𑐡𑐎𑐮𑐫𑑂 𑐫𑑅𑐐𑐸 𑐩𑐵𑑄 𑐨𑐵𑐫𑑂

-𑐴𑐶𑐩𑐾𑐱 𑐧𑐖𑑂𑐬𑐵𑐔𑐵𑐬𑑂‍𑐫

𑐖𑐶 𑐡𑐎𑐮𑐫𑑂 𑐀𑐥𑑂𑐰𑑅 𑐠𑑂𑐫𑑄𑐐𑐸 𑐡𑐾𑐫𑑂 𑐏𑑅, 𑐧𑑄𑐐𑐮𑐵𑐡𑐾𑐱 𑑋 𑐥𑑂𑐫𑐎𑑂𑐰𑑅 𑐖𑐶 𑐀𑐣 𑐰𑐣𑐾 𑐢𑐸𑐣 𑑋 𑐧𑑄𑐐𑐮𑐵𑐡𑐾𑐱 𑐠𑑂𑐫𑐣 𑐎𑐶 𑐕𑐐𑐹 𑐠𑐵𑐳𑐫𑑂 𑐖𑐶 𑐤𑑂𑐫𑐵𑐧𑑂𑐮𑐾𑑄 𑐰𑐣𑐵, 𑐀𑐮𑐾 𑐰 𑐏𑑅– 𑐝𑐵𑐎𑐵 𑐩𑐾𑐜𑐶𑐎𑐮 𑐎𑐮𑐾𑐖 𑐎𑑂𑐫𑐵𑐩𑑂𑐥𑐳 𑑋 𑐤𑐵𑐥𑐵𑑄𑐐𑐸 𑐥𑐵𑐮𑐫𑑂 𑐝𑐵𑐎𑐵𑐫𑑂 𑐰𑐣𑐵𑐧𑐮𑐫𑑂 𑐀𑐣𑐫𑐵 𑐥𑐟𑑂𑐬𑐎𑐵𑐬 𑐥𑐵𑐳𑐵𑐥𑐶𑑄𑐳𑑄 𑐫𑑄𑐎𑐹𑐐𑐸 𑐏𑑅, 𑐀𑐣 𑐰𑐣𑐾 𑐴𑐾 𑐩𑐵𑑅 𑐢𑐎𑐵𑑅 𑑋 𑐮𑐶𑐥𑐵 𑐖𑐶 𑐠𑑅 𑐴𑐾 𑐰𑐣𑐾𑐐𑐸 𑐫𑐵𑐣𑐵 𑑋 𑐄𑐐𑐸 𑐎𑑂𑐫𑐵𑐩𑑂𑐥𑐳𑐫𑑂 𑐳𑑂𑐩𑐵𑐬𑐎 𑐡𑐫𑐾𑐎𑐵 𑐟𑑅𑐐𑐸 𑐡𑐸, 𑐐𑐸𑐎𑐷𑐫𑐵𑐟 𑐳𑐴𑐷𑐡 𑐳𑑂𑐩𑐵𑐬𑐎 𑐢𑐵𑐫𑐾𑐐𑐸 𑐫𑐵𑑅 𑑋

𑐀𑐮𑐾 𑐠𑑂𑐰 𑐏𑑅, 𑐠𑑅𑐐𑐸 𑐩𑐵𑑄 𑐨𑐵𑐫𑑂𑐫𑐵 𑐣𑐶𑐟𑐶𑑄 𑐧𑐮𑐶𑐡𑐵𑐣 𑐫𑐵𑑅𑐥𑐶𑑄 𑐳𑐴𑐷𑐡𑐟𑐫𑑂𑐟 𑐮𑐸𑐩𑑄𑐎𑐵𑑅 𑐡𑐫𑐾𑐎𑐵𑑅 𑐟𑑅𑐐𑐸 𑐳𑑂𑐩𑐵𑐬𑐎 𑑋 𑐠𑐣 𑐠𑑂𑐫𑐣 𑐎𑐶 𑐖𑐶𑑄 𑐠𑑅𑐟 𑐀𑐮𑐐 𑐴𑐾 𑐀𑐣𑐸𑐨𑐰 𑐫𑐵𑐣𑐵, 𑐀𑐮𑐾 𑐮𑐸𑐩𑑄𑐎𑐵– 𑐌𑐴𑑀, 𑐖𑐶𑐐𑐸 𑐩𑐵𑑄 𑐨𑐵𑐫𑑂 𑐣𑐾𑐥𑐵𑐮 𑐨𑐵𑐲𑐵 𑑋 𑐀𑐮𑐾 𑐠𑑂𑐰 𑐨𑐵𑐫𑑂 𑐟𑐳𑐎𑑄 𑐫𑑅, 𑐕𑐵𑐫𑑂 𑐢𑐵𑑅𑐳𑐵 𑐠𑑂𑐰 𑐨𑐵𑐫𑑂 𑐖𑐶𑐟𑑅 𑐖𑐶𑐩𑐶𑑄 𑐩𑐵𑐩𑑄 𑐳𑑂𑐫𑐣𑐵𑐟𑑅𑐐𑐸 𑐏𑑅 𑑋 𑐧𑑄𑐐𑐮𑐵𑐡𑐾𑐱𑐫𑑂 𑐰𑐣 𑐢𑐵𑑅𑐳𑐵 𑐕𑐟𑐵𑑅 𑐏𑑃 𑐫𑐔𑑂𑐔𑐸𑐎 𑐀𑐣𑐸𑐨𑐰 𑐫𑐵𑐫𑐾𑐦𑐸, 𑐠𑐣 𑐔𑑂𑐰𑑄𑐥𑐶𑑄 𑐩𑐣𑐹𑐟𑐫𑑂𑐎𑐾 𑐠𑑅𑐐𑐸 𑐩𑐵𑑄 𑐨𑐵𑐫𑑂𑐥𑑂𑐬𑐟𑐶 𑐟𑐳𑐎𑑄 𑐩𑐟𑐶𑐣𑐵 𑐡𑐸 𑑋 𑐀𑐠𑐾𑑄 𑐣𑐵𑐥𑑄 𑐧𑑄𑐐𑐮𑐵 𑐨𑐵𑐫𑑂 𑐟𑐳𑐎𑑄 𑐧𑐵𑑄𑐮𑐵𑑅, 𑐣𑑂𑐫𑐣𑐾𑐧𑐮𑐫𑑂 𑐴𑐾 𑐤𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋 .

𑐥𑑂𑐬𑐟𑑂𑐫𑐾𑐎 𑐧𑑄𑐐𑐵𑐮𑐷𑐫𑐵𑐎𑐾 𑐕𑐟𑐵𑑅 𑐨𑐵𑐰𑐣𑐵 𑐡𑐸, 𑐧𑑄𑐐𑐵𑐮𑐷 𑐖𑐶𑐐𑐸 𑐩𑐵𑑄 𑐨𑐵𑐫𑑂 𑐏𑑅, 𑐠𑑂𑐰 𑐨𑐵𑐫𑑂𑐫𑐵𑐟 𑐩𑐟𑐶𑐣𑐵 𑐫𑐵𑐫𑐾𑐐𑐸 𑐖𑐶𑐐𑐸 𑐎𑐬𑑂‍𑐟𑐧𑑂𑐫 𑐏𑑅 𑑋 𑐄𑐩𑐶𑐳𑑄 𑐢𑐵𑐫𑐾𑐐𑐸 𑐣𑑄 𑐫𑐵𑑅, 𑐠𑑂𑐰 𑐨𑐵𑐫 𑐩𑑄𑐟 𑐢𑐵𑑅𑐳𑐵 𑐖𑐶𑐩𑐶𑐐𑐸 𑐀𑐳𑑂𑐟𑐶𑐟𑑂𑐰 𑐐𑐣 𑐡𑐂 ? 𑐀𑐗 𑐢𑐵𑐫𑐾, 𑐧𑑄𑐐𑐵𑐮𑐷 𑐨𑐵𑐫𑑂 𑐩𑑄𑐟 𑐢𑐵𑑅𑐳𑐵 𑐧𑑄𑐐𑐮𑐵𑐡𑐾𑐱 𑐡𑐸𑐐𑐸𑐫𑐵 𑐀𑐬𑑂‍𑐠 𑐣𑑄 𑐕𑐸 𑐡𑐸 ? 𑐥𑐹𑐬𑐵 𑐰𑐶𑐱𑑂𑐰𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐯𑐵𑐂𑐐𑐸 𑐨𑐵𑐫𑑂𑐩𑐢𑑂𑐫𑐾 𑐕𑐐𑐹 𑐏𑑅– 𑐧𑑄𑐐𑐵𑐮𑐷 𑑋

𑐧𑑄𑐐𑐮𑐵𑐡𑐾𑐱𑐫𑑂 𑐖𑐎 𑐩𑐏𑐸, 𑐨𑐵𑐬𑐟𑐫𑐵 𑐥𑐱𑑂𑐔𑐶𑐩 𑐧𑑄𑐐𑐵𑐮 𑐰 𑐰𑐫𑐵 𑐖𑑅𑐏𑑅𑐫𑐵 𑐩𑐾𑐩𑐾𑐐𑐸 𑐬𑐵𑐖𑑂𑐫 𑐣𑑄 𑐠𑑂𑐰 𑐨𑐵𑐫𑑂 𑐯𑐵𑐫𑐾𑐐𑐸 𑐫𑐵𑑅 𑑋 𑐄𑐥𑐶𑑄 𑐳𑐎𑐮𑐾𑑄 𑐠𑑅𑐐𑐸 𑐩𑐵𑑄 𑐨𑐵𑐫𑑂 𑐢𑐵𑐮𑐎𑐶 𑐟𑐳𑐎𑑄 𑐐𑐬𑑂‍𑐰 𑐫𑐵𑐂𑐥𑐶𑑄 𑐏𑑅 𑑋 𑐠𑑂𑐰 𑐴𑐾 𑐕𑐟𑐵 𑐎𑐵𑐬𑐞𑑄 𑐫𑐵𑐣𑐵𑑅 𑐥𑐹𑐬𑐵 𑐰𑐶𑐱𑑂𑐰𑐫𑑂 𑐧𑑄𑐐𑐵𑐮𑐷𑐟𑐫𑑂𑐟 𑐮𑐸𑐩𑑄𑐎𑐾𑐐𑐸 𑐫𑐵𑑅 𑑋 𑐪𑐶𑐐𑑅 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑑋 𑐰𑐶𑐱𑑂𑐰𑐣𑑂𑐫𑑄𑐎 𑐠𑑂𑐰 𑐤𑐶 𑐠𑐷𑐠𑐷 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐣𑑂𑐫𑐵𑐫𑐾𑐎𑐮 𑑋

𑐦𑐾𑐧𑑂𑐬𑐸𑐀𑐬𑐷 𑑒𑑑 𑐫𑐵𑐟 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑑄 𑐴𑐾 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐎𑐠𑑄 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐤𑐶 𑐣𑑂𑐫𑐵𑐫𑐾𑐎𑐾 𑐩𑐵𑑅𑐐𑐸𑐫𑐵 𑐄𑐡𑑂𑐡𑐾𑐱𑑂𑐫 𑐏𑑅, 𑐰𑐶𑐱𑑂𑐰𑐫𑑂 𑐫𑐎𑑂𑐰𑑄𑐫𑐵 𑐫𑐎𑑂𑐰𑑅 𑐨𑐵𑐫𑑂 𑐡𑐸 𑑋 𑐨𑐵𑐫𑑂 𑐣𑐵𑐥𑑄 𑐳𑑄𑐳𑑂𑐎𑐺𑐟𑐶 𑐣𑑄 𑐳𑑂𑐰𑐵𑐣𑐵 𑐰𑐂 𑑋 𑐄𑐎𑐶𑑄 𑐗𑐷𑐳𑑄 𑐧𑐴𑐸𑐨𑐵𑐲𑐶𑐟𑐵𑐫𑐵𑐟 𑐔𑑂𑐰𑐕𑐵𑐫𑐾𑐩𑐵𑑅, 𑐠𑐸𑐎𑐶𑐫𑐵𑐟 𑐤𑑂𑐫𑑅𑐣𑐾 𑐫𑑄𑐎𑐾𑐩𑐵𑑅 𑑋 𑐩𑐣𑐹 𑐢𑐵𑐟𑑂𑐠𑐾𑑄 𑐩𑐣𑐹 𑐖𑐹𑐐𑐸 𑐨𑐵𑐳𑑄 𑐮𑐵 𑐏𑑅, 𑐀𑐮𑐾 𑐩𑐵𑑄 𑐨𑐵𑐫𑑂𑐫𑐵 𑐩𑐴Œ𑐰 𑐳𑐸𑐫𑐵𑐟 𑐖𑐎 𑐩𑐡𑐂 ? 𑐩𑐡𑐸𑐳𑐵 𑐰 𑐐𑐠𑐾 𑐖𑐸𑐫𑐵 𑐩𑐣𑐹 𑐖𑐸𑐂 ?

𑐳𑐣𑑂 𑑑𑑙𑑕𑑒 𑐫𑑂 𑐧𑑄𑐐𑐮𑐵𑐡𑐾𑐱𑐫𑑂 𑐠𑑅𑐐𑐸 𑐩𑐵𑑄 𑐨𑐵𑐫𑑂𑐫𑐵 𑐣𑐶𑐟𑐶𑑄 𑐁𑐣𑑂𑐡𑑀𑐮𑐣 𑐳𑐸𑐬𑐸 𑐖𑐹𑐐𑐸 𑐏𑑅 𑑋 𑐄𑐧𑑂𑐮𑐾 𑐠𑑅𑐐𑐸 𑐨𑐵𑐫𑑂 𑐣𑑂𑐰𑐰𑐵𑐫𑐾 𑐡𑐫𑐾𑐩𑐵𑑅 𑐢𑐎𑐵𑑅 𑐩𑐵𑐐𑐫𑐵𑐳𑐾𑑄 𑐁𑐣𑑂𑐡𑑀𑐮𑐣 𑐫𑐵𑑅𑐥𑐶𑑄 𑐰𑐶𑐡𑑂𑐫𑐵𑐬𑑂‍𑐠𑐷𑐟𑐫𑑂𑐟 𑐔𑐬𑐩 𑐡𑐩𑐣 𑐫𑐵𑑅𑐐𑐸 𑐏𑑅, 𑐐𑐸𑐎𑐶𑐫𑐵 𑐗𑑂𑐰𑐮𑐫𑑂 𑐫𑐎𑑂𑐰 𑐳𑐴𑐷𑐡 𑐖𑐸𑐮 𑑋 𑐄𑐧𑐮𑐫𑑂 𑐟𑐎 𑐧𑑄𑐐𑐮𑐵𑐡𑐾𑐱𑐫𑐵 𑐀𑐮𑐐 𑐀𑐳𑑂𑐟𑐶𑐟𑑂𑐰 𑐩𑐡𑐸𑐣𑐶 𑑋 𑐥𑐵𑐎𑐶𑐳𑑂𑐟𑐵𑐣𑐫𑐵 𑐰 𑐕𑐐𑐹 𑐨𑐵𑐐 𑐖𑐎 𑐏𑑅, 𑐀𑐮𑐾 𑐄𑐎𑐶𑐫𑐵𑐟 𑐥𑐹𑐬𑑂‍𑐰𑐷 𑐥𑐵𑐎𑐶𑐳𑑂𑐟𑐵𑐣 𑐢𑐵𑐂𑐐𑐸 𑑋

𑐮𑐶𑐥𑐵 𑐠𑑂𑐰 𑐴𑐾 𑐨𑐵𑐲𑐵𑐫𑐵 𑐁𑐣𑑂𑐡𑑀𑐮𑐣𑑄 𑐧𑑄𑐐𑐮𑐵𑐡𑐾𑐱 𑐀𑐮𑐐 𑐖𑐸𑐮 𑑋 𑐕𑐐𑐹 𑐳𑑂𑐰𑐟𑐣𑑂𑐟𑑂𑐬 𑐡𑐾𑐫 𑐳𑑂𑐠𑐵𑐥𑐶𑐟 𑐖𑐸𑐮, 𑐳𑐣𑑂 𑑑𑑙𑑗𑑑 𑐫𑑂 𑑋 𑐨𑐵𑐲𑐵𑐫𑐵 𑐣𑐶𑐟𑐶𑑄 𑐀𑐮𑐐 𑐳𑑂𑐰𑐟𑐣𑑂𑐟𑑂𑐬 𑐡𑐾𑐫𑑂 𑐖𑐹𑐐𑐸 𑐧𑑄𑐐𑐮𑐵𑐡𑐾𑐱 𑐴𑐾 𑐕𑐐𑐹𑐫𑐵𑑄 𑐕𑐐𑐹 𑐖𑐎 𑐡𑐾𑐫𑑂 𑐏𑑅 𑑋 𑐠𑑂𑐰 𑐮𑑂𑐫𑐵𑐏𑑄 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐣𑑂𑐫𑐵𑐫𑐾𑐎𑐷𑐧𑐮𑐫𑑂 𑐧𑑄𑐐𑐮𑐵𑐡𑐾𑐱𑐫𑐵 𑐤𑑂𑐫𑐠𑐣𑐵 𑐮𑐵 𑐰𑐂𑐐𑐸 𑐴𑐾 𑐖𑐸𑐮 𑑋 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐣𑑂𑐫𑐵𑐫𑐾𑐎𑐾 𑐩𑐵𑑅 𑐢𑐎𑐵𑑅 𑐥𑐴𑐮 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐧𑑄𑐐𑐮𑐵𑐡𑐾𑐱𑑄 𑐴𑐾 𑐫𑐵𑑅𑐐𑐸 𑐏𑑅 𑑋 𑐧𑑄𑐐𑐮𑐵𑐡𑐾𑐱𑐫𑐵 𑐳𑑂𑐠𑐵𑐥𑐣𑐵𑐣𑐶𑐳𑐾𑑄 𑐄𑐩𑐶𑐐𑐸 𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐂𑐟𑐶𑐴𑐵𑐳 𑐟𑐳𑐎𑑄 𑐟𑐵𑑅𑐴𑐵𑐎𑑅 𑑋

𑐢𑐵𑐠𑐾𑑄 𑐧𑑄𑐐𑐮𑐵𑐡𑐾𑐱𑑄 𑐳𑑂𑐰𑐟𑐣𑑂𑐟𑑂𑐬𑐟𑐵𑐫𑐵 𑐣𑐶𑐟𑐶𑑄 𑐕𑐸 𑐕𑐸 𑐧𑐮𑐶𑐡𑐵𑐣 𑐫𑐵𑐟, 𑐰 𑐕𑐎𑑂𑐰𑑅 𑐧𑑂𑐰𑐣𑐾𑐧𑐴𑐐𑐸 𑐂𑐟𑐶𑐴𑐵𑐳 𑐏𑑅 𑑋 𑐁𑑅 𑐣𑑄 𑐕𑐟𑐵 𑐏𑑃 𑐕𑐸 𑐣𑐶𑐱𑑂𑐔𑐶𑐟 𑐡𑐸 𑐢𑐵𑑅𑐳𑐵 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳𑐫𑐵 𑐩𑐴Œ𑐰 𑐤𑐵𑐥𑐵 𑐐𑐸𑐮𑐶 𑐡𑐸, 𑐁𑑅 𑐰𑐫𑐵 𑐰 𑐗𑐣𑑂 𑐀𑐥𑑂𑐰𑑅𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐗𑐷𑐳𑑄 𑐣𑑄 𑐠𑑅𑐐𑐸 𑐩𑐵𑑄𑐨𑐵𑐫𑑂𑐫𑐵 𑐣𑐶𑑄𑐟𑐶𑑄 𑐫𑐵𑐣𑐵𑐐𑐸 𑐁𑐣𑑂𑐡𑑀𑐮𑐣𑐫𑐵 𑐂𑐟𑐶𑐴𑐵𑐳 𑐡𑐸 𑑋 𑐠𑐸𑐎𑐷 𑐗𑐷𑐎𑐾 𑐣𑑄 𑐟𑐳𑐎𑑄 𑐐𑐬𑑂‍𑐰 𑐡𑐸 𑑋 𑐀𑐮𑐾 𑐗𑐷 𑐣𑐾𑐰𑐵𑑅𑐟 𑐣𑑄 𑐠𑑅𑐐𑐸 𑐩𑐵𑑄 𑐨𑐵𑐫𑑂 𑐣𑐾𑐥𑐵𑐮𑐨𑐵𑐲𑐵 𑐢𑐵𑐫𑐾𑐏𑐣𑐾 𑐩𑐵𑐟𑑂𑐬𑑄 𑐮𑐫𑑂𑐟𑐵𑐂𑐥𑐶𑑄 𑐏𑑅 𑑋

𑐠𑐣𑐠𑐵𑐫𑑂 𑐴𑐾 𑐪𑐵𑐂𑐥𑐸𑐐𑐸 𑐕𑐸 𑐡𑐸 𑐢𑐵𑑅𑐳𑐵 𑐗𑐷𑐠𑐵𑐫𑑂 𑐣𑑄 𑐠𑑅𑐐𑐸 𑐩𑐵𑑄 𑐨𑐵𑐫𑑂 𑐟𑑂𑐰𑑅𑐟𑐵 𑐰𑐣𑐵𑐔𑑂𑐰𑑄𑐥𑐶𑑄 𑐀𑐥𑑂𑐰𑑅𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐐𑑂𑐫𑐵𑐔𑐶𑐎𑐸 𑐡𑐸, 𑐐𑐣𑑄 𑐗𑐷𑐐𑐸 𑐨𑐵𑐫𑑂 𑐣𑑄 𑐟𑐣𑐵 𑐰𑐣𑐷𑐐𑐸 𑐖𑐎𑑄 𑐩𑐏𑐸𑐮𑐵 ? -𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳𑐫𑐵 𑐤𑐶 𑐴𑐵𑐎𑐣𑑄 𑐕𑐎𑑂𑐰𑑅 𑐠𑐸𑐎𑐶𑐫𑐵 𑐏𑐧𑐬𑐡𑐵𑐬𑐷 𑐫𑐵𑐫𑐾𑐐𑐸 𑐃 𑐏𑑅 𑑋 𑐡𑐎𑐮𑐫𑑂 𑐤𑐵𑐥𑐵 𑐰𑐶𑐱𑑂𑐰𑐫𑑂 𑐠𑐷𑐠𑐷 𑐨𑐵𑐲𑐵𑐫𑐵 𑐟𑐠𑑂𑐫𑐵𑑄𑐎𑐥𑐵𑐏𑐾 𑐕𑐎𑑂𑐰𑑅 𑐩𑐶𑐏𑐵 𑐧𑑂𑐰𑐫𑐾𑐎𑐾𑐐𑐸 𑐥𑐵𑐫𑑂𑐕𑐶 𑐖𑐸𑐂 𑑋

𑐰𑐶𑐱𑑂𑐰𑐫𑑂 𑐤𑐫𑑂𑐡𑑂𑐰𑑅𑐳𑐶𑐧𑐾𑑄 𑐀𑐥𑑂𑐰𑑅 𑐨𑐵𑐫𑑂 𑐯𑐵𑐫𑐾𑐐𑐸 𑐫𑐵𑑅 𑑋 𑐤𑑂𑐫𑐥𑐸𑐳𑐾𑐔𑑂𑐰𑑄𑐐𑐸 𑐟𑐠𑑂𑐫 𑐕𑐸 𑐢𑐵𑑅𑐳𑐵 𑐠𑑂𑐰 𑐮𑑂𑐫𑐵𑑅 𑐤𑑂𑐫𑐵𑐧𑑂𑐮𑐾𑑄 𑐔𑑂𑐰𑐫𑑂 𑐎𑑂𑐰𑐫𑑂 𑐖𑐸𑐫𑐵𑐔𑑂𑐰𑐣𑐷, 𑐕𑐵𑐫𑑂𑐢𑐵𑑅𑐳𑐵 𑐁𑑅𑐟𑐎 𑐣𑑄 𑐤𑐹𑐐𑐸 𑐨𑐵𑐫𑑂 𑐮𑐸𑐂𑐎𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸, 𑐀𑐮𑐾 𑐤𑐹𑐐𑐸 𑐨𑐵𑐫𑑂𑐫𑐵 𑐖𑐣𑑂𑐩 𑐖𑐸𑐂𑐐𑐸 𑐖𑑂𑐫𑐵 𑐣𑑄 𑐡𑐶𑐄𑐐𑐸 𑐩𑐡𑐸𑐣𑐶 𑑋 𑐠𑑂𑐰 𑐩𑐣𑐹 𑐡𑐟𑐮𑐾 𑐤𑑂𑐫𑐵𑐣𑐵𑑄 𑐟𑐸𑑄 𑐔𑑂𑐰𑐣𑐷𑐐𑐸 𑐏𑑄 𑐏𑑅 𑑋 𑐀𑐠𑐾𑐴𑐾 𑐨𑐵𑐫𑑂 𑐮𑑀𑐥 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐣𑑄 𑐄𑐟𑐶𑐎𑑄 𑐴𑐾 𑐡𑐣𑐶 𑑋

𑐟𑐬 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐨𑐵𑐫𑑂 𑐢𑐵𑑅𑐳𑐵 𑐤𑑂𑐫𑐵𑐧𑑂𑐮𑐾𑑄 𑐏𑐟𑐬𑐵𑐫𑐵 𑐢𑐮𑐏𑐫𑑂 𑐮𑐵𑐣𑐵𑐔𑑂𑐰𑐣𑐷 𑑋 𑐀𑐠𑐾 𑐢𑐫𑐵𑐐𑐸 𑐤𑐫𑑂𑐡𑑂𑐰𑑅 𑐨𑐵𑐫𑑂𑐩𑐢𑑂𑐫𑐾 𑑓𑑓 𑐥𑑂𑐬𑐟𑐶𑐱𑐟 𑐏𑐟𑐬𑐵𑐫𑐵 𑐢𑐮𑐏𑐫𑑂 𑐡𑐸 𑑋 𑐐𑐧𑐮𑐾𑑄 𑐣𑑄 𑐠𑑂𑐰 𑐨𑐵𑐫𑑂 𑐟𑐣𑐵 𑐰𑐣𑐾𑐦𑐸 𑑋 𑐫𑐎𑑂𑐰 𑐨𑐵𑐲𑐵𑐫𑑂 𑐠𑑂𑐰 𑐨𑐵𑐫𑑂 𑐯𑐵𑐂𑐥𑐶𑐣𑐶𑐫𑐵 𑐮𑑂𑐫𑐵𑑅 𑐡𑑂𑐰𑑅𑐕𑐶𑐟𑐶 𑐖𑐎 𑐡𑐣𑐶 𑑋 𑐠𑐸𑐥𑐶𑑄 𑐩𑐣𑐹𑐟𑐫𑑂𑐟 𑐕𑐸𑑄 𑐖𑐸𑐮 𑐢𑐵𑑅𑐳𑐵 𑐄𑐩𑐶𑐐𑐸 𑐨𑐵𑐫𑑂 𑐣𑑄 𑐤𑑂𑐫𑐵𑐧𑑂𑐮𑐾𑑄𑐫𑐵 𑐣𑐶𑑄𑐟𑐶𑑄 𑐟𑐣𑐵 𑐰𑐣𑐷𑐐𑐸 𑐴𑐾 𑐖𑐸𑐮 𑑋

𑐁𑑅 𑐥𑐥𑐸𑐰𑐵 𑐣𑑂𑐫𑐸𑐐𑐶𑐣𑐷 𑐴𑐾 𑐢𑐵𑐫𑐾, 𑐠𑑂𑐰 𑐟𑐳𑐎𑑄 𑐔𑐶𑐢𑑄𑐐𑐸 𑐡𑐾𑐫𑑂 𑐩𑐢𑑂𑐫𑐾 𑐕𑐐𑐹 𑐏𑑅 𑑋 𑐀𑐣𑐫𑐵 𑐖𑐣𑐳𑑄𑐏𑑂𑐫𑐵 𑐫𑐎𑑂𑐰 𑐩𑐡𑐸, 𑐟𑐬 𑐨𑐵𑐲𑐵𑐫𑑂 𑐠𑑂𑐰 𑐡𑐾𑐫𑑂 𑐟𑐎𑐳𑑄 𑐟𑑅𑐩𑐶, 𑐀𑐣 𑐯𑐵𑐂𑐐𑐸 𑐨𑐵𑐫𑑂 𑐴𑐾 𑐔𑑂𑐫𑐵𑐳𑑅 𑐳𑐶𑐧𑐾𑑄 𑐀𑐥𑑂𑐰𑑅 𑐡𑐸 𑑋 𑐰𑐶𑐱𑑂𑐰𑐫𑑂 𑐠𑐸𑐮𑐶𑐩𑐕𑐶 𑐨𑐵𑐫𑑂 𑐡𑐸𑐳𑐵𑑄 𑐟𑐧𑐶 𑐧𑐔𑑂𑐕𑐶𑐳𑐶𑐧𑐾𑑄 𑐀𑐥𑑂𑐰𑐳𑐶𑐣𑑄 𑐏𑐵𑐳 𑐏𑐵𑐳 𑐖𑐎 𑐨𑐵𑐫𑑂 𑐯𑐵𑐂 𑑋 𑐀𑐠𑐾 𑐢𑐫𑐵𑐐𑐸 𑐰𑐶𑐱𑑂𑐰𑐫𑐵 𑐎𑐹𑐮 𑐖𑐣𑐳𑑄𑐏𑑂𑐫𑐵𑐫𑐵 𑐧𑐕𑐶 𑐩𑐣𑐹𑐟𑐫𑑂𑐳𑑄 𑐔𑐶𑐣𑐶𑐫𑐵𑑃, 𑐳𑑂𑐥𑐾𑐣𑐷𑐳, 𑐂𑑄𑐐𑑂𑐮𑐶𑐳 𑐬 𑐀𑐬𑐾𑐧𑐶𑐎 𑐨𑐵𑐫𑑂 𑐯𑐵𑐂 𑑋

𑐡𑐎𑐮𑐫𑑂 𑐀𑐥𑑂𑐰𑑅 𑐯𑐵𑐂𑐐𑐸 𑐨𑐵𑐫𑑂 𑐮𑐵, 𑐔𑐶𑐣𑐶𑐫𑐵𑑃 𑐴𑐾 𑐖𑐸𑐮 𑑋 𑐕𑐐𑐹 𑐨𑐵𑐫𑐫𑑂 𑐮𑑂𑐫𑐵𑐏𑑄 𑐠𑐸𑐥𑐶𑑄 𑐥𑑂𑐬𑐩𑐸𑐏 𑐨𑐵𑐲𑐵𑐫𑐵 𑐐𑐸𑐮𑐶 𑐩𑐴Œ𑐰 𑐡𑐸, 𑐡𑑂𑐰𑑅𑐕𑐶 𑐀𑐠𑐰𑐵 𑐳𑐕𑐶 𑐩𑐣𑐹𑐟𑐫𑑂𑐳𑑄 𑐯𑐵𑐂𑐐𑐸 𑐨𑐵𑐫𑑂𑐫𑐵 𑐣𑑄 𑐄𑐟𑐶𑐎𑑄 𑐩𑐴Œ𑐰 𑐡𑐸 𑑋 𑐨𑐵𑐫𑑂 𑐢𑐫𑐵𑐐𑐸 𑐨𑐵𑐫𑑂 𑐖𑐎 𑐩𑐏𑐸, 𑐰 𑐣𑐵𑐥 𑐳𑐨𑑂𑐫𑐟𑐵, 𑐳𑑄𑐳𑑂𑐎𑐺𑐟𑐶, 𑐬𑐴𑐣𑐳𑐴𑐣, 𑐣𑐳𑐵𑐟𑑂𑐰𑑃𑐳𑐵, 𑐠𑐵𑐫𑑂𑐧𑐵𑐫𑑂 𑐳𑐎𑐟𑐵𑑄 𑐳𑑂𑐰𑐵𑐣𑐵𑐔𑑂𑐰𑐣𑐷 𑑋
𑐕𑐐𑐹 𑐨𑐵𑐫𑑂 𑐟𑐣 𑐢𑐫𑐵𑐐𑐸𑐫𑐵 𑐀𑐬𑑂‍𑐠 𑐠𑐸𑐥𑐶𑑄 𑐳𑐎𑐟𑐵𑑄 𑐟𑐣𑐷𑐐𑐸 𑐏𑑅 𑑋

𑐀𑐮𑐾 𑐩𑐣𑐹𑐟𑐫𑑂𑐳𑑄 𑐠𑑅𑐐𑐸 𑐩𑐵𑑄 𑐨𑐵𑐳𑑄 𑐴𑐾 𑐡𑐎𑐮𑐫𑑂 𑐤𑐵𑐥𑐵𑑄 𑐣𑑂𑐰𑐰𑐵𑐫𑐾𑐩𑐵𑑅, 𑐕𑐵𑐫𑑂 𑐮𑐾 ? 𑐀𑐠𑐾 𑐮𑐵 𑐠𑐸𑐎𑐶𑐫𑐵 𑐎𑐵𑐬𑐞 𑐠𑑂𑐫𑐩𑐠𑑂𑐫𑑄 𑐳𑐎𑐳𑐶𑐣𑑄 𑐳𑐶𑐄 𑑋 𑐠𑐣 𑐏𑐵𑐮𑐶 𑐮𑐶𑐳𑐵 𑐎𑐫𑐵 𑐖𑐎 𑐢𑐵𑐫𑐾 𑐟𑑂𑐫𑐣𑐵𑐐𑐸 𑑋 𑐳𑐸 𑐩𑐔𑐵𑑄 𑐠𑑅𑐐𑐸 𑐩𑐵𑑄 𑐨𑐵𑐫𑑂 𑐳𑐫𑐾𑐎𑐷 𑐰𑐫𑐵 𑐧𑑁𑐡𑑂𑐢𑐶𑐎 𑐰𑐶𑐎𑐵𑐳𑐫𑐵 𑐳𑐩𑑂𑐨𑐵𑐰𑐣𑐵 𑐀𑐥𑑂𑐰𑑅 𑐡𑐫𑐵𑐔𑑂𑐰𑐣𑐷 𑑋 𑐰𑑄 𑐠𑑅𑐐𑐸 𑐨𑐵𑐳𑑄𑐟𑐶 𑐩𑐾𑐐𑐸 𑐨𑐵𑐳𑑄 𑐠𑑅𑐐𑐸 𑐣𑐸𑐐𑑅𑐫𑐵 𑐏𑑃 𑐢𑐵𑐫𑐾𑐦𑐂𑐩𑐏𑐸 𑑋 𑐀𑐮𑐾 𑐳𑐸𑐣𑐵𑑄 𑐠𑑅𑐐𑐸 𑐩𑐵𑑄𑐨𑐵𑐳𑑄 𑐏𑑃 𑐯𑐵𑐂, 𑐰𑐫𑐵𑐟 𑐩𑐾𑐐𑐸 𑐨𑐵𑐫𑑂 𑐳𑐫𑐾𑐎𑐵 𑐎𑐵𑐫𑐾𑐟 𑐀𑐗 𑐀𑑅𑐥𑐸𑐂 𑑋

𑐠𑑅𑐐𑐸 𑐨𑐵𑐳𑑄 𑐏𑑃 𑐯𑐵𑐂𑐐𑐸 𑐖𑐸𑐮𑐎𑐶 𑐳𑑂𑐰𑐵𑐨𑐵𑐰𑐶𑐎 𑐮𑑂𑐫𑐵𑐏𑑄 𑐰 𑐳𑐩𑐸𑐡𑐵𑐫𑐫𑐵 𑐩𑐣𑐹𑐟 𑐣𑐵𑐥 𑐳𑑂𑐰𑐵𑐥𑐹 𑐧𑑂𑐫𑐵𑐎𑐾𑐟 𑐀𑑅𑐥𑐸𑐂 𑑋 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐏“ 𑐮𑐵 𑐕𑐸 𑐢𑐵𑑅𑐳𑐵 𑐠𑑅𑐐𑐸 𑐨𑐵𑐫𑑂 𑐳𑑅𑐪 𑐩𑐣𑐹 𑐕𑐸𑑄 𑐣𑑄 𑐏𑑂𑐫𑐮𑐫𑑂 𑐰𑑂𑐫𑐵𑐰𑐳𑐵𑐫𑐶𑐎 𑐮𑑂𑐫𑐵𑐏𑑄 𑐳𑐦𑐮 𑐖𑐸𑐂 𑑋 𑐠𑐣 𑐠𑐠𑐾 𑐎𑐵𑐬𑐞𑐫𑐵 𑐢𑐮𑑅 𑐡𑐫𑐾𑐎𑐵 𑐰𑐣 𑐢𑐵𑑅𑐳𑐵 𑐟𑐵𑑅𑐴𑐵𑐎𑑅 𑐖𑐸𑐂𑐦𑐸 𑑋 𑐀𑐮𑐾 𑐠𑑅𑐐𑐸 𑐨𑐵𑐫𑑂 𑐩𑐳𑑅𑐐𑐸𑐫𑐵 𑐧𑐾𑐦𑐵𑐂𑐡𑐵𑐫𑐵 𑐢𑐮𑑅 𑐡𑐫𑐾𑐎𑐮 𑐢𑐵𑑅𑐳𑐵 𑐄𑐎𑐶𑐫𑐵 𑐢𑐮𑑅 𑐣𑑄 𑐟𑐵𑑅𑐴𑐵𑐎𑑅 𑐴𑐾 𑐖𑐸𑐂 𑑋

𑐠𑐠𑐾 𑐳𑐶𑐂𑐎𑑄 𑐳𑐶𑐂𑐎𑑄 𑐠𑑅𑐐𑐸 𑐨𑐵𑐫𑑂 𑐟𑑂𑐰𑑅𑐟𑐵𑑄 𑐕𑐸 𑐴𑐾 𑐡𑐂 ? 𑐠𑑅𑐐𑐸 𑐨𑐵𑐫𑑂 𑐠𑑅 𑐩𑐳𑑂𑐟𑐫𑑂𑐟 𑐩𑐳𑑂𑐫𑐣𑐵𑑄 𑐕𑐸 𑐴𑐾 𑐟𑑅𑐢𑑄𑐐𑐸 𑐖𑐸𑐂 𑐢𑐎𑐵𑑅 ? 𑐀𑑅𑐏𑐧𑐟𑑄 𑐧𑐾𑐦𑐵𑐂𑐡𑐵 𑐖𑐎 𑐖𑐸𑐂 𑑋
𑐴𑐵𑐎𑐣𑑄 𑐕𑐎𑑂𑐰𑑅 𑐰 𑐴𑐾 𑐝𑐵𑐎𑐵𑐫𑐵 𑐰 𑐴𑐾 𑐩𑐾𑐜𑐶𑐎𑐮 𑐎𑐮𑐾𑐖 𑐎𑑂𑐫𑐵𑐩𑑂𑐥𑐳𑐫𑑂 𑐮𑐶𑐴𑐵𑑄 𑐰𑐣𑐾 𑑋 𑐡𑐎𑐮𑐫𑑂 𑐤𑐵𑐥𑐵 𑐀𑐣 𑐠𑑂𑐫𑑄𑐧𑐮𑐫𑑂 𑐀𑐣 𑐫𑑄𑐎𑐹𑐪 𑐧𑑄𑐐𑐮𑐵𑐡𑐾𑐱𑐷 𑐥𑐟𑑂𑐬𑐎𑐵𑐬 𑐥𑐵𑐳𑐵𑐫𑐵 𑐏𑑂𑐰𑐵𑐮𑐫𑑂 𑐏𑐣𑐾𑐡𑐸𑐐𑐸 𑐐𑐬𑑂‍𑐰 𑐢𑐵𑐠𑐾𑑄 𑐳𑑂𑐰𑐫𑐾𑐧𑐴 𑑋

𑐄𑐩𑐶𑐟 𑐖𑐶𑐥𑐶𑑄 𑐧𑑄𑐐𑐵𑐮𑐷, 𑐖𑐶𑐩𑐶𑐐𑐸 𑐨𑐵𑐫𑑂 𑐧𑑄𑐐𑐵𑐮𑐷 𑐢𑐵𑐫𑐾𑐧𑐮𑐫𑑂𑐟𑐶 𑐐𑐬𑑂‍𑐰 𑐫𑐵𑐫𑐾𑐐𑐸 𑐩𑐾𑐟𑐵 𑐕𑐸𑑄 𑐴𑐾 𑐩𑐡𑐸 𑐠𑐾𑑄 𑐖𑐸𑐂𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐰𑐫𑐵 𑐳𑐎𑐟𑐵𑑄 𑐏𑑃 𑐣𑑂𑐫𑐣𑐾𑐧𑐮𑐫𑑂 𑐖𑐶𑐟𑑅 𑐣𑑄 𑐟𑐵𑐮, 𑐖𑐶𑐐𑐸 𑐣𑑄 𑐠𑑅𑐐𑐸 𑐨𑐵𑐫𑑂 𑐡𑐸, 𑐟𑐳𑐎𑑄 𑐫𑑅𑐐𑐸 𑐠𑑅𑐐𑐸 𑐴𑐾 𑐩𑐵𑑄𑐨𑐵𑐫𑑂– 𑐣𑐾𑐥𑐵 𑐨𑐵𑐲𑐵 𑑋 𑐰 𑐧𑑄𑐐𑐵𑐮𑐷𑐫𑐵𑐟 𑐠𑐾𑑄 𑐡𑑅 𑐣𑑄 𑐠𑑅𑐐𑐸 𑐩𑐵𑑄𑐨𑐵𑐲𑐵𑐫𑑂 𑐟𑐳𑐎𑑄 𑐐𑐬𑑂‍𑐰 𑐡𑐸 𑑋