𑐀𑐣𑐮𑐵𑐂𑐣 𑐎𑑂𑐮𑐵𑐳𑑄 𑐫𑐵𑐣𑐵𑑅 𑐧𑐖𑐵𑐬𑐫𑑂 𑐮𑑂𑐫𑐵𑐥𑐚𑐥 𑐀𑐨𑐵𑐰

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳) – 𑐦𑐸𑐎𑑂𑐎 𑐳𑑂𑐎𑐹𑐮𑐟𑐫𑑂𑐳𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐀𑐣𑐮𑐵𑐂𑐣 𑐎𑐎𑑂𑐲𑐵 𑐎𑐵𑐫𑐾𑐐𑐸 𑐱𑐸𑐬𑐸 𑐫𑐵𑐣𑐵 𑐴𑐫𑐾𑐰𑑄 𑐧𑐖𑐵𑐬𑐫𑑂 𑐮𑑂𑐫𑐵𑐥𑐚𑐥𑐫𑐵 𑐀𑐨𑐵𑐰 𑐱𑐸𑐬𑐸 𑐖𑐹𑐐𑐸 𑐡𑐸𑑋 𑐔𑐶𑐔𑐷𑐢𑐶𑐎𑑅𑐥𑐶𑑄 𑐩𑐳𑑂𑐟𑐫𑑂𑐟 𑐟𑐎𑑄 𑐀𑐣𑐮𑐵𑐂𑐣𑐩𑐵𑐬𑑂𑐦𑐟 𑐎𑐎𑑂𑐲𑐵 𑐎𑐵𑐫𑐾𑐐𑐸 𑐱𑐸𑐬𑐸 𑐖𑐸𑐂𑐰𑑄 𑐧𑐖𑐵𑐬𑐫𑑂 𑐮𑑂𑐫𑐵𑐥𑐚𑐥 𑐟𑐎𑑄 𑐣𑑂𑐫𑐵𑐫𑐾𑐐𑐸 𑐩𑐡𑐫𑐵𑐰𑑄𑐐𑐸 𑐏𑑅 𑑋

𑐎𑐩𑑂𑐥𑑂𑐫𑐸𑐚𑐬 𑐥𑐳𑐮𑑂𑐫𑐵𑐟𑐫𑑂𑐳𑑄 𑐢𑐵𑑅𑐎𑐠𑑄 𑐠𑑁𑑄𑐎𑐣𑑂𑐴𑐫𑑂 𑐮𑑂𑐫𑐵𑐥𑐚𑐥𑐫𑐵 𑐟𑑅𑐢𑑄𑐐𑐸 𑐩𑐵𑐐 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐟𑐬 𑐩𑐵𑐐𑐎𑐠𑑄 𑐥𑐹𑐬𑑂𑐟𑐶 𑐢𑐵𑑅𑐳𑐵 𑐫𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸𑐣𑐶 𑑋 𑐎𑑀𑐬𑑀𑐣𑐵𑐫𑐵 𑐎𑐵𑐬𑐞𑑄
𑐰𑐶𑐱𑑂𑐰𑐣𑑂𑐫𑑄𑐎𑑄 𑐫𑐵𑐟𑐵𑐫𑐵𑐟 𑐧𑐣𑑂𑐡 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐥𑐶𑐣𑐾𑑄 𑐳𑐵𑐩𑐵𑐣 𑐡𑐸𑐴𑐵𑑄 𑐰𑐫𑐾𑐐𑐸 𑐧𑐣𑑂𑐡 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐧𑐖𑐵𑐬𑐫𑑂 𑐣𑑂𑐴𑐹𑐐𑐸 𑐮𑑂𑐫𑐵𑐥𑐚𑐥 𑐰𑐫𑐵𑐔𑑂𑐰𑑄𑐐𑐸 𑐩𑐡𑐸𑑋 𑐣𑑂𑐴𑐹𑐐𑐸 𑐳𑐵𑐩𑐵𑐣 𑐩𑐡𑐸𑐐𑐸𑐮𑐶𑑄 𑐧𑐖𑐵𑐬𑐫𑑂 𑐮𑑂𑐫𑐵𑐥𑐚𑐥𑐫𑐵 𑐩𑐵𑐐 𑐡𑐸𑐳𑐵𑑄 𑐁𑐥𑐹𑐬𑑂𑐟𑐶 𑐢𑐵𑑅𑐳𑐵 𑐖𑐸𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋

𑐫𑐾𑑃𑐫𑐵 𑐥𑐵𑐎𑑀, 𑐡𑐬𑐰𑐵𑐬𑐩𑐵𑐬𑑂𑐐 𑐁𑐡𑐶 𑐠𑐾𑑄𑐖𑑂𑐫𑐵𑑅𑐐𑐸 𑐧𑐖𑐵𑐬𑐫𑑂 𑐠𑑁𑑄𑐎𑐣𑑂𑐴𑐫𑑂 𑐣𑑂𑐴𑐹𑐐𑐸 𑐩𑑀𑐜𑐾𑐮𑐫𑐵 𑐮𑑂𑐫𑐵𑐥𑐚𑐥 𑐣𑑂𑐫𑐵𑐫𑐾𑐐𑐸 𑐩𑐡𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸𑑋 𑐣𑑂𑐴𑐹𑐐𑐸 𑐮𑑂𑐫𑐵𑐥𑐚𑐥 𑐩𑐰𑑅𑐐𑐸 𑐖𑐸𑐫𑐵𑑅 𑐧𑐖𑐵𑐬𑐫𑑂 𑐥𑐸𑐮𑐵𑑄𑐐𑐸 𑐳𑑂𑐚𑐎𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐮𑑂𑐫𑐵𑐥𑐚𑐥 𑐳𑐩𑐾𑐟 𑐩𑐷𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐎𑐩𑑂𑐥𑑂𑐫𑐸𑐚𑐬 𑐥𑐳𑐮𑑂𑐫𑐵𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸𑑋 ‘𑐩𑑀𑐜𑐮 𑐥𑐸𑐮𑐵𑑄 𑐖𑐸𑐫𑐵𑑅 𑐮𑐶𑐟 𑐕𑑂𑐰𑐫𑐾𑐟 𑐛𑐶𑐎𑑂𑐎 𑐫𑐵𑐣𑐵 𑐟𑐫𑐵𑐐𑐸 𑐮𑑂𑐫𑐵𑐥𑐚𑐥 𑐟𑐎𑑄 𑐁𑑅 𑐩𑐶𑐫𑐵𑐔𑑂𑐰𑐣𑐵𑐐𑐸 𑐡𑐸’ 𑐥𑐵𑐎𑑀𑐫𑐵 𑐕𑐩𑑂𑐴 𑐎𑐩𑑂𑐥𑑂𑐫𑐸𑐚𑐬 𑐥𑐳𑐮𑑂𑐫𑐵𑑄 ‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳’ 𑐫𑐵𑐟 𑐎𑐣𑐵𑐡𑐶𑐮 𑑋

𑐩𑐵𑐐 𑐫𑐎𑑂𑐰 𑐰𑑅𑐐𑐸 𑐖𑐸𑐫𑐵𑑅 𑐧𑐖𑐵𑐬𑐫𑑂 𑐣𑑂𑐴𑐹𑐐𑐸 𑐩𑑀𑐜𑐮𑐫𑐵 𑐮𑑂𑐫𑐵𑐥𑐚𑐎 𑐠𑐶𑐎𑐫𑑂𑐎 𑐩𑐷𑐐𑐸 𑐖𑑂𑐫𑐵 𑐟𑐎𑑄 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮 𑑋 ‘𑐥𑐸𑐮𑐵𑑄𑐐𑐸 𑐩𑑀𑐜𑐾𑐮 𑐮𑐵 𑐟𑐫𑐾 𑐩𑐮𑐵𑑅, 𑐣𑑂𑐴𑐹𑐐𑐸𑐫𑐵 𑐨𑐵𑑅 𑐳𑐸𑐣𑐵𑑄 𑐎𑑂𑐰𑐎𑐵𑐂 ?’ 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐳𑑂𑐎𑐹𑐮 𑐧𑑂𑐰𑐣𑐷𑐥𑐶𑑄 𑐩𑐳𑑂𑐟𑐫𑑂𑐟 𑐮𑑂𑐫𑐵𑐥𑐚𑐥 𑐀𑐣𑐶𑐰𑐵𑐬𑑂𑐫 𑐠𑐾𑑄 𑐖𑐹𑐐𑐸𑐮𑐶𑑄 𑐣𑐶𑐩𑑂𑐣 𑐁𑐫 𑐡𑐸𑐥𑐶𑑄 𑐀𑐨𑐶𑐨𑐵𑐰𑐎𑐟𑐫𑑂𑐟 𑐢𑐵𑑅𑐳𑐵 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐳𑐷𑐡𑐸𑐐𑐸 𑐡𑐸𑑋 𑐣𑑂𑐴𑐹𑐐𑐸 𑐮𑑂𑐫𑐵𑐥𑐚𑐥 𑐣𑑂𑐫𑐵𑐫𑐾 𑐩𑐦𑐸𑐥𑐶𑑄
𑐀𑐨𑐶𑐨𑐵𑐰𑐎𑐟𑐫𑑂𑐳𑑄 𑐥𑐸𑐮𑐵𑑄𑐐𑐸 ‘𑐳𑐾𑐎𑐾𑐞𑑂𑐜 𑐴𑑂𑐫𑐵𑐞𑑂𑐜’ 𑐮𑑂𑐫𑐵𑐥𑐚𑐥 𑐟𑐎𑑄 𑐣𑑂𑐫𑐵𑐣𑐵𑑅 𑐖𑑂𑐫𑐵 𑐔𑐮𑐾 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐮𑑂𑐫𑐵𑐥𑐚𑐥 𑐣𑑂𑐫𑐵𑐫𑐾 𑐩𑐦𑐸𑐥𑐶𑑄 𑐣𑐶𑐩𑑂𑐣 𑐁𑐫 𑐀𑐨𑐶𑐨𑐵𑐰𑐎𑐟𑐫𑑂𑐳𑑄 𑐠𑑅 𑐩𑐳𑑂𑐟𑐫𑑂𑐟 𑐩𑑀𑐧𑐵𑐂𑐮 𑐦𑑀𑐣 𑐖𑑂𑐰𑑄𑐎𑐵𑑅 𑐖𑐹𑐳𑐵𑑄 𑐧𑑂𑐰𑑄𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐣𑑄 𑐮𑐹𑐐𑐸 𑐡𑐸 𑑋