𑐣𑐵𑐬𑐡 𑐧𑐖𑑂𑐬𑐵𑐔𑐵𑐬𑑂𑐫𑐫𑐵 𑐧𑐵𑐏𑑄
– 𑐖𑐶 𑐰𑐶𑐎𑐮 𑑋
𑐮𑑂𑐴𑐵𑑅 𑐩𑐶𑐮𑐾 𑐫𑐵𑐫𑐾𑐟 𑐠𑑅𑐐𑐸 𑐖𑐰𑐮𑑂𑐴𑐵𑑅 𑐣𑑂𑐴𑑂𑐫𑑅𑐣𑐾 𑐧𑑂𑐰𑐧𑑂𑐧𑑄 𑐰𑑄 𑐠𑑅𑐐𑐸 𑐥𑐬𑐶𑐔𑐫 𑐧𑐶𑐮 𑑋
– 𑐟𑐬, 𑐖𑐶𑑄 𑐮𑐵 𑐕𑐶𑐟𑑅 𑐩𑑂𑐴𑐳𑐶𑐎𑐾 𑐩𑐦𑐸𑐟…
𑐠𑑅𑐐𑐸 𑐣𑑂𑐴𑑂𑐫𑑅𑐣𑐾 𑐖𑐰 𑐮𑑂𑐴𑐵𑑅 𑐣𑑂𑐴𑑂𑐫𑐧𑑂𑐰𑐫𑐵𑑅 𑐮𑑂𑐴𑐵𑑅 𑐩𑐶𑐮𑐾 𑐫𑐵𑐫𑐾𑐟 𑐰𑑅𑐩𑑂𑐴 𑐩𑐣𑐹𑐫𑐵𑐟 𑐰𑑄 𑐮𑐶𑐳𑑅 𑐧𑐶𑐮 𑑋 𑐐𑐸𑐩𑑂𑐴 𑐩𑐣𑐹 𑐩𑐶𑐏𑐵 𑐣𑐶𑐐𑑅 𑐖𑐎 𑐟𑑂𑐰𑐵𑐮𑐵𑑄 𑐏𑐣𑐾𑐡𑐫𑐾𑐎 𑐣𑑂𑐴𑐵𑐫𑑂 𑐩𑑂𑐴𑐸𑐟𑐸 𑐬𑐸𑐩𑐵𑐮𑑄 𑐨𑐸𑐣𑐵𑐔𑑂𑐰𑑄𑐐𑐸 𑐡𑐸 𑑋
– 𑐎 ! 𑐣𑐎𑐟𑐶𑐣𑐶 𑐴𑐾 𑐕𑐶𑑄 𑐧𑐵𑐏𑑄 𑐔𑑂𑐰𑐫𑐾𑐟 𑐩𑐟𑑂𑐟𑐶𑐂 𑐟𑑅𑐩𑑂𑐴 𑐥𑐵𑐟𑑂𑐬 𑐖𑐶 𑑋 𑐖𑐶 𑐰𑐶𑐎𑐮 𑑋
– 𑐰𑐶𑐎𑐮 !
𑐀𑐖𑐹 𑐔𑐵𑐮 𑐮𑐾𑐏𑐎 𑑋 𑐧𑐵𑐏𑑄 𑐕𑐥𑐸 𑐔𑑂𑐰𑐫𑐾𑐐𑐸 𑐩𑐟𑐶𑐂 𑐟𑑅𑐐𑐸 𑐣𑑄 𑐏𑑅 𑐮𑐾𑐏𑐎𑑄 𑑋 𑐥𑑂𑐮𑐚 𑐕𑐐𑐹 𑐮𑐸𑐂𑐎𑐵𑑅 𑐄𑐎𑐾 𑐩𑐣 𑐧𑑂𑐰𑐵𑐎𑐹𑐐𑐸 𑐣𑑄 𑐏𑑅 𑐮𑐾𑐏𑐎𑑄 𑑋 𑐟𑐬, 𑐠𑐣 𑐮𑐵 𑐳𑑂𑐰𑐫𑑄 𑐥𑐵𑐟𑑂𑐬 𑐴𑐾 𑐄𑐟𑑂𑐥𑐟𑐶 𑐖𑐸𑐂𑐢𑐸𑑄𑐎𑐮 𑑋 𑐥𑐵𑐟𑑂𑐬𑑄 𑐠𑑅 𑐠𑐩𑑂𑐴𑑄 𑐠𑑅𑐐𑐸 𑐣𑐵𑑄 𑐟𑐫𑐾𑐢𑐸𑑄𑐎𑐮 𑑋 𑐀𑐮𑐾, 𑐮𑐾𑐏𑐎 𑐥𑐵𑐟𑑂𑐬𑐫𑑂 𑐡𑐸𑐧𑐶𑐣𑐵𑐔𑑂𑐰𑑄𑐐𑐸 𑐩𑐏𑐸 𑑋 𑐧𑐬𑐸, 𑐥𑐵𑐟𑑂𑐬 𑐠𑑅𑐴𑐾 𑐮𑐾𑐏𑐎𑐫𑐵𑐟 𑐣𑐵𑐥𑐮𑐵𑑅 𑐰𑐫𑐵𑐔𑑂𑐰𑐣 𑑋
𑐕𑐐𑐹 𑐀𑐖𑐹𑐔𑐵𑐫𑐵𑐥𑐸𑐐𑐸 𑐳𑑄𑐖𑑀𑐐 𑑋 𑐔𑑂𑐫𑐵𑐐𑐹𑐐𑐸 𑐁𑐱𑑂𑐔𑐬𑑂𑐫 𑑋
– 𑐖𑐶𑑄 𑐮𑐵 𑐠𑐠𑐾 𑐣𑑂𑐴𑐵𑐫𑑂, 𑐩𑑂𑐴𑐸𑐟𑐸 𑐟𑑂𑐰𑐥𑐸𑐫𑐵𑐟𑑅𑐩𑑂𑐴 𑐥𑐵𑐟𑑂𑐬𑐫𑐵 𑐎𑐮𑑂𑐥𑐣𑐵 𑐴𑐾 𑐫𑐵𑐣𑐵𑐐𑐸 𑐩𑐡𑐸 𑑋
𑐮𑐾𑐏𑐎𑑄 𑐥𑐟𑑂𑐫𑐵𑑅 𑐫𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐠𑑅𑐐𑐸 𑐣𑑂𑐴𑑂𑐫𑑅𑐣𑐾 𑐡𑐣𑐵𑐔𑑂𑐰𑑄𑐩𑑂𑐴 𑐴𑐟𑑂𑐟𑐵𑐎𑐟𑑂𑐟𑐵𑐩𑑂𑐴 𑐖𑐰𑐵𑐣𑐩𑑂𑐴 𑐩𑐣𑐹, 𑐐𑐸𑐩𑑂𑐴𑐾𑐳𑐶𑐫𑐵 𑐏𑑂𑐰𑐵𑑅 𑐬𑐸𑐩𑐵𑐮𑑄 𑐟𑑂𑐰𑐥𑐸𑐫𑐵𑐟𑑅𑐐𑐸𑐮𑐶𑑄 𑐧𑐵𑑄𑐮𑐵𑐎 𑐳𑐷𑐩𑐡𑐸 𑑋 𑐰 𑐩𑐣𑐹 𑐠𑑅𑐴𑐾 𑐥𑐵𑐟𑑂𑐬 𑐏𑑅 𑐢𑐎𑐵𑑅 𑑋
– 𑐳𑑂𑐫𑐹 𑐖𑐶𑑄 𑑋 𑐠𑑂𑐰 𑐖𑐶𑑄 𑐠𑐣𑐫𑐵 𑐴𑐾 𑐮𑐎𑐳𑐫𑐵𑐟 𑐧𑐶𑐔𑐵𑑅 𑐫𑐵𑐣𑐵𑑅 𑐟𑐫𑐵𑐰𑐂𑐐𑐸 𑐏𑑅 𑑋
𑐰𑐵𑐴 ! 𑐥𑐵𑐟𑑂𑐬𑑄 𑐠𑑅𑐠𑐩𑑂𑐴𑑄 𑐧𑐶𑐔𑐵𑑅 𑐫𑐵𑐣𑐵𑑅, 𑐩𑐣𑑄𑐟𑐸𑐣𑐵𑑅 𑐖𑑂𑐫𑐵 𑐫𑐵𑐟 𑐎𑐶 𑐮𑐾𑐏𑐎𑑄 𑐩𑐣𑑄𑐟𑐸𑑄 𑐠𑐾𑑄, 𑐧𑐶𑐔𑐵𑑅 𑐫𑐵𑑅 𑐠𑐾𑑄 𑐧𑐵𑐏𑑄 𑐐𑐠𑐾 𑐳𑐶𑐬𑑂𑐖𑐣𑐵 𑐖𑐸𑐂 𑑋
𑐮𑐾𑐏𑐎 𑐢𑐫𑐵𑐥𑐶𑑄 𑐣𑑂𑐴𑑂𑐫𑐵𑐧𑐮𑐾𑑄 𑐕𑐐𑐹 𑐣𑑄 𑐕𑐐𑐹 𑐥𑑂𑐮𑐚𑐫𑑂 𑐡𑐸𑐧𑐶𑐣𑐵 𑐴𑐾 𑐔𑑂𑐰𑐣𑐷 𑐕𑐵𑐫𑑂𑐢𑐵𑑅𑐳𑐵 𑐳𑐩𑐵𑐖𑐫𑐵 𑐔𑐷𑐢𑑄𑐐𑐸𑐫𑐵 𑐔𑐷𑐢𑑄𑐐𑐸 𑐑𑐚𑐣𑐵 𑐣𑑄 𑐀𑐩𑐶𑐐𑐸 𑐣𑐵𑐫𑐹𑐐𑐸 𑐣𑐸𑐐𑑅𑐫𑐵𑐟 𑐥𑑂𑐬𑐨𑐵𑐰𑐶𑐟 𑐫𑐵𑐣𑐵 𑐴𑐾 𑐔𑑂𑐰𑑄𑐐𑐸 𑐡𑐂 𑑋 𑐠𑑂𑐰 𑐏𑑃 𑐳𑑂𑐫𑐹𑐩𑑂𑐴, 𑐠𑑂𑐰 𑐐𑐸𑐩𑑂𑐴𑑄 𑐧𑐴𑐸𑐬𑐸𑐥𑐶 𑐖𑐸𑐂𑐩𑐵𑑅 𑑋 𑐠𑐣 𑐕𑐸𑑄 𑐲𑐜𑑂𑐫𑐣𑑂𑐟𑑂𑐬 𑐳𑐸𑐮𑐵𑐔𑑂𑐰𑑄𑐐𑐸 𑐡𑐫𑐾𑐩𑐵𑑅 𑑋 𑐄𑐎𑐾𑑄 𑐠𑑂𑐰 𑐮𑐶𑐳𑐾 𑐔𑑂𑐰𑐣𑐵𑑅 𑐨𑐶𑑄 𑐖𑐸𑐂𑐩𑐏𑐸 𑑋
𑐠𑐸𑐮𑐶 𑐏𑑃 𑐩𑐣𑐫𑑂 𑐮𑐸𑐂𑐰𑑄 𑐮𑐾𑐏𑐎 𑐰 𑐩𑐣𑐹 𑐏𑐣𑐵𑑅 𑐟𑐳𑐎𑑄 𑐴𑐾 𑐐𑑂𑐫𑐵𑐟 𑑋 𑐠𑑂𑐰 𑐩𑐣𑐹𑐥𑐵𑐏𑐾𑑄 𑐟𑐵𑐥𑐵𑐫𑐾𑐐𑐸 𑐴𑐾 𑐨𑐶𑑄 𑐖𑐸𑐂𑐐𑐸 𑐨𑐵𑑅𑐥𑐶𑐮 𑑋 𑐀𑐮𑐾 𑐦𑐴𑐶𑐮𑐵𑑅 𑐧𑐾𑐟𑑀𑐜𑑄 𑐧𑐶𑐳𑑂𑐫𑐸𑑄 𑐰𑐣𑐾𑐟 𑐥𑐮𑐵𑑅 𑐕𑐸 𑐮𑑂𑐴𑑂𑐰𑐣 –
– 𑐖𑐶 𑐣𑐶𑐮𑐶𑐩𑐵 𑑋
𑐠𑑅𑐮𑐶𑐳𑐾 𑐮𑑂𑐴𑐵𑑅 𑐩𑐶𑐮𑐾 𑐫𑐵𑐫𑐾𑐟 𑐕𑐩𑑂𑐴 𑐩𑐫𑑂𑐖𑐸𑐫𑐵 𑐮𑑂𑐴𑐵𑑅 𑐣𑑂𑐴𑑂𑐫𑐵𑑅 𑐰𑐮 𑑋 𑐮𑐾𑐏𑐎 𑐟𑐎𑑂𑐎 𑐡𑐶𑐟 𑑋 𑐠𑑅𑐐𑐸 𑐣𑑂𑐴𑑂𑐫𑑅𑐣𑐾 𑐡𑐣𑐵𑐔𑑂𑐰𑑄𑐩𑑂𑐴 𑑋 𑐴𑐶𑐳𑐶𑑄 𑐨𑐫𑑂𑐧𑑂𑐫𑐹𑐩𑑂𑐴 𑑋 𑐩𑑂𑐴𑐢𑐶𑐎𑑅 𑐣𑑄 𑐩𑐵𑐎𑑂𑐰 𑐡𑐸𑐩𑑂𑐴 𑑋 𑐟𑐳𑐎𑑄 𑐧𑐵𑑄𑐮𑐵𑑅𑐩𑑂𑐴 𑑋 𑐳𑑂𑐰𑑅𑐮𑐶𑐳𑐾 𑐳𑑂𑐰𑐫𑐾 𑐩𑐐𑐵𑑅𑐩𑑂𑐴 𑑋 𑐕𑐩𑑂𑐴 𑐖𑐰𑐵𑐣𑐩𑑂𑐴 𑐩𑐶𑐳𑐵 𑑋 𑐳𑑂𑐰𑐳𑑂𑐰𑑄 𑐴𑐾 𑐮𑐾𑐏𑐎 𑐠𑑅 𑐴𑐾 𑐮𑐚𑑂𑐚𑐸 𑐖𑐸𑐮 𑑋 𑐮𑐾𑐏𑐎𑐫𑐵 𑐡𑐸𑐣𑐸𑐐𑑅 𑐩𑐸𑐳𑐸𑐎𑐵𑐮 𑑋 𑐰𑐵𑐳𑑂𑐟𑐰𑐫𑑂 𑐰𑑄 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐩𑐵𑐮𑐵𑐔𑑂𑐰𑑄𑐩𑑂𑐴 𑐩𑐶𑐳𑐵 – 𑐠𑐸𑐖𑐵𑑅𑐩𑑂𑐴 𑐴𑐾 𑐏𑑅 𑑋
– 𑐖𑐶𑑄 𑐮𑐵 𑐕𑐶𑐟𑑅 𑐩𑑂𑐴𑐳𑐶𑐎𑐾 𑐩𑐦𑐸𑐟 𑑋 𑐠𑑂𑐰 𑐳𑐶𑐧𑐫𑑂 𑐣𑑂𑐴𑑂𑐫𑑅 𑐐𑐣𑑄 𑐏𑐣𑐵 𑐠𑐾𑑄 𑐩𑐔𑑂𑐰𑑄 𑐣𑐶 𑑋
– 𑐩𑐏𑐣 𑐏𑐂 𑑋 𑐟𑐬 𑐩𑑂𑐴 𑐴𑐾 𑐩𑐳𑑂𑐫𑐹𑐩𑑂𑐴 𑐮𑐵 𑐏𑐂𑐩𑐏𑐸 𑑋 𑐕𑐶𑐐𑐸 𑐣𑐸𑐐𑐮𑐫𑑂 𑐐𑐸𑐮𑐶 𑐂𑐬𑐸𑐠𑐶𑐬𑐸 𑐖𑐸𑐂𑐢𑐸𑑄𑐩𑑂𑐴 𑐏𑑅 𑐖𑐶 𑑋 𑐣𑐎𑐟𑐶𑐣𑐶 𑐕𑐶𑑄 𑐧𑐵𑐏𑑄 𑐔𑑂𑐰𑐫𑐾𑐟 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐥𑑂𑐮𑐚𑐫𑐵 𑐩𑐶𑐳𑐵𑐥𑐵𑐟𑑂𑐬 𑐖𑐶 𑑋 𑐖𑐶 𑐣𑐶𑐮𑐶𑐩𑐵 𑑋
𑐁𑑅 𑐢𑐵𑑅𑐳𑐵 𑐮𑐾𑐏𑐎𑐫𑐵𑐟 𑐥𑐎𑑂𑐎𑐵 𑐰𑐶𑐱𑑂𑐰𑐵𑐳 𑐖𑐸𑐮 𑑋 𑐰 𑐐𑐸𑐐𑐸𑑄 𑐩𑐵𑐫𑐵𑐰𑐷 𑐲𑐜𑑂𑐫𑐣𑑂𑐟𑑂𑐬𑐫𑑂 𑐦𑐳𑐾 𑐖𑐸𑐂𑐟𑑂𑐫𑑄𑐐𑐸 𑐡𑐸 𑑋 𑐰𑐫𑐵 𑐏𑐿𑐬𑐶𑐫𑐟 𑐩𑐡𑐸 𑑋
𑐣𑐎𑐟𑐶𑐣𑐶 𑐴𑐾 𑐮𑐾𑐏𑐎, 𑐕𑐐𑐹 𑐣𑑂𑐴𑐹𑐐𑐸 𑐳𑑄𑐑𑐫𑑂 𑐡𑐸𑐖𑑅 𑐖𑐸𑐂𑐐𑐸 𑐧𑐵𑐬𑐾 𑐳𑐴𑐮𑐴 𑐫𑐵𑐣𑐵𑐰𑑅𑐐𑐸 𑑋 𑐠𑑂𑐰 𑐏𑑃 𑐐𑐸𑐐𑐸𑑄 𑐩𑐾𑐐𑐸 𑐳𑑄𑐳𑑂𑐠𑐵𑑄 𑐳𑐷𑐎𑐵𑑅 𑐰𑐫𑐵𑐟 𑐠𑑅𑐐𑐸 𑐳𑑄𑐳𑑂𑐠𑐵𑐫𑑂 𑐳𑐵𑐮𑐵𑐎𑐵𑐫𑐾𑐟 𑐖𑐵𑐮𑐫𑑂 𑐎𑑂𑐫𑑄𑐎𑐾𑐐𑐸 𑐠𑑂𑐰 𑐕𑐐𑐹 𑐐𑑂𑐰𑐳𑐵𑑅 𑐖𑐸𑐂𑐦𑐸 𑑋 𑐠𑑂𑐰 𑐡𑐾𑐱 𑐩𑐵𑐦𑐶𑐫𑐵𑐩𑐫 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 – 𑐠𑐣 𑐕𑐸 𑐖𑐸𑐂, 𑐕𑐸 𑐩𑐖𑐸𑐂 – 𑐳𑐸𑐣𑐵𑑄 𑐕𑐸 𑐢𑐵𑐫𑐾𑐦𑐸 𑑋 𑐠𑐣 𑐳𑐸𑐣𑐵𑑄 𑐳𑐸𑐫𑐵𑐟 𑐕𑐸 𑐫𑐵𑐂, 𑐕𑐸 𑐩𑐫𑐵𑐂 𑐕𑐸𑑄 𑐴𑐾 𑐢𑐵𑐫𑐾𑐩𑐦𑐸 𑑋 𑐠𑐣 𑐩𑐖𑐸𑐂𑐩𑐵𑑅𑐐𑐸 𑐣𑑂𑐴𑑂𑐫𑐵𑐐𑑂𑐐𑐸𑑄 𑐖𑐸𑐂𑐦𑐸 𑑋 𑐖𑐸𑐂𑐩𑐵𑑅𑐐𑐸 𑐕𑐸𑑄 𑐴𑐾 𑐩𑐖𑐸𑐂𑐦𑐸 𑑋
𑐢𑑁𑐧𑐖𑐶 𑐰𑐵𑐮, 𑐮𑐾𑐏𑐎𑐫𑐵 𑐩𑐣𑐫𑑂 𑑋 𑐮𑑃𑐫𑑂 𑐡𑐟𑑂𑐠𑐸𑐂 𑐥𑐣𑐵𑑅 𑐠𑑂𑐰 𑐣𑐶𑐩𑑂𑐴 𑐥𑐵𑐟𑑂𑐬𑑄 𑐠𑑅𑐟 𑐐𑐸𑐏𑐾 𑐫𑑄𑐎𑐾𑐟𑑂𑐫𑑄𑐐𑐸 𑐏𑑅, 𑐮𑐾𑐏𑐎𑑄 𑐕𑐸𑑄 𑐴𑐾 𑐟𑐶𑐦𑑂𑐫𑐵𑐫𑐾 𑐩𑐦𑐸𑐟 𑑋
𑐀𑐣𑑂𑐟𑐫𑑂, 𑐠𑑂𑐰 𑐀𑐡𑑂𑐨𑐹𑐟𑐥𑐶𑑄 𑐣𑐶𑐩𑑂𑐴 𑐥𑐵𑐟𑑂𑐬𑐥𑐵𑐏𑐾𑑄 𑐧𑐶𑐳𑑂𑐫𑐸𑑄 𑐰𑐣𑐵𑑅 𑐧𑐶𑐳𑑂𑐫𑐸𑑄 𑐰𑐣𑐾𑐩𑐦𑐂𑐐𑐸 𑐏𑐣𑐾𑐡𑐫𑐾𑐰𑑄, 𑐮𑐾𑐏𑐎 𑐠𑑅 𑐴𑐾 𑐳𑑄𑐫𑐩𑐶𑐟 𑐖𑐸𑐮 𑑋
– 𑐕𑐶𑐎𑐥𑐶𑑄 𑐕𑐠𑐵𑐳𑑄 𑐴𑐾 𑐗𑐵𑐫𑐵𑐥𑐶𑑄 𑐏𑑅 𑐮𑐵 ?
– 𑐩𑐏𑐸 𑑋 𑐰 𑐄𑐏𑐾𑑄 𑐰𑑅𑐐𑐸 𑐖𑐶 𑐠𑐸𑐏𑐾𑑄 𑐰𑐂𑐐𑐸 𑑋
– 𑐀𑐬𑑂𑐠𑐵𑐟𑑂… 𑐕𑐶𑐎𑐥𑐶𑐣𑐶 𑐡𑐟𑑂𑐠𑐸𑐂 𑐕𑐸𑑄 𑐎𑐠𑑄𑐫𑐵 𑐴𑐾 𑐳𑑂𑐰𑐵𑐥𑐹 𑐩𑐡𑐸 ?
– 𑐳𑑂𑐰𑐵𑐥𑐹… 𑐕𑐶𑑄 𑐩𑐣𑐫𑑂 𑐟𑐶𑐣𑐶 𑐧𑐵𑐏𑑄𑐫𑐵 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐏𑑅 𑑋 𑐰𑐿 𑐧𑐶𑐫𑐵 𑑋 𑐕𑐶𑑄 𑐖𑐶𑐩𑐶𑐐𑐸 𑐡𑐟𑑂𑐠𑐸𑐂 𑐕𑐸𑑄 𑐐𑐸𑑄𑐎𑐠𑑄𑐫𑐵 𑐳𑑂𑐰𑐵𑐥𑐹 𑐮𑐵 𑐟𑐫𑐵𑐡𑐷𑐐𑐸 𑐴𑐾 𑐩𑐡𑐸𑐣𑐶…
𑐏𑑅 𑑋 𑐳𑐟𑑂𑐫 𑐏𑑅 𑑋 𑐮𑐾𑐏𑐎𑑄 𑐩𑐣𑐫𑑂 𑐟𑐶𑐣𑐶 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐏𑑅 𑑋 𑐩𑐶𑐳𑐵 𑐩𑐶𑐖𑑄 𑑋 𑐩𑐵𑐟𑑂𑐬 𑐩𑐶𑐳𑐵 𑑋 𑐩𑐵𑐟𑑂𑐬 𑐩𑐶𑐖𑑄 𑑋 𑐀𑐠𑐾 𑐏𑑅𑐳𑐵… 𑐩𑐟𑐮𑐧… 𑐀𑐬𑑂𑐠𑐵𑐟𑑂… 𑐠𑐸𑐥𑐶𑑄 𑐢𑐵𑐟𑑂𑐠𑐾𑑄 𑐮𑐾𑐏𑐎𑐫𑐵 𑐴𑐾 𑐥𑐵𑐟𑑂𑐬 𑐏𑐟 𑐮𑐵 𑑋 𑐐𑐸𑐩𑑂𑐴𑑄 𑐂𑐔𑑂𑐕𑐵𑐢𑐵𑐬𑐷, 𑐲𑐜𑑂𑐫𑐣𑑂𑐟𑑂𑐬𑐎𑐵𑐬𑐷, 𑐀𑐥𑐴𑐬𑐞𑐎𑐵𑐬𑐷, 𑐮𑐸𑐚𑐾𑐬𑐵 𑐁𑐡𑐶 𑐕𑐸𑑄 𑐩𑐏𑐸𑐟 𑐮𑐵 𑑋
𑐀𑐴𑑀 ! 𑐀𑐴𑑀 !! 𑐮𑐾𑐏𑐎𑐫𑐵𑐎𑐾 𑐡𑐸𑐣𑑄𑐣𑐶𑐳𑐾𑑄 𑐴𑐾 𑐕𑐐𑐹 𑐎𑐠𑑄𑐫𑐵 𑐄𑐟𑑂𑐟𑐾𑐖𑐣𑐵 𑐦𑐿𑐮𑐾 𑐖𑐸𑐮 𑑋 𑐁𑑅 𑐰𑑄 𑐔𑑂𑐰𑐂𑐐𑐸 𑐧𑐵𑐏𑑄 𑐳𑐖𑐶𑐰 𑐖𑐸𑐫𑐵𑑅 𑐥𑐶𑐡𑐣𑐷𑐐𑐸 𑐖𑐸𑐮 𑑋 𑐮𑐾𑐏𑐎𑐫𑐵 𑐮𑐫𑑂𑐟𑐵𑑅𑐫𑐵 𑐠𑐵𑑅𑐐𑐵𑑅 𑐴𑐾 𑐩𑐣𑑂𑐟 𑑋
𑐁𑑅 𑐮𑐾𑐏𑐎𑑄 𑐴𑐾 𑐠𑐸𑐩𑐶𑐟, 𑐠𑐸𑐩𑐶𑐐𑐸 𑐳𑑂𑐰𑐵𑐥𑐹𑐫𑐵𑐟 𑐎𑐫𑐵𑑅 𑐥𑐬𑐶𑐨𑐵𑐲𑐶𑐟 𑐫𑐵𑐣𑐵𑐧𑐷 𑐩𑐵𑐮𑐷𑐐𑐸 𑐖𑐸𑐮 𑑋 𑐮𑐾𑐏𑐎𑑄 𑐐𑑂𑐰𑐳𑐵𑑅 𑐐𑑂𑐰𑑅𑐎𑐠𑑄 𑐠𑐸𑐩𑐶𑐳𑑄 𑐠𑑅𑐐𑐸 𑐨𑐹𑐩𑐶𑐎𑐵 𑐩𑑂𑐴𑐶𑐟𑐷𑐐𑐸 𑐖𑐸𑐮 𑑋
𑐮𑐾𑐏𑐎𑑄 𑐩𑐟𑑂𑐟𑐶𑐂 𑐟𑐮 – 𑐁𑑅 𑐠𑐸𑐩𑐶𑐟 𑐩𑐟𑐶𑐣𑐵𑐩𑐶 𑐡𑐫𑐾𑐎𑐵𑐧𑐷…
𑐮𑐾𑐏𑐎 𑐠𑑅𑐴𑐾 𑐕𑐩𑑂𑐴 𑐀𑐳𑐦𑐮 𑐩𑐟𑐶𑐣𑐵𑐩𑐶 𑐏𑑅 𑑋 𑐟𑑅𑐎𑑅 𑐟𑑅𑐎𑑅 𑐴𑐾 𑐰𑐫𑐵 𑐩𑐟𑐶𑐣𑐵 𑐎𑑂𑐰𑑅𑐡𑑅𑐐𑐸 𑐡𑐸 𑑋 𑐰𑐫𑐵 𑐡𑐸𑐣𑐸𑐐𑐮𑐫𑑂 𑐳𑐸𑐮𑐵𑐔𑑂𑐰𑑄𑐐𑐸 𑐥𑐹𑐰𑑄𑐐𑐸 𑐩𑐟𑐶𑐣𑐵𑐫𑐵 𑐳𑑂𑐎𑐾𑐔𑑄 𑐁𑐎𑐵𑐬 𑐎𑐵𑐫𑐾𑐟 𑐰𑐵𑐮𑐵𑐰𑐵𑐮𑐵 𑐳𑐣𑐵𑐴𑐮 𑑋 𑐮𑐾𑐏𑐎𑑄 𑐠𑐩𑑂𑐴𑑄 𑐥𑐹𑐰𑑄𑐎𑐾𑐩𑐏𑑄𑐐𑐸 𑐩𑐟𑐶𑐣𑐵 𑐠𑐸𑐩𑐶𑐥𑐵𑐏𑐾𑑄 𑐥𑐹𑐰𑑄𑐎𑐾𑐐𑐸 𑐐𑑂𑐰𑐳𑐵𑑅 𑐐𑑂𑐰𑐮 𑑋
𑐠𑐸𑐩𑐶𑐟 𑐥𑐎𑑂𑐎𑐵𑐥𑐶𑑄 𑐩𑐟𑐶𑐣𑐵𑐩𑐶 𑐡𑐫𑐾𑐎𑐵𑐧𑐷 𑑋 𑐰𑐶𑐬𑐴 𑐰 𑐰𑐾𑐡𑐣𑐵𑑄 𑐩𑐟𑐶𑐣𑐵𑐫𑐵𑐟 𑐎𑑂𑐰𑐵𑐟𑐸𑐎𑐾𑐧𑐷 𑑋 𑐥𑐷𑐜𑐵 𑐰 𑐕𑐚𑐥𑐟𑐶𑑄 𑐥𑐮𑐏 𑐴𑐾 𑐧𑐵𑐫𑐾𑐩𑐦𑐂𑐐𑐸 𑐳𑑂𑐠𑐶𑐟𑐶 𑐮𑐵𑐎𑐵𑐧𑐷 𑑋 𑐀𑐮𑐾 𑐕𑐣𑑂𑐴𑐸 𑐩𑐟𑐶𑐣𑐵𑐫𑑂 𑐡𑐸𑐧𑐶𑐧𑑂𑐫𑐸𑑄 𑐡𑐸𑐧𑐶𑐧𑑂𑐫𑐸𑑄 𑐠𑑅𑐟 𑐴𑐾 𑐮𑑂𑐰𑑅𑐩𑑄𑐎𑐵𑑅 𑐴𑐣𑐸𑐩𑐵𑐣𑐢𑑂𑐰𑐵𑐏𑐵𑐫𑐵 𑐕𑐐𑑅 𑐡𑐾𑐐𑐮𑐫𑑂 𑐔𑑂𑐰𑑄𑐔𑑂𑐰𑐣𑐷𑐧𑐮𑐫𑑂 𑐧𑐵𑐏𑑄𑐫𑐵 𑐎𑑂𑐮𑐵𑐂𑐩𑐾𑐎𑑂𑐳 𑐳𑐖𑑂𑐬𑑂𑐫𑐵𑐣𑑂𑐟 𑐣𑑂𑐴𑐶𑐣𑐫𑑂 𑐩𑐟𑐶𑐣𑐵𑐫𑐵 𑐩𑐹𑐟𑐶 𑐎𑐵𑐫𑐾𑐎𑐾 𑐧𑐷…
𑐀𑐠𑐾𑐩𑐏𑐸, 𑐀𑐠𑐾𑐩𑐏𑐸 – 𑐮𑐾𑐏𑐎𑐫𑐵 𑐩𑐣 𑐴𑐶𑐮 – 𑐏𑑂𑐰𑐵𑐮𑐫𑑂 𑐬𑐸𑐩𑐵𑐮𑑄 𑐟𑑂𑐰𑐥𑐸𑐫𑐵𑐟𑑅𑐐𑐸 𑐴𑐾 𑐡𑐸 𑑋 𑐄𑐎𑐶𑑄 𑐄𑐩𑐶𑐟 𑐳𑐸𑐣𑐵𑑄 𑐩𑑂𑐴𑐳𑐶𑐎𑐾 𑐦𑐂 𑐴𑐾 𑐩𑐏𑐸 𑑋 𑐀𑐠𑐾 𑐮𑐵 𑐏𑑄𑐳𑐵𑑄 𑐕𑐸𑑄 𑐥𑐵𑐂𑐐𑐸 𑐮𑐵 𑐏 𑐴𑐾 𑐩𑐏𑐸 𑐕𑐵𑐫𑑂𑐢𑐵𑑅𑐳𑐵 𑐠𑐸𑐥𑐶𑑄 𑐮𑐵 𑐩𑐵𑐟𑑂𑐬 𑐥𑐵𑐟𑑂𑐬 𑐴𑐾 𑐩𑐏𑐵 𑑋 𑐧𑐬𑐸 𑐠𑐸𑐩𑐶𑐐𑐸 𑐮𑑂𑐴𑐵𑐟𑐶𑐂 𑐀𑐟𑑂𑐫𑐵𑐢𑐸𑐣𑐶𑐎 𑐧𑐣𑑂𑐡𑐹𑐎 𑐕𑐥𑐸 𑐕𑐥𑐸 𑐖𑑂𑐰𑑄𑐎𑐾𑐩𑐵𑐮𑐷 𑑋 𑐀𑐮𑐾 𑐡𑐾𑐫𑐵 𑐕𑐐𑐹 𑐟𑑅𑐢𑑄𑐐𑐸 𑐧𑐿𑑄𑐎𑐫𑑂 𑐮𑐸𑐚𑐾 𑐫𑐵𑐎𑐾 𑐕𑑂𑐰𑐫𑐾𑐩𑐵𑐮𑐷 𑑋 𑐠𑑁𑑄𑐎𑐣𑑂𑐴𑐫𑑂 𑐮𑐾𑐏𑐎𑐫𑐵𑐟 𑐢𑑂𑐫𑐧𑐵𑐫𑐵 𑐟𑐳𑐎𑑄 𑐴𑐾 𑐳𑐶𑐳𑐶𑐎𑐎𑑅 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐶𑐩𑑂𑐴 𑐩𑐳𑑂𑐟𑐫𑑂𑐟 𑐫𑐸𑐊𑐳 𑐕𑑂𑐰𑐫𑐾𑐫𑐵 𑐣𑐶𑑄𑐟𑐶𑑄 𑐔𑑂𑐰𑑄 𑐔𑑂𑐰𑐣𑐵𑐐𑐸 𑐕𑐾𑑃 𑐩𑐶𑐫𑐵𑑅, 𑐠𑑅 𑐜𑐾𑐬𑐵𑐫𑑂 𑐔𑑂𑐰𑑄 𑐰𑐣𑐾𑐩𑐵𑐮𑐷𑐐𑐸 𑐀𑐰𑐳𑑂𑐠𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐥𑐵𑐟𑑂𑐬𑑄 𑐳𑐎𑑂𑐎𑐮𑐶𑐐𑐸 𑐣𑑀𑐚 𑐧𑑀𑐬𑐵𑑄 𑐧𑑀𑐬𑐵𑑄 𑐖𑑂𑐰𑐣𑐵𑐰𑐫𑐾𑐰𑑄 – 𑐰𑑄 𑐰 𑐥𑐵𑐟𑑂𑐬𑐟𑐫𑑂𑐟 𑐂𑐬𑐾𑐖𑐬𑑄 𑐴𑐸𑐫𑐵𑐧𑐷 𑑋
𑐧𑐳𑑂 𑑋
𑐮𑐾𑐏𑐎 𑐥𑐵𑐟𑑂𑐬𑐫𑐵𑐟 𑐎𑐫𑐵𑑅 𑐧𑐵𑐏𑑄𑐫𑐵 𑐐𑑂𑐰𑐳𑐵𑑅 𑐐𑑂𑐰𑐐𑑂𑐰𑑄, 𑐠𑑅𑐴𑐾 𑐩𑐹𑐮𑐥𑐵𑐟𑑂𑐬 𑐖𑐸𑐫𑐵𑑅 𑐥𑐶𑐡𑐣𑐾𑐐𑐸 𑐟𑐬𑐏𑐬𑐫𑑂 𑐮𑐵𑑅𑐰𑐣 𑑋
𑐟𑐬, 𑐠𑑂𑐰 𑐀𑐡𑑂𑐨𑐹𑐟𑐥𑐶𑑄 𑐥𑐵𑐟𑑂𑐬𑐟 𑐢𑐵𑑅𑐳𑐵 𑐮𑐾𑐏𑐎𑐫𑐵𑐟 𑐀𑐣 𑐴𑐾 𑐟𑑂𑐰𑑅𑐟𑐵𑑅 𑐠𑐩𑑂𑐴𑑄 𑐴𑐾 𑐧𑐵𑐏𑑄 𑐨𑑀𑐐𑐾 𑐫𑐵𑐫𑐾𑐟 𑐩𑐴𑐵𑐣𑐐𑐬𑐫𑐵 𑐡𑐸𑐣𑐾 𑐡𑐸𑐣𑐾 𑐡𑐸𑐴𑐵𑑄 𑐰𑐣𑐾𑐢𑐸𑑄𑐎𑐮 𑑋
𑐰𑑃𑐰𑑄 𑐀𑐥𑐶𑑄 𑐩𑐴𑐵𑐣𑐐𑐬𑐫𑐵 𑐣𑐸𑐐𑑅𑐔𑐸𑐂 𑐠𑑂𑐫𑐣 𑑋 𑐕𑐐𑐹 𑐟𑑅𑐢𑑄𑐐𑐸 𑐗𑐮𑐩𑐮𑑂𑐮𑐐𑐸 𑐡𑐸𑐰𑐵𑐟𑐫𑑂 𑐥𑐮𑐏 𑐡𑐶𑐟 𑑋 𑐡𑐣 𑑋 𑐥𑑂𑐫𑐏𑐬𑐾𑑄 𑐳𑑂𑐰𑐟 𑑋 𑐣𑐶𑐩𑑂𑐴𑐾𑐳𑐶𑐫𑐵 𑐳𑐴𑐮𑐴 𑐫𑐵𑐟 𑑋 𑐀𑐮𑐾, 𑐀𑐣 𑐴𑐾 𑐡𑐸𑐰𑐵𑐟𑐫𑑂 𑐮𑐶𑐥𑐵 𑐣𑐵𑐥𑐮𑐵𑐫𑐾𑐐𑐸 𑐎𑑂𑐰𑑅𑐕𑐶𑐣𑐵𑑅 𑐀𑐥𑐶𑑄 𑐧𑐵𑐮 𑑋
𑐀𑐬𑑂𑐠𑐵𑐟𑑂,
𑐧𑐵𑐏𑑄𑐫𑐵𑐟 𑐫𑐵𑐎𑑅 𑐫𑐵𑐎𑑅 𑐨𑑀𑐐𑐾 𑐫𑐵𑐫𑐾𑐟, 𑐁𑐣𑐣𑑂𑐡 𑐎𑐵𑐫𑐾𑐟 𑐩𑐴𑐵𑐣𑐐𑐬𑐫𑐵 𑐡𑐸𑐣𑐾 𑐡𑐸𑐣𑐾 𑐡𑐸𑐴𑐵𑑄 𑐰𑐣 𑑋
…
𑐩𑐴𑐵𑐣𑐐𑐬 ! 𑐏𑑂𑐫𑐸𑑄 𑐏𑑂𑐫𑐸𑑄 𑐢𑐫𑐵𑐰𑑅𑐮𑐶𑐳𑐾 𑐳𑐹𑐡𑑂𑐬𑑂𑐫𑑅𑐫𑐵𑐟 𑐴𑐾 𑐩𑐵𑐠 𑐫𑐵𑐫𑐾𑐨𑐣𑑄 𑐠𑐷𑐠𑐷 𑐬𑑄𑐐𑐫𑐵 𑐩𑐟 𑐗𑐮𑐩𑐮𑑂𑐮 𑐖𑐸𑐫𑐵𑐰𑐮 𑑋
𑐳𑑂𑐰𑐵𑐨𑐵𑐰𑐶𑐎 𑐬𑐸𑐥𑑄 𑐥𑐵𑐟𑑂𑐬𑐫𑐵𑐟 𑐣𑑄 𑐟𑑂𑐫𑐵𑐣𑐸𑐮 𑑋 𑐣𑐫𑐾 𑐥𑐶𑐟𑑂𑐫𑐵𑐟 𑑋 𑐗𑐵𑐳𑐸 𑐮𑐣𑐾𑐟 𑑋 𑐥𑐶𑐟𑑂𑐫𑐵𑑅 𑐟𑑄𑐎𑐾𑐟 – 𑐴𑑀𑐚𑐮𑐥𑐵𑐏𑐾 𑐩𑐶𑐏𑐵 𑐧𑑂𑐰𑐮 𑑋
𑐰𑑄 𑐴𑑀𑐚𑐾𑐮𑐫𑑂 𑐩𑐶𑐏𑐵 𑐕𑐸 𑐧𑑂𑐰𑐮, 𑐗𑐵𑐳𑑃 𑐗𑐵𑐳𑑃 𑐢𑐵𑐢𑐵𑑄 𑐴𑐶𑐳𑐶𑐔𑐵 𑐴𑐶𑐳𑐶𑐔𑐵 𑐡𑐸𑐥𑐶𑑄 𑐣𑐵𑐣𑐶𑐔𑐵𑐥𑐶𑑄𑐳𑑄 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐴𑐾 𑐰𑐿𑐟 𑐕𑐐𑐹 𑐴𑑀𑐚𑐮 𑐡𑐸𑐣𑐾 𑐡𑐸𑐟𑐫𑑄𑐎𑐮 𑑋
𑐴𑑀𑐚𑐮 𑐳𑐸𑐣𑐳𑐵𑐣 𑑋
𑐥𑐬𑑂𑐳𑐣𑐵𑐮𑐶𑐚𑐷𑑄 𑐨𑐫𑑂𑐧𑑂𑐫𑐹𑐩𑑂𑐴 𑑋 𑐴𑐟𑑂𑐟𑐵𑐎𑐟𑑂𑐟𑐵𑐩𑑂𑐴 𑑋 𑐖𑐰𑐵𑐣𑐩𑑂𑐴 𑑋 𑐰 𑐴𑐾 𑐕𑐩𑑂𑐴 𑐖𑐎 𑐐𑑂𑐬𑐵𑐴𑐎 𑑋
𑐣𑐵𑐣𑐶𑐔𑐵𑐥𑐶𑑄 𑐰𑐫𑐵 𑐴𑐾 𑐖𑑅𑐏𑑅 𑐴𑐵𑑄 𑐨𑐸𑐣𑐾 𑐠𑐾𑑄 𑐨𑐸𑑄𑐰𑐮 𑑋
𑐕𑐩𑑂𑐴𑐳𑐾𑑄 𑐩𑐶𑐣𑐸 𑐣𑑂𑐴𑑂𑐫𑐧𑑂𑐰𑑅 𑐰𑐮 𑑋 𑐕𑐩𑑂𑐴𑐳𑐾𑑄 𑐐𑐶𑐮𑐵𑐳𑐫𑑂 𑐮𑑅 𑐟𑑅𑐰𑐮 𑑋 𑐰𑑄 𑐩𑐶𑐣𑐸 𑐳𑑂𑐰𑐳𑑂𑐰𑑄 𑑋 𑐀𑐩𑐶𑐎𑐾 𑐴𑐾 𑐣𑑂𑐫𑑃𑐣𑑂𑐫𑑄 𑐀𑐣𑐾𑐟𑐣𑐾 𑐣𑐳𑐵𑐖𑑂𑐰𑐮𑑄 𑐀𑐬𑑂𑐜𑐬 𑐫𑐵𑐟 𑑋 𑐳𑐰𑐵𑑅 𑐎𑐵𑐎𑐵𑑄 𑐮𑐸𑐢𑑄𑐎 𑐣𑐮 𑑋 𑐟𑑂𑐫𑑄𑐎 𑐥𑑂𑐰𑐵𑑅 𑐖𑐵𑐫𑐾𑐎𑐮 𑑋
𑐣𑐵𑐣𑐶𑐥𑐶𑑄 𑐰𑐫𑐵 𑐩𑑂𑐴𑐫𑑂 𑐩𑑂𑐴𑐫𑑂 𑐑𑐶𑐳𑐶𑐥𑐶𑐳𑐶 𑐫𑐵𑐣𑐵𑑅 𑐴𑐾 𑐏𑑂𑐫𑐵𑑅 𑐫𑐵𑑅 𑐰𑐿𑐔𑑂𑐰𑐣 𑑋 𑐀𑐩𑐶𑐳𑑄 𑐩𑑂𑐴𑐫𑑂 𑐩𑑂𑐴𑐫𑑂 𑐳𑐣𑐵𑑅 𑐏𑑂𑐫𑐵𑑅 𑐫𑐵𑑅𑐰𑑅𑐧𑐮𑐫𑑂 𑐰𑐫𑐵 𑐩𑑂𑐴𑐫𑑂 𑐡𑐸𑐣𑐾 𑐡𑐸𑐣𑐾 𑐠𑑂𑐫𑑄𑐎 𑐎𑐸𑐔𑐸𑐎𑐸𑐔𑐸 𑐩𑐶𑐣𑐵𑐰𑐮 𑑋
𑐖𑐶𑐩𑐶 𑐣𑑄 𑐣𑐫𑐾 𑐥𑐶𑐟𑑂𑐫𑐵𑐟 𑑋 𑐖𑐶𑐩𑐶𑐟 𑐣𑑄 𑐣𑐎𑐶 𑐬𑐾, 𑐰𑐫𑐵 𑐣𑑂𑐫𑐟𑐵𑐮𑐫𑑂 𑐔𑐸𑐥𑐵 𑐣𑐣𑑄 𑐣𑐵𑐣𑐶𑐥𑐶𑑄𑐳𑑄 𑐰𑐿𑐟 𑐥𑐶𑐬𑐾 𑐫𑐵𑐟 𑑋 𑐰𑑄 𑐀𑐩𑐶𑐟 𑐣𑑄 𑐣𑐳𑐵 𑐀𑐬𑑂𑐜𑐬 𑐫𑐵𑐣𑐵𑐧𑐶𑐮 𑑋 𑐣𑐎𑐮 𑑋
𑐕𑐩𑑂𑐴 𑐴𑐟𑑂𑐟𑐵𑐎𑐟𑑂𑐟𑐵𑐩𑑂𑐴 – 𑐮𑐵𑐴𑐸𑐬𑐾 𑐩𑐸𑐬𑑂𑐐𑐵 𑑋 𑐐𑐣𑑄 𑐀𑐠𑐾𑑄 𑐟𑑂𑐰𑑅𑐟𑐾 𑐖𑑂𑐫𑐹 𑑋 𑐥𑐳𑐮𑑂𑐫𑐵 𑐳𑐵𑐴𑐸𑑄 𑐳𑐸𑐫𑐵𑐟 𑐕𑐸 𑐩𑐶𑐏𑐵 𑐨𑐵𑐫𑑂 𑐫𑐵𑐟 𑐩𑐳𑑂𑐫𑐹 𑑋 𑐕𑐩𑑂𑐴 𑐣𑐵𑐣𑐶𑐔𑐵𑑄 𑐮𑑂𑐴𑐵𑑅 𑐖𑑂𑐰𑐣𑐵𑑅, 𑐮𑐸𑐟𑑂𑐟𑐸𑐮𑐸𑐫𑐵𑑅 𑐴𑐾 𑐴𑑀𑐚𑐮𑐫𑐵 𑐟𑐮𑐫𑑂 𑐎𑑀𑐠𑐵𑐫𑑂 𑐧𑑂𑐰𑐣𑐵𑐫𑑄𑐎𑐮 𑑋 𑐰𑐫𑐵 𑐎𑐸𑐩𑐵𑐬𑐟𑑂𑐰 𑐨𑑄𑐐 𑐫𑐵𑐣𑐵𑐧𑐶𑐮 𑑋
𑐣𑐫𑐾 𑐳𑐶𑐢𑐮 𑑋 𑐟𑑂𑐫𑐵𑐣𑐸 𑐮𑐣 𑑋 𑐣𑑂𑐴𑑂𑐫𑐂𑐥𑐸𑐳𑐾 𑐣𑑄 𑐔𑑂𑐰𑐣 𑑋 𑐰𑐣𑐾 𑐮𑐵 𑐩𑐵𑐮 𑑋 𑐰𑐣𑐾𑐟 𑐰 𑐩𑐹𑐮𑐸𑐏𑐵 𑐥𑐵𑐏𑐾 𑐳𑐬𑐵𑐳𑐬 𑐥𑐮𑐵𑑅 𑐕𑐸 𑐣𑑂𑐴𑑂𑐫𑐵𑐎𑐮 – 𑐀𑐬𑐾 ! 𑐕𑐐𑐹 𑐟𑑅𑐢𑑄𑐐𑐸 𑐳𑐩𑐳𑑂𑐫𑐵𑑄 𑐎𑐎𑑂𑐎𑐸 𑐖𑑂𑐰𑑄 𑐰𑐮 𑑋
𑐢𑑂𑐫𑐧𑐵 𑑋
𑐢𑑂𑐫𑐧𑐵 𑐮𑐵 𑐡𑐸𑐐𑐸 𑐏 𑐴𑐾 𑐩𑐏𑐸𑐟 𑑋 𑐎𑑀𑐚 𑐦𑐶𑐣𑐵𑐟𑑅𑐐𑐸 𑐖𑐹𑐳𑐵 𑐳𑐵𑐴𑐸𑑄 𑐎𑑀𑐚 𑐟𑑂𑐰𑐎𑐵 𑐎𑐵𑐂𑐐𑐸 𑐖𑐸𑐂 𑑋 𑐟𑐬 𑐥𑐵𑐟𑑂𑐬𑐫𑐵𑐎𑐾 𑐎𑑀𑐚 𑐩𑐡𑐸 𑑋 𑐑𑐜𑐶 𑐣𑑂𑐴𑑂𑐫𑐵𑐣𑐵𑐟𑑅𑐐𑐸 𑐖𑐹𑐳𑐵 𑐳𑐵𑐴𑐸𑑄 𑐑𑐜𑐶 𑐟𑑂𑐰𑐎𑐵 𑐎𑐵𑐂𑐐𑐸 𑐖𑐸𑐂 𑑋 𑐟𑐬, 𑐥𑐵𑐟𑑂𑐬𑐫𑐵𑐎𑐾 𑐑𑐜𑐶 𑐩𑐡𑐸 𑑋 𑐩𑑀𑐧𑐵𑐂𑐮 𑐖𑑂𑐰𑐣𑐵 𑐖𑐹𑐐𑐸 𑐏𑑅𑐳𑐵 𑐳𑐵𑐴𑐸𑑄 𑐩𑑀𑐧𑐵𑐂𑐮 𑐮𑐵𑐎𑐵𑑅 𑐎𑐵𑐂𑐐𑐸 𑐖𑐸𑐂 𑑋 𑐟𑐬 𑐥𑐵𑐟𑑂𑐬𑐫𑐵𑐎𑐾 𑐩𑑀𑐧𑐵𑐂𑐮 𑐣𑑄 𑐩𑐡𑐸 𑑋
𑐳𑐵𑐴𑐸𑑄 𑐩𑑂𑐴𑐸𑐟𑐸 𑐰𑐵𑐰𑐵𑑄 𑐰𑐿𑐟 𑐨𑑂𑐰𑐳𑐸𑐎𑑂𑐎 𑐡𑐵𑐮 𑑋 𑐣𑑂𑐴𑐵𑐔𑑅 𑐣𑑂𑐴𑑂𑐫𑐂𑐥𑐸𑐎𑑂𑐎 𑐏𑑂𑐫𑐵𑑅 𑐫𑐵𑑅𑐰𑐫𑐵𑐔𑑂𑐰𑑄𑐥𑐶𑑄 𑐣𑐵𑐣𑐶𑐔𑐵𑐥𑐶𑑄𑐳𑑄 𑐣𑑄 𑐰𑐿𑐟 𑐔𑐶𑐔𑐶𑐟𑑂𑐫𑐵𑐟 𑑋 𑐳𑐵𑐴𑐸𑑄 𑐰𑐂𑐐𑐸 𑐳𑑃 𑐖𑑂𑐰𑐣𑐵𑑅 𑐳𑐵𑐮𑐵𑑅 𑐴𑑀𑐚𑐾𑐮𑐫𑐵 𑐡𑐸𑐣𑐾 𑐫𑑄𑐎𑐮 𑑋 𑐡𑑂𑐰𑑄𑐔𑐶𑑄𑐎 𑐡𑐫𑐵𑐔𑑂𑐰𑑄𑐐𑐸 𑐔𑐶𑐥 𑐳𑐶𑐂𑐎𑐮 𑑋 𑐳𑐧𑑂𑐧𑐸 𑐔𑐵𑐣𑑂𑐴𑐫𑑂 𑐥𑐳𑑅 𑐟𑐶𑐂 𑐟𑑂𑐫𑐫𑐾𑐎𑐵𑑅 𑐰𑐫𑐵 𑐖𑐣𑑂𑐴𑐸 𑐦𑐵𑐟𑐫𑑂 𑐫𑐵𑑄𑐎𑐫𑐵𑑅 𑐮𑐵𑐎𑐩𑑄 𑐔𑑂𑐰𑐵𑐣𑐵𑑅 𑐳𑐟𑐎𑐫𑑂 𑐠𑑂𑐫𑑄𑐎 𑐴𑐸𑐟𑐵𑑄𑐔𑐵 𑐣𑐎𑐮 𑑋
𑐠𑐸𑐏𑐾 𑑋
𑐩𑐫𑑂𑐖𑐸 𑐥𑐵𑐟𑑂𑐬𑐫𑐵𑐟 𑐣𑑄 𑐰 𑐴𑐾 𑐳𑐩𑐳𑑂𑐫𑐵 𑐰𑐮 𑑋 𑐟𑑂𑐫𑑄𑐎 𑐣𑐫𑐵𑑅, 𑐫𑐵𑐄𑑃𑐎 𑐗𑐵𑐳𑐸 𑐮𑐣𑐵𑑅 𑐥𑐶𑐴𑐵𑑄 𑐰𑐫𑐾𑐟𑑂𑐫𑐣𑑄 𑐢𑑂𑐫𑐧𑐵𑑄 𑐴𑐾 𑐎𑐎𑑂𑐎𑐸 𑐖𑑂𑐰𑑄 𑐰𑐮 𑑋
𑐰𑐫𑐵𑐎𑐾 𑐣𑑄 𑐢𑑂𑐫𑐧𑐵 𑐮𑐵 𑐡𑐸𑐐𑐸 𑐏 𑐴𑐾 𑐩𑐏𑐸𑐟 𑑋 𑐳𑐶𑐏𑑅 𑐎𑑂𑐰𑐏𑐵𑐣𑐵 𑐟𑑅𑐐𑐸 𑐖𑐹𑐳𑐵 𑐳𑐶𑐏𑑅 𑐟𑑂𑐰𑐫𑐵𑐧𑐷𑐐𑐸 𑐖𑐸𑐂 𑑋 𑐟𑐬 𑐥𑐵𑐟𑑂𑐬𑐫𑐵𑐎𑐾 𑐳𑐶𑐏𑑅 𑐩𑐡𑐸 𑑋 𑐀𑑄𑐐𑐹 𑐣𑑂𑐴𑑂𑐫𑐵𑐣𑐵𑐟𑑅𑐐𑐸 𑐖𑐹𑐳𑐵 𑐀𑑄𑐐𑐸 𑐟𑑂𑐰𑐫𑐵𑐧𑐷𑐐𑐸 𑐖𑐸𑐂 𑑋 𑐟𑐬 𑐥𑐵𑐟𑑂𑐬𑐫𑐵𑐎𑐾 𑐀𑑄𑐐𑐸 𑐩𑐡𑐸 𑑋 𑐩𑑀𑐧𑐵𑐂𑐮 𑐖𑑂𑐰𑐣𑐵𑐖𑐹𑐐𑐸 𑐏𑑅𑐳𑐵 𑐩𑑀𑐧𑐵𑐂𑐮 𑐟𑑂𑐰𑑅𑐟𑐵 𑐠𑐎𑐷𑐐𑐸 𑐖𑐸𑐂 𑑋 𑐟𑐬 𑐥𑐵𑐟𑑂𑐬𑐫𑐵𑐎𑐾 𑐩𑑀𑐧𑐵𑐂𑐮 𑐣𑑄 𑐩𑐡𑐸 𑑋
𑐖𑑂𑐫𑐵 𑐫𑐵𑐂𑐥𑐶𑑄 𑐴𑐵𑐮 𑑋 𑐨𑐔𑐵 𑐨𑐔𑐵 𑐧𑑂𑐰𑑅 𑐣𑑄 𑐧𑐶𑐮 𑑋 𑐴𑐵𑑅𑐳𑑅 𑐟𑐵𑐫𑐵𑑅 𑐰𑑅𑐩𑑂𑐴 𑐳𑐵𑐴𑐸𑑄 𑐥𑐮𑐏𑑄 𑐳𑐎𑐟𑐵𑑄 𑐨𑐵𑐫𑑂 𑐠𑐸𑐂𑐎𑐮 𑑋 𑐠𑑂𑐰 𑐎𑐣𑑂𑐫𑐵, 𑐳𑐸𑐡𑐹𑐬𑐐𑐵𑐩𑑄 𑐣𑐎𑐟𑐶𑐣𑐶 𑐰𑑅𑐩𑑂𑐴 𑐏𑑅 𑑋 𑐱𑐴𑐬 𑐳𑑂𑐰𑐫𑐾𑐟 𑐰𑑅𑐩𑑂𑐴, 𑐱𑐴𑐬𑐫𑑂 𑐄𑐏𑐾𑐮𑐵𑑅 𑐠𑐸𑐏𑐾𑐮𑐵𑑅 𑐩𑐡𑐫𑐵𑑅 𑐟𑐣𑐵𑑅 𑐠𑐣 𑐮𑐵𑑅𑐰𑑅𑐩𑑂𑐴 𑐏𑑅 𑑋
– 𑐩𑑂𑐰𑐵𑑅𑐮 𑐩𑑂𑐰𑐵𑑅𑐮 𑑋 𑐥𑐶𑐟𑑂𑐫𑐣𑐵𑑅 𑐣𑑅𑐰𑑅𑐐𑐸 𑐏𑑅 𑑋 𑐢𑑂𑐫𑐧𑐵𑐫𑐵 𑐕𑐸𑑄 𑐏𑑃 𑐩𑐡𑐸 𑑋 𑐕𑐶𑐥𑐶𑑄 𑐴𑐸𑑃 𑑋
𑐳𑐵𑐴𑐸𑑄 𑐖𑑂𑐫𑐵 𑐫𑐵𑐂𑐥𑐶𑑄𑐟 𑐐𑐣 𑑋 𑐥𑐵𑐟𑑂𑐬𑐫𑐵𑐟 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐠𑑅𑐐𑐸 𑐡𑐸𑐣𑐾𑐔𑑂𑐰𑑄𑐐𑐸 𑐎𑑀𑐠𑐵𑐫𑑂 𑐧𑑂𑐰𑐣𑐵𑐫𑑄𑐎𑐮 𑑋
– 𑐳𑐵𑐴𑐸𑐫𑐵 𑐠𑑁𑑄𑐫𑐵 𑐔𑐵 𑐬𑑄𑐐𑐷𑐣 𑐖𑐸𑐂𑐐𑐸 𑐖𑐸𑐮 𑑋
𑐕𑐠𑑂𑐰𑑅 𑐀𑐳𑑂𑐫𑑅𑐟 𑐣𑑂𑐴𑐶𑐮 𑑋
𑐳𑐵𑐴𑐸𑑄 𑐥𑐵𑐟𑑂𑐬𑐫𑐵𑐎𑐾 𑐧𑐵𑑄𑐮𑐵𑐎 𑐴𑐾 𑐀𑐣𑑂𑐟𑐬𑑂𑐰𑐵𑐬𑑂𑐟𑐵 𑐎𑐵𑐮 𑑋 𑐀𑐣𑑂𑐟𑐬𑑂𑐰𑐵𑐬𑑂𑐟𑐵 𑐢𑐸𑐣𑐾𑐰𑑄 𑐳𑐵𑐴𑐸𑑄 𑐥𑐵𑐟𑑂𑐬𑐫𑐵𑐟 𑐩𑐴𑐵𑐣𑐐𑐬𑐷𑐫 𑐳𑑄𑐳𑑂𑐎𑐺𑐟𑐶 𑐧𑑂𑐰𑐮𑐣𑐵𑐰𑑅𑐐𑐸 𑐧𑐵𑐏𑑄𑐫𑐵 𑐩𑐹𑐟𑐶 𑐳𑐰𑐵𑑅 𑐎𑐵𑐫𑐾𑐎𑐾 𑐧𑐶𑐮 𑑋 𑐩𑐶𑐳𑐵 𑐩𑐶𑐖𑑄 𑐢𑐫𑐵𑐐𑐸 𑐕𑐸 𑐏𑑅 ? 𑐧𑐵𑑄𑐮𑐵𑐎 𑐢𑑂𑐰𑐵𑐠𑐸𑐂𑐎𑐵 𑐧𑐶𑐮 𑑋
𑐀𑐮𑐾 𑑋 𑐎𑐣𑑂𑐴𑐫𑑂 𑐎𑐸𑐣𑑂𑐴𑐸 𑐥𑐵𑐟𑑂𑐬𑑄 𑐴𑐾 𑐩𑐳𑐷𑐎 𑐥𑐵𑐟𑑂𑐬𑐫𑐵𑐟 𑐩𑐴𑐵𑐣𑐐𑐬𑐫𑐵 𑐕𑐐𑐹 𑐟𑐳𑐎𑑄 𑐣𑐵𑑄𑐖𑐵𑑅𑐐𑐸 𑐜𑐵𑐣𑑂𑐳 𑐬𑐾𑐲𑑂𑐚𑐸𑐬𑐾𑐣𑑂𑐚𑐫𑐵 𑐩𑐵𑐮𑐶𑐎𑐫𑐵𑐟 𑐣𑐶𑐐𑐹 𑐮𑐵𑐏𑑄 𑐩𑐶𑐫𑐵𑐧𑐶𑐮 𑑋
𑐥𑐵𑐟𑑂𑐬 𑑋
𑐧𑐵𑐏𑐣𑑄 𑐥𑐶𑐴𑐵𑑄 𑐰𑐫𑐵𑑅 𑐢𑐵𑐟𑑂𑐠𑐾𑑄𑐐𑐸 𑐖𑐶𑐣𑑂𑐡𑐐𑐷𑐫𑐵 𑐀𑐣𑐸𑐨𑐰 𑐫𑐵𑑅𑐰𑑅𑐩𑑂𑐴 𑐥𑐵𑐟𑑂𑐬 𑑋
𑐖𑐶𑐣𑑂𑐡𑐐𑐷𑐫𑐵 𑐠𑐷𑐠𑐷 𑐳𑐰𑐵𑑅 𑐎𑐵𑐫𑐾𑐐𑐸𑐮𑐶𑐂 𑐩𑐳𑑂𑐟 𑐖𑐸𑐮 𑑋
𑐣𑑂𑐴𑐵𑐥𑐵 𑑋
𑐩𑐩𑑅 𑐕𑐐𑐹 𑐥𑑂𑐮𑐾𑐚 𑑋 𑐥𑐷𑐖𑐵 𑐕𑐎𑐹 𑑋 𑐳𑐹𑐥 𑐕𑐐𑐹 𑐧𑐵𑐄𑐮 𑐟𑑂𑐰𑑄𑐧𑐮𑐫𑑂 𑐢𑑂𑐫𑐧𑐵 𑐢𑐫𑐵𑐐𑐸 𑐩𑐳𑐶𑐫𑐵𑑅 𑐢𑑂𑐫𑐧𑐵 𑐩𑐡𑐫𑐵𑑅 𑐰𑐵𑐠𑐵𑐰𑐵𑐠𑐵 𑐎𑑄𑐩𑑂𑐴 𑐥𑐵𑐟𑑂𑐬 𑑋
𑐁𑑅 𑑋
𑐁𑑅 𑐰𑐫𑐵 𑐢𑑂𑐫𑐧𑐵 𑐢𑐫𑐵𑐐𑐸 𑐕𑐸𑑄 𑐩𑐏𑐫𑐵 𑐧𑐶𑐮 𑑋 𑐣𑑂𑐴𑐶 𑐣𑑂𑐴𑐶𑑄 𑐰𑐫𑐵𑐟 𑐢𑑂𑐫𑐧𑐵𑑄 𑐳𑑂𑐰𑐵𑑄𑐰𑐵 𑐐𑐵𑐫𑐵𑐔𑑂𑐰𑐣 𑑋 𑐀𑐬𑑂𑐠𑐵𑐟𑑂 𑐥𑐵𑐟𑑂𑐬 𑐱𑐴𑐬𑐫𑐵 𑐣𑐵𑑄𑐖𑐵𑑅𑐩𑑂𑐴 𑐜𑐵𑐣𑑂𑐳𑐬 𑐖𑐸𑐮 𑑋
𑐡𑐾𑐫𑐵 𑐳𑐩𑑂𑐨𑑂𑐬𑐵𑐣𑑂𑐟 𑐰𑐬𑑂𑐐 – 𑐎𑐬𑑂𑐩𑐔𑐵𑐬𑐷, 𑐰𑐎𑐶𑐮, 𑐥𑑂𑐬𑐵𑐢𑑂𑐫𑐵𑐥𑐎, 𑐮𑐾𑐏𑐎, 𑐎𑐮𑐵𑐎𑐵𑐬, 𑐳𑐩𑐷𑐎𑑂𑐲𑐎, 𑐰𑐶𑐡𑑂𑐫𑐵𑐬𑑂𑐠𑐷, 𑐳𑐵𑐴𑐸, 𑐩𑐴𑐵𑐖𑐣 𑐰𑐫𑐵 𑐖𑑅𑐏𑑅 𑐴𑐵𑑄 𑐨𑐸𑐣𑐾 𑐠𑐾𑑄 𑐨𑐸𑐣𑐵𑐔𑑂𑐰𑐣 𑑋 𑐥𑑂𑐫𑐵𑐏𑑄𑐥𑐵 𑐎𑐵𑐎𑐵𑑄 𑐥𑐵𑐟𑑂𑐬 𑐳𑐸𑐫𑐵 𑐳𑐸𑐫𑐵 𑐩𑐸𑐮𑐫𑑂 𑐦𑑂𑐫𑐟𑐹 𑐰𑐣– 𑐄𑐩𑐶𑐳𑑄 𑐠𑑅𑐟 𑐢𑐣𑑂𑐫 𑐢𑐣𑑂𑐫 𑐟𑐵𑐫𑐾𑐎𑐮 𑑋
𑐥𑐵𑐟𑑂𑐬𑐫𑐵 𑐎𑐩𑐵𑐮 𑐴𑐾 𑐠𑑂𑐰 𑐎𑐶, 𑐳𑑄𑐐𑐷𑐟𑐫𑐵 𑐟𑐵𑐮𑐫𑑂 𑐦𑑀𑐴𑐬𑐵𑑄 𑐰𑑅𑐐𑐸 𑐮𑐏𑐫𑑂 𑐖𑐧 𑐥𑐔𑐶𑐣𑐵𑑄𑐐𑐵𑑄 𑐖𑐸𑐫𑐵𑑅 𑐩𑑂𑐰𑑅𑐮𑑂𑐴𑐸𑐂, 𑐴𑐮𑐫𑑂 𑐔𑑂𑐰𑑄𑐥𑐶𑑄 𑐳𑐎𑐮 𑐩𑐣𑐹𑐟 𑐩𑑂𑐴 𑐕𑐩𑑂𑐴𑑄 𑐗𑐹𑐔𑐵𑐫𑐾𑐎 𑐥𑑂𑐫𑐵𑐂 𑑋
𑐥𑐵𑐟𑑂𑐬 𑐕𑐎𑐮𑑄 𑐧𑐶𑐏𑑂𑐫𑐵𑐟 𑐖𑐸𑐮 𑑋
𑐥𑐵𑐟𑑂𑐬𑐫𑐵 𑐣𑑂𑐴𑑂𑐫𑑅𑐣𑐾 𑐩𑐐𑐢𑐫𑐵 𑐀𑐩𑑂𑐧𑐥𑐵𑐮𑐷 𑐦𑐶𑐎𑑂𑐎𑐵 𑐖𑐸𑐮 𑑋 𑐥𑐵𑐟𑑂𑐬 𑐩𑐴𑐵𑐣𑐐𑐬𑐫𑐵 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐣𑐸𑐐𑑅𑐫𑐵 𑐢𑐸𑐎𑐢𑐸𑐎𑐷 𑐖𑐸𑐫𑐵𑐧𑐶𑐮 𑑋 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐩𑑀𑐧𑐵𑐂𑐮 𑐩𑑀𑐧𑐵𑐂𑐮𑐫𑑂 𑐰𑐫𑐵 𑐥𑑀𑐖 𑐥𑑀𑐖𑐫𑐵 𑐎𑐶𑐥𑐵 𑐳𑐾𑐨 𑐖𑐸𑐮 𑑋
𑐥𑐵𑐟𑑂𑐬𑑄 𑐥𑑂𑐫𑐵𑐏𑑄𑐥𑐵 𑐎𑐫𑐵𑑄 𑐔𑑂𑐰𑐣 𑑋 𑐥𑑂𑐫𑐵𑐏𑑄𑐥𑐵 𑐎𑐵𑐎𑐵𑑄 𑐥𑐵𑐟𑑂𑐬𑑄 𑐩𑐴𑐵𑐣𑐐𑐬𑐷𑐫 𑐳𑑄𑐳𑑂𑐎𑐺𑐟𑐶𑐫𑐵𑐟 𑐧𑐵𑑄𑐮𑐵𑐎 𑐢𑑂𑐰𑐵𑐠𑐸𑐂𑐎𑐮 𑑋
𑐀𑐮𑐾, 𑐕𑐣𑑂𑐴𑐸 𑐡𑐎𑑂𑐰 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐟 𑐩𑑂𑐰𑐵𑐫𑑂𑐔𑐸𑐂𑐎𑐵𑑅 𑐩𑐴𑐵𑐣𑐐𑐬𑐫𑐵 𑐟𑑅𑐩𑐶𑐩𑑂𑐴 𑐳𑐵𑐴𑐸𑐫𑐵 𑐥𑐶𑐣𑐾𑐫𑐵𑐩𑑂𑐴 𑐎𑐮𑐵𑑅 𑐖𑐸𑐫𑐵𑑅 𑐳𑐸𑐚𑐸𑐎𑑂𑐎 𑐰𑐣𑐵𑐧𑐶𑐮 𑑋
𑐥𑐵𑐟𑑂𑐬𑐫𑐵𑐟 𑐳𑐩𑐵𑐖𑑄 𑐟𑐳𑐎𑑄 𑐔𑐮𑐵𑐏 𑐖𑐸𑐂 𑐳𑐫𑐾𑐎𑐵𑐧𑐶𑐮 𑑋
𑐔𑐮𑐵𑐏𑐩𑑂𑐴 𑐥𑐵𑐟𑑂𑐬 𑐳𑐵𑐴𑐸𑐫𑐵 𑐱𑑀𑐎𑐾𑐳𑐫𑐵 𑐧𑑂𑐰𑐳𑐵 𑐖𑐎 𑐖𑐸𑐫𑐵𑐔𑑂𑐰𑐣𑐷𑐐𑐸 𑐏𑑃 𑐴𑐾 𑐩𑐣𑑂𑐟 𑑋 𑐰𑑄 𑐠𑑅𑐫𑐵𑐟 𑐳𑐵𑐴𑐸𑐫𑐵 𑐀𑐦𑐶𑐳𑐫𑑂 𑐂𑐣𑑂𑐨𑐮𑑂𑐨 𑐫𑐵𑐫𑐵𑑄 𑐫𑑄𑐎𑐮 𑑋 𑐧𑐸𑐮𑐸𑐴𑐸𑑃 𑐰𑑂𑐫𑐵𑐥𑐵𑐬𑐶𑐎 𑐮𑐵𑐐𑐵𑐫𑑂 𑐠𑑅𑐐𑐸 𑐩𑑂𑐴𑐳𑐷𑐎𑐵 𑐳𑑂𑐠𑐵𑐥𑐶𑐟 𑐫𑐵𑐟 𑑋
𑐁𑑅 𑐢𑐫𑐵𑐔𑑂𑐰𑐣𑐾 𑐩𑑂𑐰𑐵𑑅𑐮 𑑋 𑐳𑐵𑐴𑐸𑐫𑐵 𑐡𑐎𑑂𑐰 𑐳𑐎𑑂𑐰 𑐎𑐵𑐬𑑀𑐧𑐵𑐬𑐫𑐵 𑐰 𑐴𑐬𑑂𑐟𑐵𑐎𑐬𑑂𑐟𑐵 𑐖𑐸𑐮 𑑋
𑐧𑐳𑑂 𑑋 𑐠𑐸𑐠𑐵𑐫𑑂 𑐥𑐵𑐟𑑂𑐬 𑐨𑐟𑐶𑐔𑐵 𑐨𑐵𑐰𑐸𑐎 𑐖𑐸𑐮 𑑋 𑐩𑐵𑑄 𑐖𑐸𑐫𑐵𑐫𑐵 𑐀𑐣𑐸𑐨𑐰 𑐎𑐵𑐫𑐾𑐟 𑐥𑐵𑐟𑑂𑐬 𑐮𑐵𑐮𑐵𑐫𑐶𑐟 𑐖𑐸𑐮 𑑋
𑐩𑐵𑑄 𑑋
𑐰𑐫𑐵 𑐩𑐵𑑄 𑐳𑐸 𑐏𑑅 𑐥𑐵𑐟𑑂𑐬𑑄 𑐩𑐳𑑂𑐫𑐹 𑑋 𑐟𑐬 𑐰 𑐩𑐵𑑄 𑐖𑐸𑐂𑐟 𑐴𑐠𑐵𑐫𑑂 𑐔𑐵𑐮 𑑋
𑐥𑐵𑐟𑑂𑐬𑐫𑐵 𑐩𑐣 𑐕𑐏𑐾 𑐧𑑂𑐰𑐵𑑃𑐫𑑂 𑐰𑐣𑐵𑐔𑑂𑐰𑐣 𑑋 𑐃𑐫𑐵 𑐦𑐫𑑂 𑐩𑐾𑐏𑐾 𑐣𑑂𑐴𑑂𑐫𑐵𑑅 𑐰𑐣𑐵𑐔𑑂𑐰𑐣 𑑋
𑐕𑐣𑑂𑐴𑐸,
𑐱𑐴𑐬𑑄 𑐨𑐔𑐵 𑐟𑐵𑐥𑐵𑐎𑑂𑐎 𑐫𑐵𑐎𑑅𑐔𑐵 𑐎𑐵𑐬𑐫𑑂 𑐳𑐫𑐬 𑐫𑐵𑐣𑐵𑐔𑑂𑐰𑑄𑐧𑐮𑐫𑑂, 𑐁𑐎𑐵𑐗𑐵𑐎𑐵𑑄 𑐣𑑂𑐫𑐵𑐐𑑅 𑐏𑐸𑐐𑑅 𑐩𑐾𑐩𑐾𑐐𑐸 𑐎𑐵𑐬𑑄 𑐰𑐫𑐵𑐟 𑐑𑐾𑐬𑐾 𑐫𑐵𑑅𑐰𑐮 𑑋 𑐧𑐵𑐢𑑂𑐫 𑐖𑐸𑐫𑐵𑑅 𑐴𑐾 𑐰𑑄 𑐠𑑅𑐐𑐸 𑐎𑐵𑐬 𑐡𑐶𑐎𑐾𑐩𑐵𑐮 𑑋 𑐰𑑄 𑐠𑑅𑐐𑐸 𑐎𑐵𑐬 𑐖𑐎 𑐕𑐸 𑐡𑐶𑐎𑐮, 𑐩𑐾𑐩𑐾𑐐𑐸 𑐎𑐵𑐬𑐫𑑂 𑐔𑑂𑐰𑐣𑐵𑐰𑑅𑐥𑐶𑑄 𑐐𑐸𑐞𑑂𑐜𑐵𑐟𑐳𑐾𑑄 𑐰𑐫𑐵𑐟 𑐗𑐵𑐟𑐵𑐥𑐵𑐟𑐵 𑐫𑐵𑐣𑐵𑑅 𑐀𑐥𑐴𑐬𑐞 𑐫𑐵𑐣𑐵𑐫𑑄𑐎𑐮 𑑋
𑐥𑐵𑐟𑑂𑐬𑑄 𑐖𑐧 𑐩𑐶𑐏𑐵 𑐔𑐵𑐫𑐾𑐎𑐮, 𑐩𑐴𑐵𑐣𑐐𑐬𑑄 𑐫𑐎𑑂𑐰 𑐫𑐎𑑂𑐰 𑐟𑐵𑐥𑐵𑐎𑑂𑐎𑐔𑑂𑐰𑑄𑐐𑐸 𑐕𑐐𑐹 𑐎𑑀𑐛𑐷𑐂 𑐠𑑅𑐟 𑐠𑐳𑑅 𑐥𑐵𑐫𑐵𑐔𑑂𑐰𑑄𑐐𑐸 𑐮𑐸𑐂𑐎𑐮 𑑋
𑐮𑐶𑐥𑐵 𑐳𑐶𑐮 𑐥𑐵𑐟𑑂𑐬𑑄 𑑋 𑐠𑑂𑐰 𑐦𑐸𑐎𑑂𑐎 𑐳𑐵𑐴𑐸𑐫𑐵 𑐕𑐾𑑃𑐫𑑂 𑐔𑑂𑐰𑑄𑐩𑑂𑐴 𑐎𑐮𑐵𑑅𑐫𑐵 𑐫𑑀𑐖𑐣𑐵 𑐎𑐠𑑄 𑐖𑐹𑐐𑐸 𑐖𑐸𑐫𑐵𑐔𑑂𑐰𑐣 𑑋
𑐀𑐣𑑄 𑐮𑐶𑐥𑐵…
𑐀𑐣𑑄 𑐮𑐶𑐥𑐵…
𑐮𑐾𑐏𑐎 𑐰𑑃𑐫𑑂 𑐠𑐾𑑄 𑐖𑐸𑐮 𑑋 𑐰𑐫𑐵 𑐣𑐶𑐩𑑂𑐴𑑄 𑐥𑐵𑐟𑑂𑐬 𑐠𑐥𑐵𑐫𑑂𑐢𑑄𑐐𑐸 𑐩𑐴𑐵𑐣𑐐𑐬𑐫𑑂 𑐟𑐣 𑑋
𑐥𑐸𑐮𑐶𑐳𑐫𑐵𑐟 𑐏𑑀𑐮𑐸𑐰𑐵 𑐥𑑁 𑐧𑑂𑐫𑐹 𑐰𑐣𑐾, 𑐀𑑅𑐏𑐟𑑄 𑐰𑑃𑐫𑑂 𑐢𑐎𑐵𑑅 𑐧𑑂𑐰𑑅 𑐧𑐶𑐫𑐵𑐴𑐂 𑑋 𑐥𑐟𑑂𑐬𑐥𑐟𑑂𑐬𑐶𑐎𑐵𑐫𑑂 𑐰𑐶𑐖𑑂𑐘𑐵𑐥𑐣 𑐧𑑂𑐫𑐹 𑐰𑐣𑐾 – 𑐰𑐫𑐵 𑐏𑑃 𑐳𑐸𑐣𑐵𑑄 𑐥𑐟𑑂𑐫𑐵𑑅 𑐫𑐵𑐂 𑑋 𑐳𑐸𑐣𑐵𑑄 𑐕𑐵𑐥𑐾 𑐫𑐵𑐂 𑑋
‘𑐖𑐶𑐐𑐸 𑐥𑐵𑐟𑑂𑐬 𑐟𑐣 𑑋’ 𑐰𑑄 𑐳𑐸𑐫𑐵𑐎𑐾 𑐴𑐵𑐬𑐐𑐸𑐴𑐵𑐬 𑐦𑑂𑐰𑐣𑐾𑐐𑐸 ? 𑐮𑐾𑐏𑐎𑑄 𑐕𑐸𑑄 𑐴𑐾 𑐩𑐳𑐶𑐮 𑑋 𑐰 𑐠𑑅𑐠𑐩𑑂𑐴𑑄 𑐴𑐷𑐩𑐷 𑐔𑐵𑐮 𑑋 𑐴𑐷𑐩𑐷 𑐔𑐵𑐔𑐵𑑄 𑐴𑐾 𑐮𑐾𑐏𑐎 𑐩𑐴𑐵𑐣𑐐𑐬𑐫𑐵 𑐴𑐹𑐮 𑐴𑐹𑐮𑐫𑑂 𑐡𑐸𑐴𑐵𑑄 𑐰𑐣 𑑋
𑐦𑐶𑐮𑑂𑐩 𑐴𑐮 𑐴𑐮𑐫𑑂 𑐳𑑂𑐰𑑅 𑐖𑐸𑐮 𑑋
𑐀𑐫𑑂𑐮𑐵𑑅 𑐥𑐳𑑅 𑐥𑐳𑐮𑐫𑑂 𑐡𑐸𑐳𑑂𑐰𑑅 𑐖𑐸𑐮 𑑋
𑐬𑐵𑐣𑐷𑐥𑐸𑐏𑐹 𑐔𑐵𑑅 𑐴𑐸𑐮 𑑋 𑐥𑐵𑐬𑑂𑐎–𑐥𑐵𑐬𑑂𑐎𑐫𑑂 𑐩𑐵𑑅 𑐖𑐸𑐮 𑑋
𑐟𑐬, 𑐐𑐣𑑄 𑐩𑐮𑐹 𑑋
𑐮𑐾𑐏𑐎𑐫𑐵 𑐣𑐫𑐵 𑐟𑐶𑐮𑐫𑑂 𑐩𑐐𑑂𑐫𑐣 𑑋 𑐩𑐶𑐏𑐵𑑄 𑐣𑑂𑐴𑑂𑐫𑑅 𑐧𑐶𑐳𑐶 𑐰𑐣 𑑋 𑐳𑐸𑐠𑑄𑐣𑐶𑐳𑐾𑑄 𑐧𑐴𑐣𑐷 𑐧𑐵𑐔𑐵 𑐧𑐵𑐔𑐵 𑐟𑐎 𑐮𑐾𑐏𑐎 𑐄𑐏𑐾𑑄 𑐠𑐸𑐏𑐾𑑄 𑐟𑐣𑐵𑐔𑑂𑐰𑑄𑐥𑐶𑑄 𑐥𑐵𑐟𑑂𑐬 𑐩𑐵𑑅 𑐖𑐸𑐫𑐵𑐔𑑂𑐰𑐣 𑑋
𑐟𑐬, 𑐥𑐵𑐟𑑂𑐬 𑐐𑐣𑑄 𑐩𑐮𑐹 𑑋 𑐐𑐣𑑄 𑐩𑐏𑑄 𑑋
𑐠𑑅 𑐢𑐫𑐵𑐥𑐶𑑄 𑐳𑐸𑑄 𑐩𑐡𑐸𑐐𑐸 𑐠𑑂𑐰 𑐠𑐵𑐳𑐫𑑂 𑐰𑐫𑐵 𑐥𑐵𑐟𑑂𑐬 𑐐𑐣 𑐔𑑂𑐰𑐣 𑐖𑐸𑐂 𑑋 𑐕𑐸 𑐣𑐮 𑐖𑐸𑐂 𑑋 𑐮𑐾𑐏𑐎𑐫𑐵𑐟 𑐟𑐳𑐎𑑄 𑐴𑐾 𑐢𑐣𑑂𑐡𑐵 𑐖𑐸𑐮 𑑋 𑐠𑑂𑐰𑐴𑐾 𑐥𑐷𑐬𑑄 𑐮𑐾𑐏𑐎 𑐧𑐵𑐩𑑂𑐴 𑐖𑐸𑐮 𑑋
𑐕𑐣𑑂𑐴𑐸 𑑋
𑐟𑑅𑐣𑑂𑐴𑐸 𑐮𑐶𑐥𑐵𑐫𑐵 𑐕𑐣𑑂𑐴𑐸 𑑋
𑐰𑐴𑐾 𑐡𑐸𑐰𑐵𑐟𑐫𑑂 𑑋 𑐐𑐣 𑐰𑐫𑐵 𑐣𑐶𑐩𑑂𑐴 𑐥𑐵𑐟𑑂𑐬 𑐧𑐵𑐫𑐵𑐰𑑄𑐐𑐸 𑐏𑑅 𑑋 𑐀𑐣 𑐴𑐾 𑐮𑐾𑐏𑐎 𑐠𑑂𑐫𑐣 𑑋 𑐠𑐣𑑄 𑐐𑐸𑐏𑐾𑐥𑐵𑐏𑐾 𑐳𑑂𑐰𑐫𑐵𑑅 𑐰𑐣𑐾 𑐢𑐎𑐵𑑅 𑐧𑐶𑐔𑐵𑑅 𑐫𑐵𑐣𑐵𑐔𑑂𑐰𑑄𑐧𑐮𑐫𑑂, 𑐴𑐸𑑄𑐎𑐣 – 𑐰𑐫𑐵 𑐴𑐾 𑐩𑐶𑐖𑑄𑐥𑐵𑐟𑑂𑐬 𑐰𑐶𑐎𑐮 𑐮𑑂𑐴𑐵𑐟𑐫𑑂 𑐥𑐾𑐳𑑂𑐟𑑀𑐮 𑐖𑑂𑐰𑐣𑐵𑑅, 𑐟𑐸𑐟𑐵𑐩𑑄 𑐔𑐸𑐔𑐸𑑄 𑐕𑐥𑐵 𑐟𑐸𑐟𑐶 𑐮𑐸𑐟𑑂𑐟𑐸 𑐮𑐸𑐫𑐵𑑅 𑐰𑐂𑐔𑑂𑐰𑑄𑐐𑐸 𑐏𑐣 𑑋
𑐮𑐾𑐏𑐎𑐫𑐵 𑐮𑐫𑑂𑐟𑐵𑑅𑐫𑐵 𑐠𑐵𑑅𑐐𑐵𑑅 𑐩𑐣𑑂𑐟 𑑋 𑐰𑐫𑐵 𑐥𑐵𑐟𑑂𑐬 𑐮𑐸𑐮 𑑋 𑐰𑐫𑐵 𑐟𑑄𑐩𑑂𑐴 𑐥𑐵𑐟𑑂𑐬 𑐮𑐸𑐮 𑑋 𑐟𑐬, 𑐥𑐵𑐟𑑂𑐬 𑐢𑐵𑑅𑐳𑐵 𑐩𑐾𑐫𑑂 𑐩𑐶𑐏𑐵 𑐎𑐣𑐵𑑅 𑐮𑐾𑐏𑐎𑐫𑐵𑐟 𑐴𑐾 𑐧𑐣𑑂𑐡𑐸𑐎𑑄 𑐎𑐫𑐾𑐎𑐾 𑐎𑐠𑑄 𑐟𑐵𑐎𑐾 𑐫𑐵𑐣𑐵𑑅 𑐰𑐂𑐔𑑂𑐰𑐣 𑑋
𑐕𑐸 𑐖𑐹𑐐𑐸 𑐖𑐸𑐫𑐵𑐔𑑂𑐰𑐣 𑐢𑐵𑑅𑐳𑐵…
𑐟𑑅𑐣𑑂𑐴𑐸 𑐮𑐶𑐥𑐵𑐫𑐵 𑐕𑐣𑑂𑐴𑐸 𑑋 𑐥𑑂𑐫𑐏𑐾𑐬𑑄 𑐴𑐞𑑂𑐜𑐬 𑐣𑐣𑑄 𑐰 𑐮𑑃𑐫𑐵 𑐳𑐶𑐠𑑄 𑐳𑐶𑐠𑑄 𑐴𑐾 𑐰𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐀𑐠𑐾 𑐏𑑅𑐳𑐵𑑄 𑐕𑐐𑑅 𑐧𑐾𑐟𑑀𑐜𑑄 𑐧𑑂𑐰𑐵𑐎𑐵𑐴𑑅𑐐𑐸 𑐩𑐶𑐣𑐶𑐧𑐳𑑄 𑐰𑐫𑐵𑐟 𑐛𑐎𑑂𑐎𑐬 𑐣𑐎𑐮 𑑋
𑐏 𑐮𑐵 𑐩𑐶𑐣𑐶𑐧𑐳𑐫𑐵 𑐜𑑂𑐬𑐵𑐂𑐨𑐬𑑄 𑐄𑐑𑑂𑐬𑐶𑑄𑐩𑐫𑑂 𑐧𑑂𑐫𑐵𑐎𑑂 𑐫𑐵𑐣𑐵𑑅 𑐰𑐫𑐵𑐟 𑐏𑐟𑑂𑐟𑐩 𑐫𑐵𑐣𑐵𑐧𑐷𑐟𑑂𑐫𑑄𑐐𑐸 𑐏𑑅 𑑋 𑐰𑐫𑐵 𑐨𑐵𑐐𑑂𑐫 𑐧𑐮𑑂𑐮𑐵𑑅𑐐𑐸𑐮𑐶𑑄 𑐢𑐵𑐫𑐾𑐩𑐵𑐮, 𑐩𑐶𑐣𑐶𑐧𑐳𑐫𑑂 𑐔𑑂𑐰𑑄𑐥𑐶𑑄 𑐩𑐣𑐹𑐟 – 𑐀𑐫𑑂 𑐀𑐫𑑂 𑐩𑐣𑐹 𑐡𑐸, 𑐩𑐣𑐹 𑐡𑐸 𑐢𑐎𑐵𑑅 𑐴𑐵𑑅𑐐𑐸𑐮𑐶𑑄 𑐰𑑄 𑐀𑐠𑐾 𑐫𑐵𑐫𑐾𑐩𑐦𑐸𑐟 𑑋
𑐩𑐣𑐹𑐟 𑐮𑐵 𑐩𑐸𑐣𑐵 𑐴𑐾 𑐔𑑂𑐰𑑄𑐥𑐶𑑄 𑐏𑐟 𑑋 𑐗𑐣𑑂𑐣𑐾𑐮𑐶 𑐧𑑂𑐫𑐵𑐎𑑂 𑐫𑐵𑐣𑐵𑑅 𑐳𑑂𑐫𑐵𑐫𑐾𑐟𑑂𑐫𑑄𑐐𑐸 𑐢𑐵𑐢𑐵𑑄 𑐩𑐸𑐣𑐵𑐔𑑂𑐰𑑄𑐥𑐶𑑄 𑐩𑐣𑐹𑐟𑐳𑐾𑑄 𑐩𑐶𑐣𑐶𑐧𑐳𑐫𑐵𑐟 𑐔𑐸𑑄𑐔𑐸𑑄 𑐫𑐵𑐣𑐵𑐧𑐶𑐮 𑑋 𑐜𑑂𑐬𑐵𑐂𑐨𑐬𑐫𑐵𑐟 𑐮𑐚𑑂𑐛𑐵𑐫𑑂 𑐔𑐶𑐟 𑑋
𑐰 𑐮𑐵 𑐫𑐵𑐎𑑅𑐔𑐵 𑐏𑐟 𑑋 𑐠𑑅 𑐢𑐫𑐵𑐥𑐶𑑄 𑐳𑐸𑑄 𑐡𑐸𑐐𑐸 𑐴𑐾 𑐩𑐏𑐸 𑑋 𑐀𑐠𑐾 𑐏𑑅𑐳𑐵𑑄, 𑐰𑐫𑐵 𑐀𑐣 𑐠𑑅 𑐢𑐫𑐵𑐥𑐶𑑄 𑐫𑐎𑑂𑐰 𑐡𑐫𑐵𑐰𑐮 𑑋
‘𑐠𑑂𑐰 𑐖𑐶𑐩𑐶𑐩𑑂𑐴 𑐩𑐣𑐹 𑑋 𑐠𑑂𑐰 𑐖𑐶𑐩𑐶𑐩𑑂𑐴 𑐩𑐣𑐹’ 𑐢𑐵𑐢𑐵𑑄 𑐡𑐾𑐫𑐵 𑐰𑐶𑐥𑐎𑑂𑐲𑐷 𑐥𑐵𑐬𑑂𑐚𑐷𑐫𑐵 𑐩𑐣𑐹𑐟 𑐰𑐫𑐵 𑐥𑑃 𑐮𑐶𑐟 𑑋 𑐳𑑄𑐖𑑀𑐐 𑐐𑐸𑐖𑑂𑐰𑑅𑐐𑐸 𑐖𑐸𑐫𑐵𑐧𑐶𑐮 𑐢𑐵𑑅𑐳𑐵 – 𑐰 𑐩𑐶𑐣𑐶𑐧𑐳𑐫𑐵 𑐜𑑂𑐬𑐵𑐂𑐨𑐬 𑐳𑐟𑑂𑐟𑐵𑐢𑐵𑐬𑐷 𑐥𑐵𑐬𑑂𑐚𑐷𑐫𑐵 𑐎𑐵𑐬𑑂𑐫𑐎𑐬𑑂𑐟𑐵 𑐮𑐵𑐣𑐵𑐔𑑂𑐰𑐣 𑑋
𑐁𑑅 𑐢𑐫𑐵𑐔𑑂𑐰𑐣𑐾 𑐴𑐾 𑐩𑑂𑐰𑐵𑑅𑐮 𑑋 𑐰𑐫𑐵 𑐣𑐵𑐩𑐫𑑂 𑐔𑐎𑑂𑐎𑐵𑐖𑐵𑐩 𑐖𑐸𑐮 𑑋 𑐎𑑂𑐲𑐟𑐶𑐥𑐹𑐬𑑂𑐟𑐶 𑐰 𑐰𑐵𑐳𑑅𑐫𑐵𑐟 𑐎𑐫𑐵𑑅 𑐰𑐵𑐬𑑂𑐟𑐵𑐚𑑀𑐮𑐷 𑐐𑐛𑐣 𑐖𑐸𑐮 𑑋 𑐰 𑐱𑐴𑐬𑐫𑐵 𑐣𑐵𑑄𑐖𑐵𑑅𑐐𑐸 𑐴𑐳𑑂𑐥𑐶𑐚𑐮𑐫𑑂 𑐠𑐳𑑅 𑐥𑐵𑐫𑐵𑐔𑑂𑐰𑐣 𑑋
𑐥𑑂𑐫𑐣𑑂𑐴𑐸 𑐎𑐸𑐣𑑂𑐴𑐸 𑐰𑐵𑐬𑑂𑐟𑐵 𑐎𑑂𑐰𑐔𑐵𑐮 𑑋
𑐩𑐶𑐣𑐶𑐧𑐳 𑐳𑐾𑐰𑐵 𑐳𑐩𑐶𑐟𑐶𑑄 𑐳𑑂𑐰𑑄𑐐𑐹 𑐮𑐵𑐏 𑐥𑐸𑐮𑐵𑐧𑐶𑐮 𑑋 𑐰𑐫𑐵 𑐠𑑅 𑐢𑐵𑑅𑐥𑐶𑑄 𑐐𑐸𑐥𑐶𑑄 𑐰𑐵𑐬𑑂𑐟𑐵𑐫𑑂 𑐔𑑂𑐰𑑄𑐥𑐶𑑄 𑐏𑑅, 𑐩𑐢𑑂𑐫𑐳𑑂𑐠𑐟𑐵 𑐫𑐵𑑅𑐥𑐶𑑄 𑐥𑐸𑐮𑐶𑐳, 𑐐𑐸𑐥𑐶𑑄 𑐏𑑃 𑐩𑐶𑐮𑐾 𑐫𑐵𑑅𑐥𑐶𑑄 𑐏𑑅, 𑐳𑐎𑐮𑐾𑑄 𑐩𑐸𑐳𑐸𑐎𑐵𑐮 𑑋 𑐠𑑅𑐠𑐰𑐫𑑂 𑐡𑐎𑑂𑐰 𑐢𑑂𑐫𑐧𑐵 𑐂𑐣𑐵𑐎𑐵𑐮 𑑋
𑐳𑑂𑐠𑐶𑐟𑐶 𑐱𑐵𑐣𑑂𑐟 𑐖𑐸𑐮 𑑋 𑐧𑐴𑐣𑐷 𑐄𑐥𑐶𑑄 𑐰 𑐮𑐶𑐳𑐾 𑐴𑐾 𑐣𑐫𑐾 𑐟𑑂𑐰𑐣𑐾 𑐫𑐵𑐣𑐵𑑅 𑐧𑐶𑐡𑐵𑐧𑐵𑐖𑐶 𑐖𑐸𑐮 𑑋
𑐎𑐣𑑂𑐴𑐫𑑂 𑐎𑐸𑐣𑑂𑐴𑐸𑐣𑐶𑐳𑐾𑑄 𑐥𑐵𑐟𑑂𑐬 𑐧𑐾𑐰𑐵𑐬𑐶𑐳𑐾 𑐖𑐸𑐮 𑑋
𑐥𑐵𑐟𑑂𑐬 𑐧𑐾𑐰𑐵𑐬𑐶𑐳𑐾 𑐖𑐸𑐮 𑐢𑐫𑐵𑐐𑐸 𑐳𑐷𑐰𑑄 – 𑐴𑐳𑑂𑐥𑐶𑐟𑐮𑑄 𑐣𑑄 𑐰𑐂𑐟 𑐟𑐸𑐟𑐵𑑄 𑐕𑐥𑐸 𑐖𑑂𑐰𑑄𑐎𑐵𑑅 𑐥𑐶𑐣𑐾 𑐮𑐸𑐏𑐵𑐫𑑂 𑐰𑐵𑐫𑐾𑐴𑐮 𑑋
𑐟𑑂𑐰𑑅𑐢𑐸𑐐𑐸 𑐟𑐸𑐟𑐶 𑐮𑐸𑐟𑑂𑐟𑐸𑐮𑐸𑐫𑐵𑑅 𑐏𑐸𑐟𑑂𑐫𑐵𑑄 𑐏𑐸𑐟𑑂𑐫𑐵𑑄 𑐎𑐵𑐎𑐵𑑄 𑐴𑐳𑑂𑐥𑐶𑐟𑐮𑑄 𑐰𑐂𑐔𑑂𑐰𑑄𑐐𑐸 𑑋 𑐠𑐖𑐵𑑅𑐐𑐸 𑐱𑐴𑐬𑐫𑑂 𑐠𑑅𑐟 𑐥𑐵𑐟𑑂𑐬 𑐡𑐫𑐾𑐎𑐵𑑅 𑐠𑐣𑐾𑐴𑑅𑐩𑑂𑐴 𑐮𑐾𑐏𑐎𑐫𑐵𑐟 𑐧𑐵𑐎𑐶 𑐴𑐾 𑐟𑐫𑐾𑐩𑐏𑐸 𑐢𑐎𑐵𑑅 𑐥𑐵𑑅 𑐦𑐦𑑄𑐰𑑅𑐐𑐸 𑑋
𑐄𑐎𑐶𑑄 𑐰𑑄 𑐟𑐵𑐥𑐵𑐮𑑄𑐮𑐶𑐳𑐾𑑄 𑐮𑐾𑐏𑐎𑐫𑐵𑐟 𑐏𑐣𑐾𑐰𑑄 – 𑐰𑐫𑐵 𑐕𑐵𑐟𑐶 𑐴𑐾 𑐴𑑂𑐰𑐏𑐣𑐾𑐟 𑐥𑐾𑐳𑑂𑐟𑑀𑐮𑐫𑐵 𑐣𑐶𑐱𑐵𑐣𑐵 𑐟𑑅𑐐𑐸 𑑋
𑐮𑐾𑐏𑐎 𑐰𑐫𑐵 𑐥𑐴𑐔𑐴 𑐏𑐣𑐵𑑅 𑐐𑑂𑐫𑐵𑐟 𑑋 𑐠𑐣 𑐔𑑂𑐰𑐣𑐵𑑅 𑐨𑐶𑑄 𑐖𑐸𑐂𑐩𑐏𑐸 𑐢𑐎𑐵𑑅 𑐧𑐾𑐟𑑀𑐜𑑄 𑐧𑐶𑐳𑑂𑐫𑐸𑑄 𑐰𑐣𑐾𑐟 𑐕𑐸 𑐦𑐴𑐶𑐮 – 𑐄𑐏𑐾𑑄 𑐣𑑄 𑐰𑐫𑐵 𑐩𑐶𑐳𑐵 𑐥𑐵𑐟𑑂𑐬 𑐣𑐶𑐮𑐶𑐩𑐵 𑐗𑐸𑐮𑐶𑐗𑐸𑐮𑐶 𑐣𑑅𑐮𑐶 𑐣𑑅𑐮𑐶𑐐𑐸 𑐰𑐳𑐟𑐫𑑂 𑐊𑐜𑑂𑐳𑐐𑑂𑐬𑐳𑑂𑐟 𑐩𑑂𑐴 𑐖𑑂𑐰𑐣𑐵𑑅 𑐰𑐫𑐵 𑐕𑐵𑐟𑐶 𑐴𑑂𑐰𑐏𑐣𑐾𑐟 𑐥𑐾𑐳𑑂𑐟𑑀𑐮 𑐢𑐳𑑂𑐰𑐵𑐎𑐵𑐔𑑂𑐰𑐣 𑑋
𑐮𑐾𑐏𑐎 𑐛𑐶𑐒𑑂𑐐 𑐡𑐣 𑑋
𑐣𑐶𑐥𑐵 𑐮𑑂𑐴𑐵𑑅 𑐠𑐕𑑂𑐰𑐫𑐵𑑅 𑐁𑐟𑑂𑐩𑐳𑐩𑐬𑑂𑐥𑐞 𑐫𑐵𑐟 𑑋 𑐣𑐸𑐐𑑅 𑐴𑐾 𑐔𑐸𑑄 𑐔𑐸𑑄 𑐖𑐸𑐫𑐵𑑅 𑐢𑐹 𑐖𑐸𑐂𑐢𑐸𑑄𑐎𑐹𑐥𑐶𑑄 𑐥𑐵𑐟𑑂𑐬𑐟𑐳𑐾𑑄 𑐰𑐫𑐵 𑐁𑐟𑑂𑐩𑐳𑐩𑐬𑑂𑐥𑐞𑐫𑐵𑐟 𑐰𑐵𑐳𑑂𑐟𑐵 𑐩𑐫𑐵𑐳𑐾 𑐚𑑂𑐬𑐾𑐐𑐬 𑐟𑐶𑐫𑐵𑐧𑐶𑐮 𑑋
𑐩𑐴𑐵𑐣𑐐𑐬𑐫𑐵 𑐰𑑂𑐫𑐳𑑂𑐟 𑐡𑐸𑐰𑐵𑐟𑐫𑑂 𑐮𑐾𑐏𑐎 𑐰𑐶𑐨𑐟𑑂𑐳 𑐣𑐎𑑂𑐳𑐵𑑄 𑐔𑐵𑐟𑐸𑐰𑐵𑐟 𑑋
𑐣𑐶𑐩𑑂𑐴𑑄 𑐥𑐵𑐟𑑂𑐬 𑐀𑐮𑐥 𑐖𑐸𑐮 𑑋
…
𑐣𑐶𑐩𑑂𑐴𑑄 𑐥𑐵𑐟𑑂𑐬𑐟𑐳𑐾𑑄 𑐠𑐣𑐫𑐵 𑐖𑐷𑐰𑐣𑐫𑐵𑐟 𑐨𑑀𑐐𑐾 𑐫𑐵𑐣𑐵𑐰𑐣 𑑋
𑐁𑑅 𑐠𑑂𑐰 𑐥𑐵𑐟𑑂𑐬𑐟𑐳𑐾𑑄 𑐳𑐶𑐬𑑂𑐖𑐣𑐵 𑐫𑐵𑐣𑐵𑐠𑐎𑐹𑐐𑐸 𑐑𑐚𑐣𑐵𑑄 𑐫𑐵𑐣𑐵𑑅 𑐩𑐴𑐵𑐣𑐐𑐬÷𑐡𑐾𑐱𑑄 𑐕𑐸 𑐬𑐸𑐥 𑐎𑐵𑐂𑐐𑐸 𑐏𑑅 𑐰 𑐳𑑂𑐰𑐫𑐾𑐐𑐸, 𑐨𑑀𑐐𑐾 𑐫𑐵𑐫𑐾𑐐𑐸 𑐖𑐶𑐩𑑂𑐩𑐵 𑐠𑐣𑐔𑑂𑐰𑑄𑐥𑐶𑑄𑐟 𑐴𑐾 𑑋