𑐳𑐵𑑃𑐐𑐾 𑐳𑐨𑑂𑐫𑐟𑐵𑐫𑐵 𑐳𑐦𑐹 ‘𑐳𑐵𑑃𑐐𑐾 𑐡𑐬𑑂𑐥𑐞’ 𑐥𑐶𑐡𑑄𑐣

𑐳𑐵𑑃𑐐𑐾 𑐳𑐨𑑂𑐫𑐟𑐵 𑐳𑑄𑐬𑐎𑑂𑐲𑐞 𑐣𑐵𑐥𑑄 𑐰𑐶𑐎𑐵𑐳 𑐀𑐨𑐶𑐫𑐵𑐣𑑄 𑐥𑐶𑐎𑐵𑑅𑐐𑐸 ‘𑐳𑐵𑑃𑐐𑐾 𑐡𑐬𑑂𑐥𑐞’ 𑐣𑐵𑑄𑐫𑐵 𑐳𑐦𑐹 𑐠𑑁𑑄 𑐮𑑀𑐎𑐵𑐬𑑂𑐥𑐞 𑐫𑐵𑑅𑐐𑐸 𑐡𑐸 𑑋 𑐫𑐾𑑃𑐫𑐵 𑐳𑑀𑐴𑑂𑐬𑐏𑐸𑐚𑑂𑐚𑐾𑐫𑑂 𑐔𑑂𑐰𑑄𑐐𑐸 𑐮𑐾𑐏𑐣𑐵𑐠 𑐳𑐵𑐴𑐶𑐟𑑂𑐫 𑐳𑐡𑐣𑐫𑐵 𑐳𑐨𑐵𑐴𑐮𑐫𑑂 𑐄𑐐𑐸 𑐀𑐨𑐶𑐫𑐵𑐣𑐫𑐵 𑐀𑐨𑐶𑐫𑐣𑑂𑐟𑐵𑐟𑐫𑑂𑐳𑑄 𑐩𑑄𑐎𑐵𑑅 𑐎𑐠𑑄 𑐳𑐦𑐹 𑐮𑑀𑐎𑐵𑐬𑑂𑐥𑐞 𑐫𑐵𑑅𑐐𑐸 𑐏𑑅 𑑋

𑐐𑐞𑑂𑐜𑐎𑐷 𑐥𑑂𑐬𑐡𑐾𑐱𑐀𑐣𑑂𑐟𑐬𑑂𑐐𑐟 𑐟𑐣𑐴𑐸𑑃 𑐖𑐶𑐮𑑂𑐮𑐵𑐫𑐵 𑐰𑑂𑐫𑐵𑐳 𑐣𑐐𑐬𑐥𑐵𑐮𑐶𑐎𑐵𑐡𑐸𑐣𑐾 𑐮𑐵𑑅𑐐𑐸 𑐳𑐵𑑃𑐐𑐾 𑐄𑐥𑐟𑑂𑐫𑐎𑐵𑐫𑐵 𑐧𑐵𑐳𑐶𑐣𑑂𑐡𑐵𑐟𑐫𑑂 𑐎𑐸𑐟𑐮𑑄 𑐐𑐛𑐣 𑐖𑐹𑐐𑐸 𑐀𑐨𑐶𑐫𑐵𑐣𑑄 𑐳𑑂𑐠𑐵𑐣𑐷𑐫 𑐳𑐨𑑂𑐫𑐟𑐵, 𑐳𑑄𑐳𑑂𑐎𑐺𑐟𑐶, 𑐥𑐬𑐩𑑂𑐥𑐬𑐵 𑐰 𑐳𑐩𑐎𑐵𑐮𑐷𑐣 𑐳𑐵𑐩𑐵𑐖𑐶𑐎 𑐬𑐹𑐥𑐵𑐣𑑂𑐟𑐬𑐞𑐫𑐵𑐟 𑐡𑐳𑑂𑐟𑐵𑐰𑐾𑐖𑐷𑐎𑐬𑐞 𑐫𑐵𑐫𑐾𑐟 𑐳𑐦𑐹 𑐥𑐶𑐎𑐵𑑅𑐐𑐸 𑐏𑑅 𑑋

𑐀𑐨𑐶𑐫𑐵𑐣𑐫𑐵 𑐎𑐖𑐶 𑐳𑐸𑐬𑐾𑐣𑑂𑐡𑑂𑐬 𑐰𑐵𑐐𑑂𑐮𑐾𑑄 𑐳𑐵𑑃𑐐𑐾 𑐡𑐬𑑂𑐥𑐞 𑐳𑐦𑐸𑐟𑐷 𑐄𑐥𑐟𑑂𑐫𑐎𑐵𑐫𑐵 𑐩𑑁𑐮𑐶𑐎 𑐩𑑂𑐴𑐳𑐷𑐎𑐵, 𑐨𑐵𑐲𑐵, 𑐖𑐷𑐰𑐣𑐱𑐿𑐮𑐷, 𑐳𑑄𑐳𑑂𑐎𑐵𑐬, 𑐳𑑄𑐳𑑂𑐎𑐺𑐟𑐶𑐫𑐵 𑐠𑐷 𑐠𑐷 𑐁𑐫𑐵𑐩 𑐣𑐵𑐥𑑄 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐁𑑅𑐟𑐎 𑐖𑐸𑐫𑐵𑑅 𑐨𑐰𑐶𑐲𑑂𑐫𑐟𑐎𑐫𑐵 𑐬𑐸𑐥𑐵𑐣𑑂𑐟𑐬𑐞 𑐥𑑂𑐬𑐎𑑂𑐬𑐶𑐫𑐵𑐳𑐩𑑂𑐧𑐣𑑂𑐢𑐷 𑐠𑐷 𑐠𑐷 𑐮𑐾𑐏, 𑐬𑐔𑐣𑐵 𑐰 𑐀𑐢𑑂𑐫𑐫𑐣 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫, 𑐳𑑄𑐳𑑂𑐎𑐺𑐟𑐶 𑐣𑐵𑐥𑑄 𑐳𑐵𑐩𑐵𑐖𑐶𑐎 𑐏𑑂𑐫𑑅𑐫𑐵 𑐰𑐶𑐱𑐶𑐲𑑂𑐚 𑐩𑐣𑐹𑐟𑐫𑑂𑐐𑐸 𑐧𑑂𑐰𑐟𑐶 𑐡𑐹𑐐𑐸 𑐏𑑅 𑑋 𑐮𑐶𑐳𑐾𑑄 𑐀𑐨𑐶𑐫𑐵𑐣𑐫𑑂 𑐫𑑀𑐐𑐡𑐵𑐣 𑐧𑐶𑐫𑐵𑐡𑐷𑐥𑐶𑑄 𑐰𑑂𑐫𑐎𑑂𑐟𑐶𑐟𑑂𑐰𑐟𑐫𑑂𑐟 𑐴𑑄𑐐𑐸 𑐏𑑅 𑑋 𑐠𑐸𑐐𑐸 𑐳𑐦𑐸𑐟𑐶𑑄 𑐳𑐵𑑃𑐐𑐾 𑐄𑐥𑐟𑑂𑐫𑐎𑐵𑐫𑐵 𑐡𑐸𑐐𑑂𑐫𑑄𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐔𑐾𑐟𑐣𑐵 𑐰 𑐂𑐟𑐶𑐴𑐵𑐳𑐫𑐵𑐟 𑐮𑐶𑐥𑐵𑐫𑐵 𑐥𑐸𑐳𑑂𑐟𑐵𑐟𑐫𑑂 𑐣𑐶𑐟𑐶𑑄 𑐳𑑄𑐬𑐎𑑂𑐲𑐞 𑐫𑐵𑐂𑐐𑐸 𑐨𑐮𑐳𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋