𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐩𑑂𑐴, 𑐮𑑂𑐴𑐵𑑅, 𑐟𑐸𑐟𑐶 𑐟𑑂𑐰𑐵𑐮𑑂𑐴𑐵𑐣𑐵 𑐂𑐣𑐵 𑐧𑐶𑐂𑐐𑐸 𑐎𑐸𑐟𑑅 𑑋

𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐩𑑂𑐴, 𑐮𑑂𑐴𑐵𑑅, 𑐟𑐸𑐟𑐶 𑐟𑑂𑐰𑐵𑐮𑑂𑐴𑐵𑐣𑐵 𑐂𑐣𑐵 𑐧𑐶𑐂𑐐𑐸 𑐎𑐸𑐟𑑅 𑑋

𑐳𑐣𑑂𑐡𑐬𑑂𑐨–𑑑𑑔𑐥𑑂𑐬𑐡𑐾𑐱𑐫𑑂𑐣𑐾𑐥𑐵𑐮𑐩𑐞𑑂𑐜𑐮𑐮𑐵𑐐𑐵
𑐧𑐶𑐣𑑀𑐡𑐳𑐵𑐫𑑂𑐩𑐶 (𑐁𑐮)
𑐳𑑄. 𑐬𑐵. 𑐀.

· 𑐣𑐾𑐰𑐵𑑅𑐟𑐫𑑂𑐐𑐸 𑐩𑐹 𑐧𑐳𑑂𑐟𑐶 𑐥𑐸𑐬𑑂𑐰 𑐥𑐱𑑂𑐔𑐶𑐩 𑐧𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑑅, 𑐟𑐵𑐩𑐵𑑄𑐐𑑄 𑐣𑐾 𑐰𑐵𑑅𑐟𑐫𑑂𑐟 𑐕𑐔𑐵𑐮𑐶𑑄 𑐑𑐾𑐬𑐾 𑐫𑐵𑐣𑐵 𑐟𑑅𑐐𑐸 𑐐𑐣𑐣𑑄 𑐩𑐡𑐸 𑑋
· 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐮𑐶𑑄 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐣𑐎𑑂𑐱𑐵 𑐕𑐐𑐹 𑐴𑐾 𑐳𑐸𑑄 𑐟𑑄𑐔𑐵𑐂 𑐢𑐎𑐵𑑅 𑐥𑐶𑐩𑐎𑐵𑑅𑐳𑐵 𑐐𑐠𑐾 𑐣𑐾𑐰𑐵𑑅 𑐬𑐵𑐖𑑂𑐫 𑐢𑐳𑑂𑐰𑐵𑐂 ?
· 𑑑𑑔 𑐥𑑂𑐬𑐡𑐾𑐱𑐫𑑂 𑐣𑐾𑐰𑐵𑑅 𑐬𑐵𑐖𑑂𑐫𑐫𑐵𑐟 𑐦𑑂𑐫𑐵𑐣𑐵 𑐟𑑅𑐐𑐸 𑐣𑐾𑐥𑐵𑐮𑐩𑐞𑑂𑐜𑐮 𑐨𑐹𑐩𑐶𑐫𑐵𑐟 𑐣𑐾𑐰𑐵𑑅 𑐣𑑄 𑐳𑑂𑐰𑐷𑐎𑐵𑐬 𑐫𑐵𑐫𑐾 𑐩𑐖𑑂𑐫𑐹 𑑋

𑐣𑐾𑐰𑐵𑑅 𑐠𑐵𑐫𑑂𑐧𑐵𑐫𑑂

𑐣𑐾𑐰𑐵𑑅𑐫𑐵 𑐴𑐾 𑐣𑐵𑑄 𑐎𑑂𑐰𑑅𑐎𑐫𑐵 “𑐣𑐾𑐥𑐵𑐮” 𑐡𑐾𑐳𑐫𑐵 𑐣𑐵𑑄 𑐔𑑂𑐰𑐣 𑑋 𑐄𑐮𑐶𑐄𑐮𑐶 𑐩𑐕𑐶𑑄 𑐟𑐵𑑅𑐴𑐵𑐎𑑅𑐐𑐸 𑐳𑑂𑐰𑐬𑑂𑐞 𑐃𑐟𑐶𑐴𑐵𑐳 𑐡𑐫𑐵 𑐡𑑂𑐰𑐮𑑄𑐡𑑂𑐰𑑅 𑐡𑑃 𑐟𑐎𑑄 𑐡𑐾𑐫𑑂 𑐣𑑂𑐴𑑂𑐫𑐵𑐎𑐵 𑐰𑐫𑐵 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅 𑐟𑐫𑑂𑐐𑐸 𑐮𑐵𑐐𑐵 𑐠𑑁𑑄 𑐫𑐾𑑃, 𑐫𑐮, 𑐏𑑂𑐰𑐥, 𑐢𑐸𑐮𑐶𑐏𑐾𑐮 𑐖𑑅𑐏𑑅 𑐰 𑐔𑐶𑐟𑑂𑐮𑐵𑐒𑐫𑑂 𑐡𑐸𑐣𑐾 𑐎𑐸𑐣𑐵 𑐧𑐶𑐂𑐐𑐸 𑐎𑐸𑐟 𑐫𑐵𑑅𑐐𑐸 𑐡𑐸 𑑋 𑐣𑐾𑐥𑐵𑐮𑐩𑐞𑑂𑐜𑐮 𑐣𑐾𑐰𑐵𑑅𑐫𑐵 𑐮𑐵𑐐𑐵𑐫𑑂 𑐡𑐸𑐣𑐾 𑐡𑐫𑐾𑐎𑐵𑑅 𑐟𑑅𑐐𑐸 𑐡𑐾 𑐐𑑅, 𑑖𑑔 𑐱𑐶𑐰𑐮𑐶𑐒𑑂𑐐, 𑑒𑑔 𑐧𑑁𑐡𑑂𑐑𑐥𑐶𑐛, 𑐣𑐾𑐰𑐵𑑅 𑐣𑑄 𑐳𑐡𑐵𑑄 𑐬𑐵𑐖𑑂𑐫 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑑀𑐮𑐏𑐵, 𑐣𑐸𑐰𑐵𑐎𑑀𑐚, 𑐣𑐾𑐰𑐵𑑅𑐟 𑐠𑑁𑑄 𑐣𑑄 𑐁𑐥𑐵𑐮𑑄 𑐁𑐥𑐵𑑅 𑐮𑑂𑐫𑐵𑐏𑐫𑑂 𑐔𑑂𑐰𑐣𑐵𑐔𑑂𑑄𑐰𑐐𑐸 𑐢𑐵𑐡𑐶𑐒, 𑐬𑐵𑐩𑐾𑐕𑐵𑐥, 𑐰 𑐳𑐶𑐣𑑂𑐢𑐸𑐮𑐷𑐫𑐵 𑐐𑐵.𑐧𑐶.𑐳.𑐟 𑐣𑐾𑐰𑐵𑑅 𑐥𑐴𑐶𑐔𑐵𑐣𑐫𑐵 𑐠𑐵𑐫𑑂 𑐩𑐏𑐸𑐟 𑐮𑐵 ? 𑐥𑐺𑐠𑑂𑐰𑐷𑐣𑐵𑐬𑐵𑐫𑐞 𑐱𑐵𑐴 𑐣𑑄 𑐲𑐜𑐫𑐣𑑂𑐟𑑂𑐬 𑐫𑐵𑐣𑐵 𑐣𑐾𑐥𑐵𑑅 𑐮𑐵𑐎𑐵 𑐎𑐵𑑅𑐳𑐵𑑄 𑐣𑐶𑐳𑐾𑑄 𑐴𑐾 𑐬𑐵𑐖𑑂𑐫 𑐱𑐎𑑂𑐟𑐶𑑄 𑐣𑐾𑐰𑐵𑑅𑐟𑐫𑑂𑐟 𑐎𑐩𑐖𑑀𑐬 𑐫𑐵𑐫𑐾𑐐𑐸 𑐫𑐵𑐟 𑑋 𑐣𑐾𑐥𑐵𑑅𑐫𑐵 𑐱𑐵𑐳𑐎 𑐧𑐬𑑂𑐐 𑐰 𑐱𑐵𑐳𑐎 𑐖𑐵𑐟𑐶 𑐧𑑂𑐬𑐩𑑂𑐴𑐸, 𑐏𑐫𑑂𑐟𑐫𑑂𑐳𑑄 𑐧𑑂𑐫𑐎𑑂𑐟𑐶𑐫𑐵𑐟 𑐥𑐡 𑐰 𑐟𑐎𑑂𑐩𑐵𑐫𑐵 𑐮𑑀𑐨𑐫𑑂 𑐟𑐎𑑂𑐫𑑄𑐎𑐵 𑐳𑐸𑑄 𑐣𑐾𑐰𑐵𑑅 𑐧𑑂𑐫𑐎𑑂𑐟𑐶𑐫𑐵 𑐄𑐣𑑂𑐣𑐟𑐶 𑐫𑐵𑐣𑐵 𑐧𑑂𑐫𑐹𑐐𑐸 𑐡𑐿 𑐟𑐬 𑐳𑐵𑑄𑐐𑐛𑐣𑐷𑐎 𑐬𑐸𑐥𑑄 𑐣𑐾𑐰𑐵𑑅 𑐖𑐵𑐟𑐶, 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶, 𑐳𑐩𑐵𑐣 𑐀𑐢𑐶𑐎𑐵𑐬𑐫𑐵 𑐮𑑂𑐫𑐵𑐏𑑄 𑐳𑐵𑐩, 𑐡𑐵𑐩, 𑐡𑐞𑑂𑐜, 𑐨𑐾𑐡𑐫𑐵 𑐡𑐎𑑂𑐰 𑐖𑑂𑐫𑐵𑐨𑑅 𑐕𑑂𑐫𑐮𑐵𑑅 𑐣𑐾𑐰𑐵𑑅𑐟𑐫𑑂𑐟 𑐢𑐵𑑅𑐳𑐵 𑐎𑐩𑐖𑑀𑐬 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐴𑐾 𑐏𑑅 𑑋 𑐠𑑂𑐰 𑐴𑐾 𑐣𑐶𑐬𑐣𑑂𑐟𑐬𑐟𑐵 𑐫𑐵𑐟 𑐧𑑅 𑐧𑐶𑐂 𑐎𑐠𑑄 𑐠𑑁𑑄 𑐰𑐫𑐵 𑐬𑐵𑐖𑑂𑐫 𑐥𑐸𑐣𑐳𑑄𑐬𑐔𑐣𑐵 𑐳𑐩𑐶𑐟𑐶𑑄 𑐥𑐶𑐟 𑐴𑑅𑐐𑐸 𑐣𑐾𑐥𑐵𑐮𑐩𑐞𑑂𑐜𑐮 𑐥𑑂𑐬𑐡𑐾𑐱𑐫𑐵𑐟 𑐢𑐎𑐵 𑐒𑑂𑐏𑐫𑐵𑐣𑐵 𑐟𑑅𑐐𑐸 𑐮𑐵𑐐𑐵𑑄 𑐣𑑄 𑐎𑑂𑐫𑑄 𑑋 𑐥𑑂𑐬𑐡𑐾𑐱𑐫𑐵 𑐣𑐵𑐩𑑄 “𑐣𑐾𑐰𑐵𑑅” 𑐣𑐵𑑄 𑐕𑐐𑐹 𑐡𑐟 𑐢𑐎𑐵𑑅 𑐮𑐫𑑂𑐟𑐵𑐫𑑂 𑐩𑐵𑑅𑐐𑐸 𑐕𑐸 𑐩𑐡𑐸 𑑋 𑐣𑐾𑐥𑐵𑐮𑐩𑐞𑑂𑐜𑐮, 𑐣𑐾𑐰𑐵𑑅 𑐥𑑂𑐬𑐡𑐾𑐱𑐫𑐵 𑐮𑐵𑐐𑐵 𑐢𑐿𑐐𑐸 𑐫𑐾𑑃, 𑐫𑐮, 𑐏𑑂𑐰𑐥, 𑐢𑐸𑐮𑐶𑐏𑐾𑐮 𑐖𑑅𑐏𑑅, 𑐔𑐶𑐟𑑂𑐮𑐵𑐒 𑐖𑐎 𑐩𑐏𑐸, 𑐠𑑂𑐰 𑐮𑐵 𑐣𑐾𑐰𑐵𑑅 𑐮𑐵𑐐𑐵𑐫𑐵 𑐕𑑂𑐫𑑄 𑐖𑐎 𑐏𑑅 𑑋 𑐠𑑁𑑄 𑐬𑐵𑐖𑑂𑐫 𑐥𑐸𑐣𑐳𑑄𑐬𑐔𑐣𑐵 𑐳𑐩𑐶𑐟𑐶𑑄 𑐥𑐶𑐟 𑐴𑑅𑐐𑐸 𑑑𑑔 𑐥𑑂𑐬𑐡𑐾𑐱𑐫𑐵 𑐣𑐎𑑂𑐱𑐵𑐫𑑂 𑐣𑐾𑐰𑐵𑑅 𑐬𑐵𑐖𑑂𑐫𑐫𑐵𑐟 𑐣𑐾𑐥𑐵𑐮𑐩𑐞𑑂𑐜𑐮 𑐮𑐵𑐐𑐵𑐫𑐵 𑐕𑑂 𑐫𑑄 𑐕𑐐𑑅 𑐖𑐎 𑐢𑑂𑐫𑐣𑐵 𑐣𑐾𑐰𑐵𑑅 𑐬𑐵𑐖𑑂𑐫𑐫𑐵 𑐣𑐵𑐩𑑄 𑐮𑑂𑐫𑑄𑐎𑐵 𑐩𑑂𑐴, 𑐮𑑂𑐴𑐵𑑅 𑐟𑐸𑐟𑐶 𑐟𑑂𑐰𑐵𑑅 𑐮𑑂𑐴𑐵𑐣𑐵 𑐟𑐵𑐩𑐵𑑄𑐐𑐳𑐵𑐮𑐶𑑄𑐐, 𑐣𑑂𑐴𑐹 𑐡𑐫𑐾𑐎𑐹𑐐𑐸 𑐣𑐵𑐬𑐵𑐫𑐞𑐷 𑐰 𑐳𑐸𑐣𑐎𑑀𑐱𑐷 𑐥𑑂𑐬𑐡𑐾𑐱𑐫𑑂 𑐧𑑂𑐰𑐠𑐮𑐵 𑐧𑑂𑐫𑐹𑐐𑐸 𑐡𑐸 𑑋 𑐣𑐾𑐥𑐵𑐮𑐩𑐞𑑂𑐜𑐮 𑐮𑐵𑐐𑐵 𑐧𑑂𑐮𑐠𑐮𑐵 𑐂𑐣𑐵 𑐧𑐶𑐂𑐐𑐸 𑐖𑑂𑐫𑐵𑐫𑑂 𑐩𑐾𑐥𑐶𑑄𑐳𑑄 𑐫𑐵𑐳𑐵 𑐀𑐥𑐵𑐫𑐔𑑂𑐰𑑄
𑐁𑐱𑑂𑐔𑐬𑑂𑐫 𑐩𑐖𑐸𑐂𑐐𑐸 𑐏𑑅 𑐟𑐬 𑐣𑐾𑐰𑐵𑑅 𑐣𑐾𑐟𑐵𑐟 𑐢𑐵𑑅𑐥𑐶𑑄 𑐴𑐾 𑐣𑐾𑐰𑐵𑑅𑐫𑐵𑐟 𑐎𑐩𑐖𑑀𑐬 𑐫𑐵𑐫𑐾𑐟 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐩𑑂𑐴, 𑐮𑑂𑐴𑐵𑑅 𑐟𑐸𑐟𑐶 𑐢𑑂𑐫𑐣𑐵 𑐨𑐵𑐐 𑐟𑐫𑐵 𑐂𑐣𑐵 𑐧𑐶𑐂𑐐𑐸𑐮𑐶𑐂 𑐣𑑂𑐴𑑂𑐫𑑀𑐣𑐾 𑐣𑑂𑐴𑑂𑐫𑑀𑐣𑐾 𑐣𑑂𑐴𑑂𑐫𑐵𑑅 𑐖𑐹𑐐𑐸 𑐢𑐵𑑅𑐳𑐵 𑐣𑐾𑐰𑐵𑑅𑐫𑐵 𑐣𑐶𑐟𑐶𑑄 𑐡𑐸𑑅𑐏𑐫𑐵 𑐏𑑃 𑐖𑐸𑐮 𑑋

𑐣𑐾𑐰𑐵𑑅𑐫𑐵 𑐋𑐟𑐶𑐴𑐵𑐳𑐶𑐎 𑐣𑐾𑐰𑐵𑑅 𑐥𑐴𑐶𑐔𑐵𑐣 𑐡𑐹𑐐𑐸 𑐣𑐾𑐥𑐵𑐮𑐩𑐞𑑂𑐜𑐮 𑐮𑐵𑐐𑐵 𑐩𑐢𑑂𑐫𑐩𑐵𑐘𑑂𑐔𑐮𑐫𑐵 𑑑𑑒 𑐐𑐹 𑐖𑐶𑐮𑑂𑐮𑐵 𑐡𑐸𑐣𑐾 𑐮𑐵 𑑋 𑐠𑑁𑑄 𑐟𑐎𑑄 𑐣𑑄 𑐣𑐾𑐰𑐵𑑅𑐟 𑑑𑑒 𑐐𑐹 𑐖𑐶𑐮𑑂𑐮𑐵𑐫𑐵 𑐠𑐵𑐫𑑂𑐠𑐵𑐳𑐫𑑂 𑐁𑐥𑐵 𑐩𑑂𑐴𑑂𑐰𑑅 𑐖𑐸𑐫𑐵 𑐔𑑂𑐰𑐣𑐵𑐔𑑂𑐰𑑄𑐐𑐸 𑐴𑐾 𑐡𑐹𑐳𑐵 𑐠𑐸𑐎𑐷𑐫𑐵 𑐡𑐠𑐹𑐫𑐵 𑐨𑐹 𑐨𑐵𑐐𑐫𑑂 𑐮𑐵 𑐟𑐵𑐩𑐵𑑄𑐐 𑐳𑑂𑐰𑐫𑐵 𑐣𑐾𑐰𑐵𑑅𑐫𑐵 𑐮𑑂𑐫𑐵𑑅 𑐩𑑂𑐴𑑀 𑐩𑐖𑐹 𑑋 𑐠𑑁𑑄 𑐣𑑄 𑐥𑐸𑐬𑑂𑐰𑐫𑐵 𑐴𑑂 𑐬𑐵𑐩𑐾𑐕𑐵𑐥, 𑐡𑑀𑐮𑐏𑐵 𑐣𑐶𑐳𑐾𑑄 𑐕𑐳𑑂𑐰𑐵𑑅 𑐖𑐸𑐂𑐎 𑐣𑑂𑐴𑑂𑐫𑐵𑑅 𑐰𑐫𑐵𑐔𑑂𑐰𑑄𑐐𑐸 𑐣𑐾𑐰𑐵𑑅𑐫𑐵 𑐧𑐳𑑂𑐟𑐷 𑐡𑐠𑐸𑐂 𑐫𑐾𑑃, 𑐫𑐮, 𑐰 𑐏𑑂𑐰𑐥 𑐖𑐸𑐖𑐸𑑄 𑐥𑐱𑑂𑐔𑐶𑐩𑐫𑐵 𑐣𑐸𑐰𑐵𑐎𑑀𑐚 𑐰 𑐢𑐵𑐡𑐶𑑄𑐐 𑐟𑐎 𑐣𑐾𑐰𑐵𑑅𑐫𑐵 𑐧𑐳𑑂𑐟𑐶 𑐫𑐔𑐸𑐎 𑐳𑐷𑐡𑐸 𑐳𑐵, 𑐄𑐐𑐸 𑐠𑐵𑐫𑑂 𑐟𑐵𑐩𑐵𑑄𑐐𑐟𑐫𑑂𑐳𑑄 𑐡𑐵𑐧𑐷 𑐫𑐵𑐫𑐾𑐐𑐸 𑐁𑐢𑐵𑐬 𑐣𑑄 𑐏𑐣𑐾𑐩𑐡𑐸 𑑋 𑐀𑐗 𑐮𑐵 𑐢𑐵𑐡𑐶𑐒𑐫𑐵 𑐣𑑄 𑐥𑐱𑑂𑐔𑐶𑐩 𑐰𑑄𑐳𑐵 𑐣𑐾𑐰𑐵𑑅 𑐧𑐳𑑂𑐟𑐷 𑐳𑑂𑐰𑐵𑐎𑑂𑐎𑐟𑐸𑑄 𑐐𑑀𑐬𑐏𑐵𑐫𑐵 𑐣𑐾𑐰𑐵𑑅 𑐧𑐳𑑂𑐟𑐶 𑐡𑐸 𑑋 𑐴𑐵𑐎𑐣𑑄 𑐥𑐹𑐬𑑂𑐰𑐫𑑂 𑐰𑑄𑐳𑐵 𑐬𑐵𑐩𑐾𑐕𑐵𑐥𑐫𑐵 𑐣𑐾𑐰𑐵𑑅 𑐧𑐳𑑂𑐟𑐶 𑐳𑑂𑐰𑐵𑐎𑑂𑐎 𑐌𑐏𑐮𑐝𑐸𑐒𑑂𑐐𑐵𑐫𑑂 𑐣𑐾 𑐰𑐵𑑅 𑐧𑐳𑑂𑐟𑐷 𑐡𑐸 𑑋 𑐠𑐸𑐎𑐠𑑄 𑐣𑐾𑐰𑐵𑑅𑐟𑐫𑑂𑐐𑐸 𑐧𑐳𑑂𑐟𑐶 𑐀𑐥𑑂𑐰𑑅 𑐩𑑂𑐴𑑂𑐰𑑅 𑐖𑐸𑐫𑐵 𑐣𑑂𑐫𑑄𑐎𑑅 𑐡𑐹𑐳𑐵, 𑐩𑐹 𑐎𑐠𑑄 𑐣𑐾𑐰𑐵𑑅𑐫𑐵 𑐧𑐳𑑂𑐟𑐶 𑐢𑐵𑑅𑐳𑐵 𑐥𑐸𑐬𑑂𑐰 𑐥𑐱𑑂𑐔𑐶𑐩 𑐧𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐠𑐸𑐎𑐠𑑄 𑐥𑐹𑐬𑑂𑐰 𑐥𑐱𑑂𑐔𑐶𑐩 𑐧𑑂𑐫𑐵𑐣𑐵𑐔𑑂𑐰𑑄𑐐𑐸 𑐣𑐾𑐰𑐵𑑅 𑐧𑐳𑑀𑐧𑐵𑐳𑐫𑐵𑐟 𑐧𑐵𑑄𑐮𑐵𑐎 𑐀𑐢𑑂𑐫𑐫𑐣 𑐩𑐫𑐵𑐳𑐾𑑄 𑐴𑐾 𑐣𑐾 𑐰𑐵𑑅𑐫𑐵𑐟 𑐕𑐔𑐵𑐮𑐶𑑄 𑐟𑐵𑐩𑐵𑐐𑑄 𑐑𑐾𑐬𑐾𑐫𑐵𑐣𑐵 𑐔𑑂𑐰𑑄𑐐𑐸 𑐡𑐸 𑐢𑐿𑐐𑐸 𑐨𑑂𑐬𑐵𑐩𑐎 𑐥𑑂𑐬𑐔𑐵𑐬 𑐫𑐵𑐣𑐵𑐟𑑅𑐮 𑑋 𑐣𑐾𑐰𑐵𑑅𑐫𑐵 𑐕𑐔𑐵𑐮𑐶𑑄 𑐟𑐵𑐩𑐵𑑄𑐐𑐟 𑐖𑐎 𑐖𑐸𑐂𑐟 𑐮𑐵 𑐔𑐵𑐎𑐮𑐶𑑄 𑐟𑐵𑐩𑐵𑑄𑐐𑐟 𑐖𑐸𑐂𑐩𑐵𑐮 𑑋 𑐀𑐠𑐾 𑐮𑐵 𑐐𑐣𑑄𑐣𑑄 𑐩𑐡𑐸 𑑋 𑐄𑐎𑐾𑑄 𑐣𑐾𑐰𑐵𑑅𑐫𑐵 𑐕𑐔𑐵𑑅𑐮𑐶𑑄 𑐟𑐵𑐩𑐵𑑄𑐐𑐟 𑐩𑐡𑐸, 𑐠𑑂𑐰 𑐨𑑂𑐬𑐵𑐩𑐎 𑐥𑑂𑐬𑐔𑐵𑐬 𑐖𑐎 𑐏𑑅 𑑋

𑐣𑐾𑐰𑐵𑑅𑐟 𑐡𑐾𑐱 𑐡𑐫𑐾𑐎𑐵, 𑐐𑐵𑑄 𑐡𑐫𑐾𑐎𑐵𑑅 𑐟𑑂𑐰𑐵𑑅 𑐡𑐫𑐾𑐎𑐵 𑐕𑐠𑐵𑐫𑑂 𑐩𑐸𑐣𑐵 𑐔𑑂𑐰𑐣𑐾𑐩𑐵𑐥𑐶𑑄 𑐖𑐵𑐟𑐶 𑐏𑑅, 𑐕𑐬𑐾 𑐖𑐸𑐫𑐵 𑐔𑑂𑐰𑐣𑐷𑐥𑐶𑑄 𑐩𑐏𑐸 𑑋 𑐠𑑁𑑄 𑐠𑑂𑐰 𑐴𑐾 𑐕𑐠𑐵𑐫𑑂 𑐩𑐸𑐣𑐵 𑐔𑑂𑐰𑐣𑐾𑐐𑐸 𑐣𑐾𑐰𑐵𑑅𑐫𑐵 𑐐𑐸𑐞𑐫𑑂 𑐬𑐵𑐖𑐣𑐶𑐟𑐶 𑐩𑑂𑐴𑐶𑐟𑐵𑐔𑑂𑐰𑐣 𑑋 𑐥𑐺𑐠𑑂𑐰𑐷 𑐣𑐵𑐬𑐵𑐫𑐞 𑐱𑐵𑐴 𑐣𑑄 𑐣𑐾𑐥𑐵𑑅 𑐮𑐵𑐎𑐵 𑐎𑐵𑐫𑐾 𑐢𑐸𑑄𑐎𑐵 𑐣𑐶𑐳𑐾𑑄 𑐠𑑁𑑄 𑐟𑐎𑑄 𑐱𑐵𑐳𑐎 𑐧𑐬𑑂𑐐𑐟𑐫𑑂𑐳𑑄 𑐣𑐾𑐰𑐵𑑅𑐟𑐫𑑂𑐐𑐸 𑐮𑐵𑐐𑐵𑐫𑑂 𑐁𑐥𑐵𑐮𑑄 𑐁𑐥𑐵 𑐮𑑂𑐫𑐵𑐏𑐫𑑂 𑐐𑐿𑐬 𑐣𑐾𑐰𑐵𑑅𑐟𑐫𑑂𑐟 𑐄𑐩𑐶𑐐𑐸 𑐳𑐸𑐨𑐔𑐶𑐣𑑂𑐟𑐎 𑐖𑐹𑐐𑐸𑐮𑐶𑑄 𑐟𑐫𑐾 𑐴𑐫𑐾𑐐𑐸 𑐡𑐶𑐬𑑂𑐑𑐎𑐵𑐮𑐶𑐣 𑐫𑑀𑐖𑐣𑐵 𑐣𑑂𑐴𑑂𑐫𑐵𑐎𑐮 𑑋 𑐮𑐶𑐳𑐾𑑄 𑐣𑐾𑐰𑐵𑑅 𑐔𑑂𑐰𑐣𑐵𑐔𑑂𑐰𑑄𑐐𑐸 𑐠𑐵𑐫𑐳𑑂 𑐫𑐎𑑂𑐰 𑐩𑐵𑐂𑐐𑑂𑐬𑐾𑐟 𑐩𑐣𑐹𑐟 𑐣𑑄 𑐬𑐵𑐖𑐢𑐵𑐣𑐷 𑐖𑐹𑐐𑐸𑐫𑐵 𑐮𑑂𑐫𑐵𑐏𑑄, 𑐳𑐸𑐧𑐶𑐢𑐵𑐫𑐵 𑐮𑑂𑐫𑐵𑐏𑑄, 𑐣𑑀𑐎𑐬𑐷, 𑐖𑑂𑐫𑐵 𑐫𑐵𑐫𑐾𑐟 𑐁𑐡𑐶𑐫𑐵 𑐮𑑂𑐫𑐵𑐏𑑄 𑐡𑐸𑐴𑐵 𑐰𑐫𑐵𑐟𑐸𑑄 𑐔𑑂𑐰𑐣 𑑋 𑐠𑐠𑐾 𑐣𑐾𑐥𑐵𑑅𑐫𑐵 𑐎𑐸 𑐎𑐸𑐮𑐵𑐩𑑄 𑐣𑐾𑐰𑐵𑑅𑐟𑐫𑑂𑐐𑐸 𑐮𑐵𑐐𑐵𑐫𑑂 𑐩𑐣𑐹𑐟 𑐔𑑂𑐰𑑄 𑐰𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐟𑐵𑐩𑐵𑑄𑐐 𑐟 𑐣𑑄 𑐣𑐾𑐰𑐵𑑅 𑐡𑐹𑐐𑐸 𑐠𑐵𑐳𑐫𑑂 𑐡𑐸𑐴𑐵𑑄 𑐩𑐰𑐿𑐐𑐸 𑐢𑐿 𑐐𑐸 𑐖𑐸𑐂𑐩𑐏𑐸 𑑋 𑐟𑐵𑐩𑐵𑑄𑐐𑐟 𑐣𑑄 𑐣𑐾𑐰𑐵𑑅𑐟 𑐔𑑂𑐰𑐣𑐵𑐔𑑂𑐰𑑄𑐐𑐸 𑐠𑐵𑐳𑐫𑑂 𑐳𑐸𑐧𑐶𑐢𑐵, 𑐖𑑂𑐫𑐵, 𑐱𑐶𑐎𑑂𑐲𑐵, 𑐳𑑂𑐰𑐵𑐳𑑂𑐠𑑂𑐫 𑐁𑐡𑐶𑐫𑐵𑐵 𑐮𑑂𑐫𑐵𑐏𑑄 𑐡𑐸𑐴𑐵 𑐰𑐂𑐐𑐸 𑐳𑑂𑐰𑐨𑐵𑐧𑐶𑐎 𑐏𑑅 𑑋 𑐀𑐠𑐾 𑐖𑐸𑐫𑐵 𑐣𑐾𑐰𑐵𑑅 𑐔𑑂𑐰𑐣𑐵𑐔𑑂𑐰𑑄𑐐𑐸 𑐠𑐵𑐳𑐫𑑂 𑐣𑐾𑐰𑐵𑑅𑐟 𑐕𑐐𑐹 𑐮𑐵𑐏 𑐡𑐹𑐳𑐵𑑄 𑐣𑐾𑐰𑐵𑑅 𑐀𑐮𑑂𑐥𑐩𑐟 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐖𑐎 𑐏𑑅 𑐏 ।

𑐣𑐾𑐰𑐵𑑅 𑐁𑐣𑑂𑐡𑑀𑐮𑐣
𑐣𑐾𑐰𑐵𑑅𑐟𑐫𑑂𑐳𑑄 𑐨𑐵𑐲𑐶𑐎 𑐁𑐣𑑂𑐡𑑀𑐮𑐣 𑐩𑐾𑐩𑐾𑐥𑐶𑑄 𑐖𑐵𑐟𑐷 / 𑐖𑐣𑐖𑐵𑐟𑐶𑑄 𑐣𑑂𑐴𑑂𑐫𑐵𑐎𑐾 𑐳𑑂𑐰𑐫𑐵 𑐫𑐎𑑂𑐰 𑐣𑑂𑐴𑑂𑐫𑑄 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋 𑐠𑑁𑑄 𑐣𑐾𑐰𑐵𑑅𑐫𑐵 𑐨𑐵𑐲𑐶𑐎 𑐁𑐣𑑂𑐡𑑀𑐮𑐣 𑐖𑐵𑐟𑐶𑐫 𑐁𑐣𑑂𑐡𑑀𑐮𑐣𑐫𑑂 𑐴𑐶𑐮𑐵 𑐰𑑅𑐐𑐸 𑐡𑐸 𑑋 𑐠𑐸𑐮𑐶 𑐃 𑐡𑐸𑐣𑐾 𑐧𑐶𑐨𑐶𑐣𑑂𑐣 𑐥𑐵𑐬𑑂𑐚𑐶𑑄 𑐥𑑂𑐬𑐾𑐬𑐶𑐟𑐥𑐶𑑄 𑐧𑐶𑐨𑐶𑐣𑑂𑐣 𑐧𑐶𑐔𑐵𑐬 𑐢𑐵𑐬𑐵𑑄 𑐥𑑂𑐬𑐨𑐵𑐧𑐶𑐟 𑐖𑐹𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐣𑑂𑐴𑐹 𑐣𑑂𑐴𑐹𑐐𑐸 𑐣𑐾𑐰𑐵𑑅 𑐏𑐮𑑅, 𑐥𑐸𑐔𑑅 𑐠𑑅𑐠𑑅 𑐫𑑅𑐳𑐾𑑄 𑐩𑑂𑐴𑐟𑐶𑑄 𑐩𑑂𑐴𑐟𑐶𑑄 𑐳𑑂𑐰𑐣𑐵 𑐣𑑄 𑐴𑐮 𑑋 𑐄𑐥𑐶𑑄 𑐩𑐢𑑂𑐫𑐫𑑂 𑐐𑐸𑐮𑐶𑑄 𑐮𑐵 𑐟𑐣𑐵 𑐣𑑄 𑐰𑐣 𑑋 𑐠𑐠𑐾 𑐫𑐵𑐫𑐾 𑐐𑐸𑐫𑐵 𑐩𑐹 𑐮𑑂𑐴𑐵𑑅 𑐢𑐵𑑅𑐳𑐵 𑐣𑑂𑐴𑑂𑐫𑐵𑐧𑐮𑐾𑑄 𑐬𑐵𑐖𑐣𑐿𑐟𑐶𑐎 𑐥𑐵𑐬𑑂𑐚𑐶𑐟𑐫𑑂𑐳𑑄 𑐣𑐾𑐰𑐵𑑅𑐟𑐫𑑂 𑐡𑐠𑐸𑐂 𑐠𑑅𑐠𑑅𑐐𑐸 𑐥𑐵𑐬𑑂𑐚𑐶𑐫𑐵 𑐧𑐬𑑂𑐔𑐳𑑂𑐰 𑐡𑐫𑐾𑐎𑐵 𑐟𑐫𑐾𑐟 𑐳𑑂𑐰𑐐𑐸𑐮𑐶𑑄 𑐏𑑅 𑑋 𑐣𑐾𑐰𑐵𑑅𑐟 𑐬𑐵𑐖𑐢𑐵𑐣𑐷𑐂 𑐔𑑂𑐰𑐣𑐵𑐔𑑂𑐰𑑄𑐐𑐸 𑐖𑐹𑐐𑐸𑐮𑐶𑑄 𑐳𑐎𑐮𑐾𑑄 𑐥𑐵𑐬𑑂𑐚𑐶𑐟𑐫𑑂𑐟𑐳𑑄 𑐬𑐵𑐖𑐢𑐵𑐣𑐷 𑐡𑐹𑐐𑐸 𑐠𑐵𑐳𑐫𑑂 𑐠𑑅𑐐𑐸 𑐥𑑂𑐬𑐨𑐵𑐰 𑐥𑑂𑐬𑐨𑐸𑐟𑑂𑐰 𑐎𑐵𑐫𑐩 𑐫𑐵𑐫𑐾𑐐𑐸 𑐁𑐰𑐱𑑂𑐫𑐎 𑐣𑑄 𑐖𑐸𑐂 𑑋 𑐀𑐠𑐾 𑐖𑐸𑐫𑐵 𑐴𑐾 𑐣𑐾𑐰𑐵𑑅𑐟𑐫𑑂𑐟 𑐬𑐵𑐖𑐣𑐿 𑐟𑐶𑐎 𑐥𑐵𑐬𑑂𑐚𑐶 𑐰 𑐱𑐵𑐳𑐎 𑐧𑐬𑑂𑐐𑐟𑐫𑐳𑑄 𑐣𑑂𑐴𑑂𑐫𑐵𑐧𑐮𑐾𑑄 𑐕𑐐𑐹 𑐔𑑂𑐫𑐹𑐟𑐵𑑅 𑐎𑐵𑐫𑐾𑐩𑐵𑑅𑐥𑐶𑑄 𑐖𑐵𑐟𑐶 𑐎𑐠𑑄 𑐎𑐫𑐵𑐟𑐮 𑑋 𑐠𑐸𑐎𑐠𑑄 𑐣𑐾𑐰𑐵𑑅𑐟𑐫𑑂𑐟 𑐣𑑂𑐴𑑂𑐫𑐵𑑅𑐐𑐸𑑄 𑐬𑐵𑐖𑐣𑐿𑐟𑐶𑐎 𑐥𑐵𑐬𑑂𑐚𑐶𑐟𑐫𑑂𑐳𑑄 𑐨𑐶𑑄 𑐧𑐵𑐫𑑂 𑐩𑐨𑐶𑑄𑐐𑐸 𑐣𑑂𑐴𑑂𑐫𑐵𑐐𑐸 𑐎𑐠𑑄 𑐔𑑂𑐫𑐹𑐟𑐵𑑅 𑐎𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐳𑐵𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑐸𑐎𑐶𑐫𑐵𑐟 𑐨𑐶𑑄𑐐𑐸 𑐮“𑐥𑐸𑐂 𑐫𑑄𑐎𑐾𑐟 𑐡𑐾𑐳𑐫𑑂 𑐳𑐩𑐵𑐣 𑐴𑐎 𑐀𑐢𑐶𑐎𑐵𑐬𑐫𑐵 𑐩𑑄𑐎𑐵𑑅 𑐳𑑅 𑐖𑑂𑐰𑐣𑐵 𑐳𑐎𑐳𑑂𑐫𑐵𑑄 𑐨𑐶𑑄𑐫𑐵 𑐣𑐶𑐟𑐶𑑄 𑐕𑑂𑐫𑐮𑐵 𑐫𑑄𑐎𑐾 𑐩𑐵𑑅𑐐𑐸 𑐏𑑅 𑑋 𑐧𑐬𑐸 𑐠𑐸𑐎𑐶𑐫𑐵 𑐀𑑅𑐏𑑅 𑐣𑐾𑐰𑐵𑑅𑐟𑐫𑑂𑐟 (𑐀𑐠𑐾 𑐢𑐵𑐫𑐾 𑐧𑐮𑐾 𑐣𑐾𑐰𑐵𑑅 𑐣𑐾𑐟𑐵𑐟𑐫𑑂𑐟) 𑐧𑐶𑐨𑐶𑐣𑑂𑐣 𑐬𑐵𑐖𑐣𑐿𑐟𑐶𑐎 𑐥𑐵𑐬𑑂𑐚𑐶𑐟𑐫𑑂𑐳𑑄 𑐕𑑂𑐫𑐮𑐵 𑐣𑐾𑐰𑐵𑑅𑐫𑐵 𑐎𑐸𑐔𑐵 𑐠𑐮𑐾𑐐𑐸, 𑐣𑐾𑐰𑐵𑑅𑐫𑐵𑐟 𑐮𑑂𑐰𑐵𑐎𑐾𑐐𑐸, 𑐣𑐾𑐰𑐵𑑅𑐫𑐵𑐟 𑐎𑐩𑐖𑑀𑐬 𑐫𑐵𑐎𑐾𑐐𑐸 𑐖𑑂𑐫𑐵𑐫𑑂 𑐄𑐥𑐶𑑄 𑐥𑐵𑐬𑑂𑐚𑐶𑐟, 𑐱𑐵𑐳𑐎 𑐧𑐬𑑂𑐐𑐟 𑐖𑐎𑑄 𑐳𑐦𑐮 𑐖𑐸𑐫𑐵𑐔𑑂𑐰𑐣 𑑋

𑐠𑑁𑑄 𑐣𑐾𑐥𑐵𑑅 𑐳𑑄𑐑𑐶𑐫 𑐳𑑄𑐬𑐔𑐣𑐵 𑐰𑐣𑐵 𑐫𑐸𑐐𑐵𑐣𑑂𑐟𑐎𑐵𑐬𑐷 𑐥𑐬𑐶𑐰𑐬𑑂𑐟𑐣 𑐖𑐸𑐂𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐟𑐎𑑄 𑐣𑐾𑐰𑐵𑑅 𑐣𑐾𑐟𑐵𑑅 𑐳𑐎𑐮𑐾𑑄 𑐕𑐩𑑂𑐴 𑐖𑐸𑐂 𑐦𑐫𑐵𑐔𑑂𑐰𑑄𑐐𑐸 𑐏𑐣𑐾𑐩𑐡𑐫𑐵 “𑐣𑐾𑐰𑐵𑑅𑐟 𑐩𑐵𑑄 𑐩𑐡𑐸𑐩𑑂𑐴 𑐩𑐔𑐵𑑃 𑐠𑐾𑑄 𑐖𑐸𑐫𑐵𑐧𑑂𑐫𑐹𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐨𑐹 𑐡𑐱𑐬𑐠 𑐬𑑄𑐐𑐱𑐵𑐮𑐵𑐫𑑂 𑐣𑐾𑐰𑐵𑑅 𑐬𑐵𑐖𑑂𑐫 𑐑𑑀𑐲𑐞𑐵 𑐳𑐨𑐵𑐫𑑂 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐣𑐎𑑂𑐱𑐵 𑐥𑐶𑐎𑐵𑐫𑐾𑐐𑐸 𑐩𑐖𑑂𑐫𑐹 𑐰 𑐥𑐶𑐎𑐵𑐫𑐾𑐎𑐵 𑐧𑐶𑐂 𑐩𑐏𑐸, 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐣𑐎𑑂𑐱𑐵 𑐥𑐶𑐎𑐵𑑅𑐳𑐵 𑐣𑐾𑐰𑐵𑑅 𑐳𑑄𑐑𑐬𑑂𑐲 𑐳𑐩𑐶𑐟𑐶𑐂 𑐔𑑂𑐰𑐣𑐾 𑐩𑐏𑐸 𑐢𑐿𑐥𑐶𑑄 𑐣𑐾𑐰𑐵𑑅 𑐣𑐾𑐟𑐵𑑅 𑐢𑐵𑑅𑐥𑐶𑑄 𑐥𑐶𑐴𑐵𑑄 𑐰𑑅𑐐𑐸𑐮𑐶𑑄 𑐕𑑂𑐫𑐵𑐟𑐵𑑄 𑐄𑐮𑐵 𑐧𑐶𑐮 𑑋 𑐡𑐱𑐬𑐠 𑐬𑑄𑐐𑐱𑐵𑐮𑐵𑐫𑑂 𑐀𑐥𑐵𑐫𑑂𑐢𑑄𑐐𑐸 𑐣𑐾𑐰𑐵𑑅 𑐬𑐵𑐖𑑂𑐫 𑐑𑑀𑐲𑐞𑐵 𑐫𑐵𑐫𑐾 𑐦𑐸𑐥𑐶𑑄 𑐣𑐾𑐟𑐵𑑅𑐟𑐫𑑂𑐳𑑄 𑐣𑐾𑐰𑐵𑑅 𑐬𑐵𑐖𑑂𑐫 𑐐𑐣𑐮𑐾 𑐢𑐎𑐵 𑐎𑑂𑐫𑐣𑐵 𑐧𑐶𑐂 𑐩𑐦𑐹𑐐𑐸 𑐡𑐸𑑅𑐏𑐫𑐵 𑐏𑑃 𑐏𑑅 𑑋 𑐣𑐾𑐰𑐵𑑅 𑐬𑐵𑐖𑑂𑐫𑐫𑐵 𑐣𑐎𑑂𑐱𑐵 𑐥𑐶𑐠𑐣𑐾𑐟 𑐡𑐎𑑂𑐰 𑐟𑐫𑐵𑐬𑐷 𑐫𑐵𑐣𑐵 𑐟𑑅𑐐𑐸 𑐖𑐸𑐫𑐵 𑐣𑑄 𑐕𑐩𑑂𑐴 𑐣𑐶𑐩𑑂𑐴 𑐣𑐾𑐰𑐵𑑅 𑐣𑐾𑐟𑐵𑑅𑐟𑐫𑑂𑐳𑑄 𑐣𑐾 𑐰𑐵𑑅 𑐬𑐵𑐖𑑂𑐫𑐫𑐵 𑐣𑐎𑑂𑐱𑐵 𑐥𑐶𑐎𑐵𑐫𑐾𑐟 𑐩𑐵𑐣𑐾 𑐩𑐖𑐸 𑐢𑐵𑐫𑐾𑐰𑑄 𑐕𑐸 𑐡𑐎𑑂𑐰 𑐣𑐾𑐰𑐵𑑅𑐟 𑐳𑐮𑐶𑐔𑐵𑐫𑑂 𑐮𑑅 𑐟𑐫𑐵 𑐡𑐸𑐧𑐶𑐣𑐵 𑐳𑐶𑐣𑐵 𑐰𑐣𑐾𑐐𑐸 𑐮𑐵 ?

𑐣𑐾𑐰𑐵𑑅 𑐮𑐵𑐐𑐵 𑐰 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵
𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐟𑐫𑑂𑐳𑑄 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐮𑐵𑐐𑐵 𑐰 𑐟𑐵𑐩𑐵𑑄𑐐𑐫𑐵 𑐮𑐵𑐐𑐵 𑐧𑐶𑐧𑐵𑐡𑐫𑐵𑐟 𑐳𑐡𑐵𑑄 𑐕𑐸𑑄 𑐩𑐏𑐸𑐠𑐾𑑄 𑐔𑐶𑐢𑑄𑐐𑐸 𑐏𑑃 𑐎𑐠𑑄 𑐎𑐵𑐫𑐾𑐐𑐸 𑐫𑐵𑐟 𑑋 𑐟𑑅𑐡𑑃 𑐣𑑂𑐴𑑂𑐫𑑅 𑐴𑐾 𑐩𑐵𑐌𑐧𑐵𑐡𑐶𑑄 𑐖𑐣𑐫𑐸𑐡𑑂𑐑𑐫𑐵 𑐃𑐮𑐫𑑂 𑐴𑐾 𑐖𑐶𑐮𑑂𑐮𑐵 𑐖𑐶𑐮𑑂𑐮𑐵 𑐧𑑂𑐰𑐠𑐮𑐵 𑐣𑐾𑐰𑐵𑑅𑐫𑐵𑐟 𑐫𑐾𑑃, 𑐫𑐮, 𑐰 𑐏𑑂𑐰𑐥 𑐳𑑂𑐰𑑄𑐐𑐹 𑐖𑐶𑐮𑑂𑐮𑐵𑑄 𑐖𑐎 𑐟𑐫𑐵 𑐴𑑅𑐧𑐮𑐫𑑂 𑐴𑐾 𑐣𑐾𑐰𑐵𑑅 𑐣𑐾𑐟𑐵𑐟𑐫𑑂𑐳𑑄 𑐥𑐵𑐫𑑂𑐕𑐶 𑐩𑐖𑐹𑐐𑐸 𑐏𑑃 𑐢𑐫𑐵𑐖𑐸𑐂 𑐩𑐵𑑅𑐐𑐸 𑐏𑑅 𑑋 𑐀𑐠𑐾 𑐩𑐫𑐵𑐣𑐵 𑐡𑑂𑐰𑑄𑐎𑐮 𑑋 𑐩𑐵𑐌𑐧𑐵𑐡𑐶𑑄 𑐣𑑄 𑐄𑐐𑐸𑐎𑐠𑑄 𑐣𑐾𑐰𑐵𑑅 𑐨𑐵𑐰𑐣𑐵 𑐀𑑅𑐏𑑅 𑐖𑑂𑐫𑐵 𑐫𑐵𑐫𑐾 𑐩𑐖𑑂𑐫𑐹𑐐𑐸 𑐠𑐸𑐂𑐎𑐾 𑐩𑐵𑑅 𑑋 𑐄𑐧𑐮𑐫𑑂 𑐠𑑂𑐰 𑐕𑐸𑑄 𑐩𑐏𑐸, 𑐁𑑅 𑐫𑐵𑐟 𑐀𑐠𑐾𑑄 𑐖𑐎 𑐖𑑂𑐫𑐵𑐣𑐵 𑐟𑑅𑐐𑐸 𑐢𑐎𑐵 𑐳𑐸𑐩𑑂𑐎 𑐔𑑂𑐰𑐣𑐵𑐔𑑂𑐰𑐣 𑑋 𑐄𑐧𑐮𑐾 𑐡𑑂𑐰𑑄𑐎𑐹𑐐𑐸𑐫𑐵 𑐮𑐶𑐔𑑂𑐰𑑅 𑐁𑑅 𑐏𑐣𑐾𑐡𑐟 𑑋 𑐀𑐗𑐮𑐵 𑐬𑐵𑐖𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛𑑄 𑐧𑐵𑑄𑐮𑐵𑐎𑑂𑐎 𑐀𑐢𑑂𑐫𑐫𑐣 𑐩𑐡𑐫𑐾 𑐎𑑄 𑐧𑐵𑐫𑑂 𑐕𑐐𑐹 𑐬𑐵𑐖𑐣𑐿𑐟𑐶𑐎 𑐨𑐵𑐲𑐞 𑐎𑐠𑑄 𑐧𑐵𑐫𑑂 𑐟𑐵𑐩𑐵𑑄𑐐𑐟𑐫𑑂𑐟 𑐮𑑂𑐴𑑂𑐰𑐣𑐾 𑐎𑐠𑑄 𑐣𑐾 𑐰𑐵𑑅𑐟𑐫𑐐𑐸 𑐠𑐵𑐫𑑂 𑐢𑐿𑐐𑐸 𑐢𑐸𑐮𑐶𑐏𑐾𑐮 𑐰 𑐔𑐶𑐟𑑂𑐮𑐵𑐒 𑐖𑐎 𑐏𑑅 𑐢𑐎𑐵 𑐠𑐵𑐫𑑂𑐠𑐵𑐳𑐫𑑂 𑐨𑐵𑐲𑐞 𑐫𑐵𑐣𑐵 𑐖𑐸𑐫𑐵 𑐣𑐾𑐰𑐵𑑅𑐟𑐫𑑂𑐟 𑐩𑐵𑐣𑐳𑐶𑐎 𑐬𑐸𑐥𑑄 𑐴𑐾 𑐎𑐩𑐖𑑀𑐬 𑐫𑐵𑐫𑐾𑐐𑐸 𑐳𑐸𑐬𑐸 𑐫𑐵𑐳𑐾𑑄 𑐣𑐾𑐰𑐵𑑅𑐫𑐵
𑐩𑑂𑐴, 𑐮𑑂𑐴𑐵𑑅, 𑐟𑐸𑐟𑐶 𑐟𑑂𑐰𑐠𑐮𑐾𑐐𑐸 𑐎𑑂𑐬𑐩 𑐡𑐎𑐮𑐫 𑐣𑑂𑐴𑐵𑐥𑐵 𑐣𑑂𑐴𑑂𑐫𑐵𑐎𑐵𑐮 𑑋 𑐨𑐮𑐳𑐵 𑐎𑐵𑐫𑐾 𑐰𑐫𑐎 𑐥𑐶𑐣𑑂𑐳𑑄 𑐣𑑂𑐴𑐵𑐥𑐵𑐫𑐵 𑐠𑑅𑐐𑐸 𑐎𑐩𑐖𑑀𑐬𑐷𑐫𑐵𑐟 𑐡𑐸 𑐣𑐸𑐐𑐮𑑄 𑐠𑐸𑐂𑐎𑐵 𑐎𑐫𑐵 𑐳𑐎𑐳𑑂𑐫𑐵𑑄 𑐨𑐶𑑄𑐫𑐵 𑐣𑐶𑐟𑐶𑑄 𑐠𑑅𑐐𑐸 𑐧𑐶𑐔𑐵𑑅 𑐰 𑐃 𑐕𑑂𑐫𑐮𑐷 𑑋 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐸𑐮𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐮𑐵𑐐𑐵 𑐋𑐟𑐶𑐴𑐵𑐳𑐶𑐎 𑐣𑐾𑐰𑐵𑑅 𑐥𑐴𑐶𑐔𑐵𑐣𑐫𑐵 𑐨𑐸𑐩𑐶 𑐏𑑅 𑐢𑐵𑐫𑐾𑐐𑐸 𑐫𑐵𑑅𑐳𑐵𑑄, 𑐡𑐾𑐫𑑂 𑐡𑐧𑐹𑐫𑐵 𑐳𑑅 𑐢𑐵𑑅𑐳𑐵 𑐳𑐸𑐣𑐵𑐣𑑄 𑐟𑐵𑐂𑐨𑐣𑑄 𑐕𑐸𑑄–𑐥𑑂𑐰𑐵𑐮𑐫𑑂 𑐳𑐸𑐮𑐵 𑐴𑐵𑐮𑐵 𑐔𑑂𑐰𑑄𑐠𑐾𑑄 𑐏𑑅𑐮𑐵 𑐢𑐿𑐠𑐾 𑐔𑑂𑐰𑑄 𑑋 𑐳𑑄𑐧𑐶𑐢𑐵𑐣 𑐳𑐨𑐵𑐫𑑂 𑐣𑑄 𑐣𑐾𑐰𑐵𑑅 𑐮𑐵𑐐𑐵𑐫𑐵𑐟 𑐎𑐫𑐵 𑐳𑐸𑐣𑐵𑑄 𑐣𑑄 𑐔𑑂𑐫𑐹𑐟𑐵 𑐥𑑂𑐰𑑄𑐎𑐵 𑐣𑑂𑐰𑐰𑐵𑐥𑐶𑑄 𑐳𑐸𑑄 𑐕𑐩𑑂𑐴 𑐳𑐨𑐵𑐳𑐡 𑐩𑐏𑐣𑐵 𑑋 𑐕𑐩𑑂𑐴𑐫𑐵𑑄 𑐕𑐩𑑂𑐴 𑐖𑐎 𑐖𑐹𑐳𑐵𑑄 𑐣𑐾𑐥𑐵𑑅 𑐬𑐵𑐲𑑂𑐚𑑂𑐬𑐶𑐫 𑐥𑐵𑐬𑑂𑐚𑐶𑐫𑐵 𑐳𑐨𑐵𑐳𑐡 𑐧𑐸𑐡𑑂𑐑 𑐳𑐵𑐫𑑂𑐩𑐶𑑄 𑐣𑐾𑐰𑐵𑑅 𑐮𑐵𑐐𑐵 𑐢𑐎𑐵 𑐒𑑂𑐏𑐫𑐵𑐣𑐵 𑐟𑑅𑐐𑐸 𑐮𑐵𑐐𑐵𑐫𑑂 𑐀𑐳𑐴𑐩𑐟 𑐎𑑂𑐫𑑄𑐳𑐾𑑄 𑐣𑐶𑐐𑐹𑐮𑐶𑑄 𑐣𑐎𑑂𑐱𑐵𑐫𑐵𑐟 𑐳𑐩𑐬𑑂𑐠𑐣 𑐩𑐫𑐵𑐳𑐾𑑄 𑐦𑐬𑐎 𑐩𑐟 𑐟𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐣𑐾 𑐥𑐵𑑅 𑐬𑐵𑐲𑑂𑐚𑑂𑐬𑐶𑐫 𑐥𑐵𑐬𑑂𑐚𑐶𑑄 𑐳𑑄𑐧𑐶𑐢𑐵𑐣 𑐳𑐨𑐵𑐫𑑂 𑐳𑐨𑐵𑐳𑐡 𑐧𑐸𑐡𑑂𑐑 𑐳𑐵𑐫𑑂𑐩𑐶 𑐥𑐵𑐏𑐾𑑄 𑐥𑐾𑐱 𑐫𑐵𑑅𑐐𑐸 𑐣𑐎𑑂𑐱𑐵𑐫𑑂 𑐀𑐨𑑄m 𑐣𑑄 𑐀𑐢𑑂𑐫𑐫𑐣 𑐫𑐵𑐫𑐾𑐩𑐵𑑅𑐐𑐸 𑐁𑐰𑐱𑑂𑐫𑐎 𑐡𑐣𑐷, 𑐠𑐸𑐖𑑀𑐐𑐸 𑐀𑐢𑑂𑐫𑐫𑐣 𑐣𑑂𑐴𑑂𑐫𑐵𑐎𑐵𑐟𑐸𑑄 𑐔𑑂𑐰𑐣𑐾 𑐣𑑄 𑐩𑐵𑑅, 𑐡𑐶𑐥𑐵𑑅 𑐎𑐵𑐫𑐾 𑐩𑐖𑑂𑐫𑐹 𑑋 𑐄𑐐𑐸 𑐣𑐎𑑂𑐱𑐵 𑐰 𑐦𑐬𑐎 𑐩𑐟 𑐕𑐸 𑐏𑑅 𑐳𑑂𑐰𑐫𑐾𑐟 𑐎𑑂𑐰𑐫𑑂𑐫𑐵 𑐰𑐾𑐧 𑐳𑐵𑐂𑐟𑐫𑑂 𑐗𑐵𑐳𑑃—
http://www.can.gov.np/doc_folder/225State%20 Restructuring%20Committtes%20Concept%20 paper2.pdf

𑐩𑐵𑐌𑐧𑐵𑐡𑐶𑑄 𑐣𑐾𑐥𑐵𑑅𑐫𑐵 𑐳𑑄𑐑𑐶𑐫 𑐳𑑄𑐬𑐔𑐣𑐵 𑐢𑐎𑐵 𑐖𑐣𑐫𑐸𑐡𑑂𑐑𑐫𑐵 𑐂𑐮𑐫𑑂 𑐕𑐐𑐹 𑐏𑐵𑐎𑐵𑐫𑐵 𑐣𑐎𑑂𑐱𑐵 𑐥𑐶𑐠𑐣𑐾 𑐢𑐸𑑄𑐎𑐵 𑐰𑐫𑐵𑑄 𑐮𑑂𑐫𑐹𑐮𑑂𑐫𑐹 𑐣𑑂𑐴𑑂𑐫𑐵𑑅𑐣𑑂𑐴𑑂𑐫𑐵𑑅𑐥𑐶𑐣𑑂𑐳𑑄 𑐠𑑅 𑐫𑑅𑐫𑑅𑐠𑐾𑑄 𑐣𑐾𑐥𑐵𑑅𑐫𑐵 𑐳𑑄𑐑𑐶𑐫 𑐣𑐾𑐥𑐵𑑅𑐫𑐵 𑐣𑐎𑑂𑐱𑐵𑐫𑐵 𑐏𑐵𑐎𑐵 𑐡𑐫𑐾𑐎𑐵 𑐴𑐮𑑋 𑐀𑐠𑐾 𑐫𑐵𑑅𑐥𑐶𑑄 𑐳𑐎𑐳𑐶𑐣𑑄 𑐩𑐵𑐌𑐧𑐵𑐡𑐶𑑄 𑐠𑐾𑑄 𑐣𑐾 𑐰𑐵𑑅𑐫𑐵𑐟 𑐫𑐾𑑃, 𑐫𑐮 𑐰 𑐏𑑂𑐰𑐥 𑐳𑑂𑐰𑑄𑐐𑐹 𑐖𑐶𑐮𑑂𑐮𑐵 𑐖𑐎 𑐟𑐫𑐵 𑐳𑐶𑐩𑐵𑐣𑐵 𑐧𑑂𑐰𑐠𑐮𑐵 𑐴𑐮𑑄 𑐣𑑄 𑐣𑐾𑐰𑐵𑑅 𑐣𑐾𑐟𑐵𑐟 𑐩𑑂𑐴𑐸𑐟𑐸𑐂 𑐢𑑁 𑐦𑐶𑐣𑐵 𑐔𑑂𑐰𑐣𑐾𑐩𑐖𑑂𑐫𑐹𑐐𑐸 𑐏𑑅 𑑋 𑐠𑐠𑐾 𑐳𑐸𑐩𑑂𑐎 𑐔𑑂𑐰𑐣𑐾 𑐧𑐮𑐾 𑐮𑐵 𑐩𑐾𑐥𑐶𑐣𑑂𑐳𑑄 𑐳𑐩𑐬𑑂𑐠𑐣 𑐫𑐵𑑅𑐐𑐸 𑐨𑐵𑐥𑐶𑐫𑐵 𑐎𑐵𑐂 𑑋 𑐠𑑁𑑄 𑐀𑐠𑐾 𑐴𑐾 𑐖𑐸𑐫𑐵 𑐧𑐶𑐮 𑑋 𑐬𑐵𑐖𑑂𑐫 𑐥𑐸𑐣𑐳𑑄𑐬 𑐔𑐣𑐵 𑐳𑐩𑐶𑐟𑐶𑑄 𑐥𑐶𑐎𑐵𑑅𑐐𑐸 𑐣𑐎𑑂𑐱𑐵𑐫𑑂 𑐣𑐾𑐰𑐵𑑅 𑐬𑐵𑐖𑑂𑐫𑐫𑐵 𑐮𑐵𑐐𑐵 𑐢𑐎𑐵 𑐫𑐾𑑃, 𑐫𑐮, 𑐏𑑂𑐰𑐥 ( 𑐫𑐾𑑃, 𑐫𑐮, 𑐏𑑂𑐰𑐥𑐫𑐵 𑐡𑐎𑑂𑐰𑑄 𑐠𑐵𑐫𑑂 𑐩𑐏𑐸 𑐣𑐶), 𑐢𑐸𑐮𑐶𑐏𑐾𑐮 𑐖𑑅𑐏𑑅, 𑐰 𑐩𑐎𑐰𑐵𑐣𑐥𑐸𑐬𑐫𑐵 𑐣𑐶𑐐𑐹 𑐐𑐵.𑐧𑐶.𑐳.𑐧𑐖𑑂𑐬𑐧𑐵𑐬𑐵𑐴𑐶 𑐰 𑐔𑐶𑐟𑑂𑐮𑐵𑐒 𑐖𑐎 𑐫𑐵𑐣𑐵 𑑙𑑒𑑙 𑐳𑑂𑐰𑐵𑐫𑐬 𑐧𑐬𑑂𑐐 𑐎𑐶𑐮𑑀 𑐩𑐶𑐚𑐬 (𑑐.𑑖 𑐥𑑂𑐬𑐟𑐶𑐱𑐟) 𑐨𑐹𑐨𑐵𑐐 𑐖𑐎 𑐟𑐫𑐵 𑐟𑑅𑐐𑐸 𑐡𑐸 𑑋 𑐠𑐸𑐐𑐸 𑐣𑐎𑑂𑐱𑐵 𑐳𑑄𑐧𑐶𑐢𑐵𑐣 𑐳𑐨𑐵𑐫𑑂 𑐕𑐮𑐦𑐮 𑐰𑐣𑐾 𑐢𑐸𑑄𑐎𑐵 𑐟𑐶𑐣𑐶 𑐧𑐮𑑂𑐮 𑐮𑐶𑐧𑐵𑐎 𑐖𑐹𑐳𑐵𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐮𑐶𑑄 𑐣𑐾 𑐰𑐵𑑅𑐫𑐵 𑐮𑐵𑐐𑐵 𑐄𑐮𑐶 𑐖𑐎 𑐩𑐏𑐸 𑐢𑐎𑐵𑑅 𑐣𑑂𑐰𑐰𑐵𑐣𑐵 𑐴𑐮 𑑋 𑐄𑐮𑐶 𑐢𑐫𑐵 𑐴𑐵𑐎𑐣𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐳𑐸𑐩𑑂𑐎 𑐔𑑂𑐰𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐠𑑁𑑄𑐫𑐵 𑐩𑐹 𑐰𑑄𑐐𑐸 𑐃 𑐡𑐶𑐥𑐵𑑅 𑐎𑐫𑐵 𑐳𑐸𑐩𑑂𑐎 𑐔𑑂𑐰𑐣𑐾 𑐐𑐸, 𑐡𑐾𑐣𑐵𑐔𑑂𑐰𑐣𑐾𑐐𑐸 𑐃 𑐩𑐏𑐸 𑑋 𑐠𑐸𑐎𑐶𑐫𑐵 𑐳𑐩𑐵𑐢𑐵𑐣𑐫𑐵 𑐣𑐶𑐟𑐶𑑄 𑐣𑐾𑐰𑐵𑑅𑐟𑐫𑑂𑐳𑑄, 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐸𑐮𑐶𑑄 𑐕𑐸𑑄 𑐫𑐵𑐣𑐵𑐔𑑂𑐰𑐣𑐮𑐾 𑐢𑐿𑐐𑐸 𑐏“𑐟 𑐣𑑂𑐫𑐣𑐾 𑐟𑐎𑑄 𑐩𑐏𑑄𑐣𑐵 𑐣𑐾𑐰𑐵𑑅𑐟𑐫𑑂𑐐𑐸 𑐣𑐸𑐐𑑅 𑐟𑐳𑐎𑑄 𑐎𑑂𑐰𑐟𑐸𑑄 𑑋 𑐀𑐗 𑐣𑐾𑐰𑐵𑑅 𑐬𑐵𑐖𑑂𑐫 𑐠𑐸𑐮𑐶 𑐏𑑅 𑐠𑐸𑐮𑐶 𑐖𑐸𑐂𑐩𑐵 𑐢𑐎𑐵 𑐡𑑃𑐡𑑃 𑐣𑐶𑐳𑐾𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐮𑐶𑑄 𑐧𑐶𑐲𑐾𑐱𑐖𑑂𑐘 𑐟𑐫𑐵 𑐟𑐫𑐵𑐬 𑐫𑐵𑑅𑐐𑐸 𑐣𑐎𑑂𑐱𑐵 𑐥𑐶𑐎𑐵𑐫𑐾𑐟 𑐟𑐎𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐸𑐮𑐶𑑄 𑐁𑑃𑐚 𑐟𑐎 𑐫𑐵𑑅𑐐𑐸 𑐩𑐏𑑅𑐣𑐵 𑐣𑐾𑐰𑐵𑑅𑐟𑐫𑑂 𑐣𑐸𑐐𑑅 𑐟𑐳𑐎𑑄 𑐏𑑂𑐰𑑅 𑑋 𑐳𑐵𑐬𑐵 𑐳𑑄𑐳𑐵𑐬𑑄 𑐣𑐎𑑂𑐱𑐵 𑐥𑐶𑐎𑐵𑐣𑐵 𑐕𑐮𑐦𑐮𑐫𑑂 𑐴𑐫𑐾 𑐖𑑂𑐫𑐹 𑐳𑑄𑐧𑐶𑐢𑐵𑐣 𑐳𑐨𑐵𑐫𑑂 𑐥𑐾𑐱 𑐫𑐵𑐫𑐾 𑐖𑑂𑐫𑐹𑐳𑐵 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐮𑐶𑑄 𑐖𑐎 𑐕𑐵𑐫𑑂 𑐡𑐫𑐾𑐎𑐵 𑐟𑑅𑐐𑐸 𑐣𑐎𑑂𑐱𑐵 𑐕𑐮𑐦𑐮𑐫𑑂 𑐩𑐴𑑅𑐐𑐸 ? 𑐳𑐸𑑄 𑐟𑑄 𑐔𑐵𑐂 𑐢𑐎𑐵𑑅 𑐥𑐶𑐫𑐵𑐔𑑂𑐰𑐣𑐵 𑐮𑐵 𑐥𑐵𑐫𑑂𑐕𑐶 𑐖𑐸𑐂𑐩𑐏𑐸 𑑋 𑐡𑑃𑐡𑑃 𑐧𑐶𑐂𑐎 𑐥𑑂𑐬𑐵𑐰𑐶𑐢𑐶𑐎, 𑐃𑐟𑐶𑐴𑐵𑐳𑐎𑐵𑐬, 𑐧𑐶𑐱𑐾 𑐲𑐖𑑂𑐘 𑐟𑐫𑐵 𑐡𑐫𑐾𑐎𑐹𑐐𑐸 𑐣𑐎𑑂𑐱𑐵 𑐕𑐐𑐹 𑐟𑐎𑑄 𑐥𑐶𑐎𑐵𑐫𑐾𑐟 𑐮𑐶𑐦𑑅 𑐳𑑂𑐰𑐫𑐵𑐔𑑂𑐰𑐣𑐾 𑐩𑐵𑑅𑐐𑐸 𑐕𑐸𑑄 𑐩𑐡𑐸𑐠𑐾𑑄 𑐔𑑂𑐰𑑄 𑑋 𑐗𑐷𑐟 𑐳𑐸𑐫𑐵𑑄 𑐮𑐵𑐐𑐵 𑐮𑐵𑐎𑐵 𑐎𑐵𑐫𑐾 𑐩𑐵𑑅𑐐𑐸 𑐣𑑄 𑐩𑐡𑐸 , 𑐣𑐾𑐰𑐵𑑅 𑐥𑐴𑐶𑐔𑐵𑐣𑐫𑐵 𑐠𑐵𑐫𑑂𑐧𑐵𑐫𑑂 𑐟𑑂𑐰𑐟𑐾𑐐𑐸 𑐣𑑄 𑐩𑐖𑑂𑐫𑐹 𑑋 𑐠𑐸𑐎𑐶𑐫𑐵 𑐧𑐶𑐬𑑀𑐢 𑐮𑐵 𑐳𑐸𑐣𑐵𑐣𑑄 𑐫𑐵𑐫𑐾𑐩𑐵𑑅𑐐𑐸 𑐠𑐾𑑄 𑐩𑐟𑐵 𑑋 𑐣𑐾𑐰𑐵𑑅𑐫𑐵 𑐮𑐵𑐐𑐶𑑄 𑐠𑑅𑐐𑐸 𑐖𑐷𑐰𑐣 𑐖𑑅𑐕𑐶 𑐥𑐵𑐣𑐵 𑐖𑐸𑐥𑐶𑑄 𑐣𑐾𑐰𑐵𑑅 𑐣𑐾𑐟𑐵𑐟 𑐣𑑄 𑐠𑑁𑑄 𑐖𑐶 𑐳𑑂𑐰𑐟𑐣𑑂𑐟𑑂𑐬 𑐖𑐶 𑐩𑐵𑐣𑐰𑐀𑐢𑐶𑐎𑐵𑐬𑐧𑐵𑐡𑐶 𑐖𑐎 𑐢𑐫𑐵 𑐖𑐸𑐂𑐐𑐸 𑐃 𑐣𑑄 𑐩𑐡𑐫𑐾 𑐢𑐸𑑄𑐎𑐮 𑑋 𑐣𑐾 𑐰𑐵𑑅 𑐮𑐵𑐐𑐵 𑐟𑑄𑐎𑐾𑐟𑑂𑐫𑑄𑐐𑐸 𑐂𑐮𑐫𑑂 𑐣𑑂𑐴𑑂𑐫𑑅𑐳𑐹 𑐔𑐵𑐫𑐾𑐎𑐵 𑐳𑑂𑐰𑐟𑑂𑐬𑐣𑑂𑐟𑑂𑐟 𑐢𑑅𑐎𑐵 𑐩𑐵𑐣𑐰𑐀𑐢𑐶𑐎𑐵𑐬 𑐧𑐵𑐡𑐶 𑐖𑐎 𑐢𑐫𑐵 𑐔𑑂𑐰𑑄𑐳𑐵𑑄 𑐎𑐣𑑂𑐴𑐾 𑐮𑐵 𑐕𑐶𑐎𑐥𑐶𑐣𑑂𑐟 𑐣𑑄 𑐱𑐵𑐣𑑂𑐟𑐶 𑐡𑐿 𑐠𑐾𑑄 𑐩𑐏𑐣𑐵 𑑋 𑐠𑑁𑑄 𑐠𑑅𑐐𑐸 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐮𑐵 𑐨𑐵𑐐 𑐂𑐣𑐵 𑐖𑐹𑐐𑐸 𑐥𑐣𑐾 𑐩𑐦𑐸𑐳𑐵 𑐕𑐸 𑐎𑐣𑑂𑐴𑐾𑐫𑐵 𑐥𑐸𑐳𑑂𑐟𑐵𑑄
𑐕𑐶𑐎𑐥𑐶𑐣𑐶𑐐𑐸 𑐖𑐫 𑐖𑐫 𑐎𑐵𑐬 𑐫𑐵𑐂𑐠𑐾𑑄 𑐔𑑂𑐰𑑄𑐮𑐵 ?

𑐣𑐾𑐰𑐵𑑅 𑐮𑐵𑐐𑐵 𑐨𑐵𑐐 𑐟𑐫𑐵 𑐧𑐶𑐂 𑐡𑐿 𑐩𑐏𑐸
𑐡𑐾𑐳𑐫𑑂 𑐠𑑁𑑄 𑐳𑐎𑐳𑑂𑐫𑐵 𑐠𑑅𑐠𑐸 𑐥𑐴𑐶𑐔𑐵𑐣 𑐩𑐵𑐮𑐵𑐔𑑂𑐰𑑄𑐐𑐸 𑐂𑐮𑐫𑑂 𑐮𑐵𑐎𑑂𑐎 𑐳𑐎𑐳𑑂𑐫𑐵𑑄 𑐣𑐾 𑐰𑐵𑑅𑐫𑐵 𑐥𑐴𑐶𑐔𑐵𑐣𑐫𑐵𑐟 𑐢𑐵𑑅𑐳𑐵 𑐮𑐵𑐎𑐩𑑄 𑐴𑐾 𑐔𑑂𑐰𑐵𑐣𑐵 𑐧𑑂𑐫𑐹𑐐𑐸 𑐡𑐸 𑑋 𑐣𑐾𑐰𑐵𑑅 𑐢𑐿𑐥𑐶𑑄 𑐣𑑂𑐴𑑂𑐫𑐵𑑅𑐐𑐸 𑐫𑐵𑑅𑐳𑐵𑑄 𑐧𑐵𑐫𑑂 𑐣𑑂𑐴𑑂𑐫𑐵𑑅𑐐𑐸 𑐢𑐵𑑅𑐳𑐵𑑄 𑐖𑑂𑐫𑐹𑐥𑐶𑑄 𑐎𑐟𑐵𑑄𑐩𑐬𑐶 𑐡𑐫𑐾𑐎𑐵 𑐩𑑂𑐴𑐶𑐟𑐾𑐐𑐸 𑐣𑑂𑐴𑑂𑐫𑐧𑑂𑐰𑐳𑐵𑑅 𑐡𑐫𑐾 𑐎𑐵 𑐟𑑅𑐐𑐸 𑐏𑐣𑐾𑐡𑐫𑐵 𑐰𑐮 𑑋 𑐥𑐵𑐎𑐮𑑄 𑐖𑐎 𑐴𑐶𑐳𑐵𑐧 𑐫𑐵𑑅𑐳𑐵𑑄 𑐣𑑄 𑐣𑐾𑐰𑐵𑑅 𑐰 𑐟𑐵𑐩𑐵𑑄𑐐 𑐖𑐣𑐳𑑄𑐏𑑂𑐫𑐵 𑐄𑐮𑐶𑐄𑐮𑐶𑐟𑐸𑑄 𑑕.𑑕 𑐥𑑂𑐬𑐟𑐶𑐱𑐟𑐫𑐵 𑐮𑑂𑐫𑐵𑐏𑐫𑑂 𑐡𑐹𑐳𑐵 𑐮𑐵𑐐𑐵 𑐢𑐵𑑅𑐳𑐵 𑐐𑐠𑐾 𑐣𑐾𑐰𑐵𑑅𑐫𑐵𑐟 𑑙𑑒𑑙 𑐳𑑂𑐰𑐵𑐫𑑂𑐬 𑐧𑐬𑑂𑐐 𑐎𑐶𑐮𑑀𑐩𑐶𑐚𑐬 (𑑐.𑑖 𑐥𑑂𑐬𑐟𑐶𑐱𑐟 𑐨𑐹𑐨𑐵𑐐) 𑐖𑐎 ? 𑐳𑐎𑐮𑐾𑑄 𑐩𑑂𑐰𑐵𑐫𑐾𑐩𑐵𑑅 𑐳𑐵 𑐣𑐾𑐥𑐵𑐮𑐩𑐞𑑂𑐜𑐮𑐫𑑂 𑐔𑑂𑐰𑐣𑐷𑐥𑐶𑑄 𑐩𑑂𑐰𑐵𑐫𑐾𑐩𑑂𑐰𑐵 𑐮𑐵 ? 𑐠𑐸𑐮𑐶 𑐟𑐎𑑄 𑐧𑐶𑐔𑐵𑑅 𑐩𑐫𑐵𑐳𑐾𑑄 𑐀𑐗𑐮𑐵 𑐐𑐸𑐥𑐶𑑄 𑐣𑐾𑐰𑐵𑑅 𑐣𑐾𑐟𑐵𑑅𑐟 𑐠𑐵𑐫𑑂 𑐔𑐶𑐎𑐹 𑐖𑐹𑐳𑐵 𑐗𑐣 𑐬𑐵𑐖𑑂𑐫 𑐣𑑂𑐴𑑂𑐫𑐵𑐎𑐾 𑐀𑑅𑐥𑐸𑐂 𑐢𑐎𑐵 𑐧𑐶𑐔𑐵𑑅 𑐎𑐫𑐵𑐔𑑂𑐰𑐣 𑑋 𑐟𑑅𑐎𑐹 𑐖𑐸𑐮𑐎𑐶 𑐣𑐾𑐰𑐵𑑅𑐫𑐵𑐟 𑐠𑐵𑐎𑐸𑐂 𑐢𑐿𑐐𑐸 𑐧𑐶𑐔𑐵𑑅 𑐫𑐵𑐂𑐥𑐶𑑄 𑐖𑐸𑐫𑐵𑐔𑑂𑐰𑐣 𑑋 𑐣𑐾𑐰𑐵𑑅 𑐬𑐵𑐖𑑂𑐫𑐫𑐵 𑐨𑐹𑐨𑐵𑐐 𑐔𑐶𑐎𑐹𑐳𑐵𑑄 𑐠𑑂𑐰 𑐠𑐵𑐫𑑂 𑐫𑐵 𑐎𑑂𑐰𑐵𑐮𑐶𑐚𑐶 𑐳𑑂𑐰𑐫𑐾𑐩𑐵 𑐢𑐎𑐵 𑐢𑐫𑐵𑐔𑑂𑐰𑐣 𑑋 𑐕𑐶𑐩𑐶𑐳𑑄 𑐬𑐵𑐖𑐣𑐶𑐟𑐶 𑐴𑐾 𑐩𑐠𑐹 𑐢𑐎𑐵 𑐬𑐵𑐖𑐣𑐶𑐟𑐶 𑐠𑐸𑐩𑑂𑐴 𑐖𑐸𑐫𑐵 𑐗𑑄𑐐𑑅 𑐮𑑂𑐴𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑐣 𑑋 𑐣𑐾𑐰𑐵𑑅𑐫𑐵 𑐠𑐵𑐫𑑂 𑐟𑑅𑐎𑐹 𑐰𑐵 𑐔𑐷𑐎𑐹 𑐧𑐵𑐫𑑂 𑐎𑑂𑐰𑐵𑐮𑐶𑐚𑐶 𑐧𑐵𑐫𑑂 𑐎𑑂𑐰𑐵𑐣𑑂𑐚𑐶𑐚𑐶𑐫𑐵 𑐐𑐸𑐐𑐸𑑄 𑐏“ 𑐩𑐏𑐸 𑑋 𑐠𑑂𑐰 𑐮𑐵 𑐩𑐸𑐎𑑄 𑐣𑐾𑐰𑐵𑑅𑐫𑐵 𑐋 𑐟𑐶𑐴𑐵𑐳𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐩𑐴𑐟𑑂𑐰 𑐡𑐹𑐐𑐸, 𑐣𑐾𑐰𑐵𑑅𑐫𑐵 𑐖𑐷𑐰𑐣 𑐣𑐵𑐥 𑐨𑑂𑐫𑐮𑐫𑑂 𑐥𑐸𑐣𑐵 𑐰𑐣𑐵𑐔𑑂𑐰𑑄𑐐𑐸 𑐣𑐾𑐰𑐵𑑅 𑐥𑐴𑐶𑐔𑐵𑐣 𑐣𑐾𑐰𑐵𑑅 𑐠𑐵𑐫𑑂𑐧𑐵𑐫𑑂 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐏“ 𑐏𑑅 𑑋 𑐠𑑁𑑄 𑐣𑑄 𑐣𑐾𑐰𑐵𑑅𑐫𑐵 𑐧𑐳𑑀𑐰𑐵𑐳 𑐠𑐸𑐐𑐸 𑐠𑐵𑐳𑐫 𑐟𑐵𑐩𑐵𑑄𑐐𑐫𑐵 𑐳𑑂𑐰𑐫𑐵 𑐩𑑂𑐴𑑀 𑐩𑐖𑐹𑐐𑐸 𑐨𑐹𑐨𑐵𑐐 𑐀𑐗𑑄 𑐫𑐔𑐸𑐎 𑐳𑐷 𑐡𑐹𑐐𑐸 𑐕𑐳𑑂𑐰𑐵𑑅𑐐𑐸 𑐠𑐵𑐫𑑂𑐟 𑐡𑐣𑐷 𑑋 𑐣𑐾𑐰𑐵𑑅 𑐣𑐵𑐥 𑐳𑑂𑐰𑐵𑐥𑐸 𑐴𑐾 𑐩𑐡𑐸𑐐𑐸 𑐣𑐾𑐰𑐵𑑅 𑐥𑐴𑐶𑐔𑐵𑐣𑐫𑐵 𑐐𑐸𑐐𑐸𑑄 𑐨𑐹 𑐴𑐾 𑐩𑐡𑐹𑐐𑐸, 𑐣𑐾𑐰𑐵𑑅 𑐐𑐧𑐮𑐾𑑄 𑐩𑐔𑑂𑐰𑑄𑐐𑐸 𑐠𑐵𑐫𑑂𑐫𑐵𑐟 𑐣𑐾𑐥𑐵𑐮𑐩𑐞𑑂𑐜𑐮 𑐖𑐸𑐂𑐩𑐵 𑐢𑐵𑑅𑐐𑐸 𑐩𑐡𑐸 𑐳𑐸𑐣𑐵𑐣𑑄 𑑋 𑐠𑑂𑐰 𑐮𑐵 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐐𑐸 𑐋𑐟𑐶𑐴𑐵𑐳𑐶𑐎 𑐥𑐴𑐶𑐔𑐵𑐣 𑐡𑐹𑐐𑐸 𑐠𑐵𑐳𑐫𑑂 𑐠𑑁𑑄 𑐟𑐎𑑄 𑐀𑐗𑑄 𑐣𑐾𑐰𑐵𑑅𑐟 𑐔𑑂𑐰𑐣𑐵𑐔𑑂𑐰𑑄𑐐𑐸 𑐮𑑂𑐫𑐵𑐏𑑄 𑐠𑑂𑐰 𑐣𑐾𑐰𑐵𑑅 𑐥𑐴𑐶𑐔𑐵𑐣, 𑐣𑐾𑐰𑐵𑑅 𑐮𑐵𑐐𑐵 𑐖𑐸𑐂𑐩𑐵 𑐢𑐿𑐐𑐸𑐫𑐵 𑐏𑑃 𑐖𑐎 𑐏𑑅 𑑋 𑐴𑐵𑐎𑐣𑑄 𑐣𑐾𑐰𑐵𑑅 𑐬𑐵𑐖𑑂𑐫𑐫𑑂 𑐣𑐾𑐰𑐵𑑅 𑐖𑐎 𑐔𑑂𑐰𑐣𑐷 𑐰 𑐔𑑂𑐰𑐣𑐾𑐩𑐵𑑅 𑐢𑐿𑐐𑐸 𑐣𑑄 𑐮𑐵 𑐩𑐡𑐸𑐣𑐷 𑑋 𑐟𑐵𑐩𑐵𑑄𑐐 𑐟 𑐣𑑄 𑐠𑐣 𑐴𑐾 𑐔𑑂𑐰𑐣𑐵𑐔𑑂𑐰𑑄𑐐𑐸 𑐏𑑅 𑐳𑐵 𑐄𑐩𑐶𑐟 𑐨𑐵𑐐𑑄 𑐡𑐫𑐾𑐩𑐵𑑅𑐐𑐸 𑐣𑐾𑐰𑐵𑑅𑐫𑐵𑐟 𑐩𑐵𑑅𑐐𑐸 𑐩𑐡𑐸, 𑐟𑐬 𑐣𑐾𑐰𑐵𑑅𑐫𑐵 𑐖𑐣𑐳𑑄𑐏𑑂𑐫𑐵𑐫𑐵 𑐀𑐣𑐸𑐥𑐵𑐟𑐫𑐵 𑐮𑑂𑐫𑐵𑐏𑑄, 𑐥𑑂𑐬𑐵𑐎𑐺𑐟𑐶𑐎 𑐳𑑂𑐬𑑀𑐟 𑐧𑐵𑑃𑐜𑐦𑐵𑑃𑐜𑐫𑐵 𑐮𑑂𑐫𑐵𑐏𑑄 𑐣𑐾𑐰𑐵𑑅𑐫𑐵 𑐥𑐴𑐶𑐔𑐵𑐣𑐫𑐵 𑐮𑑂𑐫𑐵𑐏𑑄 𑐣𑐾𑐥𑐵𑐮𑐩𑐞𑑂𑐜𑐮𑐫𑑂 𑐖𑐸𑐂𑐩𑐵𑑅𑐐𑐸 𑐮𑐵𑐐𑐵 𑐣𑐾𑐰𑐵𑑅 𑐣𑑄 𑐟𑑂𑐰𑐟𑐾 𑐦𑐿 𑐩𑐏𑐸 𑑋 𑐫𑐡𑐶 𑐣𑐾 𑐥𑐵𑐮𑐩𑐞𑑂𑐜𑐮𑐫𑐵 𑐮𑐵𑐐𑐵 𑐠𑑁𑑄 𑐥𑐵𑐫𑑂𑐕𑐶 𑐩𑐖𑐸𑐂𑐎 𑐩𑐾𑐩𑐾𑐐𑐸 𑐥𑑂𑐬𑐡𑐾𑐱𑐫𑑂 𑐧𑑂𑐰𑐠𑐮𑐵 𑐧𑑂𑐫𑐹𑐳𑐵𑑄 𑐠𑑂𑐰 𑐳𑑄𑐑𑐬𑑂𑐲 𑐎𑐣𑑂𑐴𑐾 𑐮𑐵 𑐩𑐫𑐵𑐂 𑐴𑐾 𑐩𑐏𑐸 𑑋 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐮𑐵𑐐𑐵 𑐨𑐵𑐐 𑐟𑐫𑐵 𑐂𑐣𑐵𑐧𑑂𑐫𑐹𑐐𑐸 𑐳𑐶𑐂𑐎 𑐳𑐶𑐂𑐎𑑄 𑐎𑐣𑑂𑐴𑐾𑐫𑐵𑐥𑐶𑑄 𑐐𑐠𑐾 𑐳𑐸𑐩𑑂𑐎 𑐔𑑂𑐰𑐣𑐷 ?

𑑕.𑑖 𑐥𑑂𑐬𑐟𑐶𑐱𑐟 𑐣𑐾𑐰𑐵𑑅𑐟𑐫𑑂𑐐𑐸 𑐨𑐹𑐨𑐵𑐐 𑐐𑐠𑐾 𑑐.𑑖 𑐥𑑂𑐬𑐟𑐶𑐱𑐟 𑐖𑐎 ? 𑐠𑑂𑐰 𑐮𑐵 𑐣𑐾 𑐰𑐵𑑅 𑐣𑐾𑐟𑐵𑑅𑐟 𑐳𑐸𑐩𑑂𑐎 𑐔𑑂𑐰𑑄𑐐𑐸𑐮𑐶𑑄 “𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐑𑐣𑐵 𑐧𑐳𑑂𑐟𑐷 𑐡𑐹𑐐𑐸 𑐕𑐾𑑃 𑐖𑐎 𑐣𑐾 𑐰𑐵𑑅 𑐣𑑄 𑐠𑑅𑐐𑐸 𑐢𑐵𑐫𑐾 𑐡𑐿 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐧𑐸𑑃 𑐐𑐸𑑃 , 𑐰 𑐥𑑂𑐬𑐵𑐎𑐺𑐟𑐶𑐎 𑐳𑑂𑐬𑑀𑐟 𑐣𑐾𑐰𑐵𑑅 𑐣𑑄 𑐠𑑅𑐐𑐸 𑐢𑐵𑐫𑐾 𑐡𑐿 𑐩𑐏𑐸𑑃 𑐢𑐎𑐵𑑅 𑐴𑐾𑐥𑐾 𑐫𑐵𑐣𑐵 𑐴𑑅𑐐𑐸 𑐳𑐶𑐧𑐾 𑐩𑐾𑐐𑐸 𑐕𑐸𑑄 𑐩𑐏𑐸 𑑋 𑐣𑐾𑐰𑐵𑑅𑐫𑐵 𑐮𑐵𑐐𑐵𑐫𑐵𑐟 𑐟𑐵𑐩𑐵𑑄𑐐𑐟𑐫𑑂𑐐𑐸𑐮𑐶𑐂 𑐟𑐫𑐵 𑐄𑐩𑐶𑐟 𑐔𑑂𑐰𑐫𑐔𑑂𑐰𑐫𑑂 𑐟𑐫𑐵 𑐬𑐵𑐖𑐣𑐷𑐟𑐶 𑐫𑐵𑐣𑐵 𑐔𑑂𑐰𑑄𑐐𑐸 𑐮𑐵 𑐥𑐸𑐮𑐵𑑄𑐐𑐸 𑐴𑐾 𑐏𑑃 𑐖𑐸𑐮 𑑋 𑐁𑑅 𑐴𑐵𑐎𑐣𑑄 𑐣𑐾𑐰𑐵𑑅𑐫𑐵 𑐣𑐵𑐥𑑄 𑐟𑐵𑐩𑐵𑑄𑐐𑐫𑐵 𑐮𑐵𑐐𑐵 𑐏𑐫𑑂𑐧𑑂𑐬𑐩𑑂𑐴𑐸𑐟𑐫𑑂𑐟 𑐢𑐎𑐵 𑐡𑐫𑐾𑐎𑐹𑐐𑐸 𑐣𑑂𑐴𑐹𑐐𑐸 𑐥𑑂𑐬𑐡𑐾𑐱 𑐣𑐵𑐬𑐵𑐫𑐞𑐷 𑐰 𑐳𑐸𑐣𑐎𑑀𑐱𑐷 𑐫𑐵𑐣𑐵 𑐨𑐵𑐐 𑐟𑐫𑐵 𑐧𑐶𑐮 𑑋
𑐠𑑁𑑄 𑐣𑑄 𑐩𑐢𑑂𑐫𑐩𑐵𑐘𑑂𑐔𑐮𑐫𑐵 𑑑𑑒 𑐐𑐹 𑐖𑐶𑐮𑑂𑐮𑐵𑐫𑐵 𑐁𑐥𑐵𑐮𑑄 𑐨𑐹𑐨𑐵𑐐𑐫𑑂 𑐕𑐳𑑂𑐰𑐵 𑐖𑐸𑐂𑐎 𑐣𑐾𑐰𑐵𑑅𑐟 𑐟𑐵𑐩𑐵𑑄𑐐𑐟 𑐳𑑂𑐰𑐫𑐵 𑐁𑐥𑐵 𑐮𑑂𑐫𑐵𑐏𑐫𑑂 𑐔𑑂𑐰𑑄𑐣𑐵𑐔𑑂𑐰𑑄𑐐𑐸 𑐠𑐵𑐫𑑂 𑐡𑐸 𑑋 𑐳𑑂𑐰𑐨𑐵𑐰𑐶𑐎 𑐎𑐠𑑄 𑐡𑐾𑐫𑑂𑐫𑐵 𑑗𑑕 𑐖𑐶𑐮𑑂𑐮𑐵𑑄 𑐴𑐾 𑐫𑐾𑑃, 𑐫𑐮, 𑐰 𑐏𑑂𑐰𑐥𑐫𑑂 𑐩𑐣𑐹𑐟 𑐩𑐵𑐂𑐐𑑂𑐬𑐾𑐳𑐣 𑐖𑐸𑐫𑐵 𑐔𑑂𑐰𑑄 𑐰𑐫𑐵𑐔𑑂𑐰𑑄 𑐧𑐮𑐾 𑐣𑐸𑐰𑐵𑐎𑑀𑐚, 𑐎𑐵𑐨𑑂𑐬𑐾𑐥𑐮𑐵𑐘𑑂𑐔𑑀𑐎, 𑐳𑐶𑐣𑑂𑐢𑐸𑐥𑐵𑐮𑑂𑐔𑑀𑐎, 𑐡𑑀𑐮𑐏𑐵, 𑐬𑐵𑐩𑐾𑐕𑐵𑐥, 𑐳𑐶𑐣𑑂𑐢𑐸𑐮𑐷𑐫𑐵 𑐣𑐾𑐰𑐵𑑅𑐟 𑐗𑐣 𑐔𑑂𑐰𑑄 𑐰𑐂𑐐𑐸 𑐴𑐾 𑐖𑐸𑐮 𑑋 𑐀𑐠𑐾 𑐖𑐸𑐫𑐵 𑐖𑐣𑐐𑐞𑐣𑐵𑐫𑑂 𑐄𑐐𑐸 𑐠𑐵𑐳𑐫𑑂 𑐣𑐾𑐰𑐵𑑅𑐫𑐵 𑐳𑑄𑐏𑑂𑐫𑐵 𑐖𑐣𑐐𑐞𑐣𑐵𑐫𑐵 𑐥𑐬𑐶𑐨𑐵𑐲𑐵 𑐎𑐠𑑄 𑐩𑑂𑐴𑑀 𑐖𑐸𑐂 𑑋 𑐠𑐸𑐥𑐶𑑄 𑐖𑐵𑐟𑐖𑐵𑐟𑐶 𑐎𑐠𑑄𑐫𑐵 𑐩𑐵𑐂𑐐𑐾𑑂𑐬𑐳𑐣𑐫𑐵 𑐟𑐠𑑂𑐫𑐵𑑄𑐎 𑐰 𑐖𑐵𑐟𑐖𑐵𑐟𑐶 𑐎𑐠𑑄 𑐖𑐣𑐳𑑄𑐏𑑂𑐫𑐵𑐫𑐵 𑐧𑐺𑐡𑐶 𑐡𑐬 𑐳𑑂𑐰𑐫𑐾𑐧𑐮𑐾 𑐫𑐔𑐸𑐎 𑐳𑐷 𑐡𑐸 𑑋 𑐀𑐠𑐾 𑐢𑐎𑐵𑑅 𑐡𑑀𑐮𑐏𑐵𑐫𑑂 𑐔𑑂𑐰𑐥𑐶𑑄 𑐣𑐾𑐰𑐵𑑅𑐟 𑐧𑐶𑐨𑐶𑐣𑑂𑐣 𑐳𑐸𑐧𑐶𑐢𑐵𑐫𑐵 𑐣𑐶𑐟𑐶𑑄 𑐠𑑁𑑄 𑐳𑑂𑐰𑐣𑐶𑐐𑐮𑐫𑑂 𑐰𑐮 𑐄𑐥𑐶𑑄 𑐁𑑅 𑐐𑐸𑐧𑐮𑐫𑑂 𑐣𑑄 𑐡𑑀 𑐮𑐏𑐵𑐫𑑂 𑐮𑐶𑐴𑐵𑑄 𑐰𑐣𑐷 𑐩𑐏𑐸 𑐢𑐿𑐐𑐸 𑐩𑐏𑐸, 𑐀𑐠𑐾𑐟𑐸𑑄 𑐣𑐸𑐰𑐵𑐎𑑀𑐚 𑐟𑑂𑐬𑐶𑐱𑐸𑐮𑐶𑑄 𑐣𑐾𑐰𑐵𑑅𑐟 𑐫𑐾𑑃 𑐧𑐶𑐨𑐶𑐣𑑂𑐣 𑐳𑐸𑐧𑐶𑐢𑐵𑐫𑐵 𑐣𑐶𑐟𑐶𑑄 𑐔𑑂𑐰𑑄 𑐰𑐮 𑐁𑑅 𑐄𑐥𑐶𑑄 𑐐𑐸𑐧𑐮𑐫𑑂 𑐣𑑄 𑐣𑐸𑐰𑐵𑐎𑑀𑐚𑐫𑑂 𑐮𑐶𑐴𑐵𑑄 𑐰𑐣𑐷 𑐩𑐏𑐸 𑐢𑐿𑐐𑐸 𑐩𑐏𑐸 𑑋 𑐳𑐶𑐣𑑂𑐢𑐸𑐥𑐵𑐮𑑂𑐔𑑀𑐎, 𑐡𑑀𑐮𑐏𑐵, 𑐬𑐵𑐩𑐾𑐕𑐵𑐥𑐫𑐵 𑐣𑐾𑐰𑐵𑑅𑐟 𑐧𑑂𑐫𑐵𑐥𑐵𑐬 𑐫𑐵𑐫𑐾𑐟 𑐧𑐶𑐨𑐶𑐣𑑂𑐣 𑐳𑐸𑐧𑐶𑐢𑐵 𑐎𑐵𑐫𑐾𑐟 𑐬𑑁𑐟𑐴𑐟, 𑐢𑐣𑐸𑐲𑐵, 𑐳𑐶𑐬𑐵𑐴𑐵 𑐳𑐥𑑂𑐟𑐬𑐷 𑐰𑐣𑐵𑐔𑑂𑐰𑐣 𑐢𑐵𑐫𑐾𑐰𑑄 𑐄𑐥𑐶𑑄 𑐁𑑅 𑐐𑐧𑐮𑐾𑑄 𑐣𑑄 𑐠𑑅𑐐𑐸 𑐖𑐣𑑂𑐩 𑐨𑐸𑐩𑐶 𑐮𑐶𑐴𑐵𑑄 𑐰𑐣𑐷𑐩𑐏𑐸 𑐢𑐿𑐐𑐸 𑐩𑐏𑐸 𑑋 𑐐𑐸𑐐𑐸𑑄 𑐳𑐸𑐧𑐶𑐢𑐵 𑐄𑐥𑐨𑑀𑐐 𑐫𑐵𑐫𑐾𑐟 𑐖𑐎 𑐰𑑄𑐥𑐶𑑄 𑐮𑐵 𑐎𑐣𑑂𑐴𑐾 𑐠𑑅𑐐𑐸 𑐖𑐣𑑂𑐩 𑐨𑐸𑐩𑐶𑐂 𑐳𑐸𑐧𑐶𑐢𑐵 𑐡𑐫𑐾 𑐰𑑄 𑐕𑐣𑑂𑐴𑐸 𑐮𑐶𑐴𑐵𑑄 𑐰𑐂 𑑋 𑐠𑑂𑐰 𑐳𑑄𑐨𑐵𑐰𑐣𑐵 𑐳𑑄𑐑𑐶𑐫 𑐬𑐵𑐖𑑂𑐫 𑐥𑑂𑐬𑐞𑐵𑐮𑐷 𑐖𑐸𑐂 𑐧𑐮𑐾 𑐀𑐗 𑐀𑐥𑑂𑐰𑑅 𑐡𑐸 𑐕𑐵𑐫𑑂 𑐢𑐵𑑅𑐳𑐵 𑐠𑑅𑐐𑐸 𑐴𑐾 𑐠𑐵𑐳𑐫𑑂 𑐳𑐸𑐧𑐶𑐢𑐵 𑐡𑐫𑐾 𑐢𑐸𑐣𑐾𑐰𑑄 𑐳𑑂𑐰𑐿𑐟𑑄 𑐣𑑄 𑐠𑑅𑐐𑐸 𑐖𑐣𑑂𑐩 𑐕𑐾𑑃 𑐟𑑂𑐰𑐟𑐵 𑐰 𑐴𑐾 𑐳𑐸𑐧𑐶𑐢𑐵 𑐄𑐥𑐨𑑀𑐐 𑐫𑐵𑐫𑐾𑐟 𑐩𑐾𑐐𑐸 𑐥𑑂𑐬𑐡𑐾𑐱𑐫𑑂 𑐰𑐣𑐾 𑐩𑐵𑐮𑐷 𑐩𑐏𑐸 𑑋 𑐖𑐣𑐐𑐞𑐣𑐵𑐫𑐵 𑐖𑐵𑐟𑐖𑐵𑐟𑐶𑐫𑐵 𑐩𑑂𑐴 𑐮𑑂𑐫𑐵𑑅𑐫𑐵 𑐟𑐠𑑂𑐫𑐵𑑄𑐎𑐫𑐵 𑐖𑐎 𑐳𑑂𑐰𑐫𑐵 𑐠𑐸𑐖𑑀𑐐𑐸 𑐏𑑃 𑐏𑐣𑐾 𑐡𑐿 𑐣𑑄 𑐩𑐏𑐸 𑑋 𑐀𑐠𑐾𑐟𑐸𑑄 𑐧𑐶𑐨𑐶𑐣 𑐎𑐵𑐬𑐞𑑄 𑐫𑐾𑑃, 𑐫𑐮, 𑐏𑑂𑐰𑐥 𑐡𑐸𑐴𑐵𑑄 𑐰𑐫𑐵𑐔𑑂𑐰𑐥𑐶𑑄 𑐳𑑄𑐑𑐶𑐫 𑐳𑑄𑐬𑐔𑐣𑐵𑐫𑑂 𑐠𑑅𑐠𑑅𑐠𑐸 𑐠𑐵𑐳𑐫𑑂 𑐳𑐸𑐧𑐶𑐢𑐵 𑐡𑐫𑐾𑐰𑑄 𑐄𑐥𑐶𑑄 𑐣𑑄 𑐠𑑅𑐠𑑅𑐐𑐸 𑐠𑐵𑐳𑐫𑑂 𑐴𑐾 𑐮𑐶𑐴𑐵𑑄 𑐩𑐰𑐣𑐷 𑐢𑐿𑐐𑐸 𑐩𑐡𑐸 𑑋 𑐮𑐸𑐩𑑄𑐎𑐾 𑐧𑐴𑐖𑐹 𑐣𑐾𑐥𑐵𑑅𑐫𑐵 𑐖𑐵𑐟𑐖𑐵𑐟𑐶 𑐩𑐢𑑂𑐫𑐾 𑐡𑐎𑐮𑐫𑑂 𑐀𑐥𑑂𑐰𑑅 𑐩𑐵𑐂𑐐𑑂𑐬𑐾𑐳𑐣 𑐖𑐸𑐫𑐵𑐔𑑂𑐰𑑄𑐐𑐸 𑐖𑐵𑐟𑐶 𑐧𑑂𑐬𑐩𑑂𑐴𑐸, 𑐎𑑂𑐲𑐾𑐟𑑂𑐬𑐷𑐟 𑐏𑑅𑐳𑐵 𑐰𑐫𑐵𑐮𑐶𑑄 𑐣𑐾𑐰𑐵𑑅𑐟 𑐏𑑅 𑑋 𑐄𑐎𑐾𑑄 𑐎𑐣𑑂𑐴𑐾 𑐳𑑄𑐑𑐶𑐫 𑐥𑑂𑐬𑐞𑐵𑐮𑐷 𑐖𑐸𑐂𑐐𑐸 𑐂𑐮𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐩𑐣𑐹𑐟 𑐩𑐵𑐂𑐐𑑂𑐬𑐾𑐟 𑐖𑐸𑐂𑐐𑐸 𑐖𑐵𑐟𑐶𑐟 𑐧𑑂𑐬𑐩𑑂𑐴𑐸 𑐎𑑂𑐲𑐾𑐟𑑂𑐬𑐷𑐟 𑐖𑐸𑐂𑐳𑐵 𑐰𑐫𑐵𑐮𑐶𑑄 𑐣𑐾𑐰𑐵𑑅𑐟 𑐴𑐾 𑐖𑐸𑐂 𑑋 𑐄𑐎𑐶 𑐩𑐢𑑂𑐫𑐫𑑂 𑐣𑑄 𑐡𑐎𑐮𑐫𑑂 𑐀𑐥𑑂𑐰𑑅 𑐩𑐣𑐹𑐟 𑐩𑐵𑐂𑐐𑑂𑐬𑐾𑐳𑐣 𑐖𑐹𑐐𑐸 𑐏𑐣𑐾 𑐡𑐿𑐐𑐸 𑐠𑐵𑐫𑑂 𑐢𑐿𑐐𑐸 𑐡𑐎𑐮𑐫𑑂 𑐀𑐥𑑂𑐰𑑅 𑐖𑐣𑐳𑑄𑐏𑑂𑐫𑐵 𑐡𑐫𑐵𑐔𑑂𑐰𑑄𑐐𑐸 𑐠𑐵𑐫𑑂 𑐣𑐾𑐥𑐵𑐮𑐩𑐞𑑂𑐜𑐮𑐫𑑂 𑐴𑐾 𑐖𑐸𑐂𑐐𑐸 𑐫𑐔𑐸𑐎 𑐳𑐷 𑐡𑐸 𑑋 𑐀𑐗 𑐮𑐵 𑐣𑐾𑐥𑐵𑑅𑐫𑐵 𑐬𑐵𑐖𑐢𑐵𑐣𑐷 𑐴𑐶𑐮𑐾𑐰𑑄 𑐠𑑂𑐰 𑐟𑐶𑐧𑑂𑐬 𑐬𑐸𑐥𑑄 𑐣𑑂𑐴𑐵𑐫𑐾𑐦𑐸 𑑋

𑐳𑐎𑐳𑑂𑐫𑐵𑑄 𑐠𑑅𑐠𑑅𑐐𑐸 𑐥𑐴𑐶𑐔𑐵𑐣 𑐩𑐵𑐮𑐾𑐐𑐸 𑐳𑑂𑐰𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐠𑑁𑑄 𑐣𑐾𑐥𑐵𑑅𑐫𑐵 𑐕𑐐𑐹 𑐳𑑄𑐰𑐺𑐡𑑂𑐑 𑐖𑐵𑐟𑐶 𑐣𑐾𑐰𑐵𑑅𑐫𑐵 𑐥𑐴𑐶𑐔𑐵𑐣 𑐟𑑄𑐎𑐾 𑐎𑐠𑑄 𑐣𑐾𑐰𑐵𑑅𑐫𑐵𑐟 𑐀𑐥𑐩𑐵𑐣 𑐖𑐸𑐂𑐎𑐠𑑄 𑐴𑐾𑐥𑐾 𑐫𑐵𑐣𑐵 𑐣𑐾 𑐰𑐵𑑅𑐟𑐫𑑂𑐟 𑐴𑐾 𑐕𑐫𑐮𑐵 𑐣𑐾𑐰𑐵𑑅 𑐮𑐵𑐐𑐵 𑐥𑑂𑐬𑐳𑑂𑐟𑐸𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋 𑐣𑐾𑐰𑐵𑑅𑐟𑐫𑑂𑐳𑑄 𑐖𑐵𑐟𑐶𑐫 𑐳𑑂𑐰𑐱𑐵𑐳𑐣𑐫𑐵𑐟 𑐳𑑂𑐰𑐷𑐎𑐵𑐬 𑐫𑐵𑑅𑐳𑐵 𑐣𑑄 𑐐𑐸𑐐𑐸 𑐣𑑄 𑐴𑐵𑐮𑐟𑐫𑑂 𑐠𑑂𑐰 𑑑𑑔 𑐥𑑂𑐬𑐡𑐾 𑐱𑐫𑑂 𑐣𑐾𑐰𑐵𑑅 𑐬𑐵𑐖𑑂𑐫𑐫𑐵𑐟 𑐢𑐎𑐵 𑐒𑑂𑐏𑐫𑐵𑐣𑐵 𑐟𑑅𑐐𑐸 𑐣𑐾𑐥𑐵𑐮𑐩𑐞𑑂𑐜𑐮 𑐨𑐹𑐩𑐶𑐫𑐵𑐟 𑐢𑐵𑑅𑐳𑐵 𑐳𑑂𑐰𑐷𑐎𑐵𑐬 𑐫𑐵𑐫𑐾 𑐩𑐖𑑂𑐫𑐹 𑑋 𑐠𑐸𑐎𑐶𑐫𑐵𑐟 𑐐𑐸𑐩𑑂𑐴 𑐣𑑄 𑐣𑐾𑐰𑐵𑑅 𑐣𑑄 𑐳𑑂𑐰𑐷𑐎𑐵𑐬 𑐫𑐵𑑅𑐣𑐵 𑐣𑑂𑐴𑑂𑐫𑐵𑑅 𑐰𑐣𑐾 𑐐𑐸 𑐎𑐸𑐟𑑅𑐫𑐵𑐟 𑐢𑐵𑑅𑐳𑐵 𑐰 𑐟𑐶 𑐟𑑅𑐢𑑄𑐐𑐸 𑐡𑐸𑑅𑐏 𑐣𑐾𑐰𑐵𑑅𑐫𑐵 𑐮𑐵𑐐𑐶 𑐩𑐾𑐐𑐸 𑐖𑐸𑐂𑐩𑐏𑐸 𑑋 𑐣𑐾𑐰𑐵𑑅 𑐖𑐣𑐳𑑄𑐏𑑂𑐫𑐵, 𑐣𑐾𑐥𑐵𑐮𑐩𑐞𑑂𑐜𑐮 𑐮𑐵𑐐𑐵𑐫𑐵 𑐖𑐣𑐳𑑄𑐏𑑂𑐫𑐵 𑐰 𑐖𑐵𑐟𑐶 𑐰 𑐨𑐸𑐩𑐶𑐫𑐵 𑐀𑐣𑐸𑐥𑐵𑐟 𑐟𑐎𑑄 𑐥𑐵𑐫𑑂𑐕𑐶 𑐩𑐖𑐹𑐐𑐸, 𑐕𑐐𑐹 𑐬𑐵𑐖𑑂𑐫 𑐩𑑂𑐰𑐵𑐫𑐾𑐟 𑐰𑐿𑐎𑐾 𑐡𑐫𑐾 𑐩𑐵𑑅𑐐𑐸 𑐥𑑂𑐬𑐵𑐎𑐺𑐟𑐶𑐎 𑐳𑑂𑐬𑑀𑐟𑐫𑐵 𑐧𑐵𑑃𑐡𑐦𑐵𑑃𑐡𑐫𑑂 𑐳𑑄𑐟𑐸𑐮𑐣 𑐩𑐡𑐸𑐐𑐸, 𑐣𑐾𑐰𑐵𑑅𑐫𑐵 𑐋𑐟𑐶𑐴𑐵𑐳𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐥𑐴𑐶𑐔𑐵𑐣𑐫𑐵 𑐠𑐵𑐫𑑂 𑐟𑐎𑑄 𑐩𑐾𑐩𑐾𑐐𑐸 𑐥𑑂𑐬𑐡𑐾𑐱𑐫𑑂 𑐧𑑂𑐰𑐠𑐮𑐵 𑐣𑐾𑐰𑐵𑑅 𑐥𑐴𑐶𑐔𑐵𑐣𑐫𑐵𑐟 𑐣𑑂𑐴𑐸𑐫𑐵 𑐧𑑂𑐫𑐹𑐐𑐸 𑑑𑑔 𑐥𑑂𑐬𑐡𑐾 𑐱𑐫𑐵 𑐣𑐾𑐰𑐵𑑅𑐬𑐵𑐖𑑂𑐫𑐫𑐵 𑐮𑐵𑐐𑐵 𑐣𑐾𑐰𑐵𑐮𑑄 𑐳𑐩𑐬𑑂𑐠𑐣 𑐫𑐵𑐫𑐾 𑐩𑐖𑑂𑐫𑐹 𑑋
𑐳𑑂𑐰𑐵𑐥𑐸 – gibinod@yahoo.com
𑐣𑐾.𑐳𑑄. 𑑑𑑑𑑓𑑐 𑐳𑐶𑐮𑑂𑐮𑐵𑐐𑐵 𑑘, 𑐱𑐣𑐶𑐧𑐵𑑅
February 6, 2010