𑐳𑑂𑐰𑐣𑐶𑐐𑑅𑐮𑐶𑐳𑐾 𑐳𑐟𑐶𑐐𑐸 𑐢𑐵𑐡𑐶𑐒 𑐖𑐶𑐮𑑂𑐮𑐵𑐫𑐵 𑐡𑐸𑐬𑑂𑐐𑐩 𑐐𑐵𑑄 𑐧𑐸𑐝𑐵𑐠𑐸𑑄𑐐𑐫𑑂 𑐣𑐾𑐥𑐵𑐮𑐨𑐵𑐲𑐵 𑐥𑑂𑐬𑐱𑐶𑐎𑑂𑐲𑐞 𑐣𑑂𑐴𑑂𑐫𑐵𑑅𑐐𑐸 𑐡𑐸 𑑋 𑐣𑐾𑐰𑐵𑑅 𑐡𑐾𑐫𑑂𑐺 𑐡𑐧𑐹𑐫𑐵 𑐳𑐩𑐣𑑂𑐰𑐫𑐫𑑂 𑐰 𑐐𑑄𑐐𑐵 𑐖𑐩𑐸𑐣𑐵 𑐐𑐵𑐄𑑃𑐥𑐵𑐮𑐶𑐎𑐵𑐫𑐵 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶𑐂 𑐄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐥𑑂𑐬𑐱𑐶𑐎𑑂𑐲𑐞 𑐣𑑂𑐴𑑂𑐫𑐵𑑅𑐐𑐸 𑐏𑑅𑑋

𑐣𑐾𑐥𑐵𑐮𑐨𑐵𑐲𑐵𑐮𑐶𑐳𑐾𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐣𑑄 𑐥𑑂𑐬𑐱𑐶𑐎𑑂𑐲𑐞 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐎𑐎𑑂𑐲𑐵𑐫𑑂 𑐄𑐐𑐸 𑐐𑐵𑐩𑐫𑑂 𑐔𑑂𑐰𑑄𑐥𑐶𑑄 𑐣𑐶𑐳𑑅 𑐳𑑂𑐰𑐫𑐵𑑄 𑐀𑐥𑑂𑐰𑑅𑐳𑐶𑐣𑑄 𑐥𑑂𑐬𑐱𑐶𑐎𑑂𑐲𑐞 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐨𑐵𑐲𑐵 𑐥𑑂𑐬𑐱𑐶𑐎𑑂𑐲𑐞 𑐄𑐮𑐾𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐳𑐩𑐵𑐖 𑐧𑐸𑐝𑐵𑐠𑐸𑑄𑐐𑐫𑐵 𑐣𑐵𑐫𑑅 𑐣𑐰𑐶𑐣 𑐱𑑂𑐬𑐾𑐲𑑂𑐛, 𑐐𑑄𑐐𑐵𑐖𑐩𑐸𑐣𑐵 𑐐𑐵𑐄𑑃𑐥𑐵𑐮𑐶𑐎𑐵 𑑗 𑐫𑐵 𑐰𑐜𑐵 𑐳𑐡𑐳𑑂𑐫 𑐴𑐬𑐶𑐱𑑂𑐔𑐣𑑂𑐡𑑂𑐬 𑐀𑐢𑐶𑐎𑐵𑐬𑐷, 𑐣𑐵𑐬𑐵𑐫𑐞𑐎𑐸𑐩𑐵𑐬 𑐱𑑂𑐬𑐾𑐲𑑂𑐛, 𑐬𑐵𑐖𑐎𑐸𑐩𑐵𑐬 𑐱𑑂𑐬𑐾𑐲𑑂𑐛 𑐮𑐐𑐵𑐫𑐟𑑄 𑐨𑐵𑐲𑐵 𑐥𑑂𑐬𑐱𑐶𑐎𑑂𑐲𑐞𑐥𑐵𑐏𑐾𑑄 𑐣𑐾𑐰𑐵𑑅 𑐳𑐩𑐸𑐡𑐵𑐫𑐫𑐵 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵𑐟 𑐳𑐷𑐎𑐾, 𑐠𑐸𑐂𑐎𑐾 𑐦𑐂𑐐𑐸 𑐣𑐵𑐥𑑄 𑐠𑐸𑐎𑐶𑐫𑐵 𑐄𑐣𑑂𑐣𑐰𑐫𑐣𑐫𑑂 𑐫𑑀𑐐𑐡𑐵𑐣 𑐫𑐵𑐫𑐾𑐟 𑐐𑑂𑐰𑐵𑐴𑐵𑐮𑐶 𑐖𑐸𑐫𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐷𑐐𑐸 𑐡𑐸 𑑋

𑐎𑐺𑐲𑑂𑐞 𑐥𑑂𑐬𑐖𑐵𑐥𑐟𑐶𑑄 𑐎𑐫𑐵𑐔𑑂𑐰𑐣𑐵𑐡𑐷𑐐𑐸 𑐨𑐵𑐲𑐵 𑐰 𑐮𑐶𑐥𑐶 𑐥𑑂𑐬𑐱𑐶𑐎𑑂𑐲𑐞𑐫𑑂 𑐰𑐫𑑂𑐎𑐮𑑄 𑐐𑐵𑑄𑐫𑐵 𑐥𑑂𑐬𑐟𑑂𑐫𑐾𑐎 𑐥𑐬𑐶𑐰𑐵𑐬𑐫𑐵𑐟 𑐜𑐵. 𑐟𑐸𑐫𑐸𑐧𑐴𑐵𑐡𑐸𑐬 𑐩𑐴𑐬𑑂𑐖𑐣𑑄 𑐔𑑂𑐰𑐫𑐵𑐡𑐷𑐐𑐸 𑐏𑐳 𑐣𑐾𑐥𑐵𑐮𑐨𑐵𑐲𑐵 𑐏𑑃𑐐𑑂𑐰𑑅𑐢𑐸𑐎𑐹 𑐰 𑐣𑐬𑐾𑐱𑐰𑐷𑐬 𑐱𑐵𑐎𑑂𑐫𑑄 𑐔𑑂𑐰𑐫𑐵𑐡𑐷𑐐𑐸 𑐣𑐾𑐥𑐵𑐮𑐨𑐵𑐲𑐵 𑐣𑐵𑑄𑐫𑐵 𑐨𑐵𑐲𑐵 𑐥𑑂𑐬𑐱𑐶𑐎𑑂𑐲𑐫𑐵 𑐳𑐦𑐹 𑐕𑐐𑐹 𑐕𑐐𑐹 𑐂𑐣𑐵𑐡𑐷𑐐𑐸 𑐏𑑅 𑑋

𑐳𑑂𑐰𑐮𑐵𑐟𑐎 𑐣𑑂𑐴𑑂𑐫𑐵𑐂𑐐𑐸 𑐨𑐵𑐲𑐵 𑐥𑑂𑐬𑐱𑐶𑐎𑑂𑐲𑐞 𑐎𑐎𑑂𑐲𑐵 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐠𑐷𑐠𑐷 𑐂𑐮𑐫𑑂 𑐥𑑂𑐫𑐠𑐵𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐸𑐠𑐳𑐶𑐫𑐵 𑑗 𑐣𑐶𑐳𑐾𑑄 𑑙 𑐟𑐵𑑅 𑐃𑐟𑐎 𑐳𑑂𑐠𑐵𑐣𑐷𑐫 𑐳𑐵𑐩𑐸𑐡𑐵𑐫𑐶𑐎 𑐨𑐰𑐣𑐫𑑂 𑐧𑐵𑑃𑐐𑐾𑐳𑐵𑐮𑐫𑑂, 𑐳𑐸𑐠𑐳𑐶𑐫𑐵 𑑑𑑑 𑐣𑐶𑐳𑐾𑑄 𑐣𑑂𑐴𑐶𑐣𑐶𑐳𑐶𑐫𑐵 𑑑 𑐟𑐵𑑅 𑐃𑐟𑐎 𑐳𑐵𑐩𑐸𑐡𑐵𑐫𑐶𑐎 𑐨𑐰𑐣 𑐳𑐵𑑃𑐢𑐥𑐶𑐥𑐮, 𑐳𑐣𑐶𑐮𑐫𑐵 𑑔 𑐣𑐶𑐳𑐾𑑄 𑑕 𑐟𑐵𑑅 𑐟𑐎 𑐧𑐡𑑂𑐬𑐷 𑐰𑐶𑐱𑐵𑐮 𑐩𑐵.𑐰𑐶. 𑐧𑐸𑐝𑐵𑐠𑐸𑑄𑐐 𑐰 𑐧𑐴𑐣𑐶𑐳𑐶𑐫𑐵 𑑖 𑐣𑐶𑐳𑐾𑑄 𑑘 𑐟𑐵𑑅 𑐟𑐎 𑐐𑐿𑐬𑐷𑐐𑐵𑐺𑑃 𑐳𑐵𑐩𑐸𑐡𑐵𑐫𑐶𑐎 𑐨𑐰𑐣 𑐟𑐮𑑂𑐮𑑀𑐴𑐚𑐶𑐫𑐵𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐥𑑂𑐬𑐟𑑂𑐫𑐾𑐎 𑐕𑐐𑐹 𑐎𑐎𑑂𑐲𑐵𑐫𑑂 𑐣𑑂𑐫𑐫𑑂𑐩𑑂𑐴𑐫𑐵 𑐮𑑂𑐫𑐵𑐏𑑄 𑐣𑐶𑐳𑑅𑐩𑑂𑐴 𑐣𑐾𑐰𑐵𑑅𑐟𑐫𑑂𑐳𑑄 𑐨𑐵𑐲𑐵 𑐰 𑐮𑐶𑐥𑐶 𑐥𑑂𑐬𑐱𑐶𑐎𑑂𑐲𑐞 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋