𑐩𑐶𑐣𑐵 𑐧𑐖𑑂𑐬𑐵𑐔𑐵𑐬𑑂‍𑐫

𑐖𑐶𑐟 𑐩𑐔𑐵𑑄𑐣𑐶𑐳𑐾𑑄 𑐖𑐵𑐐𑐶𑐬 𑐣𑐫𑐾𑐐𑐸 𑐟𑑅𑐢𑑄𑐐𑐸 𑐱𑑁𑐏 𑐏𑑅 𑑋 𑐕𑐐𑐹 𑐟𑑅𑐢𑑄𑐐𑐸 𑐀𑐦𑐶𑐳𑐫𑑂 𑐖𑑂𑐫𑐵 𑐫𑐵𑐣𑐵𑑅 𑐢𑑂𑐫𑐧𑐵 𑐎𑐩𑐾 𑐫𑐵𑐣𑐵𑑅 𑐩𑐵𑑄𑐀𑐧𑐸 𑐰 𑐟𑐟𑐵𑐥𑐶𑑄𑐟 𑐥𑑂𑐬𑐟𑐶𑐥𑐵𑐮 𑐫𑐵𑐫𑐾𑐐𑐸 𑐴𑐾 𑐖𑐶𑐐𑐸 𑐪𑐐𑐳 𑑋 𑐕𑐵𑐫𑑂𑐢𑐵𑑅𑐳𑐵 𑐖𑐶 𑐕𑐪 𑐩𑐢𑑂𑐫𑐩𑐰𑐬𑑂‍𑐐 𑐀𑐗 𑐢𑐵𑐫𑐾 𑐐𑐬𑐷𑐧 𑐥𑐬𑐶𑐰𑐵𑐬𑐫𑐵 𑐎𑐵𑐫𑑂𑐩𑐔𑐵 𑑋 𑐖𑐶𑐩𑐶 𑐀𑐧𑐸 𑐐𑐬𑐶𑐧𑐷𑐫𑐵 𑐎𑐵𑐬𑐞𑑄 𑐮𑐵𑐳𑐵𑐫𑑂 𑐮𑐵𑐣𑐵𑐔𑑂𑐰𑐣 𑑋 𑐀𑐧𑐸𑐫𑐵𑐟 𑐧𑐵𑑄𑐮𑐵𑐎 𑐰𑐵𑐳𑑅 𑐫𑐵𑐎𑐾𑐟 𑐖𑐶𑐩𑐶𑐎𑐾 𑐩𑐵𑐎𑑂𑐰 𑐢𑑂𑐫𑐧𑐵 𑐩𑐡𑐸 𑑋 𑐎𑐩𑐾𑐫𑐵𑐣𑐵𑑅 𑐣𑐎𑐷𑐪 𑐀𑐧𑐸 𑐴𑐾 𑐮𑐵𑐳𑐵𑐫𑑂 𑐮𑐵𑑅𑐧𑐮𑐫𑑂 𑐖𑐶𑐩𑐶𑐐𑐸 𑐁𑐬𑑂‍𑐠𑐶𑐎 𑐳𑑂𑐟𑐬 𑐗𑐣 𑐗𑐣 𑐳𑑂𑐫𑐣𑐵𑐰𑐣 𑑋 𑐩𑐵𑐩𑑄 𑐥𑐶𑐣𑐾 𑐳𑐵𑐴𑐸𑐟𑐫𑑂𑐠𑐵𑐫𑑂 𑐖𑑂𑐫𑐵 𑐫𑐵𑐣𑐵𑑅 𑐕𑐐𑑅 𑐣𑐶𑐐𑑅 𑐢𑑂𑐫𑐧𑐵 𑐎𑐩𑐾 𑐫𑐵𑐣𑐵𑐴𑐂 𑑋 𑐰 𑐢𑑂𑐫𑐧𑐵𑑄 𑐖𑐶𑐥𑐶𑑄 𑐣𑑂𑐫𑐵𑐪 𑐩𑐳𑑂𑐟𑐫𑑂𑐐𑐸 𑐁𑐏𑑅 𑐧𑑂𑐰𑑄𑐎𑐾𑐐𑐸 𑐏𑐬𑑂‍𑐔𑐮𑐵 𑐕𑐸 𑐣𑐫𑐾𑐟 𑐟𑐎𑑄 𑐩𑐐𑐵𑑅 𑑋 𑐄𑐎𑐶𑑄 𑐖𑐳𑑀𑐟𑐳𑑀 𑐎𑐵𑐫𑑂 𑐖𑐹𑐐𑐸𑐫𑐵 𑐣𑐵𑐟𑐵𑑄 𑐖𑐶𑑄 𑐖𑐎 𑐧𑑂𑐰𑐣𑐾 𑐏𑐣 𑐳𑐬𑐎𑐵𑐬𑐷 𑐳𑑂𑐎𑐹𑐮𑐫𑑂 𑑋 𑐖𑐶𑐩𑐶 𑐥𑑂𑐫𑐪 𑐟𑐟𑐵𑐥𑐶𑑄𑐣𑐶 𑐁𑐏𑑅 𑐧𑑂𑐰𑐣𑐾 𑐩𑐣 𑐡𑐫𑐵𑑅 𑐣𑑄 𑐧𑑂𑐰𑐣𑐾 𑐩𑐏𑑄 𑑋
𑐐𑐬𑐶𑐧𑐷, 𑐀𑐨𑐵𑐰 𑐰 𑐳𑐩𑐳𑑂𑐫𑐵𑑄 𑐫𑐵𑐣𑐵𑑅 𑐟𑐟𑐵𑐥𑐶𑑄 𑐮𑑂𑐫𑐵𑐳𑐾 𑐖𑐸𑐫𑐵𑐰𑐮 𑐣𑑄 𑐂𑐴𑐶𑐥𑐵 𑐫𑐵𑐣𑐵𑑅 𑐧𑐷𑐩𑐦𑐸 𑑋 𑐣 𑐟 𑐂𑐩𑐶𑐟 𑐳𑐸𑐣𑐵𑑄 𑐢𑐵𑑅𑐰𑐫𑐾𑐐𑐸 𑐴𑐾 𑐫𑐵𑐟 𑑋 𑐢𑐵𑑅 𑐴𑐾 𑐰𑑅𑐳𑐵𑑄 𑐖𑐶𑐩𑐶𑐐𑐸 𑐳𑑂𑐰𑐫𑐵𑑄 𑐎𑑂𑐰𑐴𑑂𑐫𑑄𑐐𑐸 𑐥𑐬𑐶𑐰𑐵𑐬 𑐎𑐶 𑐎𑐮𑐵𑑅 𑐩𑐳𑑂𑐟 𑐡𑐸𑐥𑐶𑑄 𑐳𑐵 𑐐𑐸𑐮𑐶𑑄 𑐎𑐮𑐵𑑅 𑐳𑐷𑐥𑐶𑑄, 𑐐𑐸𑐮𑐶𑑄 𑐧𑐸𑐬𑐵𑐥𑐶𑑄, 𑐮𑑂𑐰𑐐𑐶 𑐰 𑐀𑐥𑐵𑑄𑐐𑐟𑐫𑑂𑐟 𑐖𑐎 𑑋 𑐀𑐖𑑂𑐫𑐵𑑅𑐥𑐶𑑄𑐟 𑐧𑐶𑐫𑐵𑑅 𑐡𑐸𑑅𑐏 𑐴𑐾 𑐳𑐷𑐐𑐸 𑐏𑑅𑐳𑐵 𑐕𑐾𑑃𑐫𑑂 𑐟𑐫𑐵𑑅 𑐧𑐸𑐬𑐷𑐎𑐣𑑂𑐫𑐵 𑐴𑐾 𑐫𑐵𑐣𑐵𑐟𑐫𑐾 𑐢𑐎𑐵𑑅 𑐩𑐵𑑄𑐀𑐧𑐸𑑄 𑐧𑐶𑐫𑐵𑐩𑐕𑑂𑐰𑑅 𑑋 𑐟𑐟𑐵𑐥𑐶𑑄𑐳𑑄 𑐣𑑄 𑐠𑑅𑐠𑐪𑑄 𑐦𑐸𑐦𑐸𑐠𑐾𑑄 𑐳𑐶𑐮𑐵𑐂 𑐧𑐸𑐣𑐵𑐂 𑐖𑑂𑐫𑐵 𑐫𑐵𑐣𑐵𑑅 𑐨𑐔𑐵𑐨𑐔𑐵 𑐎𑐩𑐾 𑐫𑐵𑐣𑐵𑐔𑑂𑐰𑐣 𑑋 𑐣𑐶𑐪 𑐟𑐟𑐵𑐥𑐶𑐣𑐶𑐐𑐸 𑐧𑐮𑑂𑐮𑐟𑐮𑑂𑐮 𑐂𑐴𑐶𑐥𑐵 𑐖𑐸𑐮 𑑋 𑐟𑐬 𑐣𑐶𑐪 𑐕𑐾𑑃𑐫𑑂 𑐴𑐾 𑐮𑑂𑐫𑐣𑐵𑐔𑑂𑐰𑐣 𑑋 𑐂𑐩𑐶𑐐𑐸 𑐴𑐾 𑐎𑐩𑐵𑐂 𑐣𑑄 𑐖𑐶𑑄 𑐊𑐳.𑐊𑐮.𑐳𑐷 𑐟𑐎 𑐧𑑂𑐰𑐣𑐵 𑑋 𑐊𑐳.𑐊𑐮.𑐳𑐷 𑐳𑐶𑐢𑐎𑐾𑐎𑐵𑑅 𑐖𑐶𑑄 𑐖𑐵𑐐𑐶𑐬 𑐩𑐵𑐮𑐾𑐐𑐸 𑐎𑐸𑐟𑑅 𑐫𑐵𑐣𑐵 𑑋 𑐏𑑅𑐠𑐵𑐫𑑂 𑐖𑐶𑐄𑐠𑐵𑐫𑑂 𑐐𑐣𑑄 𑐖𑐵𑐐𑐶𑐬 𑐩𑐮𑐹 𑑋 𑐖𑐵𑐐𑐶𑐬 𑐣𑐫𑐾𑐟 𑐣𑑄 𑐖𑐵𑐐𑐶𑐬 𑐣𑐫𑐵𑐐𑐸 𑐳𑑂𑐰𑐡𑑃 𑐥𑑂𑐫𑐡𑑃𑐫𑐵 𑐀𑐣𑐸𑐨𑐰 𑐣𑐶 𑐩𑐵𑑅 𑐴𑑃 𑑋 𑐖𑐵𑐐𑐶𑐬 𑐣𑐫𑐾 𑐏𑑄𑐐𑐸𑐳𑐵 𑐀𑐣 𑐴𑐵𑐎𑐣𑑄 𑐖𑐵𑐐𑐶𑐬 𑐣𑐫𑐾𑐐𑐸 𑐎𑐸𑐟𑑅 𑐕𑐵𑐫𑑂 𑐫𑐵𑐣𑐵𑐔𑑂𑐰𑐣𑐾 𑐩𑐵𑐮 𑐖𑐶𑑄 ? 𑐰 𑐴𑐾 𑐖𑐵𑐐𑐶𑐬 𑐣𑐫𑐾 𑐢𑐎𑐵𑑅 𑐮𑐵 𑐰𑐫𑐵 𑐟𑐶𑐣𑐶 𑑋 𑐖𑐵𑐐𑐶𑐬 𑐩𑐵𑐩𑐵𑑄 𑐧𑐷𑐊. 𑐠𑑂𑐫𑐣 𑑋 𑐧𑐷.𑐊. 𑐠𑑂𑐫𑑄𑐎𑐵 𑐁𑐏𑑅 𑐧𑑂𑐰𑑃𑐧𑑂𑐰𑑄 𑐔𑐶𑐔𑐶𑐢𑑄𑐐𑐸 𑐖𑐵𑐐𑐶𑐬 𑐮𑐸𑐫𑐵𑐰𑐮 𑑋 𑐩𑐡𑐸𑐐𑐸 𑐳𑑂𑐰𑐫𑐵𑑄 𑐡𑐸𑐐𑐸 𑐧𑐵𑑄𑐮𑐵 𑐢𑐎𑐵𑑅 𑐖𑐵𑐐𑐶𑐬 𑐣𑐫𑐵𑑅 𑑋 𑐟𑐬 𑐰 𑐖𑐵𑐐𑐶𑐬 𑐳𑑂𑐠𑐵𑐫𑐷 𑐩𑐏𑐸 𑐀𑐳𑑂𑐠𑐵𑐫𑐷 𑐖𑐎 𑑋 𑐐𑐸𑐮𑐶𑑄 𑐮𑐕𑐶, 𑐐𑐸𑐮𑐶𑑄 𑐳𑑂𑐰𑐮𑐵, 𑐐𑐸𑐮𑐶𑑄 𑐏𑐸𑐮𑐵𑐫𑐵 𑐣𑐶𑑄𑐟𑐶𑑄 𑐖𑐎 𑑋 𑐊𑐳.𑐊𑐮.𑐳𑐷. 𑐕𑐐𑐹 𑐥𑐵𑐳 𑐖𑐸𑐮𑐎𑐶 𑐖𑐵𑐐𑐶𑐬 𑐣𑐎𑐵𑐧𑐷 𑐧𑐵𑐄 𑐢𑐵𑑅𑐥𑐶𑑄𑐳𑑄 𑐧𑐷.𑐊. 𑐥𑐵𑐳 𑐖𑐸𑐮 𑐣𑑄 𑐳𑐸𑐣𑐵𑑄 𑐖𑐵𑐐𑐶𑐬 𑐩𑐧𑐶𑐄 𑑋 𑐣𑐶𑐬𑐵𑐱 𑐖𑐸𑐫𑐵𑑅 𑐰𑐶𑐡𑐾𑐱 𑐰𑐣𑐾𑐐𑐸 𑐧𑐶𑐔𑐵𑑅 𑐣𑑄 𑐩𑐫𑐵𑐣𑐵𑐐𑐸 𑐩𑐏𑐸 𑑋 𑐟𑐬 𑐀𑐣 𑐰𑐣𑐾𑐟 𑐣𑑄 𑐮𑐵 𑐀𑑅𑐥𑐸 𑐩𑐖𑐹 𑑋 𑐤𑐵𑐥𑐵𑑄 𑐧𑐿𑑄𑐎 𑐧𑑂𑐫𑐵𑐮𑐾𑐣𑑂𑐳 𑐣𑐶𑑄 𑐎𑑂𑐫𑐣𑐾 𑐩𑐵𑑅 𑐴𑑃 𑑋 𑐧𑐿𑑄𑐎 𑐧𑑂𑐫𑐵𑐮𑐾𑐣𑑂𑐳 𑐮𑐵 𑐕𑐸 𑐖𑐶𑐩𑐶𑐳𑑄 𑐧𑐿𑑄𑐎𑐫𑑂 𑐥𑐮𑐵𑑅 𑐟𑐎𑑄 𑐟𑐫𑐾 𑐩𑐣𑑄 𑑋 𑐄𑐎𑐶𑐳𑐣𑑄 𑐪𑑄 𑐩𑐦𑐸𑐪 𑐀𑐧𑐸 𑐧𑐸𑐬𑐶𑐪 𑐩𑐵𑑄 𑐰 𑐂𑐴𑐶𑐥𑐵 𑐩𑐖𑐹𑐥𑐶𑑄 𑐟𑐟𑐵𑐥𑐶𑑄 𑐣𑐶𑐪 𑐟𑑂𑐰𑑅𑐟𑐵𑑅 𑐐𑐠𑐾 𑐰𑐣𑐾𑐐𑐸 ?

𑐖𑐶 𑐮𑑂𑐫𑐵𑐫𑑂𑐪 𑐖𑐸𑐫𑐵𑐰𑐮 𑑋 𑐄𑐎𑐶𑑄 𑐖𑐶𑐐𑐸 𑐂𑐴𑐶𑐥𑐵𑐫𑐵 𑐏𑑃 𑐖𑐸𑐂𑐐𑐸 𑐱𑐸𑐬𑐸 𑐖𑐸𑐮 𑑋 𑐟𑐬 𑐳𑑂𑐫𑐾𑐮𑑂𑐮𑐵𑑅𑐐𑐸 𑐖𑐵𑐐𑐶𑐬 𑐕𑐐𑐹 𑐩𑐡𑐫𑐾𑐎𑑄 𑐂𑐴𑐶𑐥𑐵 𑐫𑐵𑐣𑐵 𑐣𑑄 𑐕𑐸 𑐫𑐵𑐫𑐾 ? 𑐀𑐠𑐾𑐳𑐵𑑄 𑐳𑐎𑐳𑐶𑐣𑑄 𑐎𑐬 𑐫𑐵𑐟 𑑋 “𑐂𑐴𑐶𑐥𑐵 𑐣𑐶 𑐫𑐵 𑐮𑐾, 𑐖𑐵𑐐𑐶𑐬 𑐮𑐵 𑐮𑐶𑐥𑐵 𑐮𑐸𑐫𑐵 𑐰 𑐴𑐾 𑐰𑐂𑐣𑐶 𑑋 𑐕 𑐧𑑂𑐰𑐣𑐵𑐟𑑅𑐪 𑐣𑑄 𑐏𑑅 𑑋” 𑐠𑑂𑐰 𑐏𑑃𑐫𑐵𑐟 𑐖𑐶𑑄 𑐳𑑂𑐰𑐷𑐎𑐵𑐬 𑐫𑐵𑐣𑐵 𑑋 𑐂𑐴𑐶𑐥𑐵 𑐫𑐵𑐫𑐾𑐟 𑐟𑐫𑐵𑐬 𑐣𑑄 𑐖𑐸𑐫𑐵 𑑋 𑐟𑐬 𑐖𑐶𑐣𑐵𑐥 𑐂𑐴𑐶𑐥𑐵 𑐫𑐵𑐫𑐾𑐟 𑐳𑐸𑑄 𑐣𑑄 𑐟𑐫𑐵𑐬 𑐩𑐖𑐹 𑑋 𑐎𑐵𑐬𑐞 𑐖𑐶𑐐𑐸 𑐐𑐬𑐶𑐧𑐷 𑐰 𑐖𑐵𑐐𑐶𑐬 𑐩𑐡𑐸𑐐𑐸 𑐳𑑂𑐰𑐫𑐵𑑄 𑐖𑐶𑐩𑐶 𑐂𑐴𑐶𑐥𑐵 𑐩𑐖𑐹𑐣𑐶𑐥𑐶𑑄 𑐟𑐟𑐵𑐥𑐶𑑄 𑑋 𑐧𑐸𑐬𑐶𑐎𑐣𑑂𑐫𑐵𑐟 𑐡𑐸𑐐𑐸 𑐕𑑃𑐫𑑂 𑐨𑑁𑐩𑐳𑑂𑐟 𑐔𑑂𑐰𑐣𑐵 𑐣𑐫𑐾𑐦𑐂𑐩𑐏𑐸 𑐴𑑃 𑑋 𑐂𑐩𑐶𑐟 𑐠𑐵𑐎𑐸𑐂 𑐴𑑃 𑑋 𑐄𑐎𑐶𑑄 𑐎𑐶 𑐩𑐏𑐸𑐳𑐵 𑐳𑐳𑐮𑐫𑑂 𑐴𑐾 𑐔𑑂𑐰𑐣𑐾𑐐𑐸 𑐖𑐹𑐳𑐵 𑐖𑐎 𑐂𑐴𑐶𑐥𑐵 𑐫𑐵𑐣𑐵𑐧𑐷 𑐴𑑃 𑑋 𑐄𑐦𑑂 𑐩𑐣𑐹𑐟𑐫𑑂𑐐𑐸 𑐳𑑂𑐰𑐵𑐬𑑂‍𑐠𑐶𑐫𑐵 𑐏𑑃 𑐣𑑂𑐫𑑃𑐣𑑂𑐫𑑄 𑐴𑐾 𑐖𑐶 𑐴𑐷𑐩𑐷𑐔𑐵𑑅 𑑋 𑐠𑑅𑐐𑐸 𑐳𑐸𑐏𑐫𑐵 𑐣𑐶𑑄𑐟𑐶𑑄 𑐎𑐬𑐥𑐶𑐣𑐶𑐐𑐸 𑐡𑐸𑑅𑐏𑐫𑐵 𑐔𑐶𑐄𑐟𑐵𑑅 𑐟𑐎𑑄 𑐩𑐟𑑅 𑑋 𑐖𑐶𑑄 𑐩𑐵𑑄𑐀𑐧𑐸 𑐟𑐟𑐵𑐥𑐶𑑄 𑐐𑐸𑐥𑐶𑑄𑐳𑑄 𑐖𑐶𑐐𑐸 𑐮𑐵𑐐𑐶 𑐟𑑂𑐫𑐵𑐐 𑐰 𑐟𑐥𑐳𑑂𑐫𑐵 𑐫𑐵𑐣𑐵𑑅 𑐧𑑂𑐰𑐮𑑄𑐎𑐮, 𑐁𑐏𑑅 𑐧𑑂𑐰𑑄𑐎𑐮, 𑐠𑑁𑑄 𑐖𑐶𑑄 𑐂𑐩𑐶𑐟 𑐠𑑅𑐐𑐸 𑐳𑐸𑐏𑐨𑑀𑐐𑐫𑐵 𑐣𑐶𑑄𑐟𑐶𑑄 𑐐𑐠𑐾 𑐟𑑂𑐫𑐵𑐐 𑐫𑐵𑐫𑐾𑐦𑐂 ?
𑐧𑐮𑑂𑐮𑐟𑐮𑑂𑐮 𑐕𑐪 𑐩𑐶𑐳𑐵 𑐂𑐴𑐶𑐥𑐵 𑐫𑐵𑐫𑐾𑐟 𑐔𑐹𑐮𑐵𑐟 𑑋 𑐱𑐵𑐫𑐡 𑐨𑐐𑐰𑐵𑐣𑑄 𑐰 𑐖𑐶𑐟𑑅 𑐖𑐶 𑐰𑐫𑐵𑐟 𑐢𑐎𑐵𑑅 𑐴𑐾 𑐠𑑂𑐰 𑐢𑐬𑑂‍𑐟𑐶𑐂 𑐕𑑂𑐰𑐫𑐵𑐴𑑅𑐐𑐸 𑐖𑐸𑐂𑐩𑐵𑑅 𑑋 𑐰𑑄 𑐖𑐶𑐐𑐸 𑐖𑐶𑑄 𑐰𑐫𑐵𑐐𑐸 𑐡𑐸𑑅𑐏 𑐠𑐹 𑑋 𑐳𑐸𑐏𑐡𑐸𑑅𑐏 𑐧𑑂𑐫𑐵𑑅 𑑋 𑐣𑐩𑐶𑐟𑐵 𑐖𑐶𑐪 𑐖𑐴𑐵𑐣 𑐖𑐸𑐫𑐵𑑅 𑐕𑐾𑑃𑐫𑑂 𑐡𑐸𑐴𑐵𑑄 𑐰𑐳𑐵𑑄𑐣𑐶𑐳𑐾𑑄 𑐕𑑃𑐫𑐵 𑐰𑐵𑐟𑐵𑐰𑐬𑐞𑐫𑑂 𑐴𑐶𑐄𑐥𑐵𑑅 𑐰𑐮 𑑋 𑐖𑑅𑐮𑐵𑐏𑑅𑐮𑐵 𑐃𑐲𑑂𑐚𑐩𑐶𑐟𑑂𑐬𑐥𑐶𑑄𑐳𑑄 𑐣𑑄 𑐴𑐾𑐧𑐵𑐫𑑂𑐔𑐧𑐵𑐫𑑂 𑐫𑐵𑐫𑐾 𑐩𑐕𑐵𑐮 𑑋 𑐖𑐶𑐐𑐸 𑐣𑑄 𑐕𑐐𑐹 𑐥𑑂𑐬𑐵𑐂𑐨𑐾𑐚 𑐎𑐩𑑂𑐥𑐣𑐷𑐂 𑐊𑐎𑐵𑐄𑐞𑑂𑐚𑐾𑐣𑑂𑐚𑐫𑐵 𑐖𑑂𑐫𑐵 𑐔𑐹𑐮𑐵𑐟 𑑋 𑐖𑐷𑐰𑐣 𑐨𑐟𑐶𑐔𑐵 𑐳𑐴𑐖 𑐖𑐸𑐂 𑐩𑐮𑐵𑐰𑑄 𑐀𑐧𑐸𑑄 𑐠𑑂𑐰 𑐀𑐣𑐶𑐟𑑂𑐫 𑐳𑑄𑐳𑐵𑐬 𑐟𑑂𑐰𑐟𑐵𑐰𑐣 𑑋 𑐱𑐵𑐫𑐡 𑐀𑐧𑐸𑐫𑐵 𑐂𑐔𑑂𑐕𑐵 𑐥𑐹𑐰𑐣 𑐖𑐸𑐂𑐩𑐵𑑅 𑑋 𑐄𑐎𑐶𑑄 𑐖𑐶𑐩𑐶𑐟 𑐟𑑂𑐰𑑅𑐟𑐵𑐰𑐣 𑑋

𑐥𑑂𑐬𑐵𑐂𑐨𑐾𑐚 𑐎𑐩𑑂𑐥𑐣𑐷𑐂 𑐖𑐵𑐐𑐶𑐬 𑐣𑐫𑐵𑐔𑑂𑐰𑐣𑐵𑐐𑐸 𑐣𑑄 𑐗𑐶𑐡𑑃÷𑐗𑐶𑑄𑐣𑐶𑐡𑑃 𑐡𑐟 𑑋 𑐤𑐵𑐥𑐵 𑐤𑐶𑑄𑐤𑐶𑑄 𑐖𑑂𑐫𑐵 𑐖𑐎 𑐀𑐥𑑂𑐰𑑅 𑐖𑐸𑐫𑐵 𑐔𑑂𑐰𑐣𑐷𑐐𑐸 𑐁𑑅 𑐨𑐵𑐲𑐞, 𑐮𑑂𑐰𑐵𑐥𑐸, 𑐴𑐜𑐟𑐵𑐮, 𑐧𑐣𑑂𑐡, 𑐑𑐾𑐬𑐵𑐧𑐣𑑂𑐡𑐷, 𑐟𑐵𑐮𑐵𑐧𑐣𑑂𑐡𑐷 𑐰 𑐣𑐵𑐬𑐵𑐖𑐸𑐮𑐸𑐳 𑐖𑐎 𑐖𑐸𑐂𑐐𑐸 𑐖𑐸𑐫𑐵 𑐰𑐮 𑑋 𑐡𑐾𑐱𑐫𑑂 𑐬𑐵𑐖𑐣𑐿𑐟𑐶𑐎 𑐄𑐠𑐮𑐥𑐸𑐠𑐮𑑄 𑐫𑐵𑐣𑐵𑑅 𑐡𑐾𑐱𑐫𑐵 𑐳𑑂𑐠𑐶𑐟𑐶 𑐟𑐣𑐵𑐰𑐥𑐹𑐬𑑂‍𑐞 𑐖𑐸𑐫𑐵𑐰𑐮 𑑋 𑐖𑐵𑐐𑐶𑐬𑐫𑐵 𑐨𑐬𑑀𑐳𑐵 𑐩𑐡𑐫𑐵𑐰𑐮 𑑋 𑐟𑐬 𑐎𑐵𑐫𑑂 𑐪𑑂𑐫𑐵𑐫𑑂𑐫𑐵 𑐳𑑂𑐎𑐹𑐮 𑐏𑐬𑑂‍𑐔, 𑐕𑐾𑑃 𑐏𑐬𑑂‍𑐔 𑐗𑐣 𑐗𑐣 𑐀𑐥𑑂𑐰𑐫𑐵𑐰𑐮 𑑋 𑐩𑐳𑑂𑐟 𑐗𑐣 𑐗𑐣 𑐟𑑅𑐢𑐶𑐎𑑅 𑐖𑐸𑐫𑐵𑐰𑐮 𑑋 𑐏𑐬𑑂‍𑐔𑐫𑐵 𑐮𑑂𑐫𑐵𑑅𑐔𑐵𑑅 𑐩𑐡𑐫𑐵𑐰𑐣 𑑋 𑐤𑐵𑐥𑐵 𑐠𑑅𑐐𑐸 𑐥𑐵𑐮𑐫𑑂 𑐠𑐾𑑄 𑐩𑐏𑐸 𑐳𑐬𑐎𑐵𑐬𑐷 𑐳𑑂𑐎𑐹𑐮 𑐰 𑐎𑑂𑐫𑐵𑐩𑑂𑐥𑐳𑐫𑑂 𑐧𑑂𑐰𑑄𑐎𑐾𑐟 𑑋 𑐠𑑁𑑄𑐎𑐤𑐫𑑂 𑐧𑑂𑐰𑑄𑐎𑐾𑐟 𑐥𑑂𑐬𑐵𑐂𑐨𑐾𑐚 𑐳𑑂𑐎𑐹𑐮 𑐎𑐮𑐾𑐖 𑐴𑐾 𑐩𑐵𑑅 𑑋 𑐟𑐬 𑐖𑐵𑐐𑐶𑐬 𑐢𑐵𑑅𑐳𑐵 𑐳𑐬𑐎𑐵𑐬𑐷 𑑋 𑐳𑐬𑐎𑐵𑐬𑐷 𑐳𑑂𑐎𑐹𑐮 𑐎𑐮𑐾𑐖𑐫𑑂 𑐧𑑂𑐰𑑄𑐥𑐶𑑄𑐟 𑐳𑐬𑐎𑐵𑐬𑑄 𑐴𑐾 𑐥𑐟𑑂𑐫𑐵𑑅 𑐩𑐫𑐵𑑅 𑑋 𑐂𑐩𑐶𑐳𑑄 𑐮𑐵 𑐖𑐵𑐐𑐶𑐬 𑐣𑐎𑐾𑐟 𑐎𑐶 𑐥𑑂𑐬𑐵𑐂𑐨𑐾𑐚 𑐳𑑂𑐎𑐹𑐮 𑐎𑐮𑐾𑐖𑐫𑐵 𑐳𑐬𑑂‍𑐚𑐶𑐦𑐶𑐎𑐾𑐚 𑐳𑑂𑐰𑐂, 𑐎𑐶 𑐰𑐶𑐡𑐾𑐱𑐷 𑐎𑐶 𑐟 𑐬𑐵𑐖𑐣𑐿𑐟𑐶𑐎 𑐥𑐵𑐬𑑂‍𑐚𑐷 𑐰𑐵 𑐡𑐮𑐫𑐵 𑐱𑐶𑐦𑐵𑐬𑐶𑐱 𑑋 𑐠𑑁𑑄 𑐢𑐵𑐢𑐵𑑄 𑐎𑐤𑐫𑑂 𑐢𑐵𑐢𑐵𑑄 𑐡𑐸𑐐𑐸 𑐥𑑂𑐬𑐵𑐂𑐨𑐾𑐚 𑐀𑐦𑐶𑐳 𑐣𑑄 𑐧𑐣𑑂𑐡 𑐖𑐸𑐮 𑑋 𑐖𑐶 𑐴𑐵𑐎𑐣𑑄 𑐧𑐾𑐬𑑀𑐖𑐐𑐵𑐬 𑐖𑐸𑐮 𑑋 𑐥𑑂𑐬𑐵𑐂𑐨𑐾𑐚 𑐀𑐦𑐶𑐳𑐫𑐵 𑐕𑐸 𑐨𑐬 ? 𑐳𑐬𑐎𑐵𑐬𑐷 𑐖𑐵𑐐𑐶𑐬 𑐖𑐹𑐳𑐵 𑐨𑐟𑑂𑐟𑐵 𑐥𑐾𑐣𑑂𑐳𑐣 𑐁𑐡𑐶 𑐳𑐸𑐰𑐶𑐢𑐵 𑐡𑐂𑐐𑐸 𑐏𑑅 𑑋 𑐠𑑂𑐰 𑐄𑐩𑐾𑐬𑐫𑑂 𑐖𑐵𑐐𑐶𑐬 𑐩𑐵𑐩𑐵𑑄 𑐴𑐿𑐬𑐵𑐣 𑐖𑐸𑐮 𑑋 𑐤𑐵𑐥𑐵 𑐖𑐵𑐐𑐶𑐬 𑐣𑐫𑐵𑐐𑐸 𑐀𑐣𑐸𑐨𑐰 𑐩𑐡𑐫𑐵𑑅 𑐖𑐵𑐐𑐶𑐬 𑐣𑐫𑐾𑐐𑐸 𑐴𑑂𑐰𑑅𑐟𑐵 𑐔𑐧𑐸𑐟 𑑋 𑐠𑑁𑑄 𑐄𑐩𑐾𑐬 𑐀𑐥𑑂𑐰𑐫𑐵𑑅 𑐖𑐵𑐐𑐶𑐬 𑐔𑐹𑐩𑐮𑐵𑐣𑐵 𑐔𑑂𑐰𑐣 𑑋 𑐤𑑂𑐫𑐵𑐠𑐵𑐫𑑂 𑐰𑑄𑐳𑐵𑑄 𑐄𑐩𑐾𑐬 𑐴𑐾 𑐥𑑄𑐐𑑅 𑐖𑐸𑐫𑐵𑐧𑐶𑐮 𑑋
𑐠𑐸𑐎𑐶𑐫𑐵 𑐴𑐾 𑐗𑑂𑐰𑐮𑐫𑑂 𑐠𑑅 𑐳𑐩𑐎𑐵𑐮𑐶𑐣 𑐥𑐵𑐳𑐵𑐥𑐶𑑄 𑐕𑐎𑑅 𑐮𑐸𑐩𑑄𑐎𑐵 𑐳𑑂𑐰𑐫𑐵 𑑋 𑐥𑐵𑐳𑐵𑐥𑐶𑑄 𑐣𑑄 𑐣𑐎𑐾𑐟𑑂𑐰𑑄𑐎𑐾 𑐦𑑅𑐳𑐵 𑐖𑐎 𑐮𑐵 𑐏𑐣𑐷 𑑋 𑐖𑐶𑐟𑑅 𑐩𑐡𑐣 𑐮𑐸𑐩𑐣𑐵 𑐰𑐮 𑑋 𑐰 𑐮𑐵 𑐠𑑁𑑄𑐎𑐤𑐫𑑂 𑐥𑑂𑐬𑐟𑐶𑐲𑑂𑐛𑐶𑐟 𑐧𑑂𑐫𑐵𑐥𑐵𑐬𑐷 𑐢𑐵𑑅𑐐𑐸 𑑋 𑐰𑐫𑐵 𑐠𑐷 𑐠𑐷 𑐎𑐩𑑂𑐥𑐣𑐷 𑐡𑐸 𑐴𑑃 𑑋 𑐫𑐎𑑂𑐰𑐳𑐶𑐟 𑐖𑐵𑐐𑐶𑐬 𑐣𑐎𑐵𑐟𑐫𑐵 𑐢𑐎𑐵𑑅 𑐕𑐎𑑅 𑐣𑐵𑐥𑐮𑐵𑑅𑐧𑐮𑐫𑑂 𑐦𑐸𑐃𑑄 𑐫𑐵𑐣𑐵𑑅 𑐖𑐶𑐣𑐵𑐥 𑐏𑑃𑐯𑐵𑑅𑐐𑐸 𑐮𑐸𑐩𑑄𑐳𑐾 𑐰𑐮 𑑋 𑐄𑐧𑐮𑐫𑑂 𑐖𑐶𑐟𑑅 𑐰𑐫𑐵𑐐𑐸 𑐖𑐵𑐐𑐶𑐬𑐫𑐵 𑐁𑐰𑐱𑑂𑐫𑐎𑐟𑐵 𑐩𑐖𑐹 𑑋 𑐟𑐬 𑐁𑑅 𑐮𑐵…..𑑋 𑐠𑑂𑐰 𑐴𑐾 𑐧𑐶𑐔𑐵𑑅 𑐫𑐵𑐣𑐵𑐔𑑂𑐰𑐣𑐵𑐪 𑐖𑐶𑐟𑑅 𑐖𑐶𑐪 𑐎𑐮𑐵𑑅 𑐰𑐫𑐵𑑅 𑐨𑐸𑐟𑐹𑐫𑐵 𑐳𑐵𑐩𑐵𑐣𑐫𑐵 𑐮𑐶𑐳𑑂𑐟 𑐯𑐵𑐟𑐫𑑂 𑐟𑐫𑐵𑐧𑐶𑐮 𑑋 𑐖𑐵𑐐𑐶𑐬 𑐩𑐡𑐫𑐵𑑅 𑐟𑐮𑐧 𑐩𑐰𑑅𑐳𑐵𑑄 𑐨𑐸𑐟𑐹𑐫𑐵 𑐮𑐶𑐳𑑂𑐟 𑐰𑐫𑐾𑐐𑐸 𑐟𑑂𑐰𑑅𑐦𑐶𑐄𑐐𑐸 𑐩𑐡𑐸𑐣𑐶 𑑋 𑐮𑐶𑐳𑑂𑐟 𑐳𑑂𑐰𑐫𑐵𑑄 𑐐𑑂𑐫𑐵𑐳 𑐣𑑄 𑐦𑐸𑐮 𑐏𑐣𑐷 𑑋 𑐄𑐎𑐶𑑄 𑐧𑐾𑐮𑐶 𑐠𑐸𑐂𑐟 𑐴𑐾 𑐴𑐠𑐵𑐫𑑂 𑐖𑐸𑐮 𑑋 𑐟𑐬 𑐐𑑂𑐫𑐵𑐳𑐫𑐵 𑐳𑐬𑑂‍𑐟𑐾𑐖 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐐𑑂𑐫𑐵𑐳 𑐥𑐳𑐮𑐫𑑂 𑐐𑑂𑐫𑐵𑐳 𑐩𑐡𑐸 𑑋 𑐧𑑂𑐮𑐵𑐫𑑂𑐎𑑄 𑐎𑐵𑐫𑐾𑐐𑐸 𑐍𑐎𑐵𑐟 𑐠𑑅𑐎𑐾 𑐩𑐡𑐸 𑑋 𑐄𑐎𑐶𑑄 𑐩𑐟𑐔𑐶𑐎𑑄𑐳𑐵𑑄 𑐣𑑂𑐫𑐵𑐣𑐵 𑐰𑐵 𑐢𑐵𑑅𑐐𑐸𑐮𑐶𑑄 𑐳𑑂𑐰𑑅𑐰𑐣𑐵𑐐𑐸 𑐀𑐐𑑅𑐔𑐵 𑐩𑐵𑐮𑐵 𑐡𑐾𑐐𑑅𑐔𑐵 𑐮𑐸𑐮 𑐢𑐂𑐠𑐾𑑄 𑐮𑑃𑐫𑑂 𑐴𑐾 𑐩𑐡𑐣𑐔𑐶𑐟 𑐣𑐵𑐩𑐮𑐵𑐟 𑑋 𑐄𑐐𑐸𑐠𑐸𑑄𑐐𑐸𑑄 𑐏𑑃 𑐢𑐸𑑄𑐎𑐵𑑅 𑐰𑑄𑐴𑐾 𑐬𑐾𑐲𑑂𑐚𑐸𑐬𑐾𑐞𑑂𑐚𑐫𑑂 𑐰𑐣𑐵𑑅 𑐏𑑃 𑐯𑐵𑐫𑐾𑐐𑐸 𑐥𑑂𑐬𑐳𑑂𑐟𑐵𑐰 𑐟𑐮 𑑋 𑐩𑐡𑐣𑐫𑐵 𑐕𑑃𑐫𑑂 𑐠𑑂𑐫𑑄𑐎𑐾𑐟 𑐥𑑂𑐫𑐏𑐵𑐣𑑂𑐫𑐵𑐏𑐵 𑐖𑐎 𑐕𑐾𑑃𑐫𑑂 𑐥𑐸𑐮𑐵𑐰𑑄𑐳𑐵 𑐠𑑂𑐫𑑄𑐐𑐸 𑐏𑑅 𑑋 𑐀𑐠𑐾𑐳𑐵𑑄 𑐰𑑄 𑐬𑐾𑐲𑑂𑐚𑐸𑐬𑐾𑐞𑑂𑐚𑐫𑑂 𑐰𑐣𑐾𑐐𑐸 𑐢𑐎𑐵𑑅 𑐢𑐵𑑅𑐐𑐸𑐮𑐶𑑄 𑐖𑐶 𑐥𑐮𑐏 𑐀𑐎𑐩𑐎𑐾 𑐖𑐸𑐮 𑑋 𑐖𑐶𑑄 𑐣𑑄 𑐰𑑄 𑐴𑐾 𑐬𑐾𑐲𑑂𑐚𑐸𑐬𑐾𑐞𑑂𑐚𑐫𑑂 𑐰𑐣𑐾𑐐𑐸 𑐥𑑂𑐬𑐳𑑂𑐟𑐵𑐰 𑐟𑐳𑐾𑐮𑐶𑑄 𑐖𑐶 𑐕𑐵𑐫𑑂 𑐮𑐶𑐔𑐶𑐮𑐾𑐐𑐸 𑐢𑐎𑐵𑑅 𑐡𑐸𑐴𑐵𑑄 𑐰𑐣𑐵 𑑋 𑐖𑐶𑑄 𑐕𑐾𑑃𑐫𑑂 𑐐𑑂𑐫𑐵𑐳 𑐩𑐡𑐸𑐐𑐸 𑐧𑐵𑐬𑐾 𑐕𑐸 𑐏𑑃 𑐎𑐣𑐵𑐐𑐸 𑐰𑑄 𑐰𑐫𑐵𑐐𑐸 𑐧𑐵𑐬𑐾 𑐎𑐣𑐵𑐫𑑄𑐎𑐮 𑑋 𑐖𑐶𑑄 𑐕𑐸𑑄 𑐩𑐾𑐐𑐸 𑐏𑑃 𑐯𑐵𑐫𑑂 𑐏𑑄𑐐𑐸 𑐩𑐏𑐸𑐣𑐶 𑐰𑐫𑐵𑐐𑐸 𑐏𑑃 𑐖𑐎 𑐣𑑂𑐫𑐣𑐵𑐔𑑂𑐰𑐣𑐵 𑑋 𑐰𑑄 𑐫𑐵𑐣𑐵𑐐𑐸 𑐥𑑂𑐬𑐐𑐟𑐶𑐫𑐵 𑐧𑐵𑐬𑐾 𑐠𑐸𑐮𑐶 𑐏𑑃 𑐯𑐵𑐟 𑐎𑐶 𑐰 𑐠𑑁𑑄𑐎𑐤𑐫𑑂 𑐠𑐸𑐮𑐶 𑐧𑑂𑐫𑐳𑑂𑐟 𑐰 𑐥𑑂𑐬𑐏𑑂𑐫𑐵𑐟𑐪 𑐩𑐣𑐹 𑐴𑑃 𑐰𑐫𑐵 𑐮𑐕𑐶𑐫𑐵 𑐕𑐎𑑅 𑐣𑑄 𑐕𑐾𑑃𑐫𑑂 𑐖𑐵 𑐣𑐫𑐾 𑐩𑑂𑐰𑐵𑑅 𑑋 𑐄𑐎𑐶𑑄 𑐰𑐫𑐵𑐟 𑐨𑐸𑐟𑐹 𑐖𑑂𑐰𑐮𑑄𑐫𑐵 𑐕𑐸𑑄 𑐁𑐰𑐱𑑂𑐫𑐎𑐟𑐵 𑐴𑐾 𑐩𑐖𑐹 𑑋 𑐥𑐶𑐣𑐾 𑐖𑐎 𑐣𑐫𑐾𑐐𑐸 𑐴𑑃 𑑋 𑐩𑐳𑑂𑐟 𑐣𑐶𑐪 𑐰𑐶𑐡𑐾𑐱𑐫𑑂 𑐧𑑂𑐰𑑄𑐎𑐵𑐟𑐫𑐵 𑐴𑑃 𑑋 𑐕𑐾𑑃𑐫𑑂 𑐎𑐮𑐵𑑅 𑐰 𑐰 𑐖𑐎 𑑋 𑐰𑐫𑐵𑐟 𑐣𑐫𑐾𑐟 𑐳𑑅𑐟𑐹𑐠𑐵𑐫𑑂 𑐟𑐎 𑐎𑐮𑐵𑑅 𑐣𑑄 𑐧𑑂𑐰𑐣𑐵 𑐫𑑄𑐎𑐾𑐐𑐸, 𑐄𑐎𑐶𑑄 𑐂𑐩𑐶 𑐕𑐾𑑃𑐫𑑂 𑐖𑐵 𑐴𑐾 𑐠𑐸𑐂𑐩𑑂𑐰𑐵𑑅 𑐴𑑃 𑑋

𑐠𑐖𑑂𑐫𑐵𑐐𑐸 𑐏𑑃𑐫𑐵 𑐡𑐠𑐸𑐂 𑐣𑐫𑐾𑐟𑑂𑐰𑐣𑐾𑐐𑐸 𑐖𑑂𑐫𑐵 𑐣𑑄 𑐎𑐬𑐷𑐧 𑐎𑐬𑐷𑐧 𑐳𑐶𑐢𑐮 𑑋 𑐖𑐶𑑄 𑐮𑐵 𑐰𑐫𑐵𑐐𑐸 𑐏𑑃 𑐖𑐎 𑐣𑑂𑐫𑐣𑐵𑑅 𑐣𑐫𑐾 𑐴𑐾 𑐮𑑂𑐰𑑅𑐩𑑄 𑑋 𑐰𑑄 𑐖𑐎 𑐴𑐾 𑐨𑐎𑐵𑐨𑐎 𑐣𑑅𑐣𑑄 𑐏𑑃 𑐯𑐵𑐣𑐵𑐔𑑂𑐰𑐣 𑑋 𑐧𑐶𑐔𑐫𑑂 𑐧𑐶𑐔𑐫𑑂 𑐎𑐵𑐮𑐾 𑐥𑐵𑐳𑐵 𑐣𑑅 𑐕𑑄 𑐣𑑄 𑐢𑐵𑐂𑐐𑐸 𑐖𑐶𑑄 𑐕𑐸𑑄 𑐎𑐵𑐫𑐾 𑐩𑐮𑐵𑐰𑑄 𑐵𑐫𑐵𑐐𑐸 𑐪𑐸𑐟𑐸𑐂 𑐰𑐣𑐷𑐐𑐸 𑑋 𑐖𑐶𑑄 𑐮𑐵 𑐖𑐩𑑂𑐩𑐵 𑐔𑑂𑐫𑐵 𑐕𑐐𑐹 𑐎𑐥 𑐰 𑐀𑐩𑐮𑐾𑐟 𑐧𑐵𑐥𑐵 𑐖𑐎 𑐴𑐾 𑐖𑐫𑐵 𑑋 𑐰𑑄 𑐮𑐵 𑐴𑑂𑐰𑐶𑐳𑑂𑐎𑐷, 𑐰𑐶𑐫𑐬, 𑐔𑐶𑐎𑐾𑐣 𑐦𑑂𑐬𑐵𑐂, 𑐩𑐚𑐣, 𑐥𑐶𑐖𑑂𑐖𑐵 𑐕𑐸 𑐕𑐸 𑐕𑐸 𑐕𑐸 𑐖𑐶𑑄 𑐮𑐵 𑐣𑐵𑑄 𑐟𑐎𑑄 𑐩𑐳𑐶𑐄 𑑋 𑐣𑐫𑐾 𑐰 𑐳𑑂𑐰𑐫𑐾 𑐟𑐎 𑐩𑐣𑑅 𑑋 𑐴𑐵𑐎𑐣𑑄 𑐠𑑅 𑐮𑐵 𑐠𑐥𑐵𑐫𑑂𑐢𑑄𑐐𑐸 𑐠𑐵𑐳𑐫𑑂 𑐰𑐫𑐵𑑅 𑐣𑐫𑐾𑐟𑑂𑐰𑐣𑐾𑐐𑐸 𑐐𑐣 𑐎𑐵 𑐰𑐣𑐾𑐐𑐸 ? 𑐠𑑁𑑄 𑐥𑐵𑐳𑐵 𑐩𑐡𑐣 𑐳𑐵𑐴𑐸𑐖𑐸𑑄 𑐧𑑂𑐰𑐣𑐵 𑐴𑐫𑐵 𑐢𑐎𑐵𑑅 𑐰𑐫𑐾 𑐏𑑄𑐐𑐸 𑑋 𑐀𑐗 𑐮𑐵 𑐜𑐵𑐣𑑂𑐳𑐧𑐵𑐬𑐫𑑂 𑐰𑐣𑐾𑐐𑐸 𑐢𑐵𑑅𑐐𑐸 𑐟𑐬 𑐖𑐶𑑄 𑐮𑐶𑐧𑐵𑐂 𑐥𑐳𑑅 𑐰𑐣𑐾 𑐩𑐵𑐣𑐶 𑐢𑐫𑐵 𑑋

𑐢𑐵𑐟𑑂𑐠𑐾𑑄 𑐰𑐫𑐵𑐐𑐸 𑐏𑑃 𑐣𑑂𑐫𑐣𑐵𑑅 𑐮𑐵 𑐰𑐫𑐵𑐐𑐸 𑐤𑑂𑐫𑑅𑐣𑐾 𑐖𑐶 𑐐𑐣 𑐐𑐣 𑑋 𑐢𑐸𑑃𑐫𑐵 𑐤𑑂𑐫𑑅𑐣𑐾 𑐕𑐸𑑄 𑐠𑐾𑑄 𑑋 𑐰𑐫𑐵𑐐𑐸 𑐏𑑃 𑐀𑐗 𑐥𑐹𑐩𑐰𑑄𑐣𑐶 𑐖𑐶𑑄 𑐠𑑅𑐐𑐸 𑐏𑑃 𑐯𑐵𑐫𑐾𑐐𑐸 𑐴𑑂𑐰𑑅𑐟𑐵𑑅 𑐩𑐵𑐮𑐵 𑐴𑐾 𑐔𑑂𑐰𑐣𑐵𑐟𑐶𑐣𑐶 𑑋 𑐰𑐾𑐚𑐬 𑐰𑐫𑐵𑑅 𑐧𑐶𑐮 𑐧𑐷𑐴𑐮 𑑋 𑐄𑐧𑐮𑐫𑑂 𑐴𑐾 𑐩𑐡𑐣𑐫𑐵 𑐩𑑀𑐧𑐵𑐂𑐮 𑐣𑑂𑐫𑐵𑐟 𑑋 𑐩𑑀𑐧𑐵𑐂𑐮 𑐮𑐵 𑐤𑐵𑐔𑑅 𑐣𑑄 𑐟𑑅𑐎𑑂𑐰𑑅𑐩𑐕𑐶 𑐩𑐣𑑂𑐫𑐵𑐐𑐸 𑐩𑐏𑐸 𑑋 𑐰𑑄 𑐀𑐦 𑐖𑐎 𑐫𑐵𑐣𑐵𑐔𑑂𑐰𑐣 𑑋 𑐩𑐯𑑂𑐰𑑄 𑑋 𑐖𑐶𑐟 𑐏𑑃 𑐎𑐣𑐾𑐐𑐸𑐮𑐶𑐂 𑐴𑐾 𑐰𑑂𑐫𑐳𑑂𑐟 𑐖𑐸𑐮 𑑋 𑐟𑐬 𑐁𑑅 𑐢𑐵𑑅𑐳𑐵 𑐯𑑂𑐰𑐣 𑑋 𑐩𑑀𑐧𑐵𑐂𑐮𑐫𑑂 𑐟𑐵𑐫𑐾 𑐩𑑄𑐟 𑐮𑐵 𑐕𑐸 𑐠𑐾𑑄 𑐴𑐮𑑀 𑐴𑐮𑑀 𑐢𑐵𑐢𑐵𑑄 𑐚𑐾𑐧𑐸𑐮𑑄 𑐡𑐣 𑑋 𑐥𑐶𑐣𑐾 𑐰𑐣𑐵 𑐏𑑃 𑐯𑐵𑑅 𑐰𑐣 𑑋 𑐐𑐧𑐵𑐫𑑂𑐟𑐶 𑐣𑑄 𑐩𑐰𑑅 𑑋 𑐖𑐶𑑄 𑐰𑐫𑐵𑐐𑐸 𑐮𑑃 𑐳𑑂𑐰𑐫𑐵𑐔𑑂𑐰𑐣𑐵 𑑋 𑐧𑐶𑐮 𑐧𑐶𑐫𑐵𑐰𑑄𑐪 𑐰𑐾𑐚𑐬 𑐴𑐵𑐎𑐣𑑄 𑐰𑐫𑐵 𑐧𑐶𑐮𑐫𑐵 𑐢𑑂𑐫𑐧𑐵 𑐦𑑂𑐰𑑃𑐰𑐮 𑑋 𑐖𑐶𑑄 𑐟𑐷𑐖𑐎 𑐧𑐶𑐮 𑐕𑐎𑑅 𑐳𑑂𑐰𑐫𑐵𑑅 𑐄𑐎𑐷 𑐮𑐵 𑐱𑐸𑐣𑑂𑐫 𑐴𑐾 𑐳𑑂𑐰𑑄𑐐𑑅 𑐡𑐸 𑑋 𑐠𑑂𑐰 𑐏𑐣𑐾𑐰𑑄 𑐠𑐵𑐬𑐵𑐤𑐸𑐮 𑑋 𑐰𑐾𑐚𑐬 𑐴𑐾 𑐥𑑂𑐫𑐪 𑐥𑑂𑐫𑐪 𑐏𑐣 𑑋 𑐄𑐮𑐶 𑐢𑑂𑐫𑐧𑐵𑑄 𑐮𑐵 𑐖𑐶𑐩𑐶𑐟 𑐣𑐏𑑅 𑐣𑑂𑐫𑐵𑐫𑐾𑐎𑐹𑐳𑐵𑑄 𑐀𑐥𑑂𑐰𑑅 𑑋
𑐖𑐶𑑄 𑐱𑐶𑐲𑑂𑐚 𑐖𑐸𑐫𑐵𑑅 𑐰𑐾𑐚𑐬𑐫𑐵𑐟 𑐢𑐫𑐵—“𑐖𑐶𑐪 𑐥𑐵𑐳𑐵 𑐥𑐮𑐏𑑄 𑐰𑐂 𑑋 𑐰𑑄 𑐴𑐾 𑐢𑑂𑐫𑐧𑐵 𑐥𑐸𑐮𑐶𑐂 𑑋 𑐥𑐵𑐳𑐵 𑐩𑑀𑐧𑐵𑐂𑐮𑐫𑑂 𑐏𑑃 𑐯𑐵𑐣𑐵𑐔𑑂𑐰𑐣 𑑋” 𑐖𑐶𑐐𑐸 𑐏𑑃 𑐣𑑂𑐫𑐣𑐵𑑅 𑐰𑑄 𑐢𑐵𑐮—“𑐳𑐬 𑐰𑐫𑑂𑐎𑐮𑑄 𑐮𑐵 𑐁𑐟𑐎 𑐐𑐸𑐧𑐮𑐾𑑄 𑐢𑑂𑐫𑐧𑐵 𑐥𑐹𑐐𑐸 𑐩𑐳𑐶𑐄 𑑋 𑐤𑑂𑐫𑐵𑐧𑐮𑐾𑑄 𑐰𑐫𑐎𑑄 𑐣𑐵𑐥 𑐰𑐂𑐥𑐶𑑄𑐳𑑄 𑐖𑐎 𑐴𑐾 𑐥𑐸𑐮𑐷𑐐𑐸 𑐏𑑅 𑑋 𑐀𑐗 𑐠𑑁𑑄 𑐮𑐵 𑐰𑐫𑑂𑐎𑑅𑐫𑐵 𑐟𑐶𑐬𑐶𑐩𑐫𑑂𑐖𑐸 𑐩𑐗𑐵𑑅 𑐎𑐵 𑐩𑐏𑐸𑐳𑐵 𑐰𑐫𑑂𑐎𑑅𑐥𑐶𑑄 𑐣𑐶𑐪𑐾𑐳𑐶𑐫𑐵𑐐𑐸 𑐧𑐶𑐮 𑐕𑐶𑑄 𑐴𑐾 𑐥𑐸𑐮𑐾𑐩𑐵𑐮𑐷𑐐𑐸 𑐎𑐵 𑑋” 𑐰𑐫𑐵𑐐𑐸 𑐏𑑃 𑐣𑑂𑐫𑐣𑐵𑑅 𑐥𑐮𑐏 𑐖𑐶 𑐰𑐵𑐮𑑂𑐮 𑐖𑐸𑐮 𑑋 𑐤𑐵𑐔 𑐢𑐸𑑃 𑐢𑐎𑐵𑑅 𑐔𑑂𑐰𑐣𑐵𑐪 𑐩𑐡𑐣 𑐮𑐵 𑐢𑑂𑐰𑑄 𑐢𑐎𑐵𑑅 𑐮𑐵𑐣𑐵𑐔𑑂𑐰𑐣 𑑋 𑐀𑐮𑐾 𑐖𑐶𑑄 𑐣𑑄 𑐰 𑐴𑐾 𑐣𑐵𑐥𑑄 𑐩𑐡𑐣 𑐡𑐸𑐠𑐵𑐫𑑂 𑐰𑐣𑐵 𑑋 𑐰 𑐀𑐗𑑄 𑐏𑑃 𑐴𑐾 𑐯𑐵𑐣𑐵𑐔𑑂𑐰𑐣𑐟𑐶𑐣𑐶 𑑋 𑐖𑐶𑑄 𑐰𑐫𑐵𑐟 𑐢𑐫𑐵—“𑐌 𑐩𑐡𑐣 𑐳𑐵𑐴𑐸 𑐕𑐶𑐐𑐸 𑐀𑐗𑑄 𑐏𑑃 𑐎𑑂𑐰𑐩𑐔𑐵𑑅𑐣𑐶 𑐮𑐵 𑑋 𑐎𑐵 𑐳𑐵 𑐖𑐶 𑐮𑐵 𑐕𑐾𑑃𑐫𑑂𑐫𑐵𑐟 𑐨𑐸𑐟𑐹𑐫𑐵 𑐳𑐵𑐩𑐵𑐣 𑐣𑑂𑐫𑐵𑑅𑐰𑐣𑐾 𑐩𑐵𑐣𑐶 𑑋 𑐨𑐸𑐟𑐹𑐫𑐵𑐟 𑐩𑐵𑑅𑐐𑐸 𑐳𑐵𑐩𑐵𑐣 𑐣𑑂𑐫𑐵𑐣𑐵 𑐩𑐫𑑄𑐎𑐮 𑐢𑐵𑑅𑐳𑐵 𑐖𑐶 𑐎𑐮𑐵𑑅 𑐩𑐳𑑂𑐟 𑐕𑐾𑑃𑐖𑑅𑐥𑐶𑑄 𑐳𑐎𑐮𑐾𑑄 𑐡𑑂𑐫𑐵𑑄𑐮𑐵𑐂 𑑋 𑐖𑐶𑐩𑐶𑐟 𑐮𑐵 𑐕𑐶𑐩𑐶𑐟 𑐠𑐾𑑄 𑐤𑐶𑑄𑐤𑐶𑑄 𑐎𑐬𑐥𑐶𑑄𑐳𑑄 𑐣𑐎𑐷 𑐩𑐏𑐸 𑐕𑐸𑐫𑐵𑐫𑑂 𑑋 𑐄𑐎𑐶𑑄 𑐖𑐶𑑄 𑐣𑐫𑐵𑐐𑐸 𑐢𑑂𑐫𑐧𑐵 𑐖𑐶𑑄 𑐴𑐾 𑐥𑐸𑐮𑐾 𑐢𑐸𑐣 𑑋 𑐧𑐵𑑃𑐎𑐶 𑐕𑐶𑑄 𑐣𑑅𑐐𑐸 𑐖𑐎 𑐥𑐹𑐳𑐵 𑐐𑐵𑐟 𑑋 𑐠𑑁𑑄𑐫𑐵𑐟 𑐧𑐵𑐫𑑂 𑑋”
𑐖𑐶𑑄 𑐕𑐸 𑐠𑐸𑐮𑐶 𑐢𑐫𑐵, 𑐰𑐫𑐵𑐐𑐸 𑐏𑑂𑐰𑐵𑐮𑐫𑑂 𑐤𑐵𑐔𑑅𑐣𑐶𑐳𑐾𑑄𑐫𑐵 𑐦𑐸𑐃𑑄 𑐕𑐎𑑂𑐰𑐮𑑄 𑐐𑐣 𑐰𑑄 𑐐𑐣 𑐰𑑄 𑐖𑐸𑐮 𑑋 𑐰𑐾𑐚𑐬𑑄 𑐰𑐫𑐵𑐐𑐸 𑐕𑐎𑑅 𑐖𑐶𑐐𑐸 𑐕𑐎𑑅 𑐏𑑂𑐰𑐵 𑐳𑑂𑐰𑐫𑐵𑐔𑑂𑐰𑐣 𑑋 𑐖𑐶 𑐳𑐬𑐵𑐳𑐬 𑐰𑐫𑐵 𑐕𑑂𑐰𑐫𑐵 𑐴𑐵𑐎𑐣 𑐩𑐾𑐐𑐸 𑐖𑐵𑐐𑐶𑐬 𑐩𑐵𑐮𑐾𑐟 𑑋
(𑐠𑐵𑐫𑑂𑐨𑐸 𑐣𑐾𑐥𑐵𑐮 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣 𑐣𑐾.𑐳𑑄. 𑑑𑑑𑑓𑑓 𑐥𑐵𑐏𑐾𑑄)