𑐳𑑅 𑐕𑐐𑐹 𑐦𑐬𑐎 𑐀𑐨𑐶𑐰𑑂𑐫𑐎𑑂𑐟𑐶

𑐫𑐮 – 𑐳𑐵𑐩𑐵𑐣𑑂𑐫𑐟𑐫𑐵 𑐕𑐸𑑄 𑐣𑑄 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐩𑐵𑐮 𑐢𑐵𑑅𑐳𑐵 𑐳𑐸𑐫𑐵𑐟 𑐩𑐹𑐥𑐵𑐴𑐵𑑄 𑐡𑐫𑐾𑐎𑐾𑐐𑐸 𑐢𑐂𑐐𑐸 𑐏𑑃𑐫𑑂 𑐴𑐾 𑐀𑐮𑐩𑐮 𑐖𑐸𑐫𑐵𑐔𑑂𑐰𑐣𑐷 𑑋 𑐫𑐡𑐶 𑐩𑐹𑐥𑐵𑐴𑐵𑑄 𑐡 𑐴𑐾 𑐡𑐫𑐾𑐎𑐮 𑐢𑐵𑑅𑐳𑐵𑑄 𑐂𑐮𑐫𑑂 𑐠𑑂𑐫𑑄𑐎𑐵 𑐩𑐧𑐷𑐐𑐸 𑐩𑐾𑐐𑐸 𑐕𑐐𑐹 𑐳𑐩𑐳𑑂𑐫𑐵 𑐏𑑅 𑑋 𑐟𑐬 𑐳𑑅 𑐕𑐐𑐹 𑐦𑐬𑐎 𑐀𑐨𑐶𑐰𑑂𑐫𑐎𑑂𑐟𑐶𑑄 𑐠𑐖𑑂𑐫𑐵𑑅𑐐𑐸 𑐳𑐩𑐳𑑂𑐫𑐵 𑐩𑐡𑐫𑐾𑐎 𑐴𑐾 𑐩𑐹𑐥𑐵𑐴𑐵𑑄𑐫𑐵𑐟 𑐡𑐧𑐸𑐮𑐶𑐂 𑐧𑑂𑐰𑐣𑐵𑑅 𑐥𑐵𑐫𑑂𑐕𑐶 𑐂𑐮𑐫𑑂 𑐴𑐾 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵𑐩𑐶𑑄 𑐩𑐹𑐥𑐵𑐴𑐵𑑄𑐫𑐵𑐟 𑐧𑑂𑐰𑐣𑐾𑐐𑐸 𑐗𑑂𑐰𑐮𑐫𑑂 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑐰𑑅𑐥𑐶𑑄𑐩𑐢𑑂𑐫𑐾 𑐐𑑀𑐮𑐵𑐥𑑂𑐬𑐠𑐵𑑄 𑐕𑐩𑑂𑐴𑐾𑐳𑐶𑐫𑐵 𑐣𑐵𑑄 𑐑𑑀𑐲𑐞𑐵 𑐫𑐵𑐟 𑑋 𑐀𑐮𑐾 𑐰𑐫𑐵𑐟 𑐴𑐾 𑐩𑐹𑐥𑐵𑐴𑐵𑑄𑐫𑐵 𑐁𑐳𑐣 𑐐𑑂𑐬𑐴𑐞 𑐫𑐵𑐎𑐵𑑅 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐮 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵 𑐔𑐶𑐧𑐵𑐏𑑄 𑐰𑐵𑐔𑐣 𑐫𑐵𑐫𑐾𑐐𑐸 𑐳𑑄𑐳𑑂𑐠𑐵𑐫𑐵 𑐣𑐶𑐫𑐩𑐶𑐟 𑐖𑑂𑐫𑐵𑐗𑑂𑐰𑑅𑐎𑐠𑑄 𑐣𑑂𑐴𑐫𑐐𑐹𑐐𑐸 𑐳𑑄𑐳𑑂𑐎𑐬𑐞𑐫𑐵 𑐖𑑂𑐫𑐵𑐗𑑂𑐰𑑅𑐫𑐵 𑐣𑐶𑑄𑐟𑐶𑑄 𑐀𑐣 𑐄𑐥𑐳𑑂𑐠𑐶𑐟 𑐖𑐸𑐫𑐵𑐡𑐷𑐥𑐶𑑄 𑐩𑐢𑑂𑐫𑐾 𑐐𑑀𑐮𑐥𑑂𑐬𑐠𑐵𑑄 𑐕𑐣𑑀𑐚 𑐖𑐹𑐩𑑂𑐴 𑐎𑐺𑐟𑐶 𑐳𑐶𑐎𑑅𑐩𑐶𑐫𑐵𑐟 𑐩𑐹𑐥𑐵𑐴𑐵𑑄 𑐮𑑂𑐫𑐫𑐵𑑅 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐠𑑅𑐐𑐸 𑐔𑐶𑐧𑐵𑐏𑑄 𑐥𑐵𑐛 𑐫𑐵𑐫𑐾𑐟 𑐗𑐵𑐫𑐵𑐡𑐷𑐥𑐶𑑄 𑐳𑑂𑐰𑐩𑑂𑐴 𑐧𑐵𑐏𑑄 𑐔𑑂𑐰𑐩𑐶 𑐱𑐬𑐡 𑐎𑐳𑐵𑑅, 𑐣𑐶𑐖𑐶𑐬𑑀𑐳 𑐱𑑂𑐬𑐾𑐲𑑂𑐛 𑐰 𑐱𑑂𑐫𑐵𑐩 𑐁𑐱𑐵𑐫𑐵𑐟 𑐐𑑂𑐰𑐳𑐵𑑅 𑐏𑐮𑑅𑐥𑐵𑐏𑐾𑑄 𑐣𑐬𑐾𑐱 𑐀𑐩𑐵𑐟𑑂𑐫𑑄 𑐳𑑂𑐰𑐵𑑄𑐩𑐵𑑅 𑐎𑑂𑐰𑐏𑐵𑐫𑐾𑐎𑐵𑑅 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐳𑑂𑐰𑑄𑐐𑐹 𑐔𑐬𑐞𑐫𑑂 𑐣𑑂𑐴𑑂𑐫𑐵𑑅𑐐𑐸 𑐔𑐶𑐧𑐵𑐏𑑄 𑐰𑐵𑐔𑐣𑐫𑑂 𑐳𑑂𑐰𑐩𑑂𑐴𑑄 𑐔𑑂𑐰𑐩𑐶𑐥𑐶𑑄𑐳𑑄 𑐩𑑂𑐴𑐟𑐶𑑄 𑐣𑑂𑐫𑐵𑐥𑐸 𑐣𑑂𑐫𑐵𑐥𑐸 𑐫𑐵𑐣𑐵𑑅 𑐗𑐶𑑄𑐣𑑂𑐫𑐵𑐥𑐸 𑐔𑐶𑐧𑐵𑐏𑑄 𑐀𑐣 𑐥𑐵𑐛 𑐫𑐵𑑅𑐐𑐸 𑐏𑑅 𑑋

𑐥𑐵𑐛 𑐫𑐵𑑅𑐐𑐸 𑐔𑐶𑐧𑐵𑐏𑑄𑐫𑐵𑐟 𑐎𑐫𑐵𑑅 𑐚𑐶𑐥𑑂𑐥𑐞𑐷 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐰𑐬𑐶𑐲𑑂𑐛 𑐳𑐵𑐴𑐶𑐟𑑂𑐫𑐎𑐵𑐬 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬𑑄 𑐳𑑂𑐫𑐮𑑂𑐮𑐵𑑅𑐐𑐸, 𑐎𑑂𑐰𑐵𑐟𑐸𑐐𑐸 𑐰 𑐧𑐵𑐏𑑄 𑐣𑑂𑐴𑑂𑐫𑐧𑑂𑐰𑐫𑐾𑐐𑐸𑐮𑐶𑐂 𑐎𑐮𑐵𑐎𑐵𑐬𑐶𑐟𑐵𑐫𑐵 𑐥𑐴𑑅 𑐡𑐸𑐐𑐸, 𑐁𑐱𑐵𑐫𑐵 𑐧𑐵𑐏𑐣𑐫𑑂 𑐢𑐵𑐫𑐾𑐩𑐵𑑅𑐐𑐸 𑐳𑐎𑐟𑐵𑑄 𑐏𑑃 𑐔𑐶𑐴𑐵𑐎𑐮𑑄 𑐣𑑂𑐴𑑂𑐫𑐂𑐥𑐸𑐎 𑐣𑑂𑐴𑑂𑐫𑐧𑑂𑐰𑐫𑐵𑐟𑑅𑐐𑐸 𑐰 𑐱𑑂𑐬𑐾𑐲𑑂𑐛𑐫𑐵 𑐧𑐵𑐏𑑄 𑐔𑑂𑐰𑐫𑐾𑐐𑐸 𑐧𑐶𑐳𑑂𑐎𑑄 𑐥𑐴𑑅 𑐡𑐸𑐐𑐸 𑐢𑐫𑐵𑐡𑐶𑐮 𑑋

𑐬𑐔𑐣𑐵 𑐥𑐵𑐛 𑐫𑐵𑐣𑐵𑐡𑐷𑐥𑐶𑑄 𑐳𑑂𑐰𑐩𑑂𑐴𑑄 𑐔𑑂𑐰𑐩𑐶𑐫𑐵𑐟 𑐐𑑂𑐰𑐳𑐵𑑅 𑐏𑐮𑑅𑐥𑐵𑐏𑐾𑑄 𑐎𑐰𑐶 𑐣𑐵𑐥𑑄 𑐧𑐵𑐏𑑄 𑐔𑑂𑐰𑐩𑐶 𑐳𑐸𑐢𑐶𑐬 𑐏𑑂𑐰𑐧𑐶𑑄 𑐩𑐟𑐶𑐣𑐵𑐫𑐵 𑐔𑐶𑑄 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋 𑐀𑐠𑐾 𑐴𑐾 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑄 𑐳𑐶𑐎𑑅𑐩𑐶𑑄 𑐀𑐣 𑐄𑐥𑐳𑑂𑐠𑐶𑐟 𑐖𑐸𑐫𑐵𑐡𑐷𑐥𑐶𑑄 𑐩𑐢𑑂𑐫𑐾 𑐕𑐩𑑂𑐴𑐾𑐳𑐶𑐟 𑐐𑑀𑐮𑐥𑑂𑐬𑐠𑐵𑑄 𑐮𑑂𑐫𑐫𑐵𑑅 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋𑐳𑑄𑐳𑑂𑐠𑐵𑐥𑐵𑐏𑐾𑑄 𑐮𑐫𑑂𑐥𑐟𑐶𑐎𑑄 𑐮𑐵𑐫𑐵 𑐣𑑂𑐴𑐵𑐥𑐵𑑄 𑐱𑐣𑐶𑐰𑐵𑑅 𑐳𑑂𑐰𑐩𑑂𑐴 𑐔𑑂𑐰𑐩𑐶𑐥𑐶𑑄𑐟 𑐧𑑂𑐰𑐣𑐵𑑅 𑐄𑐎𑐠𑑄 𑐔𑐶𑐧𑐵𑐏𑑄 𑐰𑐵𑐔𑐣 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋