𑐮𑐶𑐥𑐶 𑐐𑐸𑐠𑐶𑐫𑐵 𑐬𑐘𑑂𑐖𑐣𑐵 𑐮𑐶𑐥𑐶 𑐎𑐶𑐥𑐵 𑐔𑑂𑐰𑐖𑑂𑐫𑐵 𑐎𑐵𑐳𑐵

𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑑔𑑂𑐬𑑂𑐬𑑖 𑐡𑑃 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐰𑑄𑐐𑐸 𑐱𑐣𑐶𑐰𑐵𑑅 𑐕𑐣𑑂𑐴𑐸𑑄 𑐴𑐾 𑐳𑑂𑐰𑑄𑐐𑐹 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐖𑐸𑐮 𑑋 𑐣𑐾𑐥𑐵𑑅𑐫𑐵 𑐩𑑁𑐮𑐶𑐎 𑐮𑐶𑐥𑐶 𑐳𑑄𑐬𑐎𑑂𑐲𑐞, 𑐳𑑄𑐰𑐡𑑂𑐬𑑂𑐢𑐣 𑐰 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐟𑐵𑐟𑐸𑐣𑐵 𑐣𑐷𑐳𑑂𑐰𑐣𑐵𑐟𑑅𑐐𑐸 𑐮𑐶𑐥𑐶 𑐐𑐸𑐠𑐶 𑑔𑑖 𑐡𑑃 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐬 𑐘𑑂𑐖𑐣𑐵 𑐮𑐶𑐥𑐶 𑐎𑐶𑐥𑐵 𑐔𑑂𑐰𑐖𑑂𑐫𑐵 𑐎𑐵𑐳𑐵, 𑐣𑐾𑐰𑐵𑑅 𑐖𑐵𑐐𑐬𑐞𑐫𑑂 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵𑐫𑐵 𑐨𑐹𑐩𑐶𑐎𑐵 𑐰𑐶𑐲𑐫𑐫𑑂 𑐐𑑀𑐲𑑂𑐛𑐶 𑐰 𑐮𑐶𑐥𑐶 𑐥𑑂𑐬𑐰𑐡𑑂𑐬𑑂𑐢𑐣𑐫𑑂 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐡𑐷𑐥𑐶𑑄𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐣𑑂𑐴𑐵𑐥𑐵𑑄𑐐𑐸 𑐖𑑂𑐫𑐵𑐗𑑂𑐰𑑅𑐎𑐠𑑄 𑐖𑐣𑐧𑐴𑐵𑑅 𑐡𑑂𑐫𑑅𑐫𑐵 𑐥𑐬𑐶𑐳𑐬𑐫𑑂 𑐠𑐷𑐠𑐷 𑐧𑑂𑐰𑐣𑐾 𑐎𑐸𑐠𑐶𑐫𑐵 𑐧𑑂𑐰𑑃𑐩𑐶𑐥𑐶𑐣𑐶 𑐡𑐠𑐸𑐂 𑐣𑐾𑐥𑐵𑐮 𑐮𑐶𑐥𑐶 𑐎𑐶𑐥𑐵 𑐔𑑂𑐰𑐖𑑂𑐫𑐵 𑐎𑐵𑐳𑐵 𑐖𑐹𑐐𑐸 𑐏𑑅 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐳𑐴𑐎𑐵𑐬𑑂𑐫𑐫𑑂 𑐩𑐴𑐵𑐣𑐐𑐬 𑐡𑐸𑐣𑐾𑐫𑐵 𑐳𑐵𑐩𑐸𑐡𑐵𑐫𑐶𑐎 𑐰 𑐳𑑄𑐳𑑂𑐠𑐵𑐐𑐟 𑐧𑑂𑐰𑐣𑐾 𑐎𑐸𑐠𑐶𑐫𑐵 𑐧𑑂𑐰𑑃𑐩𑐶𑐥𑐶𑐣𑐶 𑐡𑐠𑐸𑐂 𑐖𑐹𑐐𑐸 𑐮𑐶𑐥𑐶 𑐎𑐶𑐥𑐵 𑐔𑑂𑐰𑐖𑑂𑐫𑐵 𑐎𑐵𑐳𑐵𑐫𑑂 𑐣𑐷𑐥𑑂𑐫𑑄𑐐𑐹 𑐧𑑂𑐰𑐣𑐾 𑐎𑐸𑐠𑐶𑐫𑐵 𑐧𑑂𑐰𑑃𑐩𑐶𑐥𑐶𑑄𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋

𑐣𑐾𑐥𑐵𑑅𑐫𑐵 𑐠𑑅𑐐𑐸 𑐴𑐾 𑐩𑑁𑐮𑐶𑐎 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐳𑑄𑐬𑐎𑑂𑐲𑐞, 𑐳𑑄𑐰𑐡𑑂𑐬𑑂𑐢𑐣 𑐰 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐧𑑂𑐰𑐣𑐾 𑐎𑐸𑐠𑐶𑐫𑐵 𑐧𑑂𑐰𑑃𑐩𑐶𑐥𑐶𑑄𑐟 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐎𑐶𑐥𑐵𑐧𑐵𑐬𑐾 𑐠𑐸𑐂𑐎𑐾𑐐𑐸, 𑐳𑑂𑐫𑐣𑐾 𑐎𑐣𑐾 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐄𑐐𑐸 𑐎𑐵𑐳𑐵 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐏𑑅 𑑋 𑐕𑐐𑐹 𑐧𑑂𑐰𑐣𑐾 𑐎𑐸𑐠𑐶𑐥𑐵𑐏𑐾𑑄 𑐳𑑂𑐰𑐩𑑂𑐴 𑐧𑑂𑐰𑑃𑐩𑐶𑐥𑐶𑑄 𑐡𑐸𑐠𑑂𑐫𑐵𑐎𑐵𑑅 𑐩𑑄𑐎𑐵𑑅𑐎𑐠𑑄 𑐕𑐥𑐵𑑅 𑐎𑐶𑐥𑐵𑐣𑐵𑐥𑑄 𑐬𑐘𑑂𑐖𑐣𑐵 𑐮𑐶𑐥𑐶 𑐔𑑂𑐰𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐎𑐵𑐬𑑂𑐫𑐰𑐵𑐴𑐎 𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐮𑐶𑐥𑐶 𑐎𑐶𑐥𑐵 𑐔𑑂𑐰𑐖𑑂𑐫𑐵 𑐎𑐵𑐳𑐵𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄 𑐳𑐎𑐮 𑐧𑑂𑐰𑑃𑐩𑐶𑐥𑐶𑑄𑐟 𑐮𑐸𑐩𑐣𑑂𑐟𑐶 𑐔𑐶𑑄𑐮𑐶𑐳𑐾𑑄 𑐬𑐘𑑂𑐖𑐣𑐵 𑐮𑐶𑐥𑐶, 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐰𑐬𑑂𑐞𑐩𑐵𑐮𑐵, 𑐖𑑂𑐰𑐖𑑂𑐰𑐮𑐥𑐵 𑐱𑐶𑐰𑐰𑐶𑐮𑐵𑐳 𑐳𑐦𑐹 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐰𑐫𑐵𑑄 𑐮𑐶𑐥𑐵 𑐎𑐾𑐱𑐔𑐣𑑂𑐡𑑂𑐬 𑐥𑐵𑐬𑐵𑐰𑐬𑑂𑐟 𑐩𑐴𑐵𑐰𑐶𑐴𑐵𑐬 𑐂𑐟𑐸𑑄𑐧𑐴𑐵𑐮𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐾𑐲 𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐮𑐶𑐳𑐾𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐳𑑄𑐬𑐎𑑂𑐲𑐎 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐮𑐶𑐥𑐶 𑐎𑐶𑐥𑐵 𑐔𑑂𑐰𑐖𑑂𑐫𑐵 𑐎𑐵𑐳𑐵𑐫𑑂 𑐄𑐟𑑂𑐎𑐺𑐲𑑂𑐚 𑐖𑐹𑐥𑐶𑑄𑐟 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐎𑐵𑐳𑐵𑐫𑑂 𑐱𑑂𑐬𑐷 𑐐𑐷𑐟𑐵𑐩𑐵𑐟𑐵 𑐩𑐵𑐢𑑂𑐫𑐵𑐩𑐶𑐎 𑐰𑐶𑐡𑑂𑐫𑐵𑐮𑐫 𑐣𑑂𑐴𑐵𑐥, 𑐱𑑄𑐎𑐵𑐬𑐷 𑐳𑑂𑐎𑐸𑐮 𑐮𑐶𑐄, 𑐧𑐵𑐮𑐧𑐵𑐚𑐶𑐎𑐵 𑐰𑐶𑐡𑑂𑐫𑐵𑐮𑐫 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐏𑑅𑐳𑐵 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾 𑐎𑐸𑐠𑐶 𑐰 𑐐𑑂𑐫𑐵𑐮𑐾𑐎𑑂𑐳𑐷 𑐳𑑂𑐎𑐸𑐮𑑄 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐏𑑅 𑑋 𑐰𑐫𑑂𑐎𑑅𑐥𑐶𑑄𑐟 𑐰𑐶𑐱𑐾𑐲 𑐥𑐵𑐴𑐵𑑄 𑐩𑐮𑑂𑐮𑑄 𑐳𑐶𑐬 𑐥𑐵𑑅 𑐰 𑐐𑐸𑐠𑐶𑐫𑐵 𑐣𑐵𑐫𑑅 𑐣𑐶𑐬𑐘𑑂𑐖𑐣 𑐟𑐵𑐩𑑂𑐬𑐵𑐎𑐵𑐬𑑄 𑐡𑐾𑐕𑐵 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐠𑐸𑐐𑐸 𑐎𑐵𑐳𑐵𑐫𑑂 𑐮𑐶𑐥𑐶 𑐐𑐸𑐠𑐶𑐫𑐵 𑐥𑑂𑐬𑐵𑐖𑑂𑐘𑐮𑐶𑐳𑐾𑑄 𑐄𑐥𑐥𑑂𑐬𑐵𑐢𑑂𑐫𑐵𑐥𑐎 𑐱𑐬𑐡 𑐎𑐳𑐵𑑅, 𑐰𑐬𑐶𑐲𑑂𑐛 𑐎𑑂𑐫𑐵𑐮𑐶𑐐𑑂𑐬𑐵𑐦𑐬 𑐁𑐱𑐵𑐎𑐵𑐖𑐷 𑐠𑐎𑐸, 𑐣𑐾𑐥𑐵𑐮 𑐮𑐮𑐶𑐟𑐎𑐮𑐵 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐳𑑁𑐬𑐐𑑄𑐐𑐵 𑐡𑐬𑑂𑐱𑐣𑐢𑐵𑐬𑐷 𑐰 𑐫𑑀𑐒𑑂𑐐 𑐥𑐶𑐎𑐵𑐳𑑀 𑐫𑐵 𑐣𑐵𑐫𑑅𑐮𑐶𑐳𑐾𑑄 𑐥𑑂𑐬𑐵𑐢𑑂𑐫𑐵𑐥𑐎 𑐀𑐖𑐫 𑐡𑐾𑐳𑐵𑐬 𑐣𑐶𑐬𑑂𑐞𑐵𑐫𑐎𑐎𑐠𑑄 𑐔𑑂𑐰𑐣𑐵𑐡𑐷𑐐𑐸 𑐏𑑅 𑑋

𑐩𑐾𑐐𑐸 𑐖𑑂𑐫𑐵𑐗𑑂𑐰𑑅𑐎𑐠𑑄 ‘𑐣𑐾𑐰𑐵𑑅 𑐖𑐵𑐐𑐬𑐞𑐫𑑂 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵𑐫𑐵 𑐨𑐹𑐩𑐶𑐎𑐵’ 𑐰𑐶𑐲𑐫𑐫𑑂 𑐖𑐹𑐐𑐸 𑐐𑑀𑐲𑑂𑐛𑐶𑐂 𑐎𑐣𑑂𑐚𑐾𑐣𑑂𑐚 𑐎𑑂𑐬𑐶𑐫𑐚𑐬 𑐳𑐣𑑂𑐢𑑂𑐫𑐵 𑐧𑑂𑐫𑐵𑐘𑑂𑐖𑐸𑑄 𑐥𑑂𑐬𑐳𑑂𑐟𑐸𑐟𑐶 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐰𑐶𑐱𑐾𑐲 𑐥𑐵𑐴𑐵𑑄 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐣𑐾𑐥𑐵𑐮𑐨𑐵𑐲𑐵, 𑐮𑐶𑐥𑐶, 𑐳𑑄𑐳𑑂𑐎𑐺𑐟𑐶𑐫𑐵𑐟 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮𑐫𑑂 𑐎𑐣𑑂𑐚𑐾𑐣𑑂𑐚 𑐡𑐫𑐾𑐎𑐵𑑅 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐫𑐵𑐫𑐾 𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮𑐥𑐵𑐏𑐾𑑄 𑐰𑐶𑐱𑐾𑐲 𑐫𑐵𑐣𑐵𑑅 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵𑐫𑐵𑐟 𑐬𑐵𑐖𑐣𑐷𑐟𑐶, 𑐳𑐵𑑄𑐳𑑂𑐎𑐺𑐟𑐶𑐎 𑐬𑐸𑐥𑑄 𑐁𑐎𑐬𑑂𑐲𑐶𑐟 𑐫𑐵𑐣𑐵𑐔𑑂𑐰𑑄𑐐𑐸 𑐣𑑂𑐴𑑂𑐫𑐠𑑃𑐳𑐾𑑄 𑐠𑐸𑐎𑐶𑐫𑐵𑐟 𑐳𑐡𑐸𑐥𑐫𑑀𑐐 𑐫𑐵𑐣𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾 𑐩𑐵𑑅𑐐𑐸 𑐢𑐵𑐬𑐞𑐵 𑐟𑐫𑐵𑐡𑐶𑐮 𑑋

𑐡𑐎𑐮𑐫𑑂 𑐮𑐶𑐥𑐵𑑄𑐐𑐸 𑐖𑑂𑐫𑐵𑐗𑑂𑐰𑑅𑐎𑐠𑑄 𑐬 𑐘𑑂𑐖𑐣𑐵 𑐮𑐶𑐥𑐶𑐫𑐵 𑐳𑐸𑐔𑑄 𑐐𑑂𑐰𑐬𑑅 𑐟𑐫𑐵𑑅 𑐮𑐶𑐥𑐶 𑐥𑑂𑐬𑐰𑐡𑑂𑐬𑑂𑐢𑐣𑐫𑑂 𑐩𑐴𑐟𑑂𑐰𑐥𑐹𑐬𑑂𑐞 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐡𑐷𑐥𑐶𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑒𑑓 𑐰𑐜𑐵𑐀𑐢𑑂𑐫𑐎𑑂𑐲 𑐩𑐔𑐵𑐬𑐵𑐖𑐵 𑐩𑐴𑐬𑑂𑐖𑐣 𑐰 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑑𑑖 𑐰𑐜𑐵𑐀𑐢𑑂𑐫𑐎𑑂𑐲 𑐣𑐶𑐬𑑂𑐩𑐮𑐬𑐟𑑂𑐣 𑐱𑐵𑐎𑑂𑐫𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐐𑐸𑐠𑐶𑐫𑐵 𑐣𑐵𑐫𑑅 𑐟𑐵𑐩𑑂𑐬𑐵𑐎𑐵𑐬 𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑑅𑐥𑐶𑑄𑐟 𑐐𑐸𑐠𑐶𑐫𑐵 𑐡𑐵𑑄𑐨𑐬𑐶 𑐥𑑂𑐬𑐩𑐶𑐮𑐵 𑐟𑐵𑐩𑑂𑐬𑐵𑐎𑐵𑐬𑑄 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑐡𑐷𑐐𑐸 𑐏𑑅𑐳𑐵 𑐣𑐶𑐰𑐬𑑂𑐟𑐩𑐵𑐣 𑐣𑐵𑐫𑑅 𑐀𑐣𑐶𑐮 𑐳𑑂𑐠𑐵𑐥𑐶𑐟𑑄 𑐴𑐣𑐵𑐥𑑁 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋