𑑑. 𑐣𑑂𑐴𑑂𑐫𑐳𑑅
𑐩𑐣𑐹𑐟𑐫𑑂𑐳𑑄 𑐢𑐫𑐵𑐔𑑂𑐰𑐣, “𑐩𑐣𑐹 𑐳𑐬𑑂𑐰𑐱𑑂𑐬𑐾𑐲𑑂𑐛 𑐥𑑂𑐬𑐵𑐞𑐷 𑐏𑑅 𑑋”
𑐄𑐎𑐶𑑄 𑐖𑐶 𑐣𑑄 𑐳𑐬𑑂𑐰𑐱𑑂𑐬𑐾𑐲𑑂𑐛 𑐴𑑃 !
𑐖𑐶𑐐𑐸 𑐡𑐾𑐫𑑂𑐫𑐵 𑐩𑐣𑐹𑐟𑐫𑑂𑐳𑑄 𑐢𑐫𑐵𑐔𑑂𑐰𑐣, “𑐠𑑂𑐰 𑐡𑐾𑐱 𑐟𑑅𑐢𑑄 𑑋”
𑐄𑐎𑐶𑑄 𑐖𑐶𑑄 𑐠𑑅𑐐𑐸 𑐡𑐾𑐱𑐫𑑂 𑐐𑐬𑑂𑐰 𑐫𑐵𑐫𑐾𑐩𑐵𑑅 𑐴𑑃 !
𑐖𑐶𑐐𑐸 𑐖𑐵𑐟𑐶𑐫𑐵 𑐩𑐣𑐹𑐟𑐫𑑂𑐳𑑄 𑐢𑐫𑐵𑐔𑑂𑐰𑐣, “𑐠𑑂𑐰 𑐖𑐵𑐟𑐶 𑐟𑑅𑐖𑐶 𑑋”
𑐄𑐎𑐶𑑄 𑐖𑐶𑑄 𑐠𑑅𑐐𑐸 𑐖𑐵𑐟𑐶𑐂 𑐐𑐬𑑂𑐰 𑐫𑐵𑐫𑐾𑐩𑐵𑑅 𑐴𑑃 !
𑐖𑐶𑐐𑐸 𑐢𑐬𑑂𑐩𑐫𑐵 𑐩𑐣𑐹𑐟𑐫𑑂𑐳𑑄 𑐢𑐫𑐵𑐔𑑂𑐰𑐣, “𑐠𑑂𑐰 𑐢𑐬𑑂𑐩 𑐡𑐎𑐮𑐫𑑂 𑐔𑑂𑐰𑐖𑐵𑑅 𑑋”
𑐄𑐎𑐶𑑄 𑐖𑐶𑑄 𑐠𑑅𑐐𑐸 𑐢𑐬𑑂𑐩𑐫𑑂 𑐐𑐬𑑂𑐰 𑐫𑐵𑐫𑐾𑐩𑐵𑑅 𑐴𑑃 !
𑐖𑐶 𑐧𑐹𑐧𑐮𑐫𑑂 𑐖𑐶𑑄 𑐩𑐳𑑂𑐫𑐹 𑐖𑐶 𑐐𑐸𑐐𑐸 𑐡𑐾𑐱, 𑐖𑐵𑐟𑐶, 𑐢𑐬𑑂𑐩𑐫𑑂 𑐖𑐣𑑂𑐩 𑐖𑐸𑐫𑐵𑐔𑑂𑐰𑐣𑐵 𑑋
𑐀𑐖𑑂𑐘𑐵𑐣𑐟𑐵𑐫𑑂 𑐖𑐶𑑄 𑐐𑐠𑐾 𑐐𑐬𑑂𑐰 𑐫𑐵𑐫𑐾𑐐𑐸?
𑐢𑐵𑐟𑑂𑐠𑐾𑑄 𑐮𑐵 𑐖𑐶 𑑋𑑋𑑋𑐖𑐶’ 𑐖𑐸𑐫𑐵𑐐𑐸𑐫𑐵 𑐡𑐸𑑅𑐏 𑐩𑑂𑐰𑐵𑐣𑐵𑐔𑑂𑐰𑐣𑐵 𑑋
𑐀𑐫𑑂 𑐩𑐣𑐹𑐟 𑐕𑐶𑐥𑐶𑑄 𑐳𑐎𑐮𑐾𑑄 𑐕𑐎𑑂𑐰𑑅 𑐳𑐸𑐩𑑂𑐎 𑐔𑑂𑐰𑑃 𑑋 𑐱𑐵𑐣𑑂𑐟𑑄 𑐕𑐎𑑂𑐰𑑅 𑐖𑐶𑐟𑑅 𑐡𑐸𑐰𑐵𑐮𑐾𑐧𑑂𑐫𑐸
– 𑐖𑐶 ‘𑐖𑐶’ 𑐖𑐸𑐮 𑐴𑐾 𑐐𑐠𑐾 ?
𑑒. 𑐀𑐣𑑂𑐟𑐬 𑐂𑐔𑑂𑐕𑐵
𑐩𑐣𑐹𑐟 𑐧𑑃𑐫𑑂 𑐧𑐸𑐂, 𑐧𑑃𑐫𑑂 𑐩𑑂𑐰𑐵𑐂, 𑐧𑑃𑐫𑑂 𑐴𑐾 𑐳𑐷 𑑋
𑐣𑐫𑐾𑐐𑐸 𑐣𑐶𑐩𑑂𑐟𑐶𑑄 𑐰𑑄 𑐨𑐔𑐵𑐨𑐔𑐵 𑐧𑑃 𑐩𑑂𑐴𑐸𑐂 𑑋
𑐰𑐳𑐶𑐧𑐫𑑂 𑐁𑐥𑐵𑑅 𑐣 𑐰 𑐧𑑃𑐫𑑂 𑐡𑐸𑐴𑐵𑑄 𑐰𑐣𑐵𑑅 𑐳𑑂𑐰𑐂, 𑐣 𑐳𑐬𑑂𑐐𑐟𑐫𑑂 𑐠𑐵𑐴𑐵𑑄 𑐰𑐣𑐵𑑅 𑐳𑑂𑐰𑐂 𑑋
𑐰𑐫𑐵 𑐩𑐣𑐹𑐟𑐫𑑂𑐳𑑄 𑐰𑐫𑐵𑐟 𑐳𑑂𑐫𑐣𑐵𑐔𑑂𑐰𑐣𑐷 — 𑐔𑑂𑐰𑐫𑑂𑐔𑑂𑐰𑐫𑑂 𑐧𑑂𑐰𑐫𑐾𑐩𑐟𑐾 𑑋 𑐡𑐸𑐣𑐾𑐡𑐸𑐣𑐾 𑐡𑐸𑐴𑐵𑑄𑐰𑐣𑐾
𑐩𑐟𑐾 𑑋 𑐧𑐬𑐸 𑐐𑐸𑐮𑐶 𑐦𑐸 𑐄𑐮𑐶 𑐧𑑃𑐫𑐵 𑐢𑐬𑐵𑐟𑐮𑐫𑑂 𑐣𑑂𑐫𑐣𑐵 𑐴𑐸𑑃 𑑋 𑐐𑐸𑐮𑐶 𑐣𑑂𑐫𑐣𑐾𑐦𑐟 𑐄𑐮𑐶 𑐴𑐾
𑐁𑐥𑐵𑑅 𑐖𑐩𑐷𑐣 𑐕𑑄𑐐𑐸 𑐖𑐸𑐂 𑑋 𑐄𑐮𑐶 𑐴𑐾 𑐁𑐥𑐵𑑅 𑐕 𑐳𑐦𑐮 𑐖𑐸𑐂 𑑋
𑐐𑐧𑐮𑐫𑑂 𑐩𑐣𑐹 𑐳𑐷 𑐀𑐧𑐮𑐫𑑂 𑐢𑐵𑑅𑐳𑐵 𑐰𑐫𑐵 𑐩𑐣𑐹𑐟𑐫𑑂𑐳𑑄 𑐰𑐫𑐵𑐟 𑐎𑐶 𑐟 𑐧𑑃𑐫𑑂
𑐐𑐵𑑅𑐏𑐣𑐵𑑅 𑐮𑑂𑐴𑐵𑐎𑐷, 𑐎𑐶 𑐩𑐏𑐸𑐳𑐵 𑐰𑐫𑐵𑐟 𑐎𑐸𑑃 𑐫𑐵𑐣𑐵𑑅 𑐳𑐬𑑂𑐐𑐟𑐫𑑂 𑐧𑑂𑐰𑐫𑐾𑐎𑐵𑐕𑑂𑐰𑐂 𑑋
𑐧𑑂𑐰𑐫𑐾𑐐𑐸, 𑐡𑐸𑐴𑐵𑑄 𑐰𑐣𑐾𑐐𑐸 𑐰𑐫𑐵 𑐣𑐸𑐐𑑅𑐫𑐵 𑐂𑐔𑑂𑐕𑐵 𑐳𑐷𑐢𑐸𑑄𑐎𑐵𑑅 𑐳𑐵𑑄 𑐕𑐸𑑄 𑐨𑐔𑐵 𑐥𑐸𑐰𑑄𑐎𑐵𑐧𑐷 𑑋
𑑓. 𑐗𑑂𑐫𑐵𑑅
𑐗𑑂𑐫𑐵𑑅 𑐢𑐫𑐵𑐐𑐸 𑐕𑐸 ?
𑐀𑑄𑐐𑐮𑐫𑑂 𑐡𑐂𑐐𑐸 𑐏𑐵𑐮𑐶 𑐠𑐵𑐫𑑂 𑐖𑐎 𑐮𑐵 𑐏𑑅 𑑋
𑐟𑐬 𑐀𑐣𑑄 𑐴𑐾 𑐖𑑅 𑐰𑐂, 𑐦𑐫𑑂 𑐰𑐂, 𑐳𑑄𑐳𑐵𑐬 𑐏𑐣𑐾 𑐡𑐂 𑑋
𑐗𑑂𑐫𑐵𑑅 𑐩𑐡𑐸𑐐𑐸 𑐎𑑂𑐰𑐠𑐵 𑐮𑐵 𑐗𑐫𑐮𑐏𑐵𑐣𑐵 𑐴𑐾 𑐖𑐸𑐂 𑑋
𑐀𑐠𑐾 𑐢𑐎𑐵𑑅 𑐳𑐷𑐎𑐳𑐷𑐎𑑄 𑐣𑐸𑐐𑐮𑐫𑑂 𑐖𑐎 𑐗𑐷𑐳𑑄 𑐕𑐵𑐫𑑂 𑐀𑑄𑐐𑑅 𑐡𑐣𑐵𑐔𑑂𑐰𑐣𑐵, 𑐗𑑂𑐫𑐵𑑅,
𑐏𑐵𑐥𑐵 𑐮𑐵 𑐕𑐸 𑐴𑑂𑐰𑑅𑐥𑑂𑐰𑐵𑑅 𑐕𑐥𑑂𑐰𑐵𑑅 𑐴𑐾 𑐩𑐟𑐳𑐾 ?
𑑔. 𑐐𑐸𑐞
𑐳𑐸𑐡𑑂𑐬𑑂𑐫𑐰𑑄 𑐕𑐸 𑐳𑑂𑐫𑐹 𑐰𑑄 𑐳𑐸𑐫𑐵𑐟 𑐳𑐸𑐫𑐵𑐟 𑐮𑐸𑐩𑐸𑐖𑑅 𑐧𑐶𑐫𑐵𑐔𑑂𑐰𑐣𑐵 𑐢𑐎𑐵𑑅 ?
𑐥𑐺𑐠𑑂𑐰𑐷𑑄 𑐕𑐸 𑐳𑑂𑐫𑐹 𑐰𑑄 𑐳𑐸𑐫𑐵𑐟 𑐳𑐸𑐫𑐵𑐟 𑐠𑐵𑐫𑑂 𑐧𑐶𑐫𑐵𑐔𑑂𑐰𑐣𑐵 𑐢𑐎𑐵𑑅 ?
𑐳𑑂𑐰𑐵𑑃𑐣𑑄 𑐕𑐸 𑐳𑑂𑐫𑐹, 𑐳𑐸 𑐎𑐰𑐶𑑄 𑐰𑐫𑐵𑐟 𑐳𑑂𑐰𑐫𑐵𑑅 𑐐𑐸𑐮𑐶 𑐎𑐰𑐶𑐟𑐵 𑐔𑑂𑐰𑐮 𑐢𑐎𑐵𑑅 ?
𑐩𑐣𑐹𑐟 𑐴𑐾 𑐖𑐎 𑐏𑑅 𑐐𑐸𑐞 𑐢𑐎𑐵𑑅 𑐢𑐵𑐫𑐾 𑐳𑑅𑐥𑐶𑑄 𑑋
𑑕. 𑐏𑑃𑐳𑐸𑐰𑐵𑑅
𑐖𑐷𑐰𑐣𑑄 𑐣𑑂𑐰𑐰𑐵𑐫𑐾𑐩𑐳𑑅 𑑋
𑐩𑐟𑐶𑐣𑐵𑑄 𑐣𑑂𑐰𑐰𑐵𑐫𑐾𑐩𑐳𑑅 𑑋
𑐳𑐺𑐲𑑂𑐚𑐶𑑄 𑐣𑑂𑐰𑐰𑐵𑐫𑐾𑐩𑐳𑑅 𑑋
𑐀𑐳𑑂𑐟𑐶𑐟𑑂𑐰𑑄 𑐣𑑂𑐰𑐰𑐵𑐫𑐾𑐩𑐳𑑅 𑑋
𑐡𑑂𑐫𑐰𑑄 𑐣𑑂𑐰
𑐩𑐣𑐹 𑐖𑐎 𑐐𑐥𑐵𑐫𑑂𑐳𑐎𑑄 𑐏𑑃𑐳𑐸𑐰𑐵𑑅 ?
𑐏𑑃 𑐕𑐟𑐵 𑐩𑐣𑐹𑐟𑐫𑑂𑐟 𑐱𑐿𑐟𑐵𑐣𑑄 𑐴𑐾 𑐳𑑂𑐫𑐣𑐵𑐟𑑅𑐐𑐸 𑐏𑑅 𑐮𑐵 ?
𑑖. 𑐧𑐸𑐡𑑂𑐢 𑐰 𑐗𑐷
𑐧𑐸𑐡𑑂𑐢𑐫𑐵𑐟 𑐩𑑂𑐴𑐳𑐷𑐎𑐾𑐐𑐸 𑐐𑐠𑐾 𑐖𑐶𑑄 ?
𑐧𑐶𑐴𑐵𑐬𑐥𑐟𑐶𑑄, 𑐐𑐸𑐩𑑂𑐧𑐵𑐥𑐟𑐶𑑄 𑐰𑐫𑐵 𑐩𑐹𑐬𑑂𑐟𑐶 𑐥𑐵𑑅 𑑋
𑐧𑐬𑐸 𑐖𑐶𑑄 𑐡𑐸𑐰𑐵𑐮𑐾 – 𑐳𑑂𑐰𑐵𑑄𑐫𑐵 𑐥𑐸𑐣𑑂𑐴𑐷𑐫𑐵 𑐳𑐸𑐠𑐫𑑂 𑐰𑑄 𑐮𑐸𑐂𑐎𑐹𑐐𑐸 𑐰 𑐖𑑅, 𑐰 𑐡𑐸-𑐩𑐶𑐏𑐵,
𑐰 𑐡𑐸-𑐖𑑂𑐘𑐵𑑄 𑑋
𑐕𑐸 𑐖𑐸𑐂 𑐰 ? 𑐐𑐖𑑀𑐐𑐸 𑐖𑐸𑐂 𑐰 ?
𑐠𑑁𑑄 𑐣𑑄 𑐮𑐵 𑐳𑑂𑐰𑐫𑐾𑐡𑐂 𑐖𑐸𑐂𑐣𑐶 𑐰 !
𑐳𑐶𑐡𑑂𑐢𑐵𑐬𑑂𑐠 𑐮𑐵 𑐥𑑂𑐫𑑄𑐐𑐹 𑐣𑐶𑐩𑐶𑐟𑑂𑐟 𑐳𑑂𑐰𑐫𑐵𑑅 𑐕𑐾𑑃 𑐟𑑂𑐰𑑅𑐟𑐵𑑅 𑐥𑐶𑐴𑐵𑑄𑐰𑑄𑐩𑑂𑐴 𑐏𑑅 𑑋
𑐰 𑐴𑐾 𑐣𑐶𑐩𑐶𑐟𑑂𑐟𑐟 𑐗𑐷𑐳𑑄 𑐣𑑄 𑐣𑑂𑐴𑐶𑐠𑑄 𑐏𑐣𑐵𑐔𑑂𑐰𑐣𑐵 – 𑐬𑑀𑐐𑐷, 𑐰𑐺𑐡𑑂𑐢, 𑐳𑐷𑐩𑑂𑐴 𑐰 𑐨𑐶𑐎𑑂𑐲𑐸𑑋
𑐗𑐷𑐥𑐶𑑄 𑐢𑐵𑑅𑐳𑐵 𑐠𑐸𑐥𑐶𑑄 𑐴𑐾 𑐣𑐶𑐩𑐶𑐟𑑂𑐟 𑐳𑑂𑐰𑐫𑐵𑑅 𑐗𑐣𑐗𑐣 𑐥𑐵𑐥𑐷 𑐖𑐸𑐫𑐵𑐰𑐣𑐵𑐔𑑂𑐰𑐣𑐵 !
𑑗. 𑐳𑐶𑐏𑑅
𑐳𑐶𑐏𑐮𑑄 𑐔𑐶𑐎𑐵𑐔𑑂𑐰𑑄𑐩𑑂𑐴 𑐏𑐶𑐔𑐵𑐫𑐵𑐟 𑐩𑐸𑐎𑑂𑐟𑐶 𑐩𑑂𑐰𑐵𑑅 𑑋
𑐳𑐶𑐏𑐮𑑄 𑐔𑐶𑐎𑐵𑑅 𑐴𑐾 𑐣𑐫𑐾 𑐡𑑅𑐳𑐵 𑐐𑐵𑑅, 𑐔𑐵𑑅𑐴𑐶𑐮𑐾 𑐡𑑅𑐳𑐵 𑐐𑐵𑑅 𑑋
𑐀𑐠𑐾 𑐴𑐾 𑐠𑐾𑑄 𑐟𑐸𑑄, 𑐩𑐣𑐹𑐫𑐵𑐟 𑐣𑑄 𑐩𑐸𑐎𑑂𑐟𑐶 𑐩𑐵𑑅 𑐠𑐾𑑄 𑐩𑐟𑐵𑑅 𑑋
𑐳𑑄𑐳𑐵𑐬𑐫𑑂 𑐖𑐸𑐫𑐵𑐔𑑂𑐰𑑄𑐥𑐶𑑄 𑐩𑐣𑐹𑐟 𑐮𑐵 𑐠𑐷𑐠𑐷 𑐮𑑂𑐰𑑅𑐰𑐣𑐵𑐥𑐸𑐐𑐸 𑐳𑐶𑐏𑐮𑑄 𑐔𑐶𑐎𑐵𑑅 𑐮𑐫𑑂
𑐟𑐵𑐫𑐵𑐔𑑂𑐰𑑄𑐐𑐸 𑐴𑐾 𑐡𑐸𑑋
𑐀𑐗 𑐢𑐬𑑂𑐩𑐫𑑂 𑐖𑐸𑐫𑐵𑐔𑑂𑐰𑑄𑐥𑐶𑐣𑑂𑐟 𑐴𑐾 𑐣𑑄 𑐩𑐸𑐎𑑂𑐟𑐶 𑐩𑐵𑑅 𑐠𑐾𑑄 𑐩𑐔𑑂𑐰𑑄 𑑋
𑐩𑐸𑐎𑑂𑐟𑐶 𑐡𑐟 𑐎𑐶 𑐮𑐵 𑐢𑐬𑑂𑐩𑐵𑐟𑑂𑐩𑐵 𑐢𑐵𑐫𑐾𑐎𑐾 𑐡𑐂𑐐𑐸 𑐳𑐶𑐏𑑅𑐫𑐵 𑐑𑐩𑐞𑑂𑐜 𑐴𑐾 𑐐𑐣 𑐫𑐵𑐫𑐾 𑐡𑐂
𑐢𑐎𑐵𑑅 ?
𑑘. 𑐨𑐸𑐏𑐵𑐫𑑂
𑐰𑐵 𑐰𑐫𑐾𑐟 𑐩𑑁𑐳𑐩 𑐰𑐫𑐾𑐎𑐾 𑐩𑐵𑑅 𑑋
𑐦𑐫𑑂 𑐳𑐣𑐾𑐟 𑐩𑑁𑐳𑐩 𑐰𑐫𑐾𑐎𑐾 𑐩𑐵𑑅 𑑋
𑐳𑑂𑐰𑐵𑑄 𑐴𑑂𑐰𑐫𑐾𑐟 𑐩𑑁𑐳𑐩 𑐰𑐫𑐾𑐎𑐾 𑐩𑐵𑑅 𑑋
𑐩𑐵𑐟𑑂𑐬 𑐨𑐸𑐏𑐵𑐫𑑂 𑐧𑑂𑐰𑐫𑐾𑐟 𑐕𑐸𑑄 𑐴𑐾 𑐩𑑁𑐳𑐩 𑐩𑑂𑐰𑐵𑑅 𑑋
𑐥𑐮𑐏𑐫𑐵 𑐡𑐸𑐣𑐾 𑐐𑐸𑐮𑐶 𑐫𑐵𑐄𑑃𑐎 𑐎𑑂𑐰𑑅𑐠𑐮𑐵 𑐠𑐎𑐷 𑐰𑑄 𑐡𑐫𑐵𑐔𑑂𑐰𑑄𑐐𑐸 𑐡𑐎𑑂𑐰-𑐦𑐸𑐎𑑄 !
𑑙. 𑐳𑐵𑐩𑑂𑐥𑑂𑐬𑐡𑐵𑐫𑐶𑐎
𑐖𑑄𑐐𑐮𑐫𑑂 𑐟𑑅𑐢𑐷𑐥𑐶𑑄 𑐔𑐷𑐢𑐷𑐥𑐶𑑄 𑐁𑐥𑐵𑐮𑑄 𑐖𑐣𑐵𑐰𑐬𑐟 𑐡𑐸 𑑋
𑐂𑐥𑐶𑑄 𑐦𑐸𑐎𑑂𑐎𑐳𑐶𑐟𑑄 𑐄𑐮𑐶𑐴𑑄 𑐩𑐵𑐫𑐵 𑐡𑐸- 𑐖𑑄𑐐𑐮𑐫𑐵, 𑐠𑑅𑐐𑐸 𑐧𑐹𑐐𑐸 𑐠𑐵𑐫𑑂𑐫𑐵 𑑋
𑐟𑐬 𑐖𑐣𑐵𑐰𑐬𑐟𑐫𑑂 𑐧𑐶𑐔𑐵𑑅 𑐢𑐵𑑅𑐳𑐵 𑐥𑐵𑐣𑐵𑐔𑑂𑐰𑐣𑐷 𑑋
𑐐𑐸𑐮𑐶𑐳𑑂𑐫𑐵𑑄 𑐳𑐸𑐫𑐵𑐟 𑐣𑐫𑐾 𑐢𑐫𑐵𑐐𑐸 𑐧𑐶𑐔𑐵𑑅 𑐫𑐵𑐣𑐵𑐔𑑂𑐰𑐣𑐷 𑑋
𑐐𑐸𑐮𑐶𑐳𑐶𑐟𑑄 𑐢𑐵𑑅𑐳𑐵 𑐳𑐸𑐣𑐵𑑄 𑐣𑑄 𑐠𑑅𑐟 𑐣𑑅𑐫𑐵𑐧𑐷𑐐𑐸 𑐖𑐎𑑄 𑐏𑑅𑐮𑐵 𑐢𑐫𑐵𑐐𑐸 𑐔𑐶𑐣𑑂𑐟𑐵
𑐖𑐸𑐫𑐵𑐔𑑂𑐰𑐣𑐷 𑑋
𑐀𑐮𑐾 𑐴𑐶𑑄𑐳𑑂𑐬𑐎𑐥𑐶𑑄 𑐖𑐣𑐵𑐰𑐬𑐟 𑐕𑐐𑐹 𑐳𑐮𑑄 𑐴𑐵𑐮𑐵𑐔𑑂𑐰𑐣𑐷-
𑐠𑑂𑐰 𑐑𑐵𑑃𑐫𑑂 𑐣𑐂𑐥𑐶𑑄 𑐖𑐣𑐵𑐰𑐬𑐟𑐫𑑂 𑐕𑐟𑐶𑑄 𑐴𑐾 𑐡𑐾𑐱𑐫𑐵 𑐩𑐵𑐫𑐵 𑐩𑐡𑐸𑑋 𑐠𑑅𑐐𑐸 𑐴𑐾 𑐖𑐎
𑐔𑐶𑐄𑐟𑐵𑑅 𑐎𑐫𑐵𑐔𑑂𑐰𑐣𑐷 𑑋 𑐐𑐥𑐵𑐫𑑂𑐳𑐎𑑄 𑐳𑐵𑐩𑑂𑐥𑑂𑐬𑐡𑐵𑐫𑐶𑐎 !
𑑑𑑐. 𑐩𑐔𑐵-𑐃𑐫𑐵 𑐰 𑐳𑐩𑐸𑐡𑑂𑐬
𑐩𑐔𑐵-𑐂𑐮𑐫𑑂 𑐮𑐵𑐮𑐎𑐫𑐵𑐐𑐸 𑐰 𑐳𑐩𑐸𑐡𑑂𑐬 𑑋
𑐣𑑂𑐴𑑂𑐫𑐿𑐥𑐸𑐎 𑐩𑑂𑐴𑐶𑐟𑐵𑐐𑐸 𑐰 𑐳𑐩𑐸𑐡𑑂𑐬 𑑋
𑐫𑐔𑐸𑐳𑐾 𑐰𑑃𑐔𑐸𑐳𑐾 𑐔𑑂𑐰𑑄𑐐𑐸 𑐳𑐩𑐸𑐡𑑂𑐬 𑑋
𑐮𑐏𑐫𑑂 𑐟𑑅𑐮𑐫𑑂 𑐦𑐶-𑐮𑑂𑐰𑐴𑑄 𑐟𑑂𑐫𑐵𑐖𑐶𑐎 𑐏𑐣𑐾𑐡𑐸𑐐𑐸 𑐳𑐩𑐸𑐡𑑂𑐬 𑑋
𑐬𑑄𑐐𑐷𑐧𑐶𑐬𑑄𑐐𑐷 𑐣𑑂𑐫𑐵 𑐧𑐠𑐵𑑄-𑐧𑐠𑐵𑑄 𑐖𑐸𑐫𑐵𑐔𑑂𑐰𑑄𑐐𑐸 𑐫𑐔𑐸𑐎 𑐏𑐣𑐾𑐡𑐸𑐐𑐸 𑐳𑐩𑐸𑐡𑑂𑐬 𑑋
𑐟𑑅𑐏𑐵 𑐠𑐾𑑄 𑐔𑑂𑐰𑑄𑐥𑐶𑑄 𑐖𑐾𑐮-𑐣𑑂𑐫𑐵𑐮𑐶𑐳𑐾𑑄 𑐀𑐖𑐹𑐔𑐵𑐫𑐵𑐥𑐸𑐥𑐶𑑄 𑐖𑐷𑐰𑐟 𑐏𑐣𑐾𑐡𑐂𑐐𑐸 𑐳𑐩𑐸𑐡𑑂𑐬 𑑋
𑐧𑐴𑐣𑐷 𑐩𑐟 𑐔𑑂𑐫𑐵𑑅𑐥𑐶𑑄 𑐣𑑂𑐫𑐵 𑐳𑐸𑐮𑑂𑐮 𑐳𑐸𑐮𑑂𑐮 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐂𑐐𑐸 𑐳𑐩𑐸𑐡𑑂𑐬 𑑋
𑐠𑑁𑑄 𑐮𑐶𑐴𑐵𑑄𑐰𑐣𑐵𑑅 𑐳𑑂𑐰𑐫𑐵𑐧𑐮𑐫𑑂 𑐎𑐾𑐰𑐮 𑐢𑑂𑐫𑐵𑐔𑐣𑐵𑑅-𑐢𑑂𑐫𑐵𑐔𑐣𑐵 𑐖𑐎 𑐖𑐸𑐫𑐵𑐔𑑂𑐰𑐣 𑑋
𑐩𑑂𑐴𑐶𑐟𑐾𑐐𑐸 𑐮𑐵 𑐕𑐸 𑐳𑑂𑐰𑐫𑐾 𑐖𑐎 𑐣𑑄 𑐑𑐔𑑂𑐔𑐵𑐫𑐵𑐥𑐸𑐳𑐾 𑐔𑑂𑐰𑐣𑐵𑐔𑑂𑐰𑐣 𑑋
𑐮𑐶𑐎𑑂𑐎 𑐰𑐣𑐾𑐟𑐎𑑄 𑐩𑐦𑐫𑐾𑐎 𑐡𑐸𑐬𑑂𑐐𑐣𑑂𑐢 𑐣𑑂𑐫𑐣𑐵𑐔𑑂𑐰𑐣 𑑋
𑐥𑑂𑐬𑐐𑐟𑐶𑐫𑐵 𑐎𑐬𑐵𑐩𑐟 𑐴𑐾 𑐠𑐸𑐮𑐶 𑐴𑐾 𑐩𑐏𑐵 𑐢𑐵𑐫𑐾𑐩𑐵𑐮 !