दया शाक्य, (संयोजक), विश्व नेवाः दिवस

𑐰𑐶𑐱𑑂𑐰 𑐣𑐾𑐰𑐵𑑅 𑐡𑐶𑐰𑐳 𑐰𑐵𑐳𑑂𑐟𑐰𑐫𑑂 𑐕𑐸 𑐏𑑅 ?
– 𑐰𑐶𑐱𑑂𑐰 𑐣𑐾𑐰𑐵𑑅 𑐡𑐶𑐰𑐳𑐫𑐵 𑐀𑐰𑐢𑐵𑐬𑐞𑐵 𑐰𑑄𑐐𑐸 𑐳𑐣𑑂 𑑒𑑐𑑑𑑖 𑐩𑐵𑐬𑑂‍𑐔 𑑒𑑕 𑐣𑐶𑐳𑐾𑑄 𑑒𑑗 𑐟𑐎 𑐖𑐹𑐐𑐸 𑐰𑐶𑐱𑑂𑐰 𑐣𑐾𑐰𑐵𑑅 𑐳𑑄𑐐𑐛𑐣 (𑐜𑐧𑑂𑐮𑑂𑐫𑐸𑐊𑐣𑐌)𑐫𑐵 𑐣𑐶𑐎𑑂𑐰𑑅𑐐𑐸 𑐩𑐴𑐵𑐀𑐢𑐶𑐰𑐾𑐱𑐣𑑄 𑐣𑐶𑐬𑑂‍𑐰𑐵𑐔𑐶𑐟 𑐤𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅𑐫𑐵 𑐮𑐫𑑂𑐥𑐟𑐶𑐎𑑄 𑐖𑐸𑐂𑐐𑐸 𑐩𑐸𑑃𑐖𑑂𑐫𑐵𑐫𑑂 𑐰𑐶𑐱𑑂𑐰𑐫𑑂 𑐣𑐾𑐰𑐵𑑅𑐟 𑐳𑐸 𑐏𑑅 ? 𑐢𑐎𑐵𑑅 𑐪𑐳𑐷𑐎𑐵 𑐧𑐷𑐩𑐵𑑅𑐐𑐸 𑐏𑑃 𑐤𑑂𑐫𑑅𑐣𑐾 𑐰𑑅𑐐𑐸 𑐏𑑅 𑑋 𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐰𑑄𑐐𑐸 𑑒𑑐𑑑𑑖 𑐖𑐸𑐮𑐵𑐃 𑐩𑐴𑐶𑐣𑐵𑐥𑐵𑐏𑐾 𑐔𑑂𑐰𑑄𑐐𑐸 𑐩𑐸𑑃𑐖𑑂𑐫𑐵𑑄 𑐎𑑂𑐰𑑅𑐕𑐶𑐄𑐎𑐠𑑄 𑐴𑐮𑐶𑑄 𑐣𑐾𑐰𑐵𑑅 𑐡𑐶𑐰𑐳 (World Newah Day) 𑐫𑐵 𑐴𑐮𑐶𑑄 𑐣𑐾𑐰𑐵𑑅 𑐣𑐏𑑅 𑐴𑐣𑐾𑐐𑐸 𑐑𑑀𑐲𑐞𑐵 𑐖𑐹𑐐𑐸 𑐏𑑅 𑑋 𑐠𑑂𑐰 𑐡𑐶𑐰𑐳 𑐩𑐵𑐬𑑂‍𑐔 𑐩𑐴𑐶𑐣𑐵𑐫𑐵 𑐮𑐶𑐥𑐵𑑄𑐐𑐸 𑐱𑐣𑐶𑐰𑐵𑑅 𑐡𑑃𑐫𑑂𑐡𑐳𑑄 𑐰𑐶𑐱𑑂𑐰𑐣𑑂𑐫𑑄𑐎𑑄 𑐴𑐣𑐾𑐐𑐸 𑐖𑐸𑐂 𑑋 𑐠𑐸𑐎𑐶𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐟 𑐜𑐧𑑂𑐮𑑂𑐫𑐸𑐊𑐣𑐌𑑄 𑐁𑐴𑑂𑐰𑐵𑐣 𑐣𑑄 𑐫𑐵𑑅𑐐𑐸 𑐡𑐸 𑑋

𑐕𑐵𑐫𑑂 𑐴𑐣𑐾 𑐟𑑂𑐫𑐣𑐵𑐐𑐸 ?
– 𑐠𑑂𑐰 𑐡𑐶𑐰𑐳 𑐴𑐣𑐾𑐐𑐸𑐫𑐵 𑐩𑐹 𑐁𑐖𑑂𑐖𑐸 𑐢𑐂𑐐𑐸 𑐴𑐾 𑐣𑐾𑐥𑐵𑑅 𑐡𑐾𑐫𑑂 𑐣𑐵𑐥 𑐳𑐟𑐶𑐎 𑐳𑑂𑐰𑐵𑐥𑐹 𑐡𑐸𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐰𑐶𑐱𑑂𑐰𑐫𑐵 𑐳𑐩𑑂𑐥𑐡𑐵𑐣𑐵𑐥 𑐪𑐳𑐷𑐎𑐵 𑐧𑐷𑐐𑐸 𑐏𑑅 𑑋

𑐄𑐥𑐮𑐧𑑂𑐢𑐷 𑐕𑐸 𑐖𑐸𑐂 ?
– 𑐠𑑂𑐰 𑐡𑐶𑐰𑐳 𑐴𑐣𑐵𑑅 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐎𑐸𑑄𑐎𑐸𑐮𑐵𑐩𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂 𑐣𑐵𑐐𑐬𑐶𑐎𑐫𑐵 𑐣𑐵𑑄, 𑐣𑐾𑐰𑐵𑑅 𑐪𑐳𑐷𑐎𑐵 (𑐥𑐴𑐶𑐔𑐵𑐣)𑐫𑐵𑐟 𑐮𑑂𑐫𑑄𑐎𑐵 𑐟𑐫𑐾𑐐𑐸 𑐖𑐸𑐂 𑑋 𑐠𑑁𑑄𑐎𑐤𑐫𑑂𑐫𑐵 𑐣𑐾𑐰𑐵𑑅 𑐩𑐳𑑂𑐟 𑐗𑐷𑐥𑐶𑑄 𑐣𑐾𑐰𑐵𑑅 𑐏𑑅 𑐢𑐵𑐫𑐾 𑐩𑐳𑐫𑐵 𑐰𑐣𑐵𑐔𑑂𑐰𑑄𑐐𑐸𑐫𑐵𑐟 𑐟𑐷𑐰𑑂𑐬 𑐬𑐸𑐥𑑄 𑐥𑐣𑐵𑑅 𑐤𑑂𑐫𑐮𑑄 𑐔𑐵𑐫𑐾𑐎𑐾 𑐧𑐷𑐐𑐸 𑐖𑐸𑐂 𑑋 𑐡𑐾𑐱 𑐰𑐶𑐡𑐾𑐱𑐫𑑂 𑐖𑐣𑑂𑐩 𑐖𑐸𑐫𑐵𑑅 𑐧𑑂𑐰𑐮𑑄𑐥𑐶𑑄 𑐩𑐳𑑂𑐟 𑐮𑑂𑐫𑐵𑐫𑑂𑐪 𑐮𑑂𑐫𑐵𑐳𑐾 𑐣𑐾𑐰𑐵𑑅 𑐖𑐸𑐂 𑐩𑐳𑐫𑐵 𑐰𑑅𑐐𑐸 𑐡𑐸 𑑋 𑐂𑐩𑐶𑐟 𑐤𑐹 𑐤𑐹𑐐𑐸 𑐥𑑂𑐬𑐰𑐶𑐢𑐶 𑐕𑑂𑐫𑐮𑐵𑑅 𑐠𑑅 𑐳𑐸 𑐢𑐂𑐐𑐸 𑐧𑐵𑐬𑐾 𑐱𑐶𑐎𑑂𑐲𑐵𑐡𑐷𑐎𑑂𑐲𑐵 𑐧𑐷𑐐𑐸 𑐖𑑂𑐫𑐵𑐫𑑂 𑐴𑑅𑐥𑐵𑑅 𑐧𑐷𑐐𑐸 𑐏𑑅 𑑋 𑐠𑑂𑐰 𑐴𑐵𑐎𑐣𑑄 𑐣𑐾𑐰𑐵𑑅 𑐣𑐏𑑅 𑐴𑐣𑐾𑐐𑐸𑐫𑐵 𑐧𑐶𑐳𑑂𑐎𑑄𑐐𑐸 𑐁𑐖𑑂𑐖𑐸 𑐖𑐸𑐫𑐵𑐔𑑂𑐰𑐣𑐷 𑑋

𑐣𑐾𑐰𑐵𑑅 𑐊𑐎𑐟𑐵 𑐡𑐶𑐰𑐳 𑐮𑐶𑐳𑐾 𑐠𑑂𑐰 𑐕𑐸 𑐥𑐵𑑅 ?
– 𑐣𑐾𑐰𑐵𑑅 𑐳𑐩𑐵𑐖𑐫𑑂 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐟𑑅𑐟𑐵𑐖𑐶 𑐡𑐶𑐰𑐳 𑐩𑐢𑑂𑐫𑐾 𑐳𑐣𑑂 𑑒𑑐𑑑𑑐 𑐥𑐵𑐏𑐾 𑐡𑐱𑐬𑐠 𑐬𑑄𑐐𑐱𑐵𑐮𑐵𑐫𑑂 𑐖𑐹𑐐𑐸 𑐰𑐶𑐬𑐵𑐚 𑐣𑐾𑐰𑐵𑑅 𑐩𑐸𑐣𑐵𑐫𑐵𑐟 𑐮𑐸𑐩𑑄𑐎𑐾𑐎𑐠𑑄 𑐐𑐸𑐐𑐸 𑐣𑐾𑐰𑐵𑑅 𑐊𑐎𑐟𑐵 𑐡𑐶𑐰𑐳 𑐴𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅, 𑐠𑑂𑐰𑐴𑐾 𑐊𑐎𑐟𑐵𑐫𑐵𑐟 𑐮𑐸𑐩𑑄𑐎𑐾 𑐎𑐠𑑄 𑐡𑐾𑐫𑑂 𑐟𑑂𑐰𑑅𑐟𑐵𑑅 𑐥𑐶𑐴𑐵𑑄 𑐰𑐣𑐾𑐢𑐸𑑄𑐎𑐹𑐥𑐶𑑄 𑐠𑑁𑑄 𑐠𑑅𑐥𑐶𑑄 𑐔𑑂𑐰𑑄𑐔𑑂𑐰𑐣𑐵𑐐𑐸 𑐳𑐴𑐬, 𑐡𑐾𑐱𑐫𑑂 𑐠𑐪𑑄 𑐦𑐸𑐐𑐸𑐔𑐵𑑅𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐣𑐾𑐰𑐵𑑅 𑐪𑐳𑐷𑐎𑐵 𑐳𑑂𑐠𑐵𑐣𑐷𑐫 𑐰𑐵𑐳𑐶𑐣𑑂𑐡𑐵𑐟𑐫𑑂𑐟 𑐥𑐬𑐶𑐔𑐫 𑐧𑐷𑐐𑐸 𑐰 𑐂𑐩𑐶𑐐𑐸 𑐖𑑂𑐘𑐵𑐣𑐫𑐵 𑐨𑐞𑑂𑐜𑐵𑐬𑐫𑑂 𑐣𑐾𑐰𑐵𑑅 𑐳𑐨𑑂𑐫𑐟𑐵 𑐡𑐸𑐎𑐵𑐫𑐾𑐐𑐸𑐎𑐠𑑄 𑐠𑑂𑐰 𑐰𑐶𑐱𑑂𑐰 𑐣𑐾𑐰𑐵𑑅 𑐡𑐶𑐰𑐳 𑐴𑐣𑐾𑐐𑐸 𑐖𑐸𑐂 𑑋 𑐰𑐶𑐱𑑂𑐰𑐫𑑂 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐳𑐨𑑂𑐫𑐟𑐵 𑐩𑐢𑑂𑐫𑐾 𑐣𑐾𑐰𑐵𑑅 𑐳𑐨𑑂𑐫𑐟𑐵 𑐣𑑄 𑐕𑐐𑐹 𑐏𑑅 𑐢𑐎𑐵𑑅 𑐪𑐳𑐷𑐎𑐾 𑐧𑐷𑐐𑐸 𑐖𑑂𑐫𑐵𑐫𑑂 𑐠𑑂𑐰 𑐡𑐶𑐰𑐳 𑐴𑐣𑐵𑐫𑐵 𑐮𑐶𑐔𑑂𑐰𑑅 𑐖𑐸𑐂𑐦𑐸 𑑋

𑐡𑐶𑐰𑐳 𑐴𑐣𑐾𑐐𑐸 𑐟𑐫𑐵𑐬𑐷 𑐐𑐠𑐾 𑐖𑐸𑐫𑐵𑐔𑑂𑐰𑐣 ?
– 𑐟𑐫𑐵𑐬𑐷𑐫𑐵 𑐗𑑂𑐰𑐮𑐫𑑂 𑐀𑐎𑑂𑐚𑑀𑐧𑐬𑐥𑐵𑐏𑐾 𑐰𑐶𑐖𑑂𑐘𑐥𑑂𑐟𑐶 𑐥𑐶𑐎𑐫𑐵𑑅 𑐳𑐩𑑂𑐩𑐾𑐮𑐣𑐫𑐵 𑐩𑐹 𑐁𑐖𑑂𑐖𑐸 𑐟𑐵𑑅𑐮𑐵𑐎𑐾𑐟 𑐕𑐐𑐹 𑐳𑐩𑑂𑐩𑐾𑐮𑐣 𑐫𑐵𑐫𑐾𑐐𑐸 𑐟𑐵𑐟𑐸𑐣𑐵𑑅 𑐩𑐵𑐬𑑂‍𑐔 𑑓𑑐–𑑓𑑑 𑐣𑐶𑐤𑐸𑐫𑑄𑐎𑑄 𑐖𑐹𑐐𑐸 𑐏𑑃 𑐥𑐶𑐟 𑐧𑐷𑐢𑐸𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵𑐟 𑐮𑑂𑐰𑑅𑐐𑐸 𑐖𑑂𑐫𑐵𑐥𑑁 𑐤𑑂𑐫𑐧𑑂𑐰𑐫𑐾𑐟 𑐣𑑀𑐨𑐾𑐩𑑂𑐧𑐬 𑑓 𑐟𑐵𑐬𑐶𑐏 𑐟𑐎𑐫𑐵 𑐡𑐸𑐣𑐾 𑐩𑐹𑐟𑐶÷𑐳𑐵𑐬𑐕𑑂𑐰𑐫𑐵 𑐴𑐫𑐾𑐟 𑐂𑐣𑐵𑐥 𑐫𑐵𑐣𑐵𑐎𑐠𑑄 𑐁𑑅𑐟𑐎𑐫𑐵 𑐡𑐸𑐣𑐾 𑑒𑑐 𑐐𑐹 𑐡𑐸𑐟𑐶𑐣𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐀𑐮𑐾 𑐰𑑄𑐐𑐸 𑐖𑐣𑐰𑐬𑐷𑐫𑐵 𑑑 𑐟𑐵𑐬𑐶𑐏 𑐟𑐎𑐫𑐵 𑐡𑐸𑐣𑐾 𑐩𑐹𑐟𑐶 𑐥𑑁 𑐳𑑂𑐰𑐷𑐎𑐺𑐟𑐶 𑐖𑐹𑐐𑐸 𑐳𑐸𑐔𑑄 𑐳𑐎𑐳𑐶𑐟𑑄 𑐧𑐷 𑐢𑐸𑑄𑐎𑐹𑐐𑐸 𑐡𑐸 𑑋 𑐁𑑅 𑑓𑑑 𑐟𑐵𑐬𑐶𑐏 𑐟𑐎𑐫𑐵 𑐡𑐸𑐣𑐾 𑐖𑑂𑐫𑐵𑐥𑑁 𑐠𑑂𑐫𑑄𑐎𑐾𑐩𑐵𑑅𑐐𑐸 𑐳𑐸𑐔𑑄 𑐣𑑄 𑐧𑐷 𑐢𑐸𑑄𑐎𑐹𑐐𑐸 𑐡𑐸 𑑋 𑐂𑐩𑐶𑐳𑑄 𑐖𑑂𑐫𑐵𑐥𑑁 𑐕𑑂𑐰𑐫𑐵 𑐴𑐫𑐵𑑅 𑐳𑐩𑑂𑐩𑐾𑐮𑐣𑐫𑑂 𑐤𑑂𑐫𑐧𑑂𑐰𑐫𑐾𑐟 𑑒𑑐 𑐩𑐶𑐣𑐾𑐚 𑐃 𑐧𑐶𑐫𑐵𑑅 𑐤𑐵𑐥𑐵𑑄 𑐧𑑂𑐰𑐣𑐾𑐩𑐵𑑅𑐐𑐸 𑐏𑑃 𑐳𑐸𑐔𑑄 𑐦𑐸𑐎𑑂𑐎𑑄 𑐧𑐷𑐢𑐸𑑄𑐎𑐹𑐐𑐸 𑐡𑐸 𑑋 𑐡𑐸𑐴𑐵𑑄 𑐰𑑅𑐐𑐸 𑐖𑑂𑐫𑐵𑐥𑑁 𑐣𑐾𑐰𑐵𑑅 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶, 𑐎𑐮𑐵, 𑐳𑐵𑐴𑐶𑐟𑑂𑐫, 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮, 𑐥𑐟𑑂𑐬𑐎𑐵𑐬𑐶𑐟𑐵, 𑐳𑑄𑐎𑐶𑐥𑐵, 𑐥𑐴𑐶𑐔𑐵𑐣, 𑐨𑐵𑐫𑑂 𑐳𑑂𑐫𑐣𑐾𑐐𑐸, 𑐬𑐵𑐖𑐣𑐷𑐟𑐶 𑐁𑐡𑐶 𑐁𑐡𑐶 𑐰𑐶𑐲𑐫𑐫𑐵𑐟 𑐎𑑅𑐑𑐵𑐣𑐵𑑅 𑐖𑑂𑐫𑐵𑐥𑑁 𑐤𑑂𑐫𑐧𑑂𑐰𑐫𑐾𑐩𑐵𑑅𑐐𑐸 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐡𑐸 𑑋
𑐳𑐩𑑂𑐩𑐾𑐮𑐣 𑐖𑐸𑐂𑐐𑐸 𑐠𑐵𑐫𑑂 𑐮𑑂𑐫𑐫𑐾𑐐𑐸 𑐳𑐶𑐢𑐫𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐩𑐹𑐥𑐵𑐴𑐵𑑄, 𑐩𑐹 𑐣𑑂𑐰𑐔𑐸 𑐧𑐷𑐪 𑐮𑑂𑐫𑐫𑐾 𑐩𑐵𑐣𑐶 𑑋 𑐃 𑐳𑐟𑐶𑐣𑐵 𑐰𑑅𑐮𑐶𑐳𑐾 𑐖𑑂𑐫𑐵 𑐟𑐶𑐥𑑂𑐫𑐣𑐵 𑐰𑐣𑐷 𑐢𑐎𑐵𑑅 𑐰𑐶𑐱𑑂𑐰𑐵𑐳 𑐎𑐫𑐵 𑑋 𑐠𑑂𑐰 𑐖𑑂𑐫𑐵 𑐩𑐸𑐎𑑂𑐎𑑄 𑐟𑐵𑑅𑐮𑐵𑐎𑐾𑐟 𑐐𑐸𑐪 𑐡𑐸𑐖𑑅 𑐡𑐸𑐐𑐸 𑐕𑐐𑐹 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐣𑐷𑐳𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐳𑑄𑐫𑑀𑐖𑐎 𑐜𑐧𑑂𑐮𑑂𑐫𑐸𑐊𑐣𑐌𑐫𑐵 𑐰𑐬𑐶𑐲𑑂𑐛 𑐣𑑂𑐰𑐎𑐸 𑐡𑐫𑐵𑐬𑐟𑑂𑐣 𑐱𑐵𑐎𑑂𑐫𑐫𑐵𑐟 𑐮𑑂𑐫𑑅𑐐𑐸 𑐡𑐸 𑑋 𑐡𑐸𑐖𑐮𑐫𑑂 𑐜𑐵. 𑐣𑐵𑐬𑐵𑐫𑐞 𑐬𑐵𑐖𑐨𑐞𑑂𑐜𑐵𑐬𑐷 (𑐀𑐩𑐾𑐬𑐶𑐎𑐵), 𑐳𑑄𑐫𑐸𑐎𑑂𑐟 𑐱𑑂𑐬𑐾𑐲𑑂𑐛 (𑐫𑐸𑐎𑐾), 𑐎𑐺𑐲𑑂𑐞 𑐔𑐏𑐸𑑄 (𑐧𑐜𑑂𑐜𑐮𑐵𑐡𑐾𑐱), 𑐬𑐱𑑂𑐩𑐶𑐮𑐵 𑐥𑑂𑐬𑐖𑐵𑐥𑐟𑐶 (𑐣𑐾𑐥𑐵𑑅), 𑐱𑐵𑐎𑑂𑐫 𑐳𑐸𑐬𑐾𑐣 (𑐣𑐾𑐥𑐵𑑅), 𑐀𑐣𑐵𑐬 𑐰𑐖𑑂𑐬𑐵𑐔𑐵𑐬𑑂‍𑐫 (𑐣𑐾𑐥𑐵𑑅), 𑐱𑑂𑐬𑐷𑐖𑐣𑐵 𑐥𑑂𑐬𑐢𑐵𑐣 (𑐣𑐾𑐥𑐵𑑅), 𑐎𑐶𑐬𑐞𑐎𑐾𑐣 𑐬𑑄𑐖𑐶𑐟 (𑐣𑐾𑐥𑐵𑑅) 𑐰 𑐰𑐶𑐩𑐮𑐩𑐵𑐣 𑐱𑑂𑐬𑐾𑐲𑑂𑐛 (𑐎𑑂𑐫𑐵𑐣𑐜𑐵) 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐕𑐸 𑐕𑐸 𑐖𑐸𑐂 ?
– 𑐤𑐵𑐥𑐵𑑄𑐐𑐸 𑐤𑐶𑐫𑐵 𑐖𑑂𑐫𑐵𑐗𑑂𑐰𑑅 𑐄𑐮𑐾𑐖𑑂𑐫𑐵 𑐳𑐸𑐠𑐳𑐶𑐫𑐵 𑑑𑑒 𑐟𑐵𑑅 𑐟𑐎𑐫𑐵 𑐡𑐸𑐣𑐾 𑐳𑐶𑐢𑐫𑐾𑐎𑐾𑐐𑐸 𑑋 𑐖𑑂𑐫𑑅𑐣𑐵𑑅 𑐢𑐸𑑄𑐎𑐵𑑅 𑐤𑐶𑐕𑐶𑐫𑑄𑐎𑑄 𑐖𑑂𑐫𑐵𑐥𑑁 𑐤𑑂𑐫𑐧𑑂𑐰𑐫𑐾𑐐𑐸 𑐀𑐮𑐾 𑐟𑐸𑐔𑑂𑐔𑐵 𑐫𑐵𑐣𑐵𑑅 𑐎𑑂𑐰𑐔𑐵𑐫𑐾𑐎𑐾𑐐𑐸 𑑋 𑐣𑐶𑐤𑐸𑐫𑐵 𑐤𑐶𑐎𑐸𑐤𑐸 𑐳𑐸𑐠𑑄𑐣𑐶𑐳𑐾𑑄 𑐖𑑂𑐫𑐵𑐥𑑁 𑐤𑑂𑐫𑐧𑑂𑐰𑐫𑐾𑐐𑐸 𑐰 𑐰𑐶𑐳𑑂𑐟𑐺𑐟 𑐳𑐴𑐮𑐴 𑐫𑐵𑐣𑐵𑑅 𑐣𑐾𑐰𑐵𑑅 𑐡𑐶𑐰𑐳𑐫𑐵𑐟 𑐟𑐶𑐧𑑅 𑐧𑐷𑐐𑐸, 𑐧𑐴𑐣𑐷 𑐣𑐾𑐰𑐵𑑅 𑐨𑑂𑐰𑐫𑑂 𑐫𑐵𑐫𑐾𑐐𑐸 𑑋 𑐄𑐎𑐷 𑐐𑐣𑑂𑐫𑐩𑐵𑐣𑑂𑐫𑐥𑐶𑑄 𑐥𑐵𑐴𑐵𑑄𑐎𑐠𑑄 𑐳𑑅𑐟𑐾𑐐𑐸 𑐖𑐸𑐂 𑑋 𑐕𑐐𑐹 𑐰𑐶𑐱𑐾𑐲 𑐎𑐠𑑄𑐫𑐵 𑐣𑐾𑐰𑐵𑑅 𑐣𑐏𑑅 𑐴𑐣𑐵𑑅 𑐣𑐾𑐰𑐵𑑅 𑐪𑐳𑐷𑐎𑐵 𑐣𑐵𑐥𑑄 𑐣𑐾𑐰𑐵𑑅 𑐳𑐨𑑂𑐫𑐟𑐵𑐫𑐵𑐟 𑐟𑐶𑐧𑑅 𑐖𑐸𑐂𑐎𑐠𑑄 𑐰𑐶𑐱𑑂𑐰𑐫𑑂 𑐁𑐴𑑂𑐰𑐵𑐣 𑐫𑐵𑐫𑐾𑐐𑐸 𑐖𑐸𑐂 𑑋

𑐐𑐸𑐮𑐶 𑐩𑐣𑐸𑐏𑑄 𑐧𑑂𑐰𑐟𑐶 𑐎𑐵𑐂 ? 𑐐𑐣 𑐐𑐣 𑐡𑐾𑐱𑑄 𑐰𑐂 ?
– 𑐣𑐶𑐳𑑅𑐟𑐶 𑐩𑐣𑐹𑐟𑐫𑑂𑐳𑑄 𑐧𑑂𑐰𑐟𑐶 𑐎𑐵𑐂𑐐𑐸 𑐁𑑅𑐟𑐎𑐫𑐵 𑐀𑐣𑐸𑐩𑐵𑐣 𑐡𑐸 𑑋 𑐁𑑅𑐟𑐎𑐫𑐵 𑐡𑐸𑐣𑐾 𑐀𑐩𑐾𑐬𑐶𑐎𑐵, 𑐫𑐸𑐎𑐾, 𑐎𑑂𑐫𑐵𑐣𑐵𑐜𑐵, 𑐖𑐵𑐥𑐵𑐣, 𑐨𑐵𑐬𑐟, 𑐠𑐵𑐂𑐮𑑂𑐫𑐵𑐞𑑂𑐜, 𑐳𑑄𑐫𑐸𑐎𑑂𑐟 𑐀𑐬𑐧 𑐂𑐩𑐶𑐬𑐾𑐚𑑂𑐳, 𑐎𑐟𑐵𑐬, 𑐴𑐒𑐎𑐒 𑐁𑐡𑐶 𑐡𑐾𑐱𑑄 𑐧𑑂𑐰𑐟𑐶 𑐎𑐵𑐂𑐐𑐸 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐣𑐾𑐥𑐵𑐮𑑄 𑐣𑑄 𑐠𑐷𑐠𑐷 𑐳𑑄𑐑𑐳𑑄𑐳𑑂𑐠𑐵𑐫𑐵 𑐥𑑂𑐬𑐟𑐶𑐣𑐶𑐢𑐶𑑄 𑐧𑑂𑐰𑐟𑐶 𑐎𑐵𑐂 𑑋

𑐖𑑂𑐫𑐵𑐥𑑁 𑐕𑐸 𑐕𑐸 𑐰𑐂 ?
– 𑐖𑑂𑐫𑐵𑐥𑑁𑐫𑐵 𑐰𑐶𑐲𑐫𑐳 𑐖𑐶𑑄 𑐔𑑂𑐰𑐫𑑂 𑐴𑐾 𑐤𑑂𑐫𑐠𑐣𑐾 𑐢𑐸𑑄𑐐𑐸 𑐡𑐸 𑑋 𑐄𑐎𑐶𑑄 𑐠𑑂𑐰 𑐳𑐩𑑂𑐧𑐣𑑂𑐢𑐫𑑂 𑐩𑐾𑐐𑐸 𑐢𑐫𑐵𑐔𑑂𑐰𑐣𑐾 𑐩𑐵𑐮𑐷 𑐩𑐏𑐸 𑑋

𑐠𑐸𑐎𑐷 𑐣𑐥𑐵𑑅𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐐𑐸𑐎𑐠𑑄 𑐧𑑂𑐰𑐟𑐶 𑐎𑐵𑐫𑐾𑐦𑐂 ?
– 𑐠𑐸𑐎𑐷 𑐧𑑂𑐰𑐟𑐶 𑐎𑐵𑐫𑐾𑐟 ‘𑐌𑐥𑐣 𑐚𑐸 𑐀𑐮 𑐬𑐾𑐖𑐶𑐲𑑂𑐚𑑂𑐬𑐾𑐱𑐣 𑐦𑐷’ 𑐥𑐸𑐮𑐵𑑅 𑐧𑑂𑐰𑐟𑐶 𑐎𑐵𑐫𑐾 𑐦𑐂 𑑋 𑐬𑐾𑐖𑐶𑐲𑑂𑐚𑑂𑐬𑐾𑐱𑐣𑐫𑑂 𑐣𑐶𑐱𑑂𑐔𑐶𑐟 𑐀𑐰𑐢𑐶 𑐟𑑀𑐎𑐾 𑐫𑐵𑐣𑐵𑑅 𑐜𑐶𑐳𑑂𑐎𑐵𑐄𑐣𑑂𑐚 𑐬𑐾𑐚 𑐣𑑄 𑐟𑐫𑐵𑐟𑑅𑐐𑐸 𑐡𑐂 𑑋 𑐀𑐣𑐮𑐵𑐂𑐣 𑐩𑐵𑐬𑑂‍𑐦𑐟 𑐬𑐖𑐶𑐲𑑂𑐚𑑂𑐬𑐾𑐱𑐣 𑐦𑐵𑐬𑐵𑐩 𑐨𑐬𑐾 𑐫𑐵𑐫𑐾 𑐦𑐂 𑑋

𑐕𑐸𑑄 𑐳𑐵𑐬𑑂‍𑐰𑐖𑐣𑐶𑐎 𑐁𑐰𑑂𑐴𑐵𑐣 𑐫𑐵𑐫𑐾 𑐩𑐵𑑅𑐐𑐸 𑐡𑐸 𑐎𑐶 ?
– 𑐗𑐷 𑐳𑐎𑐮𑐾𑑄 𑐖𑐵𑐣𑐵𑑅 ‘𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐡𑐶𑐰𑐳’ 𑐳𑐦𑐮 𑐫𑐵𑐫𑐾 𑐣𑐸 𑑋 𑐠𑑂𑐰 𑐕𑐐𑐹 𑐰𑐶𑐱𑐸𑐡𑑂𑐢 𑐥𑑂𑐬𑐵𑐖𑑂𑐘𑐶𑐎 𑐳𑐩𑑂𑐩𑐾𑐮𑐣 𑐖𑐸𑐂 𑑋