𑐰𑐶𑐬𑐵𑐚𑐫𑐵 𑐔𑐶𑐢𑑄 𑐡𑐧𑐸𑐮𑐶𑐂 𑐥𑑂𑐬𑐡𑐷𑐥 𑐱𑐵𑐎𑑂𑐫

𑐰𑐶𑐬𑐵𑐚 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐐𑐸𑐠𑐶 (𑐰𑐶𑐬𑐵𑐚 𑐐𑐸𑐠𑐶𑑄) 𑐮𑐫𑑂𑐥𑐟𑐶𑐎𑑄 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 ‘𑐰𑐶𑐬𑐵𑐚 𑐔𑐶𑐢𑑄 𑐡𑐧𑐸𑐮𑐶’𑐂 𑐠𑐸𑐐𑐸𑐳𑐷 𑐰𑐶𑐬𑐵𑐚𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐰 𑐕𑑂𑐫𑐵𑐘𑑂𑐖𑐾 𑐥𑑂𑐬𑐡𑐷𑐥𑐬𑐟𑑂𑐣 𑐱𑐵𑐎𑑂𑐫𑐫𑐵 𑐫𑐵𑐎𑑅 𑐔𑐶𑐣𑐵𑐏𑑃 𑐰𑐵𑐔𑐣 𑐖𑑂𑐫𑐵𑐗𑑂𑐰𑑅 𑐖𑐸𑐮 𑑋 𑐡𑐧𑐸𑐮𑐶𑐂 𑐎𑐰𑐶 𑐱𑐵𑐎𑑂𑐫𑑄 𑐎𑐬𑐶𑐧 𑐣𑐷𑐣𑑂𑐫𑐵𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐔𑑂𑐰𑐫𑐵𑐡𑐷𑐐𑐸 𑐔𑐶𑐣𑐵𑐏𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐎𑐰𑐶 𑐱𑐵𑐎𑑂𑐫𑑄 ‘𑐱𑐵𑐣𑑂𑐟𑐶’, ‘𑐳𑐩𑐳𑑂𑐫𑐵’, ‘𑐎𑑂𑐰𑐵𑑅𑐐𑐸 𑐴𑐶𑑄𑐮𑐵 𑐖𑐷𑐰𑐣 𑐧𑐷𑐩𑐵𑑅𑐐𑐸 𑐏𑑅’, ‘𑐮𑑅𑐫𑐵 𑐦𑐸𑐟𑐶 𑐗𑐷, 𑐢𑐸𑑃’, ‘𑐠𑑁𑑄𑐫𑐵 𑐖𑐶𑐐𑐸 𑐡𑐾𑐫𑑂’, ‘𑐣𑐶𑐨𑐵𑑅 𑐖𑐷𑐰𑐣 𑐳𑐶𑐬𑑂𑐖𑐣𑐵 𑐏𑑅’, ‘𑐣𑑂𑐴𑐹𑐐𑐸 𑐰𑐳𑑂𑐟𑐸 𑐮𑐵 𑐳𑐶𑐬𑑂𑐖𑐣𑐵 𑐫𑐵𑐫𑐾𑐩𑐵𑑅’, ‘𑐠𑑅𑐐𑐸 𑐴𑐾 𑐰𑐶𑐱𑑂𑐰𑐵𑐳 𑐩𑑂𑐰𑐫𑐵𑐔𑑂𑐰𑐣’, ‘𑐠𑑁𑑄 𑐖𑐶𑐐𑐸 𑐡𑐾𑐫𑑂, 𑐂𑐟𑐶𑐴𑐵𑐳𑑄 𑐩𑑂𑐰𑐵𑐫𑑂 𑐣𑐎𑐵𑐔𑑂𑐰𑑄𑐩𑑂𑐴 𑐖𑐶’ 𑐁𑐡𑐶 𑐱𑐷𑐬𑑂𑐲𑐎𑐫𑐵 𑐕𑐐𑐹 𑐡𑐬𑑂𑐖𑐣𑑄 𑐩𑐮𑑂𑐫𑐵𑐎 𑐔𑐶𑐣𑐵𑐏𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋 𑑒𑑐𑑓𑑙 𑐳𑐵𑐮𑑄𑐣𑐶𑐳𑐾𑑄 𑑒𑑐𑑖𑑒 𑐳𑐵𑐮 𑐟𑐎𑐫𑐵 𑐡𑐸𑐣𑐾 𑐥𑐶𑐳𑑂𑐎𑐬 𑐴𑐟𑑂𑐫𑐵𑐎𑐞𑑂𑐜𑐣𑐶𑐳𑐾𑑄 𑐖𑐸𑐖𑐸 𑐖𑑂𑐘𑐵𑐣𑐾 𑐣𑑂𑐡𑑂𑐬𑐫𑐵 𑐥𑐟𑐣 𑐟𑐎𑐫𑐵 𑐑𑐚𑐣𑐵𑐫𑐵𑐟 𑐡𑐸𑐠𑑂𑐫𑐵𑐎𑐵𑑅 𑐳𑐶𑐬𑑂𑐖𑐣𑐵 𑐫𑐵𑐣𑐵𑐡𑐷𑐐𑐸 𑐔𑐶𑐣𑐵𑐏𑑃 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐥𑑄𑐔𑐵𑐫𑐟𑐎𑐵𑐮, 𑐧𑐴𑐸𑐡𑐮𑐷𑐫 𑐥𑑂𑐬𑐖𑐵𑐟𑐣𑑂𑐟𑑂𑐬 𑐰 𑐮𑑀 𑐎𑐟𑐵𑐣𑑂𑐟𑑂𑐬𑐶𑐎 𑐐𑐞𑐟𑐣𑑂𑐟𑑂𑐬𑐫𑐵 𑐃 𑐟𑐎𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐫𑐵𑐂𑐎𑐠𑑄 𑐔𑐶𑐣𑐵𑐏𑑃 𑐰𑐫𑑂𑐎𑐮𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐰𑐶𑐬𑐵𑐚𑐫𑐵 𑐣𑐵𑐫𑑅 𑐩𑐴𑐾𑐣𑑂𑐡𑑂𑐬𑐐𑑀𑐥𑐵𑐮 𑐎𑐬𑑂𑐩𑐵𑐔𑐵𑐬𑑂𑐫𑑄 𑐮𑐳𑐎𑐸𑐳 𑐫𑐵𑐣𑐵𑐡𑐶𑐳𑐾𑑄 𑐖𑑂𑐫𑐵𑐗𑑂𑐰𑑅𑐫𑐵 𑐄𑐡𑑂𑐡𑐾𑐱𑑂𑐫𑐫𑐵𑐟 𑐎𑐫𑐵𑑅 𑐢𑑂𑐰𑐠𑐸𑐂𑐎𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐨𑐵𑐥𑐟𑐶𑐫𑐵 𑐠𑐵𑐳𑑄 𑐣𑐰𑐶𑐣𑐥𑑂𑐬𑐎𑐵𑐱 𑐱𑑂𑐬𑐾𑐲𑑂𑐛𑑄 𑐡𑐵𑐬𑑂𑐱𑐣𑐶𑐎, 𑐰𑐶𑐡𑑂𑐬𑑀𑐴𑐷 𑐰 𑐱𑐵𑐣𑑂𑐟𑐶𑐫𑐵 𑐨𑐵𑐰𑐣𑐵 𑐧𑑂𑐰𑐮𑑄𑐎𑐾 𑐎𑐠𑑄 𑐎𑐰𑐶𑐟𑐵 𑐔𑑂𑐰𑐫𑐵𑑅 𑐕𑐩𑑂𑐴 𑐎𑐰𑐶𑐫𑐵 𑐄𑐔𑑂𑐔 𑐩𑐣𑑀𑐨𑐵𑐰𑐣𑐵 𑐎𑐰𑐶 𑐱𑐵𑐎𑑂𑐫 𑐟𑐵𑑅𑐮𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐰𑐶𑐬𑐵𑐚𑐫𑐵 𑐖𑑂𑐫𑐵𑐳𑐣𑐵 𑐥𑐸𑐔𑑅𑐫𑐵 𑐡𑐸𑐖𑑅 𑐳𑐸𑐮𑑀𑐔𑐣𑐵 𑐳𑐿𑑄𑐖𑐹𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐬𑐶𑐲𑑂𑐛 𑐎𑐰𑐶 𑐜𑐵. 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣, 𑐎𑐺𑐲𑑂𑐞𑐨𑐎𑑂𑐟 𑐧𑑀𑐜𑐾 , 𑐥𑐱𑐸𑐥𑐟𑐶𑐩𑐵𑐣 𑐥𑑅𑐩𑐵𑑅 𑐮𑐐𑐵𑐫𑐟𑐫𑐵 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂 𑐧𑑂𑐰𑐟𑐶 𑐡𑐸𑐐𑐸 𑐏𑑅 𑑋