𑐖𑐐𑐟𑐳𑐸𑐣𑑂𑐡𑐬𑐫𑑂 𑐰𑐾𑐧𑐥𑐾𑐖 𑐜𑐶𑐖𑐵𑐂𑐣 𑐟𑐵𑐮𑐶𑐩

𑐫𑐾𑑃- 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶𑐂 𑐰𑐸𑐩𑐾𑐣 𑐂𑐣 𑐁𑐂𑐚𑐷 𑐎𑐩𑐶𑐚𑐷𑐫𑐵 𑐐𑑂𑐰𑐳𑐵𑐮𑐫𑑂 𑐗𑐶𑐣𑑂𑐴𑐸𑐫𑐵 𑐰𑐾𑐧𑐳𑐵𑐂𑐚 𑐜𑐾𑐨𑐮𑐥𑐩𑐾𑐣𑑂𑐚 𑐰 𑐁𑐂𑐳𑐷𑐚𑐷 𑐀𑐰𑐬𑑂𑐣𑐾𑐳 𑐎𑑂𑐫𑐵𑐩𑑂𑐥𑐾𑐣 𑐖𑐸𑐮 𑑋 𑐧𑑂𑐰𑐣𑐾𑐎𑐸𑐠𑐶𑐫𑐵 𑐔𑑂𑐫𑐵𑐐𑐹𑐣𑐶𑐳𑐾𑑄 𑐗𑐶𑐐𑐹 𑐟𑐐𑐶𑑄𑐫𑐵 𑐩𑐶𑐳𑐵 𑐩𑐳𑑂𑐟𑐫𑑂𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋𑐨𑐰𑐶𑐲𑑂𑐫𑐫𑑂 𑐩𑐶𑐳𑐵𑐟𑐫𑑂𑐟 𑐣𑑄 𑐁𑐂𑐚𑐷 𑐳𑐩𑑂𑐧𑐣𑑂𑐢𑐷 𑐖𑑂𑐫𑐵 𑐫𑐵𑐫𑐾𑐐𑐸𑐮𑐶𑐂 𑐥𑑂𑐬𑑀𑐟𑑂𑐳𑐵𑐴𑐶𑐟 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐣𑑂𑐴𑑂𑐫𑐵𑐎𑐹𑐐𑐸 𑐎𑐵𑐬𑑂𑐫𑐱𑐵𑐮𑐵 𑐐𑑀𑐲𑑂𑐛𑐶𑐥𑐵𑐏𑐾𑑄 𑐧𑑂𑐰𑐣𑐾𑐎𑐸𑐠𑐶𑐫𑐵 𑐧𑑂𑐰𑑃𑐩𑐶𑐥𑐶𑑄𑐳𑑄 𑐰𑐾𑐧𑐥𑐾𑐖𑐫𑐵 𑐜𑐶𑐖𑐵𑐂𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐳𑐫𑐾𑐎𑐹𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐰𑐶𑐢𑐶𑐫𑐵 𑐫𑐸𑐐𑐫𑑂 𑐂𑐣𑑂𑐚𑐬𑐣𑐾𑐚 𑐠𑑁𑑄 𑐀𑐟𑑂𑐫𑐵𑐰𑐱𑑂𑐫𑐎 𑐖𑐹𑐳𑐵𑑄 𑐠𑐸𑐎𑐶𑑄 𑐖𑐸𑐂𑐐𑐸 𑐦𑐵𑐂𑐡𑐵 𑐰 𑐧𑐾𑐦𑐵𑐂𑐡𑐵𑐫𑐵 𑐧𑐵𑐬𑐾 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐏𑑅 𑑋

𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐎𑑂𑐫𑐵𑐣 𑐦𑐾𑐜𑐾𑐬𑐾𑐳𑐣𑐫𑐵 𑐀𑐢𑑂𑐫𑐎𑑂𑐲 𑐴𑐾𑐩𑐣𑑂𑐟𑐎𑐸𑐩𑐵𑐬 𑐔𑑁𑐬𑐵𑐳𑐶𑐫𑐵, 𑐩𑐴𑐵𑐳𑐔𑐶𑐰 𑐬𑑄𑐖𑐶𑐟 𑐥𑑀𑐡𑑂𑐡𑐵𑐬, 𑐜𑐧𑑂𑐮𑐸𑐁𑐂𑐚𑐷 𑐎𑐩𑐶𑐚𑐷𑐫𑐵 𑐀𑐢𑑂𑐫𑐎𑑂𑐲 𑐬𑐟𑑂𑐣𑐟𑐵𑐬𑐵 𑐰𑐿𑐡𑑂𑐫, 𑐡𑐸𑐖𑑅𑐥𑐶𑑄 𑐐𑐸𑐞𑐾𑐱𑑂𑐰𑐬𑐷 𑐥𑑂𑐬𑐢𑐵𑐣, 𑐀𑐘𑑂𑐖𑐣𑐵 𑐮𑑀𑐴𑐣𑐷, 𑐬𑐾𑐩𑐵 𑐬𑐵𑐖𑐨𑐞𑑂𑐜𑐵𑐬𑐷, 𑐬𑑀𑐖𑐵 𑐰𑐵𑐳𑐸𑐎𑐮𑐵, 𑐱𑐷𑐮𑐵 𑐎𑐵𑐬𑑂𑐎𑐷 𑐮𑐐𑐵𑐫𑐟𑐥𑐶𑑄 𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐎𑑂𑐫𑐵𑐣𑐫𑐵 𑐀𑐢𑑂𑐫𑐎𑑂𑐲 𑐔𑑁𑐬𑐵𑐳𑐶𑐫𑐵𑑄 𑐮𑐶𑐥𑐵 𑐴𑐵𑐎𑐣𑑄 𑐩𑐶𑐳𑐵 𑐧𑑂𑐰𑑃𑐩𑐶𑐥𑐶𑑄 𑐣𑐵𑐥𑐣𑐵𑐥𑑄 𑐩𑐶𑐖𑑄 𑐧𑑂𑐰𑑃𑐩𑐶𑐥𑐶𑑄 𑐣𑑄 𑐡𑐸𑐠𑑂𑐫𑐵𑐎𑐵𑑅 𑐫𑐵𑐎𑐣𑑄 𑐩𑐾𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐜𑐧𑑂𑐮𑐸𑐁𑐂𑐚𑐷 𑐀𑐢𑑂𑐫𑐎𑑂𑐲 𑐰𑐿𑐡𑑂𑐫𑑄 𑐠𑑅𑐥𑐶𑑄𑐳𑑄 𑐰𑐶𑐔𑐵𑑅 𑐫𑐵𑐣𑐵𑐠𑐾𑑄 𑐧𑑂𑐰𑑃𑐩𑐶𑐥𑐶𑑄𑐳𑑄 𑐧𑐵𑑄𑐮𑐵𑐎 𑐳𑐫𑐾𑐎𑐹𑐐𑐸𑐮𑐶𑑄 𑐠𑑅𑐥𑐶𑑄 𑐣𑑄 𑐀𑐟𑐶𑐎𑑄 𑐮𑐫𑑂𑐟𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐟𑐵𑐮𑐶𑐩 𑐳𑐣𑑂𑐖𑐸 𑐁𑐔𑐵𑐬𑑂𑐫𑑄 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐧𑑂𑐰𑐣𑐾𑐎𑐸𑐠𑐶𑐫𑐵 𑐳𑑂𑐫𑐣𑐵𑐩𑐶𑐥𑐶𑑄 𑐁𑐱𑐶𑐲 𑐩𑐵𑐣𑐣𑑂𑐢𑐬 𑐰 𑐳𑐧𑐶𑐣 𑐬𑐵𑐣𑐵𑐩𑐐𑐬𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐰𑐾𑐧𑐥𑐾𑐖 𑐜𑐶𑐖𑐵𑐂𑐣 𑐫𑐵𑐣𑐵𑐡𑐷𑐥𑐶𑑄 𑐩𑐢𑑂𑐫𑐾 𑐣𑑂𑐫𑐵𑐩𑑂𑐴𑐾𑐳𑐶𑐟 𑐳𑐶𑐬𑐥𑐵𑑅 𑐣𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋