𑐎𑐾𑐡𑐵𑐬 𑐳𑐶𑐟𑐸
𑐣𑑂𑐫𑐵𑐡𑑃 𑐏𑐸𑐡𑑃 𑐮𑐶𑐥𑐵 𑐣𑐵𑐥𑐮𑐵𑐣𑐵𑐧𑐮𑐫𑑂 𑐰 𑐐𑐵𑐎𑑂𑐎𑑄 𑐥𑐵𑐣𑐵𑐔𑑂𑐰𑐣𑐾𑐢𑐸𑑄𑐎𑐮 𑑋
𑐰𑐫𑐵𑐐𑐸 𑐕𑑂𑐫𑐣𑐫𑑂 𑐟𑐥𑐸𑐮𑐶 𑐩𑐡𑐸 𑑋
𑐎𑐥𑐵𑐮𑐫𑑂 𑐳𑐶𑐣𑑂𑐴𑑅 𑐩𑐡𑐸 𑑋
𑐟𑐥𑐵𑑅 𑐮𑑄𑐳𑐸𑐬𑑂𑐰𑐵𑑅𑐫𑐵 𑐠𑐵𑐳𑐫𑑂 𑐥𑐵𑐂𑐣𑑂𑐚 𑐳𑐬𑑂𑐚 𑑋
𑐟𑐸𑐟𑐶𑐂 𑐥𑐵𑐮𑐶𑐳 𑐟𑐫𑐵𑑅 𑐠𑐷𑐎𑐵𑐟𑑅𑐐𑐸 𑐕𑑂𑐫𑑄𑐐𑐹 𑐮𑐵𑐎𑐵𑑄 𑑋
𑐏𑑃 𑐮𑑂𑐴𑐵𑐂𑐐𑐸 𑐥𑐴 𑐣𑑄 𑐣𑑂𑐴𑐵𑐥𑐵 𑐳𑑂𑐰𑐫𑐵𑑅 𑐐𑐵𑐎𑑂𑐎𑑄 𑐥𑐵𑐣𑐵𑐔𑑂𑐰𑐣𑐾𑐢𑐸𑑄𑐎𑐮 𑑋 𑐣𑑂𑐴𑐵𑐥𑐵 𑐏𑑃 𑐮𑑂𑐴𑐵𑐂𑐧𑐮𑐫𑑂 𑐐𑑂𑐫𑐵𑑅𑐔𑐶𑐎𑐸 𑐥𑐴 𑐡𑐸, 𑐮𑐶𑐎𑐸𑐣𑐵𑑅 𑐏𑑃 𑐮𑑂𑐴𑐵𑐂𑐩𑑂𑐴 !
𑐁𑑅 𑐰𑐫𑐵𑐐𑐸 𑐏𑑃𑐫𑑂 𑐳𑑂𑐥𑐲𑑂𑐚𑐟𑐵 𑐡𑐸 𑑋 𑐣𑐰𑐵𑐂𑐐𑐸 𑐢𑐵𑐬𑐵𑐥𑑂𑐬𑐰𑐵𑐴 𑐖𑐹 𑑋 𑐟𑐟𑐩𑐎𑑂𑐫𑑄 𑑋
𑐰𑑄 𑐖𑐶𑐟𑑅 𑐏𑐣𑐾𑐰𑑄 𑐮𑑂𑐴𑐵𑑅 𑐣𑐶𑐥𑐵𑑄 𑐮𑑂𑐴𑑂𑐰𑐣𑐵𑑅 𑐥𑑂𑐬𑐲𑑂𑐚 𑐳𑐮𑑄 𑐢𑐵𑐮 — 𑐣𑐩𑐳𑑂𑐎𑐵𑐬 !
𑐰𑐫𑐵𑐐𑐸 𑐳𑐮𑐫𑑂 𑐖𑐶 𑐨𑐔𑐵 𑐀𑐖𑐹 𑐔𑐵𑐫𑐵𑐧𑐶𑐫𑐵 𑑋 𑐰𑐫𑐵𑐐𑐸 𑐳𑑅 𑐣𑑂𑐴𑐵𑐥𑐵 𑐀𑐠𑐾 𑐐𑐸𑐧𑑂𑐳𑑄 𑐟𑐳𑑂𑐳𑑅 𑐩𑐖𑐹 𑑋
𑐰𑑄 𑐣𑑂𑐴𑐶𑐮𑐵𑑅 𑐣𑑂𑐴𑐶𑐮𑐵𑑅 𑐖𑐶𑐐𑐸 𑐮𑑂𑐴𑐵𑑅 𑐎𑐳𑑂𑐳𑐶𑐎 𑐖𑑂𑐰𑐣 𑑋
𑐖𑐶 𑐗𑐣𑑂 𑐀𑐖𑐹 𑐔𑐵𑐫𑐵 𑑋
𑐰𑑄 𑐖𑐶𑐐𑐸 𑐮𑑂𑐴𑐵𑑅 𑐀𑐠𑐾 𑐖𑑂𑐰𑑄𑐐𑐸 𑐢𑐫𑐵𑐐𑐸 𑐴𑐾 𑐩𑐳𑑂𑐫𑐹𑐣𑐶 𑑋
𑐣𑑂𑐴𑐵𑐥𑐵𑑄𑐏𑐸𑐳𑐷 𑐠𑑁𑑄 𑐴𑐾 𑐟𑐶𑐣𑐶 𑐀𑐣𑐸𑐨𑐰 𑐫𑐵𑐣𑐵 𑑋
𑐰𑑄 𑐖𑐶𑐐𑐸 𑐮𑑂𑐴𑐵𑑅 𑐎𑑂𑐰𑐵𑐟𑑂𑐟𑐸𑐎 𑐖𑑂𑐰𑐣𑐵 𑐴𑐾 𑐟𑐮 𑑋
𑐰𑐫𑐵𑐐𑐸 𑐥𑑂𑐬𑐟𑑂𑐫𑐾𑐎 𑐥𑐴𑐔𑐴𑐮𑑄 𑐖𑐶𑐟𑑅 𑐗𑐣𑑂𑐗𑐣𑑂 𑐀𑐖𑐹𑐔𑐵𑐫𑑂𑐎𑐵𑐫𑑄𑐎𑐵𑐔𑑂𑐰𑐣 𑑋
𑐖𑐶𑐟𑑅 𑐁𑑅 𑐕𑐸 𑐥𑑂𑐬𑐲𑑂𑐚 𑐖𑐸𑐮 𑐢𑐵𑑅𑐳𑐵 𑐰 𑐁𑑅 𑐣𑑂𑐫𑐵𑐡𑑃 𑐏𑐸𑐡𑑃 𑐣𑑂𑐴𑑂𑐫𑑀𑐫𑐵𑐩𑑂𑐴 𑐩𑐏𑐫𑐾𑐢𑐸𑑄𑐎𑐮 𑑋
𑐣𑑂𑐫𑐵𑐡𑑃 𑐏𑐸𑐡𑑃 𑐣𑑂𑐴𑑂𑐫𑑀𑐟𑐎 𑐖𑐎𑐫𑐵𑐐𑐸 𑐏𑑃 𑐏𑑅 𑑋
𑐰𑐫𑐵𑐐𑐸 𑐎𑐥𑐵𑐮𑐫𑑂 𑐳𑐶𑐣𑑂𑐴𑑅 𑐢𑐫𑐵𑐐𑐸 𑐐𑐸𑐧𑐮𑐾𑑄 𑐩𑐥𑑂𑐰𑑄 𑑋
𑐳𑐸𑐠 𑐣𑑂𑐴𑐵𑐥𑐵𑑄 𑐡𑐣𑐵𑑅 𑐡𑑂𑐫𑑀–𑐡𑑂𑐫𑐾𑐎𑐾 𑐰𑐣𑐷 𑑋
𑐧𑐵𑐐𑐩𑐟𑐷, 𑐧𑐐𑐮𑐵𑐩𑐸𑐏𑐷, 𑐧𑐚𑐸𑐎 𑐨𑐿𑐬𑐧, 𑐩𑐴𑐵𑐮𑐎𑑂𑐲𑑂𑐩𑐷 𑐴𑐶𑐮𑐵𑑅 𑐴𑐶𑐮𑐵𑑅 𑐔𑐵𑐴𑐶𑐮𑐷 𑑋
𑐡𑐾𑐐𑑅 𑐥𑐟𑑂𑐟𑐶𑑄 𑐡𑐸𑐴𑐵𑑄 𑐰𑐣𑐵𑑅 𑐐𑑄 𑐠𑐵𑐂 𑑋 𑐡𑑂𑐫𑑀 𑐨𑐵𑐐𑐶𑐫𑐵𑐂 𑑋 𑐳𑑂𑐰𑐵𑑄 𑐎𑐵𑐂 𑑋 𑐳𑐶𑐣𑑂𑐴𑑅 𑐟𑐷 𑑋
𑐫𑐮𑐫𑑂 𑐔𑑂𑐰𑑄𑐐𑐸 𑐡𑑂𑐫𑑀 𑐰 𑐡𑐾𑐐𑑅𑐫𑐵 𑐣𑐵𑑄 𑐩𑐳𑑂𑐫𑐹 𑐢𑐫𑐵𑐐𑐸 𑐴𑐾 𑐩𑐡𑐸 𑑋
𑐐𑐸𑐧𑐮𑐫𑑂 𑐐𑐣 𑐡𑑂𑐫𑑀𑐫𑐵𑐠𑐵𑐫𑑂 𑐰𑐣𑐾𑐐𑐸 𑐰𑐫𑐵𑐟 𑐣𑑂𑐰𑐫𑐾𑐎 𑐰𑑅 𑑋
𑐕𑐐𑐹 𑐎𑐠𑑄 𑐰 𑐢𑐬𑑂𑐩𑐎𑐬𑑂𑐩 𑐳𑐩𑑂𑐧𑐣𑑂𑐢𑐷 𑐂𑐣𑑂𑐳𑐵𑐂𑐎𑑂𑐮𑑀𑐥𑐶𑐜𑐶𑐫𑐵 𑐴𑐾 𑐢𑐵𑑅𑐳𑐵𑑄 𑐖𑑂𑐫𑐹 𑑋
𑐐𑐸𑑄𑐮𑐵 𑐖𑐸𑐂𑐩𑐵 𑐰𑐵 𑐫𑑄𑐮𑐵, 𑐮𑐔𑑂𑐕𑐶 𑐫𑑄𑐎𑑄 𑐰 𑐡𑑂𑐫𑑀 𑐡𑑂𑐫𑑀 𑐥𑐟𑑂𑐟𑐶𑑄 𑐔𑐵𑐴𑐶𑐮𑐵𑐖𑐸𑐂 𑑋
𑐀𑐠𑐾 𑐡𑑂𑐫𑑀 𑐔𑐵𑑅𑐴𑑂𑐫𑐹𑐰𑐣𑐷𑐧𑐮𑐫𑑂 𑐣𑐵𑐥𑐮𑐵𑐎𑑂𑐰𑐮𑐶𑐳𑐾 ‘𑐟𑐵𑐬𑐾𑐩𑐵𑐩𑑂’ 𑐰 ‘𑐖𑐫 𑐱𑐩𑑂𑐨𑑀’ 𑐢𑐎𑐵𑑅 𑐀𑐨𑐶𑐰𑐵𑐡𑐣 𑐫𑐵𑐣𑐵𑐖𑐸𑐂 𑑋
𑐡𑑂𑐫𑑀 𑐔𑐵𑑅𑐴𑑂𑐫𑐹𑐰𑐂𑐥𑐶𑑄 𑐩𑐶𑐳𑐵𑐟 𑐣𑑄 𑐰 𑐢𑑂𑐰𑐡𑐸𑐮 𑐎𑐶 𑐮𑐫𑑂𑐟𑐵𑐂𑐐𑐸 𑑋
𑐩𑐶𑐳𑐵𑐟𑐫𑑂 𑐨𑐸𑐟𑐹𑐏𑑃 𑐣𑑄 𑐰𑐮𑐶𑐳𑐾 𑐧𑑂𑐫𑐵𑑅 𑑋
𑐰𑐶𑐴𑐵𑐬𑐫𑑂 𑐐𑐣𑑄 𑐨𑑀𑐖𑐣𑐡𑐵𑐣𑐫𑐵 𑐎𑐵𑐬𑑂𑐫𑐎𑑂𑐬𑐩 𑐖𑐸𑐂𑐩𑐵 𑐰𑐵 𑐰𑐬𑑂𑐲𑐵𑐰𑐵𑐳𑐫𑐵 𑐎𑐵𑐬𑑂𑐫𑐎𑑂𑐬𑐩, 𑐩𑐴𑐵𑐥𑐬𑐶𑐟𑑂𑐬𑐵𑐞 𑐖𑐸𑐂𑐩𑐵 𑐰𑐵 𑐎𑐛𑐷𑐣𑐡𑐵𑐣 𑐰𑐵 𑐢𑐬𑑂𑐩𑐡𑐾𑐱𑐣𑐵𑐫𑐵 𑐎𑐵𑐬𑑂𑐫𑐎𑑂𑐬𑐩, 𑐀𑐩𑐵𑐂 𑐥𑐸𑐣𑑂𑐴𑐶𑐫𑐵 𑐧𑐸𑐡𑑂𑐢 𑐥𑐸𑐖𑐵 𑐖𑐸𑐂𑐩𑐵 𑐰𑐵 𑐧𑐸𑐡𑑂𑐢 𑐖𑐫𑐣𑑂𑐟𑐷, 𑐧𑐸𑑄𑐐𑐡𑑂𑐫𑑀𑐫𑐵 𑐧𑐶𑐔𑐵𑑅𑐥𑐸𑐖𑐵𑐫𑐵 𑐨𑑂𑐰𑐫𑑂 𑐖𑐸𑐂𑐩𑐵 𑐰𑐵 𑐎𑐶𑐳𑐣𑑂𑐡𑑂𑐫𑑀𑐫𑐵𑐠𑐵𑐫𑑂 𑐣𑑂𑐫𑐵𑐂𑐐𑐸 𑐟𑐳𑑂𑐩𑐶 𑐨𑑂𑐰𑐫𑑂 𑐰𑐵 𑐳𑐵𑐥𑐵𑐬𑐸 𑐨𑑂𑐰𑐫𑑂 𑐰𑐵 𑐐𑐞𑐾𑐱 𑐥𑐸𑐖𑐵 𑐨𑑂𑐰𑐫𑑂, 𑐩𑐟𑐫𑐵𑑅, 𑐎𑐶𑐳𑐣𑑂𑐥𑐸𑐖𑐵, 𑐐𑐞𑐾𑐱 𑐥𑐸𑐖𑐵 𑐣𑑂𑐴𑑂𑐫𑐵𑐐𑐸 𑐖𑐸𑐂𑐩𑐵 𑐰 𑐩𑐠𑑂𑐫𑑄 𑐰 𑐩𑐣𑑂𑐴𑑂𑐫𑑄 𑐢𑐫𑐵𑐐𑐸 𑐐𑐣𑑄 𑐩𑐡𑐸 𑑋
𑐢𑐬𑑂𑐩𑐫𑐵 𑐏𑑂𑐫𑐮𑐫𑑂 𑐰𑐫𑐵𑐟 𑐩𑑂𑐴𑐩𑐳𑑂𑐫𑐹 𑐢𑐫𑐵𑐥𑐶𑑄 𑐩𑑂𑐴𑑀 𑐴𑐾 𑐖𑐎 𑐡𑐂 𑑋
𑐠𑑁𑑄 𑐩𑐸𑐎𑑂𑐎𑑄 𑐠𑐸𑐎𑐶𑐫𑐵 𑐀𑑅𑐏𑑅, 𑐣 𑐕𑑂𑐫𑐣𑐫𑑂 𑐟𑐥𑐸𑐮𑐶, 𑐣 𑐎𑐥𑐵𑐮𑐫𑑂 𑐳𑐶𑐣𑑂𑐴𑑅, 𑐣 𑐳𑑂𑐰𑐵𑑄 !
𑐖𑐶𑐐𑐸 𑐩𑐶𑐏𑐵 𑐨𑐔𑐵 𑐀𑐥𑑂𑐰𑑅 𑐴𑐾 𑐟𑐐𑑂𑐰𑑅 𑐖𑐸𑐮 𑐮𑐵 𑐕𑐸 𑐠𑐾𑑄 𑐰𑑄 𑐣𑑂𑐴𑐶𑐮𑐵𑑅 𑐣𑑂𑐴𑐶𑐮𑐵𑑅 ‘𑐠𑐠𑐾 𑐴𑐾 𑐎𑐵’ 𑐢𑐫𑐵𑐠𑐾𑑄 𑐧𑑂𑐰𑐴 𑐨𑐔𑐵 𑐎𑐫𑑂𑐎𑐸𑑄𑐎𑐮 𑑋
𑐩𑑂𑐴𑑄 𑐦𑐸 𑐩𑐦𑐸𑐫𑐵 𑐎𑐵𑐮𑐧𑐶𑐮 𑐴𑐾 𑐧𑐵𑑄𑐮𑐵𑐎 𑐖𑐸𑐂𑐩𑐮𑐵𑑅𑐣𑐶 𑐰𑑄 𑐕𑐟𑑂𑐠𑐸𑑄 ‘𑐎𑐵 𑐳𑐵, 𑐖𑐶 𑐰𑐣𑐵𑐕𑑂𑐰𑐫𑐾’ 𑐢𑐎𑐵𑑅 𑐠𑑅𑐐𑐸 𑐮𑑃 𑐮𑐶𑐣𑐵𑐕𑑂𑐰𑐟 𑑋
𑐖𑐶 𑐥𑐮𑐏 𑐮𑑃𑐫𑑂 𑐴𑐾 𑐡𑐣𑐵𑑅 𑐰 𑐰𑑄𑐐𑐸 𑐰𑐵𑐟𑐵𑐴𑐵𑑄 𑐳𑑂𑐰𑐫𑐵𑐔𑑂𑐰𑐣𑐵 𑑋
𑐰 𑐠𑑅𑐐𑐸 𑐴𑐾 𑐥𑐴𑐮𑑄 𑐕𑑂𑐫𑑀𑑄 𑐰 𑐥𑑂𑐫𑑄 𑐠𑐶𑐎𑐸𑐠𑐶𑐎𑐸 𑐳𑑄𑐎𑐵𑑅 𑐨𑐵𑐟𑐵𑐨𑐵𑐟𑐵 𑐰𑐣 𑑋 𑐮𑐶𑐦𑑅 𑐳𑑂𑐰𑐫𑐾𑐐𑐸 𑐎𑐲𑑂𑐚 𑐕𑐎𑑅 𑐴𑐾 𑐩𑐫𑐵𑑅 𑑋
𑐠𑑁𑑄𑐎𑐣𑑂𑐴𑐾 𑐰 𑐡𑑂𑐫𑑀–𑐡𑑂𑐫𑐾𑐎𑐾 𑐩𑐰𑐣𑐾𑐢𑐸𑑄𑐎𑐮 𑐴𑑄 𑑋 𑐳𑐸𑐠𑐫𑑂 𑐳𑐸𑐠𑐫𑑂 𑐮𑑃𑐫𑑂 𑐰𑐂𑐧𑐮𑐫𑑂 𑐣𑑄 ‘𑐟𑐵𑐬𑐾𑐩𑐵𑐩𑑂’ ‘𑐖𑐫 𑐱𑐩𑑂𑐨𑑀’ 𑐩𑐢𑐵𑐫𑐾𑐢𑐸𑑄𑐎𑐮 𑐴𑑄 𑑋 𑐰𑐶𑐴𑐵𑐬𑐫𑑂 𑐨𑑀𑐖𑐣𑐡𑐵𑐣𑐫𑐵 𑐎𑐵𑐬𑑂𑐫𑐎𑑂𑐬𑐩 𑐰𑐵 𑐰𑐬𑑂𑐲𑐵𑐰𑐵𑐳𑐫𑐵 𑐎𑐵𑐬𑑂𑐫𑐎𑑂𑐬𑐩𑐫𑑂 𑐣𑑄 𑐩𑐠𑑂𑐫𑐣𑐾𑐢𑐸𑑄𑐎𑐮 𑐴𑑄, 𑐩𑐴𑐵𑐥𑐬𑐶𑐟𑑂𑐬𑐵𑐞, 𑐎𑐛𑐷𑐣𑐡𑐵𑐣, 𑐢𑐬𑑂𑐩𑐡𑐱𑐣𑐵, 𑐧𑐸𑐡𑑂𑐢 𑐥𑐸𑐖𑐵 𑐰𑐵 𑐧𑐸𑐡𑑂𑐢 𑐖𑐫𑐣𑑂𑐟𑐷𑐂 𑐣𑑄 𑐩𑐠𑑂𑐫𑐣𑐾𑐢𑐸𑑄𑐎𑐮 𑐴𑑄, 𑐧𑐸𑑄𑐐𑐡𑑂𑐫𑑀𑐫𑐵 𑐧𑐶𑐔𑐵𑑅𑐥𑐸𑐖𑐵𑐫𑐵 𑐨𑑂𑐰𑐖𑐫𑑂 𑐣𑑄 𑐩𑐰𑐣𑐾𑐢𑐸𑑄𑐎𑐮 𑐴𑑄, 𑐎𑐶𑐳𑐣𑑂𑐡𑑂𑐫𑑀𑐫𑐵𑐠𑐵𑐫𑑂 𑐣𑑂𑐫𑐵𑐂𑐐𑐸 𑐟𑐳𑑂𑐩𑐶 𑐨𑑂𑐰𑐫𑑂 𑐰𑐵 𑐳𑐵𑐥𑐵𑐬𑐸 𑐨𑑂𑐰𑐫𑑂 𑐰𑐵 𑐐𑐞𑐾𑐱 𑐥𑐸𑐖𑐵 𑐨𑑂𑐰𑐖𑐫𑑂 𑐣𑑄 𑐩𑐠𑑂𑐫𑐣𑐾𑐢𑐸𑑄𑐎𑐮 𑐴𑑄, 𑐀𑐮𑐾 𑐩𑐟𑐫𑐵𑑅, 𑐎𑐶𑐳𑐣𑑂𑐥𑐸𑐖𑐵, 𑐐𑐞𑐾𑐱 𑐥𑐸𑐖𑐵 𑐕𑐸𑑄 𑐕𑐸𑑄 𑐥𑐸𑐖𑐵𑐫𑑂 𑐣𑑄 𑐏𑐣𑐾𑐩𑐡𑐫𑐾𑐢𑐸𑑄𑐎𑐮 𑐴𑑄 𑑋
𑐐𑐸𑑄𑐮𑐵 𑐫𑑄𑐮𑐵 𑐢𑐫𑐵𑐐𑐸 𑐮𑐵 𑐮𑑂𑐰𑑅𑐴𑐾 𑐩𑐣𑐾𑐢𑐸𑑄𑐎𑐮 𑐴𑑄 𑐰𑐫𑐵 𑑋
𑐳𑐩𑐫𑑂𑐧𑐖𑐶 𑐢𑐵𑐮 𑐎𑐶 𑐴𑐸𑐬𑐸𑐎𑑂𑐎 𑐴𑐾 𑐖𑐸𑐂𑐩𑑂𑐴 𑐰 𑐁𑑅 𑐳𑐩𑐫𑑂𑐧𑐖𑐶 𑐢𑐵𑐮 𑐎𑐶 𑐴𑐾 𑐣𑑂𑐴𑐵𑐫𑑂 𑐎𑐫𑑂𑐎𑐸𑑄𑐎𑐵𑐖𑐸𑐂𑐐𑐸 𑐴𑑄 𑑋
𑐖𑐶𑑄 𑐳𑐷𑐎𑑄 𑐐𑐸𑑄𑐮𑐵𑑄 𑐐𑐞𑐾𑐱𑐥𑐸𑐖𑐵 𑐰 𑐨𑐶𑐣𑑂𑐡𑑂𑐫𑑀 𑐥𑐸𑐖𑐵 𑐰𑐂𑐧𑐮𑐫𑑂 𑐟𑑂𑐰𑐵𑐮𑐫𑑂 𑐔𑑂𑐰𑐎𑐵 𑐣𑐵𑐫𑑅 𑐖𑐸𑐫𑐵𑑅 𑐧𑑂𑐰 𑐦𑐫𑐵𑐖𑐸𑐂𑐩𑑂𑐴 𑐴𑐾 𑐰 𑑋 𑐰 𑐡𑐟𑑂𑐟𑐮𑑂𑐫 𑐟𑑂𑐰𑐵𑐮𑐫𑑂 𑐳𑐸𑐣𑐵𑐣𑑄 𑐕𑐸𑑄 𑐣𑑄 𑐥𑐸𑐖𑐵𑐫𑐵𑐐𑐸 𑐧𑑂𑐰 𑐦𑐫𑐾𑐟 𑐣𑐵𑑄 𑐴𑐾 𑐎𑐵𑐫𑐾𑐩𑑂𑐰𑐵𑑅 𑑋 𑐳𑑂𑐰𑑅𑐰𑐫𑐵𑐔𑑂𑐰𑑄𑐥𑐶𑑄 𑐟𑑂𑐰𑐵𑑅𑐧𑐵𑑅𑐫𑐵𑐥𑐶𑑄𑐟 𑐰 𑐀𑐖𑑂𑐖 𑐮𑐵 𑐕𑐾𑑃𑐫𑑂 𑐕𑐾𑑃𑐫𑑂 𑐟𑐎𑑄 𑐥𑑂𑐬𑐳𑐵𑐡 𑐢𑐎𑐵𑑅 𑐧𑑂𑐰 𑐟𑐫𑐵𑑅 𑐂𑑄𑐎𑐾 𑐕𑑂𑐰𑐂𑐩𑑂𑐴 𑐣𑑄 𑐰 𑐴𑐾 𑑋
𑐖𑐶𑐠𑐵𑐫𑑂 𑐣𑑄 𑐰𑑄 𑐡𑑃𑐫𑑂𑐡𑑃𑐳𑑄 ‘𑐨𑐶𑐣𑑂𑐡𑑂𑐫𑑀𑐥𑐸𑐖𑐵𑐫𑐵 𑐥𑑂𑐬𑐳𑐵𑐡’, ‘𑐐𑐞𑐾𑐱𑐥𑐸𑐖𑐵𑐫𑐵 𑐥𑑂𑐬𑐳𑐵𑐡’ 𑐢𑐎𑐵𑑅 𑐧𑑂𑐰 𑐟𑐫𑐾𑐴𑑅 𑑋
𑐐𑐸𑑄𑐮𑐵 𑐰𑐮 𑐎𑐶 𑐴𑐾 𑐖𑐶𑐩𑐳𑑂𑐟𑐫𑑂 𑐰𑑄 𑐧𑐷𑐴𑐂𑐐𑐸 𑐨𑐶𑐣𑑂𑐡𑑂𑐫𑑀𑐥𑐸𑐖𑐵 𑐰 𑐐𑐞𑐾𑐱𑐥𑐸𑐖𑐵𑐫𑐵 𑐥𑑂𑐬𑐳𑐵𑐡 𑐣𑐫𑐾𑐟 𑐁𑐳𑑄 𑐔𑑂𑐰𑑄𑐔𑑂𑐰𑐣𑐶𑐐𑐸 𑑋 𑐣𑑂𑐴𑑂𑐫𑐵𑐐𑐸𑑄 𑐮𑑂𑐰𑐵𑐎𑐖𑑂𑐫𑐵𑐣𑐵𑐔𑑂𑐰𑐣𑐶𑐐𑐸 𑐖𑐸𑐫𑐵𑑅 𑐏𑑅 𑐮𑐵 𑐠𑐾𑑄 𑐰𑑄 𑐧𑐷𑐴𑐂𑐐𑐸 𑐥𑑂𑐬𑐳𑐵𑐡 𑐣𑐫𑐾𑐧𑐮𑐫𑑂 𑐟𑐳𑐎𑑄 𑐳𑐵𑑅 𑑋 𑐖𑐶𑐩𑐳𑑂𑐟𑐫𑑂 𑐣𑑄 𑐰𑑄 𑐧𑐷𑐴𑐂𑐐𑐸 𑐥𑑂𑐬𑐳𑐵𑐡 𑐣𑐫𑐾 𑐟𑐳𑐎𑑄 𑐫𑑅 𑑋
𑐁𑑅 𑐰𑑄 𑐀𑐖𑑂𑐫𑐵𑑅𑐐𑐸 𑐥𑑂𑐬𑐳𑐵𑐡 𑐣𑑄 𑐂𑐣𑐾𑐩𑐴𑐫𑐾𑐢𑐸𑑄𑐎𑐮 𑐴𑑄 𑑋
𑐖𑐶𑐩𑐳𑑂𑐟 𑐟𑑅𑐢𑐷 𑐖𑐸𑐫𑐵𑑅 𑐥𑐶𑐣𑐾 𑐁𑐏𑑅 𑐧𑑂𑐰𑑄𑐰𑐣𑐾𑐢𑐸𑑄𑐎𑐹𑐳𑐵𑑄 𑐰𑐫𑐵𑐐𑐸 𑐣𑐵𑑄 𑐣𑑂𑐴𑑂𑐫𑐠𑐣 𑐎𑐶 𑐴𑐾 𑐰𑑄 𑐧𑐷𑐴𑐂𑐐𑐸 𑐥𑑂𑐬𑐳𑐵𑐡 𑐣𑐶𑑄 𑐮𑐸𑐩𑑄𑐎𑐾𑐢𑐸𑑄𑐎𑐷𑐐𑐸 𑑋
𑐫𑑄𑐮𑐵𑑄 𑐫𑑄𑐮𑐳𑐶 𑐰𑐣𑐾𑐟 𑐟𑑂𑐰𑐵𑑅𑐧𑐵𑑅𑐫𑐵𑐥𑐶𑑄 𑐦𑐸𑐎𑑂𑐎 𑐮𑑂𑐫𑐵𑐫𑑂𑐩𑑂𑐴𑐮𑑂𑐫𑐵𑐳𑐾𑐟𑐫𑑂𑐟 𑐳𑐸𑐠𑐫𑑂 𑐧𑐴𑐣𑐷 𑐔𑑂𑐰𑐫𑑂𑐎𑑅 𑐖𑐸𑐂 𑑋 𑐰𑐮𑐶𑐳𑐾 𑐫𑑄𑐮𑐳𑐶 𑐰𑐣𑐾𑐐𑐸 𑐐𑐸𑐮𑐶 𑐣𑑂𑐴𑑂𑐫𑐵𑐂𑐥𑐸𑐳𑐾 𑐔𑑂𑐰𑑄 ! 𑐮𑑂𑐫𑐵𑐳𑐾𑐟 𑐰𑐮𑐶𑐳𑐾 𑐢𑐶𑐟𑑂𑐟𑐸𑐢𑐶𑐣𑐵𑑅 𑐏𑐶𑐟𑑂𑐟𑐸𑐏𑐶𑐣𑐵𑑅 𑐴𑐸𑐬𑑂𑐬 𑐴𑐸𑐬𑑂𑐬 𑐧𑑂𑐰𑐵𑑃𑐫𑑂 𑐖𑐸𑐂 𑑋 𑐰 𑐣𑑄 𑐄𑐩𑐾𑐬𑑄 𑐠𑑃 𑐳𑐵𑑄 𑐮𑑂𑐫𑐵𑐳𑐾𑐟𑐮𑐶𑐳𑐾 𑐠𑐶𑐟𑐸𑑄𑐠𑐶𑐟𑐸𑑄 𑐖𑐸𑐂 𑑋 𑐫𑑄𑐮𑐳𑐶 𑐰𑑄𑐥𑐶𑑄 𑐦𑐸𑐎𑑂𑐎𑐳𑑂𑐫𑐵𑑄 𑐣𑑂𑐴𑑂𑐫𑐵𑐂𑐥𑐸𑐎𑐵𑑅 𑐰𑐂 𑑋
𑐎𑐵𑐬𑑂𑐟𑐶𑐎 𑐮𑐔𑑂𑐕𑐶 𑐳𑐸𑐠𑐫𑑂 𑐔𑑀𑐨𑐵𑑅 𑐰𑐣𑐾𑐐𑐸 𑐖𑑂𑐫𑐵𑐫𑑂 𑐣𑑄 𑐰𑑄 𑐴𑐾 𑐟𑑂𑐰𑐵𑐮𑐫𑑂 𑐔𑑂𑐰𑑄𑐥𑐶𑑄 𑐮𑑂𑐫𑐵𑐫𑑂𑐩𑑂𑐴𑐮𑑂𑐫𑐵𑐳𑐾𑐥𑐶𑐣𑑂𑐟 𑐔𑑂𑐰𑐫𑑂𑐎𑐵𑑅 𑐖𑐸𑐂 𑑋
𑐩𑐵𑐑𑑄 𑐣𑑄 𑐩𑐵𑐑𑑅 𑐰𑐣𑐾𑐟 𑐟𑑂𑐰𑐵𑐮𑐫𑑂 𑐔𑑂𑐰𑑄𑐥𑐶𑑄 𑐡𑐎𑑂𑐰 𑐩𑐳𑑂𑐟𑐫𑑂𑐟 𑐔𑑂𑐰𑐫𑑂𑐎𑐵𑐖𑐸𑐂 𑑋 𑐩𑐳𑑂𑐟𑐫𑑂 𑐣𑐵𑐫𑑅 𑐖𑐸𑐫𑐵𑑅 𑐩𑐳𑑂𑐟𑐫𑑂 𑐣𑑂𑐴𑑂𑐫𑑀𑐣𑑂𑐴𑑂𑐫𑑀 𑐔𑑂𑐰𑐣𑐵𑑅 𑐢𑑂𑐰𑐵𑑃𑐫𑑂 𑐧𑑂𑐰𑐫𑑂𑐎𑐵𑑅 𑐮𑐫𑑂 𑐟𑐫𑐵𑑅 ‘𑐴𑐬 𑐴𑐬 𑐴𑐬 𑐩𑐴𑐵𑐡𑐾𑐰’ 𑐢𑐎𑐵𑑅 𑐳𑑅 𑐠𑑂𑐰𑐫𑑂𑐎𑐷𑐩𑑂𑐴 𑐰 𑐴𑐾 𑑋
𑐰 𑐡𑐟𑑂𑐟𑐮𑑂𑐫 𑐟𑑂𑐰𑐵𑐮𑐫𑑂 𑐔𑑂𑐰𑑄𑐥𑐶𑐣𑐶 𑐳𑐸𑐫𑐵𑑄 𑐕𑐸𑑄 𑐴𑐾 𑐣𑐏𑑅𑐔𑐏𑑅 𑐟𑑂𑐰𑐦𑐶𑐂𑐩𑐏𑐸 𑐮𑐵 𑐢𑐫𑐵𑐠𑐾𑑄 𑐔𑑂𑐰𑑄 𑑋
𑐟𑑂𑐰𑐵𑐮𑐫𑑂 𑐰 𑐢𑐬𑑂𑐩𑐎𑐬𑑂𑐩 𑐰 𑐣𑐏𑑅𑐔𑐏𑑅𑐫𑐵 𑐎𑑂𑐫𑐵𑐮𑐾𑐞𑑂𑐜𑐬 𑐴𑐾 𑐢𑐵𑑅𑐳𑐵𑑄 𑐖𑑂𑐫𑐹 𑑋
𑐥𑑄𑐔𑐩𑐷, 𑐀𑐲𑑂𑐚𑐩𑐷, 𑐊𑐎𑐵𑐡𑐱𑐷, 𑐁𑐩𑐿, 𑐥𑐸𑐣𑑂𑐴𑐶 𑐮𑐵 𑐰𑐫𑐵𑐟 𑐎𑐞𑑂𑐛 𑑋
𑐳𑐸𑐫𑐵𑑄 𑐟𑐶𑐠𑐶 𑐮𑑂𑐰𑑅𑐩𑑄𑐳𑐵 𑐰𑐫𑐵𑐠𑐵𑐫𑑂 𑐧𑑂𑐰𑐵𑑃𑐫𑑂 𑐰𑐣𑐷𑐐𑐸 𑑋
𑐐𑐸𑐧𑐮𑐫𑑂 𑐕𑐸 𑐣𑐏𑑅 𑐮𑐵𑑅 𑐰𑐫𑐵𑐟 𑐣𑑂𑐰𑐫𑑂𑐎 𑐰𑑅 𑑋
𑐩𑐸𑐏𑑅 𑐀𑐲𑑂𑐚𑐩𑐷, 𑐣𑐬𑑅 𑐀𑐲𑑂𑐚𑐩𑐷, 𑐨𑐮𑐨𑐮 𑐀𑐲𑑂𑐚𑐩𑐷, 𑐎𑐵𑐫𑑅 𑐀𑐲𑑂𑐚𑐩𑐷, 𑐧𑐏𑐸𑑄𑐩𑐡𑑅 𑐀𑐲𑑂𑐚𑐩𑐷, 𑐮𑐿𑑄𑐔𑑅𑐴𑑂𑐬𑐾, 𑐳𑐶𑐠𑐶𑐔𑑅𑐴𑑂𑐬𑐾, 𑐐𑐠𑐵𑑄𑐩𑐸𑐐𑑅 𑐔𑑅𑐴𑑂𑐬𑐾, 𑐥𑐵𑐴𑐵𑑄𑐔𑑅𑐴𑑂𑐬𑐾, 𑐖𑐸𑐐𑑅𑐔𑑅𑐴𑑂𑐬𑐾, 𑐳𑐎𑐶𑐩𑐣𑐵 𑐥𑐸𑐣𑑂𑐴𑐶, 𑐮𑑂𑐴𑐸𑐟𑐶𑐥𑐸𑐣𑑂𑐴𑐶, 𑐖𑑂𑐫𑐵𑑅𑐥𑐸𑐣𑑂𑐴𑐶, 𑐳𑐶𑐥𑐸𑐣𑑂𑐴𑐶, 𑐫𑑀𑐩𑐬𑐶 𑐥𑐸𑐣𑑂𑐴𑐶, 𑐳𑐎𑐶𑐩𑐣𑐵 𑐥𑐸𑐣𑑂𑐴𑐶, 𑐧𑐸𑑄𑐐𑐡𑑂𑐫𑑀 𑐣𑑂𑐴𑐰𑑄, 𑐳𑐶𑐠𑐶 𑐣𑐏𑑅, 𑐔𑐠𑐵𑑅, 𑐥𑑄𑐖𑐬𑐵𑑄, 𑐧𑐳𑐸𑐣𑑂𑐢𑐬𑐵𑐫𑐵 𑐢𑐮𑑄 𑐡𑐣𑐾𑐐𑐸, 𑐡𑐶𑐳𑐶𑐥𑐸𑐖𑐵, 𑐐𑑂𑐰𑐵𑐬𑑂𑐔𑐵 𑐣𑐫𑐾𑐐𑐸 𑐊𑐎𑐵𑐡𑐱𑐷 𑐐𑐸𑐏𑐸𑐣𑑂𑐴𑐸 𑐮𑐵𑑅 𑐢𑐎𑐵𑑅 𑐳𑐷𑐎𑐾𑐩𑐵𑑅𑐳𑐵 𑐰𑐫𑐵𑐎𑐾 𑐣𑑂𑐫𑐣𑐾𑐰 𑐐𑐵𑑅 𑑋
𑐟𑑂𑐰𑐵𑐮𑐫𑑂 𑐰𑐫𑐵𑐟 ‘𑐧𑐵𑐐𑑅 𑐥𑐵𑐟𑑂𑐬𑑀’𑐣𑑄 𑐢𑐵𑐫𑐾𑐐𑐸 𑐫𑐵𑑅 𑑋
𑐢𑐬𑑂𑐩𑐥𑑂𑐬𑐟𑐶 𑐰𑐫𑐵𑐎𑐾 𑐠𑑁𑑄 𑐰𑐶𑐱𑑂𑐰𑐵𑐳 𑐴𑐾 𑐟𑑄𑐐𑐸 𑐠𑑂𑐫𑑄𑐎 𑐮𑐵 𑐖𑐹𑐐𑐸 𑐏𑐂𑐩𑐏𑐸 𑐖𑐸𑐂 𑑋
𑐟𑐬 𑐳𑐶𑐣𑑂𑐴𑑅 𑐩𑐡𑐸𑐐𑐸 𑐰𑐫𑐵𑐐𑐸 𑐎𑐥𑐵𑐮𑑄 𑐢𑐬𑑂𑐩𑐥𑑂𑐬𑐟𑐶 𑐰𑐫𑐵𑐐𑐸 𑐄𑐡𑐵𑐳𑐶𑐣𑐟𑐵 𑐴𑐾 𑐎𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐰𑐫𑐵𑐐𑐸 𑐕𑐾𑑃𑐎𑑂𑐰𑐫𑑂 𑐰𑐫𑐵 𑐎𑐮𑐵𑑅 𑐣𑐵𑐥𑐮𑐵𑐟 𑑋
𑐰𑐫𑐵 𑐎𑐮𑐵𑑅𑐫𑐵 𑐎𑐥𑐵𑐮𑐫𑑂 𑐣𑑄 𑐳𑐶𑐣𑑂𑐴𑑅 𑐩𑐡𑐸 𑑋 𑐳𑐶𑐣𑑂𑐔 𑐣𑑄 𑐣𑑂𑐴𑐵𑐥𑐵 𑐠𑐾𑑄 𑐕𑐵𑐫𑐵𑐩𑐟𑑅 𑑋 𑐳𑑃𑐥𑑂𑐰𑑅 𑐣𑑄 𑐔𑐶𑐣𑐵𑐟𑑅𑐐𑐸 𑐩𑐡𑐸 𑑋 𑐳𑑃 𑐟𑑂𑐰𑑅𑐟𑐵𑐟𑑅𑐐𑐸 𑐡𑐸 𑑋 𑐨𑐵𑑅𑐟 𑐡𑐸𑐥𑐶𑑄 𑐩𑐶𑐳𑐵𑐟𑐫𑑂𑐳𑑄 𑐳𑐶𑐣𑑂𑐔 𑐕𑐵𑐣𑐵𑐩𑐟𑐂𑐐𑐸 𑐴𑐶𑐳𑐶 𑐩𑐡𑐸 𑐢𑐎𑐵𑑅 𑐳𑐶𑐣𑑂𑐔 𑐕𑐵𑐣𑐵𑐩𑐟𑐂𑐥𑐶𑑄 𑐩𑐶𑐳𑑂𑐟 𑐏𑐣𑐵𑑅 𑐟𑑄 𑐥𑐶𑐎𑐵𑐂𑐩𑑂𑐴 𑐰𑐫𑐵 𑐎𑐮𑐵𑑅 𑐠𑑁𑑄 𑐠𑑅 𑐴𑐾 𑐳𑐶𑐣𑑂𑐔 𑐩𑐕𑐵𑑅𑐳𑐾 𑐔𑑂𑐰𑐣𑐵𑐔𑑂𑐰𑑄𑐐𑐸 𑐏𑐣𑐵𑑅 𑐖𑐶𑐐𑐸 𑐀𑐖𑐸𑐐𑐟𑐶𑐫𑐵 𑐩𑐵𑑅𑐔𑐵𑑅 𑐴𑐾 𑐩𑐣𑑂𑐟 𑑋
𑐣𑑂𑐫𑐵𑐡𑑃𑐏𑐸𑐡𑑃𑐫𑐵 𑐡𑐸𑐣𑐾 𑐂𑐩𑐶𑐎𑐾 𑐰𑑅𑐐𑐸 𑐴𑑂𑐫𑐹𑐥𑐵𑑅 𑐣𑐿𑐳𑐬𑑂𑐐𑐶𑐎 𑐴𑐾 𑐏𑑅 𑐮𑐵 ? 𑐳𑐩𑐵𑐖 𑐠𑐸𑐮𑐶 𑐥𑑂𑐬𑐐𑐟𑐶𑐱𑐷𑐮 𑐖𑐸𑐂𑐢𑐸𑑄𑐎𑐮 𑐮𑐵 ?
𑐖𑐶𑐎𑐾 𑐩𑐣𑑂𑐴𑑂𑐫𑑄 𑐩𑐣𑑂𑐴𑑂𑐫𑑄 𑐣𑑂𑐴𑑂𑐫𑐳𑑅𑐥𑑂𑐰𑑅 𑐡𑐣𑐵𑐰𑐮 𑑋