𑐎𑐵𑐛𑐩𑐵𑐜𑑁𑑄 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑑄 𑐱𑐶𑐮𑑂𑐥𑐎𑐮𑐵 𑐣𑑄 𑐧𑑂𑐰𑑄𑐎𑐾𑐐𑐸 𑐳𑐸𑐬𑐸 𑐫𑐵𑑅𑐐𑐸 𑐡𑐸 𑑋 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑑄 𑐱𑐶𑐮𑑂𑐥 𑐰 𑐜𑐶𑐖𑐵𑐂𑐣 𑐱𑐶𑐎𑑂𑐲𑐵𑐫𑑂 𑐳𑑂𑐣𑐵𑐟𑐎𑐫𑐵 𑐎𑐎𑑂𑐲𑐵 𑐳𑐸𑐬𑐸 𑐫𑐵𑑅𑐐𑐸 𑐡𑐸 𑑋 𑐧𑐶𑐴𑐶𑐰𑐶𑐵𑑅 𑐣𑐶𑐳𑐾𑑄 𑐳𑐸𑐬𑐸 𑐖𑐹𑐐𑐸 𑐠𑑂𑐰 𑐰𑐶𑐲𑐫 𑐣𑐾𑐥𑐵𑐮𑐫𑑂 𑐴𑐾 𑐣𑑂𑐴𑐵𑐥𑐵𑑄𑐏𑐸𑐳𑐷 𑐧𑑂𑐰𑑄𑐎𑐾𑐐𑐸 𑐳𑐸𑐬𑐸 𑐖𑐹𑐐𑐸 𑐏𑑅 𑑋 𑐥𑑂𑐫𑐡𑑃𑐫𑐵 𑐠𑑂𑐰 𑐎𑑀𑐬𑑂𑐳𑐫𑑂 𑐠𑐸𑐐𑐸𑐳𑐷 𑐣𑐷𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐨𑐬𑑂𑐣𑐵 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐱𑐶𑐮𑑂𑐥 𑐎𑐮𑐵 𑐧𑑂𑐰𑑄𑐎𑐾𑐐𑐸 𑐳𑐸𑐬𑐸 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐎𑐵𑐛𑐩𑐵𑐜𑑁𑑄 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐄𑐥𑐎𑐸𑐮𑐥𑐟𑐶 𑐥𑑂𑐬𑐵. 𑐜𑐵. 𑐨𑑀𑐮𑐵 𑐠𑐵𑐥𑐵𑑄 𑐠𑑅𑐥𑐶𑑄𑐳𑑄 𑐕𑐸𑑄 𑐣𑑂𑐴𑐹𑐐𑐸 𑐖𑑂𑐫𑐵 𑐫𑐵𑐣𑐵𑐐𑐸 𑐩𑐏𑐳𑐾 𑐥𑐸𑐬𑑂𑐏𑐵 𑐰 𑐳𑐩𑐸𑐡𑐵𑐫𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐖𑑂𑐫𑐵𑐫𑐵𑐟 𑐖𑐎 𑐕𑐸𑑄 𑐣𑑂𑐴𑐹𑐐𑐸 𑐥𑐴 𑐧𑐷𑐟𑑂𑐫𑐣𑐵𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐬𑐿𑐠𑐵𑐣 𑐎𑐮𑐵, 𑐥𑐩𑑂𑐥𑐬𑐵𑐐𑐟 𑐎𑐮𑐵, 𑐖𑑂𑐘𑐵𑐣 𑐰 𑐱𑐷𑐥𑐫𑐵𑐟 𑐳𑑂𑐰𑐵𑐣𑐵𑑅 𑐣𑑂𑐴𑑂𑐫𑐵𑑅𑐰𑐣𑐾𑐐𑐸 𑐎𑐸𑐟𑑅 𑐖𑐸𑐂𑐐𑐸 𑐏𑑃 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐄𑐡𑑂𑐫𑑀𑐐 𑐰𑐵𑐞𑐶𑐖𑑂𑐫, 𑐨𑐹𑐩𑐶 𑐰 𑐥𑑂𑐬𑐱𑐵𑐳𑐣𑐩𑐣𑑂𑐟𑑂𑐬𑐷 𑐬𑐵𑐩𑐎𑐺𑐲𑑂𑐞 𑐔𑐶𑐟𑑂𑐬𑐎𑐵𑐬𑑄 𑐣𑐾𑐥𑐵𑐮 𑐮𑐮𑐶𑐟𑐎𑐮𑐵 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣𑐮𑐶𑐳𑐾𑐫𑐵 𑐳𑐴𑐎𑐵𑐬𑑂𑐫𑐫𑑂 𑐎𑐵𑐛𑐩𑐵𑐜𑑁𑑄 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑑄 𑐱𑐶𑐮𑑂𑐥𑐎𑐮𑐵𑐫𑐵 𑐥𑐛𑐣𑐥𑐵𑐛𑐣 𑐳𑐸𑐬𑐸 𑐫𑐵𑐣𑐵𑑅 𑐎𑐮𑐵 𑐎𑑂𑐲𑐾𑐟𑑂𑐬𑐫𑑂 𑐰𑐶𑐎𑐵𑐳𑐫𑑂 𑐫𑑀𑐐𑐡𑐵𑐣 𑐧𑐶𑐄𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐠𑑂𑐰 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐥𑑂𑐬𑐡𑐾𑐱 𑐳𑐬𑐎𑐵𑐬𑑄 𑐣𑑄 𑐎𑐮𑐵𑐫𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑑅 𑐁𑑅 𑐥𑑂𑐬𑐡𑐾𑐱 𑐳𑑄𑐳𑐡𑐫𑑂 𑐴𑐳𑑂𑐟𑐎𑐮𑐵 𑐰𑐶𑐢𑐾𑐫𑐎 𑐣𑑂𑐴𑑂𑐫𑐧𑑂𑐰𑐫𑐾 𑐢𑐸𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐀𑐠𑐾𑐴𑐾 𑐣𑐾𑐥𑐵𑐮 𑐮𑐮𑐶𑐟𑐎𑐮𑐵 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐎𑐸𑐮𑐥𑐟𑐶 𑐣𑐵𑐬𑐡𑐩𑐞𑐶 𑐴𑐵𑐬𑑂𑐟𑐩𑑂𑐕𑐵𑐮𑐷𑑄 𑐱𑐶𑐮𑑂𑐥 𑐰 𑐜𑐶𑐖𑐵𑐂𑐣 𑐎𑐮𑐵𑐫𑑂 𑐳𑑂𑐣𑐵𑐟𑐎 𑐟𑐎 𑐧𑑂𑐰𑑄𑐎𑐾𑐐𑐸 𑐳𑐸𑐬𑐸 𑐖𑐹𑐐𑐸 𑐢𑐫𑐵𑐐𑐸 𑐮𑐮𑐶𑐟𑐎𑐮𑐵 𑐎𑑂𑐲𑐾𑐟𑑂𑐬𑐫𑐵 𑐣𑐶𑑄𑐟𑐶𑑄 𑐄𑐥𑐮𑐧𑑂𑐢𑐷 𑐖𑐹𑐐𑐸 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐮𑐮𑐶𑐟𑐎𑐮𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐥𑑂𑐬𑐵𑐖𑑂𑐘𑐶𑐎 𑐎𑑂𑐲𑐾𑐟𑑂𑐬𑐫𑑂 𑐴𑐾 𑐥𑐬𑐩𑑂𑐥𑐬𑐵𑐐𑐟 𑐎𑐮𑐵𑐫𑐵 𑐱𑐶𑐎𑑂𑐲𑐵 𑐧𑐷𑐐𑐸 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹𑐐𑐸 𑐏𑑃 𑐢𑐫𑐵𑐡𑐶𑐮 𑑋