𑐫𑐾𑑃 – 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐐𑑂𑐰𑐳𑐵𑐮𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶 𑐥𑑂𑐬𑐰𑐬𑑂𑐡𑑂𑐨𑐣 𑐀𑐨𑐶𑐫𑐵𑐣 𑐎𑑂𑐰𑐔𑐵𑑅𑐐𑐸 𑐡𑐸 𑑋 𑐳𑑂𑐰𑐮𑐵𑐫𑑄𑐎𑑄 𑐣𑑂𑐴𑑂𑐫𑐵𑑅𑐐𑐸 𑐀𑐨𑐶𑐫𑐵𑐣 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐠𑐸𑐐𑐸 𑐀𑐨𑐶𑐫𑐵𑐣𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐩𑑂𑐴 𑐥𑑂𑐬𑐡𑐾𑐱 𑑓 𑐫𑐵 𑐳𑐵𑑄𑐳𑐡 𑐬𑐵𑐖𑐾𑐱 𑐱𑐵𑐎𑑂𑐫𑐫𑐵𑐟 𑐴𑐣𑐵𑐥𑑁 𑐣𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐐𑐸𑐠𑐶𑐫𑐵 𑐣𑐵𑐫𑑅 𑐣𑐶𑐬𑐘𑑂𑐖𑐣 𑐟𑐵𑐩𑑂𑐬𑐵𑐎𑐵𑐬𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄 𑐐𑐸𑐠𑐶𑐫𑐵 𑐳𑑄𑐬𑐎𑑂𑐲𑐎𑐣𑐵𑐥𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐥𑑂𑐬𑐡𑐾𑐱 𑐳𑐵𑑄𑐳𑐡 𑐱𑐵𑐎𑑂𑐫𑐮𑐶𑐳𑐾‌ 𑐀𑐨𑐶𑐫𑐵𑐣𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐳𑐸𑐨𑐵𑐫𑑂 𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐠𑐸𑐎𑐠𑑄 𑐴𑐾 𑐣𑐾𑐥𑐵𑐮 𑐮𑐶𑐥𑐶 𑐰 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐊𑐥𑑂𑐳 𑐡𑐫𑐾𑐎𑐾𑐟 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐣𑐵𑐥𑑄 𑐐𑐸𑐠𑐶𑐥𑐵𑐏𑐾‌ 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐎𑑂𑐫𑐵𑐮𑐶𑐖𑐵𑐟𑑂𑐬𑐵𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄𑐟 𑐣𑑄 𑐳𑐸𑐨𑐵𑐫𑑂 𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐥𑑂𑐬𑐡𑐾𑐱 𑐳𑐵𑑄𑐳𑐡 𑐱𑐵𑐎𑑂𑐫𑐫𑐵 𑐳𑐵𑑄𑐳𑐡 𑐰𑐶𑐎𑐵𑐳 𑐎𑑀𑐲𑐥𑐵𑐏𑐾‌ 𑐣𑑂𑐴𑑂𑐫𑐵𑑅𑐐𑐸 𑐣𑐾𑐥𑐵𑐮 𑐮𑐶𑐥𑐶 𑐥𑑂𑐬𑐰𑐬𑑂𑐡𑑂𑐢𑐣 𑐀𑐨𑐶𑐫𑐵𑐣 𑐀𑐣𑑂𑐟𑐬𑑂𑐐𑐟 𑐁𑐣𑐣𑑂𑐡𑐎𑐸𑐩𑐵𑐬 𑐩𑐴𑐬𑑂𑐖𑐣, 𑐥𑐰𑐣𑐬𑐵𑐖𑐵 𑐩𑐴𑐬𑑂𑐖𑐣, 𑐀𑐱𑑂𑐮𑐾𑐲𑐵 𑐩𑐴𑐬𑑂𑐖𑐣𑑄 𑐬𑐘𑑂𑐖𑐣𑐵 𑐰 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐊𑐥𑑂𑐳 𑐰 𑐚𑑂𑐫𑐸𑐚𑑀𑐬𑐶𑐫𑐮 𑐨𑐶𑐜𑐶𑐫𑑀 𑐡𑐫𑐾𑐎𑐵𑐡𑐷𑐐𑐸 𑐏𑑅𑐳𑐵 𑐳𑐸𑐫𑑀𑐐𑑂𑐫𑐬𑐟𑑂𑐣 𑐟𑐵𑐩𑑂𑐬𑐵𑐎𑐵𑐬‌ 𑐊𑐥𑑂𑐳 𑐣𑐵𑐥𑑄 𑐎𑑂𑐫𑐵𑐮𑐶𑐖𑐵𑐟𑑂𑐬𑐵, 𑐳𑐩𑐶𑐬 𑐎𑐬𑑂𑐩𑐵𑐔𑐵𑐬𑑂𑐫𑑄 𑐫𑐸𑐣𑐶𑐎𑑀𑐜𑐫𑑂 𑐮𑐶𑐥𑐶 𑐦𑐣𑑂𑐚, 𑐮𑐶𑐥𑐶𑐫𑐵 𑐚𑑂𑐫𑐸𑐚𑑀𑐬𑐶𑐫𑐮 𑐨𑐶𑐜𑐶𑐫𑑀, 𑐮𑐶𑐥𑐶 𑐊𑐥𑑂𑐳, 𑐎𑑂𑐫𑐵𑐮𑐶𑐖𑐵𑐟𑑂𑐬𑐵 𑐰 𑐩𑐕𑐶𑐣𑑂𑐡𑑂𑐬 𑐎𑑂𑐮𑐧𑑄 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐐𑐸𑐮𑐶𑑄 𑐳𑐸𑐨𑐵𑐫𑑂 𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐀𑐠𑐾 𑐴𑐾 𑐐𑐸𑐠𑐶𑐥𑐵𑐏𑐾‌ 𑐠𑐷𑐠𑐷 𑐠𑐵𑐳𑐫𑑂 𑐰𑐣𑐵𑑅 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐥𑑂𑐬𑐰𑐬𑑂𑐡𑑂𑐢𑐣 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐣𑑂𑐴𑑂𑐫𑐵𑐎𑐹𑐐𑐸 𑐎𑑂𑐫𑐵𑐮𑐶𑐖𑐵𑐟𑑂𑐬𑐵𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄𑐟 𑐣𑑄 𑐳𑐸𑐨𑐵𑐫𑑂 𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋