𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑕 𑐦𑐵𑐮𑑂𑐐𑐸𑐞 𑑒𑑙, 𑐧𑐸𑐢𑐧𑐵𑐬 𑑑𑑖:𑑓𑑓:𑑑𑑐

𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐁𑑅 𑐣𑐾𑐥𑐵𑐮𑐨𑐵𑐲𑐵𑐫𑐵 𑐧𑑂𑐰𑐣𑐾𑐎𑐸𑐠𑐶 (𑐳𑑂𑐎𑐹𑐮) 𑐔𑐵𑐫𑐾𑐎𑐷𑐐𑐸 𑐖𑐹𑐐𑐸 𑐡𑐸 𑑋 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐕𑐸𑑄 𑐡𑑃 𑐤𑑂𑐫𑑅𑐣𑐶𑐳𑐾𑑄 𑐥𑑂𑐬𑐵𑐬𑐩𑑂𑐨𑐶𑐎 𑐂𑐳𑐷𑐜𑐷 (𑐧𑐵𑐮 𑐰𑐶𑐎𑐵𑐳)𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐁𑐏𑑅 𑐧𑑂𑐰𑑄𑐎𑐾𑐐𑐸 𑐖𑑂𑐫𑐵𑐫𑐵 𑐠𑐵𑐮𑐣𑐷 𑐫𑐵𑑅𑐐𑐸 𑐏𑑅 𑑋

𑐫𑐮𑐫𑑂 𑐠𑑁𑑄𑐎𑐤𑐫𑑂 𑐗𑐶𑐐𑐹 𑐂𑐳𑐷𑐜𑐷 𑐳𑑄𑐔𑐵𑐮𑐣𑐫𑑂 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐩𑐳𑑂𑐟𑐫𑑂𑐟 𑐠𑑅𑐐𑐸 𑐩𑐵𑑄𑐨𑐵𑐳𑑄 𑐁𑐏𑑅 𑐧𑑂𑐰𑑄𑐎𑐾𑐐𑐸 𑐣𑐶𑐟𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐁𑐏𑑅 𑐧𑑂𑐰𑑄𑐎𑐷𑐐𑐸 𑐧𑑂𑐰𑐣𑐾𑐎𑐸𑐠𑐶 𑐳𑑄𑐔𑐵𑐮𑐣𑐫𑑂 𑐴𑐫𑐾𑐐𑐸 𑐣𑐶𑐟𑐶𑑄 𑐳𑐴𑐮𑐴 𑐖𑐸𑐫𑐵𑐔𑑂𑐰𑑄𑐐𑐸 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐱𑐶𑐎𑑂𑐲𑐵 𑐀𑐢𑐶𑐎𑐵𑐬𑐷 𑐩𑐴𑐾𑐣𑑂𑐡𑑂𑐬𑐧𑐴𑐵𑐡𑐸𑐬 𑐎𑑂𑐲𑐾𑐟𑑂𑐬𑐷𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐱𑐶𑐎𑑂𑐲𑐵 𑐀𑐢𑐶𑐎𑐵𑐬𑐷 𑐎𑑂𑐲𑐾𑐟𑑂𑐬𑐷𑑄 𑐢𑐫𑐵𑐡𑐷, “𑐳𑑂𑐎𑐹𑐮𑐫𑐵 𑐥𑑂𑐬𑐵𑐬𑐩𑑂𑐨𑐶𑐎 𑐟𑐴𑐣𑐶𑐳𑐾𑑄 𑐄𑐔𑑂𑐔 𑐟𑐴𑐟𑐎 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐧𑑂𑐰𑑄𑐎𑐾𑐐𑐸 𑐁𑐖𑑂𑐖𑐸𑑄 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐳𑑂𑐎𑐹𑐮 𑐳𑑄𑐔𑐵𑐮𑐣𑐫𑑂 𑐴𑐫𑐾𑐟𑑂𑐫𑐣𑐵𑐐𑐸 𑐏𑑅 𑑋 𑐁𑐢𑐵𑐬𑐨𑐹𑐟 𑐟𑐴𑐮𑐫𑑂 𑐀𑐨𑐶𑐨𑐵𑐰𑐎𑐥𑐶𑐣𑑂𑐳𑑄 𑐔𑐵𑐴𑐾 𑐖𑐸𑐮 𑐢𑐵𑑅𑐳𑐵 𑐠𑑅𑐐𑐸 𑐩𑐵𑑄𑐨𑐵𑐳𑑄 𑐁𑐏𑑄 𑐧𑑂𑐰𑐎𑐾𑐡𑐂 𑑋”

𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑐵𑐩𑐸𑐴𑐶𑐎 𑐳𑑂𑐎𑐹𑐮𑑄 𑐀𑐨𑐶𑐨𑐵𑐰𑐎𑐫𑐵𑐟 𑐁𑐎𑐬𑑂‍𑐲𑐶𑐟 𑐫𑐵𑐎𑐾𑐐𑐸 𑐣𑐶𑐟𑐶𑑄 𑐀𑑄𑐐𑑂𑐬𑐾𑐖𑐷 𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐁𑐏𑑅 𑐧𑑂𑐰𑑄𑐎𑐾𑐐𑐸 𑐫𑐵𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐁𑐏𑑅 𑐧𑑂𑐰𑑄𑐎𑐾𑐐𑐸 𑐟𑐫𑐵𑐬𑐷𑐫𑐵 𑐥𑐮𑐵𑑅 𑐤𑑂𑐫𑐵𑐎𑐵𑐔𑑂𑐰𑑄𑐐𑐸 𑐏𑑅 𑑋

𑐱𑐶𑐎𑑂𑐲𑐵 𑐀𑐢𑐶𑐎𑐵𑐬𑐷 𑐎𑑂𑐲𑐾𑐟𑑂𑐬𑐷𑑄 𑐢𑐫𑐵𑐡𑐷, “𑐀𑐨𑐶𑐨𑐵𑐰𑐎𑐥𑐶𑐣𑑂𑐳𑑄 𑐠𑑅 𑐩𑐔𑐵𑐟𑐫𑑂𑐟 𑐩𑐵𑑄𑐨𑐵𑐳𑑄 𑐧𑑂𑐰𑑄𑐎𑐾 𑐔𑐵𑐴𑐾𑐖𑐹𑐐𑐸𑐮𑐶𑑄 𑐠𑑅𑐥𑐶𑐣𑑂𑐳𑑄 𑐩𑐵𑐨𑐵𑐳𑑄 𑐁𑐏𑑅 𑐧𑑂𑐰𑑄𑐎𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑐣𑐵𑐐𑐸 𑐏𑑅 𑑋”

𑐱𑐶𑐎𑑂𑐲𑐵 𑐀𑐢𑐶𑐎𑐵𑐬𑐷 𑐎𑑂𑐲𑐾𑐟𑑂𑐬𑐷𑐫𑐵 𑐎𑐠𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾 𑐳𑐵𑐩𑐸𑐡𑐵𑐫𑐶𑐎 𑐰 𑐳𑑄𑐳𑑂𑐠𑐵𑐐𑐟 𑐫𑐵𑐣𑐵𑑅 𑐣𑐶𑐳𑑅 𑐰 𑐣𑐶𑐐𑐹 𑐧𑑂𑐰𑐣𑐾𑐎𑐸𑐠𑐶 𑐳𑑄𑐔𑐵𑐮𑐣𑐫𑑂 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐥𑑂𑐬𑐵𑐬𑐩𑑂𑐨𑐶𑐎 𑐧𑐵𑐮 𑐰𑐶𑐎𑐵𑐳 𑐧𑑂𑐰𑐣𑐾𑐎𑐸𑐠𑐶 𑐤𑐫𑑂𑐥𑑂𑐫𑑄𑐐𑐹 (𑑗𑑔 𑐐𑐹) 𑐳𑑄𑐔𑐵𑐮𑐣𑐫𑑂 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋