𑐫𑐾𑑃 – 𑐣𑐾𑐰𑐵𑑅𑐟𑐫𑑂𑐟 𑐮𑑀𑐎𑐳𑐾𑐰𑐵 𑐁𑐫𑑀𑐐𑐫𑑂 𑐖𑐵𑑃𑐔 𑐧𑐷𑐐𑐸 𑐣𑐶𑑄𑐟𑐶𑑄 𑐩𑑂𑐴𑐷𑐐 𑐕𑐐𑐹 𑐥𑐬𑐵𑐩𑐬𑑂𑐱 𑐖𑑂𑐫𑐵𑐗𑑂𑐰𑑅 𑐖𑐸𑐮 𑑋 𑐩𑐸𑐎𑑂𑐎𑑄 𑑗𑑘 𑐩𑑂𑐴 𑐣𑐾𑐰𑐵𑑅 𑐫𑐸𑐰𑐵𑐟𑐫𑑂𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐮𑑀𑐎𑐳𑐾𑐰𑐵 𑐁𑐫𑑀𑐐𑐫𑑂 𑐖𑐵𑑃𑐔 𑐧𑐶𑐫𑐵𑑅 𑐳𑐬𑐎𑐵𑐬𑐷 𑐖𑐵𑐐𑐶𑐬 𑐕𑐵𑐫𑑂 𑐣𑐫𑐾𑐩𑐵𑑅 𑐢𑐂𑐐𑐸 𑐧𑐵𑐬𑐾 𑐢𑑂𑐰𑐵𑐠𑐸𑐂𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐮𑐶𑐳𑐾𑑄 𑐩𑐵𑐣𑐰𑐀𑐢𑐶𑐎𑐵𑐬𑐎𑐬𑑂𑐩𑐷 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐣𑐾𑐰𑐵𑑅𑐟 𑐮𑐶𑐄𑐣𑐾 𑐮𑐵𑑅𑐐𑐸 𑐎𑐵𑐬𑐞 𑐣𑐶𑐬𑑂𑐞𑐫 𑐫𑐵𑐫𑐾𑐐𑐸 𑐰 𑐫𑑀𑐖𑐣𑐵 𑐡𑐫𑐾𑐎𑐾𑐐𑐸 𑐎𑑂𑐲𑐾𑐟𑑂𑐬𑐫𑑂 𑐩𑐠𑑂𑐫𑑄𑐐𑐸𑐮𑐶𑑄 𑐏𑑅 𑐢𑐵𑐳𑐾𑑄 𑐳𑐬𑐎𑐵𑐬𑐷 𑐳𑐾𑐰𑐵𑐫𑑂 𑐣𑐾𑐰𑐵𑑅𑐟 𑐡𑐸𑐴𑐵𑑄 𑐰𑐣𑐾𑐩𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐳𑐴𑐳𑐔𑐶𑐰 𑐬𑐶𑐟𑐾𑐱 𑐱𑐵𑐎𑑂𑐫𑑄 𑐖𑐵𑐐𑐶𑐬 𑐣𑐫𑐾𑐐𑐸 𑐣𑐶𑑄𑐟𑐶𑑄 𑐰𑐶𑐡𑐾𑐱𑐫𑑂 𑐴𑐾 𑐰𑐣𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐩𑐡𑐸 𑐢𑐵𑐳𑐾𑑄 𑐮𑑀𑐎𑐳𑐾𑐰𑐵 𑐩𑐵𑐬𑑂𑐦𑐟 𑐠𑐣 𑐴𑐾 𑐖𑐵𑐐𑐶𑐬 𑐣𑐫𑐾𑐟 𑐳𑐩𑐳𑑂𑐫𑐵 𑐩𑐡𑐸𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐥𑑂𑐬𑐵𑐂𑐩 𑐧𑐿𑑄𑐎𑐫𑐵 𑐜𑐾𑐥𑐸𑐚𑐷 𑐩𑐿𑐣𑐾𑐖𑐬 𑐨𑐵𑐂𑐬𑐵𑐖𑐵 𑐟𑐸𑐮𑐵𑐢𑐬𑑄 𑐣𑑄 𑐥𑐬𑐵𑐩𑐬𑑂𑐱 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐧𑑂𑐰𑐟𑐶 𑐎𑐵𑑅𑐥𑐶𑑄 𑐩𑐢𑑂𑐫𑐾 𑑑𑑕 𑐩𑑂𑐴 𑐧𑐵𑐴𑐾𑐎 𑐩𑐾𑐥𑐶𑑄𑐳𑑄 𑐮𑑀𑐎𑐳𑐾𑐰𑐵 𑐁𑐫𑑀𑐐𑐥𑐵𑐏𑐾𑑄 𑐳𑐬𑐎𑐵𑐬𑐷 𑐖𑐵𑐐𑐶𑐬 𑐣𑐫𑐾𑐦𑐂 𑐢𑐂𑐐𑐸 𑐟𑐎𑑄 𑐩𑐳𑐶𑐄𑐐𑐸 𑐏𑑃 𑐎𑑄𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑑅 𑐩𑑄𑐎𑐵𑑅 𑐢𑐸𑐎𑐹, 𑐩𑑄𑐎𑐵𑑅 𑐩𑐸𑐣𑐵, 𑐩𑑄𑐎𑐵𑑅 𑐂𑐣𑑂𑐨𑐾𑐲𑑂𑐚𑐩𑐾𑐣𑑂𑐚 ,𑐮𑐸𑐣𑐶𑐨𑐵𑑅 𑐳𑑂𑐰𑐵𑐳𑑂𑐠𑑂𑐫 𑐎𑐾𑐣𑑂𑐡𑑂𑐬 𑐰 𑐰𑐖𑑂𑐬𑐵𑐔𑐵𑐬𑑂𑐫 𑐎𑑂𑐮𑐧𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐏𑑅𑑋 𑐠𑑂𑐰𑐴𑐾 𑐗𑑂𑐰𑐮𑐫𑑂 𑐁𑑅 𑐩𑑄𑐎𑐵𑑅 𑐩𑐸𑐣𑐵𑐫𑐵 𑐐𑑂𑐰𑐳𑐵𑐮𑐫𑑂 𑐣𑑂𑐴𑐶𑐠𑑄 𑐮𑑀𑐎𑐳𑐾𑐰𑐵 𑐁𑐫𑑀𑐐𑐫𑐵 𑐖𑐵𑑃𑐔 𑐰 𑐖𑐵𑐐𑐶𑐬 𑐣𑐫𑐾𑐐𑐸 𑐧𑐵𑐬𑐾 𑐥𑐬𑐵𑐩𑐬𑑂𑐱 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐾𑐟𑑂𑐫𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋

𑐮𑑀𑐎𑐳𑐾𑐰𑐵𑐫𑐵 𑐣𑐶𑑄𑐟𑐶𑑄 𑐦𑐵𑐬𑐵𑐩 𑐨𑐬𑐾 𑐫𑐵𑐫𑐾𑐐𑐸 𑐰 𑐖𑐵𑑃𑐔 𑐧𑐷𑐐𑐸 𑐣𑐶𑑄𑐟𑐶𑑄 𑐣𑑄 𑐩𑐵𑑅𑐐𑐸 𑐥𑐬𑐵𑐩𑐬𑑂𑐱 𑐧𑐷𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐥𑑂𑐬𑐰𑐎𑑂𑐟𑐵 𑐬𑐩𑐾𑐱𑐩𑐵𑐣 𑐥𑐶𑐫𑐵𑑄 ‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳’ 𑐫𑐵𑐟 𑐎𑐣𑐵𑐡𑐶𑐮 𑑋