𑐬𑐵𑐞𑐵 𑐱𑐵𑐳𑐣𑐫𑐵 𑐀𑐣𑑂𑐟𑑂𑐫 𑐮𑐶𑐥𑐵 𑑒𑑐𑑑𑑕 𑐳𑐵𑐮𑐫𑑂 𑐤𑐵𑐥𑐵𑑄𑐐𑐸 𑐁𑐩 𑐣𑐶𑐬𑑂‍𑐰𑐵𑐔𑐣 𑐖𑐸𑐂𑐟𑑂𑐫𑑄𑐐𑐸 𑐃 𑑋 𑐎𑑂𑐲𑐾𑐟𑑂𑐬 𑐣𑑄 𑑑 𑐫𑐾𑑃𑐥𑐵𑐏𑐾𑑄 𑐳𑑂𑐰𑐪 𑐳𑐱𑐎𑑂𑐟 𑐄𑐩𑑂𑐩𑐾𑐡𑐰𑐵𑐬𑐟 𑐔𑐸𑐣𑐵𑐰𑐷 𑐩𑐿𑐡𑐵𑐣𑐫𑑂 𑐡𑑄𑐰𑐫𑐵𑐔𑑂𑐰𑑄𑐐𑐸 𑑋 𑐥𑐸𑐮𑐵𑑄𑐪 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐾. 𑐁𑐃. 𑐳𑐶𑑄𑐴 𑐰 𑐥𑐸𑐮𑐵𑑄𑐪 𑐩𑐣𑑂𑐟𑑂𑐬𑐷 𑐐𑐞𑐾𑐱𑐩𑐵𑐣 𑐳𑐶𑑄𑐴 𑑋 𑐣𑐶𑐪 𑐥𑑂𑐬𑐨𑐵𑐰𑐱𑐵𑐮𑐷 𑐣𑐾𑐟𑐵𑐟𑐫𑑂 𑐡𑐠𑐸𑐂 𑐩𑐾𑐪 𑐄𑐩𑑂𑐩𑐾𑐡𑐰𑐵𑐬 𑐣𑐾𑐎𑐥𑐵𑐫𑐵 𑐳𑑄𑐳𑑂𑐠𑐵𑐥𑐎 𑐥𑐸𑐲𑑂𑐥𑐮𑐵𑐮 𑐱𑑂𑐬𑐾𑐲𑑂𑐛 𑑋

𑐔𑐸𑐣𑐵𑐰𑐫𑐵 𑐑𑑀𑐲𑐞𑐵𑐣𑐵𑐥𑑄 𑐁𑐩 𑐖𑐣𑐟𑐵𑐫𑑂 𑐠𑑅𑐠𑑅𑐐𑐸 𑐥𑐎𑑂𑐲𑐫𑑂 𑐮𑐴𑐬 𑐴𑐫𑐾𑐐𑐸 𑐴𑑀𑐜𑐧𑐵𑐖𑐷 𑑋 𑐐𑐞𑐾𑐱𑐩𑐵𑐣 𑐠𑑃𑐧𑐴𑐶𑐫𑐵 𑐔𑐵𑐎𑑂𑐳𑐷𑐧𑐵𑐬𑐷𑐳𑑂𑐠𑐶𑐟 𑐠𑑅𑐐𑐸 𑐴𑐾 𑐕𑐾𑑃 𑐣𑑄 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬𑐫𑑂 𑐰𑑂𑐫𑐳𑑂𑐟 𑑋 𑐄𑐏𑐾 𑐥𑐸𑐲𑑂𑐥𑐮𑐵𑐮 𑐠𑑅𑐐𑐸 𑐣𑐶𑑄𑐟𑐶𑑄 𑐳𑐩𑑂𑐥𑐬𑑂‍𑐎 𑐖𑑂𑐫𑐵𑐎𑐹 𑐩𑐵𑐮𑐵𑐔𑑂𑐰𑑄𑐐𑐸 𑑋 𑐤𑑂𑐫𑐏𑐵𑐫𑑂 𑐧𑐵𑐮𑑄 𑐔𑑂𑐰𑑄𑐔𑑂𑐰𑐣𑐵𑐡𑐷𑐪 𑐥𑐸𑐲𑑂𑐥𑐮𑐵𑐮𑐫𑐵𑐟 𑐠𑑅𑐐𑐸 𑐴𑐾 𑐐𑐜 𑐎𑑂𑐲𑐾𑐟𑑂𑐬𑐫𑑂 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐖𑑂𑐫𑐵𑐎𑐹 𑐟𑐫𑐾𑐐𑐸 𑐬𑐴𑐬 𑑋 𑐩𑐾𑐪 𑐎𑐩𑑂𑐫𑐸𑐣𑐶𑐲𑑂𑐚 𑐣𑐾𑐟𑐵 𑐱𑐩𑑂𑐨𑐸𑐬𑐵𑐩 𑐱𑑂𑐬𑐾𑐲𑑂𑐛 𑐣𑑄 𑐤𑑂𑐫𑐏𑐵𑐫𑑂 𑐴𑐾 𑐔𑑂𑐰𑐣𑐷𑐐𑐸 𑑋

𑐖𑑂𑐫𑐵𑐎𑐹 𑐩𑐵𑐮𑐾𑐐𑐸 𑐗𑑂𑐰𑐮𑐫𑑂 𑐤𑑂𑐫𑐏𑐵𑑄 𑐳𑐫 𑐩𑐶𑐚𑐬 𑐟𑐶 𑐠𑐸𑐏𑐾 𑐔𑑂𑐰𑑄𑐐𑐸 𑐠𑐵𑐫𑑂𑐩𑐡𑐸 𑐔𑐸𑐎𑐫𑑂 𑐖𑑂𑐫𑐵𑐎𑐹 𑐔𑐵𑐫𑐾𑐎𑐾𑐐𑐸 𑐎𑑂𑐰𑐠𑐵 𑐮𑐸𑐟 𑑋 𑐰 𑐎𑑂𑐰𑐠𑐵 𑐏𑑅– 𑐜𑐵. 𑐎𑐩𑐮 𑐥𑑂𑐬𑐎𑐵𑐱 𑐩𑐮𑑂𑐮𑐫𑐵 𑑋
𑐥𑑂𑐬𑐐𑐟𑐶𑐱𑐷𑐮 𑐬𑐵𑐖𑐣𑐷𑐟𑐶𑐎 𑐴𑐳𑑂𑐟𑐶𑐟 𑐔𑑂𑐰𑐣𑐷𑐐𑐸 𑐰 𑐬𑐵𑐖𑐣𑐷𑐟𑐶𑐎 𑐐𑐟𑐶𑐰𑐶𑐢𑐶 𑐖𑐸𑐫𑐵𑐔𑑂𑐰𑐣𑐷𑐐𑐸 𑐖𑐹𑐐𑐸𑐮𑐶𑑄 𑐠𑐵𑐫𑑂𑐩𑐡𑐸 𑐟𑑂𑐰𑐵𑑅𑐫𑐵 𑐩𑐮𑑂𑐮𑐫𑐵 𑐖𑐷𑐰𑐣𑐫𑐵 𑐤𑐵𑐥𑐵𑑄𑐐𑐸 𑐧𑑂𑐰𑑅 𑐣𑑄 𑐬𑐵𑐖𑐣𑐷𑐟𑐶𑐣𑐵𑐥 𑐳𑑂𑐰𑐣𑐵𑐔𑑂𑐰𑑄𑐐𑐸 𑐖𑐸𑐮 𑑋

𑐥𑐸𑐲𑑂𑐥𑐮𑐵𑐮, 𑐱𑐩𑑂𑐨𑐸𑐬𑐵𑐩, 𑐩𑐣𑐩𑑀𑐴𑐣 𑐀𑐢𑐶𑐎𑐵𑐬𑐷, 𑐔𑐣𑑂𑐡𑑂𑐬𑐩𑐵𑐣 𑐩𑐵𑐳𑑂𑐎𑐾 𑐮𑐐𑐵𑐫𑐟𑐣𑐵𑐥𑐫𑐵 𑐳𑑄𑐐𑐟𑑄 𑐰𑐫𑑂𑐎𑑅 𑐣𑑄 𑐥𑑂𑐬𑐐𑐟𑐶𑐱𑐷𑐮 𑐰𑐶𑐔𑐵𑐬𑐢𑐵𑐬𑐵𑐥𑐵𑐏𑐾𑑄 𑐥𑑂𑐬𑐨𑐵𑐰𑐶𑐟 𑐖𑐸𑐫𑐵𑐡𑐶𑐮 𑑋 𑐮𑐶𑐥𑐵 𑐟𑑂𑐬𑐶𑐔𑐣𑑂𑐡𑑂𑐬 𑐎𑐮𑐾𑐖𑐫𑑂 𑐁𑐃𑐊 𑐧𑑂𑐰𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐀𑐏𑐶𑐮 𑐣𑐾𑐥𑐵𑐮 𑐰𑐶𑐡𑑂𑐫𑐵𑐬𑑂‍𑐠𑐷 𑐦𑐾𑐜𑐬𑐾𑐳𑐣𑐫𑑂 𑐁𑐰𑐡𑑂𑐢 𑐖𑐸𑐫𑐵𑑅 𑐬𑐵𑐖𑐣𑐷𑐟𑐶𑐂 𑐮𑐐𑐾 𑐖𑐸𑐫𑐵𑐡𑐶𑐮 𑑋 𑐗𑐶𑐔𑑂𑐫𑐵𑐡𑑃𑐫𑐵 𑐰𑐿𑑄𑐱𑐫𑑂 𑐟𑐟𑑂𑐎𑐵𑐮𑐷𑐣 𑐳𑐬𑐎𑐵𑐬 𑐰𑐶𑐬𑐸𑐡𑑂𑐢 𑐖𑐰𑐬𑑂‍𑐖𑐳𑑂𑐟 𑐨𑐵𑐲𑐞 𑐫𑐵𑐣𑐵𑐡𑐶𑐮 𑑋

𑐕𑐎𑑂𑐰𑑅 𑐳𑐬𑐎𑐵𑐬𑑄 𑐴𑑅𑐐𑐸 𑐳𑐸𑐬𑐎𑑂𑐲𑐵 𑐎𑐵𑐣𑐹𑐣 𑐰𑐶𑐬𑐸𑐡𑑂𑐢 𑐨𑐵𑐲𑐞 𑐫𑐵𑑅𑐐𑐸 𑐂𑐮𑐫𑑂 𑐰𑐫𑑂𑐎𑑅𑐫𑐵𑐟 𑐖𑑂𑐰𑐣𑐵𑐫𑑄𑐎𑐮 𑑋 𑐄𑐧𑐮𑐫𑑂 𑐳𑐸𑐬𑐎𑑂𑐲𑐵 𑐎𑐵𑐣𑐹𑐣 𑐀𑐣𑑂𑐬𑑂‍𑐟𑐐𑐟 𑐰𑐫𑑂𑐎𑑅𑐫𑐵𑐟 𑐨𑐡𑑂𑐬𑐐𑑀𑐮 𑐖𑐾𑐮𑐫𑑂 𑐐𑐸𑐮𑐵 𑐟𑐎 𑐧𑐣𑑂𑐡𑐷 𑐡𑐫𑐾𑐎𑐮 𑑋𑐟𑑂𑐰𑐵𑐮𑐫𑑂 𑐔𑑂𑐰𑑄𑐥𑐶𑐣𑐶 𑐳𑑄𑐐𑐟𑑄 𑐰𑐫𑑂𑐎𑑅𑐫𑐵 𑐬𑐵𑐖𑐣𑐷𑐟𑐶𑐎 𑐔𑐾𑐟𑐣𑐵 𑐠𑐎𑐵𑐫𑐾𑐐𑐸 𑐣𑐶𑑄𑐟𑐶𑑄 𑐕𑐐𑐹 𑐎𑐠𑑄 𑐐𑑂𑐰𑐵𑐴𑐵𑐮𑐶 𑐩𑐫𑐵𑑅𑐐𑐸 𑐩𑐏𑐸 𑑋 𑐮𑐶𑐳𑐾𑑄 𑐕𑐾𑑃𑐖𑑅𑐫𑐵 𑐮𑐎𑐳𑑄 𑐣𑑄 𑐰𑐫𑑂𑐎𑑅𑐫𑐵𑐟 𑐳𑑂𑐰𑐟𑐣𑑂𑐟𑑂𑐬𑐟𑐵, 𑐣𑑂𑐫𑐵𑐫 𑐰 𑐳𑐩𑐵𑐣𑑂𑐟𑐵𑐫𑐵 𑐩𑐸𑐡𑑂𑐡𑐵𑐫𑑂 𑐤𑑂𑐫𑑅𑐣𑐾 𑐰𑐣𑐾𑐟 𑐐𑑂𑐰𑐵𑐴𑐵𑐮𑐶 𑐡𑐟 𑑋

𑐰𑐫𑑂𑐎𑑅𑐫𑐵 𑐧𑐵𑐖𑑂𑐫𑐵 𑐥𑐹𑐬𑑂‍𑐞 𑐩𑐮𑑂𑐮 𑐎𑐸𑐩𑐵𑐬𑐷 𑐔𑑀𑐎𑐫𑑂 𑐀𑐰𑐳𑑂𑐠𑐶𑐟 𑐬𑐵𑐖𑐱𑑂𑐰 𑐰𑐶𑐨𑐵𑐐𑐫𑐵 𑐎𑐬𑑂‍𑐩𑐔𑐵𑐬𑐷 𑑋 𑐕𑐸𑑄 𑐡𑑃 𑐟𑐎 𑐀𑐣 𑐖𑑂𑐫𑐵 𑐫𑐵𑐫𑐾𑐢𑐸𑑄𑐎𑐵𑑅 𑐥𑐹𑐬𑑂‍𑐞 𑐩𑐮𑑂𑐮𑐫𑐵𑐟 𑐔𑐣𑑂𑐡𑑂𑐬 𑐱𑐩𑑂𑐳𑐾𑐬𑑄 𑐖𑐵𑐐𑐶𑐬𑑄 𑐮𑐶𑐎𑐵𑐣𑐵𑐴𑐮 𑑋 𑐠𑑅𑐐𑐸 𑐣𑐵𑑄𑐫𑐵 𑐮𑑂𑐫𑐹𑐣𑐾 ‘𑐩𑐮𑑂𑐮’ 𑐖𑐵𑐟 𑐔𑑂𑐰𑑅𑐐𑐸 𑐀𑐨𑐶𑐫𑑀𑐐𑐫𑑂 𑐖𑐵𑐐𑐶𑐬𑑄 𑐥𑐶𑐟𑐶𑐣 𑑋 𑐖𑐵𑐟 𑐮𑐶𑐎𑐵𑐫𑐾 𑐩𑐵𑐣𑐾 𑐩𑐖𑐸𑐂𑐰𑑄 𑐳𑐣𑑂 𑑑𑑙𑑑𑑐 𑐳𑐾𑐥𑑂𑐚𑐾𑐩𑑂𑐧𑐬𑐫𑑂 𑐰𑐫𑑂𑐎𑐮𑑄 𑐠𑑅𑐐𑐸 𑐖𑐵𑐐𑐶𑐬 𑐟𑑄𑐎𑐾𑐩𑐵𑐮 𑑋

𑐮𑐶𑐥𑐵 𑐩𑐮𑑂𑐮𑐫𑐵 𑐀𑐧𑐸𑐖𑐸 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐎𑐵𑐱 𑐩𑐮𑑂𑐮𑐫𑐵𑐟 𑐣𑑄 𑐔𑐣𑑂𑐡𑑂𑐬 𑐱𑐩𑑂𑐳𑐾𑐬𑑄 𑐴𑐾 𑐳𑐣𑑂 𑑑𑑙𑑒𑑘 𑐀𑐎𑑂𑐚𑑀𑐧𑐬𑐫𑑂 𑐖𑐵𑐐𑐶𑐬𑑄 𑐮𑐶𑐎𑐫𑐵𑐴𑐮 𑑋 𑐀𑐨𑐶𑐫𑑀𑐐 𑐏𑑅– 𑐰𑐫𑑂𑐎𑑅 𑐥𑐹𑐬𑑂‍𑐞 𑐩𑐮𑑂𑐮𑐫𑐵 𑐎𑐵𑐫𑑂, 𑐐𑐸𑐪𑐾𑐳𑐶𑐣𑑄 𑐠𑑅𑐐𑐸 𑐥𑐴𑐶𑐔𑐵𑐣 (𑐩𑐮𑑂𑐮)𑐫𑐵𑐟 𑐮𑐶𑐎𑐵𑐫𑐾 𑐩𑐵𑐣𑐾 𑐩𑐖𑐸𑐮 𑑋 𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮 𑐠𑑅𑐐𑐸 𑐕𑐾𑑃𑐖𑑅𑐫𑐵𑐟 𑐬𑐵𑐖𑑂𑐫𑐥𑐵𑐏𑐾𑑄 𑐫𑐵𑑅𑐐𑐸 𑐰𑐶𑐨𑐾𑐡𑐫𑐵𑐟 𑐧𑐵𑑄𑐮𑐵𑐎 𑐠𑐹𑐪 𑐏𑑅 𑑋 𑐬𑐵𑐖𑑂𑐫𑐫𑐵 𑐀𑐣𑑂𑐫𑐵𑐫𑐥𑐹𑐬𑑂‍𑐞 𑐰𑑂𑐫𑐰𑐴𑐵𑐬 𑐰 𑐀𑐳𑐩𑐵𑐣𑑂𑐟𑐥𑑂𑐬𑐟𑐶 𑐳𑐖𑐎 𑐰 𑐳𑐔𑐾𑐟 𑐖𑐸𑐫𑐵𑐡𑐷 𑑋

𑐧𑐵𑐖𑑂𑐫𑐵 𑐰 𑐧𑐵𑑅𑐫𑐵𑐟 𑐬𑐵𑐖𑑂𑐫𑐥𑐵𑐏𑐾𑑄 𑐫𑐵𑑅𑐐𑐸 𑐀𑐣𑑂𑐫𑐵𑐫𑐥𑐵𑐏𑐾𑑄 𑐰𑐫𑑂𑐎𑑅𑐫𑐵𑐟 𑐬𑐵𑐖𑐣𑐷𑐟𑐶𑐎 𑐰𑐶𑐨𑐾𑐡𑐫𑐵 𑐧𑐵𑐬𑐾 𑐳𑐔𑐾𑐟 𑐫𑐵𑐎𑐾𑐐𑐸 𑐖𑑂𑐫𑐵 𑐫𑐵𑐎𑐮 𑑋 𑐄𑐏𑐾 𑐰𑐫𑑂𑐎𑑅𑐫𑐵 𑐎𑐎𑐵 𑐴𑑀𑐩𑐥𑑂𑐬𑐎𑐵𑐱 𑐩𑐮𑑂𑐮𑐫𑐵 𑐬𑐵𑐖𑐣𑐷𑐟𑐶𑐎 𑐐𑐟𑐶𑐰𑐶𑐢𑐶 𑐰 𑐔𑐾𑐟𑐣𑐵𑐥𑐵𑐏𑐾𑑄 𑐣𑑄 𑐳𑐷𑐎𑐵𑑅 𑐎𑐵𑐫𑐾𑐐𑐸, 𑐳𑑂𑐫𑐣𑐵 𑐎𑐵𑐫𑐾𑐐𑐸 𑐫𑐵𑐣𑐵𑐡𑐶𑐮 𑑋 𑐴𑑀𑐩𑐥𑑂𑐬𑐎𑐵𑐱 𑑒𑑐𑑐𑑗 𑐳𑐵𑐮 𑐮𑐶𑐥𑐵 𑐥𑑂𑐬𑐐𑐟𑐶𑐱𑐷𑐮 𑐀𑐢𑑂𑐫𑐫𑐣 𑐩𑐞𑑂𑐜𑐮, 𑐣𑐾𑐥𑐵𑐮 𑐫𑐸𑐰𑐎 𑐳𑑄𑐑 𑐰 𑐖𑐣𑐰𑐵𑐡𑐷 𑐳𑑄𑐫𑐸𑐎𑑂𑐟 𑐩𑑀𑐬𑑂‍𑐔𑐵𑐫𑐵 𑐳𑐩𑐬𑑂‍𑐠𑐎 𑐖𑐸𑐫𑐵𑐡𑐶𑐮 𑑋

𑐰𑐫𑑂𑐎𑑅 𑐠𑑅𑐐𑐸 𑐎𑑂𑐰𑐠𑐵𑐫𑑂 𑐨𑐵𑐬𑐟𑐫𑐵 𑐰𑐶𑐡𑑂𑐬𑑀𑐴𑐷 𑐣𑐾𑐟𑐵 𑐳𑐸𑐨𑐵𑐲𑐨𑐔𑐣𑑂𑐡𑑂𑐬 𑐧𑑀𑐳, 𑐗𑐵𑑃𑐳𑐷𑐫𑐵 𑐬𑐵𑐣𑐷 𑐮𑐐𑐵𑐫𑐟 𑐎𑐶𑐥𑐵 𑐟𑐶𑐎𑐵𑐟𑐂𑐐𑐸, 𑐀𑐮𑐾 ‘𑐩𑐵𑐎𑑂𑐬𑑂‍𑐳𑐰𑐵𑐡 𑐎𑑂𑐫𑐵 𑐴𑐿’, ‘𑐰𑐶𑐡𑑂𑐬𑑀𑐴𑐷 𑐳𑐸𑐨𑐵𑐲’ 𑐠𑐾𑑄𑐖𑑂𑐫𑐵𑑅𑐐𑐸 𑐳𑐦𑐹 𑐧𑑂𑐰𑐣𑐵𑐡𑐷𑐪 𑑋𑐟𑑂𑐰𑐵𑑅𑐫𑐵 𑐥𑐵𑐳𑐵𑐨𑐵𑐂𑐥𑐶𑐣𑐶 𑐳𑑄𑐐𑐟, 𑐕𑐾𑑃𑐖𑑅𑐫𑐵𑐟 𑐬𑐵𑐖𑑂𑐫𑑄 𑐫𑐵𑑅𑐐𑐸 𑐰𑐶𑐨𑐾𑐡𑐥𑑂𑐬𑐟𑐶𑐫𑐵 𑐁𑐎𑑂𑐬𑑀𑐱 𑐰 𑐕𑐾𑑃𑐖𑑅𑐫𑐵 𑐬𑐵𑐖𑐣𑐷𑐟𑐶𑐎 𑐔𑐾𑐟𑐣𑐵𑐫𑐵 𑐎𑐵𑐬𑐞𑑄 𑐜𑐵. 𑐎𑐮𑐩𑐥𑑂𑐬𑐎𑐵𑐱 𑐩𑐮𑑂𑐮𑐫𑐵 𑐤𑐵𑐥𑐵𑑄𑐐𑐸 𑐧𑑂𑐰𑑅 𑐬𑐵𑐖𑐣𑐷𑐟𑐶𑐥𑐵𑐏𑐾 𑐟𑐥𑑂𑐫𑑄𑐎 𑐳𑑂𑐰𑐵𑐥𑐹 𑐡𑐟 𑑋

𑐟𑑂𑐬𑐶𑐔𑐣𑑂𑐡𑑂𑐬 𑐎𑐮𑐾𑐖𑐫𑑂 𑐁𑐃𑐊 𑐰 𑐧𑐷𑐊𑐫𑐵 𑐥𑐝𑐵𑐃 𑐖𑐸𑐫𑐵𑐔𑑂𑐰𑑄𑐟𑐮𑐾 𑐰𑐫𑑂𑐎𑑅 𑐬𑐵𑐖𑐣𑐷𑐟𑐶𑐂 𑐳𑐎𑑂𑐬𑐶𑐫 𑐖𑐸𑐫𑐵𑐡𑐶𑐮 𑑋 𑐮𑐶𑐥𑐵 𑐕𑐾𑑃𑐫𑐵 𑐁𑐬𑑂‍𑐠𑐶𑐎 𑐀𑐰𑐳𑑂𑐠𑐵𑐫𑐵 𑐴𑐸𑐣𑐶𑑄 𑐖𑐵𑐐𑐶𑐬 𑐣𑐫𑐾𑐩𑐵𑑅𑐐𑐸𑐮𑐶𑑄 𑐥𑑂𑐬𑐟𑑂𑐫𑐎𑑂𑐲 𑐬𑐸𑐥𑑄 𑐬𑐵𑐖𑐣𑐷𑐟𑐶𑐥𑐵𑐏𑐾 𑐳𑑄𑐮𑐐𑑂𑐣 𑐖𑐸𑐫𑐵𑐩𑐡𑐷 𑑋 𑐄𑐐𑐸 𑐃 𑐟𑐎 𑐰𑐫𑑂𑐎𑑅𑐫𑐵 𑐎𑑂𑐲𑐩𑐟𑐵 𑐰 𑐮𑐐𑐣𑐱𑐷𑐮𑐟𑐵 𑐫𑐔𑑂𑐔𑐸𑐎𑐾 𑐏𑐣𑐾𑐡𑐫𑐾𑐢𑐸𑑄𑐎𑐮 𑑋 𑐕𑐐𑐹 𑐂𑐮𑐫𑑂 𑐥𑐸𑐲𑑂𑐥𑐮𑐵𑐮𑐫𑐵 𑐳𑐔𑐶𑐰 𑐳𑐬𑐴 𑐟𑐎 𑐖𑑂𑐫𑐵 𑐫𑐵𑐣𑐵𑐡𑐷𑐪 𑐩𑐮𑑂𑐮 𑐬𑐵𑐖𑐣𑐷𑐟𑐶𑐥𑐵𑐏𑐾𑑄 𑐥𑑂𑐬𑐟𑑂𑐫𑐎𑑂𑐲 𑐬𑐸𑐥𑑄 𑐳𑑄𑐮𑐐𑑂𑐣 𑐩𑐖𑐹𑐐𑐸𑐮𑐶𑑄 𑐥𑐸𑐲𑑂𑐥𑐮𑐵𑐮𑑄 𑐔𑐶𑐣𑑂𑐟𑐵 𑐎𑐵𑐮 𑑋

𑐕𑐎𑑂𑐰 𑐔𑐵𑐤𑐫𑑂 𑐴𑐾 𑐰𑐫𑐵𑑅 𑐰𑐫𑑂𑐎𑑅𑐫𑐵𑐟 𑐬𑐵𑐖𑐣𑐷𑐟𑐶 𑐫𑐵𑐫𑐾𑐐𑐸 𑐟𑑂𑐰𑑅𑐟𑐾 𑐩𑐟𑐾 𑐢𑐎𑐵𑑅 𑐥𑐸𑐲𑑂𑐥𑐮𑐵𑐮𑑄 𑐂𑐣𑐵𑐥 𑐫𑐵𑑅𑐰𑐮 𑑋 𑐟𑐬 𑐕𑐾𑑃𑐫𑐵 𑐮𑐎𑐳𑑄 𑐩𑐮𑑂𑐮𑐫𑐵𑐟 𑐄𑐏𑐾𑐥𑐵𑐏𑐾 𑐳𑐵𑐮𑐾𑐩𑐦𑐸𑐟 𑑋
𑐥𑑂𑐬𑐟𑑂𑐫𑐎𑑂𑐲 𑐬𑐸𑐥𑑄 𑐰𑐫𑑂𑐎𑐮𑑄 𑐮𑐶𑐥𑐵 𑐬𑐵𑐖𑐣𑐷𑐟𑐶 𑐐𑐸𑐧𑐮𑐾𑑄 𑐫𑐵𑐣𑐵𑐩𑐡𑐷 𑑋 𑐟𑐬 𑐬𑐵𑐖𑐣𑐷𑐟𑐶𑐥𑐵𑐏𑐾𑑄 𑐰𑐫𑑂𑐎𑑅𑐫𑐵 𑐩𑐶𑐏𑐵 𑐢𑐵𑑅𑐳𑐵 𑐐𑐸𑐧𑐮𑐾𑑄 𑐄𑐏𑐾𑐠𑐸𑐏𑐾 𑐩𑐖𑐹 𑑋 𑐮𑐶𑐥𑐵 𑐤𑑂𑐫𑐵𑐧𑐮𑐾𑑄 𑐰𑐫𑑂𑐎𑑅 𑐠𑑅𑐐𑐸 𑐎𑐮𑐩 𑐰 𑐧𑑁𑐡𑑂𑐢𑐶𑐎 𑐔𑑂𑐰𑐳𑐸𑐥𑐵𑐏𑐾𑑄 𑐬𑐵𑐖𑐣𑐷𑐟𑐶𑐎 𑐰𑐶𑐳𑑄𑐐𑐟𑐶 𑐰 𑐰𑐶𑐨𑐾𑐡𑐫𑐵𑐟 𑐎𑐫𑐵𑑅 𑐧𑐶𑐔𑐵𑑅 𑐟𑐫𑐵𑐔𑑂𑐰𑐣𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐬𑐵𑐖𑐣𑐷𑐟𑐶𑐎 𑐀𑐰𑐳𑑂𑐠𑐵𑐫𑑂 𑐰𑐫𑐾𑐩𑐵𑑅𑐐𑐸 𑐳𑐸𑐢𑐵𑐬𑐟𑐫𑑂 𑐧𑐵𑐬𑐾 𑐔𑑂𑐰𑐫𑐵𑐡𑐷𑐐𑐸 𑐏𑑃𑐟 𑐮𑐶𑐥𑐵 𑐥𑑂𑐬𑐩𑐸𑐏 𑐬𑐵𑐖𑐣𑐷𑐟𑐶𑐎 𑐩𑐸𑐡𑑂𑐡𑐵 𑐟𑐎𑑄 𑐖𑐸𑐫𑐵𑐧𑐶𑐮 𑑋𑐥𑐘𑑂𑐔𑐵𑐫𑐟 𑐰𑑂𑐫𑐰𑐳𑑂𑐠𑐵𑐫𑐵 𑐂𑐮𑐫𑑂 𑐟𑐎𑑄 𑐰𑐫𑑂𑐎𑐮𑑄 𑐕𑐪 𑐣𑐶𑐜𑐬 𑐔𑑂𑐰𑐩𑐶 𑐎𑐠𑑄 𑐥𑐘𑑂𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵𑐫𑐵 𑐁𑐔𑑀𑐮𑐣𑐵 𑐫𑐵𑐫𑐾𑐐𑐸 𑐟𑑂𑐰𑑅𑐟𑐵𑐩𑐡𑐷 𑑋 𑐥𑐘𑑂𑐔𑐵𑐫𑐟 𑐰𑑂𑐫𑐰𑐳𑑂𑐠𑐵𑐥𑐵𑐏𑐾𑑄 𑐮𑐵𑐡𑐾 𑐫𑐵𑐣𑐵𑐟𑑅𑐐𑐸 𑐕𑐐𑐹 𑐨𑐵𑐲𑐵, 𑐕𑐐𑐹 𑐢𑐬𑑂‍𑐩𑐫𑐵𑐟 𑐟𑐥𑑂𑐫𑑄𑐎 𑐀𑐳𑑂𑐰𑐷𑐎𑐵𑐬 𑐫𑐵𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐁𑐥𑐵𑐮𑑄 𑐔𑑂𑐰𑐳𑐸𑐟 𑐔𑑂𑐰𑐫𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐣𑐾𑐥𑐵𑑅𑐫𑐵 𑐰𑐶𑐰𑐶𑐢𑐟𑐵 𑐰 𑐠𑐷𑐠𑐷 𑐨𑐵𑐫𑑂𑐫𑐵𑐟 𑐳𑑂𑐰𑐷𑐎𑐵𑐬 𑐩𑐫𑐵𑐫𑐾𑐐𑐸 𑐏𑑅𑐳𑐵 𑐬𑐵𑐖𑑂𑐫 𑐐𑐧𑐮𑐾𑑄 𑐳𑐸𑐠𑐵𑑄 𑐩𑐮𑐵𑐂𑐐𑐸 𑐧𑐶𑐔𑐵𑑅 𑐣𑐶𑐬𑐣𑑂𑐟𑐬 𑐥𑑂𑐰𑑄𑐎𑐵𑐔𑑂𑐰𑐣𑐵𑐡𑐶𑐮 𑑋 𑐩𑐵𑑄𑐨𑐵𑐫𑑂𑐫𑐵 𑐩𑐵𑐢𑑂𑐫𑑄 𑐱𑐶𑐎𑑂𑐲𑐵 𑐧𑐷𑐩𑐵𑑅 𑐢𑐂𑐐𑐸 𑐏𑑃𑐫𑐵𑐟 𑐤𑑂𑐫𑐵𑐧𑑂𑐮𑐾𑑄 𑐠𑑅𑐐𑐸 𑐥𑑂𑐬𑐵𑐠𑐩𑐶𑐎𑐟𑐵𑐫𑑂 𑐮𑐵𑐎𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐳𑑂𑐰𑐷𑐡𑑃 𑐤𑑂𑐫𑑅 𑐩𑐸𑐎𑑂𑐎𑑄 𑐖𑐵𑐟𑐶, 𑐨𑐵𑐲𑐵 𑐰 𑐳𑑄𑐳𑑂𑐎𑐺𑐟𑐶𑐫𑐵𑐟 𑐳𑐩𑐵𑐣 𑐀𑐢𑐶𑐎𑐵𑐬 𑐡𑐫𑐾𑐩𑐵𑑅𑐐𑐸 𑐢𑐎𑐵𑑅 𑐟𑐫𑐵𑐡𑐷𑐐𑐸 𑐧𑐶𑐔𑐵𑑅 𑐮𑐶𑐥𑐵 𑑒𑑐𑑖𑑒÷𑑖𑑓 𑐳𑐵𑐮𑐫𑐵 𑐖𑐣𑐁𑐣𑑂𑐡𑑀𑐮𑐣𑐫𑑂 𑐥𑑂𑐬𑐩𑐸𑐏 𑐬𑐵𑐖𑐣𑐷𑐟𑐶𑐎 𑐩𑐸𑐡𑑂𑐡𑐵 𑐖𑐸𑐫𑐵𑑅 𑐥𑐶𑐖𑑂𑐰𑐮 𑑋

𑐳𑐩𑐵𑐰𑐾𑐱𑐷 𑐰 𑐳𑐩𑐵𑐣𑐸𑐥𑐵𑐟𑐶𑐎 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐰𑑂𑐫𑐰𑐳𑑂𑐠𑐵 𑐮𑐶𑐥𑐵 𑐖𑐧𑐬𑑂‍𑐖𑐳𑑂𑐟 𑐬𑐸𑐥𑑄 𑐳𑐟𑐎 𑐁𑐣𑑂𑐡𑑀𑐮𑐣𑐫𑑂 𑐊𑐖𑐾𑐞𑑂𑐜𑐵 𑐖𑐸𑐮 𑑋 𑑒𑑐𑑔𑑖 𑐳𑐵𑐮𑐫𑑂 𑐥𑑂𑐬𑐖𑐵𑐟𑐣𑑂𑐟𑑂𑐬𑐫𑐵 𑐥𑐸𑐣𑑅𑐳𑑂𑐠𑐵𑐥𑐣𑐵 𑐮𑐶𑐥𑐵 𑐊𑐎𑐮 𑐴𑐶𑐣𑑂𑐡𑐸 𑐬𑐵𑐖𑑂𑐫 𑐰 𑐨𑐵𑐲𑐶𑐎 𑐰𑐶𑐨𑐾𑐡𑑄 𑐣𑐶𑐬𑐣𑑂𑐟𑐬𑐟𑐵 𑐎𑐵𑐫𑐾𑐰𑑄 𑐣𑐾𑐰𑐵𑑅𑐟 𑐬𑐵𑐖𑐣𑐷𑐟𑐶𑐎 𑐬𑐸𑐥𑑄 𑐁𑐣𑑂𑐡𑑀𑐮𑐶𑐟 𑐖𑐸𑐮 𑑋

𑐳𑐣𑑂 𑑒𑑐𑑐𑑖𑐮𑐫𑑂 𑐡𑐎𑐮𑐫𑑂 𑐤𑐵𑐥𑐵𑑄 𑐣𑐾𑐰𑐵𑑅 𑐬𑐵𑐖𑐣𑐷𑐟𑐶𑐎 𑐁𑐣𑑂𑐡𑑀𑐮𑐣 𑐣𑐵𑑄 𑐥𑐸𑐔𑑅 𑐳𑑂𑐰𑐣𑐵𑑅 𑐣𑐾𑐰𑐵𑑅𑐟𑐫𑑂𑐳𑑄 𑐖𑐵𑐟𑐶𑐫 𑐳𑑂𑐰𑐱𑐵𑐳𑐣, 𑐢𑐬𑑂‍𑐩 𑐣𑐶𑐬𑐥𑐾𑐎𑑂𑐲𑐟𑐵 𑐰 𑐳𑑄𑐰𑐶𑐢𑐵𑐣 𑐳𑐨𑐵𑐥𑐵𑐏𑐾𑑄 𑐤𑐹𑐐𑐸 𑐳𑑄𑐰𑐶𑐢𑐵𑐣 𑐣𑐶𑐬𑑂‍𑐩𑐵𑐞𑐫𑐵 𑐩𑐵𑐐 𑐫𑐵𑐟 𑑋 𑐜𑐵. 𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮 𑐳𑐴𑐶𑐟 𑐩𑐸𑐎𑑂𑐎𑑄 𑑕𑑒𑐪 𑐰𑐬𑐶𑐲𑑂𑐛 𑐣𑐾𑐰𑐵𑑅 𑐤𑑂𑐫𑐮𑐸𑐰𑐵𑑅𑐟𑐫𑑂𑐳𑑄 𑐄𑐐𑐸 𑐩𑐵𑐐 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐟𑐟𑑂𑐎𑐵𑐮𑐷𑐣 𑐣𑐾𑐎𑐥𑐵 𑐩𑐵𑐌𑐰𑐵𑐡𑐷𑐥𑐵𑐏𑐾𑑄 𑐐𑐞𑐟𑐣𑑂𑐟𑑂𑐬𑐫𑐵 𑐩𑐵𑐐𑐫𑐵𑐟 𑐖𑐬𑑂‍𑐧𑐖𑐳𑑂𑐟 𑐬𑐸𑐥𑑄 𑐯𑑂𑐰𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐔𑑂𑐰𑐩𑐶𑐫𑐵𑐟 𑐐𑐞𑐟𑐣𑑂𑐟𑑂𑐬𑐫𑐵 𑐧𑐵𑐬𑐾 𑐎𑐣𑐵𑐡𑐷𑐐𑐸 𑐏𑑅, ‘𑐁𑑅 𑐳𑑄𑐳𑐵𑐬𑐫𑑂 𑐬𑐵𑐖𑐟𑐣𑑂𑐟𑑂𑐬𑐟 𑐡𑐣𑐷𑐐𑐸 𑐡𑐾𑐱𑐟 𑐳𑑂𑐰𑐫𑐾𑐐𑐸 𑐏𑑅𑐳𑐵 𑐁𑐥𑐵 𑐐𑐬𑐶𑐧 𑐡𑐾𑐱𑐫𑑂 𑐖𑐎 𑐡𑐣𑐷 𑑋 𑐫𑐎𑑂𑐰 𑐡𑐾𑐱𑐫𑑂 𑐬𑐵𑐖𑐟𑐣𑑂𑐟𑑂𑐬 𑐩𑐡𑐫𑐾𑐢𑐸𑑄𑐎𑐮 𑑋 𑐗𑐷𑐐𑐸 𑐡𑐾𑐱𑐫𑑂 𑐣𑑄 𑐳𑑂𑐰𑐫𑐾𑐐𑐸 𑐏𑑅𑐳𑐵 𑐖𑐸𑐖𑐸 𑐡𑐫𑐵𑑅 𑐕𑐸𑑄 𑐦𑐵𑐂𑐡𑐵 𑐡𑐂𑐐𑐸 𑐩𑐏𑐸 𑑋’

𑐤𑐵𑐥𑐵𑑄𑐐𑐸 𑐳𑑄𑐰𑐶𑐢𑐵𑐣𑐳𑐨𑐵𑐥𑐵𑐏𑐾𑑄 𑐳𑑄𑐰𑐶𑐢𑐵𑐣 𑐣𑐶𑐬𑑂‍𑐩𑐵𑐞𑐫𑐵 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐰𑐫𑑂𑐎𑑅 𑐀𑐩𑐾𑐬𑐶𑐎𑐵𑐫𑑂 𑐰𑐣𑐾𑐢𑐸𑑄𑐎𑐹𑐐𑐸 𑐖𑐸𑐮 𑑋 𑐡𑐾𑐱𑑄 𑐥𑐶𑐣𑐾 𑐖𑐹𑐳𑐵𑑄 𑐰𑐫𑑂𑐎𑐮𑑄 𑐣𑐾𑐥𑐵𑐮𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐳𑑄𑐰𑐶𑐢𑐵𑐣 𑐣𑐶𑐬𑑂‍𑐩𑐵𑐞𑐫𑐵 𑐖𑑂𑐫𑐵𑐫𑐵 𑐰𑐶𑐱𑐾𑐲 𑐬𑐸𑐔𑐷 𑐳𑐴𑐶𑐟 𑐳𑑂𑐰𑐫𑐵𑐔𑑂𑐰𑐣𑐵𑐡𑐶𑐮 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐬𑐵𑐖𑑂𑐫 𑐥𑐸𑐣𑑅𑐳𑑄𑐬𑐔𑐣𑐵𑐫𑐵 𑐳𑐰𑐵𑐮𑐫𑑂 𑐰𑐫𑑂𑐎𑑅𑐫𑐵 𑐁𑐥𑐵 𑐬𑐸𑐔𑐷 𑐡𑐸𑐐𑐸 𑐖𑐸𑐮 𑑋

𑐤𑐵𑐥𑐵𑑄𑐐𑐸 𑐳𑑄𑐰𑐶𑐢𑐵𑐣𑐳𑐨𑐵𑐫𑐵 𑐬𑐵𑐖𑑂𑐫 𑐥𑐸𑐣𑑅𑐳𑑄𑐬𑐔𑐣𑐵 𑐟𑐠𑐵 𑐱𑐎𑑂𑐟𑐶 𑐧𑐵𑑃𑐜𑐦𑐵𑑃𑐚 𑐳𑐩𑐶𑐟𑐶𑑄 𑐟𑐫𑐵𑐬 𑐫𑐵𑑅𑐐𑐸 𑐗𑐶𑑄𑐥𑑂𑐫𑑄𑐐𑐹 𑐥𑑂𑐬𑐡𑐾𑐱𑐫𑐵 𑐏𑐵𑐎𑐵𑐫𑑂 𑐰𑐫𑑂𑐎𑐮𑑄 𑐣𑐶𑐐𑐹 𑐐𑐴𑐣 𑐚𑐶𑐥𑑂𑐥𑐞𑐷 𑐫𑐵𑐣𑐵𑐡𑐶𑐮 𑑋 𑐕𑐐𑐹 𑐣𑐾𑐰𑐵𑑅𑐟𑐫𑑂 𑐣𑐶𑑄𑐟𑐶𑑄, 𑐩𑐾𑐐𑐸 𑐥𑐴𑐶𑐔𑐵𑐣 𑐡𑐸𑐐𑐸 𑐥𑐴𑐶𑐔𑐵𑐣 𑐳𑐴𑐶𑐟𑐫𑐵 𑐥𑑂𑐬𑐡𑐾𑐱 𑐳𑑂𑐰𑐷𑐎𑐵𑐬 𑐩𑐫𑐵𑐂𑐥𑐶𑐣𑐶 𑐣𑐶𑑄𑐟𑐶𑑄 𑑋 𑐬𑐵𑐖𑑂𑐫 𑐥𑐸𑐣𑑅𑐳𑑄𑐬𑐔𑐣𑐵 𑐳𑐩𑐶𑐟𑐶𑐫𑐵 𑐣𑐾𑐰𑐵𑑅 𑐥𑑂𑐬𑐡𑐾𑐱 𑐡𑐸𑐠𑑂𑐫𑐵𑑅𑐐𑐸 𑐥𑑂𑐬𑐟𑐶𑐰𑐾𑐡𑐣 𑐳𑑂𑐰𑐫𑐾𑐢𑐸𑑄𑐎𑐵𑑅 𑐰𑐫𑑂𑐎𑐮𑑄 𑐣𑐾𑐰𑐵𑑅𑐟𑐫𑑂 𑐣𑐾𑐟𑐺𑐟𑑂𑐰 𑐰𑐬𑑂‍𑐐𑐟𑐫𑑂𑐟 𑐕𑐥𑐸 𑐂𑐩𑐾𑐮 𑐔𑑂𑐰𑐫𑐵𑐡𑐶𑐮 𑑋

𑐩𑐾𑐮𑐫𑑂 𑐤𑑂𑐫𑑅𑐠𑐣𑐵𑐟𑑅𑐐𑐸 𑐡𑐸, ‘𑐥𑐸𑐣𑑅𑐳𑑄𑐬𑐔𑐣𑐵 𑐳𑐩𑐶𑐟𑐶𑑄 𑐟𑐫𑐵𑐬 𑐫𑐵𑑅𑐐𑐸 𑐏𑐵𑐎𑐵 𑐕𑐐𑐹 𑐴𑐾 𑐖𑐎 𑐩𑐵𑐥𑐡𑐞𑑂𑐜 𑐎𑐠𑑄 𑐫𑐵𑐣𑐵𑐟𑑅𑐐𑐸 𑐡𑐸 – 𑐳𑐵𑑄𑐳𑑂𑐎𑐺𑐟𑐶𑐎 𑐰𑐵 𑐥𑑁𑐬𑐵𑐞𑐶𑐎 𑑋 𑐠𑐸𑐎𑐷 𑐕𑐸𑑄 𑐣𑑄 𑐋𑐟𑐶𑐴𑐵𑐳𑐶𑐎 𑐡𑐳𑑂𑐟𑐵𑐰𑐾𑐖 𑐰 𑐖𑐣𑐳𑐵𑑄𑐏𑑂𑐫𑐶𑐎 𑐟𑐠𑑂𑐫𑐵𑑄𑐎𑐫𑐵𑐟 𑐁𑐢𑐵𑐬 𑐡𑐫𑐾𑐎𑐵𑐟𑑅𑐐𑐸 𑐩𑐡𑐸 𑑋’

𑐰𑐫𑑂𑐎𑐮𑑄 𑐥𑑁𑐬𑐵𑐞𑐶𑐎 𑐁𑐢𑐵𑐬𑐫𑐵 𑐮𑐶𑐢𑑄𑐳𑐵𑐫𑑂 𑐖𑐸𑐂𑐐𑐸 𑐳𑐶𑐩𑐵𑐫𑐵 𑐮𑑂𑐫𑐹𑐣𑐾 𑐩𑐰𑑄𑐳𑐾 𑐣𑐾𑐰𑐵𑑅 𑐳𑐩𑐵𑐖𑐫𑐵𑐟 𑐧𑑁𑐡𑑂𑐢𑐶𑐎 𑐳𑐩𑐵𑐖𑐥𑐵𑐏𑐾 𑐰𑐣𑐾𑐟, 𑐤𑐹𑐐𑐸 𑐚𑐾𑐎𑑂𑐣𑑀𑐮𑑀𑐖𑐶, 𑐰𑑂𑐫𑐰𑐳𑑂𑐠𑐵𑐥𑐎𑐶𑐫 𑐎𑑁𑐱𑐮 𑐰 𑐰𑐶𑐱𑑂𑐰 𑐧𑐖𑐵𑐬𑐫𑑂 𑐥𑑂𑐬𑐟𑐶𑐳𑑂𑐥𑐬𑑂‍𑐢𑐵 𑐫𑐵𑐫𑐾𑐦𑐂𑐐𑐸 𑐎𑐠𑑄 𑐳𑑂𑐬𑑀𑐟 𑐰 𑐳𑐵𑐢𑐣𑐫𑐵𑐟 𑐄𑐥𑐫𑑀𑐐 𑐫𑐵𑐫𑐾𑐦𑐸𑐳𑐵 𑐖𑐎 𑐗𑐷𑐐𑐸 𑐨𑐰𑐶𑐲𑑂𑐫 𑐳𑐸𑐣𑐶𑐱𑑂𑐔𑐶𑐟 𑐖𑐸𑐂𑐐𑐸 𑐟𑐬𑑂‍𑐎 𑐤𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐀𑐠𑐾𑐴𑐾 𑐕𑐎𑑂𑐰 𑐥𑑂𑐬𑐵𑐢𑑂𑐫𑐵𑐥𑐎 𑐔𑐿𑐟𑐣𑑂𑐫 𑐩𑐶𑐱𑑂𑐬𑑄 𑐬𑐵𑐖𑑂𑐫 𑐥𑐸𑐣𑑅𑐳𑑄𑐬𑐔𑐣𑐵, 𑐖𑐵𑐟𑐶𑐫 𑐀𑐢𑐶𑐎𑐵𑐬 𑐮𑐐𑐵𑐫𑐟𑐫𑐵𑐧𑐵𑐬𑐾 𑐥𑑂𑐬𑐳𑑂𑐟𑐸𑐟 𑐫𑐵𑐣𑐵𑐡𑐷𑐐𑐸 𑐎𑐵𑐬𑑂‍𑐫𑐥𑐟𑑂𑐬𑐫𑑂 𑐟𑐳𑐎𑑄 𑐀𑐳𑐴𑐩𑐟𑐶 𑐥𑑂𑐰𑑄𑐎𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐀𑐳𑐴𑐩𑐟𑐶𑐫𑐵𑐟 𑐩𑐾𑐮 𑐫𑐵𑐣𑐵𑐡𑐶𑐮 𑑋 𑐩𑐶𑐱𑑂𑐬𑐫𑐵 𑐎𑐵𑐬𑑂‍𑐫𑐥𑐟𑑂𑐬𑐫𑑂 𑐬𑐵𑐖𑑂𑐫 𑐥𑐸𑐣𑑅𑐳𑑄𑐬𑐔𑐣𑐵 𑐳𑐩𑐶𑐟𑐶𑑄 𑐟𑐫𑐵𑐬 𑐫𑐵𑑅𑐐𑐸 𑐗𑐶𑑄𑐥𑑂𑐫𑑄𑐐𑐹 𑐥𑑂𑐬𑐡𑐾𑐱𑐫𑐵 𑐏𑐵𑐎𑐵𑐫𑐵𑐟 𑐕𑐸𑑄 𑐣𑑄 𑐠𑐵𑐫𑑂 𑐩𑐧𑐶𑐄𑐐𑐸 𑐏𑑃𑐫𑑂 𑐟𑑃 𑐥𑑂𑐰𑑄𑐎𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐔𑑂𑐰𑐫𑐵𑐡𑐷, ‘𑐳𑑄𑐰𑐶𑐢𑐵𑐣𑐳𑐨𑐵 𑐣𑐾𑐥𑐵𑑅𑐩𑐶𑐟𑐫𑑂𑐳𑑄 𑐮𑑂𑐫𑑅𑐐𑐸 𑐥𑑂𑐬𑐟𑐶𑐣𑐶𑐢𑐶𑐟𑐫𑑂 𑐳𑐵𑐬𑑂‍𑐰𑐨𑑁𑐩 𑐃𑐎𑐵𑐂 𑐏𑑅 𑑋 𑐕𑐶𑐐𑐸 𑐥𑑂𑐬𑐵𑐖𑑂𑐘𑐶𑐎 𑐎𑐵𑐬𑑂‍𑐫𑐥𑐟𑑂𑐬𑐫𑑂 𑐠𑐸𑐎𑐷𑐫𑐵𑐟 𑐠𑐵𑐫𑑂 𑐧𑐷𑐩𑐵𑑅𑐐𑐸 𑐏𑑅 𑑋 𑐠𑑂𑐰𑐴𑐾 𑐕𑐐𑐹 𑐰𑐶𑐱𑑂𑐰𑐵𑐳 𑐫𑐵𑐣𑐵𑐟𑑅𑐐𑐸 𑐣𑐶𑐎𑐵𑐫 𑐳𑐸𑐣𑐵𑑄 𑐤𑐹𑐐𑐸 𑐳𑑄𑐰𑐶𑐢𑐵𑐣 𑐣𑐶𑐬𑑂‍𑐩𑐵𑐞 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐂 𑑋 𑐕𑐶𑑄 𑐠𑐸𑐎𑐷 𑐖𑐹𑐐𑐸 𑐕𑐮𑐦𑐮𑐫𑐵𑐟 𑐕𑐸𑑄 𑐣𑑄 𑐩𑐴𑐟𑑂𑐰 𑐧𑐶𑐫𑐵𑐩𑐡𑐷 𑑋 𑐠𑑂𑐰 𑐰𑐶𑐱𑑂𑐰𑐵𑐳 𑐴𑐾 𑐫𑐵𑐫𑐾𑐧𑐴𑐩𑐖𑐹 !….𑐫𑐡𑐶 𑐁𑑅𑐫𑐵 𑐥𑑂𑐬𑐱𑐵𑐳𑐣𑐶𑐎 𑐰 𑐬𑐵𑐖𑐣𑐷𑐟𑐶𑐎 𑐃𑐎𑐵𑐂𑐫𑐵𑐟 𑐥𑐬𑐶𑐰𑐬𑑂‍𑐟𑐣 𑐫𑐵𑐣𑐵𑑅 𑐨𑐔𑐵 𑐀𑐥𑑂𑐰𑑅 𑐳𑑂𑐰𑐵𑐫𑐟𑑂𑐟𑐟𑐵 𑐧𑐷𑐫𑐵𑑅 𑐤𑐹𑐐𑐸 𑐣𑐶𑐬𑑂‍𑐩𑐵𑐞 𑐫𑐵𑐂𑐳𑐵 𑐁𑐎𑐵𑐱 𑐎𑐸𑐟𑐸𑑄 𑐰𑐂𑐩𑐏𑐸 𑑋

𑐫𑐡𑐶 𑐋𑐟𑐶𑐴𑐵𑐳𑐶𑐎 𑐳𑑄𑐳𑑂𑐎𑐵𑐬 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐥𑐴𑐶𑐔𑐵𑐣𑐫𑐵𑐟 𑐥𑑂𑐬𑐡𑐾𑐱 𑐣𑐶𑐬𑑂‍𑐩𑐵𑐞𑐫𑐵 𑐗𑑂𑐰𑐮𑐫𑑂 𑐮𑑂𑐫𑑄𑐎𑐾𑐦𑐂𑐳𑐵 𑐠𑐸𑐎𑐶𑑄 𑐕𑐸 𑐎𑑂𑐲𑐟𑐶 𑐫𑐵𑐂 ?’𑐠𑐸𑐎𑐠𑑄 𑐜𑐵. 𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑑄 𑐥𑑂𑐬𑐟𑑂𑐫𑐾𑐎 𑐴𑐶𑐮𑐵𑐰𑑄𑐐𑐸 𑐬𑐵𑐖𑐣𑐷𑐟𑐶𑐎 𑐰𑑂𑐫𑐰𑐳𑑂𑐠𑐵𑐫𑑂 𑐠𑑅𑐐𑐸 𑐀𑐨𑐶𑐩𑐟𑐫𑐵 𑐖𑐵𑐴𑐾𑐬 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐤𑑂𑐫𑐠𑐣𑐵𑐡𑐷𑐐𑐸 𑐁𑐥𑐵𑐮𑑄 𑐏𑑃𑐟 𑐎𑐵𑐮𑐵𑐣𑑂𑐟𑐬𑐫𑑂 𑐥𑐵𑐫𑑂𑐕𑐶 𑐳𑐵𑐰𑐶𑐟 𑐣𑑄 𑐖𑐸𑐮 𑑋

𑐳𑐵𑐴𑐶𑐟𑑂𑐫, 𑐂𑐟𑐶𑐴𑐵𑐳 𑐰 𑐨𑐵𑐲𑐵𑐫𑐵 𑐏𑑂𑐫𑐮𑐫𑑂 𑐰𑐫𑑂𑐎𑐮𑑄 𑐠𑑅𑐐𑐸 𑐥𑑂𑐬𑐟𑑂𑐫𑐎𑑂𑐲 𑐳𑑄𑐮𑐐𑑂𑐣𑐟𑐵𑐫𑑂 𑐫𑐎𑑂𑐰 𑐏𑑃 𑐧𑐶𑐫𑐵 𑐗𑐵𑐮 𑑋 𑐟𑐬 𑐬𑐵𑐖𑐣𑐷𑐟𑐶𑐎 𑐬𑐸𑐥𑑄 𑐰𑐫𑑂𑐎𑐮𑑄 𑐫𑐵𑐣𑐵𑐡𑐷𑐐𑐸 𑐐𑐴𑐣 𑐚𑐶𑐥𑑂𑐥𑐞𑐷𑐟 𑐣𑑄 𑐠𑐸𑐐𑐸 𑐳𑐩𑐵𑐖𑐫𑐵 𑐣𑐶𑑄𑐟𑐶𑑄 𑐄𑐮𑐶𑐐𑑂𑐫𑑄𑐎 𑐩𑐴𑐟𑑂𑐰𑐥𑐹𑐬𑑂‍𑐞 𑐖𑐹 𑑋𑐜𑐵. 𑐎𑐩𑐮𑐥𑑂𑐬𑐎𑐵𑐱𑑄 𑐠𑑅𑐐𑐸 𑐖𑐷𑐰𑐣𑐫𑐵 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐟𑐎 𑐣𑑄𑑄 𑐬𑐵𑐖𑐣𑐷𑐟𑐶𑐫𑐵𑐟 𑐳𑐟𑐶𑐎𑑄 𑐩𑐸𑐮𑑂𑐫𑐵𑑄𑐎𑐣 𑐫𑐵𑐣𑐵𑐔𑑂𑐰𑐣𑐵𑐡𑐶𑐮 𑑋

𑐬𑐵𑐖𑐣𑐷𑐟𑐶𑐎 𑐡𑐮 𑐰𑐵 𑐬𑐵𑐖𑐣𑐷𑐟𑐶𑐎 𑐣𑐾𑐟𑐺𑐟𑑂𑐰𑐣𑐵𑐥 𑐰𑐶𑐡𑑂𑐫𑐵𑐬𑑂‍𑐠𑐷 𑐃 𑐢𑐸𑑄𑐎𑐵𑑅 𑐳𑐟𑐶𑐎 𑐔𑑂𑐰𑐣𑐾 𑐔𑐵𑐴𑐾 𑐩𑐖𑐹𑐳𑐵𑑄 𑐰𑐫𑑂𑐎𑑅𑐫𑐵 𑐐𑐴𑐣 𑐧𑐶𑐔𑐵𑑅 𑐤𑑂𑐫𑐵𑐧𑑂𑐮𑐾𑑄 𑐕𑐐𑐹 𑐩𑐵𑐬𑑂‍𑐐𑐡𑐬𑑂‍𑐱𑐣 𑐖𑐸𑐫𑐵𑐔𑑂𑐰𑐣 𑑋 𑐠𑑁𑑄 𑐰𑐫𑑂𑐎𑑅 𑐗𑐷𑐐𑐸 𑐣𑐶𑑄𑐟𑐶𑑄 𑐩𑑄𑐟 𑑋 𑐣𑐾𑐥𑐵𑐮𑑄 𑐕𑐪 𑐂𑐟𑐶𑐴𑐵𑐳𑐎𑐵𑐬, 𑐨𑐵𑐲𑐵𑐰𑐶𑐡𑑂 𑐖𑐎 𑐩𑐏𑐸 𑐬𑐵𑐖𑐣𑐷𑐟𑐶𑐎 𑐏𑑂𑐫𑐮𑐫𑑂 𑐡𑐹𑐬𑐡𑐬𑑂‍𑐱𑐶𑐟𑐵 𑐡𑐸𑐪 𑐕𑐪 𑐰𑐶𑐡𑑂𑐰𑐵𑐣 𑐩𑐵𑐬𑑂‍𑐐𑐣𑐶𑐬𑑂‍𑐡𑐾𑐱𑐎 𑐣𑑄 𑐟𑑄𑐎𑐾𑐩𑐵𑐮 𑑋 𑐰𑐫𑑂𑐎𑐮𑑄 𑐬𑐵𑐖𑐣𑐷𑐟𑐎 𑐏𑑂𑐫𑐮𑐫𑑂 𑐪𑐶𑐟𑐵𑐔𑑂𑐰𑐣𑐵𑐡𑐷𑐐𑐸 ‘𑐰𑐵𑐔𑐜𑐐’𑐫𑐵 𑐨𑐹𑐩𑐶𑐎𑐵 𑐤𑑂𑐫𑐵𑐧𑐮𑐾𑑄 𑐩𑐐𑐵𑑅𑐩𑐔𑐵𑑅𑐐𑐸 𑐀𑐣𑐸𑐨𑐹𑐟 𑐖𑐸𑐫𑐵𑐔𑑂𑐰𑐣𑐷 𑑋