𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐰𑐶𑐖𑐫𑐬𑐟𑑂𑐣 | 𑑒𑑐𑑗𑑕 𑐔𑐿𑐟𑑂𑐬 𑑑𑑘, 𑐳𑑀𑐩𑐧𑐵𑐬 𑑑𑑗:𑑕𑑓:𑑑𑑗

𑐫𑐮 𑐣𑐐𑐬𑐷𑐫𑐵𑐟 𑐰𑐶𑐱𑑂𑐰 𑐎𑐮𑐵 𑐥𑐬𑐶𑐲𑐡𑑄 𑐴𑐮𑐶𑑄𑐣𑑂𑐫𑑄𑐎𑑄𑐩𑐢𑑂𑐫𑐾 ‘𑑓𑑕 𑐍𑑄 𑐎𑐮𑐵 𑐣𑐐𑐬𑐷’ 𑐑𑑀𑐲𑐞𑐵 𑐫𑐵𑑅𑐐𑐸 𑐮𑐳𑐟𑐵 𑐴𑐣𑐾𑐎𑐠𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐮𑑂𑐫𑐵𑑅 𑑑𑑖 𑐫𑐵 𑐐𑑂𑐰𑐳𑐵𑐮𑐫𑑂 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 ‘𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶 𑐩𑐴𑑀𑐟𑑂𑐳𑐰 𑑑𑑑𑑓𑑙’ 𑐁𑐂𑐟𑐰𑐵𑑅 𑐕𑐐𑐹 𑐟𑑅𑐖𑐶𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐎𑑂𑐰𑐔𑐵𑐫𑐾𑐎𑐹𑐐𑐸 𑐡𑐸 𑑋

𑐔𑐿𑐟𑑂𑐬 𑑑𑑓 𑐐𑐟𑐾𑐣𑐶𑐳𑐾𑑄 𑑑𑑗 𑐐𑐟𑐾𑐟𑐎 𑐣𑑂𑐫𑐵𑐤𑐸𑐫𑑄𑐎𑑄 𑐤𑑂𑐫𑐵𑑅𑐐𑐸 𑐄𑐐𑐸 𑐩𑐴𑑀𑐟𑑂𑐳𑐰𑐫𑑂 𑐫𑐮𑐫𑐵 𑐋𑐟𑐶𑐴𑐵𑐳𑐶𑐎 𑐰 𑐢𑐵𑐬𑑂‍𑐩𑐶𑐎 𑐩𑐴𑐟𑑂𑐰𑑄 𑐖𑐵𑐐𑐸 𑐠𑐷𑐠𑐷 𑐧𑐴𑐵𑑅 𑐔𑐸𑐎 𑐣𑐣𑐷 𑐡𑐸𑐣𑐾 𑐰 𑐥𑐶𑐣𑐾 𑐣𑑂𑐫𑑄𑐎𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐰 𑐎𑐮𑐵𑐫𑐵 𑐧𑑂𑐰𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐄𑐐𑐸 𑐩𑐴𑑀𑐟𑑂𑐳𑐰𑐫𑑂 𑐰𑐶𑐱𑐾𑐲 𑐫𑐵𑐣𑐵𑑅 𑐫𑐮𑐫𑐵 𑐮𑐵𑐫𑐎𑐹 𑐮𑐵𑐐𑐵 𑐩𑑄𑐐𑑅 𑐧𑐖𑐵𑑅, 𑐎𑐵𑐫𑐾𑐐𑐸𑐣𑐣𑐷, 𑐣𑐵𑐐𑐧𑐴𑐵𑑅, 𑐔𑐮𑑂𑐏𑐸, 𑐣𑑅𑐧𑐴𑐷 𑐮𑐐𑐵𑐫𑐟𑐫𑐵 𑐠𑐷𑐠𑐷 𑐠𑐵𑐳𑐫𑑂 𑐠𑐷𑐠𑐷 𑐎𑐠𑑄𑐫𑐵 𑐎𑐮𑐵𑐟𑑂𑐩𑐎 𑐰 𑐟𑐖𑐶𑐮𑐖𑐶𑑄 𑐖𑐵𑑅𑐐𑐸 𑐧𑑂𑐰𑐖𑑂𑐫𑐵 𑐖𑐹𑐐𑐸 𑐏𑑅𑐳𑐵 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐂𑐟𑐶𑐴𑐵𑐳𑐫𑑂 𑐣𑐵𑑄𑐖𑐵𑑅𑐪 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸𑐫𑐵 𑐧𑐵𑐏𑑄 𑐎𑑅𑐑𑐵𑐣𑐵𑑅 𑐡𑐫𑐾𑐎𑐵𑐟𑑅𑐐𑐸 ‘𑐖𑐵𑐩𑐣𑑅 𑐐𑐸𑐨𑐵𑐖𑐸’ 𑐳𑑄𑐎𑐶𑐥𑐵 𑐫𑐮𑐫𑐵 𑐀𑐱𑑀𑐎 𑐴𑐮𑐫𑑂 𑐱𑐸𑐎𑑂𑐬𑐰𑐵𑑅 𑐎𑑂𑐫𑐣𑐾𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐁𑐂𑐟𑐰𑐵𑑅 𑐫𑐮𑐫𑐵 𑐀𑐱𑑀𑐎 𑐴𑐮𑐫𑑂 𑐖𑐹𑐐𑐸 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐕𑐐𑐹 𑐑𑑀𑐲𑐞𑐵 𑐥𑑁 𑐖𑐵𑐬𑐷 𑐫𑐵𑐣𑐵𑑅 𑐫𑐮𑐫𑐵 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐥𑑂𑐬𑐟𑐶𑐧𑐡𑑂𑐢𑐟𑐵 𑐣𑑄 𑐥𑑂𑐰𑑄𑐎𑐹𑐐𑐸 𑐏𑑅 𑑋

𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂‍𑐖𑐣 𑐩𑐹𑐥𑐵𑐴𑐵𑑃 𑐎𑐠𑑄 𑐗𑐵𑐫𑐵𑐡𑐷𑐐𑐸 𑐄𑐐𑐸 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑑅 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶 𑐩𑐴𑑀𑐟𑑂𑐳𑐰 𑑑𑑑𑑓𑑙 𑐫𑐵 𑐐𑑂𑐰𑐳𑐵𑑅 𑐏𑐮𑑅 𑐎𑐖𑐶 𑐰 𑐫𑐮 𑐰𑐜𑐵 𑐮𑑂𑐫𑐵𑑅 𑑑𑑖 𑐫𑐵 𑐰𑐜𑐵𑐢𑑂𑐫𑐎𑑂𑐲 𑐣𑐶𑐬𑑂‍𑐩𑐮𑐬𑐟𑑂𑐣 𑐱𑐵𑐎𑑂𑐫𑐫𑐵 𑐳𑐨𑐵𑐣𑐵𑐫𑑅𑐳𑐸𑐂 𑐎𑑂𑐰𑐔𑐵𑑅𑐐𑐸 𑐏𑑅 𑑋