𑐀𑐬𑑂𑐔𑐣𑐵 𑐀𑐣𑐸𑐥𑑂𑐬𑐶𑐫𑐵

𑐁𑐮𑑀𑐎 𑐳𑐸𑐠𑑄𑐣𑐶𑐳𑐾𑑄 𑐡𑐶𑐎𑑂𑐎 𑐔𑐵𑐫𑐵𑐔𑑂𑐰𑑄𑐐𑐸 𑐡𑐸𑑋 𑐳𑐸𑐠𑐫𑑂 𑐴𑐾 𑐠𑑁𑑄 𑐳𑐸𑑄 𑐕𑐩𑑂𑐴𑐾𑐳𑐶𑐣𑑄 𑐰𑐫𑐵𑐐𑐸 𑐧𑐐𑐮𑐷 𑐩𑐵𑐬𑐾 𑐫𑐵𑐣𑐵𑑅 𑐢𑑂𑐫𑐧𑐵 𑐳𑑂𑐰𑐴𑐵𑐫𑐾𑐎𑐮 𑑋 𑐐𑐸𑐮𑐶 𑐩𑐾𑐴𑐣𑐟 𑐫𑐵𑐣𑐵𑑅 𑐢𑐶𑐧𑑂𑐕𑑅, 𑐢𑐶𑐧𑑂𑐕𑑅 𑐩𑐸𑑄𑐎𑐵𑑅 𑐁𑐮𑑀𑐎𑑄 𑐩𑐵𑑄𑐫𑐵𑐟 𑐕𑑂𑐰𑐫𑐵𑐧𑐷𑐟 𑐥𑑂𑐫𑐡𑑂𑐰𑑅 𑐡𑐵𑑄 𑐩𑐸𑑄𑐎𑐹𑐐𑐸 𑐏𑑅 𑑋 𑐚𑑂𑐫𑐹𑐱𑐣𑑄 𑐕𑐣𑑂𑐴𑐸 𑐣𑐶𑐣𑑂𑐴𑐸𑐫𑐵 𑐧𑐶𑐡𑐵 𑐎𑐫𑐵𑑅 𑐐𑐵𑐩𑐫𑑂 𑐰𑐣𑐵𑑅 𑐰𑐫𑐾 𑐩𑐵𑐮𑐷 𑐢𑐎𑐵𑑅 𑐧𑐶𑐔𑐵𑑅 𑐫𑐵𑑅𑐐𑐸 𑐣𑑄 𑐏𑑅 𑑋 𑐩𑐵𑑄𑐫𑐵𑐟 𑐢𑑂𑐫𑐧𑐵 𑐣𑑄 𑐕𑑂𑐰𑐫𑐵𑐧𑐷 𑐀𑐮𑐾 𑐰𑐫𑐵𑐐𑐸 𑐳𑐾𑐰𑐵 𑐣𑑄 𑐫𑐵𑐣𑐵𑐧𑐷 𑑋 𑐐𑐧𑐮𑐫𑑂𑐣𑐶𑐳𑐾𑑄 𑐐𑐵𑐩𑑄 𑐠𑑅 𑐩𑐵𑐩𑑄 𑐖𑐶 𑐩𑑂𑐴𑑄 𑐩𑐦𑐸, 𑐕𑐸𑑄 𑐨𑐔𑐵 𑐢𑑂𑐫𑐧𑐵 𑐕𑑂𑐰𑐫𑐵𑐴𑐶𑑃 𑐢𑐎𑐵𑑅 𑐥𑑁 𑐕𑑂𑐰𑐫𑐵𑐴𑐮 𑑋 𑐀𑐧𑐮𑐫𑑂𑐣𑐶𑐳𑐾𑑄 𑐁𑐮𑑀𑐎𑐫𑐵𑐟 𑐢𑐣𑑂𑐡𑐵 𑐖𑐸𑐫𑐵𑐔𑑂𑐰𑐣, ‘𑐩𑐳𑐶𑐄 𑐕𑐸 𑐖𑐸𑐂𑐎𑐵 𑐔𑑂𑐰𑐣 𑐏𑑅… 𑐰𑑄 𑐱𑐴𑐬𑐫𑑂 𑐰𑐫𑐾 𑐣𑑂𑐴𑑂𑐫𑑅 𑐣𑑄 𑐢𑐵𑐂𑐩𑐏𑐸….𑐎𑐵𑐔𑐵𑐎 𑐚𑑂𑐫𑐹𑐱𑐣 𑐟𑑂𑐰𑑅𑐟𑐵𑑅 𑐰𑐣𑐾𑐐𑐸 𑐣𑑄 𑐳𑐩𑑂𑐨𑐰 𑐩𑐡𑐸𑑋 𑐐𑐸𑐮𑐶 𑐎𑐸𑐟𑑅 𑐫𑐵𑐣𑐵𑑅 𑐟𑐶𑐣𑐶 𑐰𑐫𑐵𑐟 𑐣𑐶𑐐𑐹 𑐳𑑂𑐰𑑄𑐐𑐹 𑐧𑐵𑑄𑐮𑐵𑑅𑐐𑐸 𑐚𑑂𑐫𑐹𑐱𑐣 𑐔𑐹𑐮𑐵𑑅𑐐𑐸 𑐏𑑅 𑑋 𑐟𑑅𑐣𑑂𑐴𑐸 𑐟𑐎 𑐧𑐶𑐡𑐵𑐫𑑂 𑐔𑑂𑐰𑐣 𑐎𑐶 𑐩𑐳𑑂𑐟𑐫𑑂 𑐩𑐵𑑄 𑐀𑐧𑐸𑐥𑐶𑐳𑑄 𑐳𑐸𑑄 𑐩𑐾𑐥𑐶𑑄 𑐴𑐾 𑐟𑐫𑐵𑐧𑐷 𑑋 𑐀𑐠𑐾𑑄𑐣𑑄 𑐧𑐾𑐬𑐵𑐾𑐖𑐐𑐵𑐬𑐷 𑐠𑑁𑑄𑐎𑐣𑑂𑐴𑐫𑑂 𑐠𑐸𑐮𑐶 𑐀𑐥𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑐎𑐶 𑐣𑐶𑐐𑐹𑐐𑐸 𑐳𑑂𑐰𑑄𑐐𑐹𑐐𑐸 𑐎𑑂𑐮𑐵𑐳𑐫𑐵𑐥𑐶𑑄 𑐩𑐳𑑂𑐟𑐫𑑂𑐟 𑐧𑑂𑐰𑑄𑐎𑐷𑐥𑐶𑑄 𑐩𑐵𑐳𑑂𑐚𑐬𑐟 𑐀𑑅𑐥𑐸𑐎 𑐴𑐾 𑐔𑐹𑐮𑐵𑐂 𑑋 𑐁𑐮𑑀𑐎𑐫𑐵 𑐱𑐴𑐬𑐫𑐵 𑐠𑐶𑐎𑐾𑐐𑐸 𑐧𑐾𑐳𑐵𑑅𑐨𑐵𑑅 𑐧𑐮𑐫𑑂 𑐠𑑅𑐐𑐸 𑐎𑐩𑐵𑐃𑐫𑐵 𑐕𑐐𑐹 𑐖𑐎 𑐩𑐵𑐢𑑂𑐫𑐩 𑐟𑑂𑐰𑑅𑐦𑐶𑐎𑐾 𑐩𑐵𑐳𑑂𑐟𑐶 𑐩𑐰𑑅 𑑋 𑐀𑐠𑐾 𑐖𑐸𑐫𑐵𑑅 𑐣𑑄 𑐰𑑄 𑐢𑑂𑐫𑐧𑐵 𑐩𑐸𑐣𑐵𑑅 𑐰 𑐕𑐸𑑄 𑐨𑐔𑐵 𑐥𑐾𑐱𑑂𑐎𑐷 𑐎𑐫𑐵𑑅 𑐐𑐵𑐩𑐫𑑂 𑐰𑐣𑐾𑐐𑐸 𑐰 𑐩𑐵𑑄𑐫𑐵𑐟 𑐧𑐵𑑄𑐮𑐵𑐎 𑐰𑐵𑐳𑑅 𑐫𑐵𑐣𑐵𑑅 𑐦𑐎𑑂𑐰 𑐫𑐵𑐎𑐣𑑄 𑐮𑐶𑐴𑐵𑑄 𑐰𑐫𑐾𑐐𑐸 𑐎𑑂𑐰𑑅𑐕𑐶𑐄𑐐𑐸 𑐏𑑅 𑑋

𑐱𑐴𑐬𑐫𑑂 𑐥𑐵𑐳𑐵𑐥𑐶𑑄𑐣𑐵𑐥 𑐰 𑐕𑐎𑐹 𑐴𑐾 𑐎𑑂𑐰𑐠𑐵𑐫𑑂 𑐔𑑂𑐰𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐀𑐠𑐾 𑐖𑐸𑐫𑐵𑑅 𑐩𑐵𑑄 𑐰 𑐎𑐾𑐴𑐾𑑃𑐫𑐵𑐟 𑐴𑐫𑐾𑐐𑐸 𑐳𑐩𑑂𑐨𑐰 𑐩𑐖𑐸𑐮 𑑋 𑐴𑐵𑐣𑑄 𑐩𑐵𑑄 𑐣𑑄 𑐐𑐵𑐩𑑄 𑐰𑐫𑐾 𑐣𑑂𑐴𑑂𑐫𑐵𑑅𑐩𑑂𑐴 𑐩𑐏𑐸𑑋 ‘𑐐𑐵𑐩𑐫𑑂 𑐧𑐸𑑃 𑐕𑐎𑐹𑐔𑐵 𑐡𑐸, 𑐩𑐵𑑄 𑐱𑐴𑐬𑐫𑑂 𑐰𑐮 𑐢𑐵𑑅𑐳𑐵 𑐰 𑐣𑑄 𑐩𑐡𑐂….𑐠𑐠𑐾 𑐧𑐶𑐔𑐵𑑅 𑐫𑐵𑐣𑐵𑑅 𑐰𑑄 𑐂𑐔𑑂𑐕𑐵 𑐡𑐫𑐾𑐎 𑐡𑐫𑐾𑐎 𑐣𑑄 𑐩𑐵𑑄 𑐰 𑐎𑐾𑐴𑐾𑑃𑐫𑐵𑐟 𑐴𑐫𑐾 𑐩𑐦𑐫𑐵𑐔𑑂𑐰𑐣….𑐀𑑃, 𑐂𑐮𑐫𑑂 𑐧𑑂𑐫𑐮𑐫𑑂 𑐨𑐔𑐵 𑐨𑐔𑐵 𑐢𑑂𑐫𑐧𑐵 𑐢𑐵𑑅𑐳𑐵 𑐕𑑂𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑑁𑑄 𑐳𑐸𑐠𑐫𑑂 𑐰 𑐚𑑂𑐫𑐹𑐱𑐣𑑄 𑐢𑑂𑐫𑐧𑐵 𑐖𑑂𑐰𑐣𑐵𑑅 𑐰𑐫𑐵𑐔𑑂𑐰𑑄𑐧𑐮𑐫𑑂 𑐴𑐾 𑐳𑐸𑐣𑐵𑐣𑑄 𑐰𑐫𑐵𑐐𑐸 𑐧𑐐𑐮𑐶 𑐩𑐵𑐬𑐾 𑐫𑐵𑑅𑐐𑐸 𑐏𑑅 𑑋

𑐁𑐮𑑀𑐎𑐫𑐵 𑐩𑐶𑐏𑐵𑑄 𑐏𑑂𑐰𑐧𑐶 𑐴𑐵𑐮 𑑋 𑐢𑑂𑐫𑐧𑐵 𑐠𑑂𑐫𑑄𑐎 𑐩𑐰𑐮 𑐎𑐶 𑐩𑐵𑐩𑑄 𑐖𑑅𑐏𑑅 𑐔𑑂𑐰𑑄𑐥𑐶𑑄𑐟 𑐏𑐸𑐳𑐵𑐩𑐡 𑐫𑐵𑐣𑐵𑑅 𑐣𑑂𑐴𑑂𑐫𑐵𑐩𑑂𑐴𑐳𑐵𑑄 𑐕𑐩𑑂𑐴𑐾𑐳𑐶𑐐𑐸 𑐩𑑀𑐧𑐵𑐂𑐮𑑄 𑐰𑐫𑐵𑐟 𑐦𑑀𑐣 𑐫𑐵𑐣𑐵𑑅 𑐣𑑂𑐫𑐣𑐷 𑑋 𑐀𑐮𑐾 𑐰𑑄 𑐢𑑂𑐫𑐧𑐵 𑐕𑐸 𑐖𑐸𑐫𑐵𑑅 𑐕𑑂𑐰𑐫𑐵 𑐴𑐫𑐾 𑐩𑐦𑐸𑐟 𑐢𑐎𑐵𑑅 𑐢𑐵𑐫𑐾𑐐𑐸…? 𑐢𑐫𑐵 𑐴𑐾 𑐕𑑂𑐰𑐟 𑐢𑐵𑑅𑐳𑐵 𑐣𑑄 𑐢𑑂𑐫𑐧𑐵𑐫𑐵 𑐧𑑂𑐫𑐰𑐳𑑂𑐠𑐵 𑐐𑐠𑐾 𑐫𑐵𑐣𑐵𑑅 𑐫𑐵𑐂 ? 𑐊𑐜𑐨𑐵𑐣𑑂𑐳 𑐎𑐵𑑅𑐐𑐸 𑐏𑑅 𑐰𑑄, 𑐁𑑅 𑐟𑐸𑐬𑐸𑐣𑑂𑐟 𑐴𑐾 𑐚𑑂𑐫𑐹𑐱𑐣𑑄 𑐢𑑂𑐫𑐧𑐵 𑐐𑐣𑑄 𑐰𑐂 ….? 𑐁𑐮𑑀𑐎𑑄 𑐟𑐳𑐎𑑄 𑐡𑐸𑑅𑐏 𑐟𑐵𑐮 𑑋 𑐰𑑄 𑐁𑑅 𑐐𑐵𑐩𑑄 𑐳𑐸𑐣𑐵𑐣𑑄 𑐦𑑀𑐣 𑐫𑐵𑐣𑐵 𑐴𑐮 𑐢𑐵𑑅𑐳𑐵 𑐩𑐮𑑂𑐴𑑂𑐰𑐣𑐾𑐐𑐸 𑐰 𑐩𑐵𑐩𑑄 𑐕𑑂𑐰𑐫𑐵𑐴𑑅𑐐𑐸 𑐥𑑁𑐫𑐵 𑐮𑐶𑐳𑑅 𑐣𑑄 𑐩𑐕𑑂𑐰𑐫𑐾𑐐𑐸 𑐎𑑂𑐰𑑅𑐕𑐶𑐟..𑐁𑑅 𑐐𑐸𑐮𑐶 𑐣𑑄 𑐖𑐸𑐂 𑐃𑐱𑑂𑐰𑐬𑐫𑐵 𑐩𑐬𑑂𑐖𑐷 ..𑑋 𑐰𑑄 𑐁𑑅 𑐩𑐾𑐐𑐸 𑐣𑑄 𑐚𑑂𑐫𑐹𑐱𑐣 𑐩𑐵𑑅𑐰𑐣 𑐳𑐵𑐫𑐡 𑐐𑐣𑑄 𑐕𑐠𑐵𑐳𑑄 𑐢𑑂𑐫𑐧𑐵 𑐧𑑂𑐫𑐰𑐳𑑂𑐠𑐵 𑐖𑐸 𑐴𑐾 𑐖𑐸𑐂𑐮𑐵…𑑋 𑐠𑑂𑐰 𑐴𑐾 𑐎𑐸𑐟𑑅 𑐫𑐵𑐫𑐵𑑄 𑐥𑑂𑐫𑐣𑑂𑐴𑐸 𑐣𑑂𑐫𑐵𑐣𑑂𑐴𑐸 𑐧𑐶𑐟…𑐁𑐮𑑀𑐎𑐫𑐵 𑐩𑐣𑑄 𑐔𑐶𑐣𑑂𑐟𑐵 𑐎𑐫𑐵𑐔𑑂𑐰𑐣 𑐀𑐮𑐾 𑐠𑑅𑐐𑐸 𑐴𑐾 𑐡𑑀𑐲 𑐏𑑄𑐎𑐵𑐔𑑂𑐰𑐣 𑑋

𑐕𑐰𑐵𑑅 𑐮𑐶𑐥𑐵 𑐴𑐾 𑐐𑐵𑐩𑑄 𑐦𑑀𑐣 𑐰𑐮 𑑋 𑐮𑐶𑐎𑑂𑐎 𑐔𑑂𑐰𑑄𑐐𑐸 𑐕𑐾𑑃𑐫𑑂 𑐔𑑂𑐰𑑄𑐩𑑂𑐴 𑐎𑐎𑐶𑐫𑐵 𑐦𑑀𑐣 𑐮𑐵𑐣𑐵𑐔𑑂𑐰𑐣 𑑋 𑐁𑐮𑑀𑐎𑑄 𑐠𑐸𑐴𑐾 𑐠𑐸𑐮 𑐎𑐶 𑐰𑐫𑐵 𑐮𑐶𑐎𑑂𑐎 𑐥𑐎𑑂𑐎𑐵 𑐣𑑄 𑐩𑐵𑑄 𑐔𑑂𑐰𑑄𑐔𑑂𑐰𑑄𑐐𑐸 𑐡𑐂 𑑋 𑐣𑐶𑐐𑐹 𑐥𑑂𑐫𑑄𑐐𑐹 𑐟𑐎𑐫𑐵 𑐎𑐮 𑐰𑑄 𑐮𑑂𑐴𑑂𑐰𑑄 𑐴𑐾 𑐩𑐮𑑂𑐴𑑂𑐰𑑄 𑑋 𑐟𑐬 𑐴𑐵𑐣𑑄 𑐴𑐵𑐣𑑄 𑐣𑑄 𑐦𑑀𑐣 𑐣𑑂𑐫𑐵𑐣𑐵 𑐴𑐾 𑐔𑑂𑐰𑑄𑐳𑐾𑑄𑐮𑐶 𑐟𑐳𑐎𑑄 𑐎𑑂𑐰𑐟𑐸𑑄𑐐𑐸 𑐩𑐣𑑄 𑐰𑑄 𑐦𑑀𑐣 𑐮𑑂𑐴𑑂𑐰𑐣 𑑋 𑐧𑐶𑐔𑐵𑑅 𑐫𑐵𑐟, 𑐣𑑂𑐴𑑂𑐫𑐵𑐐𑐸𑐳𑐵𑑄 𑐕𑐐𑐹 𑐟𑑂𑐰𑐴𑑅 𑐟𑐫𑐾𑐩𑐵𑐮𑐷 𑑋 𑐀𑐮𑐾 𑐢𑐫𑐵𑐧𑐷𑐩𑐵𑐮𑐷 𑐎𑐶 𑐁𑑅𑐫𑐵𑐟 𑐎𑐵𑐎𑐶𑐫𑐵𑐎𑐾 𑐟𑑂𑐫𑐵𑐫𑐾 𑐎𑐵, 𑐖𑐶𑑄 𑐰𑐫𑐵𑑅 𑐥𑐸𑐮𑐵𑐧𑐷….𑐟𑐬 𑐩𑐵𑑄𑐫𑐵 𑐮𑐳𑐟𑐵𑑄 𑐖𑐵𑑅𑐐𑐸 𑐳𑑅 𑐟𑐵𑑅𑐧𑐮𑐫𑑂 𑐰 𑐀𑐖𑐹 𑐔𑐵𑑅𑐐𑐸 𑐄𑐮𑐶𑐠𑐸𑐮𑐶 𑐴𑐾 𑐩𑐣𑑂𑐟 𑑋 𑐩𑐵𑐩𑑄 𑐢𑐫𑐵𑐔𑑂𑐰𑐣, ‘𑐁𑐮𑐸, 𑐕𑑄 𑐂𑐮𑐫𑑂 𑐴𑐾 𑐣𑑂𑐫𑐵𑐡𑑂𑐰𑑅 𑐡𑐵𑑄 𑐕𑑂𑐰𑐫𑐵𑐴𑐫𑐵𑑅 𑐖𑐶𑑄 𑐩𑐾𑐥𑐶𑑄 𑐳𑐸𑐫𑐵𑐎𑐾𑑄 𑐟𑑂𑐫𑐵𑐫𑑂 𑐎𑐵𑐫𑐾 𑐩𑑂𑐰𑐵𑐫𑐾𑐎𑐵 𑐧𑐶𑐮 𑐥𑐸𑐟𑐵 … 𑐳𑐡𑐵𑑄 𑐨𑐶𑑄 𑐖𑐸𑐂𑐩𑐵…𑐏𑐸𑐧 𑐥𑑂𑐬𑐐𑐟𑐷 𑐫𑐵….𑐰𑐵𑐳𑑅 𑐮𑐵 𑐰 𑐴𑐾 𑐰𑐮 𑑋 𑐮𑐶𑐳𑐾𑑄 𑐩𑐵𑑅𑐩𑐵𑑅𑐐𑐸 𑐩𑐾𑐩𑐾𑐐𑐸 𑐳𑐵𑐩𑐵𑐣 𑐣𑑄 𑐎𑐵𑐫𑐾 𑐢𑐸𑐣 𑐖𑐶𑑄 …. 𑐁𑑅 𑐠𑐠𑐾𑑄 𑐩𑐾𑐐𑐸 𑐢𑑂𑐫𑐧𑐵 𑐕𑑂𑐰𑐫𑐵 𑐴𑐫𑐾𑐟 𑐴𑐠𑐵𑐫𑑂 𑐔𑐵𑐫𑐾 𑐩𑑂𑐰𑐵𑑅 …𑐀𑐠𑐾 𑐮𑐵 𑐕𑑄 𑐣𑑂𑐴𑑂𑐫𑐵𑐧𑑂𑐮𑐾𑑄 𑐂𑐮𑐫𑑂 𑐴𑐾 𑐢𑑂𑐫𑐧𑐵 𑐕𑑂𑐰𑐫𑐵 𑐴𑐂….𑐟𑐬 𑐠𑐥𑐵𑐮𑐾 𑐖𑐶𑐐𑐸 𑐴𑐵𑐮𑐟 𑐨𑐔𑐵 𑐟𑐳𑐎𑑄 𑐴𑐾 𑐧𑐵𑑄𑐩𑐮𑐵𑐟 …𑐕𑑄 𑐖𑐶𑐐𑐸 𑐳𑐩𑐳𑑂𑐫𑐵 𑐡𑐎𑑂𑐰 𑐖𑑂𑐫𑑄𑐎𑐵𑐧𑐶𑐮 𑑋’

𑐁𑐮𑑀𑐎𑑄 𑐠𑑂𑐰 𑐏𑑃 𑐠𑐸𑐂𑐎𑐾 𑐩𑐦𑐫𑐵𑐔𑑂𑐰𑐣 𑐎𑐶 𑐰𑑄 𑐢𑑂𑐫𑐧𑐵 𑐕𑑂𑐰𑑅𑐐𑐸 𑐴𑐾 𑐩𑐡𑐸𑐳𑐵 𑐩𑐵𑑄𑐫𑐵 𑐮𑑂𑐴𑐵𑐟𑐫𑑂 𑐐𑐠𑐾 𑐖𑐸𑐫𑐵𑑅 𑐢𑑂𑐫𑐧𑐵 𑐮𑐵𑐟..? 𑐰𑐫𑐵𑐐𑐸 𑐢𑑂𑐫𑐧𑐵 𑐮𑐵 𑐟𑑄𑐐𑐸 𑐏𑑅 𑑋 𑐴𑐵𑐣𑑄…? 𑐠𑑂𑐰 𑐩𑐵𑐩𑐮𑐵 𑐕𑐸 𑐏𑑅 ? 𑐁𑐮𑑀𑐎𑑄 𑐣𑑂𑐴𑑂𑐫𑐵𑐎𑑂𑐰 𑐴𑐾 𑐧𑐶𑐔𑐵𑑅 𑐫𑐵𑑅𑐳𑐵𑑄 𑐠𑑂𑐰 𑐠𑐠𑐾 𑐴𑐾 𑐖𑐹𑐐𑐸 𑐏𑑅 𑐢𑐎𑐵𑑅 𑐢𑐵𑐫𑐾 𑐩𑐦𑐸𑐟 𑑋

𑐕𑐰𑐵𑑅 𑐮𑐶𑐥𑐵 𑐁𑐮𑑀𑐎𑐫𑐵 𑐣𑐵𑐩𑐫𑑂 𑐕𑐥𑐸 𑐥𑑁 𑐠𑑂𑐫𑑄𑐎𑐵𑐰𑐮 𑑋 𑐄𑐎𑐷 𑐔𑑂𑐰𑐫𑐵𑐟𑐮… ‘𑐡𑐵𑐂, 𑐰𑑄𑐐𑐸 𑐰𑐵𑐮𑐫𑑂 𑐖𑐶𑑄 𑐕𑐶𑐐𑐸 𑐧𑐐𑐮𑐷 𑐩𑐵𑐬𑐾 𑐫𑐵𑐣𑐵𑐐𑐸 𑐏𑑅 𑑋 𑐄𑐎𑐷 𑐥𑑂𑐫𑐡𑑂𑐰𑑅 𑐡𑐵𑑄𑐫𑐵 𑐮𑐶𑐳𑐾𑑄 𑐕𑐶𑐎𑐥𑐶𑐣𑐶 𑐩𑐵𑑄𑐫𑐵 𑐥𑑁 𑐣𑑄 𑐡𑐸, 𑐐𑐸𑐩𑑂𑐴 𑐄𑐳𑐵𑑃𑐫𑑂 𑐩𑐡𑐫𑐵𑐔𑑂𑐰𑑄𑐐𑐸 𑐖𑐸𑐫𑐵𑐔𑑂𑐰𑐣, 𑐀𑐮𑐾 𑐕𑐶𑐟𑑅 𑐢𑑂𑐫𑐧𑐵 𑐕𑑂𑐰𑐫𑐵𑐴𑐶𑑃 𑐢𑐎𑐵 𑐔𑑂𑐰𑐫𑐵𑐴𑑅𑐩𑑂𑐴 𑐮𑐵𑐣𑐵𑐔𑑂𑐰𑐣….𑐡𑐵𑐂, 𑐖𑐶𑑄 𑐕𑐶𑐐𑐸 𑐥𑑂𑐫𑐡𑑂𑐰𑑅 𑐡𑐵𑐩𑐫𑑂 𑐡𑑂𑐰𑑅𑐕𑐶 𑐡𑐵𑑄 𑐩𑐾𑐐𑐸 𑐳𑐵𑐫𑐵𑑅 𑐡𑐎𑑂𑐰𑑄 𑐫𑐵𑐣𑐵𑑅 𑐣𑑂𑐫𑐵𑐡𑑂𑐰𑑅 𑐡𑐵𑑄 𑐕𑐶𑐎𑐥𑐶𑐣𑐶 𑐩𑐵𑑄𑐫𑐵 𑐣𑐵𑐩𑐫𑑂 𑐕𑑂𑐰𑐫𑐵𑐧𑐶𑐫𑐵𑐐𑐸 𑐡𑐸….𑐁𑐱𑐵 𑐡𑐸, 𑐕𑐶𑐎𑐥𑐶𑐣𑐶 𑐩𑐵𑑄𑐫𑐵 𑐮𑑂𑐰𑐫𑑂 𑐮𑐣 𑐖𑐸𑐂…𑐥𑐵𑐎𑐾𑐚𑐩𑐵𑐬…𑑋’ 𑐁𑐮𑑀𑐎 𑐄𑐮𑐶𑐠𑐸𑐮𑐶 𑐴𑐾 𑐩𑐡𑐫𑐾𑐎 𑐀𑐖𑐹 𑐔𑐵𑐮 𑑋 𑐁𑑅 𑐁𑐮𑑀𑐎𑑄 𑐰𑐫𑐵 𑐩𑐵𑑄𑐫𑐵𑐟 𑐢𑐵𑐟𑑂𑐠𑐾𑑄 𑐳𑐸𑐣𑐵𑑄 𑐢𑑂𑐫𑐧𑐵 𑐕𑑂𑐰𑐫𑐵𑐧𑐶𑐄𑐐𑐸 𑐖𑐸𑐫𑐵𑐔𑑂𑐰𑐣 𑐢𑐂𑐐𑐸 𑐏𑑃 𑐧𑐵𑑄𑐮𑐵𑐎 𑐴𑐾 𑐠𑐸𑐮 𑑋 𑐰𑐫𑐵 𑐩𑐶𑐏𑐵𑑄 𑐏𑑂𑐰𑐧𑐶 𑐴𑐵𑐮 𑑋 𑐏𑑂𑐰𑐧𑐶𑑄 𑐥𑑂𑐫𑐵𑑅𑐐𑐸 𑐩𑐶𑐏𑐵𑑄 𑐁𑐮𑑀𑐎𑑄 𑐥𑐟𑐶𑐂 𑐔𑐸𑐥𑑂𑐥𑐵 𑐣𑐮 𑑋 𑐀𑐮𑐾 𑐮𑐠𑑂𑐫𑐵𑐣𑐵𑑅 𑐏𑐮𑑂𑐟𑐶𑐂 𑐟𑐮 𑑋 𑐰𑑄 𑐠𑑅𑐐𑐸 𑐴𑑂𑐰𑐐𑑄𑐐𑐸 𑐏𑐮𑑂𑐟𑐶 𑐳𑑂𑐰𑐳𑑂𑐰𑑄 𑐩𑐣𑑄 𑐩𑐣𑑄 𑐄𑐩𑑂𑐴 𑐥𑐵𑐎𑐾𑐚𑐩𑐵𑐬𑐫𑐵𑐟 𑐳𑐸𑐰𑐵𑑅 𑐧𑐶𑐫𑐵𑐔𑑂𑐰𑐣 𑑋

𑐨𑐵𑐫𑑂𑐴𑐶𑐄𑐩𑑂𑐴 : 𑐬𑐩𑐾𑐱𑐎𑐵𑐖𑐷 𑐳𑑂𑐠𑐵𑐥𑐶𑐟