𑐩𑐡𑐸𑐩𑑂𑐴 𑐎𑐰𑐶 𑐣𑐵𑐟𑐷 𑐩𑐴𑐬𑑂𑐖𑐣 𑐥𑐵𑐎𑑅𑐫𑐵 𑐥𑐶𑐩𑐡𑑄𑐣𑐶𑐐𑐸 𑐕𑐥𑐹 𑐧𑐵𑐏𑑄 —

𑐗𑐵𑐜𑐵 𑐣𑐵𑐫𑑅

𑐁𑐛𑐥𑐴𑐬𑐷𑐫𑐵 𑐣𑐶𑐩𑑂𑐴 𑐳𑑂𑐰𑐩𑑂𑐴 𑐧𑑂𑐰𑐣𑐵 𑐠𑑁𑑄 𑐳𑐸𑐠𑑄𑐣𑐶𑐳𑐾𑑄 𑐨𑐶𑐩𑐰𑐴𑐵𑐡𑐸𑐬 𑐁𑐧𑐵 𑐐𑐵𑐩𑐫𑑂 𑐔𑐵𑐴𑑂𑐫𑐹 𑐖𑐸𑐮 𑑋 𑐴𑐵𑐎𑐸𑐔𑐶𑐫𑐵 𑐕𑐾𑑃 𑐣𑑂𑐴𑑂𑐫𑑀𑐣𑐾 𑐔𑑂𑐰𑐣𑐵 𑐴𑐵𑐎𑐸𑐔𑐶𑐟 “𑐊 𑐴𑐵𑐎𑐸 ! 𑐊 𑐴𑐵𑐎𑐸 !” 𑐢𑐎𑐵𑑅 𑐳𑐟𑐵𑑅𑐔𑑂𑐰𑐣 𑑋

𑐴𑐵𑐎𑐸𑐔𑐵 𑐕𑐾𑑃𑐫𑑂 𑐩𑐡𑐸𑐮𑐵 𑐩𑐳𑑂𑐫𑐸 𑐴𑐃 𑐢𑐫𑐵𑐩𑐴𑑅 𑑋 “𑐕𑐾𑑃𑐫𑑂 𑐴𑐾 𑐩𑐡𑐸 𑐖𑐸𑐂 𑐰, 𑐐𑐖𑑂𑐫𑐵𑑅𑐩𑑂𑐴 𑐩𑐣𑐹 𑐐𑐣 𑐖𑐎 𑐰𑐣𑐷𑐩𑑂𑐴 𑐣𑑂𑐴𑑂𑐫𑐵𑐧𑐮𑐾𑑄 𑐰𑑅𑐳𑐵𑑄 𑐕𑐾𑑃 𑐩𑐡𑐸 𑑋 𑐕𑐾𑑃 𑐡𑐸𑐳𑐵𑑄 𑐴𑐂 𑐩𑐢𑐵𑑅𑐳𑐾 𑐔𑑂𑐰𑐣𑐵 𑐔𑑂𑐰𑐣𑐶𑐩𑑂𑐴𑐮𑐵 𑐧𑐾𑐂𑐩𑐵𑐣 𑐢𑐎𑐵𑑅 𑐨𑐷𑐩𑐰𑐴𑐵𑐡𑐸𑐬 𑐁𑐧𑐵 𑐨𑐸𑐣𑐸 𑐨𑐸𑐣𑐸 𑐴𑐵𑐮𑐵𑐔𑑂𑐰𑐣 𑑋 𑐁𑑅 𑐠𑑂𑐰𑐫𑐵𑐟 𑐕𑐸 𑐫𑐵𑐫𑑂𑐐𑐸 𑐁𑐛𑐥𑐴𑐬𑐷𑐟 𑐥𑐵𑐏𑐾 𑐳𑑂𑐰𑐫𑐵𑑅 𑐢𑐵𑐮, “𑐠𑑂𑐰𑑃 𑐖𑐶𑐟𑑅 𑐟𑐳𑐎𑑄 𑐡𑐸𑑅𑐏 𑐧𑐶𑐮 𑐕𑐎𑑅 𑐩𑐏𑐸, 𑐣𑐶𑐎𑑅 𑐩𑐏𑐸, 𑐐𑑂𑐰𑐣𑑂𑐴𑐸 𑐡𑐟 𑐖𑐶𑐟𑑅 𑐡𑐸𑑅𑐏 𑐧𑐶𑐫𑐵 𑐟𑑅𑐐𑐸 𑐎𑐵 𑐁𑐛𑐥𑐴𑐬𑐷𑐫𑐵 𑐨𑐵𑐃 𑑋 𑐠𑑂𑐰𑐫𑐵𑐟 𑐕𑐸 𑐫𑐵𑐫𑐾𑐐𑐸 ? 𑐠𑑂𑐰𑐫𑐵𑐟 𑐠𑑂𑐰𑐫𑐵𑐐𑐸 𑐕𑐾𑑃𑐫𑑂𑐫𑐵 𑐏𑐵𑐥𑐵 𑐮𑐶𑐣𑐵 𑐡𑐾𑐫𑑂 𑐥𑐸𑐏𑐸𑐮𑐶𑐃 𑐰𑐵𑐣𑑂𑐕𑑂𑐰𑐫𑐵 𑐧𑑂𑐫𑐸 𑑋”

𑐁𑐛𑐥𑐴𑐬𑐷𑐫𑐵𑐟 𑐏𑐵𑐥𑐵 𑐮𑐶𑐣𑐵 𑐰𑐵𑐣𑑂𑐕𑑂𑐰𑐫𑑂𑐟 𑐰𑑄𑐧𑐮𑐫𑑂 𑐴𑐵𑐎𑐸𑐔𑐶𑐫𑐵 𑐎𑐵𑐫 𑐧𑑂𑐰𑐵𑑃𑐫𑑂 𑐧𑑂𑐰𑐵𑑃𑐫𑑂 𑐰𑐫𑐵 𑐨𑐷𑐩𑐰𑐴𑐵𑐡𑐸𑐬 𑐁𑐧𑐵𑐫𑐵 𑐟𑐸𑐟𑐶 𑐖𑑂𑐰𑑄𑐰𑐮 𑑋

“𑐫𑑀 𑐧𑐵𑐖𑑂𑐫𑐵 𑐂𑐩𑐶𑐟 𑐬𑑀𑐎𑐫𑑂𑐫𑐵 𑐧𑐶𑐣𑑂𑐟𑐷 𑐖𑐶𑐩𑐶 𑐧𑐵 𑐣𑑅𑐮𑐵 𑐳𑑂𑐰𑐵𑑄 𑐥𑐶𑐂𑐟 𑐧𑐵𑐐𑐩𑐟𑐶 𑐦𑐶 𑐎𑐵𑑅 𑐰𑐣𑐵𑐔𑑂𑐰𑐣, 𑐰𑐂𑐐𑐸 𑐃 𑐖𑐸𑐮 𑑋 𑐖𑐶𑐩𑐶 𑐧𑐵𑑅 𑐣𑐶𑑄 𑐰𑐫𑑂𑐎𑐾 𑐁𑐳𑐾 𑐏𑐵𑐥𑐵 𑐮𑐶𑐣𑐵 𑐰𑐵𑐣𑑂𑐕𑑂𑐰𑐫𑑂 𑐩𑐟𑐾” 𑐢𑐎𑐵𑑅 𑐩𑐔𑐵𑑄 𑐮𑑂𑐴𑐵𑑅 𑐖𑑀𑐬𑐫𑑂 𑐫𑐵𑐣𑐵 𑐧𑐶𑐣𑑂𑐟𑐶 𑐫𑐵𑐟 𑑋

“𑐐𑐸𑐮𑐶 𑐥𑐶𑐫𑐵𑑅 𑐔𑑂𑐰𑐣𑐾𑐐𑐸 𑐗𑐶𑐎𑑅 𑐳𑑅𑐟𑑅 𑐰𑐫𑑂𑐢𑐸𑐣 𑐐𑐧𑐮𑐾𑑄 𑐣𑐵𑐥𑐮𑐵𑑅𑐐𑐸 𑐩𑐏𑐸 𑑋” 𑐨𑐷𑐩𑐰𑐴𑐵𑐡𑐸𑐬 𑐁𑐧𑐵 𑐗𑑀𑐎𑑂𑐎𑐫𑑂 𑐖𑐸𑐫𑐵𑑅 𑐴𑐵𑐮 𑑋
“𑐧𑐵𑐖𑑂𑐫𑐵 𑐰𑑅𑐧𑐮𑐫𑑂 𑐖𑐶𑐥𑐶𑑄 𑐕𑐾𑑃 𑐩𑐡𑐸𑐐𑐸 𑐥𑐵𑐏𑐾 𑐮𑐵𑐟𑐎𑐵 𑐣𑐟𑑂𑐬𑐳𑐵 𑐧𑐵𑐖𑑂𑐫𑐵𑑄 𑐳𑐟𑐎𑐵𑐣𑑄 𑐴𑐃 𑐩𑐢𑐵𑑅𑐳𑐾 𑐔𑑂𑐰𑐣𑐵 𑐔𑑂𑐰𑐣𑐷𑐮𑐵, 𑐁𑑅𑐣𑑄 𑐧𑐵𑐖𑑂𑐫𑐵𑑄 𑐳𑑅𑐟𑐸𑐧𑐮𑐫𑑂 𑐖𑐶 𑐦𑐿𑐫𑐵𑐟 𑐣𑐳𑐵 𑐟𑑅 𑐰𑐣𑐵𑐔𑑂𑐰𑐣𑐵𑐐𑐸, 𑐟𑐵 𑐴𑐾 𑐩𑐟𑐵𑑅, 𑐧𑐵𑐖𑑂𑐫𑐵 𑐣𑑂𑐴𑑂𑐫𑐵𑐐𑐸𑐳𑐵𑑄 𑐟𑑃𑐔𑐵𑐫𑑂𑐩𑐟𑐾 𑐧𑐵 𑐰𑐂𑐣𑑄 𑐖𑐸𑐂, 𑐧𑐬𑐸 𑐧𑐵𑐖𑑂𑐫𑐵𑐫𑐵 𑐩𑐾𑐫𑑂𑐠𑐵𑐫𑑂 𑐰𑐣𑐾𑐩𑐵𑑅𑐳𑐵 𑐰𑑄 𑐳𑐵𑑄 𑐖𑑂𑐫𑐸, 𑐖𑐶𑑄 𑐧𑐵 𑐰𑐮𑐎𑐶 𑐧𑐵𑐖𑑂𑐫𑐵𑐫𑐵𑐠𑐵𑐫𑑂 𑐕𑑂𑐰𑐫𑐵 𑐴𑐫𑑂 𑑋”

“𑐖𑐶𑐠𑐵𑐫𑑂 𑐕𑐾𑑃 𑐩𑐏𑐸 𑐰𑐫𑑂𑐳𑐵𑐟𑑄 𑐮𑐵𑐕𑐷 𑐕𑑂𑐰𑐫𑐵 𑐴𑐔𑐶 𑑋” 𑐢𑐎𑐵𑑅 𑐨𑐷𑐩𑐰𑐴𑐵𑐡𑐸𑐬 𑐁𑐧𑐵 𑐁𑐛𑐥𑐴𑐬𑐶𑐫𑐵 𑐣𑐵𑐥𑑄 𑐧𑑂𑐰𑐣𑐵 𑐰𑐣 𑑋
𑐨𑐷𑐩𑐰𑐴𑐵𑐡𑐸𑐬 𑐁𑐧𑐵 𑐬𑐵𑐞𑐵 𑐱𑐵𑐳𑐣𑐫𑐵 𑐥𑐵𑐮𑐫𑑂 𑐗𑐵𑐜𑐵 𑐔𑑂𑐰𑐫𑑂𑐎 𑐖𑐸𑐂𑐐𑐸 𑐖𑑂𑐫𑐵𑐫𑑂 𑐣𑐵𑐫𑑅 𑐫𑐵𑐣𑐵 𑐟𑑅𑐩𑑂𑐴 𑑋 𑐬𑐵𑐞𑐵𑐟𑐫𑑂 𑐎𑐵𑐫𑑂 𑐩𑑂𑐴𑑂𑐫𑐵𑐫𑑂𑐥𑐶𑐣𑑂𑐟 𑐡𑐬𑐧𑐵𑐬 𑐡𑐫𑑂𑐎𑐾𑐟 𑐧𑐮𑑂𑐮𑐵𑐐𑐸, 𑐧𑐵𑑃𑐮𑐵𑑅𑐐𑐸 𑐳𑐶𑑄𑐫𑐵𑐐𑐸 𑐗𑑂𑐫𑐵𑑅, 𑐏𑐵𑐥𑐵, 𑐡𑐮𑐶𑐣, 𑐟𑐶𑐩𑑂𑐩𑐵 𑐡𑐫𑐾𑐎𑐾𑐟 𑐀𑐐𑐬𑐵𑐠, 𑐔𑐵𑑃𑐥𑐫𑐵 𑐳𑐶𑐩𑐵 𑐐𑐣 𑐐𑐣 𑐡𑐸, 𑐀𑐣 𑐀𑐣 𑐖𑑄𑐐𑐮𑐫𑑂 𑐳𑐶𑐩𑐵 𑐎𑑂𑐰𑐠𑐮𑐵 𑐫𑐾𑑃𑐫𑐵 𑐎𑐵𑐛 𑐐𑑀𑐡𑐵𑐩𑐫𑑂 𑐴𑐫𑑂𑐟 𑐖𑑂𑐫𑐵𑐩𑐷 𑐏𑐟𑐣 𑐥𑐟𑐣 𑐫𑐵𑐫𑐾𑐐𑐸 𑐮𑐵𑐐𑐶 𑐗𑐵𑐜𑐵 𑐣𑐵𑐫𑑅 𑐫𑐵𑐐𑐸 𑐏𑐵𑐣𑐎𑐶 𑐧𑐶𑐫𑐵𑐟𑑅𑐩𑑂𑐴, 𑐬𑐵𑐞𑐵 𑐳𑐬𑐎𑐵𑐬𑑄 𑐣𑑂𑐫𑐵𑐥𑐷 𑐧𑐸𑑃 𑐏𑐵𑐣𑐎𑐶 𑐧𑐶𑐫𑐵 𑐡𑑃𑐫𑑂 𑐡𑑃𑐫𑑂 𑐗𑐵𑐜𑐵 𑐔𑑀𑐫𑑂𑐎𑐾𑐐𑐸 𑐖𑑂𑐫𑐵 𑐧𑐶𑐫𑐵𑐟𑑅𑐩𑑂𑐴 𑑋 𑐎𑐵𑐬𑑂𑐟𑐶𑐎 𑐩𑑄𑐳𑐶𑐬𑑄 𑐧𑐸𑑃𑐖𑑂𑐫𑐵 𑐎𑑂𑐰𑐔𑐵𑐃𑐠𑐾𑑄 𑐔𑑂𑐰𑐣𑐎𑐶 𑐗𑐵𑐜𑐵 𑐔𑑂𑐰𑐫𑑂𑐎𑑅 𑐰𑐂 𑐨𑐷𑐩 𑐧𑐴𑐵𑐡𑐸𑐬 𑐁𑐧𑐵 𑐳𑑂𑐰𑐫𑐵 𑐖𑑂𑐫𑐵𑐩𑐶𑐟 𑐏𑐟𑐣 𑐥𑐟𑐣 𑐫𑐵𑐃 𑑋 𑐐𑐸𑐮𑐶𑐳𑐶𑐟𑑄 𑐔𑐶𑐟𑑁𑐣, 𑐐𑐸𑐮𑐶𑐳𑐶𑐟𑑄 𑐴𑐾𑐚𑑁𑐜𑐵𑐥𑐵𑐏𑐾 𑐔𑐵𑐬𑐎𑑀𑐳 𑐗𑐵𑐜𑐷 𑐕𑑂𑐰𑐃 𑑋 𑐩𑑂𑐴𑐵𑑄 𑐰𑐣𑐾𑐩𑐏𑐸 𑐢𑐵𑐫𑑂𑐩𑐖𑑂𑐫𑐹 𑑋 𑐩𑐰𑐣𑐎𑐶 𑐧𑐸𑑃 𑐕𑐎𑐸𑐔𑐵 𑐖𑑂𑐫𑐵𑐎𑐵𑑅 𑐟𑑅𑐐𑐸 𑐣𑑄 𑐮𑐵𑐎𑐵𑐎𑐵𑐃 𑑋 𑐳𑐸𑐮𑐵𑑅 𑐔𑑂𑐰𑑄𑐳𑐵 𑐏𑐵𑐥𑐵 𑐮𑐶𑐣𑐵𑑅 𑐡𑐾𑐫𑑂 𑐥𑐸𑐏𑐸𑐮𑐷 𑐰𑐵𑐣𑑂𑐕𑑀𑐫𑐵 𑐧𑐶𑐃 𑑋 𑐩𑑂𑐴𑐵𑑄 𑐗𑐵𑐜𑐵 𑐰𑐣𑐾𑐩𑐏𑐸 𑐢𑐵𑑅𑐥𑐶𑐣𑑂𑐟 𑐐𑑀𑐬𑐏𑐮𑑀𑐬𑐷 𑐟𑐫𑐵𑑅 𑐔𑐶𑐣𑐵 𑐮𑐵𑐕𑐶 𑐐𑑂𑐰𑐵𑐬𑐵 𑐟𑐸𑐂𑐎𑐵 𑐟𑐃 𑑋 𑐐𑐸𑐮𑐶𑐳𑐶𑐟𑑄 𑐮𑐵 𑐏𑑂𑐰𑐵𑐮𑐫𑑂 𑐳𑐵𑐏𑑅 𑐟𑐷 𑐥𑐵𑐣𑐵 𑐦𑐮𑑂𑐔𑐶𑐫𑐵 𑐠𑐵𑐩𑐫𑑂 𑐔𑐶𑐣𑐵 𑐟𑐃 𑑋 𑐨𑐷𑐩𑐰𑐴𑐵𑐡𑐸𑐬 𑐁𑐧𑐵𑐫𑐵 𑐕𑐸 𑐩𑐟𑐶𑑄𑐰𑐮 𑐰𑐴𑐾 𑐳𑐖𑐵𑑃𑐫𑑂 𑐧𑐶𑐫𑐵𑑅 𑐟𑐃 𑑋 𑐰𑑄 𑐠𑑅𑐟 𑐐𑐵𑑄𑐫𑐵𑐩𑑂𑐴 𑐕𑐩𑑂𑐴 𑐖𑐸𑐖𑐸 𑐨𑐵𑑅𑐥𑐶𑐫𑐵 𑐡𑐸𑑅𑐏 𑐧𑐶𑐫𑐵𑐟𑑅𑐳𑐵𑑄 𑐰𑐿𑐐𑐸 𑐰𑐶𑐬𑑀𑐢 𑐫𑐵𑐫𑑂𑐐𑐸 𑐐𑐵𑐩𑐫𑑂 𑐳𑑂𑐰𑐫𑐵𑐎𑐾𑑄 𑐴𑐾 𑐟𑐵𑐐𑐟 𑐩𑐡𑐸 𑑋

𑐴𑐵𑐎𑐸𑐔𑐵 𑐧𑐵𑐐𑐩𑐟𑐶 𑐰𑐣𑐵𑑄𑐰𑑅𑐩𑑂𑐴 𑐕𑐾𑑃 𑐠𑑂𑐫𑐣𑐾𑐳𑐵𑐠𑑄 𑐎𑐵𑐫𑑂𑐩𑑂𑐴 𑐨𑐷𑐩𑐰𑐴𑐵𑐡𑐸𑐬 𑐁𑐧𑐵 𑐢𑐫𑐵𑐰𑑄𑐐𑐸 𑐏𑑃 𑐎𑐣 𑑋 𑐴𑐵𑐎𑐸𑐔𑐶𑐫𑐵 𑐮𑐵 𑐳𑐵𑐟𑐸𑐴𑐾 𑐰𑐣 𑑋 𑐀𑐠𑐾𑐴𑐾 𑐴𑐵𑐎𑐸𑐩𑑂𑐴 𑐨𑐷𑐩𑐧𑐴𑐵𑐡𑐸𑐬 𑐁𑐧𑐵 𑐮𑐵𑐕𑐶 𑐰𑐵 𑐢𑐵𑐮 𑐢𑐵𑑅𑐧𑐮𑐫𑑂 𑐰𑐫𑐵 𑐏𑑂𑐰𑐵𑑅𑐮𑐵 𑐰𑑃𑐔𑐸𑐳𑐾 𑐔𑑂𑐰𑐣𑐵 𑐰𑐣 𑑋 𑐳𑐶𑐩𑐵𑑄 𑐎𑐸𑐟𑐸𑑄𑐰𑑅𑐩𑑂𑐴 𑐩𑐵𑐎𑑅𑐠𑐾𑑄 𑐟𑑂𑐰𑐮𑐫𑑂 𑐖𑐸𑐫𑐵𑐔𑑂𑐰𑐣 𑑋 𑐰𑐫𑐵 𑐩𑐣𑐫𑑂 𑐀𑐣𑐾𑐟𑐣𑐾𑐐𑐸 𑐏𑑃 𑐮𑐸𑐮 𑑋 𑐰𑐿𑐟 𑐠𑑅 𑐖𑑂𑐫𑐵𑐥𑐸 𑐖𑐸𑐫𑐵 𑐳𑐬𑐎𑐵𑐬𑐫𑐵𑐐𑐸 𑐧𑐸𑑃 𑐖𑑂𑐫𑐵𑐣𑐵 𑐣𑐫𑐵𑐔𑑂𑐰𑐣𑐵𑐐𑐸 𑐢𑐶𑐎𑑂𑐎𑐵𑐬 𑐢𑐿𑐠𑐾𑑄 𑐟𑐵𑐮 𑑋 𑑓𑑖𑑐 𑐡𑐶𑐣 𑐡𑐸𑑅𑐏 𑐳𑐶𑐫𑐵𑐣𑑄 𑐡𑐸𑑅𑐏 𑐳𑐶𑐃 𑐩𑐐𑐵𑑅𑐐𑐸 𑐠𑑂𑐰 𑐖𑑂𑐫𑐵𑐥𑐸𑐫𑐵 𑐎𑐬𑑂𑐩 𑐢𑐿𑐠𑐾𑑄 𑐩𑐟𑐶𑑄𑐮𑐸𑐮 𑑋 𑐳𑑂𑐰𑐳𑑅 𑐰 𑐏𑐸𑐂𑐣𑑂𑐴𑐸 𑐖𑑂𑐫𑐵 𑐖𑑂𑐫𑐵, 𑐐𑐧𑐮𑐾𑑄 𑐧𑐸𑑃𑐖𑑂𑐫𑐵, 𑐐𑐧𑐮𑐾𑑄 𑐐𑐸𑐛𑐷𑐫𑐵 𑐖𑑂𑐫𑐵 𑐐𑐧𑐮𑐾𑑄 𑐖𑐸𑐖𑐫𑐵𑐠𑐵𑐫𑑂 𑐖𑑂𑐫𑐵, 𑐐𑐧𑐮𑐾𑑄 𑐳𑐵𑐴𑐸𑐟𑐫𑑂𑐠𑐵𑐫𑑂 𑑋 𑐁𑐬𑐵𑐩 𑐢𑐿𑐐𑐸𑐮𑐵 𑐳𑐶𑐣𑐵𑑅 𑐰𑐣𑐷𑐧𑐮𑐫𑑂 𑐟𑐶𑐣𑐶 𑐡𑐃 𑐢𑐿𑐠𑐾𑑄 𑐩𑐣𑐫𑑂 𑐰𑐮 𑑋 𑐣𑑂𑐴𑑂𑐫𑐵𑐎𑑂𑐰 𑐡𑐸𑑅𑐏 𑐳𑑂𑐫𑐹𑐳𑐵𑑄 𑐕𑐸𑐫𑐵𑐫𑑂 𑐰𑐴𑐾 𑐥𑑂𑐰𑐵𑑅 𑐕𑐐𑑅𑐫𑐵 𑐔𑑂𑐫𑑅 𑐮𑐵 𑐏𑐣𑐶 𑐖𑑂𑐫𑐵𑐮𑐵 𑐢𑐎𑐵𑑅 𑐢𑐾𑐧𑐵 𑐕𑐐𑑅 𑐳𑐸𑐣𑐵𑐣𑑄 𑐧𑐶𑐂𑐐𑐸 𑐩𑐏𑐸 𑑋 𑐐𑐸𑐮𑐶𑐳𑐶𑐣𑑄 𑐥𑐸𑐮𑐵𑑄𑐐𑐸 𑐮𑑃 𑐕𑐥𑐵𑑅 𑐣𑐶𑐥𑐵𑑅 𑐧𑐶𑐫𑐵𑑅 𑐴𑐃 𑑋 𑐐𑐸𑐮𑐶𑐳𑐶𑐣𑑄 𑐔𑐶𑐎𑐸𑐮𑐵𑑄 𑐦𑐶𑐂𑐟 𑐖𑑂𑐫𑐹 𑐢𑐎𑐵𑑅 𑐕𑐸𑑃 𑐔𑐵𑐣𑐵𑑅 𑐟𑑅𑐐𑐸 𑐎𑑀𑐚 𑐕𑐥𑐵𑑅 𑐣𑐶𑐥𑐵𑑅 𑐧𑐶𑐫𑐵 𑐴𑐾𑐫𑑂𑐎𑐵 𑐴𑐃 𑑋 𑐡𑐬𑐰𑐵𑐬𑐫𑑂 𑐖𑑂𑐫𑐵 𑐰𑑄𑐳𑐵 𑐂𑐩𑐶𑐟 𑐩𑐫𑑀𑐐𑐸 𑐦𑐳𑐶, 𑐮𑐿𑑄 𑐗𑑂𑐫𑐵𑐟𑐸𑐐𑐸 𑐖𑑂𑐫𑐵𑐩𑐕𑐶𑑄𑐐𑐸 𑐧𑐶𑐫𑐵 𑐴𑐃 𑑋 𑐣𑐏𑑅𑐔𑐏𑑅𑐧𑐮𑐫𑑂 𑐏𑐵𑐔𑐵 𑐳𑑂𑐫𑐵𑐣𑐵 𑐰𑐵𑐣𑑂𑐕𑑂𑐰𑐫𑑂 𑐟𑑂𑐫𑑀𑑄𑐐𑐸 𑐟𑐸𑐟𑐶, 𑐕𑑂𑐫𑑀𑑄, 𑐥𑐥𑑁 𑐩𑐔𑐵𑐟𑐫𑑂𑐟 𑐣𑐎𑐶 𑐢𑐎𑐵 𑐧𑐶𑐫𑐵𑐴𑐃 𑑋 𑐄𑐮𑐶𑑄𑐴𑐾 𑐣𑑂𑐴𑐶𑐔𑑂𑐕𑐶 𑐖𑑂𑐫𑐵 𑐫𑐵𑐣𑐵𑐐𑐸 𑐖𑑂𑐫𑐵𑐮𑐵 𑐢𑐾𑐧𑐵 𑐧𑐶𑐐𑐸𑐮𑐵 𑐣𑐵𑑄 𑐴𑐾 𑐎𑐵𑐃 𑐩𑐏𑐸 𑑋 𑐖𑑂𑐫𑐵𑐮𑐵 𑐴𑐶𑑄 𑐢𑐵𑐫𑑂 𑐕𑐵𑑅𑐐𑐸 𑐴𑐾 𑐩𑐏𑐸 𑐕𑐸𑐫𑐵𑐫𑑂 ?

𑐳𑑀𑐗𑐵 𑐖𑐸𑐮𑐎𑐶 𑐳𑐎𑐳𑐶𑐣𑑄 𑐴𑐾 𑐡𑐸𑑅𑐏 𑐧𑐶𑐂𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐁𑑅 𑐳𑑂𑐰𑐬𑐾 𑐴𑐵𑐣𑑄 𑐩𑐴𑐣𑐶 𑐣𑐏𑑅 𑐔𑑂𑐫𑐵𑐣𑑂𑐴𑐸 𑐣𑑂𑐴𑑂𑐫𑑀 𑐗𑐵𑐬𑐵 𑐔𑑂𑐰𑐫𑑂𑐎𑐾 𑐕𑑂𑐰𑐫𑐵 𑐴𑐮 𑑋 𑐰𑐣𑐾 𑐢𑐵𑐫𑑂𑐐𑐸𑐮𑐵 𑐩𑐰𑐣𑐾 𑐢𑐵𑐫𑑂𑐐𑐸 𑑋 𑐰𑐣𑐾 𑐢𑐵𑑅𑐳𑐵 𑐩𑐴𑐣𑐶𑐠𑐾𑑄 𑐖𑑂𑐫𑐵𑐧𑐮𑐫𑑂 𑐰𑐶𑐡𑐾𑐱 𑐰𑐣𑐵 𑐔𑑂𑐰𑑄𑐥𑐶𑑄 𑐴𑐾 𑐥𑐬𑐶𑐰𑐵𑐬 𑐣𑐵𑐥 𑐔𑑂𑐰𑐣𑐵 𑐣𑐏𑑅 𑐩𑐵𑐣𑐫𑑂 𑐫𑐵𑐫𑑂𑐟 𑐕𑐾𑑃𑐫𑑂 𑐮𑐶𑐴𑐵𑑄𑐰𑐂 𑐢𑐵𑑅𑐳𑐵 𑐠𑐣𑐔𑑂𑐰𑑄𑐥𑐶𑑄 𑐔𑐶𑐟𑑁𑐣, 𑐴𑐾𑐚𑑁𑐜𑐵𑐫𑑂 𑐠𑑅 𑐩𑐔𑐵 𑐏𑐵𑐔𑐵 𑐟𑑂𑐰𑐟𑐵 𑐣𑐏𑑅 𑐩𑐵𑐣𑐫𑑂 𑐩𑐫𑐵𑐳𑐾 𑐰𑐣𑐾 𑐩𑑄 𑐡𑐿𑐮𑐵 𑑋 𑐴𑐵𑐣𑑄 𑐩𑐰𑑄𑐳𑐵 𑐁𑐛𑐥𑐴𑐬𑐷𑐫𑐵𑑄 𑐖𑑂𑐰𑑄𑐰𑐃 𑐢𑐎𑐵𑑅 𑐳𑐸𑐮𑐵𑑅 𑐳𑐸𑐮𑐵𑑅 𑐖𑐸𑐃 𑐩𑐵𑐮𑐷 𑑋 𑐴𑐵𑐎𑐸𑐔𑐶𑐟 𑐕𑐸𑐫𑐵𑐫𑑂 𑐕𑐸𑐫𑐵𑐫𑑂 𑐖𑐸𑐮 𑑋 𑐰𑑄𑐳𑐵𑑄 𑐩𑐖𑑂𑐫𑐹 𑐩𑐰𑑄𑐳𑐵𑑄 𑐩𑐖𑑂𑐫𑐹 𑑋

𑐩𑑀𑐴𑐣𑐶 𑐟𑑂𑐫𑐫𑑂𑐎𑐵 𑐗𑐵𑐜𑐵 𑐔𑑂𑐰𑐫𑑂𑐎𑐵 𑐰𑑅𑐐𑐸𑐮𑐶𑑄 𑐴𑐵𑐎𑐸𑐔𑐶𑐟 𑐨𑐷𑐩𑐰𑐴𑐵𑐡𑐸𑐬 𑐁𑐧𑐵 𑐏𑐣𑐵𑑄 𑐟𑐳𑐎𑑄 𑐟𑑃 𑐥𑐶𑐴𑐵𑑄𑐰𑐮 𑑋 𑐧𑐾𑐂𑐩𑐵𑐣 𑐏𑐷𑐣𑑅𑐩𑑂𑐴 𑐧𑐸𑐬𑐵 𑐩𑑀𑐴𑐣𑐶 𑐟𑑂𑐫𑐫𑑂𑐎𑐵 𑐗𑐵𑐜𑐵 𑐔𑑂𑐰𑐫𑑂𑐎𑑅 𑐰𑐫𑐵 𑐐𑐬𑐷𑐰𑐟𑐫𑑂𑐐𑐸 𑐩𑑀𑐴𑐣𑐶 𑐴𑐾 𑐕𑐏𑐾 𑐮𑐵𑐎𑐵𑑅 𑐧𑐶𑐮 𑑋 𑐩𑑀𑐴𑐣𑐶 𑐣𑐏𑑅 𑐕𑐸 𑐂𑐩𑐶 𑐖𑐎 𑐩𑐵𑐣𑐫𑑂 𑐫𑐵𑐫𑐾 𑐩𑐵𑑅𑐐𑐸𑐮𑐵 ? 𑐖𑐸𑐖𑐸𑐥𑐶𑐣𑐶, 𑐳𑐵𑐴𑐸𑐟𑐫𑑂 𑐖𑐎 𑐣𑐏𑑅𑐮𑐵 𑐩𑐏𑐸𑐣𑐶, 𑐐𑐬𑐷𑐰𑐟𑐫𑑂 𑐣𑑄 𑐮𑐵 𑐣𑐏𑑅 𑐏𑑅, 𑐡𑐸𑐥𑐶𑐣𑐶 𑐳𑐵𑐴𑐸𑐟𑐫𑑂 𑐡𑐸𑐠𑐾𑑄 𑐩𑐵𑐣𑐫𑑂 𑐫𑐵𑐂, 𑐩𑐡𑐸𑐥𑐶𑑄 𑐐𑐬𑐷𑐧𑐟𑐫𑑂 𑐩𑐡𑐸𑐐𑐸 𑐎𑐶𑐳𑐶𑐩𑑄 𑐩𑐵𑐣𑐫𑑂 𑐫𑐵𑐃 𑑋 𑐄𑐮𑐶𑐣𑑄 𑐳𑐶𑐂𑐎𑐾 𑐩𑑂𑐰𑐵𑑅𑐮𑐵 𑐰 𑐣𑑂𑐴𑑂𑐫𑐾𑐥𑐸 𑐩𑐡𑐸𑐩𑑂𑐴 𑐧𑐸𑐬𑐵𑑄 𑑋 𑐫𑑅𑐫𑑅𑐐𑐸 𑐠𑐖𑐸𑐂𑐩𑐵 𑐠𑑂𑐰 𑐩𑑀𑐴𑐣𑐶 𑐣𑑂𑐴𑑂𑐫𑑀𑐮𑐵 𑐖𑐶 𑐗𑐵𑐜𑐵 𑐰𑐣𑐾 𑐴𑐾 𑐩𑐏𑐸 𑐢𑐎𑐵𑑅 𑐴𑐵𑐎𑐸𑐔𑐵 𑐮𑐶𑐧𑐶 𑐮𑐸𑐏𑐵𑑄 𑐳𑐸𑐣𑐵𑐣𑑄 𑐩𑐏𑑄𑐎 𑐧𑐶𑐳𑑂𑐫𑐹𑑄𑐰𑐣 𑑋
𑐨𑐷𑐩𑐰𑐴𑐵𑐡𑐸𑐬 𑐁𑐧𑐵 𑐴𑐵𑐣𑑄 𑐰𑐫𑐵 𑐴𑐵𑐎𑐸𑐔𑐵 𑐳𑐟𑑅𑐰𑐮, “𑐐𑑂𑐰 𑐕𑐶𑐩𑐶 𑐧𑐵 𑐩𑐰𑐣𑐶𑐮𑐵”
𑐴𑐵𑐎𑐸𑐔𑐶𑐫𑐵 𑐎𑐵𑐫𑑂 𑐣𑑂𑐰𑑄𑐴𑐾 𑐩𑐰𑐵𑑅𑐳𑐾 𑐔𑑂𑐰𑐣𑐵𑐔𑑂𑐰𑐣 𑑋

“𑐎𑐵 𑐩𑑂𑐰𑐵𑐮 𑐰𑐣𑐾𑐩𑑂𑐰𑐵𑑅, 𑐰𑐾𑐂𑐩𑐵𑐣𑐟, 𑐊 𑐁𑐛𑐥𑐴𑐬𑐶𑐫𑐵 𑐨𑐵𑐃 𑐎𑐵 𑐠𑑂𑐰𑐫𑐵𑐐𑐸 𑐏𑐵𑐥𑐵 𑐖𑐎 𑐩𑐏𑐸 𑐳𑑂𑐰𑐵𑐴𑐵𑐣𑐶𑐣𑑄 𑐮𑐶𑐣𑐵 𑐡𑐾𑐫𑑂 𑐥𑐸𑐏𑐸𑐮𑐷 𑐰𑐵𑐕𑑂𑐰𑐫𑐵 𑐧𑑂𑐫𑐹 ” 𑐢𑐵𑐮 𑑋 𑐁𑐛𑐥𑐴𑐬𑐶𑐫𑐵𑐟𑐫𑑂𑐳𑑄 𑐟𑐸𑐬𑐸𑐣𑑂𑐟 𑐴𑐾 𑐏𑐵𑐥𑐵 𑐳𑑂𑐰𑐵𑐴𑐵𑐣𑐶 𑐮𑐶𑐣𑐵 𑐴𑐫𑐵 𑐡𑐾𑐫𑑂 𑐥𑐸𑐏𑐸𑐮𑐷 𑐰𑐵𑑄𑐕𑑂𑐰𑐫𑐵 𑐰𑐣 𑑋 𑐴𑐵𑐎𑐸𑐔𑐶𑐫𑐵 𑐎𑐮𑐵 𑐏𑑃𑐫𑑂𑐨𑐵𑐫𑑂 𑐴𑐾 𑐩𑐳𑑅𑐩𑑂𑐴 𑐏𑑂𑐰𑑄𑐏𑑂𑐰𑑄 𑐨𑐷𑐩𑐧𑐴𑐵𑐡𑐸𑐬 𑐁𑐧𑐵𑐫𑐵𑐟 𑐱𑑂𑐬𑐵𑐥 𑐧𑐶𑐫𑐵 𑐔𑑂𑐰𑐣 𑑋

𑐡𑑃𑐫𑑂 𑐡𑑃𑐫𑑂 𑐎𑐵𑐬𑑂𑐟𑐶𑐎 𑐩𑑄𑐳𑐶𑐬 𑐩𑐴𑐶𑐣𑐵𑐫𑑂 𑐐𑐵𑑃𑐩𑐫𑑂 𑐗𑐵𑐜𑐵 𑐔𑑂𑐰𑐫𑑂𑐎 𑐰𑐃 𑑋 𑐐𑐵𑐩𑐫𑑂 𑐧𑐸𑑃 𑐖𑑂𑐫𑐵𑐫𑐵𑐣𑐵 𑐣𑐂𑐥𑐶𑑄 𑐀𑐥𑑂𑐰𑑅𑐠𑐾𑑄 𑐎𑐶𑐳𑐵𑐣𑐟 𑐗𑐵𑐜𑐵 𑐰𑐣𑐾𑐐𑐸 𑐢𑐎𑐵𑑅 𑐟𑐬𑐵𑐃𑐫𑐵 𑐖𑑄𑐐𑐮𑐾 𑐡𑑃𑐫𑑂 𑐡𑑃𑐫𑑂 𑐖𑑂𑐫𑐵 𑐫𑐵𑑅 𑐰𑐣𑐷 𑑋 𑐔𑐵𑐬𑐎𑑀𑐳 𑐗𑐵𑐜𑐷 𑐰𑐣𑐵𑑅 𑐳𑐶𑐩𑐵 𑐎𑑂𑐰𑐠𑑅 𑐰𑐣𑐷 𑑋 𑐳𑐟𑐬𑐷, 𑐟𑐶𑐩𑑂𑐩𑐵 𑐡𑐫𑑂𑐎𑐵𑑅 𑐫𑐾𑑃 𑐎𑐵𑐛 𑐐𑑀𑐡𑐵𑐩𑐫𑑂 𑐠𑑂𑐫𑐾𑑄𑐎 𑐟𑐫𑑂𑐴𑐂 𑑋 𑐡𑐔𑑂𑐕𑐶𑐫𑐵 𑑗𑑒 𑐏𑐾𑐟𑐵𑐮𑐵 𑐏𑐵𑐎𑐾𑐩𑐵𑑅 𑐢𑐎𑐵𑑅 𑐮𑐵𑑃 𑐮𑐵𑑃 𑐟𑐎 𑐀𑐖𑐵𑑅𑐐𑐸 𑐍𑐮 𑐡𑐸𑐠𑐵𑐫𑑂 𑐢𑐸𑑃 𑐨𑐵𑐮𑐸 𑐰𑐂𑐠𑐵𑐫𑑂 𑐖𑑄𑐐𑐮𑐫𑑂 𑐫𑐵𑐎𑑅𑐔𑐵 𑐫𑐵𑐎𑑅𑐔𑐵 𑐖𑑂𑐫𑐵 𑐫𑐵𑑅 𑐰𑐣𑐷 𑑋 𑐳𑐸𑐠𑑄𑐣𑐶𑐳𑐾𑑄 𑐧𑐴𑐣𑐶𑐟𑐎 𑐖𑑂𑐫𑐵 𑐫𑐵𑐫𑐾𑐐𑐸 𑐖𑑂𑐫𑐵𑐮𑐵 𑐣𑑂𑐴𑐶𑑄 𑐖𑐵𑐎𑐶 𑐣𑐶𑐩𑐣𑐵 𑐰 𑐥𑐶𑐁𑐣𑐵 (𑑑𑑖 𑐥𑐿𑐳𑐵) 𑐢𑐾𑐧𑐵 𑐧𑐶𑐂 𑐐𑐵𑐫𑑂𑐩𑐵 𑐩𑐐𑐵𑐫𑑂𑐩𑐵, 𑐥𑑂𑐰𑐵𑑅 𑐖𑐵𑐫𑑂𑐩𑐵 𑐩𑐖𑐵𑐫𑑂𑐩𑐵 𑐳𑐸𑐣𑐵𑐣𑑄 𑐩𑐟𑐮𑐧 𑐫𑐵𑐃𑐩𑐏𑐸 𑑋 𑐀𑐖𑐵𑑅𑐐𑐸 𑐠𑐵𑐎𑐸𑐎 𑐖𑑂𑐫𑐵𑐫𑐵𑐃𑐥𑐶𑐣𑑂𑐟 𑐖𑐵𑐎𑐷 𑐣𑐶𑐩𑐣𑐵𑑄 𑐣𑑂𑐴𑐶𑐔𑑂𑐕𑐶𑐫𑐵𑐟 𑐐𑐵𑑅 𑐩𑐐𑐵𑑅 𑐳𑑂𑐰𑐂𑐥𑐶𑑄 𑐳𑐸𑑄 𑐩𑐡𑐸, 𑐏𑐵𑐮𑐶 𑐖𑑂𑐫𑐵 𑐫𑐵𑑅 𑐩𑐫𑐵𑑅 𑐳𑑂𑐰𑐰𑐂𑐥𑐶𑑄 𑐖𑐎 𑑋 𑐂𑐮𑐫𑑂 𑐳𑐶𑐢𑐫𑑂𑐎𑐾 𑐩𑐵𑑅 𑐢𑐎𑐵𑑅 𑐏𑑂𑐫𑐵𑑅𑐰𑐂𑐥𑐶𑑄 𑐖𑐎 𑐰𑐃 𑑋 𑐴𑐵𑐎𑐸𑐔𑐵 𑐰𑐴𑐾 𑐗𑐵𑐜𑐵 𑐰𑐣𑐾𑐐𑐸 𑐖𑑂𑐫𑐵 𑐖𑐎 𑐮𑐸𑐩𑑄𑐎𑐵 𑐮𑑃 𑐢𑐸𑐕𑐶 𑐩𑐣𑐫𑑂 𑐏𑑃 𑐮𑑂𑐴𑐵𑐎𑐵 𑐣𑐶𑐣𑐶𑐩𑑂𑐴𑐾 𑐳𑐶𑐠𑐵𑐫𑑂 𑐕𑐾𑑃 𑐦𑑃𑐥𑐷 𑐰𑐣 𑑋 𑐴𑐵𑐎𑐸𑐔𑐵𑑄 𑐗𑐵𑐜𑐵𑐰𑐣𑐾 𑐩𑐵𑐮𑐶 𑐢𑐎𑐵𑑅 𑐠𑐣 𑐣𑐶𑐣𑐶𑐫𑐵𑐠𑐵𑐫𑑂 𑐳𑐹 𑐰𑐫𑐵𑐐𑐸 𑐢𑐵𑐮 𑑋

𑐣𑐶𑐣𑐶𑐩𑑂𑐴 𑐴𑐵𑐎𑐸𑐔𑐶𑐟 𑐴𑐾𑐎𑐵𑑅 𑐢𑐵𑐮, “𑐧𑐵𑐧𑐸 𑐗𑐵𑐜𑐵 𑐰𑐣𑐾 𑐠𑐵𑐎𑐸𑐔𑐵𑐫𑑂 𑐩𑐟𑐾 𑐣𑐶𑐣𑑂𑐴𑐸 𑐥𑑂𑐫𑐣𑑂𑐴𑐸 𑐩𑑂𑐴𑐶𑐟𑐾𑐠𑐾𑑄 𑐰𑐣𑐵𑑄 𑐴𑐵𑐖𑐶𑐬 𑐕𑐵𑐫𑑂𑐎𑐵𑑅 𑐰𑐵 𑑋 𑐕 𑐠𑐠𑐾 𑐧𑐶𑐳𑑂𑐫𑐹𑑄 𑐖𑐸𑐫𑐵𑑄 𑐕𑐸𑐫𑐵𑐫𑑂 𑐕𑐣𑑂𑐟 𑐕𑐣𑑂𑐴𑐹 𑐖𑑂𑐰𑐣𑐵 𑐂𑐩𑐶𑐳𑑄 𑐖𑑂𑐫𑐵 𑐩𑐫𑐵𑐎𑐷 𑐴𑐾 𑐩𑐏𑐸 𑑋 𑐴𑐵𑐣𑑄 𑐖𑑂𑐰𑐣𑐵 𑐫𑐣𑐎𑐶 𑐕𑐣𑑂𑐟 𑐳𑐖𑐵𑐫𑑃 𑐣𑑄 𑐧𑐷, 𑐗𑐵𑐜𑐵 𑐣𑑄 𑐕𑑂𑐰𑐂 𑑋 𑐳𑐖𑐵𑐫𑑃 𑐣𑐫𑑂𑐐𑐸 𑐥𑐮𑑂𑐳𑐵 𑐁𑑅 𑐴𑐾 𑐳𑐸𑐩𑑂𑐎 𑐴𑐸𑑃 𑑋 𑐠𑐸𑐎𑐾𑐴𑐾 𑐕𑐣𑑂𑐟 𑐨𑐮𑑀 𑐖𑐸𑐂 𑑋”

𑐴𑐵𑐎𑐸𑐔𑐶𑐟 𑐦𑐳𑐵𑐡 𑐖𑐸𑐮, 𑐰𑐣𑐾𑐮𑐵 𑐩𑐰𑐣𑐾𑐮𑐵 𑐖𑐸𑐮 𑑋 𑐴𑐵𑐎𑐸𑐔𑐵 𑐣𑑂𑐴𑐵𑐥𑐵𑐣𑑄 𑐣𑐶𑐎𑑅 𑐳𑑂𑐰𑐎𑑅 𑐗𑐵𑐜𑐵 𑐰𑐣𑐵 𑐖𑑄𑐐𑐮𑐫𑑂 𑐳𑐶𑑄 𑐎𑐸𑐧𑐶𑐫𑐵 𑐀𑐧𑐸𑑄 𑐩𑐣𑑅𑐐𑐸 𑐡𑐸𑑅𑐏 𑐣𑐫𑐵𑑅 𑐰𑐫𑑂𑐢𑐸𑑄𑐎𑐹𑐩𑑂𑐴, 𑐩𑑂𑐴𑐫𑑂 𑐮𑑃 𑐩𑐡𑐫𑑂𑐎 𑐀𑐖𑐵𑑅𑐐𑐸 𑐟𑐵𑑃𑐣𑑂𑐰𑐠𑐵𑐫𑑂 𑐖𑑄𑐐𑐮𑐫𑑂 𑐳𑐶𑐩𑐵 𑐎𑑂𑐰𑐠𑐮𑐵 𑐰𑐫𑑂𑐢𑐸𑑄𑐎𑐹𑐩𑑂𑐴, 𑐮𑑅 𑐟𑑂𑐰𑐣𑐾𑐐𑐸 𑐠𑐮 𑐩𑐡𑐫𑐵𑑅 𑐴𑑂𑐰𑑅𑐐𑑄𑐐𑐸 𑐟𑐥𑐮𑐶𑑄 𑐏𑐸𑐳𑐶𑐔𑐵𑐫𑐵 𑐮𑑅 𑐟𑐸𑐫𑐵 𑐟𑑂𑐰𑐣𑐵 𑐰𑐫𑑂𑐢𑐸𑑄𑐎𑐹𑐩𑑂𑐴, 𑐥𑐵𑐮𑐟𑐮𑐫𑑂 𑐮𑐵𑐎𑐵𑑄 𑐩𑐡𑐫𑑂𑐎 𑐐𑐸𑑃 𑐡𑐠𑐸𑑄 𑐡𑐠𑐸𑑄 𑐧𑑀𑐳𑐶 𑐖𑑂𑐫𑐵 𑐫𑐵𑐃𑐥𑐶𑐣𑑂𑐟 𑐖𑐵 𑐳𑐸𑐰𑐵 𑐖𑐸𑐫𑐵 𑐖𑐵 𑐣𑐎𑐵 𑐰𑐫𑑂𑐢𑐸𑑄𑐎𑐹𑐩𑑂𑐴, 𑐰𑑄𑐧𑐟𑐶 𑐀𑐣𑐫𑐵 𑐡𑐸𑑅𑐏 𑐩𑐾𑐥𑐶𑑄 𑐳𑐸𑐣𑐵𑑄 𑐳𑐶𑐂, 𑐴𑐵𑐎𑐸𑐔𑐵𑑄 𑐣𑑂𑐴𑐵𑐥𑐵𑐫𑐵 𑐏𑑃 𑐮𑐸𑐩𑑄𑐎𑐹 𑐮𑐸𑐩𑑄𑐎𑐹𑑄 𑐩𑐶𑐏𑐵𑑄 𑐏𑑂𑐰𑐧𑐶 𑐴𑐵𑐫𑑂𑐎𑐮 𑑋

𑐱𑑂𑐬𑐷 𑑓 𑐬𑐵𑐞𑐵 𑐳𑐬𑐎𑐵𑐬 𑐟𑐳𑐎𑑄 𑐐𑑂𑐫𑐵𑐣𑐵𑐥𑐸 𑐂𑐩𑐶𑐳𑑄 𑐣𑑂𑐴𑑂𑐫𑐵𑐎𑑂𑐰 𑐀𑐣𑑂𑐫𑐵𑐫 𑐀𑐟𑑂𑐫𑐵𑐔𑐵𑐬 𑐫𑐵𑑅𑐳𑐵𑑄 𑐖𑐣𑐟𑐵𑑄 𑐣𑑂𑐰𑐰𑐵𑐫𑑂 𑐩𑐖𑑂𑐫𑐹, 𑐟𑐸𑐬𑐸𑐣𑑂𑐟 𑐖𑑂𑐰𑐣𑐵 𑐫𑐣𑐶, 𑐖𑐾𑐮𑐫𑑂 𑐎𑐸𑐣𑐾𑐫𑐣𑐷, 𑐖𑐰𑐵𑑅 𑐳𑐰𑐵𑑅 𑐫𑐵𑐣𑐵 𑐏𑑃𑐮𑑂𑐴𑐵𑐟𑐎𑐶 𑐖𑐶𑐄 𑐢𑐣 𑐳𑐬𑐎𑐵𑐬 𑐢𑐎𑐵𑑅 𑐡𑐎𑑂𑐰 𑐳𑑄𑐥𑐟𑐶 𑐮𑐵𑐎𑐵 𑐖𑐾𑐮𑐫𑑂 𑐟𑐫𑑂𑐫𑐣𑐷 𑑋 𑐣𑑂𑐫𑐵𑐫 𑐣𑐶𑐳𑐵𑐦 𑐢𑐂𑐐𑐸 𑐩𑐏𑐸, 𑐎𑐵𑐣𑐸𑐣 𑐳𑑂𑐰𑐫𑐵 𑐔𑑂𑐰𑐫𑑂𑐮𑐵𑑅𑐥𑐶𑑄 𑐂𑐥𑐶𑑄 𑑋 𑐂𑐩𑐶 𑐏𑐮𑑂𑐟𑐶 𑐴𑐾 𑐮𑐵𑐮 𑐩𑑀𑐴𑐬 𑐕𑐵𑐥𑐾 𑐫𑐵𑐫𑐾𑐐𑐸 𑐖𑑂𑐰𑐣𑐵 𑐖𑐸𑐂𑐥𑐶𑑄 𑑋 𑐣𑑂𑐴𑑂𑐫𑐵𑐐𑐸 𑐣𑑂𑐫𑐵𑐫 𑐣𑐶𑐳𑐵𑐦 𑐫𑐵𑐟 𑐣𑑄 𑐴𑐸𑐎𑐸𑐩𑑄 𑐎𑐵𑐟𑐫𑑂 𑐫𑐵𑐫𑐾 𑐖𑑂𑐫𑐹𑐐𑐸 𑐴𑐸𑐎𑐸𑐩 𑐳𑐵𑐳𑐣 𑐔𑐮𑐾𑐫𑐵𑐣𑐵 𑐔𑑂𑐰𑑄𑐥𑐶𑑄 𑑋 𑐂𑐩𑐶𑐸 𑐰𑐶𑐬𑐸𑐡𑑂𑐢𑐫𑑂 𑐣𑑂𑐰𑑄𑐰𑐵𑐂𑐩𑑂𑐴 𑐳𑐸 ? 𑐱𑑂𑐬𑐷 𑑓 𑐳𑐬𑐎𑐵𑐬𑐫𑐵 𑐐𑐸𑐮𑐶𑐣𑑄 𑐡𑐵𑐖𑐸 𑐎𑐶𑐖𑐵 𑐥𑐬𑐶𑐰𑐵𑐬 𑐡𑐸 𑐳𑐎𑐳𑐶𑐫𑐵𑑄 𑐩𑐴𑐵𑐬𑐵𑐣𑐷 𑐧𑐵𑐴𑐾𑐎 𑐴𑐾 𑐐𑑂𑐰𑐵𑑅 𑐐𑑂𑐰𑐵𑑅 𑐣𑐵𑐣𑐶𑐥𑐶𑑄 𑐡𑐬𑐧𑐵𑐬𑐫𑑂 𑐟𑐫𑐵𑑅𑐟𑑅𑐐𑐸 𑐡𑐸 𑑋 𑐩𑐴𑐵𑐬𑐵𑐣𑐷 𑐥𑐵𑐏𑐾𑐣𑑄 𑐣𑐵𑐣𑐶𑐥𑐶𑐣𑐶 𑐥𑐵𑐏𑐾𑑄 𑐣𑑄 𑐫𑐵𑐣𑐵 𑐐𑑂𑐰𑐵𑑅 𑐐𑑂𑐰𑐵𑑅 𑐩𑐔𑐵 𑐡𑐫𑑂𑐎𑐵 𑐟𑑅𑐐𑐸 𑐡𑐸 𑑋 𑐩𑐴𑐵𑐬𑐵𑐣𑐷 𑐥𑐵𑐏𑐾𑑄 𑐡𑐸𑐥𑐶𑑄 𑐠𑑂𑐫𑐵𑑅𑐥𑐶𑑄 𑐰 𑐣𑐵𑐣𑐶𑐥𑐶𑐣𑐶𑐥𑐵𑐏𑐾𑑄 𑐡𑐸𑐩𑑂𑐥𑐶𑑄 𑐩𑐠𑑂𑐫𑐵𑑅𑐥𑐶𑑄 𑐢𑐎𑐵𑑅 𑐳𑐎𑐳𑐶𑐟𑑄 𑐡𑐬𑐧𑐵𑐬 𑐡𑐫𑑂𑐎𑐾 𑐩𑐵𑑅𑐐𑐸 𑐡𑐸 𑑋 𑐐𑐣 𑐡𑐫𑑂𑐎𑐾𑐐𑐸 𑐨𑐔𑐵 𑐖𑐐𑑂𑐐𑐵 𑐖𑐩𑐶𑐣 𑐐𑐵𑑅𑐐𑐸 𑐩𑐏𑐸 𑑋 𑐫𑐾𑑃, 𑐫𑐮𑐫𑐵 𑐖𑑂𑐫𑐵𑐥𑐸𑐟𑐫𑑂𑐐𑐸 𑐡𑑂𑐰𑐮𑑄𑐡𑑂𑐰𑑅 𑐬𑑀𑐥𑐣𑐶 𑐧𑐸𑑃 𑐖𑐧𑐬𑐖𑐳𑑂𑐟𑐶𑑄 𑐎𑐵𑐮 𑐄𑐎𑐾 𑐴𑐾 𑐡𑐬𑐧𑐵𑐬 𑐡𑐫𑑂𑐎𑐵 𑐧𑐶𑐮 𑑋 𑐡𑐬𑐧𑐵𑐬 𑐡𑐫𑑂𑐎𑐾𑐟 𑐩𑐵𑐎𑑂𑐰 𑐗𑑂𑐫𑐵𑑅 𑐏𑐵𑐥𑐵 𑐢𑐮𑐶𑑄 𑐡𑐫𑑂𑐎𑐾𑐟 𑐐𑐵𑐩𑐾𑐫𑐵𑐥𑐶𑑄 𑐖𑑂𑐫𑐵𑐥𑐸𑐟𑐫𑑂𑐟 𑐡𑑃𑐫𑑂 𑐡𑑃𑐫𑑂 𑐗𑐵𑐜𑐵 𑐕𑑂𑐰𑐫𑑂𑐐𑐸 𑐢𑐎𑐵𑑅 𑐔𑐵𑐬𑐎𑑀𑐳 𑐗𑐵𑐜𑐷 𑐳𑐶𑐩𑐵 𑐢𑐾𑑄𑐎𑐵𑑅 𑐟𑐶𑐩𑑂𑐩𑐵, 𑐳𑐟𑐬𑐷 𑐡𑐫𑑂𑐎𑐵 𑐴𑐫𑑂𑐟 𑐕𑑂𑐰𑐟 𑑋 𑐩𑑂𑐴𑐵𑑄 𑐰𑐣𑐾𑐩𑐏𑐸 𑐢𑐵𑐫𑑂 𑐖𑑂𑐫𑐹𑐐𑐸 𑐩𑐏𑐸, 𑐧𑐸𑑃 𑐕𑐎𑐹𑐔𑐵 𑐖𑑂𑐫𑐵𑐣𑐵 𑐣𑐫𑐵𑐔𑑂𑐰𑐣𑐵𑐐𑐸 𑐣𑑄 𑐩𑐡𑐃 𑐢𑐎𑐵𑑅 𑐢𑐣𑑂𑐡𑐵 𑑋 𑐰𑐣𑐾𑐢𑐵𑑅𑐳𑐵 𑐰𑐣𑐾𑐐𑑂𑐫𑐵𑑅 𑑋 𑐡𑑃𑐫𑑂 𑐡𑑃𑐫𑑂 𑐎𑐫𑑁𑑄 𑐩𑐣𑐹𑐟 𑐗𑐵𑐜𑐵𑐰𑑄𑐥𑐶𑑄 𑐳𑐶𑐩𑐵𑑄 𑐮𑑂𑐴𑐵𑐣𑐵𑑄 𑐳𑐶𑐂𑐥𑐶𑑄 𑐡𑐸, 𑐐𑐸𑐮𑐶𑑄 𑐍𑐮𑑄 𑐎𑐫𑐵𑑅 𑐰𑐶𑐬𑐵𑐩𑐶 𑐖𑐸𑐫𑐵 𑐳𑐶𑐂𑐥𑐶𑑄 𑐡𑐸, 𑐳𑐶𑑄 𑐮𑑂𑐴𑑂𑐫𑐾𑐫𑐵 𑐴𑑃 𑐴𑑃 𑐳𑐶𑑄 𑐟𑑂𑐫𑐮𑐵 𑐳𑐶𑐂𑐥𑐶𑑄 𑐐𑐸𑐮𑐶, 𑐥𑐴𑐵𑐜𑐫𑑂 𑐳𑐶𑑄𑐎𑐸𑐧𑐶𑐫𑐵𑐰𑑅𑐥𑐶𑑄 𑐥𑐴𑐵𑐜𑑄 𑐟𑐸𑐮𑐵𑐰𑐣𑐵 𑐳𑐶𑐂𑐥𑐶𑑄 𑑋 𑐐𑐬𑐶𑐧 𑐖𑐣𑐟𑐵 𑐳𑐶𑐂𑐐𑐸 𑐂𑐩𑐶𑐟 𑐩𑐟𑐮𑐧 𑐩𑐡𑐸 𑑋 𑐢𑑂𑐰𑑄 𑐳𑐶𑐂𑐐𑐸𑐮𑐵, 𑐏𑐶𑐔𑐵 𑐳𑐶𑐂𑐐𑐸𑐮𑐵 𑑋 𑐬𑐵𑐞𑐵𑐟𑐫𑑂𑐳𑑄 𑐫𑐵𑐣𑐵 𑐟𑑅𑐐𑐸 𑐀𑐟𑑂𑐫𑐵𑐔𑐵𑐬 𑐮𑐸𑐩𑑄𑐎𑐵 𑐮𑑃𑐫𑑂 𑐰 𑐰𑑄 𑐴𑐵𑐎𑐸𑐔𑐵𑑄 𑐕𑐾𑑃 𑐠𑑂𑐫𑑄𑐐𑐸 𑐴𑐾 𑐩𑐔𑐵𑐮, 𑐎𑐮𑐵𑐩𑑂𑐴 “𑐐𑐣 𑐰𑐣𑐵𑐔𑑂𑐰𑐣𑐵𑐩𑑂𑐴𑐮𑐫𑑂 𑐨𑐷𑐩𑐰𑐴𑐵𑐡𑐸𑐬 𑐁𑐧𑐵 𑐐𑑂𑐰𑐎𑑅 𑐳𑐟𑐎𑐾 𑐕𑑂𑐰𑐫𑐵 𑐴𑐫𑐾 𑐢𑐸𑑄𑐎𑐮 𑐎𑐣𑑂𑐴𑐫𑑂 𑐳𑐸𑐠𑐫𑑂 𑐩𑐰𑐮𑐎𑐶 𑐴𑐵𑐣𑑄 𑐁𑐛 𑐥𑐴𑐬𑐷 𑐕𑑂𑐰𑐫𑐵 𑐴𑐫𑑂 𑐴𑑃 𑐕𑐸 𑐫𑐵𑐫𑑂𑐐𑐸 ?” 𑐎𑐮𑐵𑐩𑑂𑐴𑑄 𑐢𑐵𑐳𑐾𑑄𑐮𑐶𑑄 𑐰 𑐗𑐳𑑄𑐐 𑐰𑐣 𑑋

“𑐁𑑅 𑐖𑑂𑐰𑑄𑐎𑐾 𑐕𑑂𑐰𑐫𑐵𑐴𑐫𑑂 𑐢𑐵𑐳𑐾𑑄𑐮𑐶𑑄 𑐰𑑄𑐴𑐾 𑐰𑐣 𑐩𑐵𑐮𑐶𑐎𑐵, 𑐧𑐖𑐶 𑐣𑐶𑐦𑐵 𑐰 𑐐𑐸𑑃𑐡𑑂𑐬𑐸 𑐨𑐔𑐵 𑐥𑑂𑐰𑐔𑐶𑐣𑐵 𑐟𑐶, 𑐐𑐸𑐮𑐶 𑐔𑑂𑐰𑐣𑐾𑐩𑐵𑐮𑐷 𑐐𑐸𑐮𑐶 𑐔𑑂𑐰𑐣𑐾𑐩𑐵𑐮𑐷 𑐂𑐩𑐶𑐳𑑄 𑐧𑐶𑐂𑐐𑐸 𑐖𑐵𑐎𑐶 𑐣𑐶𑐩𑐣𑐵 𑐥𑑂𑐰𑐵𑑅 𑐖𑐵𑐫𑑂𑐎 𑐣𑐫𑑂𑐟 𑐐𑐵𑑅𑐐𑐸 𑐩𑐏𑐸 𑑋 𑐣𑑂𑐴𑐶𑐣𑐫𑑂 𑐧𑐖𑐶 𑐣𑐫𑐵𑑅𑐳𑐵𑑄 𑐥𑑂𑐰𑐵𑑅 𑐖𑐵𑐫𑑂𑐎𑐾 𑐩𑐵𑐮 𑑋 𑐧𑐖𑐶 𑐨𑐔𑐵 𑐀𑐥𑑂𑐰𑑅 𑐴𑐾 𑐟𑐶 𑑋” 𑐴𑐵𑐎𑐸𑐔𑐵𑑄 𑐎𑐮𑐵𑐩𑑂𑐴𑐾𑐳𑐶𑐟 𑐢𑐵𑐃 𑑋

𑐴𑐵𑐎𑐸𑐔𑐶𑐫𑐵 𑐩𑑀𑐴𑐣𑐶 𑐣𑑂𑐴𑑂𑐫𑑀 𑐗𑐵𑐜𑐵 𑐰𑐣𑐾𑐮𑐵 𑐩𑑄 𑐡𑐸𑐐𑐸 𑐴𑐾 𑐩𑐏𑐸 𑐰 𑐨𑐷𑐩𑐰𑐴𑐵𑐡𑐸𑐬 𑐁𑐧𑐵𑐫𑐵𑐟 𑐩𑐣𑑄 𑐩𑐣𑑄 𑐧𑑂𑐰𑐧𑐶𑐮, 𑐰𑐫𑐵 𑐀𑐧𑐸𑐫𑐵 𑐕𑑂𑐫𑑀𑑄 𑐖𑐵𑐟𑑂𑐬𑐵 𑐢𑐸𑑄𑐎𑐵𑑅 𑐖𑐎 𑐗𑐵𑐜𑐵 𑐔𑑂𑐰𑐫𑑂𑐎𑑅 𑐰𑐫𑑂𑐩𑑂𑐰𑐵𑑅𑐮𑐵 ? 𑐧𑐸𑑃𑐖𑑂𑐫𑐵𑐣𑑄 𑐳𑐶𑐢𑑅 𑐣𑐏𑑅𑐣𑑄 𑐳𑐶𑐢𑑅 𑐰 𑐏𑐶𑐣𑑅𑐩𑑂𑐴 𑐧𑐸𑐬𑐵𑑄 𑐁𑐛𑐥𑐴𑐬𑐷𑐟𑐫𑑂𑐟 𑐢𑐵𑑅𑐳𑐵 𑐔𑑂𑐫𑐵𑐣𑑂𑐴𑐸 𑐧𑐵𑑅𑐕𑐶 𑐀𑐠𑐾𑑄 𑐮𑐶 𑐕𑑂𑐫𑐵𑐫𑑂𑐖𑑂𑐫𑐹 𑑋 𑐄𑐮𑐶 𑐴𑐾 𑐮𑐶𑐕𑑂𑐫𑐵𑐫𑑂𑐐𑐸 𑐏𑑃 𑐩𑐮𑑂𑐴𑐵𑑅𑐳𑐾 𑐩𑐵𑐐𑑅𑐐𑐸 𑐡𑐸𑑅𑐏 𑐧𑑂𑐫𑐹𑐐𑐸𑐮𑐵 𑐠𑑂𑐰 𑐣𑐏𑑅 𑐣𑑂𑐴𑑂𑐫𑑀 𑑋

𑐴𑐵𑐎𑐸𑐔𑐶𑐫𑐵 𑐧𑐵𑐖𑑂𑐫𑐵𑑄 𑐰𑑀𑐳𑐶𑐣𑑀𑐮 𑐕𑐥𑐸𑐫𑐵 𑐧𑐸𑑃 𑐣𑐷𑐥𑐷 𑑒𑑐 𑐬𑑀𑐥𑐣𑐷 𑐧𑐸𑑃 𑐖𑑂𑐫𑐵𑐣𑐵 𑐟𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐧𑑀𑐳𑐶𑐣𑑀𑐮𑐫𑐵 𑐧𑐸𑑃 𑐖𑑂𑐫𑐵𑐣𑐵𑐟𑑅𑐥𑐶𑑄 𑐖𑐸𑐫𑐵 𑐡𑑃𑐫𑑂 𑐡𑑃𑐫𑑂 𑐗𑐵𑐬𑐵 𑐰𑐣𑐾𑐩𑐵𑑅 𑑋 𑐧𑑀𑐳𑐶𑐣𑑀𑐮 𑐢𑐵𑐫𑑂𑐠𑐾𑑄𑐴𑐾 𑐧𑑂𑐫𑑃𑐣𑑀𑐮, 𑐡𑐎𑐬𑑂𑐩𑐶 𑐣𑑀𑐮, 𑐢𑐵𑐳𑐾𑑄𑑃𑐣𑑀𑐮, 𑐣𑐵𑑄𑐫𑐵𑐐𑐸 𑐧𑐸𑑃 𑐖𑑂𑐫𑐵𑐣𑐵𑐔𑑂𑐰𑑄𑐥𑐶𑑄 𑐣𑑄 𑐡𑐸, 𑐀𑐫𑑂𑐳𑐵𑑄 𑐂𑐩𑐶 𑐧𑑀𑐳𑐶𑐣𑑀𑐮, 𑐧𑑂𑐫𑑃𑐣𑑀𑐮𑐥𑐶𑐣𑐶𑐠𑐾𑑄 𑐠𑐵𑐎𑐸𑐎 𑐟𑐵𑐥𑐮𑐾 𑐰𑐣𑐵 𑐠𑐵𑐎𑐸𑐎 𑐖𑑂𑐫𑐵 𑐫𑐵𑑅 𑐰𑐣𑐾𑐩𑑂𑐰𑐵𑑅 𑑋 𑐳𑑂𑐰𑐣𑐶𑐐𑐮𑐫𑑂 𑐴𑐾 𑐔𑑂𑐰𑐣𑐵 𑐖𑑂𑐫𑐵 𑐫𑐵𑐫𑐾 𑐡𑐸 𑑋 𑐡𑐎𑐬𑑂𑐩𑐶 𑐣𑑀𑐮𑐵 𑐧𑐸𑑃 𑐖𑑂𑐫𑐵𑐣𑐵𑐟𑑅𑐥𑐶𑐣𑐶 𑐖𑐸𑐖𑐸𑐫𑐵 𑐡𑐬𑐧𑐵𑐬𑐫𑑂 𑐩𑐬𑑂𑐩𑐟 𑐳𑑄𑐨𑐵𑐬 𑐰 𑐡𑐾𑐐𑑅 𑐦𑐮𑑂𑐔𑐵 𑐩𑐬𑑂𑐩𑐟 𑐫𑐵𑐫𑑂𑐐𑐸 𑐖𑑂𑐫𑐵 𑐫𑐵𑑅𑐳𑐵𑐐𑐵𑑅, 𑐑𑐵𑐳𑐾𑑃𑐣𑑀𑐮𑐫𑐵 𑐧𑐸𑑃 𑐖𑑂𑐫𑐵𑐣𑐵𑐔𑑂𑐰𑑄𑐥𑐶𑐣𑐶 𑐖𑐸𑐖𑐸𑐫𑐵 𑐮𑐴𑐶𑐣𑐵𑐟𑑅𑐥𑐶𑑄 𑐳𑐮, 𑐎𑐶𑐳𑐷𑐫𑐵𑐟 𑐣𑐎𑐾𑐟 𑐑𑐵𑑃𑐫𑑂 𑐟𑐫𑑂𑐫𑐣𑐾𑐐𑐸 𑐖𑑂𑐫𑐵 𑐫𑐵𑑅𑐳𑐵 𑐐𑐵 𑑋 𑐗𑐵𑐜𑐵 𑐰𑐣𑐷𑐥𑐶𑐣𑐶𑐠𑐾𑑄 𑐠𑐵𑐎𑐸 𑐩𑐖𑐹 𑑋 𑐳𑐬𑐎𑐵𑐬𑑄 𑐧𑐸𑑃 𑐖𑑂𑐫𑐵𑐎𑐵 𑐟𑐫𑐵𑐐𑐸 𑐣𑐵𑐩𑑄 𑐖𑐣𑐟𑐵𑐫𑐵𑐟 𑐟𑐳𑐎𑑄 𑐱𑑀𑐲𑐞 𑐫𑐵𑐣𑐵 𑐟𑐮, 𑐖𑐣𑐟𑐵 𑐏𑑂𑐰𑐫𑑂𑐎𑐵 𑐟𑐮 𑑋 𑐖𑐣𑐟𑐵𑐫𑐵𑐟 𑐠𑑂𑐰 𑐀𑐣𑑂𑐫𑐵𑐫 𑐀𑐟𑑂𑐫𑐵𑐔𑐵𑐬 𑐫𑐵𑐣𑐵 𑐟𑑅𑐐𑐸 𑐏𑑅 𑑋 𑐧𑐸𑑃 𑐖𑑂𑐫𑐵𑐎𑐵 𑐟𑐮𑐢𑐫𑐵𑑃 𑐕𑐸 𑐫𑐵𑐫𑐾 𑐖𑑂𑐫𑐵𑐖𑐎 𑐫𑐵𑐫𑑂𑐐𑐸𑐮𑐵 𑐏𑑅𑐣𑐶, 𑐧𑐸𑑃 𑐰𑐂𑐐𑐸 𑐰𑐵 𑐡𑐎𑑂𑐰 𑐄𑐏𑐾 𑐥𑐸, 𑐠𑐸𑐏𑐾 𑐥𑐸 𑐫𑐵𑐣𑐵 𑐴𑐾 𑐦𑐸𑐣𑐵𑐰𑐣𑐷 𑑋 𑐳𑐬𑐎𑐵𑐬𑐫𑐵𑐟 𑐟𑑅𑐳𑐶𑑄 𑐥𑐸, 𑐎𑑁𑐫𑐵𑐟 𑐖𑑂𑐫𑐵𑐨𑑅 𑐥𑐵𑐫𑑂𑐣 𑐟𑐫𑑂𑐎𑐾𑐟 𑐥𑐸, 𑐣𑑁𑐫𑐵𑐟 𑐳𑑃 𑐏𑐵𑐎𑐾𑐐𑐸, 𑐮𑐸𑐳𑐶 𑐢𑑂𑐫𑐣𑐾𑐐𑐸, 𑐳𑐸𑐔𑐶𑐎𑐵𑐬𑐫𑐵𑐟 𑐮𑑃 𑐳𑐸𑐂𑐎𑐾𑐟 𑐥𑐸𑐮𑐾𑐧𑐮𑐫𑑂 𑐧𑐸𑑃 𑐰𑐂𑐐𑐸 𑐰𑐵 𑐕𑐐𑑅 𑐣𑑄 𑐮𑑂𑐫𑐣𑐷 𑐩𑐏𑐸 𑑋 𑐰𑐴𑐾 𑐕𑑂𑐰 𑐣𑐶𑐐𑑅𑐔𑐵 𑐡𑐿𑐐𑐸𑐮𑐶𑑄 𑐢𑐾𑐬 𑐐𑑀𑐬𑐔𑐵 𑐣𑐫𑐵𑑅 𑐡𑑃 𑐎𑐟𑐫𑑂 𑐫𑐵𑐫𑑂𑐩𑐵 𑐕𑐸 𑐡𑐸 𑐢𑐎𑐵𑑅 𑐡𑐸𑑅𑐏 𑐳𑐶𑐫𑐵𑐐𑐸 𑐩𑐹 𑑋

𑐎𑐹𑐕𑐶 𑐨𑑂𑐰𑐫𑑂 𑐥𑑂𑐫𑐣𑑂𑐴𑐹 𑐣𑑂𑐴𑑂𑐫𑑀 𑐴𑐵𑐎𑐸𑐔𑐶𑐟 𑐩𑑄𑐩𑐡𑐸 𑐩𑑄𑐩𑐡𑐸 𑐔𑐶𑐟𑑁𑐣𑐫𑐵 𑐖𑑄𑐐𑐮𑐫𑑂 𑐏𑐟𑐾 𑐫𑐵𑐣𑐵 𑐕𑑂𑐰𑐮 𑑋 𑐧𑐖𑐶 𑐣𑐶𑐦𑐵 𑐳𑑂𑐰𑐦𑐵 𑐐𑐸𑐣𑑂𑐡𑑂𑐬𑐸 𑐕𑐥𑑂𑐰𑑅 𑐖𑑂𑐰𑐣𑐵 𑐗𑐵𑐜𑐵 𑐰𑐣𑐾𑐐𑐸 𑐢𑐎𑐵𑑅 𑐠𑐎𑑂𑐰𑐵𑑅 𑐥𑐵𑐏𑐾 𑐳𑑂𑐰𑐫𑐵 𑐥𑐵𑐳𑐵𑐥𑐶𑑄𑐮𑐶𑐳𑐾𑑄 𑐰𑐣 𑑋 𑐗𑐵𑐜𑐵 𑐰𑐣𑐾𑐐𑐸 𑐖𑑂𑐫𑐵 𑐟𑐳𑐎𑑄 𑐠𑐵𑐎𑐸 𑐖𑑂𑐫𑐵 𑐢𑐿𑐐𑐸 𑐠𑐵𑐎𑐸 𑐩𑐖𑐹𑐐𑐸 𑐕𑐸𑑄 𑐣𑑄 𑐡𑐿𑐩𑐏𑐸 𑐀𑐠𑐾𑐳𑐵𑑄 𑐗𑐵𑐜𑐵 𑐰𑐣𑐾𑐐𑐸 𑐖𑑂𑐫𑐵 𑐢𑐿𑐐𑐸 𑐩𑐾𑐐𑐸 𑐖𑑂𑐫𑐵 𑐳𑐶𑐧𑐫𑑂 𑐫𑐎𑑂𑐰 𑐴𑐾 𑐠𑐵𑐎𑐸 𑐖𑑂𑐫𑐵𑐣 𑐥𑐵𑐣𑐵 𑐖𑐸𑐃𑐩𑐵 𑑋 𑐳𑑂𑐰𑐣𑐶𑐐𑐮𑑄 𑐣𑐶𑐳𑐾𑑄 𑐟𑐬𑐵𑐃𑐫𑐵 𑐖𑑄𑐐𑐮𑐫𑑂 𑐠𑑂𑐫𑑄𑐎 𑐣𑑂𑐫𑐵𑐳𑐶 𑐰𑐣𑐾, 𑐰𑐫𑑂 𑐩𑐵𑑅 𑑋 𑐖𑑄𑐐𑐮𑐫𑑂 𑐫𑐵𑐎𑑅𑐔𑐵 𑐫𑐵𑐎𑑅𑐔𑐵 𑐰𑐣𑐵 𑐳𑐶𑐩𑐵 𑐎𑑀𑐠𑑅 𑐰𑐣𑐾𑐩𑐵, 𑐟𑐶𑐩𑑂𑐩𑐵 𑐳𑐟𑐬𑐶 𑐡𑐫𑑂𑐎𑐵𑑅 𑐎𑐸𑐧𑐶𑐫𑐵 𑐠𑑅𑐥𑐶𑑄 𑐔𑑂𑐰𑐣𑐾𑐠𑐵𑐫𑑂 𑐧𑐮𑐫𑑂 (𑐕𑐵𑐥𑑂𑐬𑑀) 𑐟𑐫𑑂𑐴𑐫𑐾𑐩𑐵𑑅 𑑋 𑐡𑐬𑐧𑐵𑐬 𑐡𑐫𑑂𑐎𑐾𑐟 𑐳𑐶𑑄 𑐐𑐵𑐟 𑐢𑐵𑐮𑐎𑐶 𑐡𑐎𑑂𑐰 𑐳𑐶𑑄 𑐀𑐣𑑄𑐣𑐶𑐳𑐾𑑄 𑐫𑐾𑑃 𑐎𑐵𑐛 𑐐𑑀𑐜𑐵𑐩𑐫𑑂 𑐠𑑂𑐫𑑄𑐎 𑐮𑑂𑐴𑑂𑐫𑐫𑐵 𑐴𑐫𑑂𑐩𑐵𑑅 𑑋 𑐣𑐶𑐩𑑂𑐴 𑐩𑐣𑐹 𑐣𑐵𑐥𑑄 𑐖𑐸𑐂 𑐩𑐖𑑂𑐫𑐹𑐐𑐸 𑐥𑐴𑐵𑐜𑐫𑐵 𑐮𑑃, 𑐟𑐟𑑅𑐴𑐵𑐎𑑅𑐐𑐸 𑐳𑐟𑐬𑐶 𑐗𑐶𑐩𑑂𑐴 𑐗𑐶𑑄𑐣𑐶𑐩𑑂𑐴 𑐩𑐣𑐹 𑐖𑐵𑐣𑐵 𑐎𑐸𑐧𑐸𑐫𑐵 𑐎𑐵𑐛 𑐐𑑀𑐜𑐵𑐩𑐫𑑂 𑐟𑐫𑑂 𑐴𑐫𑑂𑐩𑐵𑑅 𑑋 𑐂𑐮𑐫𑑂 𑐠𑐵𑐳𑐫𑑂 𑐠𑑂𑐫𑐾𑑄𑐎𑐾 𑐩𑐴𑐃 𑐢𑐎𑐵𑑅 𑐁𑐛𑐥𑐴𑐬𑐶 𑐮𑑂𑐫𑐹 𑐮𑑂𑐫𑐹 𑐕𑑂𑐰𑐫𑐵𑐴𑐃 𑑋 𑐟𑑂𑐫𑐵𑐣𑐸𑐮 𑐢𑐎𑐵𑑅 𑐨𑐔𑐵 𑐗𑐵𑐳 𑐮𑑄𑐎𑐾 𑐴𑐾 𑐧𑐶𑐂𑐐𑐸 𑐩𑐏𑐸 𑐔𑐵𑑃𑐜𑐿 𑐴𑐶𑑄𑐜 𑐢𑐎𑐵𑑅 𑐁𑐛𑐥𑐴𑐬𑐶𑐟𑐳𑐾𑑄 𑐟𑑂𑐰𑐵𑑃𑐣𑐵𑐮𑐫𑑂 𑐎𑐟𑑂𑐠𑐶𑑄 𑐡𑐵𑑅𑐰𑐂𑐐𑐸 𑑋 𑐰𑐶𑐬𑑂𑐃 𑐖𑐶𑐎𑑂𑐰 𑐴𑐾 𑐡𑐸𑑅𑐏 𑐧𑐶𑐂𑐐𑐸, 𑐕𑐸𑐫𑐵𑐫𑑂 𑐦𑐳𑐵𑑄 𑐩𑐦𑐸𑐳𑐵𑑄 𑐂𑐩𑐶𑐳𑑄 𑐢𑐵𑑅𑐐𑐸 𑐏𑑃 𑐣𑑂𑐫𑐣𑐾𑐴𑐾 𑐩𑐵𑐮 𑑋 𑐴𑐵𑐎𑐸𑐔𑐵 𑐣𑑂𑐴𑐵𑐥𑐵𑐣𑑄 𑐣𑐶𑐎𑑅 𑐳𑑂𑐰𑐎𑑅 𑐗𑐵𑐜𑐵 𑐰𑐫𑑂 𑐢𑐸𑑄𑐎𑐹𑐩𑑂𑐴 𑐰𑐫𑐵𑐟 𑐖𑑂𑐫𑐵 𑐫𑐵𑐫𑑂𑐐𑐸𑐮𑐶𑐮𑐵 𑐀𑐥𑐵𑐫𑑂𑐳𑐎𑑄 𑐐𑑂𑐫𑐵𑑅𑐠𑐾𑑄 𑐩𑐔𑑂𑐰𑑄 𑑋 𑐀𑐫𑑂𑐳𑐵𑑄 𑐠𑐸𑐐𑐸𑐳𑐷 𑐣𑑂𑐴𑐹𑐣𑑂𑐴𑐹𑐥𑐶𑑄 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐳𑐬𑐴 𑐖𑑂𑐫𑐵𑐫𑐵𑐫𑑂 𑐨𑐔𑐵 𑐠𑐵𑐎𑐸 𑐔𑐵𑐮 𑑋 𑐰 𑐨𑐔𑐵 𑐄𑐩𑐾𑐬 𑐣𑑄 𑐖𑐵𑐫𑑂 𑐢𑐸𑑄𑐎𑐹𑐩𑑂𑐴 𑐣𑑂𑐴𑐵𑐥𑐵 𑐮𑑂𑐫𑐵𑐫𑑂𑐩𑑂𑐴𑐧𑐮𑐫𑑂 𑐠𑐾𑑄 𑐧𑑅𑐮𑐵𑐂𑐐𑐸𑐮𑐵 𑐏𑑃 𑐴𑐾 𑐩𑐡𑐸 𑑋 𑐧𑐵𑐕𑐶 𑐳𑑂𑐰𑐰𑐵𑑅 𑐟𑐎𑐮𑐵 𑐧𑐵𑑃𑐮𑐵𑐎 𑐴𑐾 𑐖𑑂𑐫𑐵 𑐫𑐵𑐟 𑑋 𑐮𑐶𑐥𑐵 𑐖𑐸𑐫𑐵 𑐰𑑅𑐮𑐶𑐳𑐾 𑐖𑑂𑐫𑐵𑐫𑐵𑐫𑑂 𑐨𑐔𑐵 𑐠𑐵𑐎𑐸𑐐𑐸 𑐠𑐾𑑄 𑐖𑐸𑐫𑐵𑐰𑐮 𑑋 𑐴𑐵𑐎𑐸𑐔𑐵𑑄 𑐠𑑅𑐟 𑐨𑐔𑐵 𑐎𑐩𑐖𑑀𑐬 𑐖𑐹𑐐𑐸 𑐟𑐵𑐫𑑂𑐎𑐮 𑑋 𑐧𑑅𑐮𑐵𑐥𑐶𑑄 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐣𑐵𑐥 𑐖𑑂𑐫𑐵𑐫𑐵𑐫𑐾 𑐰𑐫𑐵𑐟 𑐠𑐵𑐎𑐸𑐮 𑑋 𑐰𑐫𑐵𑐟 𑐣𑑂𑐴𑑂𑐫𑐵𑐧𑐮𑐾𑑄 𑐟𑑂𑐫𑐵𑐣𑐸𑐐𑐸 𑐠𑐾𑑄 𑐩𑑂𑐴𑐳𑑂𑐫𑐵𑑅𑐐𑐸 𑐟𑐸𑐟𑐶 𑐳𑑂𑐫𑐵𑑅𑐠𑐾𑑄 𑐔𑑂𑐰𑐣𑐵𑐰𑐮 𑑋 𑐣𑐫𑐾𑐟𑑂𑐰𑐣𑐾𑐐𑐸 𑐐𑐟𑐶𑐮𑐵𑑅𑐐𑐸 𑐡𑐸𑐐𑐸 𑐩𑐏𑐸 𑑋 𑐰𑐴𑐾 𑐄𑐳𑐶𑐣𑐵 𑐖𑐵𑐎𑐶𑐫𑐵 𑐖𑐵 𑐣 𑐟𑐬𑐎𑐵𑐬𑐶 𑐣 𑐀𑐔𑐵𑐬, 𑐩𑐮𑑂𑐟𑐵 𑐕𑐐𑑅𑐴𑐾 𑐥𑐵𑐳𑐵𑐥𑐶𑐣𑑂𑐳𑑄 𑐮𑐵𑐎𑐵 𑐣𑐃 𑐢𑐎𑐵𑑅 𑐩𑐏𑑄𑐎 𑐳𑐸𑐔𑐸𑐎𑐵 𑐣𑐫𑑂𑐩𑐵𑑅 𑑋 𑐀𑐖𑐵𑑅𑐐𑐸 𑐏𑐵𑐣𑐵 𑐣𑐫𑐵𑑅 𑐐𑐣 𑐧𑑅𑐮𑐵𑐃 ? 𑐖𑐶𑐰𑑄 𑐩𑐦𑐸𑐳𑐵 𑐨𑐵𑐃 𑐳𑐬𑐴 𑐖𑑂𑐫𑐵𑐫𑐵𑐫𑑂 𑐩𑐵𑑅𑐐𑐸𑐮𑐶𑑄 𑐴𑐵𑐎𑐸𑐔𑐵 𑐖𑑂𑐰𑐬 𑐰𑐫𑑂𑐎𑐮 𑑋 𑐖𑑂𑐫𑐵𑐫𑑂 𑐰𑐣𑐾 𑐟𑑂𑐫𑑅𑐎𑐵𑐟𑐎 𑐴𑐵𑐎𑐸𑐔𑐵 𑐡𑐣𑐵 𑐩𑐰𑑅𑐐𑐸𑐮𑐶𑑄 𑐥𑐵𑐳𑐵𑐩𑑂𑐴 𑐴𑐵𑐎𑐸𑐔𑐶𑐟 𑐳𑑂𑐰𑑅𑐰𑐣, 𑐴𑐵𑐎𑐸𑐔𑐵𑐮𑐵 𑐦𑐵𑑃𑐐𑐵𑑄 𑐟𑑂𑐰𑐥𑐸𑐫𑐵 𑐡𑑂𑐫𑑅𑐰𑑅𑐩𑑂𑐴 𑐠𑐾𑑄 𑐏𑐵𑐣𑐵𑐔𑑂𑐰𑐣 𑑋 𑐥𑐵𑐳𑐵𑐩𑑂𑐴 𑐴𑐵𑐎𑐸 𑐡𑐵𑐃 𑐖𑑂𑐰𑐬 𑐰𑐫𑑂𑐎𑐵 𑐔𑑂𑐰𑐣 𑐢𑐎𑐵 𑐧𑑀𑐳𑐶 𑐣𑐵𑐫𑑅 𑐳𑑅𑐟𑐵𑐴𑐮 𑑋 𑐣𑐵𑐫𑑅 𑐣𑑄 𑐴𑐵𑐎𑐸𑐔𑐶𑐫𑐵 𑐏𑑂𑐰𑐵𑑅 𑐳𑑂𑐰𑐫𑐵 𑐠𑑂𑐰𑐫𑐵𑐟 𑐍𑑄𑐮𑐶𑑄 𑐎𑐮, 𑐁 𑐠𑑂𑐰 𑐠𑐣 𑐖𑑂𑐫𑐵𑐫𑐵𑐫𑑂 𑐦𑐂𑐩𑐏𑐸𑐟, 𑐠𑑂𑐰𑐫𑐵𑐟 𑐕𑐾𑑃𑐫𑑂 𑐧𑑂𑐰𑐣𑐵 𑐫𑑄𑐎𑐷 𑐰𑐵𑐳𑑅 𑐫𑐵𑐫𑑂 𑐫𑑄𑐎𑐷 𑐢𑐵𑐮 𑑋 𑐠𑑁𑑄 𑐴𑐾 𑐧𑑂𑐰𑐣𑐵𑑄 𑐫𑑄𑐎𑐷 𑐰𑐫𑐵𑐟 𑐕𑐾𑑃𑐫𑑂, 𑐕𑐾𑑃𑐫𑑂 𑐰𑐣𑐵 𑐧𑐵𑐵𑑄𑐮𑑅𑐩𑑂𑐴 𑐧𑐿𑐡𑑂𑐫 𑐎𑑂𑐫𑐣𑐵 𑐰𑐵𑐳𑑅 𑐫𑐵𑐎𑐶 𑐎𑐵 𑐮𑐶𑐧𑐵𑐎𑐵 𑐔𑑂𑐰𑐣𑐾𑐩𑐟𑐾 𑐴𑐸𑑃 𑐕𑐶𑐩𑐶 𑐣𑐶𑐩𑑂𑐴 𑑋 𑐮𑑃𑐫𑑂 𑐰𑑄𑐰𑑄 𑐰𑐫𑐵𑐟 𑐠𑐵𑐎𑐸𑐫𑐵 𑐰𑐮 𑐢𑐵𑑅𑐳𑐵 𑐨𑐬𑐶𑐫𑐵 𑐟𑐫𑐵 𑐎𑐸𑐧𑐸𑐂𑐎𑐵 𑐫𑑄𑐎𑐷 𑐣𑐵 𑐠𑑂𑐰 𑐗𑐶𑐟𑐎𑐵 𑐡𑐵𑑃 𑐢𑐎𑐵𑑅 𑐗𑐶𑐟𑐎𑐵 𑐡𑐵𑑃 𑐮𑑃 𑐏𑐬𑑂𑐔 𑐧𑐶𑐫𑐵 𑐧𑑀𑐳𑐶 𑐣𑐵𑐫 𑐖𑑂𑐫𑐵𑐫𑑂 𑐰𑐣 𑑋

𑐴𑐵𑐎𑐸𑐔𑐶𑐟 𑐨𑐬𑐶𑐫𑐵𑑄 𑐡𑑀𑐎𑐫𑑂 𑐟𑐫𑐵𑑅 𑐎𑐸𑐧𑐸𑐫𑐵 𑐕𑐾𑑃 𑐟𑐫𑑂𑐴𑐮 𑐳𑐣𑐾𑐴𑐾 𑐩𑐦𑐸𑐩𑑂𑐴 𑐨𑐵𑐟𑐫𑐵𑐟 𑐜𑑀𑐎𑐫𑑂 𑐟𑐫𑐵 𑐎𑐸𑐧𑐸𑐫𑐵 𑐕𑐾𑑃 𑐕𑐫𑑂 𑐴𑑅𑐐𑐸 𑐏𑑃𑐧𑐮𑐫𑑂 𑐴𑐵𑐎𑐸𑐔𑐶𑐫𑐵 𑐎𑐮𑐵 𑐴𑐹 𑐴𑐹 𑐏𑑂𑐰𑐮 𑑋 𑐕𑐸 𑐖𑐸𑐮 𑐕𑐣𑑂𑐟 𑐴𑐾 𑐨𑐐𑐰𑐵𑐣 𑐢𑐎𑐵𑑅 𑐑𑐫𑑂𑐥𑐣𑐵 𑐏𑑂𑐰𑐮 𑑋 𑐴𑐵𑐎𑐸𑐔𑐶𑐫𑐵 𑐎𑐮𑐵 𑐏𑑂𑐰𑑅𑐐𑐸 𑐳𑑅 𑐟𑐵𑐫𑐵 𑐏𑑀𑐣𑐵 𑐟𑐩𑐵 𑐕𑐵𑐫𑑂 𑐏𑑂𑐰𑐫𑐵𑐐𑐸 𑐨𑐩𑑂𑐔𑐵 𑐕𑐸 𑐖𑐸𑐮 𑐢𑐎𑐵𑑅 𑐩𑐵𑐟𑐣𑐫𑑂 𑐠𑐵𑐴𑐵𑑃𑐰𑐮 𑑋 𑐳𑑂𑐰𑐬𑐾 𑐟𑑅𑐩𑐵𑑄 𑐰 𑐗𑐵𑐜𑐵 𑐰𑑄𑐩𑑂𑐴 𑐕𑐸 𑐖𑐸𑐂𑐎𑐵 𑐰𑑅𑐐𑐸 𑐡𑐣𑐾 𑐴𑐾 𑐩𑐦𑐸, 𑐮𑑂𑐴𑐵 𑐟𑐸𑐟𑐶 𑐕𑐎 𑐳𑑂𑐰𑐬𑐾 𑐢𑐎𑐵𑑅 𑐴𑐵𑐎𑐸𑐔𑐶𑐫𑐵 𑐮𑐶𑐎𑑂𑐎 𑐫𑐣 𑑋 𑐴𑐵𑐎𑐸𑐔𑐶𑐫𑐵 𑐩𑐶𑐏𑐵 𑐡𑐸𑐴𑐵𑑃𑐰𑑄𑐐𑐸 𑐎𑐥𑐵 𑐣𑑂𑐴𑑂𑐫𑐵𑑅𑐰𑑅𑐐𑐸 𑐏𑑂𑐰𑐵𑑅 𑐏𑐣𑐾𑐰𑑄 𑐴𑐾 𑐏𑑀𑐣𑐵 𑐟𑐩𑐵𑑄𑐣𑑄 𑐠𑑂𑐰𑐫𑐵𑐟 𑐍𑐮𑐶 𑐎𑐮 𑐢𑐵𑐮 𑑋 𑐎𑐮𑐵𑐩𑑂𑐴𑐾𑐳𑐶𑐟 𑐫𑐵𑐎𑐣𑑄 𑐳𑐵𑐣𑐸𑐔𑐵 𑐰𑐿𑐡𑑂𑐫 𑐳𑑅𑐟𑐵 𑐴𑐫𑐵𑑅 𑐎𑑂𑐫𑐣𑐾𑐴𑐶𑑄 𑐢𑐵𑐮 𑑋 𑐦𑐕𑐶𑑄𑐦𑐎𑑂𑐰 𑐫𑐵𑐎𑐣𑑄 𑐰𑐵𑐳𑑅 𑐫𑐵𑐫𑐾𑐩𑐵, 𑐠𑑂𑐰 𑐍𑐮𑐵𑐮𑐶 𑐮𑑂𑐰𑐫𑑂 𑐢𑐿𑐐𑐸 𑐐𑑂𑐫𑐵𑐣𑐵𑐥𑐸𑐐𑐸 𑐮𑑂𑐰𑐫𑑂 𑑋 𑐴𑐸𑑃 𑐫𑐵𑐎𑐣𑑄 𑐳𑐵𑐣𑐸𑐔𑐵 𑐰𑐿𑐡𑑂𑐫 𑐳𑑅𑐟𑐵𑐴𑐶𑑄, 𑐖𑐶𑑄 𑐠𑐣 𑐳𑑂𑐰𑐩𑑂𑐴 𑐀𑐖𑐶𑐩𑐵𑐥𑐶𑐣𑐶 𑐣𑐵𑐩𑑄 𑐖𑐵𑐎𑐶 𑐨𑐵𑐐𑐫𑐵𑐎𑐵 𑐟𑐫𑑂, 𑐎𑐣𑑂𑐴𑐾𑐎𑑃𑐳 𑐕𑑄𑐮𑐵𑐃𑐧𑐮𑐾 𑐳𑑂𑐰𑐩𑑂𑐴 𑐀𑐖𑐶𑐩𑐵𑐫𑐵𑐠𑐵𑐫𑑂 𑐎𑐮𑑅 𑐰𑐣𑐵𑐧𑑂𑐫𑐹 𑑋 𑐀𑐠𑐾𑑄 𑐎𑑂𑐰𑐮𑐵𑐣𑐵 𑐰𑐣𑐶 𑐢𑐣𑑂𑐡𑐵 𑐎𑐵𑐫𑑂𑐩𑑂𑐰𑐵𑑅 𑐢𑐎𑐵𑑅 𑐗𑑂𑐫𑐵𑐦𑐮𑐫𑑂 𑐔𑑂𑐰𑑄𑐐𑐸 𑐴𑐸𑐏𑐵 𑐎𑐫𑐵 𑐧𑐖𑐵𑑄 𑐟𑑂𑐰𑐣 𑑋 𑐴𑐵𑐎𑐸𑐔𑐶𑐫𑐵 𑐎𑐮𑐵 𑐧𑑂𑐰𑐵𑑃𑐫𑑂 𑐧𑑂𑐰𑐵𑑃𑐫𑑂 𑐰𑐿𑐡𑑂𑐫 𑐳𑐟𑑅 𑐰𑐣 𑑋

𑐳𑐵𑐣𑐸𑐔𑐵 𑐰𑐿𑐡𑑂𑐫 𑐰𑐮 𑑋 𑐦𑐸𑐦𑐵 𑐫𑐵𑐣𑐵 𑐗𑐵𑐜𑐾 𑐫𑐵𑐣𑐵 𑐰𑐵𑐳𑑅 𑐣𑐎𑐾𑐐𑐸 𑐧𑐶𑐫𑐵 𑐔𑑂𑐫𑐵𑐣𑑂𑐴𑐸 𑐡𑐃𑐧𑐮𑐫𑑂 𑐎𑑂𑐰𑐮𑐵𑐣𑐵 𑐰𑐣𑐶 𑐢𑐫𑐵𑐰𑐣 𑑋 𑐏𑑀𑐣𑐵 𑐟𑑅𑐩𑐵𑑄 𑐣𑑄 𑐨𑐵𑐐𑐶 𑐫𑐵𑐎𑐵 𑐟𑑅𑐐𑐸 𑐖𑐵𑐎𑐶 𑐟𑐫𑐵𑑅 𑐳𑑂𑐰𑐩𑑂𑐴 𑐀𑐖𑐶𑐩𑐵𑑄𑐫𑐵𑐠𑐵𑐫𑑂 𑐣𑑄 𑐎𑐮𑑅 𑐰𑐣𑐵 𑐧𑐶𑐮 𑑋 𑐀𑐫𑑂𑐳𑐵𑑄 𑐴𑐵𑐎𑐸𑐔𑐶𑐫𑐵 𑐮𑑂𑐰𑐫𑑂 𑐎𑑂𑐰𑐮𑐵𑐐𑐸 𑐩𑐏𑐸 𑐗𑐣 𑐗𑐣 𑐐𑑄𑐳𑐶𑐖𑐸𑐫𑐵 𑐰𑐣, 𑐮𑑂𑐴𑐵𑑅𑐟𑐸𑐟𑐶 𑐎𑐠𑐶𑐠𑐾𑑄, 𑐨𑑄𑐐𑑅 𑐕𑐐𑑅 𑐖𑐎 𑐢𑐶𑐩𑐾𑐠𑐾𑑄 𑐦𑐸𑐮𑐫𑑂 𑐖𑐸𑐫𑐵𑐔𑑂𑐰𑐣 𑑋 𑐳𑐸𑐣𑐵𑑄 𑐕𑐸 𑐫𑐵𑑅𑐳𑐵 𑐮𑑂𑐰𑐫𑑂 𑐎𑑂𑐰𑐮𑐵𑐃 𑐢𑐵𑐮 𑐀𑐠𑐾𑐴𑐾 𑐫𑐵𑐣𑐵𑐔𑑂𑐰𑐣 𑑋 𑐐𑐸𑐮𑐶 𑐡𑑂𑐫𑑅 𑐥𑐸𑐖𑐵 𑐫𑐵𑐣𑐵𑐧𑐶𑐮, 𑐐𑐸𑐮𑐶 𑐧𑑁 𑐟𑐫𑐵𑐖𑐸𑐮 𑑋 𑐩𑑂𑐴𑐳𑑂𑐫𑐹 𑐳𑑂𑐫𑐹𑐥𑐶𑑄 𑐰𑐿𑐡𑑂𑐫 𑐎𑑂𑐫𑐣𑐾 𑐴𑐮 𑐄𑐮𑑂𑐟𑐶 𑐣𑐎𑐮, 𑐍𑐮𑐶 𑐎𑑅𑐐𑐸 𑐢𑐎𑐵𑑅 𑐏𑐵𑐮𑐸 𑐟𑑂𑐰𑑄𑐎𑐮, 𑐳𑐶𑐎𑑄 𑐠𑐶𑐫𑐵𑐟𑑅𑐐𑐸𑐮𑐶𑑄 𑐐𑑄𑐳𑐶 𑐖𑐸𑐫𑐵𑐰𑑄𑐐𑐸 𑐢𑐎𑐵𑑅 𑐡𑐶𑐥𑐫𑑂 𑐖𑐵𑐫𑐵𑐩𑑂𑐴 𑐩𑐣𑐹 𑐖𑑂𑐫𑐵𑐣𑐵 𑐧𑑁𑐟𑐫𑑂 𑐫𑐣 𑑋 𑐮𑑂𑐰𑐫𑑂𑐢𑐵𑑅𑐳𑐵 𑐎𑑂𑐰𑐮𑐵𑑅𑐐𑐸 𑐴𑐾 𑐩𑐏𑐸, 𑐴𑐵𑐎𑐸𑐔𑐶𑐫𑐵 𑐎𑐮𑐵𑐫𑐵 𑐣𑐶𑐟𑑂𑐰𑐮𑐵𑐫𑐵 𑐳𑐸𑐬𑐵𑐃 𑐰 𑐣𑐶𑐟𑑂𑐰𑐮𑐵𑐫𑐵 𑐮𑐸𑑃𑐫𑐵 𑐚𑐸𑐎𑐶 𑐩𑐶𑐫𑐵𑑅 𑐰𑐵𑐳𑑅 𑐫𑐵𑐫𑐾 𑐢𑐸𑑄𑐎𑐮 𑑋 𑐀𑐗𑐣𑑄 𑐮𑑂𑐰𑐫𑑂 𑐎𑑂𑐰𑐮𑐵𑑅𑐐𑐸 𑐩𑐏𑐸 𑑋 𑐴𑐵𑐎𑐸𑐔𑐵 𑐩𑑂𑐰𑐵𑐃 𑐢𑐿𑐐𑐸 𑐳𑑂𑐰𑐫𑐵𑑄 𑐴𑐾 𑐁𑐱𑐵 𑐩𑐣𑑂𑐟 𑑋 𑐁𑐏𑐶𑐬𑐾 𑐫𑐵𑐣𑐵 𑐫𑐵𑐣𑐵𑐐𑐸 𑐰𑐵𑐳𑑅𑐮𑑄 𑐩𑐠𑐶𑐫𑐵𑑅 𑐴𑐵𑐎𑐸𑐔𑐵𑑄 𑐦𑐵𑐐𑐸 𑐥𑐸𑐣𑑂𑐴𑐶 𑐏𑐸𑐣𑑂𑐴𑐸 𑐠𑑅𑐐𑐸 𑐥𑑂𑐬𑐵𑐞 𑐟𑑂𑐰𑐟𑐵𑑅 𑐠𑑂𑐰 𑐳𑑄𑐳𑐵𑐬𑑄 𑐰𑐶𑐡𑐵 𑐎𑐫𑐵𑑅𑐰𑐣 𑑋 𑐬𑐵𑐞𑐵 𑐱𑐵𑐳𑐣𑐫𑐵 𑐥𑐵𑐮𑐫𑑂 𑐴𑐵𑐎𑐸𑐔𑐵𑐠𑐾𑑄 𑐖𑑂𑐫𑐵𑑅𑐥𑐶𑑄 𑐳𑐮𑑄𑐳𑑅 𑐩𑐣𑐹𑐟 𑐗𑐵𑐜𑐵 𑐰𑐣𑐵 𑐳𑐶𑐂𑐥𑐶𑑄 𑐡𑐸 𑑋 𑐐𑐸𑐮𑐶𑑄 𑐳𑐶𑐩𑐵 𑐎𑑂𑐰𑐠𑑅𑐧𑐮𑐫𑑂 𑐳𑐶𑐩𑐵𑑄 𑐮𑑂𑐴𑐵𑐣𑐵𑑅 𑐳𑐶𑐂𑐥𑐶𑑄, 𑐐𑐸𑐮𑐶𑑄 𑐳𑐶𑑄𑐐𑑂𑐰𑐮𑑄 𑐮𑑂𑐴𑐵𑐣𑐵 𑐳𑐶𑐂𑐥𑐶𑑄, 𑐐𑐸𑐮𑐶𑑄 𑐳𑐟𑐬𑐶 𑐎𑐸𑐧𑐶𑐫𑐵 𑐳𑑂𑐰𑐣𑐶𑐐𑐮𑐫𑑂 𑐟𑑅𑐰𑑅𑐧𑐮𑐫𑑂 𑐥𑐴𑐵𑐜𑑄 𑐎𑐸𑐟𑐸𑑄 𑐰𑐣𑐵 𑐳𑐶𑐂𑐥𑐶𑑄, 𑐐𑐸𑐮𑐶 𑐴𑐵𑐎𑐸𑐔𑐵𑐠𑐾𑑄 𑐍𑐮𑐶 𑐎𑐫𑐵𑑅 𑐳𑐶𑐂𑐥𑐶𑑄 𑑋 𑐠𑐸𑐮𑐶 𑐳𑐶𑐟 𑐄𑐮𑐶 𑐳𑐶𑐟 𑐢𑐿𑐐𑐸 𑐮𑑂𑐫𑐵𑐔𑐵𑑅 𑐴𑐾 𑐩𑐡𑐸 𑑋 𑐐𑐬𑐶𑐧 𑐳𑐶𑐟 𑐢𑑂𑐰𑑄 𑐳𑐶𑐂𑐐𑐸𑐮𑐵, 𑐏𑐶𑐔𑐵 𑐳𑐶𑐂𑐐𑐸𑐮𑐵 𑐳𑑂𑐰𑐫𑐵𑐟 𑐩𑐟𑐮𑐧 𑐩𑐡𑐸 𑑋 𑐂𑐩𑐶𑐟 𑐮𑐵 𑐖𑑂𑐫𑐵 𑐩𑐵𑑅𑐐𑐸 𑐡𑐸, 𑐖𑑂𑐫𑐵 𑐫𑐵𑐫𑑂 𑐦𑐟𑐮𑐾 𑐎𑐵𑐮, 𑐳𑐶𑐟𑑄 𑐕𑐾𑑃𑐫𑑂 𑐥𑐬𑐶𑐰𑐵𑐬𑐫𑐵𑐟 𑐑𑑅𑐳𑐸 𑐫𑐵𑐫𑑂𑐟 𑐴𑐾 𑐢𑐾𑐧𑐵 𑐕𑐐𑑅 𑐩𑐧𑑂𑐫𑐹𑐳𑐾 𑐏𑑂𑐰𑐫𑑂𑐎𑐵 𑐕𑑂𑐰𑐟 𑑋 𑐰𑐴𑐾 𑐏𑑂𑐰𑐫𑑂𑐎𑐵 𑐕𑑂𑐰𑑅𑐥𑐶𑐣𑐶 𑐁𑐟𑑂𑐩𑐵𑑄 𑐱𑑂𑐬𑐵𑐥 𑐧𑑂𑐫𑐹𑐐𑐸 𑐐𑑂𑐫𑐮𑐵𑑅 𑐁𑐏𑐶𑐬𑐾 𑐬𑐵𑐞𑐵 𑐱𑐵𑐳𑐣𑐫𑐵 𑐥𑐟𑐣 𑐖𑐸𑐫𑐵𑐰𑐣 𑑋 𑐣𑐵𑐥 𑐣𑐵𑐥𑑄 𑐗𑐵𑐜𑐵 𑐰𑐣𑐾𑐐𑐸 𑐖𑑂𑐫𑐵 𑐣𑑄 𑐰𑑄𑐡 𑐖𑐸𑐫𑐵𑐰𑐣 𑑋