𑐗𑐩𑑂𑐳𑐶𑐏𑑂𑐫𑑅𑐫𑐵 ‘𑐡𑐶 𑐦𑑀𑐊𑐬’𑐫𑑂 𑐳𑑂𑐰𑐷𑐡𑑄 𑐎𑑂𑐰𑐫𑑂𑐫𑐵 𑑖𑑐 𑐩𑑂𑐴 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐮𑑂𑐫𑐵𑐫𑑂𑐩𑑂𑐴𑐮𑑂𑐫𑐵𑐳𑐾 𑐳𑐴𑐮𑐴 𑐫𑐵𑐣𑐵𑐔𑑂𑐰𑐣 𑑋 𑐂𑐩𑐶𑐐𑐸 𑐳𑐴𑐮𑐴𑐫𑐵 𑐰𑐶𑐲𑐫 𑐏𑑅 𑐮𑐶𑐥𑐶 𑑋 𑐠𑑂𑐰 𑐴𑐾 𑐮𑑂𑐫𑐵𑐳𑐾𑐮𑑂𑐫𑐵𑐫𑑂𑐩𑑂𑐴𑐫𑐵 𑐥𑐸𑐔𑐮𑐫𑑂 𑐕𑐩𑑂𑐴 𑐥𑐬𑐶𑐥𑐎𑑂𑐰𑐩𑑂𑐴 𑐰𑑂𑐫𑐎𑑂𑐟𑐶 𑐥𑑂𑐬𑐡𑐾𑐱 𑐣𑑄. 𑑓 𑐫𑐵 𑐳𑐵𑑄𑐳𑐡 𑐬𑐵𑐖𑐾𑐱 𑐱𑐵𑐎𑑂𑐫 𑐣𑑄 𑐂𑐥𑐶𑑄𑐮𑐶𑐳𑐾 𑐐𑐦 𑐫𑐵𑐣𑐵𑐔𑑂𑐰𑐣 𑑋 𑐮𑐶𑐥𑐶 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐐𑐦 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐳𑐵𑑄𑐳𑐡 𑐱𑐵𑐎𑑂𑐫𑑄 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐩𑐴𑐶𑐩𑐵𑐫𑐵 𑐐𑐸𑐞𑐐𑐵𑐣 𑐫𑐵𑐣𑐵𑐔𑑂𑐰𑐣 𑑋

𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑐫𑑂 𑐣𑐾𑐥𑐵𑑅𑐫𑐵𑐟 𑐕𑐐𑐹 𑐳𑑂𑐰𑐟𑐣𑑂𑐟𑑂𑐬 𑐬𑐵𑐲𑑂𑐚𑑂𑐬𑐫𑐵 𑐬𑐸𑐥𑐫𑑂 𑐣𑑂𑐴𑐫𑐧𑑂𑐰𑐫𑐾𑐐𑐸 𑐣𑐶𑑄𑐟𑐶𑑄 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐫𑐵𑑅𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐩𑐴𑐟𑑂𑐰𑐥𑐹𑐬𑑂𑐞 𑐨𑐹𑐩𑐶𑐎𑐵 𑐡𑐸𑐐𑐸 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋 𑐡𑐾𑐫𑑂𑐫𑐵𑐟 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫𑐳𑑂𑐟𑐬𑐫𑑂 𑐥𑐴𑐶𑐔𑐵𑐣 𑐫𑐵𑐎𑐹𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵𑐟 𑐡𑐎𑑂𑐰𑑄 𑐣𑐾𑐥𑐵𑑅𑐩𑐶𑐫𑐵 𑐡𑐠𑐸𑐂 𑐠𑑂𑐫𑑄𑐎𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐳𑐾𑑄 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐠𑐩𑑂𑐴𑑄 𑐳𑐵𑑄𑐳𑐡 𑐰𑐶𑐎𑐵𑐳 𑐎𑑀𑐲𑐥𑐵𑐏𑐾𑑄 𑑕𑑐 𑐐𑐹 𑐮𑐵𑐏 𑐟𑐎𑐵 𑐡𑐵𑑄 𑐠𑑂𑐰 𑐴𑐾 𑐮𑐶𑐥𑐶𑐫𑐵 𑐥𑑂𑐬𑐔𑐵𑐬𑐥𑑂𑐬𑐳𑐵𑐬 𑐀𑐨𑐶𑐫𑐵𑐣𑐫𑐵 𑐣𑐶𑑄𑐟𑐶𑑄 𑐐𑑂𑐰𑐵𑐴𑐵𑐮𑐶 𑐣𑑄 𑐫𑐵𑐣𑐵𑐐𑐸 𑐢𑐫𑐵𑐔𑑂𑐰𑐣𑐵𑐡𑐷𑐐𑐸 𑐂𑐮𑐫𑑂 𑐀𑐣 𑐩𑐸𑐣𑐵𑐔𑑂𑐰𑑄𑐥𑐶𑑄 𑐳𑐎𑐮𑐾𑑄 𑐮𑑂𑐫𑐵𑐳𑐾𑐮𑑂𑐫𑐵𑐫𑑂𑐩𑑂𑐴𑐟 𑐄𑐟𑑂𑐳𑐵𑐴𑐶𑐟 𑐖𑐸𑐮 𑑋

𑐮𑐶𑐳𑐾𑑄 𑐮𑐶𑐥𑐶 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐳𑐴𑐮𑐴 𑐫𑐵𑐫𑐾𑐟 𑐰𑑅𑐥𑐶𑑄 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵𑐥𑐶𑑄𑐳𑑄 𑐀𑐟𑐶𑐎𑑄 𑐮𑐳𑐟𑐵 𑐣𑑄 𑐥𑑂𑐰𑑄𑐎𑐮 𑑋 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑑄 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 ‘𑐮𑐶𑐥𑐶 𑐐𑐦’𑐫𑑂 𑐐𑐸𑐠𑐶𑐫𑐵 𑐣𑐵𑐫𑑅 𑐣𑐶𑐬𑐘𑑂𑐖𑐣 𑐟𑐵𑐩𑑂𑐬𑐵𑐎𑐵𑐬𑑄 𑐠𑑅𑐐𑐸 𑐏𑑃 𑐟𑐫𑐾𑐐𑐸 𑐗𑑂𑐰𑐮𑐫𑑂 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵𑐟 𑐣𑐾𑐥𑐵𑑅𑐫𑐵 𑐩𑑁𑐮𑐶𑐎 𑐮𑐶𑐥𑐶 𑐳𑑂𑐫𑐣𑐾𑐐𑐸 𑐖𑑂𑐫𑐵 𑐖𑐸𑐮 𑐢𑐵𑑅𑐳𑐵 𑐩𑑂𑐴𑑀𑐟𑐶𑑄 𑐣𑑄 𑐣𑑂𑐫𑐫𑑂𑐡𑑃 𑐟𑐎 𑐂𑐩𑐶𑐳𑑄 𑐩𑐾𑐥𑐶𑑄𑐟 𑐣𑑄 𑐳𑑂𑐫𑐣𑐵 𑐰𑐣𑐾 𑐦𑐂 𑐢𑐫𑐵𑐡𑐶𑐮 𑑋

𑐮𑐶𑐥𑐶 𑐐𑐦𑐫𑐵 𑐴𑐾 𑐗𑑂𑐰𑐮𑐫𑑂 𑐩𑐶𑐳 𑐣𑐾𑐰𑐵𑑅 𑑑𑑑𑑓𑑒 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐮𑐶𑐳𑐾𑐫𑐵 𑐳𑐴𑐎𑐵𑐬𑑂𑐫𑐫𑑂 𑐠𑑅𑐐𑐸 𑐥𑐸𑐔𑐮𑑄 𑐠𑐷𑐠𑐷 𑐖𑐶𑐮𑑂𑐮𑐵𑐫𑑂 𑐰𑐣𑐵𑑅 𑐎𑑂𑐫𑐵𑐮𑐶𑐖𑐵𑐟𑑂𑐬𑐵𑐫𑐵 𑐣𑐵𑐩𑑄 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐰𑐬𑑂𑐎𑐳𑐥 𑐫𑐵𑐣𑐵𑐐𑐸 𑐃𑐫𑐵 𑐣𑑂𑐴𑐫𑐂𑐥𑐸𑐐𑐸 𑐀𑐣𑐸𑐨𑐰 𑐣𑑂𑐫𑑄𑐎𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐎𑑂𑐫𑐵𑐮𑐶𑐖𑐵𑐟𑑂𑐬𑐵𑐫𑑂 𑐁𑐟𑐎 𑐥𑑂𑐫𑐡𑑂𑐰𑐮𑑄 𑐩𑐮𑑂𑐫𑐵𑐎𑐫𑐵𑐟 𑐬𑐘𑑂𑐖𑐣𑐵 𑐮𑐶𑐥𑐶 𑐳𑑂𑐫𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐣𑑄 𑐢𑐫𑐵𑐡𑐶𑐮 𑑋
𑐠𑑅𑐠𑐵𑐫𑑂 𑐐𑑂𑐬𑐵𑐦𑐶𑐎𑑂𑐳 𑐰 𑐊𑐣𑐶𑐩𑐾𑐱𑐣 𑐳𑐫𑐾𑐎𑑅 𑐰𑐂𑐥𑐶𑑄𑐟 𑐊𑐣𑐶𑐩𑐾𑐱𑐣𑐫𑑂 𑐬𑐘𑑂𑐖𑐣𑐵 𑐮𑐶𑐥𑐶 𑐣𑑄 𑐟𑐫𑐵𑑅 𑐳𑑂𑐫𑐣𑐾𑐐𑐸 𑐫𑐵𑐫𑐾𑐩𑐵𑑅𑐐𑐸 𑐖𑐸𑐎𑑂𑐟𑐶 𑐣𑑄 𑐀𑐣 𑐥𑐶𑐴𑐵𑑄 𑐰𑑅𑐐𑐸 𑐏𑑅𑐳𑐵 ‘𑐰𑐾𑐰𑐶𑐣𑐵𑐬’ 𑐫𑐵𑐣𑐵𑑅 𑐰𑐶𑐡𑐾𑐱𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐠𑑅𑐠𑐶𑐟𑐶, 𑐥𑐵𑐳𑐵𑐨𑐵𑐂𑐥𑐶𑑄𑐟 𑐬𑐘𑑂𑐖𑐣𑐵 𑐮𑐶𑐥𑐶 𑐳𑑂𑐫𑐣𑐾𑐐𑐸 𑐂𑐔𑑂𑐕𑐵 𑐡𑐸𑐐𑐸 𑐣𑑄 𑐕𑐐𑐹 𑐥𑐸𑐔𑐮𑑄 𑐥𑑂𑐰𑑄𑐎𑐮 𑑋 𑐮𑐶𑐥𑐶 𑐐𑐦𑐫𑐵 𑐴𑐾 𑐗𑑂𑐰𑐮𑐫𑑂 𑐩𑐾𑐐𑐸 𑐥𑐸𑐔𑐮𑑄 𑐳𑑂𑐚𑐵𑐬 𑐧𑐎𑑂𑐳𑐫𑑂 𑐠𑐾𑑄 𑐴𑐾 𑐎𑐦𑐶, 𑐔𑑂𑐫𑐵 𑐟𑑂𑐰𑐣𑐾𑐟 𑐰𑐂𑐥𑐶𑑄𑐟 𑐎𑐥𑐫𑑂 𑐴𑐾 𑐬𑐘𑑂𑐖𑐣𑐵 𑐮𑐶𑐥𑐶 𑐔𑑂𑐰𑐫𑐵𑑅 𑐧𑐷𑐧𑐮𑐫𑑂 𑐐𑐵𑐴𑐵𑐎𑐶 𑐣𑑄 𑐡𑑄𑐐 𑐖𑐸𑐂 𑐏𑑃 𑐣𑑂𑐫𑑄𑐎𑐮 𑑋

𑐩𑐾𑐐𑐸 𑐥𑐸𑐔𑐮𑑄 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵𑐟 𑐖𑐣𑑂𑐩𑐣𑑂𑐴𑐶 (𑐧𑐬𑑂𑐠𑐜𑐾) 𑐎𑐾𑐎 𑐰 𑐎𑐵𑐬𑑂𑐜𑐫𑑂 𑐣𑑄 𑐥𑑂𑐬𑐫𑑀𑐐𑐫𑐵𑐫𑐾 𑐦𑐂𑐐𑐸 𑐳𑐸𑐗𑐵𑐰 𑐧𑐶𑐄𑐐𑐸 𑐏𑑅𑐳𑐵 𑐩𑐾𑐐𑐸 𑐕𑐐𑐹 𑐥𑐸𑐔𑐮𑑄 𑐨𑑂𑐫𑐵𑐮𑐾𑐣𑑂𑐚𑐵𑐂𑐣 𑐜𑐾 𑐰 𑐩𑐟𑐶𑐣𑐵𑐫𑐵 𑐔𑐶𑑄 ‘𑐚𑑀𑐎𑐣 𑐀𑐦 𑐮𑐨’ 𑐫𑑂 𑐣𑑄 𑐰𑑂𑐫𑐵𑐥𑐎 𑐬𑐸𑐥𑑄 𑐬𑐘𑑂𑐖𑐣𑐵 𑐮𑐶𑐥𑐶 𑐰 𑐣𑐾𑐥𑐵𑐮 𑐮𑐶𑐥𑐶 𑐥𑑂𑐬𑐫𑑀𑐐 𑐫𑐵𑐫𑐾 𑐦𑐂𑐐𑐸 𑐏𑑃 𑐢𑐵𑑅𑐐𑐸 𑐏𑑅 𑑋𑐀𑐠𑐾 𑐴𑐾 𑐩𑑀𑐧𑐵𑐂𑐮𑐫𑐵 𑐣𑑂𑐎𑑂𑐲𑑂𑑃 𑐰 𑐳𑑂𑐚𑐶𑐎𑐬𑐫𑑂 𑐣𑑄 𑐬𑐘𑑂𑐖𑐣𑐵 𑐰 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐩𑐵𑐢𑑂𑐫𑐩𑑄 𑐠𑐷𑐠𑐷 𑐳𑐣𑑂𑐡𑐾𑐱 𑐔𑑂𑐰𑐫𑐾 𑐦𑐂𑐐𑐸 𑐏𑑃 𑐀𑐣 𑐰𑑅𑐐𑐸 𑐏𑑅 𑑋

𑐠𑐸𑐮𑐶 𑐖𑐎 𑐩𑐏𑐳𑐾 𑐫𑐸𑐚𑑂𑐫𑐸𑐧𑐥𑐵𑐏𑐾𑑄 𑐣𑑄 𑐬𑐘𑑂𑐖𑐣𑐵 𑐮𑐶𑐥𑐶 𑐳𑑂𑐫𑐣𑐾 𑐦𑐂𑐐𑐸 𑐳𑐸𑐗𑐵𑐰𑐫𑐵 𑐏𑑃 𑐣𑑄 𑐀𑐣 𑐰𑑅𑐐𑐸 𑐏𑑅 𑑋 𑐦𑐾𑐳𑐧𑐸𑐎 𑐠𑐾𑑄𑐖𑑂𑐫𑐵𑑅𑐐𑐸 𑐮𑑀𑐎𑑄𑐴𑑂𑐰𑐵𑑅𑐐𑐸 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮𑐫𑑂 𑐠𑐷𑐠𑐷𑐎𑐠𑑄𑐫𑐵 𑐎𑐶𑐥𑐵 𑐟𑐫𑐾𑐠𑐾𑑄 𑐴𑐾 𑐬𑐘𑑂𑐖𑐣𑐵 𑐰 𑐣𑐾𑐥𑐵𑐮 𑐮𑐶𑐥𑐶𑑄 𑐔𑑂𑐰𑐫𑐵𑐟𑑅𑐐𑐸 𑐮𑑂𑐰𑐴𑑄𑐥𑑁 𑐰 𑐄𑐎𑐶𑐫𑐵 𑐀𑐣𑐸𑐰𑐵𑐡 𑐖𑐎 𑐣𑑄 𑐔𑑂𑐰𑐫𑐵𑑅 𑐟𑐫𑐾 𑐦𑐟 𑐢𑐵𑑅𑐳𑐵𑑄 𑐣𑑄 𑐁𑐥𑐵𑐮𑑄 𑐋𑐟𑐶𑐴𑐵𑐳𑐶𑐎 𑐟𑐠𑑂𑐫 𑐳𑐫𑐾𑐎𑐾 𑐳𑐷𑐎𑐾 𑐦𑐂𑐐𑐸 𑐏𑑃 𑐣𑑂𑐴𑑂𑐫𑑅𑐣𑐾 𑐴𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐡𑐎𑐮𑐫𑑂 𑐮𑐶𑐥𑐵 𑐩𑐾𑐐𑐸 𑐕𑐐𑐹 𑐥𑐸𑐔𑐮𑑄 𑐳𑑂𑐎𑐸𑐮𑐫𑐵 𑐩𑐳𑑂𑐟𑐫𑑂𑐟 𑐂𑐩𑐶𑐐𑐸 𑐳𑑂𑐎𑐸𑐮 𑐧𑑂𑐫𑐵𑐐𑐫𑑂 𑐳𑑂𑐎𑐸𑐮𑐫𑐵 𑐣𑐵𑑄 𑐔𑑂𑐰𑐫𑐵𑑅 𑐧𑐷𑐧𑐮𑐫𑑂 𑐬𑐘𑑂𑐖𑐣𑐵 𑐰 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐰𑑂𑐫𑐵𑐥𑐎 𑐖𑐸𑐂𑐐𑐸 𑐢𑐵𑐮 𑑋 𑐗𑐞𑑂𑐜𑐿 𑐳𑑂𑐰𑐑𑑁 𑐟𑐵𑑅𑐴𑐵𑐎𑑅𑐐𑐸 𑐮𑐶𑐥𑐶 𑐐𑐦𑐫𑐵 𑐡𑐎𑐮𑐫𑑂 𑐮𑐶𑐥𑐵 𑐐𑐸𑐸𑐠𑐶𑐫𑐵 𑐣𑑂𑐰𑐎𑐸 𑐀𑐣𑐶𑐮 𑐳𑑂𑐠𑐵𑐥𑐶𑐟𑑄 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐋𑐟𑐶𑐴𑐵𑐳𑐶𑐎 𑐥𑐎𑑂𑐲𑐫𑐵 𑐧𑐵𑐬𑐾 𑐕𑐸𑑄 𑐕𑐸𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐠𑑂𑐰 𑐴𑐾 𑐰𑐂𑐐𑐸 𑐀𑐳𑐵𑐬 𑑑𑑔 𑐐𑐟𑐾 𑐧𑐳𑐣𑑂𑐟𑐥𑐸𑐮𑐶𑐂 𑐖𑐸𑐂𑐐𑐸 𑐧𑐺𑐴𑐟 𑐮𑐶𑐥𑐶 𑐣𑐏𑑅𑐫𑐵 𑐧𑐵𑐬𑐾 𑐣 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋