𑐫𑐮 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷ 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑑄 𑐥𑐵𑐚𑐣 𑐎𑑂𑐫𑐵𑐩𑑂𑐥𑐳𑐫𑑂 𑐣𑐾𑐥𑐵𑐮𑐨𑐵𑐲𑐵 𑐎𑐫𑐵𑑅 𑐊𑐩𑐊 𑐫𑐵𑐂𑐥𑐶𑑄 𑐣𑑂𑐫𑐵𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐱𑐟𑐥𑑂𑐬𑐟𑐶𑐱𑐟 𑐕𑐵𑐟𑑂𑐬𑐰𑐺𑐟𑑂𑐟𑐶 𑐧𑐷𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑐷𑐣𑐶𑐡𑑃 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐳𑑀𑐩𑐰𑐵𑑅 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑃 𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐩𑐾𑐫𑐬 𑐩𑐴𑐬𑑂𑐖𑐣𑑄 𑐠𑑂𑐰 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸, ‘𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑑄 𑐳𑐶𑐦𑐵𑐬𑐶𑐳 𑐫𑐵𑐣𑐵𑐴𑑅𑐎𑐠𑑄 𑐣𑑂𑐫𑐵𑐩𑑂𑐴𑐾𑐳𑐶𑐫𑐵 𑐏𑐬𑑂𑐔 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐱𑐟𑐥𑑂𑐬𑐟𑐶𑐱𑐟 𑐰𑑂𑐫𑐴𑑀𑐬𑐾 𑐫𑐵𑐫𑐾𑐐𑐸 𑐖𑐸𑐂 𑑋’ 𑐀𑐠𑐾𑐴𑐾 𑐰𑐫𑑂𑐎𑐮𑑄 𑐫𑐮𑐫𑐵 𑐠𑐷𑐠𑐷 𑐠𑐵𑐫𑑂𑐫𑐵 𑐥𑐸𑐮𑐵𑑄𑐐𑐸 𑐣𑐵𑑄 𑐳𑐩𑑂𑐧𑐣𑑂𑐢𑐷 𑐀𑐣𑐸𑐳𑐣𑑂𑐢𑐵𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐣𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐥𑐵𑐏𑐾𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐧𑐔𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐜𑐵. 𑐬𑐵𑐖𑐣𑐮𑐵𑐮 𑐖𑑀𑐱𑐷𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑐵𑐚𑐣 𑐎𑐮𑐾𑐖𑐫𑑂 𑐣𑐾𑐥𑐵𑐮𑐨𑐵𑐲𑐵 𑐎𑐫𑐵𑑅 𑐧𑑂𑐰𑑄𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐥𑐶𑐫𑐸𑐲 𑐥𑐡𑐎, 𑐳𑐟𑑂𑐫𑐴𑐾𑐬𑐵 𑐳𑐶𑐬𑐥𑐵𑑅, 𑐫𑑀𑐐𑐰𑐷𑐬𑐳𑐶𑑄𑐴 𑐀𑐣𑐸𑐳𑐣𑑂𑐢𑐵𑐣 𑐰𑐺𑐟𑑂𑐟𑐶, 𑐥𑐸𑐲𑑂𑐥𑐵𑐡𑐾𑐰𑐷 𑐕𑐵𑐟𑑂𑐬𑐰𑐺𑐟𑑂𑐟𑐶, 𑐦𑐿𑐐𑐸𑐮𑐶 𑐳𑐶𑐬𑐥𑐵𑑅, 𑐱𑑂𑐬𑐾𑐲𑑂𑐛 𑐥𑐡𑐎 𑐣𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐣𑑂𑐴𑐫𑑂𑐡𑑃 𑐣𑑂𑐴𑑂𑐫𑐰𑐣𑐶𑐳𑐾𑑄 𑐡𑐶𑐣𑐵𑐔𑑂𑐰𑑄𑐐𑐸 𑐠𑐸𑐥𑐶𑑄 𑐳𑐶𑐬𑐥𑐵𑑅 𑐣𑐾.𑐳𑑄. 𑑑𑑑𑑓𑑖 𑐣𑐶𑐳𑐾𑑄 𑑑𑑑𑑔𑑒 𑐟𑐎𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐥𑐶𑐫𑐸𑐲 𑐥𑐡𑐎 𑐨𑐬𑐟 𑐩𑐴𑐬𑑂𑐖𑐣 (𑐣𑐾.𑐳𑑄. 𑑑𑑑𑑓𑑖), 𑐬𑐵𑐖𑐾𑐣𑑂𑐡𑑂𑐬 𑐱𑐵𑐎𑑂𑐫 (𑑑𑑑𑑓𑑗), 𑐬𑐵𑐎𑐾𑐱 𑐩𑐴𑐬𑑂𑐖𑐣 (𑑑𑑑𑑓𑑘), 𑐎𑐰𑐶𑐣 𑐱𑑂𑐬𑐾𑐲𑑂𑐛 (𑑑𑑑𑑓𑑙)𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐀𑐠𑐾𑐴𑐾 𑐳𑐟𑑂𑐫𑐴𑐾𑐬𑐵 𑐳𑐶𑐬𑐥𑐵 𑐱𑐵𑐣𑑂𑐟 𑐩𑐴𑐬𑑂𑐖𑐣 (𑐖𑑂𑐘𑐖𑑂𑐘𑐡𑑂𑐢𑐖𑑂𑐘)𑐫𑐵𑐟, 𑐫𑑀𑐐𑐰𑐷𑐬 𑐳𑐶𑑄 𑐀𑐣𑐸𑐳𑐣𑑂𑐢𑐵𑐣 𑐧𑐺𑐟𑐶 𑐬𑐵𑐖𑐾𑐣𑑂𑐡𑑂𑐬 𑐱𑐵𑐎𑑂𑐫 (𑑑𑑑𑑓𑑗), 𑐀𑐬𑑂𑐰𑐶𑐣𑑂𑐡𑑂𑐬𑐩𑐵𑐣 𑐳𑐶𑑄 (𑑑𑑑𑑓𑑘), 𑐎𑐶𑐬𑐞𑐎𑐾𑐣 𑐬𑑄𑐖𑐶𑐟 (𑑑𑑑𑑓𑑙) 𑐫𑐵𑐟, 𑐥𑐸𑐲𑑂𑐥𑐡𑐾𑐰𑐷 𑐕𑐵𑐟𑑂𑐬𑐰𑐺𑐟𑐶 𑐬𑐵𑐖𑐣 𑐱𑑂𑐬𑐾𑐲𑑂𑐛, 𑐳𑐬𑐶𑐣𑐵 𑐬𑑄𑐖𑐶𑐟, 𑐣𑐶𑐟𑐸 𑐜𑑄𑐐𑑀𑐮, 𑐳𑐸𑐡𑐷𑐥 𑐩𑐴𑐬𑑂𑐖𑐣𑐫𑐵𑐟, 𑐦𑐿𑐐𑐸𑐮𑐶 𑐳𑐶𑐬𑐥𑐵𑑅 𑐬𑐵𑐩𑐾𑐱𑑂𑐰𑐬 𑐱𑑂𑐬𑐾𑐲𑑂𑐛𑐫𑐵𑐟 𑐰 𑐱𑑂𑐬𑐾𑐲𑑂𑐛 𑐥𑐡𑐎 𑐨𑐬𑐟 𑐩𑐴𑐬𑑂𑐖𑐣, 𑐳𑐺𑐲𑑂𑐚𑐶 𑐱𑑂𑐬𑐾𑐲𑑂𑐛, 𑐣𑐵𑐣𑐷𑐴𑐾𑐬𑐵 𑐥𑑂𑐬𑐖𑐵𑐥𑐟𑐶 (𑑑𑑑𑑓𑑖), 𑐬𑐵𑐖𑐾𑐣𑑂𑐡𑑂𑐬 𑐱𑐵𑐎𑑂𑐫, 𑐟𑐾𑐖𑐩𑐵𑐫𑐵 𑐩𑐴𑐬𑑂𑐖𑐣, 𑐥𑑄𑐎𑐖 𑐣𑐎𑐬𑑂𑐩𑐶, 𑐬𑐵𑐩𑐾𑐱𑑂𑐰𑐬 𑐱𑑂𑐬𑐾𑐲𑑂𑐛 (𑑑𑑑𑑓𑑗), 𑐬𑐵𑐎𑐾𑐱 𑐩𑐴𑐬𑑂𑐖𑐣, 𑐳𑐸𑐖𑐮 𑐰𑐖𑑂𑐬𑐵𑐔𑐵𑐬𑑂𑐫, 𑐡𑐬𑑂𑐱𑐣𑐰𑐷𑐬 𑐱𑐵𑐎𑑂𑐫 (𑑑𑑑𑑓𑑘), 𑐎𑐰𑐶𑐣 𑐱𑑂𑐬𑐾𑐲𑑂𑐛, 𑐎𑐰𑐶𑐣𑐵 𑐣𑐾𑐥𑐵𑐮𑐷, 𑐳𑐶𑐮𑑂𑐨𑐵 𑐥𑑂𑐬𑐢𑐵𑐣 (𑑑𑑑𑑓𑑙) 𑐫𑐵𑐟, 𑐳𑐟𑑂𑐫𑐴𑐾𑐬𑐵 𑐀𑐣𑐸𑐳𑐣𑑂𑐢𑐵𑐣 𑐳𑐸𑐨𑐵𑐫 𑐥𑑁 𑐬𑐰𑐶𑐣𑑂𑐡𑑂𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐥𑑂𑐬𑐖𑐶𑐟 𑐱𑐵𑐎𑑂𑐫, 𑐎𑐺𑐲𑑂𑐞𑐥𑑂𑐫𑐵𑐬𑐷 𑐱𑑂𑐬𑐾𑐲𑑂𑐛 𑐰 𑐣𑐰𑐷𑐣 𑐥𑑂𑐬𑐎𑐵𑐱 𑐱𑑂𑐬𑐾𑐲𑑂𑐛𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑐸𑐲𑑂𑐥𑐵𑐡𑐾𑐰𑐷 𑐳𑐶𑐬𑐥𑐵𑑅𑐫𑐵 𑐡𑐵𑐟𑐵 𑐥𑐘𑑂𑐔𑐰𑐷𑐬𑐳𑐶𑑄𑐴 𑐟𑐸𑐮𑐵𑐢𑐬𑑄 𑐠𑑂𑐰 𑐳𑐶𑐬𑐥𑐵𑑅 𑐣𑐶𑐬𑐣𑑂𑐟𑐬 𑐫𑐵𑐣𑐵𑐟𑐫𑐾𑐐𑐸 𑐣𑐶𑑄𑐟𑐶𑑄 𑐣𑑂𑐫𑐵𑐐𑐹 𑐮𑐵𑐏 𑐟𑐎𑐵𑐫𑐵 𑐀𑐎𑑂𑐲𑐫𑐎𑑀𑐲 𑐣𑐷𑐳𑑂𑐰𑐣𑐾𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐥𑑂𑐬𑐵. 𑐥𑑂𑐬𑐎𑐵𑐱 𑐏𑐜𑑂𑐐𑐷𑑄 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐀𑐎𑑂𑐲𑐫 𑐎𑑀𑐲𑐫𑐵 𑐣𑐶𑑄𑐟𑐶𑑄 𑐕𑐐𑐹𑐮𑐵𑐏 𑐟𑐎𑐵 𑐧𑐷𑐐𑐸 𑐑𑑀𑐲𑐞𑐵 𑐣𑑄 𑐫𑐵𑑅𑐐𑐸 𑐏𑑅 𑑋 𑐀𑐠𑐾𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐬𑐰𑐶𑐣 𑐱𑑂𑐬𑐾𑐲𑑂𑐛𑑄 𑐔𑑂𑐰𑐫𑐵𑐡𑐷𑐐𑐸 ‘𑐳𑐩𑐵𑐖 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑐵 𑐕𑐸𑑄’ 𑐳𑐦𑐹 𑐰 𑐣𑐾𑐥𑐵𑐮𑐨𑐵𑐲𑐵 𑐖𑐬𑑂𑐣𑐮 𑐣𑑄 𑐰𑐶𑐩𑑀𑐔𑐣 𑐖𑐹𑐐𑐸 𑐏𑑅 𑑋