𑐥𑑂𑐬𑐾𑐬𑐎 𑐥𑑂𑐬𑐱𑑄𑐐 : 𑐩𑐹𑐬𑑂‍𑐏𑐟𑐵𑐫𑐵 𑐡𑐞𑑂𑐜

𑐴𑐾𑐣𑐬𑐷 𑐠𑑀𑐬𑑀 𑐀𑐩𑐾𑐬𑐶𑐎𑐵𑐫𑐵𑐪 𑐟𑑅𑐢𑑄𑐪 𑐔𑐶𑐣𑑂𑐟𑐎 𑐰 𑐰𑐶𑐔𑐵𑐬𑐎 𑐏𑑅 𑑋 𑐰 𑐣𑐶𑐡“ 𑐟𑐎 𑐖𑑄𑐐𑐮𑐫𑑂 𑐁𑐱𑑂𑐬𑐩 𑐡𑐫𑐾𑐎𑐵𑑅 𑐔𑑂𑐰𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐄𑐧𑐮𑐫𑑂 𑐴𑐾 𑐰𑑄 𑐕𑐪 𑐎𑐶𑐳𑐵𑐣𑐫𑐵𑐎𑐾 𑐕𑐸𑑄 𑐨𑐔𑐵 𑐖𑐐𑑂𑐐𑐵 𑐣𑑂𑐫𑐵𑐣𑐵𑐎𑐵𑐮 𑑋 𑐠𑑂𑐰 𑐖𑐐𑑂𑐐𑐵 𑐰𑐫𑐵𑐟 𑐟𑐳𑐎𑑄 𑐴𑐾 𑐎𑐟𑐶𑐮𑐵𑐎 𑐮𑐵𑐟 𑑋 𑐟𑐬 𑐖𑐐𑑂𑐐𑐵 𑐩𑐶𑐂 𑐢𑐸𑑄𑐎𑐵𑑅 𑐎𑐶𑐳𑐵𑐣 𑐥𑐳𑑂𑐟𑐵𑐫𑑂 𑐔𑐵𑐮 𑑋 𑐕𑐵𑐫𑑂𑐎𑐶 𑐰𑑄 𑐠𑑅𑐐𑐸 𑐖𑐐𑑂𑐐𑐵 𑐟𑐳𑐎𑑄 𑐴𑐾 𑐡𑑄𑐐𑐸 𑐨𑐵𑐰𑑄 𑐩𑐶𑐂 𑐮𑐵𑐎𑐮 𑑋

𑐎𑐤𑐫𑑂𑐎𑐸𑐤𑐸 𑐧𑐴𑐣𑐷 𑐰 𑐠𑑀𑐬𑑀𑐫𑐵𑐠𑐵𑐫𑑂 𑐰𑐣 𑐀𑐮𑐾 𑐧𑐶𑐣𑑂𑐟𑐶 𑐧𑐶𑐣𑑂𑐟𑐶 𑐫𑐵𑐣𑐵𑑅 𑐢𑐵𑐮, ‘𑐳𑐬, 𑐠𑑂𑐰 𑐖𑐐𑑂𑐐𑐵 𑐖𑐶𑐟𑑅 𑐮𑐶𑐟 𑐧𑐶𑐫𑐵𑐡𑐶𑐳“ 𑑋 𑐖𑐶𑐩𑐶 𑐎𑐮𑐵𑑅 𑐖𑐶 𑐏𑐣𑐵𑑅 𑐟𑐳𑐎𑑄 𑐟𑑄𑐔𑐵𑐫𑐵𑐔𑑂𑐰𑐣 𑑋’

‘𑐳𑐬, 𑐕𑐶𑑄 𑐧𑐬𑐸 𑐕𑐸𑑄 𑐨𑐔𑐵 𑐴𑐬𑑂‍𑐖𑐵𑐣𑐵 𑐎𑐫𑐵𑐡𑐶𑐳“ 𑑋 𑐖𑐶 𑐐𑐬𑐷𑐧 𑐏𑑅 𑑋 𑐠𑐸𑐮𑐶𑑄 𑐀𑐥𑑂𑐰𑑅 𑐖𑐶𑐎𑐾 𑐩𑐡𑐸 𑑋’ 𑐠𑑀𑐬𑑀𑐫𑐵 𑐯𑐵𑐟𑐫𑑂 𑑑𑑐 𑐜𑐮𑐬 𑐟𑐫𑐵𑐧𑐶𑐧𑐶𑐄“ 𑐰𑑄 𑐢𑐵𑐮 𑑋

‘𑐕 𑐠𑑅 𑐐𑐬𑐷𑐧 𑐖𑐸𑐳𑐾𑑄𑐮𑐶 𑐴𑐵𑐣𑑄 𑐠𑑂𑐰 𑑑𑑐 𑐜𑐮𑐬 𑐕𑐵𑐫𑑂 𑐧𑐶𑐫𑐵𑐔𑑂𑐰𑐣𑐵𑐐𑐸 𑐮𑐾 𑐖𑐶𑐟𑑅 ?’

‘𑐠𑑅𑐐𑐸 𑐩𑐹𑐬𑑂‍𑐏𑐟𑐵𑐫𑐵 𑐡𑐞𑑂𑐜 𑑋 𑐧𑐖𑐵𑐬 𑐨𑐵𑑅 𑐴𑐾 𑐩𑐳𑐶𑐂𑐎 𑐠𑐠𑐾 𑐡𑑄𑐐𑐸 𑐨𑐵𑐰𑑄 𑐖𑐐𑑂𑐐𑐵 𑐩𑐶𑐂𑐐𑐸 𑐢𑐫𑐵𑐐𑐸 𑐩𑐹𑐬𑑂‍𑐏𑐟𑐵 𑐩𑐏𑐸𑐳𑐵 𑐩𑐾𑐐𑐸 𑐕𑐸 ?’ 𑐎𑐶𑐳𑐵𑐣𑑄 𑐢𑐵𑐮 𑑋

‘𑐳𑐶 𑐴𑐾 𑐩𑐳𑐶𑐂𑐎 𑐧𑐖𑐵𑐬 𑐨𑐵𑑅 𑐳𑑂𑐰𑐫𑐵𑑄 𑐡𑑄𑐎 𑐠𑑅𑐐𑐸 𑐔𑐷𑐖 𑐩𑐶𑐂𑐐𑐸 𑐕𑑄𑐐𑐸 𑐩𑐶𑐏𑐵𑐫𑑂 𑐩𑐹𑐬𑑂‍𑐏𑐟𑐵 𑐏𑑅𑐳𑐵 𑐳𑐶𑐂𑐎 𑐳𑐶𑐂𑐎𑑄 𑐟𑐹𑐐𑐸 𑐳𑑂𑐰𑐫𑐵𑑄 𑐫𑐎𑑂𑐰 𑐴𑐾 𑐡𑑄𑐐𑐸 𑐨𑐵𑐰𑑄 𑐔𑐷𑐖 𑐎𑐵𑐫𑐾𑐐𑐸 𑐕𑐸 𑐏𑑅 𑐮𑐾 ? 𑐎𑐺𑐲𑐎, 𑐕𑑄 𑐐𑐸𑐮𑐶 𑐣𑑄 𑐢𑐫𑐵𑐔𑑂𑐰𑐣, 𑐰 𑐦𑐸𑐎𑑂𑐎𑑄 𑐮𑐵 𑐖𑐶𑐟𑑅 𑐏𑑅 𑐩𑐟𑐵𑑅, 𑐀𑐫𑑂𑐣𑑄 𑐖𑐶𑐟𑑅 𑐟𑐵𑑅 𑐎𑐶 𑐔𑐵𑐫𑐾𑐎 𑐔𑐵𑐫𑐾𑐎𑑄 𑐟𑐹𑐐𑐸 𑐳𑑂𑐰𑐫𑐵𑑄 𑐫𑐎𑑂𑐰 𑐴𑐾 𑐎𑐩 𑐨𑐵𑐰𑑄 𑐕𑑄𑐐𑐸 𑐖𑐐𑑂𑐐𑐵 𑐣𑑂𑐫𑐵𑐣𑐵𑑅 𑐖𑐶𑑄 𑐀𑐥𑐬𑐵𑐢 𑐫𑐵𑐣𑐵𑐐𑐸 𑐡𑐸 𑑋 𑐳𑐸𑐨𑐵𑐫𑑂 𑑋 𑐕𑑄𑐐𑐸 𑐖𑐐𑑂𑐐𑐵 𑐕𑑄𑐟 𑐴𑐾 𑐮𑐶𑐟 𑐧𑐶𑐫𑐵𑐐𑐸 𑐖𑐸𑐮 𑑋 𑐠𑑂𑐰 𑐕𑑄𑐐𑐸 𑑑𑑐 𑐜𑐮𑐬 𑐣𑑄 𑐖𑑂𑐰𑐣𑐵𑐴𑐸“ 𑑋 𑐐𑐮𑑂𑐟𑐷 𑐖𑐶𑐐𑐸 𑐀𑐮𑐾 𑐴𑐬𑑂‍𑐖𑐵𑐣𑐵 𑐕𑑄 𑐥𑐸𑐮𑐾𑐐𑐸 𑐮𑐵 ?’ 𑐠𑑀𑐬𑑀𑑄 𑐮𑐶𑐳𑑅 𑐧𑐶𑐮 𑑋