱 𑐎𑐶𑐬𑐞 𑐩𑐵𑐣𑐣𑑂𑐢𑐬𑐫𑐵 𑐰𑑂𑐫𑐎𑑂𑐟𑐶𑐟𑑂𑐰 𑐰 𑐫𑑀𑐐𑐡𑐵𑐣𑐫𑐵𑐟 𑐎𑑅𑐑𑐵𑐣𑐵𑑅 𑐔𑐬𑑂𑐔𑐵 𑐥𑐬𑐶𑐔𑐬𑑂𑐔𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐡𑐧𑐹𑐫𑐵 𑐩𑐴𑐵𑐳𑐔𑐶𑐰 𑐎𑐾𑐎𑐾 𑐩𑐵𑐣𑐣𑑂𑐢𑐬𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐠𑐸𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐀𑐣𑑂𑐟𑐫𑑂 𑐳𑐨𑐵𑐥𑐟𑐶 𑐣𑐺𑐥𑐾𑐣𑑂𑐡𑑂𑐬𑐮𑐵𑐮 𑐱𑑂𑐬𑐾𑐲𑑂𑐛𑑄 𑐠𑑅𑐐𑐸 𑐣𑐸𑐐𑑅 𑐏𑑃 𑐟𑐫𑐵 𑐳𑐨𑐵 𑐎𑑂𑐰𑐔𑐵𑐫𑐾𑐎𑐸𑐐𑐸 𑐏𑑅 𑑋

𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑐶𑐫 𑐡𑐧𑐹𑐫𑐵 𑐣𑐶𑐰𑐬𑑂𑐟𑐩𑐵𑐣 𑐣𑐵𑐫𑑅 𑐳𑐸𑐬𑐖𑐰𑐷𑐬 𑐧𑐖𑑂𑐬𑐵𑐔𑐵𑐬𑑂𑐫 𑐥𑑂𑐬𑐢𑐵𑐣 𑐳𑐩𑑂𑐥𑐵𑐡𑐎 𑐖𑐸𑐫𑐵 𑐥𑐶𑐠𑑄𑐐𑐸 𑐠𑐸𑐐𑐸 𑐐𑑂𑐬𑐣𑑂𑐠𑐫𑑂 𑐳𑐩𑑂𑐥𑐵𑐡𑐎𑐥𑐶𑑄 𑐳𑐸𑐣𑐶𑐮 𑐩𑐴𑐬𑑂𑐖𑐣, 𑐎𑐾𑐎𑐾 𑐩𑐵𑐣𑐵𑐣𑑂𑐢𑐬, 𑐬𑐵𑐖𑐸 𑐣𑐵𑐥𑐶𑐟, 𑐄𑐟𑑂𑐟𑐩 𑐎𑐸𑐩𑐵𑐬 𑐱𑑂𑐬𑐾𑐲𑑂𑐛𑐥𑐶𑑄 𑐖𑐸𑐫𑐵𑐡𑐷𑐐𑐸 𑐏𑑅 𑑋 𑐡𑐧𑐹𑐫𑐵 𑐣𑑂𑐰𑐎𑐹 𑐳𑐸𑐬𑐾𑐣𑑂𑐡𑑂𑐬𑐨𑐎𑑂𑐟 𑐱𑑂𑐬𑐾𑐲𑑂𑐛 𑐳𑑄𑐫𑑀𑐖𑐎 𑐖𑐸𑐫𑐵 𑐠𑐸𑐐𑐸 𑐳𑑂𑐩𑐺𑐟𑐶 𑐐𑑂𑐬𑐣𑑂𑐠 𑐥𑐶𑐠𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅𑐳𑐵 𑐰𑑂𑐫𑐰𑐳𑑂𑐠𑐵𑐥𑐎𑐫𑑂 𑐧𑐵𑐧𑐸𑐎𑐵𑐖𑐷 𑐱𑑂𑐬𑐾𑐲𑑂𑐛 𑐰 𑐳𑐸𑐣𑐶𑐟𑐵 𑐩𑐴𑐬𑑂𑐖𑐣𑐥𑐶𑑄 𑐔𑑂𑐰𑐣𑐵𑑅 𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋