𑐫𑐾𑑃 – 𑐴𑐮𑐶𑑄 𑐣𑐾𑐰𑐵𑑅 𑐐𑐸𑐠𑐶𑐫𑐵 𑐐𑑂𑐰𑐳𑐵𑐮𑐫𑑂 𑐕𑐰𑐵:𑐫𑑄𑐎𑑄 𑐖𑐹𑐐𑐸 𑐕𑐣𑑂𑐡𑐧𑐡𑑂𑐢 𑐔𑐶𑐣𑐵𑐏𑑃 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐎𑑂𑐰𑐔𑐵𑑅𑐐𑐸 𑐡𑐸 𑑋 𑐰𑑄𑐐𑐸 𑐨𑐡𑑁 𑑑𑑙 𑐐𑐟𑐾𑐣𑐶𑐳𑐾𑑄 𑑒𑑕 𑐐𑐟𑐾 𑐟𑐎 𑐖𑐸𑐩𑐥𑐵𑐏𑐾𑑄 𑐕𑐰𑐵:𑐫𑑄𑐎𑑄 𑐕𑐣𑑂𑐡𑐧𑐡𑑂𑐢 𑐔𑐶𑐣𑐵𑐏𑑃 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐏𑑅 𑑋 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑐮𑐫𑑂 𑐮𑑀𑐎𑐎𑐰𑐶 𑐬𑐵𑐖𑐨𑐵𑐃 𑐖𑐎𑑅𑐩𑐶𑑄 𑐟𑐵𑐮𑐶𑐩 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐱𑐣𑐶𑐰𑐵𑑅 𑐀𑐳𑑀𑐖 𑑑𑑐 𑐐𑐟𑐾 𑐕𑐐𑐹 𑐍𑐥𑐔𑐵𑐬𑐶𑐎 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐳𑐩𑐵𑐥𑐣 𑐖𑐹𑐐𑐸 𑐏𑑅 𑑋 𑐴𑐮𑐶𑑄 𑐣𑐾𑐰𑐵𑑅 𑐐𑐸𑐠𑐶𑐫𑐵 𑐳𑑄𑐬𑐎𑑂𑐲𑐎 𑐱𑐵𑐣𑑂𑐟 𑐥𑑂𑐬𑐎𑐵𑐱 𑐱𑑂𑐬𑐾𑐲𑑂𑐛𑐫𑐵 𑐣𑐵𑐫𑑅𑐳𑐸𑐂 𑐖𑐹𑐐𑐸 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛 𑐩𑐹𑐥𑐵𑐴𑐵𑑄 𑐰 𑐰𑐶𑐱𑐾𑐲𑐥𑐵𑐴𑐵𑑄 𑐎𑐠𑑄 𑐠𑑁𑑄𑐎𑐣𑑂𑐴𑐫𑑂 𑐬𑐸𑐳𑐫𑑂 𑐔𑑂𑐰𑐣𑐵𑐡𑐷𑐩𑑂𑐴 𑐧𑐬𑐶𑐲𑑂𑐛 𑐳𑐵𑐴𑐶𑐟𑑂𑐫𑐎𑐵𑐬 𑐎𑐺𑐲𑑂𑐞𑐥𑑂𑐬𑐎𑐵𑐱 𑐱𑑂𑐬𑐾𑐲𑑂𑐛𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋 𑐄𑐐𑐸 𑐟𑐵𑐮𑐶𑐩𑐫𑑂 𑐀𑐩𑐾𑐬𑐶𑐎𑐵, 𑐨𑐵𑐬𑐟, 𑐖𑐵𑐥𑐵𑐣, 𑐂𑐖𑐬𑐵𑐫𑐮, 𑐂𑐒𑐮𑑂𑐫𑐵𑐞𑑂𑐜 𑐮𑐐𑐵𑐫𑐟 𑐣𑐷𑐣𑑂𑐴𑑂𑐫𑐩𑑂𑐴𑐳𑐶𑐣𑑄 𑐳𑐎𑑂𑐬𑐶𑐫 𑐬𑐸𑐥𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋

𑐀𑐠𑐾𑐴𑐾 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐎 𑐬𑐵𑐖𑐨𑐵𑐃 𑐖𑐎𑑅𑐩𑐶𑐫𑐵 𑐀𑐥𑑂𑐬𑐎𑐵𑐱𑐶𑐟 𑐳𑐦𑐹 ‘𑐥𑐸𑐬𑑂𑐏𑐵𑐫𑐵 𑐥𑐮𑐵𑑅 𑐏𑑂𑐰𑐵𑐫ॅ𑑄’ 𑐡𑐸𑐣𑐾 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑑒𑑗 𑐩𑑂𑐴 𑐣𑐾𑐰𑐵𑑅 𑐩𑐴𑐵𑐬𑐠𑐶 𑐥𑐸𑐬𑑂𑐏𑐵𑐥𑐶𑐣𑐶𑐐𑐸 𑐰𑑂𑐫𑐎𑑂𑐟𑐶𑐟𑑂𑐰 𑐥𑐶𑐧𑑂𑐰𑐫𑐾𑐐𑐸 𑐎𑐠𑑄𑐫𑐵 𑐣𑐷𑐣𑑂𑐴𑐫𑑂𑐥𑐸 𑐔𑐶𑐣𑐵𑐏𑑃 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂𑐳𑑄 𑐕𑐣𑑂𑐡𑐧𑐡𑑂𑐢 𑐬𑐸𑐥𑑄 𑐕𑐥𑐸-𑐕𑐥𑐸 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐾𑐲𑐥𑐵𑐴𑐵𑑄 𑐳𑐵𑐴𑐶𑐟𑑂𑐫𑐎𑐵𑐬 𑐱𑑂𑐬𑐾𑐲𑑂𑐛𑑄 𑐥𑑂𑐬𑐱𑐶𑐎𑑂𑐲𑐎 𑐖𑐎𑑅𑐩𑐶𑐫𑐵 𑐄𑐐𑐸 𑐳𑐦𑐹𑐫𑐵𑐟 𑐬𑐸𑐳𑐷 𑐨𑐵𑐲𑐵𑑄 𑐀𑐣𑐸𑐰𑐵𑐡 𑐫𑐵𑐣𑐵𑑅 𑐥𑐶𑐎𑐵𑐫𑐾𑐐𑐸 𑐧𑐔𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑑄𑐰𑐵𑐳𑐾𑑄 𑐥𑑂𑐬𑐱𑐶𑐎𑑂𑐲𑐎 𑐖𑐎𑑅𑐩𑐶𑑄 𑐕𑐣𑑂𑐡 𑐱𑐵𑐳𑑂𑐟𑑂𑐬 𑐢𑐂𑐐𑐸 𑐳𑐩𑐵𑐖𑐫𑐵 𑐱𑐵𑐳𑑂𑐟𑑂𑐬𑐷𑐫 𑐱𑐎𑑂𑐟𑐶 𑐏𑑅 𑐢𑐫𑐵𑐡𑐶𑐳𑐾𑑄 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵𑐟 𑐴𑐳𑑂𑐟𑐵𑐣𑑂𑐟𑐬𑐞 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐀𑐮𑐾 𑐠𑐸𑐐𑐸 𑐀𑐨𑐶𑐫𑐵𑐣𑐫𑐵𑐟 𑐩𑐡𑐶𑐎𑑂𑐎 𑐣𑑂𑐴𑑂𑐫𑐵𑐎𑐵 𑐰𑐣𑐾𑐐𑐸 𑐏𑑃 𑐎𑐣𑐵𑐡𑐶𑐮 𑑋