𑐩𑐶𑐳𑐵 𑐳𑐵𑐴𑐶𑐟𑑂𑐫𑐎𑐵𑐬 𑐩𑐸𑐣𑐵𑐫𑐵 𑐐𑑂𑐰𑐳𑐵𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐀𑑅𑐥𑐸𑐎 𑐔𑑂𑐰𑐫𑐾 𑐧𑑂𑐰𑐣𑐾 𑐳𑐫𑐾𑐎𑐾𑐐𑐸 𑐳𑐩𑑂𑐧𑐣𑑂𑐢𑐷 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐖𑐸𑐮 𑑋 𑐩𑐶𑐳𑐵𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐣𑑂𑐴𑑂𑐫𑐵𑐎𑐹𑐐𑐸 𑐄𑐐𑐸 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐠𑐣𑐫𑐵 𑐟𑑂𑐫𑐵𑐐𑐮𑐫𑑂 𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐖𑑂𑐫𑐵𑐎𑐸𑐠𑐶𑐂 𑐖𑐹𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐨𑐵𑐲𑐵𑐴𑑂𑐫𑑅𑐩𑐶 𑐥𑑁𑐨𑐵𑑅 𑐳𑐵𑐫𑑂𑐩𑐶𑑄 𑐣𑐾𑐰𑐵𑑅 𑐨𑐵𑐫𑑂 𑐐𑐸𑐎𑐠𑑄 𑐩𑐡𑑂𑐰𑑄𑐎, 𑐀𑑅𑐥𑐸𑐎 𑐰 𑐫𑐂𑐥𑐸𑐎 𑐔𑑂𑐰𑐫𑐾𑐐𑐸 𑐰 𑐧𑑂𑐰𑐣𑐾𑐐𑐸 𑐢𑐂𑐐𑐸 𑐧𑐵𑐬𑐾 𑐳𑐿𑐡𑑂𑐢𑐵𑐣𑑂𑐟𑐶𑐎 𑐥𑑂𑐬𑐱𑐶𑐎𑑂𑐲𑐞 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐫𑐮𑐫𑐵 𑐣𑐵𑐫𑑅 𑐴𑐶𑐬𑐵𑐎𑐵𑐖𑐷 𑐩𑐴𑐬𑑂𑐖𑐣𑑄 𑐗𑐷𑐳𑑄 𑐗𑐷𑐐𑐸 𑐴𑐾 𑐨𑐵𑐫𑑂 𑐕𑑂𑐫𑐮𑐵𑐧𑐸𑐮𑐵 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐳𑐾𑑄 𑐫𑐮 𑐡𑐾𑐱𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐀𑐰𑐳𑑂𑐠𑐵 𑐰 𑐩𑑄𑐎𑐵𑑅 𑐏𑐮𑐎𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐐𑐟𑐶𑐰𑐶𑐢𑐶 𑐧𑐵𑐬𑐾 𑐎𑐣𑐵𑐡𑐷𑐐𑐸 𑐏𑑅 𑑋

𑐳𑑄𑐳𑑂𑐠𑐵𑐫𑐵 𑐣𑐵𑐫𑑅 𑐀𑐘𑑂𑐖𑐣𑐵 𑐟𑐵𑐩𑑂𑐬𑐵𑐎𑐵𑐬𑑄 𑐠𑑅𑐥𑐶𑐣𑐶𑐐𑐸 𑐳𑑄𑐳𑑂𑐠𑐵𑑄 𑐨𑐵𑐲𑐵 𑐰 𑐳𑐵𑐴𑐶𑐟𑑂𑐫𑐫𑐵 𑐏𑑂𑐫𑐮𑐫𑑂 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐣𑐾𑐰𑐵𑑅 𑐨𑐵𑐫𑑂 𑐀𑑅𑐥𑐸𑐎 𑐔𑑂𑐰𑐫𑐾, 𑐧𑑂𑐰𑐣𑐾 𑐳𑐫𑐾𑐎𑐾𑐐𑐸 𑐠𑐸𑐎𑐠𑑄𑐫𑐵 𑐥𑑂𑐬𑐱𑐶𑐎𑑂𑐲𑐞𑑄 𑐩𑐶𑐳𑐵 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐳𑐾𑑄 𑐠𑐸𑐎𑐠𑑄𑐫𑐵 𑐥𑑂𑐬𑐱𑐶𑐎𑑂𑐲𑐞 𑐰𑐂𑐐𑐸 𑐡𑐶𑐣𑐫𑑂 𑐣𑑄 𑐣𑑂𑐴𑑂𑐫𑐵𑐎𑐵 𑐰𑐣𑐾𑐐𑐸 𑐖𑐸𑐂 𑐢𑐫𑐵𑐡𑐶𑐮 𑑋

𑐳𑑄𑐳𑑂𑐠𑐵𑐫𑐵 𑐣𑑂𑐰𑐎𑐸 𑐡𑐶𑐰𑑂𑐫𑐵 𑐟𑐵𑐩𑑂𑐬𑐵𑐎𑐵𑐬𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐁𑐥𑐵𑐮𑑄 𑐩𑐶𑐳𑐵 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋