𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐮𑐮𑐾𑐣𑑂𑐡𑑂𑐬 𑐱𑐵𑐎𑑂𑐫 | 𑑒𑑐𑑗𑑖 𑐖𑐾𑐛 𑑒, 𑐧𑐶𑐴𑐶𑐧𑐵𑐬 𑑑𑑓:𑑔𑑔:𑑔𑑗

𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑑙 𑐰𑐜𑐵 𑐣𑐐𑐵𑐩𑐫𑑂 𑐔𑑂𑐰𑑄𑐐𑐸 𑐣𑐐𑐵𑑄 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑐮𑑅𑐫𑐵 𑐐𑑂𑐰𑐳𑐵𑐮𑐫 𑐥𑑄𑐔𑐩𑐵𑐫𑐵 𑐳𑑂𑐩𑐺𑐟𑐶 𑐎𑑀𑐲𑐫𑐵 𑐐𑑂𑐰𑐵𑐴𑐵𑐮𑐶𑐂 𑐧𑑁𑐡𑑂𑐢 𑐣𑑂𑐴𑑂𑐫𑐳𑑅 𑐮𑐶𑐳𑑅 𑐎𑐵𑐳𑐵 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋

𑐠𑑂𑐰𑐴𑐾 𑐰𑐂𑐐𑐸 𑐣𑐾.𑐳𑑄. 𑑑𑑑𑑓𑑙 𑐧𑐕𑐮𑐵𑐠𑑂𑐰 𑐳𑑂𑐰𑐵𑑄𑐫𑐵𑐥𑐸𑐣𑑂𑐴𑐷 (𑐖𑐾𑐲𑑂𑐛 𑑔 𑐐𑐟𑐾) 𑐱𑐣𑐶𑐰𑐵𑑅 𑐄𑐐𑐸 𑐧𑑁𑐡𑑂𑐢 𑐣𑑂𑐴𑑂𑐫𑐳𑑅 𑐮𑐶𑐳𑑅 𑐎𑐵𑐳𑐵 𑐖𑐸𑐂𑐐𑐸 𑐖𑐵𑐣𑐎𑐵𑐬𑐷 𑐐𑑂𑐰𑐳𑐵 𑐏𑐮𑑅 𑐣𑐐𑐵𑑄 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑐮𑐎𑑄 𑐣𑐾𑐰𑐵 𑐀𑐣𑐮𑐵𑐃𑐣𑐣𑑂𑐫𑐹𑐖𑐫𑐵𑐟 𑐧𑑂𑐫𑐹𑐐𑐸 𑐡𑐸 𑑋

𑑒𑑕𑑖𑑓 𑐎𑑂𑐰𑐐𑐸 𑐧𑐸𑐡𑑂𑐢𑐖𑐫𑐣𑑂𑐟𑐷𑐫𑐵 𑐮𑐳𑐟𑐵𑐫𑑂 𑐟𑑅𑐖𑐶𑐎 𑐧𑐸𑐡𑑂𑐢 𑐖𑐫𑐣𑑂𑐟𑐷 𑐴𑐣𑐾𑐐𑐸 𑐮𑐶𑐳𑐾𑐮𑐶𑐳𑐾𑑄 𑐧𑑁𑐡𑑂𑐢 𑐣𑑂𑐴𑑂𑐫𑐳𑑅 𑐮𑐶𑐳𑑅 𑐎𑐵𑐳𑐵 𑐣𑑄 𑐟𑑅𑐖𑐶𑐎 𑐫𑐵𑐫𑐾𑐐𑐸 𑐁𑐖𑑂𑐖𑐸 𑐡𑐹𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐐𑑂𑐰𑐳𑐵𑑅 𑐏𑐮𑑅 𑐣𑐐𑐵𑑄 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑐮𑐎𑑄 𑐧𑑂𑐫𑐹𑐐𑐸 𑐡𑐸 𑑋

𑐐𑑂𑐰𑐳𑐵𑑅 𑐏𑐮𑐎𑑄 𑐧𑑂𑐫𑐹𑐐𑐸 𑐖𑐵𑐣𑐎𑐵𑐬𑐷 𑐎𑐠𑑄 𑐄𑐐𑐸 𑐧𑑁𑐡𑑂𑐢 𑐣𑑂𑐴𑑂𑐫𑐳𑑅 𑐮𑐶𑐳𑑅 𑐎𑐵𑐳𑐵𑐫𑑂 𑐏𑐮𑑂𑐧 𑐩𑐶𑐳𑐵 𑐥𑐸𑐔𑑅𑐥𑐵𑐏𑐾𑑄 𑐀𑐘𑑂𑐖𑐣𑐵 𑐩𑐴𑐬𑑂𑐖𑐣 𑐰 𑐄𑐬𑑂𑐩𑐶𑐮𑐵 𑐩𑐴𑐬𑑂𑐖𑐣 𑐩𑐵𑐮𑐷, 𑐣𑐐𑐵𑑄 𑐡 𑐩𑐶𑐳𑐵 𑐥𑐸𑐔𑑅𑐥𑐵𑐏𑐾𑑄 𑐨𑐵𑐰𑐣𑐵 𑐩𑐴𑐬𑑂𑐖𑐣 𑐰 𑐳𑐬𑐶𑐟𑐵 𑐩𑐴𑐬𑑂𑐖𑐣, 𑐧𑐵𑐮𑐎𑐸𑐩𑐵𑐬𑐷 𑐩𑐶𑐳𑐵 𑐥𑐸𑐔𑑅𑐥𑐵𑐏𑐾𑑄 𑐀𑐘𑑂𑐖𑐮𑐷 𑐩𑐴𑐬𑑂𑐖𑐣 𑐰 𑐬𑐱𑑂𑐩𑐷 𑐩𑐴𑐬𑑂𑐖𑐣, 𑐣𑐐𑐵𑑄 𑐩𑐶𑐳𑐵 𑐏𑐮𑑅𑐥𑐵𑐏𑐾𑑄 𑐥𑐹𑐬𑑂𑐞𑐡𑐾𑐰𑐷 𑐩𑐴𑐬𑑂𑐖𑐣 𑐰 𑐱𑐵𑐣𑑂𑐟𑐶 𑐩𑐴𑐬𑑂𑐖𑐣, 𑐮𑐳𑐟𑐵 𑐩𑐵𑑄 𑐥𑐸𑐔𑑅𑐥𑐵𑐏𑐾𑑄 𑐥𑐵𑐬𑐰𑐟𑐷 𑐩𑐴𑐬𑑂𑐖𑐣 𑐰 𑐱𑐵𑐣𑑂𑐟𑐶 𑐩𑐴𑐬𑑂𑐖𑐣 𑐀𑐠𑐾𑐴𑐾, 𑐣𑐐𑐵𑑄 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑐮𑑅𑐥𑐵𑐏𑐾𑑄 𑐔𑐾𑐟𑐣𑐵 𑐩𑐴𑐬𑑂𑐖𑐣 𑐰 𑐱𑐎𑐸𑐣𑑂𑐟𑐮𑐵 𑐩𑐴𑐬𑑂𑐖𑐣𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐡𑐸 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐟𑑅𑐖𑐶𑐎 𑑒𑑕𑑖𑑓 𑐎𑑂𑐰𑑅𑐐𑐸𑐸 𑐳𑑂𑐰𑐵𑑄𑐫𑐵𑐥𑐸𑐣𑑂𑐴𑐷 𑐧𑐸𑐡𑑂𑐢𑐖𑐫𑐣𑑂𑐟𑐷𑐫𑐵 𑐮𑐳𑐟𑐵𑐫𑑂 𑐐𑑂𑐰𑐳𑐵𑑅 𑐏𑐮𑑅 𑐣𑐐𑐵𑑄 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑐮𑐎𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅𑐫𑐵 𑐐𑑂𑐰𑐳𑐵𑑅 𑐐𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐨𑐶𑐩𑐳𑐾𑐣 𑐩𑐴𑐬𑑂𑐖𑐣𑐫𑐵 𑐳𑑄𑐫𑑀𑐖𑐣𑐫𑑂 𑐣𑑂𑐴𑑂𑐫𑐵𑐂𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑑙 𑐰𑐜𑐵 𑐣𑐐𑐵𑑄𑐫𑐵 𑐮𑐵𑐕𑐶𑐂 𑐖𑐸𑐂𑐐𑐸 𑐐𑑂𑐰𑐳𑐵𑑅 𑐐𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐣𑐾.𑐳𑑄. 𑑑𑑑𑑓𑑙 𑐧𑐕𑐮𑐵𑐠𑑂𑐰 𑐳𑑂𑐰𑐵𑑄𑐫𑐵𑐥𑐸𑐣𑑂𑐴𑐷 𑐖𑐾𑐲𑑂𑐛 𑑔 𑐐𑐟𑐾 𑐱𑐣𑐶𑐰𑐵𑑅 𑐳𑐸𑐠𑐳𑐶𑐫𑐵 𑑖𑑅𑑓𑑐 𑐟𑐵 𑐃𑐣𑐶𑐳𑐾𑑄 𑑗 𑐟𑐵 𑐃𑐟𑐎 𑐳𑐸𑐔𑐸𑐥𑐶𑐔𑐸 𑐖𑑂𑐫𑐵𑐗𑑂𑐰𑑅𑐫𑐵 𑐐𑑂𑐰𑐳𑐵𑑅 𑐐𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐀𑐠𑐾𑐴𑐾, 𑑗 𑐟𑐵 𑐃𑐣𑐶𑐳𑐾𑑄 𑑗𑑅𑑓𑑐 𑐟𑐵 𑐃𑐟𑐎 𑐖𑐮𑐥𑐵𑐣, 𑑗𑑅𑑓𑑐 𑐟𑐵 𑐃𑐣𑐶𑐳𑐾𑑄 𑑘𑑅𑑓𑑐 𑐟𑐵 𑐃𑐟𑐎 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐧𑑂𑐰𑐖𑑂𑐫𑐵, 𑑘𑑅𑑓𑑐 𑐟𑐵 𑐃𑐣𑐶𑐳𑐾𑑄 𑑙𑑅𑑓𑑐 𑐟𑐵 𑐃𑐟𑑂𑐎 𑐧𑐸𑐡𑑂𑐢𑐥𑐹𑐖𑐵 𑐖𑑂𑐫𑐵𑐗𑑂𑐰𑑅𑐫𑐵 𑐐𑑂𑐰𑐳𑐵𑑅 𑐐𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑑑𑑐𑑅𑑓𑑐 𑐟𑐵 𑐃𑐣𑐶𑐳𑐾𑑄 𑑑𑑑 𑐟𑐵 𑐃𑐟𑐎 𑐁𑐳𑐣 𑐐𑑂𑐬𑐴𑐞 𑐮𑐶𑐳𑐾𑑄 𑐥𑑄𑐔𑐱𑐷𑐮 𑐥𑑂𑐬𑐵𑐬𑑂𑐠𑐣𑐵𑐫𑐵 𑐐𑑂𑐰𑐳𑐵𑑅 𑐐𑑂𑐰𑐫𑐵𑐟𑑅𑐐𑐸 𑐡𑐸𑐳𑐵 𑑑𑑑 𑐟𑐵 𑐃𑐣𑐶𑐳𑐾𑑄 𑑑 𑐟𑐵 𑐃𑐟𑐎 𑐧𑑁𑐡𑑂𑐢 𑐣𑑂𑐴𑑂𑐫𑐳𑑅 𑐮𑐶𑐳𑑅 𑐎𑐵𑐳𑐵𑐫𑐵 𑐐𑑂𑐰𑐳𑐵𑑅 𑐐𑑂𑐰𑐫𑐵𑐟𑑅𑐐𑐸 𑐡𑐸 𑑋

𑑑 𑐟𑐵 𑐃𑐣𑐶𑐳𑐾𑑄 𑑑𑑅𑑓𑑐 𑐟𑐵 𑐃𑐟𑐎 𑐖𑐮𑐥𑐵𑐣, 𑑑𑑅𑑓𑑐 𑐟𑐵 𑐃𑐣𑐶𑐳𑐾𑑄 𑑔 𑐟𑐵 𑐃𑐟𑐎 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣, 𑑔 𑐟𑐵 𑐃𑐣𑐶𑐳𑐾𑑄 𑑕 𑐟𑐵 𑐃𑐟𑐎 𑐏𑐶𑐬 𑐨𑑀𑐖𑐣, 𑑕 𑐟𑐵 𑐃𑐣𑐶𑐳𑐾𑑄 𑑖𑑅𑑓𑑐 𑐟𑐵 𑐃𑐟𑐎 𑐱𑐵𑐣𑑂𑐟𑐶 𑐥𑐡𑐫𑐵𑐟𑑂𑐬𑐵 𑐰 𑐧𑐴𑐣𑐷 𑑖𑑅𑑓𑑐 𑐟𑐵 𑐃𑐣𑐶𑐳𑐾𑑄 𑑗 𑐟𑐵 𑐃𑐟𑐎 𑐩𑐿𑐣𑐩𑐟 𑐥𑐡𑐫𑐵𑐟𑑂𑐬𑐵𑐫𑐵 𑐐𑑂𑐰𑐳𑐵𑑅 𑐐𑑂𑐰𑐫𑐵𑐟𑑅𑐐𑐸 𑐡𑐸 𑑋