𑐫𑐾𑑃 𑐩𑐣𑐥𑐵𑑄 𑐰𑐂𑐐𑐸 𑐩𑑄𑐳𑐶𑐬 𑑒𑑗 𑐐𑐟𑐾 𑐩𑐴𑐵𑐣𑐐𑐬𑐳𑑂𑐟𑐬𑐷𑐫 𑐧𑐵𑑃𑐳𑐸𑐬𑐷 𑐢𑐾𑐢𑐾𑑄𑐧𑐮𑑂𑐮𑐵𑑅 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑑒𑑙 𑐎𑑂𑐰𑑅𑐐𑐸 𑐩𑐴𑐵𑐣𑐐𑐬 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐩𑐴𑐵𑐣𑐐𑐬 𑐳𑑂𑐰𑐬𑑂𑐞𑐶𑐩 𑐫𑑀𑐖𑐣𑐵 ‘𑐳𑐵𑑄𑐳𑑂𑐎𑐺𑐟𑐶𑐎 𑐩𑐴𑐵𑐣𑐐𑐬’ 𑐖𑑂𑐫𑐵𑐗𑑂𑐰𑑅 𑐎𑐠𑑄 𑐠𑑂𑐰 𑐎𑐵𑐳𑐵 𑐖𑐸𑐂𑐟𑑂𑐫𑑄𑐐𑐸 𑐏𑑅 𑑋

𑐩𑐣𑐥𑐵𑐫𑐵 𑐳𑐩𑑂𑐥𑐡𑐵 𑐟𑐠𑐵 𑐥𑐬𑑂𑐫𑐚𑐣 𑐰𑐶𑐨𑐵𑐐 𑐥𑑂𑐬𑐩𑐸𑐏 𑐀𑐬𑑂𑐔𑐣𑐵 𑐱𑐵𑐎𑑂𑐫 𑐱𑑂𑐬𑐾𑐲𑑂𑐛𑐫𑐵 𑐎𑐠𑑄 𑐠𑐸𑐎𑐷 𑐧𑑂𑐰𑐟𑐶 𑐎𑐵𑐂𑐥𑐶𑑄𑐟 𑐰𑐶𑐨𑐵𑐐𑑄 𑐦𑐵𑐬𑐩 𑐂𑐣𑐾𑐐𑐸 𑐱𑐸𑐬𑐸 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐡𑐬𑑂𑐟𑐵 𑐦𑐵𑐬𑐩 𑐟𑑂𑐰𑐵𑑅, 𑐐𑐸𑐠𑐶 𑐰𑐵 𑐳𑑄𑐑 𑐳𑑄𑐳𑑂𑐠𑐵𑐫𑐵 𑐐𑐸𑐬𑐸, 𑐎𑐖𑐶, 𑐣𑐵𑐫𑑅𑐥𑐵𑐏𑐾𑑄 𑐳𑐶𑐦𑐵𑐬𑐶𑐳 𑐫𑐵𑐎𑐾𑐩𑐵𑑅 𑑋

𑐧𑑂𑐰𑐟𑐶 𑐎𑐵𑐂𑐐𑐸 𑐥𑐸𑐔𑐮𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐗𑐶𑐣𑐶𑐩𑑂𑐴𑐾𑐳𑐶𑐫𑐵 𑐣𑐵𑑄 𑐡𑐸𑐠𑑂𑐫𑐵𑐎𑐾 𑐦𑐂 𑑋 𑐐𑐸𑐎𑐷 𑐔𑑂𑐫𑐵𑐩𑑂𑐴𑐾𑐳𑐶𑐣𑑄 𑐧𑐵𑑃𑐳𑐸𑐬𑐷 𑐖𑐎 𑐥𑐸𑐂 𑑋 𑐮𑐶𑐳𑐾𑑄 𑐦𑐫𑐵𑐦𑐕𑐶 𑐳𑑂𑐰𑑄𑐐𑐸𑐮𑐶𑑄 𑐧𑐵𑑃𑐳𑐸𑐬𑐷 𑐡𑐸𑐠𑑂𑐫𑐵𑐎𑐾𑐩𑐵𑑅 𑑋 𑐩𑐏𑐸𑐳𑐵 𑐣𑐶𑐐𑐹 𑐎𑐠𑑄𑐫𑐵 𑐧𑐵𑑃𑐳𑐸𑐬𑐷 𑐀𑐣𑐶𑐰𑐵𑐬𑑂𑐫 𑐡𑐸𑐠𑑂𑐫𑐵𑐎𑐾𑐩𑐵𑑅 𑑋

𑐠𑐸𑐐𑐸 𑐢𑐾𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵𑐫𑑂 𑐣𑑂𑐴𑐵𑐥 𑐮𑐵𑑅𑐩𑑂𑐴𑐾𑐳𑐶𑐟 𑑑 𑐮𑐵𑐏 𑑕𑑐 𑐴𑐖𑐵𑐬 𑐮𑐶𑐳𑐾𑑄 𑐰𑐴𑑅𑐫𑐵 𑐟𑐥𑐸𑐐𑐸 𑐧𑐵𑑃𑐳𑐸𑐬𑐷, 𑐮𑐶𑐄 𑐮𑐵𑑅𑐩𑑂𑐴𑐾𑐳𑐶𑐟 𑑑 𑐮𑐵𑐏 𑐣𑐐𑐡 𑐳𑐴𑐶𑐟 𑐩𑐗𑑁𑐮𑐵 𑐧𑐵𑑃𑐳𑐸𑐬𑐷 𑐰 𑐮𑐶𑐫𑐵𑑄 𑐮𑐶𑐄 𑐮𑐵𑑅𑐩𑑂𑐴𑐾𑐳𑐶𑐟 𑑕𑑐 𑐴𑐖𑐵𑐬 𑐣𑐐𑐡 𑐳𑐴𑐶𑐟 𑐰𑐴𑑅𑐫𑐵 𑐔𑐶𑐥𑐸𑐐𑐸 𑐧𑐵𑑃𑐳𑐸𑐬𑐷 𑐳𑐶𑐬𑐥𑐵 𑐧𑐷 𑑋 𑐮𑐶𑐳𑐾 𑐢𑐾𑐢𑐾𑑄𑐧𑐮𑑂𑐮𑐵𑑅 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑑅𑐥𑐶𑑄 𑐳𑐎𑐳𑐶𑐟𑑄 𑐗𑐶𑐡𑑂𑐰𑑅 𑐟𑐎𑐵 𑐥𑑂𑐬𑑀𑐟𑑂𑐳𑐵𑐴𑐣 𑐎𑐠𑑄 𑐧𑐷𑐐𑐸 𑐰𑑂𑐫𑐰𑐳𑑂𑐠𑐵 𑐣𑑄 𑐫𑐵𑐣𑐵𑐟𑑅𑐐𑐸 𑐡𑐸 𑑋