𑐣𑐾𑐰𑐵𑑅 𑐳𑑂𑐫𑐣𑐵𑐩𑐶 𑐡𑐧𑐹𑐫𑐵 𑐗𑐶𑑄𑐏𑐸𑐡𑑃 𑐧𑐸𑐣𑑂𑐴𑐶

𑐣𑐾𑐰𑐵𑑅 𑐳𑑂𑐫𑐣𑐵𑐩𑐶 𑐡𑐧𑐹𑐫𑐵 𑐗𑐶𑑄𑐏𑐸𑐎𑑂𑐰𑑅𑐐𑐸 𑐧𑐸𑐡𑐶𑑄 𑐰 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾𑐫𑐵 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑑂𑐫𑐣𑐷𑐥𑐶𑑄 𑐣𑐾𑐰𑐵𑑅 𑐳𑑂𑐫𑐣𑐵𑐩𑐶𑐥𑐶𑑄𑐟 𑐳𑐩𑑂𑐥𑐡𑐵 𑐨𑑂𑐬𑐩𑐞𑐫𑐵 𑐖𑑂𑐫𑐵𑐗𑑂𑐰𑑅 𑐏𑑂𑐰𑐥𑐫𑐵 𑐔𑑀𑑄𑐒𑐵
𑐐𑐞𑐾𑐱𑐫𑑂 𑐖𑐸𑐮 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑄 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑑄𑐳𑑂𑐎𑐺𑐟𑐶 𑐩𑐣𑑂𑐟𑑂𑐬𑐷 𑐱𑐿𑐮𑐾𑐣𑑂𑐡𑑂𑐬 𑐧𑐖𑑂𑐬𑐵𑐔𑐵𑐬𑑂𑐫𑑄 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑑂 𑐣𑐾𑐥𑐵𑐮 𑐨𑐵𑐲𑐵 𑐎𑐵𑐩𑐎𑐵𑐖𑐷𑐫𑐵 𑐨𑐵𑐫𑑂 𑐖𑐸𑐂𑐢𑐸𑑄𑐎𑐹𑐐𑐸 𑐂𑐮𑐫𑑂 𑐠𑐸𑐎𑐶𑐫𑐵𑐟 𑐳𑐩𑑂𑐧𑐬𑑂𑐢𑐣 𑐰 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐡𑐵𑐫𑐶𑐟𑑂𑐰 𑐗𑐷𑐐𑐸 𑐴𑐾 𑐧𑑂𑐰𑐴𑐮𑐫𑑂 𑐰𑑅𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋

𑐀𑐠𑐾𑐴𑐾 𑐨𑐵𑐲𑐵 𑐁𑐫𑑀𑐐𑐫𑐵 𑐡𑐸𑐖𑑅 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬𑑄 𑐰𑐶𑐡𑑂𑐫𑐵𑐮𑐫𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑑂𑐫𑐣𑐾𑐐𑐸 𑐖𑑂𑐫𑐵 𑐗𑐷𑐐𑐸 𑐥𑑂𑐬𑐟𑐶𑐳𑑂𑐠𑐵 𑐣𑐵𑐥𑑄 𑐳𑑂𑐰𑐵𑐥𑐹 𑐡𑐸𑐐𑐸 𑐖𑐹𑐐𑐸𑐮𑐶𑑄 𑐩𑐳𑑂𑐟𑐫𑑂𑐟 𑐧𑐵𑑄𑐮𑐵𑐎 𑐳𑑂𑐫𑐣𑐾𑐩𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐫𑐾𑑃 𑐩𑐣𑐥𑐵𑐫𑐵 𑐥𑐸𑐮𑐵𑑄𑐩𑑂𑐴 𑐩𑐾𑐫𑐬 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐣𑐾𑐰𑐵𑑅 𑐳𑑂𑐫𑐣𑐵𑐩𑐶 𑐡𑐧𑐹𑐫𑐵 𑐫𑑀𑐐𑐡𑐵𑐣 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐠𑐸𑐎𑐷 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐳𑐎𑐳𑐶𑐟𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐶𑐮 𑑋 𑐫𑐾𑑃 𑐩𑐣𑐥𑐵 𑐳𑐴𑐬𑐷 𑐫𑑀𑐖𑐣𑐵 𑐁𑐫𑑀𑐐𑐫𑐵 𑐥𑐸𑐮𑐵𑑄𑐩𑑂𑐴 𑐡𑐸𑐖𑑅 𑐐𑐸𑐖𑐾𑐱𑑂𑐰𑐬𑐷 𑐱𑑂𑐬𑐾𑐲𑑂𑐛𑑄 𑐳𑐎𑐮 𑐳𑑂𑐫𑐣𑐵𑐩𑐶𑐥𑐶𑑄𑐳𑑄 𑐨𑐶𑑄𑐟𑐸 𑐩𑐟𑐶𑐂 𑐟𑐫𑐵𑑅 𑐧𑑂𑐰𑑄𑐎𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋 𑐣𑐾𑐰𑐵𑑅 𑐳𑑂𑐫𑐣𑐵𑐩𑐶 𑐡𑐧𑐹𑐫𑐵 𑐎𑑀𑐲𑐵𑐢𑑂𑐫𑐎𑑂𑐲 𑐎𑐵𑐫 𑐧𑐴𑐵𑐡𑐸𑐬 𑐰𑑂𑐫𑐣𑑂𑐖𑐣𑐎𑐵𑐬𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐡𑐧𑐹𑐫𑐵 𑐕𑑂𑐫𑐵𑑄𑐖𑑂𑐫𑐾 𑐧𑐬𑐸𑐞𑐥𑑂𑐬𑐳𑐵𑐡 𑐰𑐿𑐡𑑂𑐫𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑑂𑐧𑐬𑑂𑐢𑐣 𑐰 𑐰𑐶𑐎𑐵𑐳𑐫𑐵 𑐮𑐵𑐐𑐶𑑄 𑐠𑐸𑐐𑐸 𑐨𑐵𑐲𑐵𑐫𑐵𑐟 𑐥𑑂𑐬𑐵𑐠𑐩𑐶𑐎 𑐟𑐐𑐶𑑄𑐣𑐶𑐳𑐾𑑄 𑐄𑐔𑑂𑐔 𑐱𑐶𑐎𑑂𑐲𑐵 𑐟𑐎 𑐀𑐢𑑂𑐫𑐫𑐣 𑐫𑐵𑐎𑐾𑐟 𑐰 𑐠𑐷𑐠𑐷 𑐧𑑂𑐰𑐣𑐾𑐎𑐸𑐠𑐶 𑐣𑐾𑐥𑐵𑐮𑐨𑐵𑐲𑐵 𑐳𑑂𑐫𑐣𑐾𑐐𑐸 𑐟𑐵𑑅 𑐟𑐫𑐵𑑅 𑐣𑐾𑐰𑐵𑑅 𑐳𑑂𑐫𑐣𑐵𑐩𑐶 𑐡𑐧𑐹 𑐣𑐷𑐳𑑂𑐰𑐣𑐵𑑅 𑐖𑑂𑐫𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐶.𑐳𑑄.𑑒𑑐𑑖𑑕 𑐳𑐵𑐮𑐫𑑂 𑐥𑐮𑐶𑐳𑑂𑐠𑐵 𑐖𑐸𑐫𑐵𑑅 𑑒𑑐𑑗𑑓 𑐳𑐵𑐮𑐫𑑂 𑐖𑐶𑐮𑑂𑐮𑐵 𑐥𑑂𑐬𑐱𑐵𑐳𑐣 𑐎𑐵𑐬𑑂𑐫𑐵𑐮𑐫𑐫𑑂 𑐰𑐶𑐢𑐶𑐰𑐟 𑐡𑐬𑑂𑐟𑐵 𑐫𑐵𑐣𑐵𑑅 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐳𑑄𑐳𑑂𑐠𑐵𑑄 𑐫𑐾𑑃 𑐩𑐣𑐥𑐵𑐫𑐵 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑑑𑑔 𑐐𑐹 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐣𑑂𑐴𑐫𑑂𑐩𑑂𑐴 𑐳𑑂𑐫𑐣𑐵𑐩𑐶 𑐣𑐶𑐫𑐸𑐎𑑂𑐟 𑐫𑐵𑐣𑐵𑑅 𑐕𑐐𑐹 𑐣𑐶𑐳𑐾𑑄 𑐣𑑂𑐫𑐵𑐐𑐹 𑐟𑐐𑐶𑑄𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐱𑐸𑐬𑐹 𑐫𑐵𑑅𑐐𑐸 𑐏𑑅𑑋

𑐰𑐶.𑐳𑑄. 𑑒𑑐𑑗𑑗 𑐀𑐳𑑀𑐖 𑑑𑑙 𑐐𑐟𑐾𑐫𑐵 𑐫𑐾𑑃 𑐩𑐣𑐥𑐵𑐫𑐵 𑐣𑐶𑐬𑑂𑐞𑐫 𑐎𑐠𑑄 𑐣𑐥𑐵 𑐡𑐸𑐣𑐾𑐫𑐵 𑐡𑐎𑑂𑐰 𑐰𑐶𑐡𑑂𑐫𑐵𑐮𑐫 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐣𑐶𑐬𑑂𑐞𑐫𑐎𑐠𑑄 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐫𑐾𑐐𑐸 𑐰 𑐠𑐷𑐠𑐷 𑐟𑐵𑐮𑐶𑐩 𑐧𑐷𑐐𑐸 𑐖𑑂𑐫𑐵𑐫𑑂 𑐣𑐾𑐰𑐵𑑅 𑐳𑑂𑐫𑐣𑐵𑐩𑐶 𑐡𑐧𑐸𑐮𑐶𑑄𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐐𑐸 𑐳𑑄𑐳𑑂𑐠𑐵𑑄 𑐁𑑅 𑐟𑐎 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑑑𑑗𑑒 𑐩𑑂𑐴 𑐳𑑂𑐫𑐣𑐵𑐩𑐶 𑐮𑐶𑐳𑐾𑑄 𑑓𑑑𑑕 𑐐𑐹 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫𑐫𑐵 𑑓𑑔𑑒 𑐩𑑂𑐴 𑐳𑑂𑐫𑐣𑐵𑐩𑐶𑐫𑐵𑐟 𑐣𑐾𑐥𑐵𑐮𑐨𑐵𑐲𑐵 𑐳𑑂𑐫𑐣𑐾𑐐𑐸 𑐟𑐵𑐮𑐶𑐩 𑐧𑐷𑐢𑐸𑑄𑐎𑐹𑐐𑐸 𑐡𑐸 𑑋