𑐫𑐮(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷ 𑐣𑐾𑐥𑐵𑐮𑐨𑐵𑐲𑐵 𑐦𑐵𑐄𑐞𑑂𑐜𑐾𑐳𑐣𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐕𑐐𑐹 𑐴𑐾 𑐥𑐬𑐶𑐰𑐵𑐬𑐫𑐵 𑐳𑑂𑐰𑐩𑑂𑐴 𑐩𑐶𑐳𑐵 𑐔𑑂𑐰𑐩𑐶𑐫𑐵 𑐥𑑂𑐫𑑄𑐐𑐹 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐖𑐸𑐮 𑑋 𑐠𑐣𑐫𑐵 𑐫𑐵𑐎 𑐥𑑂𑐫𑐵𑐮𑐾𑐳𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐵𑑄 𑐰 𑐰𑐫𑑂𑐎𑑅𑐫𑐵 𑐣𑐶𑐩𑑂𑐴 𑐩𑑂𑐴𑑂𑐫𑐵𑐫𑑂𑐥𑐶𑐣𑐶𑐐𑐸 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐩𑑀𑐟𑐶𑐱𑑀𑐨𑐵 𑐱𑑂𑐬𑐾𑐲𑑂𑐛𑐫𑐵 ‘𑐥𑑂𑐬𑐎𑐺𑐟𑐶’, ‘𑐮𑐸𑐩𑐣𑑂𑐟𑐶𑐫𑐵 𑐜𑐵𑐫𑐬𑐷’, ‘𑐏𑑂𑐰𑐧𑐶’ 𑐰 ‘𑐳𑐟𑑂𑐫 𑐰 𑐩𑐵𑑄’ 𑐄𑐥𑐣𑑂𑐫𑐵𑐳 𑐳𑐦𑐹 𑐰 ‘𑐣𑐾𑐥𑐵𑐮𑐫𑑂 𑐑𑐬𑐾𑐮𑐸 𑐄𑐡𑑂𑐫𑑀𑐐𑐫𑐵 𑐰𑐶𑐎𑐵𑐳’ 𑐣𑐵𑑄𑐫𑐵 𑐣𑐶𑐐𑐹 𑐳𑐦𑐹, 𑐰𑐫𑑂𑐎𑑅𑐫𑐵 𑐟𑑅𑐢𑐶𑐎𑐩𑑂𑐴 𑐩𑑂𑐴𑑂𑐫𑐵𑐫𑑂 𑐜𑐵. 𑐳𑐺𑐖𑐣𑐵 𑐱𑑂𑐬𑐾𑐲𑑂𑐛𑐫𑐵 ‘𑐣𑑂𑐴𑑂𑐫𑐳𑑅𑐔𑐶𑑄 𑐣𑐶𑐳𑐾𑑄 𑐮𑐶𑐳𑑅 𑐔𑐶𑑄 𑐟𑐎’ 𑐰 ‘𑐳𑐸𑐥𑐵𑑃𑐫𑑂 𑐣𑑄 𑐕𑐸 𑐳𑑂𑐫𑐹’ 𑐰 𑐔𑐶𑐢𑐶𑐎𑑅𑐩𑑂𑐴 𑐩𑑂𑐴𑑂𑐫𑐵𑐫𑑂 𑐜𑐵. 𑐳𑐧𑐶𑐣𑐵 𑐱𑑂𑐬𑐾𑐲𑑂𑐛𑐫𑐵 ‘𑐖𑐶𑐣𑑂𑐡𑐐𑐷 𑑅 𑐕𑐐𑐹 𑐣𑑂𑐴𑑂𑐫𑐳𑑅 𑐔𑐶𑑄 𑐰 𑐩𑐣𑐫𑐵 𑐳𑑂𑐥𑐬𑑂𑐱’ 𑐣𑐵𑑄𑐫𑐵 𑐳𑐦𑐹 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐳𑐦𑐹𑐩𑐢𑑂𑐫𑐾 𑐩𑑀𑐟𑐶𑐱𑑀𑐨𑐵𑐫𑐵 𑐕𑐐𑐹 𑐴𑐾 𑐳𑐦𑐸𑐟𑐶𑐂 𑐥𑑂𑐫𑑄𑐐𑐹 𑐄𑐥𑐣𑑂𑐫𑐵𑐳 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐩𑐾𑐐𑐸 𑐰𑐫𑑂𑐎𑑅 𑐕𑐩𑑂𑐴 𑐀𑐬𑑂𑐠𑐱𑐵𑐳𑑂𑐟𑑂𑐬𑐷 𑐖𑐹𑐐𑐸 𑐮𑑂𑐫𑐵𑐏𑑄 𑐰𑐫𑑂𑐎𑐮𑑄 𑐟𑑅𑐡𑑃 𑐟𑐎 𑐳𑐬𑐎𑐵𑐬𑐷 𑐳𑐾𑐰𑐵𑐫𑑂 𑐟𑑅𑐡𑑃 𑐟𑐎 𑐦𑑂𑐫𑐵𑐣𑐵𑐡𑐷𑐐𑐸 𑐀𑐣𑐸𑐨𑐰𑐫𑐵𑐟 𑐎𑐫𑐵𑑅 𑐔𑑂𑐰𑐫𑐵𑐟𑑅𑐐𑐸 𑐳𑐦𑐹 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑐫𑐵 𑐥𑑂𑐬𑐩𑐸𑐏 𑐁𑐟𑐶𑐠𑑂𑐫𑐟𑐵𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐦𑐵𑐄𑐞𑑂𑐜𑐾𑐳𑐣𑐫𑐵 𑐣𑐵𑐫𑑅 𑐩𑑄𑐐𑐮𑐩𑐵𑐣 𑐱𑐵𑐎𑑂𑐫𑑄 𑐳𑑄𑐳𑑂𑐠𑐵𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐖𑑂𑐫𑐵𑐗𑑂𑐰𑑅 𑐰 𑐐𑐟𑐶𑐰𑐶𑐢𑐶𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐳𑐦𑐹𑐫𑐵𑐟 𑐎𑐫𑐵𑑅 𑐳𑐵𑐴𑐶𑐟𑑂𑐫𑐎𑐵𑐬 𑐱𑐵𑐎𑑂𑐫 𑐳𑐸𑐬𑐾𑐣𑑄 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐥𑑂𑐫𑑄𑐐𑐸𑐮𑐶𑑄 𑐳𑐦𑐹𑐫𑐵 𑐳𑐩𑐷𑐎𑑂𑐲𑐵 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐔𑑂𑐰𑐩𑐶 𑐜𑐵. 𑐬𑐶𑐣𑐵 𑐟𑐸𑐮𑐵𑐢𑐬𑑄 𑐣𑑄 𑐳𑐦𑐹 𑐰 𑐔𑑂𑐰𑐩𑐶𑐫𑐵 𑐧𑐵𑐬𑐾 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐩𑐹𑐥𑐵𑐴𑐵𑑄 𑐢𑐵𑑅𑐏𑑂𑐰𑐵, 𑐣𑐾𑐥𑐵𑐮 𑐳𑐬𑐎𑐵𑐬𑐫𑐵 𑐥𑐸𑐮𑐵𑑄𑐩𑑂𑐴 𑐳𑐔𑐶𑐰𑐮𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬 𑐱𑑄𑐎𑐬𑐥𑑂𑐬𑐳𑐵𑐡 𑐎𑑀𑐂𑐬𑐵𑐮𑐵𑑄 𑐨𑐶𑑄𑐟𑐸𑐣𑐵 𑐣𑑂𑐰𑐔𑐸 𑐧𑐶𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑑂𑐰𑐩𑑂𑐴𑑄 𑐔𑑂𑐰𑐩𑐶𑑄 𑐳𑐵𑐴𑐶𑐟𑑂𑐫 𑐳𑐶𑐬𑑂𑐖𑐣𑐵𑐫𑑂 𑐠𑑅𑐠𑑅𑐐𑐸 𑐀𑐣𑐸𑐨𑐰 𑐎𑐣𑐵𑐡𑐷𑐐𑐸 𑐏𑑅 𑑋 𑐔𑑂𑐰𑐩𑐶 𑐱𑑂𑐬𑐾𑐲𑑂𑐛 𑐟𑑅𑐎𑐾𑐴𑐾𑑄 𑐣𑑄 𑐔𑐶𑐣𑐵𑐏𑑃 𑐧𑑂𑐰𑐣𑐵𑑅 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋