𑐨𑐰𑐶𑐲𑑂𑐫𑐫𑑂 𑐁𑐢𑐸𑐣𑐶𑐎 𑐰𑐶𑐱𑑂𑐰𑐫𑐵 𑐴𑐬𑐾𑐎 𑐎𑐠𑑄𑐫𑐵 𑐔𑐸𑐣𑑁𑐟𑐷𑐫𑐵 𑐳𑐵𑐩𑐣𑐵 𑐫𑐵𑐣𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾𑐦𑐸𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐟𑐫𑐵𑐬 𑐫𑐵𑐫𑐾𑐐𑐸 𑐟𑐵𑑅 𑐟𑐫𑐵𑑅 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐕𑐐𑐹 𑐳𑑂𑐎𑐹𑐮 𑐏𑑅 – 𑐰𑐶𑐖𑐾𑐱𑑂𑐰𑐬𑐷 𑐳𑐾𑐎𑐾𑐣𑑂𑐜𑐬𑐷 𑐳𑑂𑐎𑐹𑐮 𑑋 𑐠𑑂𑐰 𑐴𑐾 𑐩𑐹 𑐟𑐵𑑅 𑐟𑐫𑐵𑑅 𑐰𑑄𑐐𑐸 𑐳𑑂𑐰𑑄𑐐𑐹 𑐡𑐱𑐎 𑐣𑑂𑐴𑑂𑐫𑐰𑐣𑐶𑐳𑐾𑑄 𑐳𑑄𑐔𑐵𑐮𑐣𑐫𑑂 𑐰𑐫𑐵𑐔𑑂𑐰𑑄𑐐𑐸 𑐠𑑂𑐰 𑐳𑑂𑐎𑐹𑐮 𑐫𑐾𑑃𑐫𑐵 𑐰𑐶𑐖𑐾𑐱𑑂𑐰𑐬𑐷𑐂 𑐡𑐸 𑑋 𑐳𑑂𑐎𑐹𑐮𑐫𑐵 𑐩𑐹 𑐟𑐵𑑅 𑐢𑐫𑐵𑐐𑐸 𑐴𑐾 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐳𑐩𑐐𑑂𑐬 𑐰𑐶𑐎𑐵𑐳 𑐫𑐵𑐫𑐾𑐐𑐸, 𑐦𑐸𑐎𑑂𑐎 𑐏𑑂𑐫𑐮𑐫𑑂 𑐳𑐎𑑂𑐲𑐩 𑐫𑐵𑐫𑐾𑐐𑐸 𑐏𑑅 𑑋

𑐄𑐎𑐶𑑄 𑐠𑑂𑐰 𑐳𑑂𑐎𑐸𑐮𑑄 𑐠𑑅𑐐𑐸 𑐳𑑂𑐠𑐵𑐥𑐣𑐵𑐎𑐵𑐮𑑄𑐣𑐶𑐳𑐾𑑄 𑐠𑑅𑐥𑐶𑑄 𑐔𑑂𑐰𑐣𑐵𑐔𑑂𑐰𑑄𑐐𑐸 𑐳𑐩𑐵𑐖 𑐰 𑐡𑐾𑐫𑑂𑐫𑐵 𑐣𑐶𑑄𑐟𑐶𑑄 𑐫𑑀𑐐𑐡𑐵𑐣 𑐫𑐵𑐫𑐾𑐦𑐸𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐟𑐫𑐵𑐬 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐄𑐩𑐶𑐐𑐸 𑐳𑐩𑐐𑑂𑐬 𑐰𑐶𑐎𑐵𑐳𑐫𑑂 𑐢𑑂𑐫𑐵𑐣 𑐧𑐶𑐫𑐵𑑅 𑐱𑐶𑐎𑑂𑐲𑐵 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑃 𑐳𑑂𑐎𑐹𑐮𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐩𑐫𑑂𑐖𑐸 𑐰𑐶𑐣𑑂𑐡𑐹 𑐟𑐸𑐮𑐵𑐢𑐬𑑄 𑐎𑐣𑐵𑐡𑐷 𑑋 𑐠𑑂𑐰 𑐳𑑂𑐎𑐸𑐮𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐎𑐶𑐟𑐵𑐧𑐷 𑐱𑐶𑐎𑑂𑐲𑐵 𑐧𑐷𑐐𑐸 𑐖𑐎 𑐩𑐏𑐸, 𑐄𑐩𑐶𑐎𑐾 𑐡𑐸𑐐𑐸 𑐠𑐷𑐠𑐷 𑐎𑑂𑐲𑐩𑐟𑐵 𑐄𑐖𑐐𑐵𑐬 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐠𑐷𑐠𑐷 𑐴𑑂𑐰𑑅𑐟𑐵𑑅 𑐔𑐹𑐮𑐵𑐎𑐾 𑐧𑐶𑐂𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐳𑑂𑐎𑐹𑐮𑐫𑐵 𑐴𑐬𑐾𑐎 𑐱𑐶𑐎𑑂𑐲𑐎𑐥𑐶𑑄𑐳𑑄 𑐠𑑅 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐠𑑅𑐐𑐸 𑐄𑐟𑑂𑐟𑐬𑐡𑐵𑐫𑐶𑐟𑑂𑐰 𑐠𑐸𑐂𑐎𑐵𑑅 𑐳𑐩𑑂𑐩𑐵𑐣𑐥𑐹𑐬𑑂𑐰𑐎 𑐠𑑅𑐐𑐸 𑐎𑑂𑐲𑐩𑐟𑐵 𑐰𑐶𑐎𑐵𑐳 𑐫𑐵𑐫𑐾𑐦𑐫𑐾𑐩𑐵 𑐢𑐎𑐵𑑅 𑐩𑐡𑐶𑐎𑑂𑐎 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐐𑐸 𑐡𑐂 𑑋 𑐰𑐶𑐖𑐾𑐱𑑂𑐰𑐬𑐷 𑐳𑐾𑐎𑐾𑐣𑑂𑐜𑐬𑐷 𑐳𑑂𑐎𑐹𑐮𑐫𑐵 𑐳𑑂𑐠𑐵𑐥𑐣𑐵 𑐳𑐣𑑂 𑑑𑑙𑑘𑑑 𑐃 𑐖𑐹𑐐𑐸 𑐏𑑅 𑑋 𑐳𑑂𑐠𑐵𑐥𑐣𑐵𑐎𑐵𑐮𑐫𑑂 𑐔𑐶𑐎𑐶𑐔𑐵𑐢𑑄𑐐𑐸 𑐳𑑂𑐎𑐸𑐮𑐥𑐵𑐏𑐾𑑄 𑐳𑐸𑐬𑐸 𑐖𑐹𑐐𑐸 𑐠𑑂𑐰 𑐳𑑂𑐎𑐹𑐮 𑐠𑑁𑑄 𑐡𑐾𑐫𑑂𑐫𑐵 𑐴𑐾 𑐕𑐐𑐹 𑐣𑑂𑐴𑑂𑐫𑑅𑐣𑐾𑐧𑐴𑑅𑐐𑐸 𑐳𑑂𑐎𑐹𑐮 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋

‘𑐖𑐶𑐩𑐶𑐐𑐸 𑐠𑑂𑐰 𑐳𑐦𑐮𑐟𑐵𑐫𑐵 𑐩𑐹 𑐎𑐵𑐬𑐞 𑐢𑐫𑐵𑐐𑐸 𑐴𑐾 𑐀𑐨𑐶𑐨𑐵𑐰𑐎, 𑐰𑐶𑐡𑑂𑐫𑐵𑐬𑑂𑐠𑐷𑐫𑐵 𑐮𑐶𑐳𑐾𑑄 𑐳𑐩𑐸𑐡𑐵𑐫𑑄 𑐫𑐵𑑅𑐐𑐸 𑐰𑐶𑐱𑑂𑐰𑐵𑐳𑐫𑐵 𑐎𑐵𑐬𑐞𑑄 𑐏𑑅’ 𑐥𑑂𑐬𑐶𑐣𑑂𑐳𑐶𑐥𑐮 𑐟𑐸𑐮𑐵𑐢𑐬𑑄 𑐎𑐣𑐵𑐡𑐷 𑑋 𑐰𑐫𑑂𑐎𑑅𑐥𑐶𑐣𑐶𑐐𑐸 𑐰𑐶𑐱𑑂𑐰𑐵𑐳𑑄 𑐴𑐾 𑐖𑐶𑐥𑐶𑑄 𑐠𑐸𑐮𑐶 𑐣𑑂𑐴𑑂𑐫𑐵𑑅 𑐰𑐫𑐾𑐦𑐸𑐐𑐸 𑐏𑑅 𑐢𑐫𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐢𑐫𑐵𑐡𑐷, ‘𑐰𑑄𑐐𑐸 𑐳𑑂𑐰𑐷𑐡𑑃𑐫𑐵 𑐡𑐸𑐣𑐾 𑐫𑐎𑑂𑐰 𑐴𑐾 𑐱𑐶𑐎𑑂𑐲𑐎 𑐱𑐶𑐎𑑂𑐲𑐶𑐎, 𑐎𑐬𑑂𑐩𑐔𑐵𑐬𑐷𑐥𑐶𑑄𑐳𑑄 𑐳𑑂𑐎𑐹𑐮𑐫𑐵𑐟 𑐠𑐣𑐟𑐎 𑐴𑐫𑐾𑐐𑐸 𑐣𑐶𑑄𑐟𑐶𑑄 𑐟𑑅𑐢𑑄𑐐𑐸 𑐩𑐾𑐴𑐣𑐟 𑐫𑐵𑑅𑐐𑐸 𑐡𑐸 𑑋’

𑐡𑐾𑐫𑑂𑐫𑐵 𑐴𑐾 𑐕𑐐𑐹 𑐄𑐟𑑂𑐎𑐺𑐲𑑂𑐚 𑐳𑑂𑐎𑐸𑐮 𑐎𑐠𑑄 𑐣𑐵𑑄𑐖𑐵𑑅𑐐𑐸 𑐳𑑂𑐎𑐹𑐮𑐫𑐵 𑐳𑑄𑐔𑐵𑐮𑐎, 𑐰𑑂𑐫𑐰𑐳𑑂𑐠𑐵𑐥𑐣, 𑐱𑐶𑐎𑑂𑐲𑐎 𑐱𑐶𑐎𑑂𑐲𑐎𑐵𑐥𑐶𑐣𑐶 𑐩𑐾𑐴𑐣𑐟 𑐠𑐸𑐮𑐶𑑄 𑐴𑐾 𑐎𑑂𑐰𑐔𑐵𑑅𑐐𑐸 𑐢𑐵𑑅𑐳𑐵 𑐩𑐡𑐸𑐣𑐶 𑑋 ‘𑐡𑐾𑐫𑑂𑐫𑐵 𑐎𑐬𑑂𑐞𑐢𑐵𑐬 𑐢𑐵𑐂𑐥𑐶𑑄 𑐮𑑂𑐫𑐵𑐫𑑂𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐄𑐟𑑂𑐎𑐺𑐲𑑂𑐚 𑐱𑐶𑐎𑑂𑐲𑐵 𑐧𑐶𑐂𑐐𑐸 𑐣𑐶𑑄𑐟𑐶𑑄 𑐱𑐿𑐎𑑂𑐲𑐶𑐎 𑐏𑑂𑐫𑐮𑐫𑑂 𑐰𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐔𑐸𑐣𑑁𑐟𑐶𑐫𑐵 𑐳𑐵𑐩𑐣𑐵 𑐫𑐵𑐫𑐾𑐟 𑐁𑑅 𑐣𑑄 𑐣𑑄 𑐠𑐷𑐠𑐷 𑐏𑑂𑐫𑑅𑐫𑐵 𑐰𑐶𑐖𑑂𑐘𑐥𑐶𑑄, 𑐱𑐶𑐎𑑂𑐲𑐵𑐰𑐶𑐡𑑂, 𑐀𑐨𑐶𑐨𑐵𑐰𑐎𑐥𑐶𑑄 𑐮𑐶𑐳𑐾 𑐊𑐎𑐖𑐸𑐚 𑐖𑐸𑐫𑐵𑑅 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣𑐵𑐐𑐸 𑐡𑐸’ 𑐩𑐫𑑂𑐖𑐸 𑐟𑐸𑐮𑐵𑐢𑐬𑑄 𑐢𑐫𑐵𑐡𑐶𑐮 𑑋

𑐥𑑂𑐮𑐳 𑐚𑐸 𑐥𑐵𑐏𑐾 𑐰𑐶𑐖𑐾𑐱𑑂𑐰𑐬𑐷 𑐳𑑂𑐎𑐹𑐮𑑄 𑐠𑑁𑑄𑐎𑐣𑑂𑐴𑐫𑑂 𑐩𑑂𑐫𑐵𑐣𑐾𑐖𑐩𑐾𑐣𑑂𑐚 𑐰 𑐦𑐵𑐂𑐣 𑐁𑐬𑑂𑐚 𑐰𑐶𑐲𑐫𑐫𑑂 𑐧𑑂𑐰𑑄𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐔𑐵𑐬𑑂𑐚𑐬𑑂𑐜 𑐊𑐎𑐵𑐄𑐣𑑂𑐚𑐾𑐣𑑂𑐚, 𑐚𑑂𑐬𑐵𑐨𑐮 𑐊𑐞𑑂𑐜 𑐚𑐸𑐬𑐶𑐖𑐩, 𑐴𑑀𑐚𑐮𑐖 𑐩𑑂𑐫𑐵𑐣𑐾𑐖𑐩𑐾𑐣𑑂𑐚, 𑐧𑐿𑐎𑐶𑑄𑐐 𑐮𑐶𑐳𑐾𑑄 𑐰𑑂𑐫𑐰𑐳𑑂𑐠𑐵𑐥𑐣𑐫𑐵 𑐠𑐷𑐠𑐷 𑐏𑑂𑐫𑐮𑐫𑑂 𑐰𑐣𑐾 𑐔𑐵𑐴𑐾 𑐖𑐹𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑐶 𑐣𑐶𑑄𑐟𑐶𑑄 𑐩𑑂𑐫𑐵𑐣𑐾𑐖𑐩𑐾𑐣𑑂𑐚𑐫𑐵 𑐀𑐢𑑂𑐫𑐵𑐥𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐠𑐣𑑄 𑐩𑑂𑐫𑐵𑐣𑐾𑐖𑐩𑐾𑐣𑑂𑐚 𑐰𑐶𑐲𑐫 𑐎𑐫𑐵𑑅 𑐀𑐢𑑂𑐫𑐫𑐣 𑐫𑐵𑐣𑐵 𑐰𑑄𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐧𑐿𑑄𑐎𑐬, 𑐀𑐬𑑂𑐠𑐱𑐵𑐳𑑂𑐟𑑂𑐬𑐷, 𑐬𑐵𑐖𑐱𑑂𑐰 𑐀𑐢𑐶𑐎𑐺𑐟, 𑐳𑐾𑐮𑑂𑐳 𑐊𑐞𑑂𑐜 𑐩𑐵𑐬𑑂𑐎𑐾𑐚𑐶𑐒𑑂𑐐 𑐎𑑂𑐲𑐾𑐟𑑂𑐬𑐫𑑂, 𑐳𑑂𑐚𑐎 𑐰 𑐦𑐵𑐂𑐣𑐵𑐣𑑂𑐳 𑐊𑐣𑐵𑐮𑐵𑐂𑐳𑐶𑐳𑑂𑐚, 𑐰𑐶𑐖𑐣𑐾𑐱 𑐜𑐾𑐨𑐮𑐥𑐩𑐾𑐣𑑂𑐚 𑐀𑐦𑐶𑐳𑐬, 𑐰𑐶𑐖𑐣𑐾𑐱 𑐥𑑂𑐬𑐩𑑀𑐚𑐬, 𑐊𑐜𑐩𑐶𑐣𑐶𑐳𑑂𑐚𑐾«𑐚𑐶𑐨 𑐴𑐾𑐜 𑐖𑐸𑐂𑐐𑐸 𑐎𑑂𑐲𑐩𑐟𑐵 𑐰𑐶𑐎𑐵𑐳 𑐖𑐸𑐂𑐐𑐸 𑐮𑐶𑐳𑐾𑑄 𑐠𑑅𑐐𑐸 𑐴𑐾 𑐧𑐶𑐳𑑂𑐎𑑄 𑐳𑑂𑐰𑐟𑐣𑑂𑐟𑑂𑐬 𑐄𑐡𑑂𑐫𑑀𑐐 𑐔𑐵𑐫𑐾𑐎𑐾𑐐𑐸 𑐰𑐵 𑐰𑑂𑐫𑐰𑐳𑐵𑐫 𑐫𑐵𑐫𑐾𑐟 𑐳𑐎𑑂𑐲𑐩 𑐖𑐸𑐂𑐐𑐸 𑐡𑐵𑐰𑐷 𑐰𑐫𑑂𑐎𑑅𑐫𑐵 𑐡𑐸 𑑋

𑐠𑐣 𑐳𑑂𑐎𑐸𑐮𑐫𑑂 𑐦𑐵𑐂𑐣 𑐁𑐬𑑂𑐚 𑐎𑐫𑐵𑑅 𑐣𑑄 𑐧𑑂𑐰𑐣𑐾 𑐡𑐂 𑑋 𑐎𑐮𑐵 𑐎𑑂𑐲𑐾𑐟𑑂𑐬𑐫𑑂 𑐰𑐣𑐾 𑐔𑐵𑐴𑐾 𑐖𑐹𑐥𑐶𑑄 𑐮𑐶𑐳𑐾𑑄 𑐦𑐾𑐳𑐣 𑐜𑐶𑐖𑐵𑐂𑐣𑐬, 𑐂𑐣𑑂𑐚𑐾𑐬𑐶𑐫𑐬 𑐜𑐶𑐖𑐵𑐂𑐣𑐬, 𑐦𑑀𑐚𑑀𑐐𑑂𑐬𑐵𑐦𑐬 𑐁𑐡𑐶 𑐖𑐸𑐂 𑐣𑑂𑐴𑑂𑐫𑐵𑑅𑐥𑐶𑑄𑐳𑑄 𑐠𑑂𑐰 𑐰𑐶𑐲𑐫 𑐧𑑂𑐰𑐣𑐾 𑐦𑐂 𑑋 𑐦𑐵𑐂𑐣 𑐁𑐬𑑂𑐚 𑐰𑐶𑐲𑐫 𑐖𑐹𑐳𑐵𑑄 𑐠𑐸𑐎𑐷 𑐂𑑄𑐐𑑂𑐮𑐶𑐳 𑐰 𑐣𑐾𑐥𑐵𑐮𑐷 𑐀𑐣𑐶𑐰𑐵𑐬𑑂𑐫 𑐰𑐶𑐲𑐫 𑐖𑐸𑐂 𑑋

𑐥𑑂𑐮𑐳 𑐚𑐸 𑐮𑐫𑑂 𑐦𑐵𑐂𑐣 𑐁𑐬𑑂𑐚 𑐎𑐫𑐵𑑅 𑐧𑑂𑐰𑑄𑐥𑐶𑑄𑐳𑑄 𑐊𑐣𑐶𑐩𑐾𑐱𑐣, 𑐐𑑂𑐬𑐵𑐦𑐶𑐎 𑐜𑐶𑐖𑐵𑐫𑐣, 𑐦𑐾𑐳𑐣, 𑐌𑐬𑐶𑐐𑐵𑐩𑐷, 𑐖𑑂𑐰𑐾𑐮𑐬𑐷 𑐜𑐶𑐖𑐵𑐂𑐣, 𑐰𑐶𑐖𑑂𑐘𑐵𑐥𑐣, 𑐦𑐶𑐮𑑂𑐩, 𑐣𑐵𑐚𑐎, 𑐂𑐣𑑂𑐚𑐾𑐬𑐶𑐫𑐬 𑐰 𑐊𑐎𑑂𑐚𑐾𑐬𑐶𑐫𑐬, 𑐦𑑀𑐚𑑀𑐐𑑂𑐬𑐵𑐦𑐶, 𑐳𑐾𑐬𑐵𑐩𑐶𑐎 𑐁𑐬𑑂𑐚, 𑐂𑐣𑑂𑐜𑐲𑑂𑐚𑑂𑐬𑐶𑐫𑐮 𑐜𑐶𑐖𑐵𑐂𑐣𑐬, 𑐐𑐾𑐩 𑐜𑐶𑐖𑐵𑐂𑐣𑐳, 𑐎𑐵𑐬𑑂𑐚𑐸𑐣, 𑐰𑐾𑐧 𑐜𑐶𑐖𑐵𑐂𑐣, 𑐁𑐬𑑂𑐚 𑐜𑐵𑐂𑐬𑐾𑐎𑑂𑐚𑐬, 𑐁𑐬𑑂𑐚 𑐰 𑐊𑐣𑑂𑐚𑐶𑐎 𑐜𑐶𑐖𑐫𑐵𑐬, 𑐜𑐶𑐖𑐶𑐚𑐮 𑐁𑐬𑑂𑐚𑐶𑐳𑑂𑐚, 𑐳𑑄𑐷𑐟, 𑐩𑐹𑐬𑑂𑐟𑐶𑐎𑐵𑐬, 𑐔𑐶𑐟𑑂𑐬𑐎𑐵𑐬𑐷, 𑐂𑐨𑐾𑐣𑑂𑐚 𑐩𑑂𑐫𑐵𑐣𑐾𑐖𑐩𑐾𑐣𑑂𑐚 𑐁𑐡𑐶 𑐎𑑂𑐲𑐾𑐟𑑂𑐬𑐫𑑂 𑐠𑑅𑐐𑐸 𑐎𑑂𑐫𑐵𑐬𑐶𑐫𑐬 𑐡𑐫𑐾𑐎𑐾𑐦𑐂 𑑋

𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐠𑑁𑑄𑐫𑐵 𑐃 𑐎𑐠𑑄 𑐮𑑂𑐰𑐫𑐾𑐎 𑐧𑑂𑐰𑑄𑐎𑐾𑐐𑐸 𑐣𑐶𑑄𑐟𑐶𑑄 𑐳𑑂𑐎𑐸𑐮𑐫𑑂 𑐨𑑁𑐟𑐶𑐎 𑐥𑐹𑐬𑑂𑐰𑐵𑐢𑐵𑐬𑐫𑑂 𑐣𑑄 𑐄𑐟𑑂𑐎𑐺𑐲𑑂𑐚 𑐎𑐠𑑄 𑐡𑐫𑐾𑐎𑐵𑐟𑑅𑐐𑐸 𑐡𑐸 𑑋 𑐣𑑂𑐴𑑂𑐫𑐵𑐧𑐮𑐾𑑄 𑐣𑐶𑐨𑐵𑑅 𑐏𑐂 𑐎𑐠𑑄 𑐎𑐎𑑂𑐲𑐵 𑐎𑑂𑐰𑐠𑐵 𑐡𑐸 𑑋 𑐩𑐮𑑂𑐚𑐶𑐩𑐶𑐜𑐶𑐫𑐵, 𑐎𑐩𑑂𑐥𑑂𑐫𑐹𑐚𑐬 𑐥𑑂𑐬𑐫𑑀𑐐𑐱𑐵𑐮𑐵, 𑐮𑐵𑐂𑐧𑑂𑐬𑐾𑐸𑐬𑐷, 𑐦𑐵𑐂𑐣 𑐁𑐬𑑂𑐚 𑐳𑑂𑐚𑐸𑐜𑐶𑐫𑑀 𑐠𑐾𑑄𑐖𑑂𑐫𑐵𑑅𑐐𑐸 𑐥𑐹𑐬𑑂𑐰𑐵𑐢𑐵𑐬 𑐥𑐹𑐰𑑄𑐎 𑐥𑑂𑐬𑐰𑐶𑐢𑐶 𑐰 𑐁𑐢𑐸𑐣𑐶𑐎 𑐬𑐸𑐥𑑄 𑐡𑐫𑐾𑐎𑐵𑐟𑑅𑐐𑐸 𑐡𑐸 𑑋 𑐀𑐠𑐾𑐴𑐾 𑐳𑑂𑐎𑐸𑐮𑑄 𑐠𑐷𑐠𑐷 𑐎𑐵𑐳𑐵𑐫𑐵 𑐣𑐶𑑄𑐟𑐶𑑄 𑐠𑐵𑐫𑑂 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋