–𑐬𑐵𑐖 𑐩𑐴𑐬𑑂𑐖𑐣
𑐥𑑂𑐬𑐵𑐞𑐩𑐵𑐫𑐵 𑐠𑑅 𑐨𑐵𑑅𑐟 𑐟𑐔𑑂𑐰𑐫𑑂𑐎 𑐩𑑂𑐴 𑐩𑐦𑐫𑐵 𑐴𑐳𑑂𑐥𑐶𑐟𑐮𑐫𑑂 𑐴𑐫𑐾𑐩𑐵𑑅𑐧𑐮𑐾 𑐟𑐎 𑐣𑑄 𑐠𑑅𑐩𑑂𑐴𑑄 𑐕𑐾𑑃 𑐣𑑄 𑐥𑐶𑐟𑐶𑐣𑐵𑐩𑑂𑐴 𑐎𑐵𑐫𑑂 𑐬𑐵𑐖𑐾𑐱𑐫𑐵𑐟 𑐳𑐟𑐎𑐾 𑐩𑐕𑑂𑐰 𑑋 𑐥𑑂𑐬𑐵𑐞𑐩𑐵𑐫𑐵𑐫𑐵 𑐡𑐟𑐦𑐟 𑐕𑐩𑑂𑐴 𑐴𑐾 𑐖𑐎 𑐎𑐵𑐫𑑂 𑐬𑐵𑐖𑐾𑐱 𑑋 𑐟𑐬 𑐬𑐵𑐖𑐾𑐱𑑄 𑐠𑑅𑐐𑐸 𑐳𑐶𑐧𑐾𑑄 𑐎𑑂𑐰𑐫𑑂 𑐖𑐵𑐟𑐫𑐵𑐩𑑂𑐴 𑐩𑐶𑐳𑐵 𑐧𑑂𑐫𑐵𑐴𑐵 𑐫𑐵𑐫𑐾𑐐𑐸 𑐢𑐶𑐥𑐶 𑐎𑑂𑐫𑑄𑐧𑐮𑐾 𑐥𑑂𑐬𑐵𑐞𑐩𑐵𑐫𑐵𑑄 𑐫𑐵𑐄𑐎 𑐎𑐵𑐫𑑂𑐫𑐵𑐟 𑐴𑐵𑐎𑐸𑐟𑐶𑐣𑐵 𑐕𑑂𑐰𑐟 𑑋 𑐥𑑂𑐬𑐵𑐞𑐩𑐵𑐫𑐵𑐫𑐵 𑐴𑐿𑐎𑐩 𑐎𑐜𑐵 𑐴𑐾 𑐢𑐵𑐫𑐾𑐩𑐵𑐮𑐶𑐂, 𑐄𑐫𑐵 𑐨𑐵𑑅𑐟, 𑐠𑑅𑐠𑐶𑐟𑐶 𑐳𑐸𑐣𑐵𑑄 𑐏𑑃 𑐠𑐸𑐂𑐎𑐾 𑐴𑐾 𑐦𑐸𑐐𑐸 𑐩𑐏𑐸 𑑋
𑐠𑑁𑑄𑐎𑐣𑑂𑐴𑐫𑑂 𑐖𑐵𑐟𑐥𑐵𑐟𑐫𑐵 𑐏𑑃 𑐮𑑂𑐴𑐵𑐣𑐵𑐔𑑂𑐰𑐣𑐵 𑐩𑐮𑐵𑑅 𑐢𑐎𑐵𑑅 𑐫𑐎𑑂𑐰𑐳𑑂𑐫𑐵𑑄 𑐠𑐸𑐂𑐎𑐾𑐟 𑐳𑑂𑐰𑐮, 𑐟𑐬 𑐏𑑃 𑐠𑐸𑐂𑐎𑐾𑐟 𑐳𑑂𑐰𑐥𑐶𑑄 𑐴𑐾 𑐥𑑂𑐬𑐵𑐞𑐩𑐵𑐫𑐵𑐫𑐵 𑐩𑐶𑐏𑐵𑐫𑐵 𑐢𑐹 𑐠𑐾𑑄 𑐖𑐸𑐫𑐵 𑐰𑐶𑐂𑐐𑐸 𑑋 𑐖𑐵𑐟𑐥𑐵𑐟𑐫𑐵 𑐏𑑃𑐫𑑂 𑐟𑐳𑐎𑑄 𑐀𑐧𑑂𑐫𑐰𑐴𑐵𑐬𑐶𑐎 𑐎𑐠𑑄 𑐴𑐾 𑐎𑐜𑐵 𑑋 𑐠𑑅𑐐𑐸 𑐣𑐶𑐬𑑂𑐞𑐫𑐏𑐫𑑂 𑐮𑑂𑐰𑐴𑑄𑐫𑐵 𑐥𑐬𑑂𑐰 𑐠𑐾𑑄 𑐀𑐰𑐶𑐔𑐮𑐶𑐟 𑑋 𑐟𑐬 𑐠𑑁𑑄 𑐨𑐵𑑅𑐟 𑐩𑑂𑐴 𑐩𑐦𑐫𑐵𑑅 𑐴𑐳𑑂𑐥𑐶𑐟𑐮 𑐴𑐫𑐾 𑐩𑐵𑑅𑐧𑐮𑐾 𑐟𑐳𑐎 𑐁𑐟𑐾 𑐔𑐵𑑅𑐐𑐸 𑐏𑐣𑐾𑐡𑐫𑐵𑐔𑑂𑐰𑐣 𑑋 𑐁𑐟𑐾 𑐔𑐵𑐫𑐾 𑐣𑑄 𑐮𑐵 𑐩𑐵𑐮 𑐟𑐸𑐬𑐸𑐣𑑂𑐟 𑐴𑐶𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐩𑐶𑐳𑐵 𑐖𑐵𑐟𑐫𑐵𑐟 𑐀𑐥𑐸𑐐𑐸 𑐣𑑄 𑐮𑐵 𑐩𑐏𑐸𑐟 𑑋 𑐬𑐵𑐖𑐾𑐱𑐫𑐵 𑐜𑐵𑐎𑑂𑐚𑐬 𑐥𑐵𑐳𑐵 𑐀𑐣 𑐴𑐾 𑐴𑐳𑑂𑐥𑐶𑐟𑐮𑐫𑑂 𑐡𑐸𑐐𑐸𑐮𑐶𑑄 𑐣𑑄 𑐐𑐵𑐎𑑂𑐎 𑐴𑐾 𑐀𑐥𑐸𑐮 𑑋 𑐣𑑂𑐫𑐵𑐐𑐸 𑐣𑑂𑐫𑐵𑐐𑐸 𑐥𑐶𑐣𑑂𑐟 𑐩𑐕𑐶 𑐴𑐶 𑐩𑐵𑑅𑐐𑐸 𑐬𑐵𑐖𑐾𑐱𑐫𑐵 𑐜𑐵𑐎𑑂𑐚𑐬 𑐥𑐵𑐳𑐵𑑄 𑐴𑐳𑑂𑐥𑐶𑐟𑐮𑐫𑐵 𑐳𑑂𑐚𑐵𑐦𑐟𑐫𑑂𑐐𑐸 𑐥𑐵𑐏𑐾𑑄 𑐴𑐾 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐧𑑂𑐫𑐹𑐐𑐸𑐮𑐶𑑄 𑐫𑐎𑑂𑐰 𑐠𑐸𑐏𑐾𑐬 𑐄𑐏𑐾𑐬 𑐧𑑂𑐰𑐵𑑃𑐫𑑂 𑐣𑑄 𑐖𑐸𑐂𑐩𑑂𑐰𑐵𑐮 𑑋
𑐨𑐵𑑅𑐟𑐫𑐵 𑐮𑑂𑐰𑐫𑑂 𑐎𑑂𑐰𑐮𑐵𑐣𑐵𑑅 𑐴𑐳𑑂𑐥𑐶𑐟𑐮𑑄 𑐜𑐶𑐳𑑂𑐔𑐵𑐬𑑂𑐖 𑐖𑐸𑐂𑐐𑐸 𑐃 𑐰𑐮 𑑋 𑐥𑑂𑐬𑐵𑐞𑐩𑐵𑐫𑐵𑐫𑐵 𑐎𑐺𑐟𑐖𑑂𑐘𑐟𑐵 𑐢𑐵𑑅𑐳𑐵 𑐬𑐵𑐖𑐾𑐱𑐫𑐵 𑐜𑐵𑐎𑑂𑐚𑐬 𑐥𑐵𑐳𑐵𑐥𑑂𑐬𑐟𑐶 𑐰𑐶𑐮𑐶𑐰𑐶𑐮𑐶 𑐴𑐾 𑐖𑐵𑐫𑐵𑐰𑑅𑐐𑐸 𑐏𑐣𑐾𑐡𑐟 𑑋 𑐜𑐶𑐳𑑂𑐔𑐵𑐬𑑂𑐖𑐫𑐵 𑐣𑑂𑐴𑑂𑐫𑑀 𑐴𑐶 𑐧𑑂𑐫𑐸𑐥𑐶𑐣𑑂𑐟 𑐣𑐵𑐥𑐮𑐵𑐣𑐵 𑐎𑐺𑐟𑐖𑑂𑐘𑐟𑐵 𑐥𑑂𑐰𑑄𑐎𑐾𑐐𑐸 𑐥𑑂𑐬𑐵𑐞𑐩𑐵𑐫𑐵𑐫𑐵 𑐂𑐔𑑂𑐕𑐵 𑐎𑐠𑑄 𑐴𑐶 𑐧𑑂𑐫𑐹𑐥𑐶𑑄 𑐳𑑂𑐚𑐵𑐦𑐟𑐫𑑂𑐟 𑐳𑐟𑐎𑐾𑐕𑑂𑐰𑐟 𑑋 𑐴𑐶 𑐧𑑂𑐫𑐹𑐥𑐶𑑄 𑐡𑐎𑑂𑐰 𑐮𑐳𑑂𑐎𑐬𑐷 𑐖𑐧 𑐴𑐳𑑂𑐥𑐶𑐟𑐮𑐫𑐵 𑐎𑑀𑐠𑐵𑐫𑑂 𑐡𑑄 𑐰𑐮, 𑐥𑑂𑐬𑐵𑐞𑐩𑐵𑐫𑐵 𑐠𑑅𑐐𑐸 𑐟𑐸𑐟𑐶𑐂 𑐡𑐣𑐵𑐔𑑂𑐰𑐣𑐾 𑐩𑐦𑐸𑐟 𑑋
𑐴𑐶 𑐧𑑂𑐫𑐹𑐥𑐶𑑄 𑐡𑐎𑑂𑐰𑐳𑐶𑐫𑐵 𑐮𑑂𑐴𑐵𑐟𑐶𑐂 𑐧𑑃 𑐥𑐸𑐂𑐐𑐸 𑐔𑑂𑐰𑐵𑐦𑐶 𑐏𑐣𑐵𑑅 𑐥𑑂𑐬𑐵𑐞𑐩𑐵𑐫𑐵𑐫𑐵 𑐩𑐶𑐏𑐵 𑐄𑐩𑐶𑐳𑑄 𑐖𑑂𑐰𑐣𑐵𑐟𑑅𑐐𑐸 𑐔𑑂𑐰𑐵𑐦𑐶𑑄 𑐄𑐏𑐾𑐠𑐸𑐏𑐾 𑐰𑐣𑐾𑐦𑐸𑐐𑐸 𑐴𑐾 𑐩𑐏𑐸𑐟 𑑋 𑐥𑑂𑐬𑐵𑐞𑐩𑐵𑐫𑐵𑑄 𑐕𑐸 𑐣𑑂𑐰𑐰𑐵𑐫𑐾 𑐠𑐾𑑄 𑐩𑑂𑐴𑐸𑐟𑐸𑐳𑐶 𑐳𑑄𑐎𑐾𑐟 𑐳𑑂𑐰𑐮 𑐟𑐬 𑐳𑑅 𑐴𑐾 𑐥𑐶𑐴𑐵𑑃 𑐩𑐰𑑅 𑑋 𑐟𑐵𑐄𑐟 𑐮𑐶𑐥𑐵 𑐟𑐶𑐣𑐶 𑐥𑑂𑐬𑐵𑐞𑐩𑐵𑐫𑐵𑑄 𑐔𑐶𑐳𑐮𑑄 𑐳𑐸𑐨𑐵𑐫𑑂 𑐢𑐵𑑅𑐐𑐸 𑐟𑐵𑐫𑐾 𑐡𑐟 𑑋
—–𑐎𑑂𑐰𑐔𑐵𑐮—–