𑐔𑐾𑐟𑐣𑐵𑑄 𑐥𑐷𑐔𑑂𑐫𑐵𑐪 𑐰𑐶𑐡𑑂𑐫𑐵𑐬𑑂‍𑐠𑐷𑐫𑐵𑐟 𑐕𑐵𑐟𑑂𑐬𑐰𑐺𑐟𑑂𑐟𑐶 𑐮𑑅𑐯𑐵𑐟

𑐫𑐾𑑃 – 𑐔𑐾𑐟𑐣𑐵 𑐣𑐵𑑄𑐫𑐵 𑐳𑑄𑐳𑑂𑐠𑐵𑑄 𑐳𑑂𑐰𑐣𑐶𑐐𑑅𑐫𑐵 𑐣𑑂𑐫𑐵𑐐𑐹 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐩𑐸𑐎𑑂𑐎𑑄 𑐥𑐷𑐔𑑂𑐫𑐵𑐪 𑐰𑐶𑐡𑑂𑐫𑐵𑐬𑑂‍𑐠𑐷𑐫𑐵𑐟 𑐕𑐵𑐟𑑂𑐬𑐰𑐺𑐟𑑂𑐟𑐶 𑐮𑑅𑐯𑐵𑑅𑐐𑐸 𑐡𑐸 𑑋 𑐱𑐿𑐎𑑂𑐲𑐶𑐎 𑐡𑑃 𑑒𑑐𑑗𑑖 𑐣𑐶𑑄𑐟𑐶𑑄 𑐄𑐎𑐠𑑄 𑐰𑐶𑐡𑑂𑐫𑐵𑐬𑑂‍𑐠𑐷𑐟𑐫𑑂𑐟 𑐕𑐵𑐟𑑂𑐬𑐰𑐺𑐟𑑂𑐟𑐶 𑐮𑑅𑐯𑐵𑑅𑐐𑐸 𑐏𑑅 𑑋 𑐱𑐶𑐎𑑂𑐲𑐵, 𑐰𑐶𑐖𑑂𑐘𑐵𑐣 𑐟𑐠𑐵 𑐥𑑂𑐬𑐰𑐶𑐢𑐶𑐩𑐣𑑂𑐟𑑂𑐬𑐷 𑐐𑐶𑐬𑐶𑐬𑐵𑐖𑐩𑐞𑐶 𑐥𑑀𑐏𑐬𑐾𑐮𑑄 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐕𑐵𑐟𑑂𑐬𑐰𑐺𑐟𑑂𑐟𑐶 𑐮𑑅𑐯𑐵𑐣𑐵𑐡𑐷𑐐𑐸 𑐏𑑅 𑑋

𑑒𑑐𑑖𑑙 𑐳𑐵𑐮𑑄𑐣𑐶𑐳𑐾𑑄 𑐳𑑄𑐳𑑂𑐠𑐵𑑄 𑐤𑐶𑑄 𑐕𑐐𑐹 𑐎𑐥 𑐔𑑂𑐫𑐵 𑐧𑐬𑐵𑐧𑐬 𑐗𑐶𑐟𑐎𑐵 𑐡𑐵𑑄 𑐐𑑂𑐰𑐵𑐴𑐵𑐮𑐶 𑐩𑐸𑑄𑐎𑐵𑑅 𑐄𑐐𑐸 𑐂𑐮𑐫𑑂 𑐥𑑂𑐫𑐪 𑐰𑐶𑐡𑑂𑐫𑐵𑐬𑑂‍𑐠𑐷𑐫𑐵𑐟 𑐕𑐵𑐟𑑂𑐬𑐰𑐺𑐟𑑂𑐟𑐶 𑐧𑐷𑐐𑐸 𑐱𑐸𑐬𑐸 𑐫𑐵𑐣𑐵𑐐𑐸 𑐳𑑄𑐳𑑂𑐠𑐵𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐣𑑂𑐟𑑂𑐬𑐷 𑐥𑑀𑐏𑐬𑐾𑐮𑑄 𑐔𑐾𑐟𑐣𑐵𑑄 𑐱𑐶𑐎𑑂𑐲𑐵𑐫𑐵 𑐏𑑂𑐫𑐮𑐫𑑂 𑐫𑐵𑐣𑐵𑐔𑑂𑐰𑑄𑐐𑐸 𑐠𑐸𑐎𑐠𑑄𑐫𑐵 𑐔𑐶𑐢𑑄𑐐𑐸 𑐐𑑂𑐰𑐵𑐴𑐵𑐮𑐶𑑄 𑐱𑐿𑐎𑑂𑐲𑐶𑐎 𑐔𑐾𑐟𑐣𑐵 𑐀𑐨𑐶𑐰𑐺𑐡𑑂𑐢𑐶 𑐫𑐵𑐫𑐾𑐟 𑐪𑐶𑐟𑐹𑐐𑐸 𑐖𑑂𑐫𑐵𑐫𑐵𑐟 𑐎𑐫𑐵𑑅 𑐔𑑂𑐰𑐕𑐵𑐫𑐵𑐡𑐶𑐳𑐾𑑄 𑐠𑑅 𑐳𑑂𑐰𑐫𑑄 𑐣𑑄 𑐠𑐸𑐎𑐠𑑄𑐫𑐵 𑐄𑐡𑐵𑐴𑐬𑐞𑐷𑐫 𑐖𑑂𑐫𑐵𑐫𑑂 𑐳𑐴𑐨𑐵𑐐𑐶 𑐖𑐸𑐂𑐟 𑐤𑐶𑑄 𑐕𑐐𑐹 𑐎𑐥 𑐔𑑂𑐫𑐵 𑐧𑐬𑐵𑐧𑐬𑐫𑐵 𑐢𑑂𑐫𑐧𑐵 𑐳𑑄𑐳𑑂𑐠𑐵𑐫𑐵𑐟 𑐧𑐶𑐫𑐵𑑅 𑐔𑐾𑐟𑐣𑐵𑐫𑐵 𑐡𑐸𑐖𑑅 𑐖𑐸𑐫𑐵𑐐𑐸 𑐑𑑀𑐲𑐞𑐵 𑐣𑑄 𑐫𑐵𑐣𑐵𑐡𑐶𑐮 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐰𑐎𑑂𑐟𑐵𑐮𑐶𑐳𑐾𑑄 𑐰𑐜𑐵 𑐣𑑄. 𑑑𑑕𑐫𑐵 𑐰𑐜𑐵𑐀𑐢𑑂𑐫𑐎𑑂𑐲 𑐃𑐱𑑂𑐰𑐬𑐩𑐵𑐣 𑐜𑑄𑐐𑑀𑐮𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐰𑐬𑑂‍𑐟𑐩𑐵𑐣 𑐀𑐰𑐳𑑂𑐠𑐵𑐫𑑂 𑐬𑐵𑐖𑑂𑐫 𑐳𑑂𑐰𑐫𑑄 𑐤𑑂𑐫𑐔𑐶𑐮𑐾𑐩𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐔𑐾𑐟𑐣𑐵 𑐠𑐾𑑄𑐖𑑂𑐫𑐵𑑅𑐐𑐸 𑐳𑑄𑐳𑑂𑐠𑐵𑑄 𑐣𑐶𑑅𑐳𑑂𑐰𑐵𑐬𑑂‍𑐠 𑐬𑐸𑐥𑐫𑑂 𑐖𑑂𑐫𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐳𑑄𑐳𑑂𑐠𑐵𑐫𑐵 𑐀𑐨𑐶𑐫𑐵𑐣𑐫𑐵𑐟 𑐎𑐫𑐵𑑅 𑐔𑑂𑐰𑐕𑐵𑐫𑐵𑐡𑐶𑐮 𑑋

𑐐𑐷𑐟𑐵𑐩𑐵𑐟𑐵 𑐄.𑐩𑐵.𑐰𑐶.𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐴𑐬𑐶𑐎𑐺𑐲𑑂𑐞 𑐱𑑂𑐬𑐾𑐲𑑂𑐛𑑄 𑐠𑐸𑐎𑐠𑑄𑐫𑐵 𑐕𑐵𑐟𑑂𑐬𑐰𑐺𑐟𑑂𑐟𑐶 𑐮𑑅𑐯𑐵𑐫𑐾𑐐𑐸 𑐖𑑂𑐫𑐵𑑄 𑐁𑐬𑑂‍𑐠𑐶𑐎 𑐀𑐰𑐳𑑂𑐠𑐵 𑐎𑐩𑐖𑑀𑐬 𑐖𑐹𑐥𑐶𑑄 𑐰𑐶𑐡𑑂𑐫𑐵𑐬𑑂‍𑐠𑐷𑐟𑐫𑑂𑐎 𑐁𑐏𑑅 𑐧𑑂𑐰𑐣𑐾𑐩𑐵𑑅 𑐢𑐂𑐐𑐸 𑐨𑐵𑐰𑐣𑐵 𑐀𑐨𑐶𑐰𑐺𑐡𑑂𑐢𑐶 𑐖𑐸𑐂 𑐢𑐫𑐵𑐡𑐶𑐮 𑑋 𑐳𑐴𑐫𑑀𑐐𑐷 𑐳𑑄𑐳𑑂𑐠𑐵 𑐴𑐵𑐟𑑂𑐟𑐷𑐰𑐣 𑐳𑐵𑐩𑐵𑐖𑐶𑐎 𑐳𑑄𑐳𑑂𑐠𑐵𑐫𑐵 𑐩𑐫𑑂𑐖𑐸 𑐥𑑂𑐬𑐩𑐶 𑐱𑑂𑐬𑐾𑐲𑑂𑐛𑑄 𑐔𑐾𑐟𑐣𑐵𑐫𑐵 𑐔𑐶𑐢𑑄𑐐𑐸 𑐎𑐸𑐟𑐮𑑄 𑐱𑐸𑐬𑐸 𑐖𑐹𑐐𑐸 𑐖𑑂𑐫𑐵 𑐰 𑐟𑑅𑐨𑐸𑐏𑐵𑐫𑑂𑐫𑐵 𑐂𑐮𑐫𑑂 𑐰𑐶𑐡𑑂𑐫𑐵𑐮𑐫𑐫𑐵 𑐰𑐶𑐡𑑂𑐫𑐵𑐬𑑂‍𑐠𑐷𑐫𑐵𑐟 𑐫𑐵𑑅𑐐𑐸 𑐐𑑂𑐰𑐵𑐴𑐵𑐮𑐶𑐫𑐵𑐟 𑐣𑐶𑑄𑐟𑐶𑑄 𑐔𑐾𑐟𑐣𑐵𑐮𑐶𑐳𑐾𑑄 𑐳𑐴𑐎𑐵𑐬𑑂‍𑐫 𑐫𑐵𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮𑑋

𑐖𑑂𑐫𑐵𑐗𑑂𑐰𑐮𑐫𑑂 𑐜𑐮𑑂𑐮𑐸𑐫𑐵 𑐣𑐶𑐥𑐸 𑐴𑐶𑐟𑐶 𑐐𑑂𑐰𑐳𑐵𑑅 𑐏𑐮𑑅𑐫𑐵 𑐣𑐵𑐫𑑅 𑐟𑑂𑐬𑐶𑐬𑐟𑑂𑐣 𑐩𑐵𑐣𑐣𑑂𑐢𑐬𑑄 𑐣𑐶𑐪 𑐰𑐶𑐡𑑂𑐫𑐵𑐬𑑂‍𑐠𑐷𑐫𑐵𑐟 𑐕𑐵𑐟𑑂𑐬𑐰𑐺𑐟𑑂𑐟𑐶 𑐮𑑅𑐯𑐵𑐫𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅𑐳𑐵 𑐳𑐩𑐵𑐖𑐳𑐾𑐰𑐷 𑐥𑐬𑐩𑐵𑐣𑐣𑑂𑐡 𑐰𑐖𑑂𑐬𑐵𑐔𑐵𑐬𑑂‍𑐫𑑄 𑐗𑐶𑐡𑑂𑐰𑑅 𑐟𑐎𑐵 𑐡𑐵𑑄 𑐳𑑄𑐳𑑂𑐠𑐵𑐫𑐵 𑐣𑐵𑐫𑑅 𑐁𑐣𑐣𑑂𑐡𑐩𑐸𑐣𑐶 𑐰𑐖𑑂𑐬𑐵𑐔𑐵𑐬𑑂‍𑐫𑐫𑐵𑐟 𑐮𑑅𑐯𑐵𑐣𑐵𑐡𑐶𑐮 𑑋

𑐳𑑄𑐳𑑂𑐠𑐵𑐫𑐵 𑐣𑐵𑐫𑑅 𑐰𑐖𑑂𑐬𑐵𑐔𑐵𑐬𑑂‍𑐫𑑄 𑐕𑐏𑐾 𑐮𑐏𑑁𑑄 𑐟𑐎𑐵 𑐏𑐬𑑂‍𑐔 𑐫𑐵𑐣𑐵𑑅 𑐣𑐶𑐖𑐷 𑐳𑑂𑐎𑐸𑐮𑐫𑑂 𑐁𑐏𑑅 𑐧𑑂𑐰𑑄𑐎𑐵 𑐔𑑂𑐰𑑄𑐐𑐸 𑐡𑐸𑐳𑐵 𑐩𑐾𑐏𑐾 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐀𑐨𑐶𑐨𑐵𑐰𑐎𑐥𑐶𑑄 𑐁𑐰𑐱𑑂𑐫𑐎 𑐣𑑂𑐫𑐹𑐣𑐟𑐩 𑐱𑐿𑐎𑑂𑐲𑐶𑐎 𑐳𑐵𑐩𑐐𑑂𑐬𑐷 𑐟𑐎𑑄 𑐔𑐹𑐮𑐵𑐎𑐾 𑐦𑐸𑐐𑐸 𑐀𑐰𑐳𑑂𑐠𑐵 𑐡𑐸𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐳𑑄𑐳𑑂𑐠𑐵𑐫𑐵 𑐳𑐔𑐶𑐰 𑐬𑐷𑐣𑐵 𑐰𑐖𑑂𑐬𑐵𑐔𑐵𑐬𑑂‍𑐫𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐡𑐸𑐖𑑅 𑐜𑐵. 𑐔𑐣𑑂𑐡𑑂𑐬𑐾𑐱𑐬𑐟𑑂𑐣 𑐟𑐸𑐮𑐵𑐢𑐬𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋