𑐀𑐥𑐬𑑂𑐞𑐵 𑐥𑑂𑐬𑐢𑐵𑐣𑐫𑐵 𑐥𑑂𑐫𑑄𑐐𑐹 𑐳𑐦𑐹 𑐥𑐶𑐟𑐧𑑂𑐰𑐖𑑂𑐫𑐵

𑐫𑐮(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐣𑐵𑑄𑐖𑐵𑑅𑐩𑑂𑐴 𑐩𑐶𑐳𑐵 𑐳𑐵𑐴𑐶𑐟𑑂𑐫𑐎𑐵𑐬𑐮𑐶𑐳𑐾𑑄 𑐳𑐩𑐵𑐮𑑀𑐔𑐎 𑐀𑐥𑐬𑑂𑐞𑐵 𑐥𑑂𑐬𑐢𑐵𑐣𑐫𑐵 𑐥𑑂𑐫𑑄𑐐𑐹 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐖𑐸𑐮 𑑋 𑐎𑐸𑐟𑑅 𑐥𑐶𑐎𑐵𑐎𑑅𑐫𑐵 𑐐𑑂𑐰𑐳𑐵𑐮𑐫𑑂 𑐠𑐣𑐫𑐵 𑐮𑐸𑐨𑐸𑐂 𑐔𑑂𑐰𑑄𑐐𑐸 𑐩𑐴𑐵𑐮𑐎𑑂𑐲𑑂𑐩𑐷 𑐧𑑂𑐫𑐵𑑄𑐎𑑂𑐰𑐾𑐚𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐔𑐶𑐧𑐵𑐏𑑄 𑐩𑐸𑐣𑐵, 𑐁𑐟𑑂𑐩𑐰𑐺𑐟𑑂𑐟𑐵𑐣𑑂𑐟 𑐰 𑐳𑐩𑐵𑐮𑑀𑐔𑐣𑐵 𑐩𑐣𑐵𑐸 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐧𑐵𑐏𑑄 𑐔𑑂𑐰𑐩𑐶, 𑐣𑐶𑐧𑐣𑑂𑐢𑐎𑐵𑐬, 𑐄𑐥𑐣𑑂𑐫𑐵𑐳𑐎𑐵𑐮𑐶𑐳𑐾𑑄 𑐳𑐩𑐵𑐮𑑀𑐔𑐎 𑐥𑑂𑐬𑐢𑐵𑐣𑐫𑐵 𑐣𑐶𑐐𑐹 𑐔𑐶𑐧𑐵𑐏𑑄 𑐩𑐸𑐣𑐵 𑐳𑐦𑐹 ‘𑐫𑐵𑐣𑑂𑐟𑑂𑐬𑐶𑐎𑐥𑐸’ 𑐰 ‘𑐮𑑂𑐰𑐴𑑄 𑐡𑑂𑐫𑑅’ 𑐁𑐟𑑂𑐩𑐰𑐺𑐟𑑂𑐟𑐵𑐣𑑂𑐟 𑐳𑐦𑐹 ‘𑐥𑐸𑐣𑐬𑑂𑐖𑐣𑑂𑐩’ 𑐰 𑐳𑐩𑐵𑐮𑑀𑐔𑐣𑐵 𑐩𑐸𑐣𑐵 ‘𑐥𑑂𑐬𑐟𑐶𑐰𑐶𑐩𑑂𑐧’𑐫𑐵 𑐥𑐶𑐟𑐧𑑂𑐰𑐖𑑂𑐫 𑐫𑐵𑑅𑐐𑐸 𑐏𑑅 𑑋 𑐠𑐸𑐥𑐶𑑄 𑐳𑐦𑐹𑐟 𑐣𑐾𑐥𑐵𑐮 𑐳𑐵𑐴𑐶𑐟𑑂𑐫 𑐩𑐣𑑂𑐡𑐶𑐬𑐫𑐵 𑐳𑑄𑐳𑑂𑐠𑐵𑐥𑐎 𑐟𑐶𑐮𑐎𑐥𑑂𑐬𑐎𑐵𑐱 𑐎𑐵𑐫𑐳𑑂𑐠, 𑐳𑐵𑐴𑐶𑐟𑑂𑐫𑐎𑐵𑐬 𑐰 𑐳𑐩𑐵𑐮𑑀𑐔𑐎𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐳𑐩𑐵𑐮𑑀𑐔𑐎 𑐥𑐹𑐬𑑂𑐞 𑐟𑐵𑐩𑑂𑐬𑐵𑐎𑐵𑐬 𑐰 𑐩𑐴𑐵𑐮𑐎𑑂𑐲𑑂𑐩𑐷 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐴𑐬𑐶𑐐𑑀𑐰𑐶𑐣𑑂𑐡 𑐱𑑂𑐬𑐾𑐲𑑂𑐛𑑄 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐊𑐎𑐾𑐡𑐾𑐩𑐶𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐜𑐵. 𑐬𑐵𑐖𑐎𑐬𑑂𑐞𑐶𑐎𑐵𑐬𑑄 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐳𑐦𑐹𑐫𑐵𑐟 𑐎𑐫𑐵𑑅 𑐳𑐩𑐷𑐎𑑂𑐲𑐵𑐟𑑂𑐩𑐎 𑐚𑐶𑐥𑑂𑐥𑐞𑐷 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐫𑐵𑐣𑑂𑐟𑑂𑐬𑐶𑐎𑐥𑐸𑐬 𑐳𑐦𑐸𑐟𑐶𑐂 𑐔𑑂𑐰𑐩𑐶𑑄 𑐩𑐵𑐬𑑂𑐩𑐶𑐎 𑐢𑑄𑐐𑑄 𑐣𑑂𑐴𑐹 𑐥𑐸𑐳𑑂𑐟𑐵𑐟 𑐰𑐶𑐡𑐾𑐱 𑐥𑐮𑐵𑐫𑐣 𑐖𑐸𑐂𑐐𑐸 𑐎𑑂𑐬𑐩 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸𑐫𑐵𑐟 𑐔𑐶𑐟𑑂𑐬𑐞 𑐫𑐵𑐣𑐵 𑐟𑐫𑐵𑐡𑐷𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐠𑐸𑐎𑐠𑑄𑐫𑐵 𑐰𑐶𑐲𑐫 𑐄𑐟𑑂𑐠𑐵𑐣 𑐫𑐵𑐣𑐵𑐡𑐷𑐐𑐸𑐮𑐶𑑄 𑐔𑑂𑐰𑐩𑐶𑐥𑑂𑐬𑐟𑐶 𑐁𑐨𑐵𑐬 𑐥𑑂𑐰𑑄𑐎𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐠𑑁𑑄𑐎𑐣𑑂𑐴𑐫𑑂𑐫𑐵 𑐣𑑂𑐴𑐹 𑐥𑐸𑐳𑑂𑐟𑐵 𑐧𑑂𑐰𑐣𑐵𑑅 𑐳𑐎𑑂𑐲𑐩 𑐖𑐸𑐂𑐢𑐸𑑄𑐎𑐵𑑅 𑐰𑐶𑐡𑐾𑐱 𑐥𑐮𑐵𑐫𑐣 𑐖𑐸𑐂𑐐𑐸 𑐎𑑂𑐬𑐩 𑐀𑐥𑑂𑐰𑐫𑐵𑐔𑑂𑐰𑑄𑐐𑐸 𑐏𑑃𑐫𑑂 𑐔𑐶𑐄𑐟𑐵𑑅 𑐥𑑂𑐰𑑄𑐎𑐵𑐡𑐶𑐳𑐾𑑄 𑐠𑐸𑐎𑐶𑐫𑐵𑐟 𑐥𑐣𑐾𑐐𑐸 𑐖𑑂𑐫𑐵 𑐫𑐵𑐫𑐾 𑐩𑐦𑐸𑐟 𑐢𑐵𑑅𑐳𑐵 𑐰𑐂𑐐𑐸 𑐡𑐶𑐣𑐫𑑂 𑐣𑐾𑐥𑐵𑑅 𑐕𑐐𑐹𑐎𑐠𑑄𑐫𑐵 𑐰𑐺𑐡𑑂𑐢𑐵𑐱𑑂𑐬𑐩 𑐠𑐾𑑄 𑐖𑐹 𑐰𑐣𑐷𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐏𑑃 𑐳𑐦𑐸𑐟𑐶𑐂 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐰 𑐠𑑂𑐰 𑐡𑐎𑐮𑐫𑑂 𑐔𑐶𑐄𑐟𑐵𑑅𑐫𑐵 𑐰𑐶𑐲𑐫 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐢𑐫𑐵𑐡𑐶𑐮 𑑋