𑐡𑐎𑑂𑐎𑐮𑐾 𑐣𑑂𑐴𑐵𑐥𑐵𑑄 𑐧𑐵𑐏𑑄 𑐣𑑂𑐫𑐣𑐾𑐰𑐵 𑐀𑐨𑐶𑐫𑐵𑐣 𑐏𑐮𑑅𑐫𑐵𑐟 𑐎𑐶𑐥𑐸𑐮𑐶𑐂 𑐮𑐳𑐎𑐸𑐳 𑐡𑐸, 𑐠𑑂𑐰 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐵𑑅 𑐡𑐶𑐂𑐐𑐸𑐫𑐵𑐟 𑐁𑐥𑐵𑑅𑐁𑐥𑐮𑑄 𑐳𑐸𑐨𑐵𑐫𑑂 𑐣𑑄 𑐡𑐸 𑑋

𑐠𑑁𑑄 𑐗𑐷, 𑐣𑐾𑐥𑐵𑑅𑐫𑐵 𑐕𑐐𑐹 𑐥𑑂𑐬𑐵𑐔𑐷𑐣 𑐰 𑐋𑐟𑐶𑐴𑐵𑐳𑐶𑐎 𑐱𑐴𑐬 𑐎𑐶𑐥𑐹𑐫𑐵 𑐡𑐎𑑂𑐎𑐮𑐾 𑐔𑑂𑐰𑐫𑑂𑐮𑐵𑑅𑐐𑐸 𑐎𑑂𑐰𑐵𑑅𑐔𑑂𑐰 𑐀𑐬𑑂𑐠𑐵𑐟𑑂 𑐎𑑂𑐰𑐵𑐠𑐔𑑂𑐰𑐫𑑂 𑐩𑐴𑐵𑐡𑑂𑐫𑑅–𑐥𑐵𑐬𑑂𑐰𑐟𑐷 𑐡𑐾𑐐𑑅𑐫𑐵 𑐩𑐸𑐮𑐫𑑂 𑐧𑐵𑐏𑑄 𑐣𑑂𑐫𑐣𑐾𑐎𑐣𑐾 𑐫𑐵𑐫𑐾𑐟 𑐩𑐸𑐣𑐵𑑅 𑐔𑑂𑐰𑐣𑐵 𑑋 𑐧𑐵𑐏𑑄 𑐣𑑂𑐫𑐣𑐾𑐎𑐣𑐾 𑐫𑐵𑐫𑐾𑐫𑐵 𑐣𑑂𑐴𑑂𑐫 𑐧𑐵𑐏𑑄 𑐕𑐸 𑐏𑑅? 𑐕𑐵𑐫𑑂 𑐣𑑂𑐫𑐣𑐾𑐎𑐣𑐾 𑐩𑐵𑐮 ? 𑐐𑐠𑐾 𑐐𑐸𑐎𑐠𑑄 𑐢𑐂𑐐𑐸 𑐕𑐟𑑂𑐰𑐵𑐔𑐵 𑐏𑑃 𑐣𑑂𑐴𑑂𑐫𑐠𑐣𑐾 𑑋

𑐧𑐵𑐏𑑄 𑐕𑐸 𑐏𑑅 𑐢𑐵𑐫𑐾𑐧𑐮𑐫𑑂 𑐧𑐵𑐏𑑄 𑐥𑐸𑐮𑐵𑑄𑐐𑐸 𑐑𑐚𑑂𑐣𑐵𑐫𑐵 𑐧𑐶𑐰𑐬𑐞 𑐏𑑅, 𑐳𑐩𑐵𑐖 𑐳𑐵𑐥𑐎𑑂𑐲 𑐎𑐵𑐮𑑂𑐥𑐣𑐶𑐎 𑐣𑑄 𑐖𑐸𑑄𑐂 𑐦𑐸 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐧𑐵𑐏𑑄 𑐥𑑂𑐬𑐵𑐎𑐺𑐟𑐶𑐎 𑐱𑐎𑑂𑐟𑐶 𑐰 𑐢𑐵𑐬𑑂𑐩𑐶𑐎 𑐁𑐳𑑂𑐠𑐵𑐫𑐵𑐟 𑐧𑑅𑐎𑐫𑐵𑐟𑑅𑐐𑐸 𑐡𑐸 𑑋 𑐧𑐵𑐏𑑄 𑐕𑐵𑐫𑑂 𑐣𑑂𑐫𑐣𑐾𑐎𑐣𑐾 𑐩𑐵𑐮 𑐢𑐵𑐫𑐾𑐧𑐮𑐫𑑂 𑐥𑐸𑐮𑐵𑑄𑐐𑐸 𑐏𑑃 𑐳𑐶𑐂𑐎𑐾𑐟, 𑐳𑐶𑐂𑐎𑐵𑑅 𑐠𑐸𑐂𑐎𑐵𑑅 𑐧𑐵𑑄𑐮𑐵𑑅𑐐𑐸 𑐐𑑁𑐬𑐩𑐫 𑐂𑐟𑐶𑐴𑐵𑐳 𑐩𑑂𑐰𑐵𑐎𑐵𑑅 𑐟𑐫𑐾𑐟 𑐏𑑅 𑑋 𑐧𑐵𑐏𑑄 𑐐𑐠𑐾 𑐐𑐸𑐎𑐠𑑄 𑐩𑑂𑐰𑐵𑐎𑐵𑑅 𑐟𑐫𑐾 𑐢𑐵𑐫𑐾𑐧𑐮𑐫𑑂 𑐥𑐸𑐮𑐵𑑄𑐐𑐸 𑐧𑐵𑐏𑑄 𑐣𑑂𑐫𑐣𑐾𑐎𑐣𑐾 𑐫𑐵𑐫𑐾𑐐𑐸, 𑐧𑐵𑐏𑑄𑐫𑐵 𑐥𑑂𑐫𑐵𑐏𑑃 𑐡𑐫𑐾𑐎𑐾𑐐𑐸, 𑐔𑐶𑐟𑑂𑐬 𑐔𑑂𑐰𑐫𑐾𑐐𑐸 𑐩𑐹𑐬𑑂𑐟𑐶 𑐡𑐫𑐾𑐎𑐾𑐐𑐸, 𑐮𑐶𑐥𑐶𑐰𑐡𑑂𑐢 𑐫𑐵𑐫𑐾𑐐𑐸 𑐠𑑁𑑄𑐫𑐵 𑐧𑐿𑐖𑑂𑐘𑐵𑐣𑐶𑐎 𑐥𑑂𑐬𑐰𑐶𑐢𑐶𑐫𑐵 𑐂𑐮𑐫𑑂 𑐦𑐶𑐮𑐶𑐩 𑐡𑐾𑐫𑐾𑐎𑐾𑐐𑐸 𑐏𑑅 𑑋 𑐠𑐸𑐐𑐸 𑐴𑐾 𑐖𑑂𑐫𑐵𑐗𑑂𑐰𑑅𑐎𑐠𑑄 𑐁𑑅 𑐗𑐷 𑐧𑐵𑐏𑑄 𑐣𑑂𑐫𑐣𑐾𑐎𑐣𑐾 𑐫𑐵𑐫𑐾 𑐟𑑂𑐫𑐣𑐵 𑑋 𑐠𑑁𑑄𑐫𑐵 𑐧𑐵𑐏𑑄 𑐣𑑂𑐫𑐣𑐾 𑐰𑐵 𑐖𑑂𑐫𑐵𑐗𑑂𑐰𑐮𑐫𑑂 𑐖𑐶𑐟 𑐧𑐶𑐫𑐵𑐟𑑅𑐐𑐸 𑐰𑐶𑐲𑐫 𑐏𑑅 𑐠𑐵𑐫𑑂𑐫𑐵 𑐣𑐵𑑄

𑐖𑐶𑑄 𑐣𑑄 𑐀𑐖𑐵–𑐀𑐖𑐶𑐥𑐶𑑄𑐥𑐵𑐏𑐾𑑄, 𑐟𑑂𑐰𑐵𑑅 𑐧𑐴𑐵𑐮𑐫𑑂 𑐣𑑂𑐫𑐣𑐵𑐟𑐫𑐵𑐐𑐸, 𑐳𑐥𑐹m 𑐧𑑂𑐰𑐣𑐵𑐐𑐸𑐫𑐵𑐟 𑐧𑑅𑐎𑐫𑐵𑑅 𑐎𑐶𑐥𑐹𑐫𑐵 𑐠𑐷𑐠𑐷 𑐣𑐵𑑄 𑐕𑐸𑐣𑐵𑐟𑑅𑐐𑐸 𑐰𑐵𑐬𑐾𑐫𑐵 𑐧𑐵𑐏𑑄 𑐎𑐣𑐾 𑐟𑑂𑐫𑐣𑐵 𑑋 𑐡𑑂𑐰𑑄𑐰𑐶𑐡𑑂𑐰𑑄 𑐎𑑂𑐲𑐾𑐩𑐵 𑐫𑐵𑐣𑐵𑑅 𑐡𑐶𑐳𑑃 𑑋

𑐠𑑂𑐰 𑐠𑐵𑐫𑑂𑐫𑐵 𑐣𑐵𑑄 𑐎𑐫𑐵𑑅 𑐴𑐵𑐮𑐵𑐟𑑅𑐐𑐸 𑐁𑐖𑐸𑐡𑑂𑐫𑑅𑐫𑐵 𑐕𑐥𑐹 𑐥𑐸𑐮𑐵𑑄𑐐𑐸 𑐨𑐖𑐣𑐫𑐵𑐥𑐵𑐏𑐾𑑄 𑐳𑐸𑐬𑐸 𑐫𑐵𑐫𑐾 ¬–

𑐴𑐾 𑐖𑐫 𑐖𑐫 𑐧𑐵𑐑𑐨𑐿𑐬𑐰 𑐕𑐶𑐎𑐾 𑐳𑐾𑐰𑐵, 𑐴𑐾 𑐀𑐟𑐶 𑐣𑑄 𑐨𑐵𑐫𑐵𑐣𑐎 𑐏𑑂𑐰𑐵𑐮 𑐰𑐵𑑄𑐏𑐵𑐳𑐾 𑐡𑐶𑐮 𑐬𑐾 𑐥𑑂𑐬𑐨𑐸 𑐰𑐵𑑄𑐏𑐵𑐳𑐾 𑐡𑐶𑐮 𑐬𑐾
𑐴𑐾 𑐨𑐶𑐣 𑐨𑐶𑐣 𑐮𑑀𑐎 𑐨𑐶𑐣 𑐨𑐶𑐣 𑐮𑑀𑐎 𑐠𑐶𑐟𑐶 𑐀𑐟𑐶 𑐎𑐴𑐮 𑐖𑐵𑐎 𑐣𑐵𑐩 𑑑
𑐴𑐾 𑐥𑐡𑑂𑐩 𑐎𑐳𑑂𑐟𑐥𑐸𑐬𑐷 𑐡𑐾𑐱 𑐀𑐟𑐶 𑐳𑑂𑐰𑐨𑐵 𑐮𑐵𑐎 𑐬𑐾 𑐴𑐾 𑐥𑑂𑐬𑐨𑐸 𑐀𑐟𑐶 𑐳𑑂𑐰𑐨𑐵 𑐮𑐵𑐎 𑐬𑐾

𑐥𑐬𑐵𑐥𑐹𑐬𑑂𑐰 𑐎𑐵𑐮𑐫𑑂 𑐳𑑂𑐰𑐣𑐶𑐐𑑅 𑐀𑐬𑑂𑐠𑐵𑐟𑑂 𑐎𑐵𑐛𑐩𑐵𑐜𑑁𑑄 𑐄𑐥𑐟𑑂𑐫𑐎𑐵 𑐕𑐐𑐹 𑐟𑑅𑐢𑑄𑐐𑐸 𑐥𑐸𑐏𑐹 𑐏𑑅 𑑋 𑐄𑐐𑐸 𑐥𑐸𑐏𑐹𑐮𑐶𑐂 𑐄𑐐𑐸 𑐃 𑐢𑐵𑐂 𑐳𑐟𑑂𑐫𑐫𑐹𑐐𑐫𑑂 𑐰𑐶𑐥𑐱𑑂𑐰𑐷 𑐰𑐸𑐡𑑂𑐢𑑄 𑐥𑐡𑑂𑐩 𑐳𑑂𑐰𑐵𑑄𑐫𑐵 𑐥𑐹 𑐎𑑂𑐰𑑅𑐦𑐵𑐣𑐵 𑐠𑐎𑐹𑐐𑐸 𑐖𑐸𑐫𑐵𑑅 𑐔𑑂𑐰𑐣 𑑋 𑐄𑐐𑐸 𑐥𑐹𑐥𑐵𑐏𑐾𑑄 𑐥𑐡𑑂𑐩 𑐳𑑂𑐰𑐵𑑄 𑐀𑐬𑑂𑐠𑐵𑐟𑑂 𑐥𑐮𑐾𑐳𑑂𑐰𑐵𑑄 𑐴𑑂𑐰𑐐𑐸𑐮𑐶𑐂 𑐖𑐵𑐖𑑂𑐰𑐮𑑂𑐫𑐩𑐵𑐣 𑐖𑑂𑐫𑑀𑐟𑐶 𑐄𑐟𑑂𑐥𑐣𑑂𑐣 𑐖𑐸𑐮 𑑋 𑐄𑐟𑑂𑐥𑐣𑑂𑐣 𑐖𑐹𑐐𑐸 𑐖𑑂𑐫𑑀𑐟𑐶 𑐡𑐬𑑂𑐱𑐣 𑐫𑐵𑐫𑐾𑐟 𑐟𑑂𑐬𑐾𑐟𑐵𑐫𑐹𑐐𑐫𑑂 𑐩𑐴𑐵𑐔𑐷𑐣𑑄 𑐩𑐘𑑂𑐖𑐸𑐱𑑂𑐬𑐷𑑄 𑐟𑑅𑐢𑐶𑐩𑑂𑐴 𑐎𑐮𑐵𑑅 𑐧𑐬𑐡𑐵 𑐰 𑐔𑐶𑐢𑐶𑐩𑑂𑐴 𑐩𑑀𑐎𑑂𑐲𑐡𑐵𑐣𑐵𑐥𑑄 𑐧𑑂𑐰𑐣𑐵𑑅 𑐰𑑅𑐐𑐸𑐖𑐸𑐮 𑑋 𑐡𑐸𑐬𑐸 𑐥𑐸𑐏𑐹 𑐔𑑂𑐰𑐳𑑄 𑐐𑐸𑑃𑐔𑑂𑐰𑐎𑐵𑐫𑑂 𑐢𑑂𑐫𑐵𑐣 𑐟𑐥𑐳𑑂𑐫𑐵 𑐔𑑂𑐰𑐣𑐵𑑅 𑐩𑐘𑑂𑐖𑐸𑐱𑑂𑐬𑐷𑑄 𑐠𑑅𑐐𑐸 𑐏𑐜𑑂𑐐𑑄 𑐎𑐔𑑂𑐕𑐥𑐵𑐮 𑐥𑐬𑑂𑐰𑐟 𑐥𑐵𑐮𑐵𑑅 𑐟𑑅𑐕𑑂𑐫𑐵𑐣𑐵𑑅 𑐟𑑅𑐢𑑄𑐥𑐸𑐏𑐹𑐫𑐵 𑐮𑑅 𑐥𑐶𑐟𑐕𑑂𑐰𑐫𑐵𑑅 𑐧𑐳𑑂𑐟𑐷 𑐡𑐫𑐾𑐎𑐵𑑅 𑐧𑐶𑐮 𑑋 𑐢𑑂𑐫𑐵𑐣𑐔𑑂𑐰𑑄𑐐𑐸 𑐠𑑂𑐰 𑐐𑐸𑑃𑐔𑑂𑐰𑐎𑐵 𑐖𑐹𑐐𑐸𑐮𑐶𑑄 𑐢𑑂𑐫𑐵𑐣𑐵𑐔𑑂𑐰 𑐢𑐵𑑅𑐐𑐸 𑐢𑐂𑐐𑐸 𑐡𑐸 𑑋 𑐧𑐳𑑂𑐟𑐷 𑐡𑐫𑐾𑐎𑐹𑐐𑐸 𑐡𑐶𑑄𑑄 𑐏𑐵𑐂𑐳𑑄𑐮𑑂𑐴𑐸𑐎𑐸𑐣𑑂𑐴𑐸 𑐢𑑂𑐫𑐵𑐣𑐔𑑂𑐰𑐩𑐵𑐖𑐸 𑐟𑐠𑐵 𑐩𑐴𑐵𑐔𑐩𑑂𑐥𑐵𑐡𑐾𑐰𑐷𑐫𑐵 𑐬𑐸𑐥𑐫𑑂 𑐰 𑐩𑑀𑐎𑑂𑐲𑐡𑐵 𑐢𑑂𑐫𑐵𑐣 𑐔𑑂𑐰𑐣𑐵𑑅 𑐱𑐶𑐎𑑂𑐲𑐵 𑐧𑑂𑐫𑐹𑐐 𑐡𑐶𑑄 𑐱𑑂𑐬𑐷𑐥𑐘𑑂𑐔𑐩𑐷𑐎𑐸𑐣𑑂𑐴𑐸 𑐩𑐴𑐵𑐳𑐬𑐳𑑂𑐰𑐟𑐷𑐫𑐵 𑐬𑐸𑐥𑐫𑑂 𑐩𑐵𑐣𑐫𑑂 𑐫𑐵𑐣𑐵𑑅 𑐠𑑂𑐰 𑐣𑐶𑐣𑑂𑐴𑐸 𑐱𑑂𑐬𑐡𑑂𑐢𑐵𑐮𑐸 𑐨𑐎𑑂𑐟𑐖𑐣𑐥𑐶𑑄 𑐥𑐹𑐖𑐵 𑐀𑐬𑑂𑐔𑐣𑐵 𑐫𑐵𑑅𑐰𑐣𑐵𑑅 𑐩𑐾𑐮𑐵 𑐥𑐬𑑂𑐰 𑐣𑑂𑐴𑑂𑐫𑐵𑐎𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐥𑐸𑐏𑐹𑐫𑐵 𑐮𑑅 𑐧𑐵𑑅𑐰𑑄𑐐𑐸𑐮𑐶𑐂 𑐣𑐵𑐐𑐟𑐫𑑂 𑐖𑐸𑐖𑐸 𑐎𑐬𑑂𑐎𑑀𑐚𑐎 𑐣𑐵𑐐 𑐣𑑄 𑐥𑐶𑐴𑐵𑑄 𑐰𑐣𑐾𑐟𑑂𑐫𑑄𑐐𑐸𑐮𑐶𑑄 𑐩𑐘𑑂𑐖𑐸𑐱𑑂𑐬𑐷𑑄 𑐠𑑅𑐐𑐸 𑐏𑐜𑑂𑐐𑑄 𑐥𑐸𑐏𑐹𑐟𑐮𑐫𑑂 𑐐𑐵𑑅𑐰𑑄𑐎 𑐥𑐵𑐮𑐵𑑅 𑐀𑐣𑐫𑐵 𑐔𑐵 𑐢𑑂𑐫𑐵𑐣𑐔𑑂𑐰 𑐎𑑂𑐰𑐳𑑄 𑐰𑐵𑑄𑐕𑑂𑐰𑐐𑐸 𑐐𑐸𑑄𑐫𑐵𑐟 𑐎𑑂𑐰𑐢𑑂𑐫𑐵𑐣𑐔𑑂𑐰 𑐢𑐵𑐫𑐾𑐫𑐵𑐣𑐵𑐥𑑄 𑐢𑑂𑐫𑐵𑐣𑐔𑑂𑐰 𑐩𑐵𑐖𑐸𑐫𑐵 𑐕𑐐𑐹 𑐥𑐵𑐮𑐷 𑐣𑑄 𑐢𑐵𑐫𑐾𑐐𑐸 𑐫𑐵𑑅, 𑐀𑐠𑐾 𑐴𑐾 𑐕𑐐𑐹 𑐥𑐵𑐮𑐷 𑐱𑐎𑑂𑐟𑐶 𑐥𑐷𑐛𑐫𑐵 𑐬𑐸𑐥𑐫𑑂 𑐡𑐸𑐬𑐸𑐥𑐸𑐏𑐹𑐫𑐵 𑐮𑑃𑐫𑑂𑐳𑑄 𑐳𑑂𑐰𑐣𑐵𑐟𑑅𑐐𑐸 𑐡𑐸 𑑋 𑐐𑐵𑑅𑐰𑑄𑐎 𑐡𑐫𑐾𑐎𑐵𑑅 𑐧𑑂𑐫𑐹𑐐𑐸 𑐟𑑅𑐢𑑄(𑐟𑑅𑐴𑑂𑐬𑑄) 𑐥𑐸𑐏𑐸𑐮𑐶𑐂 𑐎𑐬𑑂𑐎𑑀𑐚𑐎 𑐣𑐵𑐐 𑐰𑐶𑐬𑐵𑐩𑐵𑐣 𑐖𑐹𑐐𑐖𑐸𑐮 𑑋 𑐩𑐘𑑂𑐖𑐸𑐱𑑂𑐬𑐷𑐣𑐵𑐥 𑐰𑑅𑐥𑐶𑑄 𑐄𑐥𑐵𑐱𑐎–𑐄𑐥𑐵𑐱𑐶𑐎𑐵𑐥𑐶𑐣𑑂𑐟 𑐠𑐣 𑐴𑐾 𑐧𑐳𑑂𑐟𑐷 𑐫𑐵𑐎𑐵𑑅 𑐠𑐎𑐮 𑑋 𑐥𑐡𑑂𑐩 𑐀𑐬𑑂𑐠𑐵𑐟𑑂 𑐥𑐮𑐳𑑂𑐰𑐵𑑄𑐮𑐫𑑂 𑐄𑐟𑑂𑐥𑐣𑑂𑐣 𑐖𑐹𑐐𑐸 𑐖𑑂𑐫𑑀𑐟𑐶 𑐡𑐬𑑂𑐱𑐣 𑐫𑐵𑑅𑐰𑐩𑑂𑐴 𑐩𑐘𑑂𑐖𑐸𑐱𑑂𑐬𑐷𑑄 𑐧𑐳𑑂𑐟𑐷 𑐡𑐫𑐾𑐎𑐵𑑅 𑐰𑑄𑐐𑐸 𑐠𑑂𑐰 𑐠𑐵𑐫𑑂𑐫𑐵 𑐣𑐵𑑄 𑐥𑐡𑑂𑐩𑐎𑐵𑐲𑑂𑐛𑐥𑐸𑐬 𑐢𑐎𑐵𑑅 𑐣𑐵𑑄 𑐕𑐸𑐐𑐸 𑐖𑐸𑐮, 𑐠𑑂𑐰 𑐠𑐵𑐫𑑂 𑐨𑐟𑐶𑐔𑐵 𑐜𑐵𑑃𑐜𑐵 𑐣𑑄 𑐖𑐹𑐐𑐸𑐴𑐸𑐣𑐶𑑄𑑄 𑐥𑐡𑑂𑐩𑐎𑐵𑐲𑑂𑐛𑐐𑐶𑐬𑐶 𑐣𑑄 𑐢𑐵𑐫𑐾𑐐𑐸 𑐖𑐹𑐐𑐸 𑐏𑑅 𑐢𑐂𑐐𑐸 𑐣𑑂𑐫𑐣𑐾 𑐡𑐸 𑐧𑑂𑐰𑐣𑐾 𑐡𑐸 𑑋

𑐀𑐠𑐾 𑐴𑐾 𑐡𑑂𑐰𑐵𑐥𑐬 𑐫𑐹𑐐𑐫𑑂 𑐨𑐵𑐳𑑂𑐟𑐶𑐎𑐵𑐥𑐸𑐬𑐫𑑂 (𑐠𑐎𑑂𑐰𑐵𑑅) 𑐧𑐵𑐞𑐵𑐳𑐸𑐬(𑐮𑐵𑐏𑐫𑑂) 𑐔𑑂𑐰𑐣𑐶𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐧𑐵𑐞𑐵𑐳𑐸𑐬𑐫𑐵 𑐡𑐵𑐣𑐵𑐳𑐸𑐬, 𑐎𑐔𑑂𑐕𑐥𑐵𑐳𑐸𑐬 𑐣𑐵𑑄𑐫𑐵 𑐣𑐶𑐩𑑂𑐴 𑐎𑐵𑐫𑑂 𑐰 𑐥𑑂𑐬𑐨𑐵𑐰𑐟𑐶 𑐣𑐵𑑄𑐫𑐵 𑐕𑐩𑑂𑐴 𑐩𑑂𑐴𑑂𑐫𑐵𑐫𑑂 𑐡𑐸𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐥𑑂𑐬𑐨𑐵𑐰𑐟𑐶𑐫𑐵 𑐕𑐣𑑂𑐴𑐸 𑐩𑑂𑐴𑐐𑐳𑐫𑑂 𑐱𑑂𑐬𑐷𑐎𑐺𑐲𑑂𑐞𑐫𑐵 𑐎𑐵𑐫𑑂 𑐥𑑂𑐬𑐡𑑂𑐫𑐸𑐩𑑂𑐣 𑐏𑐣𑐵𑑅 𑐩𑐟𑐶𑐣𑐵 𑐖𑐸𑐮, 𑐣𑐵𑐥𑐮𑐵𑐫𑐾𑐐𑐸 𑐣𑑄 𑐫𑐵𑐟, 𑐟𑐬 𑐥𑑂𑐬𑐨𑐵𑐰𑐟𑐶𑐫𑐵 𑐧𑑁, 𑐡𑐵𑐖𑐸𑐥𑐶𑐣𑑂𑐳𑑄 𑐩𑐘𑑂𑐖𑐸𑐬 𑐩𑐫𑐵𑐳𑐾𑑄𑐮𑐶 𑐱𑑂𑐬𑐷𑐎𑐺𑐲𑑂𑐞 𑐰𑐫𑐵𑑅 𑐫𑐸𑐡𑑂𑐢𑐫𑐵𑐣𑐵𑑅 𑐂𑐩𑐶𑐟 𑐳𑑂𑐫𑐵𑐣𑐵𑑅 𑐧𑐶𑐮 𑑋 𑐥𑑂𑐬𑐨𑐵𑐰𑐟𑐶𑐫𑐵 𑐩𑑂𑐰𑑅 𑐮𑑂𑐴𑐸𑐂𑐐𑐸 𑐥𑐸𑐏𑐹 (𑐡𑐴)𑐔𑑂𑐰𑐳𑑄 𑐔𑑂𑐰𑑄𑐐𑐸 𑐥𑐬𑑂𑐰𑐟𑐫𑐵𑐟 𑐎𑐺𑐲𑑂𑐞𑐫𑐵 𑐔𑐎𑑂𑐬𑑄 𑐟𑐕𑑂𑐫𑐵𑐣𑐵𑑅 𑐥𑐸𑐏𑐹𑐫𑐵 𑐮𑑅 𑐥𑐶𑐕𑑂𑐰𑐫𑐵𑑅 𑐧𑐶𑐮 𑑋 𑐥𑐬𑑂𑐰𑐟 𑐟𑑅𑐩𑐕𑑂𑐫𑐵𑐎𑐾𑐟 𑐥𑐣𑐵𑑅𑐔𑑂𑐰𑑄𑐩𑑂𑐴 𑐎𑐔𑑂𑐕𑐥𑐵𑐳𑐸𑐬𑐫𑐵𑐟 𑐀𑐣 𑐴𑐾 𑐳𑑂𑐫𑐵𑐣𑐵𑑅 𑐧𑑂𑐫𑐹𑐐𑐸𑐮𑐶 𑐠𑑂𑐰 𑐥𑐬𑑂𑐰𑐟 𑐔𑑂𑐰𑐧𑐴𑐵𑑅𑐫𑐵𑐟 𑐎𑐔𑑂𑐕𑐥𑐵𑐮𑐥𑐬𑑂𑐰𑐟 𑐢𑐵𑑅𑐐𑐸 𑐢𑐂𑐐𑐸 𑐡𑐸 𑑋 𑐎𑐺𑐲𑑂𑐞𑐣𑐵𑐥 𑐐𑑀𑐎𑐸𑐮𑑄 𑐰𑑅𑐥𑐶𑑄 𑐐𑑂𑐰𑐵𑐮𑐵𑐟 𑐠𑐣 𑐴𑐾 𑐧𑐳𑑂𑐟𑐷 𑐫𑐵𑐣𑐵𑑅 𑐔𑑂𑐰𑐣, 𑐠𑐸𑐥𑐶𑑄 𑐴𑐾 𑐐𑑂𑐰𑐵𑐮𑐵𑐟 𑐐𑑂𑐰𑐵𑑅 𑐠𑐬𑐫𑐵 𑐬𑐸𑐥𑑄𑑄 𑐠𑑁𑑄𑐟𑐎𑑄 𑐡𑐸, 𑐰 𑐴𑐾 𑐐𑑂𑐰𑐵𑑅𑐟𑐩𑐢𑑂𑐫𑐾 𑐕𑐩𑑂𑐴 ‘𑐣𑐾𑐥’ 𑐣𑐵𑑄𑐫𑐵 𑐐𑑂𑐰𑐵𑑅𑐫𑐵 𑐳𑐵 𑐣𑑂𑐴𑐶𑑄𑐣𑑂𑐴𑐶𑐠𑑄 𑐳𑐸𑐠𑐫𑑂 𑐀𑐣𑐰𑑄𑐠𑐣𑐰𑑄 𑐩𑐳𑑂𑐫𑐹, 𑐡𑐸𑐬𑐸 𑐣𑑄 𑐩𑐧𑑂𑐫𑐹 𑐀𑐠𑐾 𑐖𑐸𑐫𑐵𑑅 𑐕𑐣𑑂𑐴𑐹 𑐐𑑂𑐰𑐵𑑅𑐣𑑄 𑐠𑑅𑐩𑑂𑐴 𑐳𑐵𑐫𑐵 𑐔𑐶𑐰𑐵𑑅𑐎𑐵𑐮 𑑋 𑐳𑐸𑐠𑐣𑑂𑐴𑐵𑐥𑐵𑑄 𑐳𑐵 𑐧𑐵𑐐𑐩𑐟𑐷 𑐳𑐶𑐠𑐳𑐶𑐠𑑄 𑐐𑑂𑐰𑐮𑐫𑐵 𑐕𑐐𑐹 𑐠𑐵𑐳𑐫𑑂 𑐠𑑅𑐠𑐩𑑂𑐴𑑄 𑐡𑐸𑐬𑐸 𑐟𑐸𑐬𑐸𑐬𑐸𑐬𑐸 𑐴𑐵𑐫𑐾𑐎𑐵𑑅 𑐮𑐶𑐴𑐵𑑄𑐰𑐮 𑑋 𑐡𑐸𑐬𑐸𑐴𑐵𑐫𑐾𑐎𑐹𑐐𑐸 𑐠𑐵𑐳𑐫𑑂 ‘𑐣𑐾𑐥’ 𑐐𑑂𑐰𑐵𑑅𑐣𑑄 𑐐𑐵𑑅 𑐩𑑂𑐴𑐸𑐫𑐵𑐳𑑂𑐰𑑅𑐧𑐮𑐫𑑂 𑐥𑐱𑐸𑐥𑐟𑐶 𑐩𑐴𑐵𑐡𑑂𑐫𑑅 𑐥𑑂𑐬𑐎𑐚 𑐖𑐸𑐮, 𑑋 𑐥𑑂𑐬𑐎𑐚 𑐖𑐹𑐩𑑂𑐴 𑐩𑐴𑐵𑐡𑑂𑐫𑑅𑐫𑐵 𑐩𑐶𑑄𑐖𑑂𑐰𑐵𑐮𑐵𑑄 𑐐𑑂𑐰𑐵𑑅 𑐀𑐣 𑐴𑐾 𑐩𑐸𑐎𑑂𑐟𑐶 𑐖𑐸𑐮 𑑋 𑐰𑐴𑐾 𑐐𑑂𑐰𑐵𑑅𑐫𑐵 𑐎𑐵𑐫𑑂 𑐨𑐹𑐩𑐵𑐟𑐒𑑂𑐐 𑐖𑐸𑐖𑐸 𑐫𑐵𑐟 𑑋 𑐐𑑀𑐥𑐵𑐮𑐰𑑄𑐱𑐫𑐵 𑐨𑐹𑐩𑐵𑐟𑐒𑑂𑐐 𑐴𑐾 𑐣𑑂𑐴𑐵𑐥𑐵𑑄𑐩𑑂𑐴 𑐖𑐸𑐖𑐸 𑐖𑐹𑐩𑑂𑐴 𑐖𑐸𑐮 𑑋 ‘𑐐𑑂𑐰𑐵𑑅’𑐫𑐵 𑐣𑐵𑐩𑑄 𑐎𑐶𑐥𑐹, 𑐠𑐵𑑄𑐧𑐴𑐵𑑅 𑐟𑑂𑐰𑐵𑐮𑐫𑑂 𑐧𑑅𑐔𑐵𑐢𑑄𑐐𑐸 ‘𑐐𑑂𑐰𑐵𑑅 𑐥𑐸𑐏𑐹’ 𑐣𑐵𑐩𑑄𑐖𑐵𑑅𑐐𑐸 𑐥𑐸𑐏𑐹 𑐣𑑄 𑐡𑐸 𑑋 𑐠𑑂𑐰 𑐠𑐵𑐫𑑂𑐫𑐵 𑐳𑐵, 𑐠𑑂𑐰 𑐠𑐵𑐫𑑂𑐫𑐵 𑐩𑐣𑐹𑐥𑐵𑐏𑐾 𑐥𑐱𑐸𑐥𑐟𑐶 𑐩𑐴𑐵𑐡𑑂𑐫 𑐥𑑂𑐬𑐎𑐚 𑐖𑐹𑐐𑐸 𑐰 𑐠𑑂𑐰 𑐠𑐵𑐫𑑂𑐫𑐵 𑐩𑐣𑐹 𑐣𑑂𑐴𑐵𑐥𑐵𑑄𑐩𑑂𑐴 𑐖𑐸𑐖𑐸 𑐖𑐹𑐐𑐸𑐮𑐶𑑄 𑐠𑑂𑐰 𑐠𑐵𑐫𑑂𑐫𑐵 𑐎𑐷𑐬𑑂𑐟𑐶 𑐟𑑅𑐢𑑄 𑐢𑐂𑐐𑐸𑐎𑐠𑑄 𑐎𑐷𑐬𑑂𑐟𑐶𑐫𑐵 𑐬𑐸𑐥𑑄 𑐠𑑂𑐰 𑐠𑐵𑐫𑑂𑐫𑐵𑐟 𑐎𑐷𑐬𑑂𑐟𑐶𑐥𑐸𑐬 𑐢𑐵𑑅𑐐𑐸 𑐢𑐂𑐐𑐸 𑐣𑑂𑐫𑐣𑐾 𑐡𑐸 𑑋

𑐠𑑂𑐰 𑐠𑐵𑐫𑑂𑐫𑐵𑐟 𑐐𑐸𑑃𑐡𑐾𑐫𑑂 𑐣𑑄 𑐢𑐵𑐂, 𑐐𑐸𑑃𑐡𑐾𑐫𑑂 𑐕𑐵𑐫𑑂 𑐢𑐵𑐮𑐮𑐫𑑂 𑐢𑐂𑐐𑐸 𑐳𑐩𑑂𑐧𑐣𑑂𑐢𑐫𑑂 𑐣𑑄 𑐁𑐥𑐮𑑄 𑐧𑐵𑐏𑑄 𑐡𑐸, 𑐕𑐥𑐹 𑐧𑐵𑐏𑑄 𑐎𑐣𑐾 – 𑐥𑑂𑐬𑐵𑐔𑐷𑐣𑐎𑐵𑐮𑐫𑑂 𑐎𑐶𑐥𑐹𑐰𑐵𑐳𑐷𑐟𑐫𑑂 𑐠𑑅 𑐰𑐳𑑂𑐟𑐸𑐟 𑐀𑐬𑑂𑐠𑐵𑐟𑑂 𑐳𑐵, 𑐩𑐾𑐫𑑂, 𑐔𑑂𑐰𑐮𑐫𑑂, 𑐡𑐸𑐐𑐸, 𑐦𑐿 𑐮𑐶𑐎𑐳𑑄 𑐔𑑂𑐰𑑄𑐐𑐸 𑐐𑐸𑑃𑐂 𑐖𑑂𑐰𑑅𑐰𑐣𑐷𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐰𑐳𑑂𑐟𑐸 𑐖𑑂𑐰𑑅𑐰𑐣𑐶𑑄𑐥𑐶𑑄 𑐖𑐰𑐵𑑅 𑐩𑐔𑐵𑐟𑐫𑑂 𑐩𑑂𑐴𑐵𑐂𑐥𑐸 𑐕𑑂𑐫𑐵𑐫𑐾𑐟 𑐂𑐮𑐫𑑂𑐧𑑂𑐫𑐮𑐫𑑂 𑐠𑐷𑐠𑐷 𑐎𑐵𑐳𑐵 𑐩𑑂𑐴𑐶𑐟𑐷𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐕𑐣𑑂𑐴𑐸 𑐔𑐵𑐫𑐵𑐩𑑂𑐴 𑐢𑐸𑑃 𑐡𑐫𑐾𑐎𑐵 𑐩𑑂𑐴𑐶𑐟𑐾𑐐𑐸 𑐫𑐵𑑅𑐐𑐸 𑐖𑐸𑐮 𑑋 𑐖𑐰𑐵𑑅𑐩𑐔𑐵𑐟𑐫𑑂 𑐐𑐸𑐮𑐶𑐳𑐶𑐣𑑄 𑐩𑑂𑐴, 𑐐𑐸𑐮𑐶𑐳𑐶𑐣𑑄 𑐟𑐸𑐟𑐶, 𑐕𑑂𑐫𑑄 𑐡𑐫𑐾𑐎𑐮 𑑋 𑐢𑐸𑑃𑐫𑐵 𑐩𑑂𑐴 𑐦𑐸𑐎𑑂𑐎 𑐡𑐫𑐾𑐎𑐾𑐢𑐸𑑄𑐎𑐵𑑅 𑐮𑑂𑐰𑐫𑑂𑐎 𑐩𑐾𑑃 𑐟𑐫𑐾𑐟 𑐳𑐶𑐩𑐵𑐴𑑅 𑐩𑐵𑑅𑐰𑐣 𑑋 𑐠𑑂𑐰 𑐴𑐾 𑐂𑐮𑐫𑑂 𑐩𑐴𑐵𑐡𑑂𑐫𑑅 𑐠𑑅 𑐎𑐵𑐫𑑂 𑐐𑐞𑐾𑐱 𑐟𑑅𑐣𑑂𑐴𑐸 𑐩𑐏𑐣𑐵 𑐩𑐵𑐩𑐵 𑐖𑐸𑐖𑐸𑑄 𑐎𑑂𑐰𑐫𑑂𑐣𑐵 𑐏𑐸𑐳𑐶 𑐩𑑂𑐴𑐶𑐟𑐵𑐔𑑂𑐰𑑄𑐐𑐸 𑐮𑐸𑐂𑐎𑐵 𑐎𑐿𑐮𑐵𑐳𑐫𑑂 𑐮𑐶𑐴𑐵𑑃 𑐣𑐸 𑐢𑐵𑑅𑐧𑐮𑐾 𑐐𑐞𑐾𑐱𑑄 𑐠𑑂𑐰 𑐠𑐵𑐫𑑂 𑐟𑑅𑐳𑐎𑑄 𑐣𑑂𑐴𑑂𑐫𑐵𑐂𑐥𑐸𑐮 𑐠𑐣 𑐴𑐾 𑐔𑑂𑐰𑐣𑐾 𑐢𑐵𑐳𑐾𑑄𑐮𑐶 𑐩𑐴𑐵𑐡𑑂𑐫𑑅𑐰𑑄 𑐐𑐞𑐾𑐡𑑂𑐫𑑅𑐫𑐵𑐟 𑐖𑐮𑐰𑐶𑐣𑐵𑐫𑐎𑐫𑐵 𑐬𑐸𑐥𑐫𑑂 𑐔𑑂𑐰𑑄 𑐢𑐎𑐵𑑅 𑐢𑐫𑐵𑑅 𑐀𑐣𑑄 𑐩𑐴𑐵𑐡𑑂𑐫𑑅 𑐔𑐵𑐴𑑂𑐫𑐸𑐴𑑂𑐫𑐸𑑄 𑐎𑐶𑐥𑐹 𑐜𑐵𑑄𑐜𑐵𑐫𑐵 𑐄𑐟𑑂𑐟𑐬𑐥𑐵𑐏𑐾 𑐠𑑂𑐫𑑄𑐐𑐸 𑐖𑐸𑐮 𑑋 𑐀𑐣 𑐕𑐐𑐹 𑐐𑐵𑐮𑐫𑑂 𑐫𑐔𑐸𑐳𑐾𑐔𑑂𑐰𑑄𑐎 𑐮𑑅 𑐧𑐸𑐫𑐵𑐔𑑂𑐰𑑄𑐐𑐸 𑐧𑐸𑑄𑐐𑐵𑑅 𑐏𑐣𑐵𑑅 𑐮𑑅 𑐟𑑂𑐰𑐣 𑑋 𑐮𑑅 𑐟𑑂𑐰𑐣𑐾𑐢𑐸𑑄𑐎𑐵𑑅 𑐎𑐶𑐥𑐹 𑐜𑐵𑑄𑐜𑐵 𑐐𑐫𑐵𑑅 𑐔𑑂𑐰𑐫𑑂 𑐠𑑂𑐫𑐣 𑑋 𑐐𑐞𑐾𑐱𑐫𑐵𑐟 𑐩𑐵𑐩𑐵𑑄 𑐖𑐸𑐫𑐵𑑅 𑐔𑐵𑑅𑐴𑑂𑐫𑐸𑐴𑑂𑐫𑐸𑑄 𑐩𑐴𑐵𑐡𑑂𑐫𑑅𑐫𑐵𑐟 𑐣𑐫𑐾 𑐣𑑄 𑐥𑐶𑐟𑑂𑐫𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐣𑐫𑐾𑐐𑐸 𑐕𑐸𑑄 𑐡𑐸𑐐𑐸 𑐩𑐏𑐸, 𑐕𑐸 𑐣𑐫𑐾, 𑐕𑐸 𑐣𑐫𑐾 𑐖𑐸𑐮 𑑋 𑐀𑐣𑐳𑑄 𑐦𑐿𑐔𑐵𑐟 𑐖𑑂𑐰𑐫𑐵𑐟𑑅𑐐𑐸 𑐏𑐣, 𑐠𑑂𑐰 𑐴𑐾 𑐣𑐫𑐾𑐮𑐵 𑐢𑐎𑐵𑑅 𑐩𑐟𑐶 𑐰𑐮, 𑐟𑐬 𑐐𑐠𑐾 𑐣𑐫𑐾 𑐠𑑅 𑐖𑐸𑐮 𑐳𑐵𑐎𑐵𑐴𑐵𑐬𑐷 𑑋 𑐴𑐵𑐣 𑐀𑐣 𑐔𑐵𑐫𑐵𑐩𑑂𑐴 𑐕𑐩𑑂𑐴 𑐢𑐸𑑃 𑐏𑐣, 𑐀𑐮𑐾 𑐩𑐴𑐵𑐡𑑂𑐫𑑅 𑐔𑐵𑐫𑐵𑐩𑑂𑐴 𑐢𑐸𑑃𑐂 𑐡𑐸𑐧𑐶𑐣𑐵𑑅 𑐨𑐿𑐬𑐰 𑐖𑐸𑐫𑐵𑑅 𑐦𑐿𑐔𑐵𑐟 𑐣𑐫𑐵𑐧𑐶𑐮 𑑋 𑐩𑐾𑑃 𑐟𑐫𑐾𑐟 𑐳𑐶𑐩𑐵𑐴𑑅 𑐎𑐵𑑅𑐰𑑄𑐥𑐶𑑄 𑐖𑐰𑐵𑑅𑐩𑐔𑐵𑐟 𑐰𑑅𑐧𑐮𑐫𑑂 𑐠𑑅 𑐦𑐂𑐔𑐵𑐟 𑐩𑐏𑑄𑐣 𑑋 𑐠𑐸𑐏𑐾𑑄 𑐄𑐏𑐾𑑄 𑐳𑑂𑐰𑐮 𑐩𑐬𑐸 𑑋 𑐠𑑅𑐥𑐶𑐣𑑂𑐳𑑄 𑐡𑐫𑐾𑐎𑐵𑐩𑑂𑐴 𑐔𑐵𑐫𑐵𑐩𑑂𑐴 𑐢𑐸𑑃 𑐢𑐵𑐟𑑂𑐠𑐾𑑄𑐫𑐵𑐩𑑂𑐴𑐠𑐾𑑄 𑐦𑐸𑐂𑑃𑐦𑐸𑐂𑑃 𑐳𑐵𑐳𑑅 𑐮𑑂𑐴𑐵𑐣𑐵𑐔𑑂𑐰𑐣 𑑋 𑐖𑐰𑐵𑑅𑐩𑐔𑐵𑐟 𑐀𑐖𑐹𑐔𑐵𑐫𑐵𑑅

𑐟𑑂𑐰𑐵𑐮𑐫𑑂 𑐰𑐣𑐵 𑐠𑑅 𑐩𑐵𑑄–𑐀𑐧𑐸, 𑐀𑐖𑐵–𑐀𑐖𑐶𑐥𑐶𑑄 𑐳𑑅𑐟𑐵𑐴𑐮 𑑋 𑐢𑐵𑐟𑑂𑐠𑐾𑑄 𑐦𑐿𑐔𑐵𑐟 𑐩𑐬𑐸, 𑐠𑐫𑑂𑐎 𑐳𑑂𑐰𑐮𑑄 𑐕𑐩𑑂𑐴 𑐢𑐸𑑃𑐫𑐵 𑐩𑑂𑐴𑐸𑐟𑐸𑐂 𑐴𑑂𑐫𑐵𑐄𑑃𑐎 𑐴𑐶 𑐏𑐣𑐾 𑐡𑐸 𑐀𑐮𑐾 𑐕𑐩𑑂𑐴 𑐠𑐎𑐵𑐮𑐶𑐩𑑂𑐴 𑐀𑐖𑐵𑑄 𑐢𑐸𑑃𑐫𑐵𑐎𑐾 𑐣𑑂𑐫𑐣, 𑐀𑐫𑑂 𑐢𑐸𑑃 𑐖𑐶𑐩𑐶 𑐦𑐿𑐔𑐵𑐟 𑐐𑑂𑐰 ? 𑐢𑐸𑑃 𑐬𑐸𑐥𑐷 𑐨𑐿𑐬𑐰𑑄 𑐮𑐶𑐳𑑅 𑐧𑐶𑐮 𑐕𑐶𑐩𑐶𑐠𑐵𑐫𑑂 𑐎𑑂𑐰𑐫𑑂 𑐧𑐸𑑄𑐐𑐵𑐮𑐫𑑂 𑐮𑑅 𑐟𑑂𑐰𑐣𑐾𑐢𑐸𑐣, 𑐕𑐶𑐩𑐶 𑐦𑐿𑐔𑐵𑐟 𑐣𑑄 𑐣𑐫𑐵𑐧𑐶𑐫𑐵𑑅, 𑐕𑐶𑐩𑐶𑐥𑑂𑐬𑐟𑐶 𑐖𑐶 𑐆𑐞𑐷 𑐖𑐸𑐮 𑑋 𑐀𑐠𑐾 𑐖𑐸𑐫𑐵𑑅 𑐠𑑂𑐰 𑐠𑐵𑐫𑑂𑐫𑐵 𑐖𑐶 𑐳𑑄𑐬𑐎𑑂𑐲𑐎 𑐖𑐸𑐫𑐵𑐔𑑂𑐰𑐣𑐾 𑐢𑐂𑐐𑐸 𑐰𑐔𑐣 𑐧𑐶𑐂𑐫𑐵𑐣𑐵𑐥𑑄 𑐦𑐿𑐔𑐵𑐟 𑐣𑐫𑐵𑐐𑐸 𑐏𑑅 𑐢𑐎𑐵𑑅 𑐁𑑄 𑐫𑐵𑐣𑐵𑐎𑑂𑐫𑐣 𑑋 𑐖𑐰𑐵𑑅 𑐩𑐔𑐵𑐟𑐫𑑂𑐳𑑄 𑐟𑑄 𑐥𑐶𑐎𑐫𑐵 𑐕𑐣𑑂𑐟 𑐩𑐾𑑃 𑐣𑑄 𑐟𑐫𑐾 𑐩𑐏𑐸𑐟 𑐁𑐩𑑂𑐠𑐾 𑐴𑐾 𑐁𑑄 𑐏𑐵𑐫𑐵𑑅 𑐔𑑂𑐰𑑃 𑐢𑐎𑐵𑑅 𑐳𑐬𑐵𑑅 𑐧𑐶𑐮 𑑋 𑐳𑐬𑐵𑑅 𑐧𑑂𑐫𑐹𑐐𑐸𑐮𑐶𑑄 𑐁𑐖𑐸𑐡𑑂𑐫𑑅𑐰𑑄 𑐣𑑂𑐴𑑂𑐫𑐵𑐧𑐮𑐾𑑄 𑐁𑑄 𑐫𑐵𑐣𑐵𑐔𑑂𑐰𑑄𑐐𑐸 𑐰 𑐩𑐾 𑐣𑑄 𑐩𑐡𑐸𑐐𑐸 𑐏𑑅 𑐢𑐂𑐐𑐸 𑐡𑐸 𑑋 𑐢𑐸𑑃𑐬𑐸𑐥𑐷 𑐳𑑂𑐰𑑄𑐐𑑅 𑐩𑐶𑐏𑐵 𑐎𑐣𑐵𑐔𑑂𑐰𑑄𑐩𑑂𑐴 𑐨𑐿𑐬𑐰𑑄 𑐧𑑂𑐫𑐹𑐐𑐸 𑐧𑐔𑑄𑐫𑐵𑐟 𑐎𑐶𑐥𑐹𑐰𑐵𑐳𑐷𑑄 𑐱𑐶𑐬𑑀𑐢𑐵𑐬 𑐫𑐵𑐣𑐵𑑅 𑐠𑑅𑐐𑐸 𑐡𑐾𑐫𑑂𑐫𑐵 𑐁𑐬𑐵𑐢𑑂𑐫𑐡𑐾𑐰𑐎𑐠𑑄 𑐠𑑁𑑄𑐟𑐎 𑐩𑐵𑐣𑐫𑑂 𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐏𑑅 𑐢𑐂𑐐𑐸 𑐖𑐣𑐢𑐵𑐬𑐞𑐵 𑐡𑐸 𑑋 𑐁𑐖𑐸𑐡𑑂𑐫𑑅 𑐰𑐶𑐬𑐵𑐖𑐩𑐵𑐣 𑐖𑐹𑐐𑐸 𑐐𑐸𑑄𑐮𑐵𑐐𑐵𑐫𑐵 𑐣𑐵𑐩𑑄 𑐠𑑂𑐰 𑐠𑐵𑐫𑑂𑐫𑐵𑐟 𑐐𑐸𑑄𑐡𑐾𑐫𑑂 𑐣𑑄 𑐢𑐵𑐫𑐾𑐐𑐸 𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐖𑐸𑐮 𑑋

𑐴𑐵𑐎𑐣 𑐮𑐶𑐥𑐵 𑐰𑐫𑐵𑑅 𑐠𑑂𑐰 𑐠𑐵𑐫𑑂𑐫𑐵𑐟 𑐎𑐷𑐬𑑂𑐟𑐶𑐥𑐸𑐬 𑐰 𑐎𑐶𑐥𑐹 𑐢𑐵𑐫𑐾𑐐𑐸 𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑐠𑐠𑐾 𑐕𑐵𑐫𑑂 𑐢𑐵𑐫𑐾𑐐𑐸 𑐫𑐵𑐟𑐮𑐫𑑂 𑐢𑐂𑐐𑐸 𑐧𑐵𑐏𑑄 𑐢𑐵𑐫𑐾 𑐰𑐵 𑐂𑐟𑐶𑐴𑐵𑐳 𑐠𑐠𑐾 𑐡𑐸 – 𑐣𑐾𑐥𑐵𑐮𑐳𑐩𑑂𑐰𑐟𑑂 𑑒𑑑𑑙 𑐀𑐬𑑂𑐠𑐵𑐟𑑂 𑐗𑐶𑑄𑐣𑐶𑐐𑐹 𑐱𑐡𑐷𑐥𑐵𑐏𑐾 𑐖𑐸𑐖𑐸 𑐱𑐶𑐰𑐡𑐾𑐰𑑄 𑐰𑐮𑐰𑐮𑐡𑐾𑐰𑐷𑐫𑐵 𑐟𑐥𑐳𑑂𑐫𑐵 𑐫𑐵𑐣𑐵𑑅 𑐧𑑅𑐏𑐸𑐂 𑐧𑑃𑐥𑐣𑐵𑑅 𑐠𑐵𑐫𑑂𑐠𑐵𑐳𑐫𑑂 𑐮𑑂𑐰𑐴𑑄𑐴𑐶𑐟𑐶, 𑐧𑐸𑑄𑐐𑐵𑑅, 𑐥𑐸𑐏𑐹 𑐡𑐫𑐾𑐎𑐵𑑅 𑐥𑑂𑐫𑐟 𑐖𑐵𑑅𑐐𑐸 𑐣𑑂𑐫𑐵𑐐𑐹 𑐢𑑂𑐰𑐵𑐏𑐵 𑐡𑐸𑐐𑐸 𑐡𑐬𑐰𑐵𑐬 (𑐱𑑂𑐬𑐷𑐬𑐵𑐖𑐐𑐺𑐴) 𑐧𑐵𑑄𑐮𑐵𑐎 𑐖𑐐 𑐟𑐫𑐵𑑅 𑐡𑐫𑐾𑐎𑐵𑑅 𑐠𑑂𑐰 𑐥𑑂𑐬𑐵𑐔𑐷𑐣 𑐠𑐵𑐫𑑂𑐫𑐵𑐟 𑐕𑐐𑐹 𑐰𑑂𑐫𑐰𑐳𑑂𑐠𑐶𑐟 “𑐥𑐸𑐬”𑐫𑐵 𑐬𑐸𑐥𑑄 𑐰𑐶𑐎𑐵𑐳 𑐫𑐵𑐣𑐵𑐰𑑄𑐐𑐸 𑐢𑐂𑐐𑐸 𑐧𑐵𑐏𑑄 𑐟𑐠𑐵 𑐧𑑄𑐱𑐵𑐰𑐮𑐷 𑐡𑐸 𑑋
𑐕𑐐𑐹 𑐥𑐹𑐬𑑂𑐰𑐵𑐢𑐵𑐬𑐫𑐸𑐎𑑂𑐟 𑐐𑐝𑐫𑐵 𑐬𑐸𑐥𑑄 𑐳𑑂𑐠𑐵𑐥𑐷𑐟 𑐋𑐟𑐶𑐴𑐵𑐳𑐶𑐎 𑐠𑑂𑐰 “𑐥𑐸𑐬”𑐫𑐵𑐟𑑅 𑐖𑐸𑐖𑐸 𑐱𑐶𑐰𑐡𑐾𑐰𑑄 𑐠𑑅𑐐𑐸 “𑐎𑐷𑐬𑑂𑐟𑐶”𑐫𑐵 𑐬𑐸𑐥𑐫𑑂 𑐎𑐷𑐬𑑂𑐟𑐶𑐥𑐸𑐬 𑐣𑐵𑑄 𑐕𑐸𑐣𑐵𑐵𑐰𑑄𑐐𑐸 𑐏𑑅 𑐢𑐂𑐐𑐸 𑐣𑑄 𑐣𑑂𑐫𑐣𑐾 𑐡𑐸 𑑋 𑐣𑐾𑐰𑐵𑐟𑐫𑑂 𑐁𑐥𑐮𑑄 𑐣𑐵𑑄𑑄 𑐔𑐷𑐴𑐵𑐎𑐮𑑄 𑐢𑐵𑐫𑐾𑐐𑐸 𑐔𑐮𑐣𑐎𑐠𑑄 “𑐎𑐷𑐬𑑂𑐟𑐶”𑐫𑐵 𑐎𑐶 “𑐥𑐸𑐬”𑐫𑐵 𑐥𑐹𑐖𑐎 𑐎𑐫𑐵𑑅 𑐎𑐶𑐥𑐹 𑐢𑐵𑐫𑐾𑐐𑐸 𑐣𑑄𑑄 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑐢𑐂𑐐𑐸 𑐣𑑂𑐫𑐣𑐾 𑐡𑐸 𑑋

𑐠𑐸𑐐𑐸𑐎𑐠𑑄 𑐠𑑂𑐰𑐠𑐵𑐫𑑂𑐫𑐵 𑐠𑐷𑐠𑐷 𑐣𑐵𑑄 𑐟𑐫𑐵𑐰𑑄𑐐𑐸 𑐧𑐵𑐏𑑄 𑐡𑐸𑐐𑐸 𑐖𑐸𑐮, 𑐖𑐶𑑄 𑐣𑑂𑐫𑐣𑐵𑑅 𑐟𑐫𑐵𑐐𑐸 𑐧𑐵𑐏𑑄 𑐠𑐸𑐮𑐶 𑐴𑐾 𑐖𑐸𑐮, 𑐧𑐵𑐏𑑄 𑐩𑐣 𑐟𑐫𑐵𑑅 𑐣𑑂𑐫𑐣𑐵𑐡𑐶𑐂𑐥𑐶 𑐳𑐎𑐮𑐳𑐶𑐟 𑐳𑐸𑐨𑐵𑐫𑑂 𑑋 𑐩𑐐𑐵𑑅𑐩𑐔𑐵𑑅 𑐖𑐸𑐂 𑐦𑐸, 𑐡𑑂𑐰𑑄–𑐰𑐶𑐡𑑂𑐰𑑄 𑐎𑑂𑐲𑐾𑐩𑐵 𑐦𑑂𑐰𑐣𑐾 𑑋 𑐧𑐵𑐏𑑄 𑐎𑐣𑐾𑐐𑐸 𑐀𑐰𑐳𑐬 𑐧𑐶𑐫𑐵𑑅 𑐡𑐶𑐂𑐥𑐶𑑄 𑐧𑐵𑐏𑑄 𑐣𑑂𑐫𑐣𑐾 𑐰𑐵 𑐀𑐨𑐶𑐫𑐵𑐣 𑐏𑐮𑑅𑐫𑐵𑐟 𑐴𑐵𑐎𑐣 𑐕𑐎 𑐮𑐶𑐳𑐵 𑐎𑐫𑐵𑑅 𑐳𑐸𑐨𑐵𑐫𑑂 𑐡𑐾𑐕𑐵𑐫𑐾 𑐱𑐸𑐨𑐵𑐫𑑂 !