𑐨𑑁𑐔𑐶𑐫𑐵 𑐣𑐶𑐳𑐵𑐦

𑐕𑐩𑑂𑐴 𑐧𑐵𑐔𑐏𑐸𑑄 𑐳𑐶𑐩𑐵𑐫𑑂 𑐳𑑂𑐰𑑅 𑐡𑐫𑐾𑐎𑐵𑑅 𑐁𑐣𑐣𑑂𑐡𑑄 𑐔𑑂𑐰𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐕𑐩𑑂𑐴𑐸 𑐰 𑐣𑐫𑐾𑐟𑑂𑐰𑐣𑐾𑐐𑐸 𑐔𑐎𑑂𑐎𑐬𑐫𑑂 𑐀𑐣𑑂𑐣 𑐧𑐵𑐮𑐷 𑐧𑐵𑑄𑐮𑐵𑐎 𑐳𑐫𑐵𑐔𑑂𑐰𑑄𑐐𑐸 𑐧𑐸𑑃𑐂 𑐠𑑂𑐫𑑄𑐎𑑅𑐰𑐣 𑑋 𑐀𑐣 𑐩𑑀𑐖𑑄
𑐣𑐫𑐾 𑐟𑑂𑐰𑐣𑐾 𑐏𑑄𑐧𑐮𑐫𑑂 𑐰 𑐳𑐵𑐥 𑐮𑐫𑑂𑐟𑐵𑐮 𑑋 𑐀𑐥𑑂𑐰𑑅 𑐮𑐫𑑂𑐮𑐫𑑂𑐟𑐵𑑅𑐧𑐮𑐫𑑂 𑐰𑐫𑐵 𑐧𑐴𑐣𑐷 𑐠𑑅𑐐𑐸 𑐳𑑂𑐰𑐮𑐫𑑂 𑐮𑐶𑐴𑐵𑑄 𑐰𑐣𑐾𑐩𑐵𑐣𑐶 𑐢𑐫𑐵𑐐𑐸 𑐴𑐾 𑐮𑑂𑐰𑑅𑐩𑐣 𑑋 𑐰𑑄 𑐀𑐣𑐫𑑅 𑐔𑑂𑐰𑐣𑐵𑑅 𑐣𑑂𑐴𑑂𑐫𑐵𑐂𑐥𑐸𑐎 𑐣𑑂𑐴𑐶 𑐕𑑂𑐫𑐵𑐣𑐵𑐔𑑂𑐰𑐣 𑑋

𑐠𑐸𑐏𑐾𑐬 𑐳𑐣𑐶𑐮𑐫𑑂 𑐕𑐩𑑂𑐴 𑐏𑐬𑐵𑐔𑐵 𑐄𑐐𑐸 𑐳𑐶𑐩𑐵 𑐡𑐸𑐠𑐵𑐫𑑂 𑐰𑐮, 𑐐𑐣 𑐧𑐵𑐔𑐏𑐸𑑄𑐫𑐵 𑐳𑑂𑐰𑑅 𑐡𑐸𑐐𑐸 𑐏𑑅 𑑋 𑐳𑐶𑐩𑐵 𑐕𑐟𑐶𑑄 𑐴𑐾 𑐟𑐖𑐵𑑅 𑐩𑐖𑐹 𑑋 𑐀𑐠𑐾 𑐖𑐹𑐧𑐮𑐫𑑂 𑐏𑐬𑐵𑐔𑐵𑑄 𑐄𑐐𑐸 𑐳𑑂𑐰𑐮𑐫𑑂 𑐳𑑂𑐰𑑅𑐧𑐮𑐫𑑂 𑐳𑑂𑐰𑑅 𑐏𑐵𑐮𑐶 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣 𑑋 𑐳𑑂𑐰𑑅 𑐣𑑂𑐫𑐵𑐎𑑂𑐎 𑐴𑐾 𑐟𑑅𑐢𑑄 𑑋 𑐀𑐠𑐾 𑐖𑐹𑐧𑐮𑐫𑑂 𑐏𑐬𑐵𑐔𑐵 𑐕𑐩𑑂𑐴 𑐮𑐵 𑐀𑐣 𑐫𑐵𑐄𑑃𑐎 𑐴𑐾 𑐣𑑂𑐴𑑂𑐫𑑄 𑑋 𑐰𑐫𑐵𑐟 𑐠𑑂𑐰 𑐡𑐫𑐾𑐎𑐵𑐟𑑅𑐐𑐸 𑐳𑑂𑐰𑑅 𑐳𑐵𑐥 𑐴𑐾 𑐫𑐮, 𑐀𑐮𑐾 𑐀𑐣 𑐴𑐾 𑐔𑑂𑐰𑐣𑐾𑐐𑐸 𑐎𑑂𑐰𑑅𑐕𑐶𑐟 𑑋

𑐕𑐸𑑄 𑐣𑑂𑐴𑐶 𑐮𑐶𑐥𑐵 𑐧𑐵𑐔𑐏𑐸𑑄 𑐩𑑀𑐖𑑄 𑐣𑐫𑐵𑑅 𑐠𑐥𑐵𑐫𑑂 𑐐𑑂𑐰𑐵𑐬𑐵 𑐖𑐸𑐂𑐎 𑐮𑑂𑐴𑑂𑐰𑐣𑐵𑐰𑐮 𑑋 𑐰𑐫𑐵𑐟 𑐠𑑅𑐐𑐸 𑐳𑑂𑐰𑑅 𑐮𑐸𑐩𑐣𑐵𑐰𑐮 𑑋 𑐰 𑐮𑐶𑐴𑐵𑑄 𑐰𑐮 𑑋 𑐀𑐣 𑐠𑑂𑐫𑑄𑐎𑐵𑑅 𑐰𑑄 𑐏𑐣, 𑐰𑐫𑐵𑐐𑐸 𑐳𑑂𑐰𑐮𑐫𑑂 𑐮𑐵 𑐏𑐬𑐵𑐔𑐵 𑐢𑐎𑐵𑐳𑐵 𑐁𑐣𑐣𑑂𑐡𑑄 𑐔𑑂𑐰𑐣𑐵𑐔𑑂𑐰𑐣 𑑋 𑐰𑐫𑐵𑐟 𑐟𑑄 𑐰𑐮 𑑋 𑐰𑑄 𑐏𑐬𑐵𑐔𑐶𑐟 𑐢𑐵𑐮, ‘𑐏𑐸𑑃 𑐧𑐾𑐂𑐩𑐵𑐣 ! 𑐖𑐶 𑐩𑐡𑐸𑐟𑐮𑐾𑑄 𑐖𑐶𑐐𑐸 𑐕𑐾𑑃𑐫𑑂 𑐡𑐸𑐴𑐵𑑄 𑐰𑐫𑐵 𑐎𑐵 𑐩𑐏𑐸𑐮𑐵 ? 𑐎𑐵 𑐥𑐶𑐴𑐵𑑃 𑐴𑐸𑑃, 𑐎𑐬𑑂𑐥𑐶𑐣𑐶 𑐕𑐾𑑃𑐫𑑂 𑐔𑑂𑐰𑐣𑐾𑐟 𑐩𑐕𑐵 𑐣𑑄 𑐩𑐖𑐹𑐮𑐵 𑐕 ?’

𑐏𑐬𑐵𑐔𑐵𑑄 𑐕𑐸𑑄 𑐩𑐏𑐸𑐠𑐾𑑄 𑐮𑐶𑐳 𑐧𑐶𑐮, ‘𑐐𑐣𑐫𑐵 𑐕𑑄𑐐𑐸 𑐕𑐾𑑃 ? 𑐐𑐸𑐐𑐸𑐥𑐟𑐶 𑐕𑑄𑐐𑐸 𑐕𑐾𑑃 ? 𑐠𑑂𑐰 𑐮𑐵 𑐖𑐶𑐐𑐸 𑐕𑐾𑑃 𑐎𑐵 𑑋 𑐰𑐾𑑄 𑐖𑐸𑐮 𑐮𑐵 𑐕 ? 𑐀𑐬𑐾 𑐟𑐸𑑄𑐠𑐶, 𑐥𑐸𑐏𑐹, 𑐀𑐠𑐰𑐵 𑐳𑐶𑐩𑐵 𑐕𑐎𑑂𑐰𑑅 𑐟𑑂𑐰𑑅𑐟𑐵 𑐳𑐸𑑄 𑐰𑐣 𑐢𑐵𑑅𑐳𑐵 𑐰𑑄 𑐠𑑅𑐐𑐸 𑐴𑐎 𑐣𑑄 𑐟𑑂𑐰𑑅𑐦𑐶𑐎𑐷 𑑋 𑐠𑐣 𑐮𑐵 𑐐𑐧𑐮𑐫𑑂 𑐟𑐎 𑐖𑐶 𑐡𑐸, 𑐰 𑐠𑑅𑐐𑐸 𑐴𑐾 𑐕𑐾𑑃 𑐖𑐸𑐂 𑑋 𑐮𑐶𑐥𑐵 𑐄𑐎𑐷 𑐣𑑂𑐴𑑂𑐫𑐵𑐩𑑂𑐴 𑐣𑑄 𑐔𑑂𑐰𑐣𑐾𑐦𑐂 𑑋 𑐁𑑅𑐫𑐵𑐟 𑐠𑑂𑐰 𑐖𑐶𑐐𑐸 𑐴𑐾 𑐕𑐾𑑃 𑐏𑑅 𑑋 𑐩𑑂𑐰𑐵𑑅𑐳𑐵𑑄 𑐩𑑂𑐰𑐵𑑅𑐳𑐵𑑄 𑐖𑐶 𑐣𑐵𑐥 𑐴𑐵𑑅 𑐰𑐫𑐵𑐔𑑂𑐰𑐣𑐾 𑐩𑐟𑐾 𑑋’

𑐠𑑂𑐰 𑐏𑑃 𑐣𑑂𑐫𑐣𑐵𑑅 𑐧𑐵𑐔𑐏𑐸𑑄𑐔𑐵 𑐢𑐵𑐮, ‘𑐠𑐠𑐾 𑐧𑐴𑐳 𑐫𑐵𑐣𑐵𑑃𑐔𑑂𑐰𑐣𑐵𑑄 𑐕𑐸𑑄 𑐣𑑄 𑐡𑐂𑐩𑐏𑐸𑑋 𑐳𑐸𑑄 𑐕𑐩𑑂𑐴 𑐥𑐞𑑂𑐜𑐶𑐟𑐫𑐵𑐠𑐵𑐫𑑂 𑐰𑐣𑐾 𑐣𑐸𑑋 𑐰𑑄 𑐳𑐸𑐫𑐵𑐐𑐸 𑐥𑐎𑑂𑐲𑐫𑑂 𑐦𑐿𑐳𑐮𑐵 𑐧𑐷 𑐰𑐫𑐵𑐟 𑐴𑐾 𑐠𑑂𑐰 𑐕𑐾𑑃 𑐡𑐂 𑑋’

𑐄𑐐𑐸 𑐳𑐶𑐩𑐵𑐫𑐵 𑐮𑐶𑐎𑑂𑐎𑑄 𑐏𑐸𑐳𑐶 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐀𑐣 𑐕𑐩𑑂𑐴 𑐡𑐵𑑄𑐐𑑂𑐬𑐵𑐩𑑂𑐴 𑐨𑑁 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐸𑑋 𑐰𑑄 𑐕𑐸𑑄 𑐢𑐬𑑂𑐩𑐥𑐵𑐛 𑐫𑐵𑐣𑐵𑐔𑑂𑐰𑑄𑐩𑑂𑐴 𑐠𑐾𑑄 𑐏𑐣𑐾𑐡𑐸𑑋 𑐀𑐠𑐾 𑐮𑐵 𑐨𑑁 𑐢𑐫𑐵𑐩𑑂𑐴 𑐏𑐬𑐵𑐔𑐵 𑐰 𑐔𑐏𑐸𑑄 𑐣𑐶𑐩𑑂𑐴𑐳𑑂𑐫𑐵𑑄 𑐣𑑄 𑐖𑐣𑑂𑐩𑐖𑐵𑐟 𑐱𑐟𑑂𑐬𑐸 𑐴𑐾 𑐏𑑅 𑑋 𑐟𑐬 𑐀𑐣 𑐩𑐾𑐥𑐶𑑄 𑐳𑐸𑑄 𑐩𑐡𑐸𑑋 𑐀𑐠𑐾 𑐖𑐹𑐧𑐮𑐫𑑂 𑐂𑐥𑐶𑑄 𑐣𑐶𑐩𑑂𑐴𑐾𑐳𑐶𑐣𑑄 𑐣𑑄 𑐰𑐫𑐵𑐠𑐵𑐫𑑂 𑐴𑐾 𑐰𑐣𑐵 𑐣𑑂𑐫𑐵𑐫 𑐦𑑂𑐰𑑄𑐰𑐣𑐾𑐐𑐸 𑐥𑐵𑐫𑑂𑐕𑐶 𑐟𑐵𑐫𑐾𑐎𑐮 𑑋 𑐂𑐥𑐶𑑄 𑐟𑐷𑐖𑐎 𑐨𑑁𑐫𑐵 𑐣𑑂𑐴𑑂𑐫𑑅𑐣𑐾 𑐰𑐣 𑐀𑐮𑐾 𑐠𑑅𑐥𑐶𑐣𑐶𑐐𑐸 𑐳𑐩𑐳𑑂𑐫𑐵 𑐎𑐣 𑑋

𑐂𑐩𑐶𑐳𑑄 𑐢𑐵𑐮, ‘𑐖𑐶𑐩𑐷𑐳𑑄 𑐠𑑅𑐥𑐶𑐣𑐶 𑐳𑐩𑐳𑑂𑐫𑐵 𑐮𑐵 𑐎𑐣𑐾 𑐢𑐸𑐣 𑑋 𑐁𑑅 𑐠𑐸𑐎𑐶𑐫𑐵 𑐳𑐩𑐵𑐢𑐵𑐣 𑐕𑐸 𑐏, 𑐰 𑐕𑐶𑑄 𑐢𑐫𑐵𑐡𑐷 𑐩𑐵𑐮 𑑋 𑐐𑐸𑐩𑑂𑐴 𑐳𑐟𑑂𑐫 𑐏𑑅 𑐰𑐫𑐵𑐟 𑐰 𑐳𑑂𑐰𑑅 𑐧𑐶𑐫𑐵𑐡𑐷 𑐩𑐵𑐮, 𑐀𑐮𑐾 𑐐𑐸𑐩𑑂𑐴 𑐀𑐳𑐟𑑂𑐫 𑐏𑑅 𑐰𑐫𑐵𑐟 𑐕𑐶𑑄 𑐣𑐫𑐵𑐡𑐷 𑐩𑐵𑐮 𑑋’

“𑐀𑐴𑑀 ! 𑐠𑑂𑐰 𑐕𑐶𑐩𑐶𑐳𑑄 𑐕𑐸 𑐏𑑃 𑐮𑑂𑐴𑐵𑐣𑐵𑐐𑐸 ? 𑐴𑐶𑑄𑐳𑐵 𑐠𑐾𑑄𑐖𑑂𑐫𑐵𑑅𑐐𑐸 𑐥𑐵𑐥 𑐩𑐾𑐐𑐸 𑐩𑐡𑐸 𑐠𑑂𑐰 𑐳𑑄𑐳𑐵𑐬𑐫𑑂 𑑋 𑐩𑐾𑐥𑐶𑑄𑐟 𑐳𑑂𑐫𑐵𑐂𑐩𑑂𑐴 𑐠 𑐴𑐾 𑐣𑐵𑐎𑐫𑑂 𑐰𑐣𑐷 𑑋 𑐖𑐶𑑄 𑐕𑐶𑐩𑐶𑐟 𑐣𑑂𑐫𑐵𑐫 𑐣𑐶𑐳𑐵𑐦 𑐮𑐵 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾, 𑐟𑐬 𑐦𑐟𑐵𑐴𑐵𑐫𑐵𑐟 𑐣𑐫𑐾𑐐𑐸 𑐏𑑃 𑐢𑐵𑑅𑐳𑐵 𑐖𑐶𑐐𑐸 𑐥𑐵𑐏𑐾𑑄 𑐖𑐸𑐂𑐩𑐏𑐸𑑋 𑐖𑐶𑑄 𑐕𑐟𑐵 𑐏𑑃 𑐕𑐶𑐩𑐶𑐟 𑐣𑑂𑐴𑐵𑐫𑑂 𑐥𑐣𑐫𑑂 𑐢𑐵𑐫𑐾 𑐩𑐵𑐳𑑂𑐟𑐶 𑐰𑑅, 𑐨𑐔𑐵 𑐮𑐶𑐎𑑂𑐎 𑐰𑐵 𑐳𑐵 𑑋”

𑐏𑐬𑐵𑐔𑐵 𑐰 𑐔𑐏𑐸𑑄𑐔𑐵 𑐣𑐶𑐩𑑂𑐴𑑄 𑐁 𑐦𑐿𑐳𑐮𑐵 𑐧𑐵𑑄𑐮𑐵𑐎 𑐖𑐸𑐂𑐐𑐸 𑐖𑐸𑐮 𑐢𑐎𑐵 𑐮𑐫𑑂𑐟𑐵𑐮 𑑋 𑐀𑐮𑐾 𑐰𑐫𑐵𑐐𑐸 𑐮𑐶𑐎𑑂𑐎 𑐰𑐣 𑑋 𑐀𑐮𑐾 𑐮𑐵 𑐕𑐸 𑐩𑐵𑐣𑐶 ? 𑐮𑐶𑐎𑑂𑐎 𑐰𑑅𑐩𑑂𑐴 𑐏𑐬𑐵𑐔𑐶𑐟 𑐥𑐘𑑂𑐖𑐵𑑄 𑐎𑑂𑐰𑐵𑐟𑐸𑐎 𑐖𑑂𑐰𑐣, 𑐀𑐮𑐾 𑐔𑐏𑐸𑑄𑐔𑐶𑐟 𑐩𑑂𑐴𑐸𑐟𑐸𑑄 𑐰𑐵𑑄𑐣𑑂𑐫𑐵𑐟 𑑋

𑐣𑐶𑐩𑑂𑐴𑐾𑐳𑐶𑐟𑑄 𑐕𑐎𑑂𑐰𑐮𑑄 𑐴𑐾 𑐳𑐶𑐢𑐫𑐾𑐎𑐵𑐧𑐶𑐮 𑑋 𑐠𑑅 𑐱𑐟𑑂𑐬𑐸 𑐏𑑅 𑐢𑐎𑐵𑑅 𑐩𑑂𑐴𑐳𑐷𑐎 𑐩𑑂𑐴𑐳𑐷𑐎 𑐣𑑄 𑐰𑐫𑐵𑐟 𑐴𑐾 𑐥𑐟𑑂𑐫𑐵 𑐫𑐵𑐣𑐵𑐧𑐶𑐄𑐧𑐮𑐫𑑂 𑐔𑐏𑐸𑑄𑐔𑐵 𑐰 𑐏𑐬𑐵𑐔𑐵 𑐣𑐶𑐩𑑂𑐴𑐳𑐶𑐐𑐸𑑄 𑐖𑑂𑐫𑐵𑐣 𑐰𑐣 𑑋 𑐢𑐵𑐠𑐾𑑄 𑐏𑑅 𑐱𑐟𑑂𑐬𑐸𑐟 𑐣𑐵𑐥 𑐕𑐎𑑂𑐰𑐫𑑂 𑐟𑐵𑐥𑐵𑐎 𑐔𑑂𑐰𑐣𑐾𑐐𑐸 𑐴𑐾 𑐨𑐶𑑄 𑐖𑐸𑐂 𑑋