𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑑂 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐋𑐣 𑐣𑐶𑐬𑑂𑐩𑐵𑐞 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐮

𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑑂 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐋𑐣 𑐣𑐶𑐬𑑂𑐩𑐵𑐞 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐮

𑑒𑑐𑑕𑑖 𑐳𑐵𑐮𑑄𑐣𑐶𑐳𑐾𑑄 𑐴𑐵𑐎𑐹𑐐𑐸 𑐣𑑂𑐴𑐶 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐣𑑂𑐴𑐶𑑄 𑐖𑐾𑐛 𑑑𑑘 𑐠𑑁𑑄𑐫𑐵 𑐣𑑂𑐴𑐶 𑐏𑑅 𑑋 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱 𑐳𑐩𑐶𑐟𑐶𑐫𑐵 𑐂𑐣𑐵𑐥𑐫𑑂 𑐠𑐣𑐶𑐣𑐶𑐳𑐾𑑄 𑐴𑐾 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐨𑐵𑐲𑐵 𑐋𑐣 𑐡𑐫𑐾𑐎𑐾𑐐𑐸 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐹𑐐𑐸 𑐡𑐸 𑑋

𑑒𑑐𑑕𑑖 𑐳𑐮𑐫𑐵 𑐖𑐾𑐛 𑑑𑑘 𑐐𑐟𑐾 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑐫𑐵 𑐦𑐿𑐳𑐮𑐵𑐫𑐵𑐟 𑐎𑐫𑐵𑑅 𑐴𑐵𑐎𑐹𑐐𑐸 𑐣𑑂𑐴𑐶 𑐴𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐠𑐸𑐐𑐸𑐳𑐷 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐋𑐣 𑐡𑐫𑐾𑐎𑐾𑐐𑐸 𑐀𑐨𑐶𑐫𑐵𑐣 𑐠𑐸𑐐𑐸 𑐴𑐾 𑐡𑐶𑐣𑑄𑐣𑐶𑐳𑐾𑑄 𑐣𑑂𑐴𑑂𑐫𑐵𑐎𑐵𑑅𑐐𑐸 𑐖𑐵𑐣𑐎𑐵𑐬𑐷𑐬𑐷 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱 𑐳𑐩𑐶𑐟𑐶 𑐧𑑂𑐫𑐹𑐐𑐸 𑐡𑐸 𑑋

𑐥𑑂𑐬𑐡𑐾𑐱 𑐳𑐩𑐶𑐟𑐶𑑄 𑐏𑐸𑐮𑐵 𑐣𑑂𑐴𑑂𑐫𑑅 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱 𑐳𑑄𑐳𑐡𑑄 𑐳𑐬𑑂𑐰𑐳𑐩𑑂𑐩𑐟 𑐎𑐠𑑄 𑐨𑐵𑐲𑐵 𑐋𑐣 𑐥𑐵𑐬𑐶𑐟 𑐫𑐵𑐫𑐾 𑐢𑐸𑑄𑐎𑐵𑑅 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱 𑐳𑐩𑐶𑐟𑐶𑐫𑐵 𑐟𑑀𑐏𑐵𑐫𑑂 𑐔𑑂𑐰𑑄𑐐𑐸 𑐥𑐹𑐬𑑂𑐞 𑐧𑐿𑐛𑐎𑑄 𑐖𑐾𑐛 𑑑𑑘 𑐫𑐵𑐟 𑐴𑐵𑐎𑐹𑐐𑐸 𑐣𑑂𑐴𑐶 𑐎𑐠𑑄 𑐴𑐣𑐾𑐩𑑂𑐰𑐵𑑅𑐐𑐸 𑐰 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐋𑐣 𑐣𑐶𑐬𑑂𑐩𑐵𑐞 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬 𑐳𑐩𑐶𑐟𑐶𑐫𑐵 𑐐𑑂𑐰𑐳𑐵𑐮𑐫𑑂 𑐠𑑁𑑄 𑐱𑐸𑐎𑑂𑐬𑐰𑐵𑑅 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱𑐫𑐵 𑐣𑐵𑐫𑑅 𑐱𑑂𑐬𑐷𑐎𑐺𑐲𑑂𑐞 𑐩𑐴𑐬𑑂𑐖𑐣𑑄 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐰𑐶𑐖𑐫 𑐱𑑂𑐬𑐾𑐲𑑂𑐛𑐫𑐵𑐟 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐋𑐣𑐫𑐵 𑐩𑐳𑑂𑐫𑑁𑐡𑐵 𑐣𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐡𑐸 𑑋 𑐄𑐥𑐥𑑂𑐬𑐩𑐸𑐏 𑐱𑑂𑐬𑐾𑐲𑑂𑐛𑑄 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐋𑐣 𑐴𑐫𑐾𑐐𑐸 𑐣𑐷𑐟𑐶 𑐠𑑅 𑐣𑑂𑐴𑑂𑐫𑐔𑐶𑐮𑐶𑐐𑐸 𑐥𑑂𑐬𑐟𑐶𑐧𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐠𑐶𑐩𑐶 𑐣𑐐𑐬 𑐳𑐩𑐶𑐟𑐫𑐵 𑐣𑐵𑐫𑑅 𑐖𑑂𑐘𑐵𑐣𑐡𑐾𑐰 𑐱𑑂𑐬𑐾𑐲𑑂𑐛𑐫𑐵 𑐳𑐨𑐵𑐥𑐥𑐶𑐟𑑂𑐰𑐫𑑂 𑐖𑐸𑐐𑐸 𑐏𑑅 𑑋

courtsey:𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐮𑐮𑐾𑐣𑑂𑐡𑑂𑐬 𑐱𑐵𑐎𑑂𑐫

Post Views: 540