𑐎𑐶𑐥𑐹(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐡𑑃𑐫𑑂𑐡𑐳𑑄 𑐫𑑅𑐩𑐬𑐶 𑐥𑐸𑐣𑑂𑐴𑐶𑐎𑐸𑐣𑑂𑐴𑐸 𑐥𑐵𑑄𑐐𑐵𑐫𑑂 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐐𑑀𑐲𑑂𑐛𑐷 𑐩𑑂𑐴𑐶𑐐𑑅 𑐥𑐵𑑄𑐐𑐵𑐫𑐵 𑐮𑐵𑐕𑐶 𑐟𑑂𑐰𑐵𑐮𑐫𑑂 𑐟𑑅𑐖𑐶𑐎 𑐖𑐸𑐮 𑑋 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐣𑐾𑐥𑐵𑐮 𑐩𑐖𑐡𑐸𑐬 𑐎𑐶𑐳𑐵𑐣 𑐥𑐵𑐬𑑂𑐚𑐷𑐫𑐵 𑐎𑐾𑐣𑑂𑐡𑑂𑐬𑐷𑐫 𑐳𑐔𑐶𑐰 𑐰 𑐥𑑂𑐬𑐟𑐶𑐣𑐶𑐢𑐶 𑐳𑐨𑐵𑐫𑐵 𑐳𑐡𑐳𑑂𑐫 𑐥𑑂𑐬𑐾𑐩 𑐳𑐸𑐰𑐵𑐮𑑄 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐩𑐎𑐶𑐥𑐵𑐫𑐵 𑐎𑐾𑐣𑑂𑐡𑑂𑐬𑐷𑐫 𑐳𑐡𑐳𑑂𑐫 𑐰 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐳𑐸𑐣𑐶𑐮 𑐥𑑂𑐬𑐖𑐵𑐥𑐟𑐶𑑄 𑐣𑐾𑐰𑐵𑑅𑐟𑐫𑑂 𑐣𑐏𑑅𑐔𑐏𑑅, 𑐎𑐮𑐵 𑐳𑑄𑐳𑑂𑐎𑐺𑐟𑐶 𑐴𑐾 𑐣𑐾𑐰𑐵𑑅𑐟𑐫𑑂 𑐥𑐴𑐶𑐔𑐵𑐣 𑐖𑐹𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐥𑐴𑐶𑐔𑐵𑐣𑐫𑐵𑐟 𑐮𑑂𑐫𑑄𑐎𑐵 𑐟𑐫𑐾 𑐩𑐦𑐸𑐟 𑐢𑐵𑑅𑐳𑐵 𑐀𑐳𑑂𑐟𑐶𑐟𑑂𑐰 𑐮𑑀𑐥 𑐖𑐸𑐂 𑐢𑐫𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐨𑐵𑐲𑐵 𑐳𑑄𑐳𑑂𑐎𑐺𑐟𑐶 𑐩𑑂𑐰𑐵𑐎𑐾𑐐𑐸 𑐎𑐠𑑄 𑐎𑐵𑐣𑐸𑐣𑐷 𑐧𑑂𑐫𑐰𑐳𑑂𑐠𑐵 𑐖𑐸𑐂𑐢𑐸𑑄𑐎𑐹𑐐𑐸𑐮𑐶𑑄 𑐁𑑅 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑐥𑐵𑐏𑐾𑑄 𑐎𑐮𑐵 𑐳𑑄𑐳𑑂𑐎𑐺𑐟𑐶𑐫𑐵 𑐖𑑂𑐘𑐵𑐣 𑐣𑐵𑐥𑑄 𑐎𑐵𑐳𑐵𑐫𑐵 𑐰𑐶𑐰𑐬𑐞 𑐣𑑄 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑐵𑐟 𑐥𑐵𑐛 𑐧𑐶𑐫𑐵𑑅 𑐄𑐎𑐶𑐫𑐵𑐟 𑐩𑑂𑐰𑐵𑐎𑐾𑐐𑐸 𑐀𑐨𑐶𑐫𑐵𑐣𑐫𑑂 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵 𑐮𑐐𑐾 𑐖𑐸𑐫𑐵𑐔𑑂𑐰𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐰𑐬𑐶𑐲𑑂𑐛 𑐥𑐟𑑂𑐬𑐎𑐵𑐬 𑐨𑐿𑐬𑐰 𑐬𑐶𑐳𑐵𑐮𑑄 𑐣𑐾𑐥𑐵𑐮 𑐳𑐬𑐎𑐵𑐬 𑐴𑐵𑐮 𑐣𑐾𑐥𑐵𑑅𑐫𑐵 𑐫𑐠𑐵𑐬𑑂𑐠 𑐣𑐎𑑂𑐳𑐵 𑐥𑐶𑐟 𑐧𑐷𑐟 𑐁𑐣𑐵𑐎𑐵𑐣𑐷 𑐫𑐵𑐣𑐵𑐔𑑂𑐰𑑄𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐎𑐶 𑐮𑑂𑐰𑐵𑐫𑐾 𑐏𑐣𑐵𑑅 𑐐𑑂𑐫𑐵𑐫𑐾 𑐩𑐖𑐶𑐄𑐐𑐸 𑐎𑐶 𑐩𑐏𑐸𑐳𑐵 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐀𑐡𑐵𑐮𑐟𑐫𑑂 𑐩𑐸𑐡𑑂𑐡𑐵 𑐟𑐫𑐵𑑅 𑐖𑐹𑐳𑐵𑑄 𑐣𑐾𑐥𑐵𑑅𑐫𑐵 𑐀𑐟𑐶𑐎𑑂𑐬𑐩𑐶𑐟 𑐨𑐹𑐩𑐶 𑐮𑐶𑐟 𑐎𑐵𑐫𑐾𑐟 𑐳𑐬𑐎𑐵𑐬 𑐟𑐫𑐵𑐬 𑐖𑐸𑐂𑐩𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐡𑐾𑐱 𑐳𑐵𑑄𑐳𑐡 𑐳𑐸𑐬𑐾𑐣𑑂𑐡𑑂𑐬𑐬𑐵𑐖 𑐐𑑀𑐳𑐵𑐃, 𑐳𑐶𑐬𑑂𑐖𑐣𑐵 𑐳𑐿𑑄𑐖𑐹 𑐮𑐐𑐵𑐫𑐟𑑄 𑐣𑑂𑐰𑐰𑐵𑐣𑐵𑐡𑐷𑐐𑐸 𑐏𑑅𑐳𑐵 𑐀𑐣 𑐠𑐷𑐠𑐷 𑐬𑐔𑐣𑐵 𑐣𑑄 𑐰𑐵𑐔𑐣 𑐖𑐹𑐐𑐸 𑐏𑑅 𑑋