𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑖 𑐁𑐲𑐵𑐝 𑑑𑑓, 𑐱𑐸𑐎𑑂𑐬𑐧𑐵𑐬 𑑑𑑖:𑑕𑑖:𑑓𑑔

𑐳𑐬𑐎𑐵𑐬𑐷 𑐎𑐮𑐾𑐖𑐫𑑂 𑐴𑐾 𑐰𑐣𑐾𑐐𑐸 𑐀𑐜𑐵𑐣, 𑐎𑐬𑐶𑐲𑑂𑐩𑐵 𑐰𑑂𑐫𑐰𑐳𑑂𑐠𑐵𑐥𑐣 𑐧𑑂𑐰𑐣𑐷𑐐𑐸

𑐕𑐸𑑄 𑐡𑐶𑑄 𑐣𑑂𑐴𑑂𑐫𑑅 𑐳𑑄𑐎𑐶𑐥𑐵 ‘𑐖𑐵𑐟𑑂𑐬𑐿 𑐖𑐵𑐟𑑂𑐬𑐵’ 𑐳𑑂𑐰𑐫𑐾𑐐𑐸 𑐣𑐶𑐟𑐶𑑄 𑐫𑐾𑑃𑐫𑐵 𑐎𑐸𑐩𑐵𑐬𑐷 𑐴𑐮 𑐠𑑂𑐫𑑄𑐎𑐵𑐡𑐷𑐩𑑂𑐴 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷𑐫𑐵 𑐣𑐵𑐫𑑅 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃 𑐣𑑄 𑐣𑐵𑐫𑐶𑐎𑐵 𑐎𑐬𑐶𑐲𑑂𑐩𑐵 𑐩𑐵𑐣𑐣𑑂𑐢𑐬 𑐣𑐶𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐬𑐵𑐖𑐣𑐷𑐟𑐶 𑐰 𑐥𑐵𑐬𑑂𑐚𑐷𑐂 𑐳𑐎𑑂𑐬𑐶𑐫 𑐩𑐖𑐹𑐐𑐸 𑐢𑐫𑐵𑐡𑐷𑐐𑐸 𑐏𑑅 𑑋

𑐜𑐵. 𑐨𑐚𑑂𑐚𑐬𑐵𑐃 𑐣𑑄 𑐢𑐫𑐵𑐡𑐷𑐐𑐸 𑐏𑑅, “𑐎𑐬𑐶𑐲𑑂𑐩𑐵𑐫𑐵𑐟 𑐖𑐶𑐩𑐶𑐳𑑄 𑐕𑐸𑐚𑑂𑐚𑐷 𑐧𑐶𑐫𑐵𑐐𑐸 𑐏𑑅 𑑋 𑐰𑐫𑑂𑐎𑑅 𑐕𑐩𑑂𑐴 𑐧𑐵𑑄𑐮𑐵𑑅𑐩𑑂𑐴 𑐎𑐮𑐵𑐎𑐵𑐬 𑐏𑑅 𑑋 𑐣𑐶𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐰𑐫𑑂𑐎𑑅 𑐬𑐵𑐖𑐣𑐷𑐟𑐶𑐂 𑐳𑐎𑑂𑐬𑐶𑐫 𑐖𑐸𑐫𑐵𑐩𑐡𑐷 𑑋 𑐰𑐫𑑂𑐎𑐮𑑄 𑑑𑑒 𑐎𑐎𑑂𑐲𑐵𑐟𑐎 𑐧𑑂𑐰𑐣𑐾 𑐢𑐫𑐵𑐡𑐷𑐐𑐸 𑐡𑐸 𑑋 𑐄𑐎𑐶𑑄 𑐕𑐐𑐹 𑐎𑐠𑑄 𑐢𑐵𑐫𑐾𑐧𑐮𑐫𑑂 𑐎𑐬𑐶𑐲𑑂𑐩𑐵 𑐩𑐵𑐣𑐣𑑂𑐢𑐬𑐫𑐵𑐟 𑐕𑐸𑐚𑑂𑐚𑐷 𑐧𑐶𑐫𑐵𑐐𑐸 𑐏𑑅 𑑋”

𑐣𑐵𑐫𑐶𑐎𑐵 𑐎𑐬𑐶𑐲𑑂𑐩𑐵 𑐩𑐵𑐣𑐣𑑂𑐢𑐬𑑄 𑐢𑐵𑑅𑐳𑐵 𑐥𑐵𑐬𑑂𑐚𑐷𑐂 𑐥𑐵𑐫𑐕𑐶𑐐𑐸 𑐠𑐵𑐫𑑂 𑐩𑐡𑐹𑐐𑐸𑐮𑐶𑑄 𑐬𑐵𑐖𑐣𑐷𑐟𑐶𑐂 𑐳𑐎𑑂𑐬𑐶𑐫 𑐎𑐠𑑄 𑐩𑐖𑐸𑐫𑐵𑐐𑐸 𑐢𑐫𑐵𑐡𑐷𑐐𑐸 𑐡𑐸 𑑋 𑐰𑐴𑐾 𑐎𑐬𑐶𑐲𑑂𑐩𑐵 𑐧𑐶𑐴𑐶𑐰𑐵𑑅 𑐳𑐵𑐬𑑂𑐰𑐖𑐣𑐶𑐎 𑐖𑐹𑐐𑐸 𑐊𑐳𑐃𑐃 𑐥𑐬𑐷𑐎𑑂𑐲𑐵𑐫𑑂 𑐧𑐷 𑐥𑑂𑐮𑐳 𑐴𑐫𑐵𑑅 𑐥𑐵𑐳 𑐖𑐹𑐐𑐸 𑐏𑑅 𑑋

𑐠𑑁𑑄 𑐱𑐸𑐎𑑂𑐬𑐰𑐵𑑅 𑐠𑑅𑐩𑑂𑐴 𑐧𑑂𑐰𑑄𑐐𑐸 𑐰 𑐊𑐳𑐃𑐃 𑐧𑑂𑐫𑐹𑐐𑐸 𑐫𑐾𑑃𑐫𑐵 𑐩𑐿𑐟𑐷𑐡𑐾𑐰𑐷𑐫𑐵 𑐟𑑂𑐬𑐶𑐰𑐾𑐞𑐷 𑐳𑐵𑐩𑐸𑐡𑐵𑐫𑐶𑐎 𑐳𑑂𑐎𑐹𑐮𑐫𑑂 𑐊𑐳𑐃𑐃 𑐥𑐵𑐳 𑐖𑐹𑐐𑐸 𑐮𑐳𑐟𑐵𑐫𑑂 𑐮𑐳𑐟𑐵 𑐎𑐵𑐮𑐧𑐶𑐮 𑐫𑐵𑐫𑐾𑐟 𑐠𑑂𑐫𑑄𑐎𑐵𑐡𑐷𑐩𑑂𑐴 𑐣𑐵𑐫𑐶𑐎𑐵 𑐎𑐬𑐶𑐲𑑂𑐩𑐵 𑐩𑐵𑐣𑐣𑑂𑐢𑐬𑑄 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑐮𑐶𑐳𑐾 𑐳𑑂𑐰𑐵𑐥𑐹 𑐳𑑂𑐫𑑄𑐐𑐸 𑐏𑑃𑐫𑐵𑐟 𑐀𑐳𑑂𑐰𑐷𑐎𑐵𑐬 𑐫𑐵𑐣𑐵𑐡𑐶𑐮 𑑋 𑐟𑐬, 𑐰𑐫𑑂𑐎𑐮𑑄 𑐢𑐫𑐵𑐡𑐷, “𑐳𑐴𑐷 𑐏𑑃 𑐳𑐴𑐷 𑐠𑐵𑐳𑐫𑑂 𑐖𑐸𑐂𑐩𑐵𑑅 𑑋 𑐳𑐴𑐷 𑐏𑑃 𑐐𑐮𑐟 𑐠𑐵𑐳𑐫𑑂 𑐖𑐸𑐮 𑐢𑐵𑑅𑐳𑐵 𑐄𑐎𑐶𑐫𑐵 𑐩𑐴𑐟𑑂𑐰 𑐡𑐂𑐩𑐏𑐸 𑑋”

𑐣𑐵𑐫𑐶𑐎𑐵 𑐩𑐵𑐣𑐣𑑂𑐢𑐬𑑄 𑐀𑐳𑐩𑑂𑐨𑐰 𑐢𑐿𑐐𑐸 𑐏𑑃 𑐕𑐸𑑄 𑐣𑑄 𑐩𑐡𑐹𑐐𑐸𑐮𑐶𑑄 𑐣𑑄 𑐠𑑅𑐩𑑂𑐴𑑄 𑐴𑐵𑐎𑐣𑑄 𑐬𑐵𑐖𑐣𑐷𑐟𑐶 𑐫𑐵𑐫𑐾𑐐𑐸 𑐏𑑃𑐫𑐵𑐟 𑐀𑐳𑑂𑐰𑐷𑐎𑐵𑐬 𑐫𑐵𑐫𑐾𑐩𑐖𑑂𑐫𑐹𑐐𑐸 𑐢𑐫𑐵𑐡𑐷𑐐𑐸 𑐡𑐸 𑑋

𑐣𑐵𑐫𑐶𑐎𑐵 𑐩𑐵𑐣𑐣𑑂𑐢𑐬𑑄 𑐠𑑅 𑐕𑐾𑑃 𑐮𑐶𑐎𑑂𑐎𑐫𑐵 𑐳𑐬𑐎𑐵𑐬𑐷 𑐎𑐮𑐾𑐖𑐫𑑂 𑐧𑑂𑐰𑐣𑐾𑐐𑐸 𑐢𑐫𑐵𑐡𑐷𑐐𑐸 𑐡𑐸 𑑋 𑐳𑐬𑐎𑐵𑐬𑐷 𑐳𑑂𑐎𑐹𑐮 𑐰 𑐎𑐮𑐾𑐖𑐫𑑂 𑐐𑐬𑐶𑐧𑐫𑐵 𑐎𑐵𑐫𑑂 𑐩𑑂𑐴𑑂𑐫𑐵𑐫𑑂 𑐖𑐎 𑐧𑑂𑐰𑐣𑐷 𑐢𑐿𑐐𑐸 𑐩𑐵𑐣𑐳𑐶𑐎𑐟𑐵 𑐡𑐹𑐐𑐸 𑐢𑐵𑐳𑐾𑑄 𑐠𑐸𑐎𑐶𑐫𑐵𑐟 𑐔𑐶𑐬𑐾𑐫𑐵𑐫𑐾𑐟 𑐣𑑄 𑐠𑑅𑐩𑑂𑐴𑑄 𑐳𑐬𑐎𑐵𑐬𑐷 𑐎𑐮𑐾𑐖 𑐮𑑂𑐫𑐫𑐵𑐐𑐸 𑐎𑐬𑐶𑐲𑑂𑐩𑐵 𑐩𑐵𑐣𑐣𑑂𑐢𑐬𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐎𑐬𑐶𑐲𑑂𑐩𑐵 𑐩𑐵𑐣𑐣𑑂𑐢𑐬𑐫𑐵𑐟 𑐀𑐢𑑂𑐫𑐫𑐣𑐫𑐵 𑐣𑐶𑐟𑐶𑑄 𑐐𑑀𑐮𑑂𑐜𑐾𑐣 𑐐𑐾𑐚𑐫𑐵 𑐱𑐶𑐎𑑂𑐲𑐎 𑐕𑐾𑑃𑐫𑑂 𑐴𑐾 𑐣𑐵𑐥𑐮𑐵𑐫𑐾𑐟 𑐣𑑄 𑐠𑑂𑐫𑑄𑐎𑐹𑐐𑐸 𑐏𑑅 𑑋 𑐟𑐬, 𑐰𑐫𑑂𑐎𑐮𑑄 𑐳𑐬𑐎𑐵𑐬𑐷 𑐎𑐮𑐾𑐖 𑐴𑐾 𑐧𑑂𑐰𑐣𑐾𑐐𑐸 𑐀𑐜𑐵𑐣 𑐎𑐫𑐵𑐡𑐷𑐐𑐸 𑐏𑑅 𑑋

𑐎𑐬𑐶𑐲𑑂𑐩𑐵 𑐩𑐵𑐣𑐣𑑂𑐢𑐬𑑄 𑐠𑑅𑐩𑑂𑐴𑑄 𑐰𑑂𑐫𑐰𑐳𑑂𑐠𑐵𑐥𑐣 𑐴𑐾 𑐧𑑂𑐰𑐣𑐾𑐐𑐸 𑐳𑑀𑐔 𑐟𑐫𑐵𑐡𑐷𑐐𑐸 𑐡𑐸𑐳𑐵 𑐠𑑅𑐐𑐸 𑐣𑐶𑐟𑐶𑑄 𑐠𑑂𑐰𑐴𑐾 𑐥𑐵𑐫𑐕𑐶 𑐖𑐹𑐐𑐸 𑐣𑑄 𑐳𑑂𑐥𑐲𑑂𑐚 𑐫𑐵𑐣𑐵𑐡𑐷𑐐𑐸 𑐡𑐸 𑑋