𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐮𑐮𑐾𑐣𑑂𑐡𑑂𑐬 𑐱𑐵𑐎𑑂𑐫 | 𑑒𑑐𑑗𑑗 𑐁𑐲𑐵𑐝 𑑒𑑒, 𑐳𑑀𑐩𑐧𑐵𑐬 𑑑𑑔:𑑕𑑙:𑑐𑑘

𑐳𑐬𑐎𑐵𑐬𑐮𑐶𑐳𑐾𑐫𑐵 𑐰𑐵𑐬𑑂𑐟𑐵 𑐳𑐎𑐵𑐬𑐵𑐟𑑂𑐩𑐎 𑐖𑐹𑐐𑐸 𑐢𑐵𑐳𑐾𑑄 𑐣𑐷𑐖𑐶 𑐳𑑂𑐎𑐹𑐮 𑐳𑑄𑐔𑐵𑐮𑐎𑐥𑐶𑐣𑑂𑐳𑑄 𑐁𑐣𑑂𑐡𑑀𑐮𑐣𑐫𑐵 𑐖𑑂𑐫𑐵𑐗𑑂𑐰𑑅 𑐳𑑂𑐠𑐐𑐶𑐟 𑐫𑐵𑑅𑐐𑐸 𑐡𑐸 𑑋 𑐂𑐩𑐶𑐳𑑄 𑐀𑐣𑐮𑐵𑐂𑐣 𑐀𑐢𑑂𑐫𑐫𑐣 𑐀𑐢𑑂𑐫𑐵𑐥𑐣 𑐀𑐰𑐬𑐸𑐡𑑂𑐢 𑐩𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐟𑐎𑑄 𑐫𑐵𑑅𑐐𑐸 𑐡𑐸 𑑋

𑐱𑐶𑐎𑑂𑐲𑐵, 𑐰𑐶𑐖𑑂𑐘𑐵𑐣 𑐰 𑐥𑑂𑐬𑐰𑐶𑐢𑐶𑐩𑐣𑑂𑐟𑑂𑐬𑐷 𑐐𑐶𑐬𑐶𑐬𑐵𑐖𑐩𑐞𑐶 𑐥𑑀𑐏𑐬𑐾𑐮𑐮𑐶𑐳𑐾 𑐁𑐂𑐟𑐰𑐵𑑅 𑐖𑐹𑐐𑐸 𑐳𑐴𑐮𑐴𑐳 𑐠𑑅𑐥𑐶𑐣𑐶𑐐𑐸 𑐩𑐵𑐐 𑐥𑐹𑐰𑐣𑐷𑐐𑐸 𑐳𑑄𑐎𑐾𑐟 𑐏𑐣𑐾𑐡𑐹𑐐𑐸 𑐰 𑐳𑑄𑐰𑐵𑐡 𑐖𑐵𑐬𑐷 𑐖𑐹𑐐𑐸𑐮𑐶𑑄 𑐁𑐣𑑂𑐡𑑀𑐮𑐣 𑐳𑑂𑐠𑐐𑐶𑐟 𑐫𑐵𑐣𑐵𑐐𑐸 𑐣𑐷𑐖𑐶 𑐰 𑐳𑑄𑐳𑑂𑐠𑐵𑐐𑐟 𑐳𑑂𑐎𑐹𑐮 𑐀𑐬𑑂𑐐𑐣𑐵𑐂𑐖𑐾𑐳𑐣 𑐣𑐾𑐥𑐵𑐮 (𑐥𑑂𑐫𑐵𑐧𑑂𑐳𑐣)𑐫𑐵 𑐣𑐵𑐫𑑅 𑐚𑐶𑐎𑐵𑐬𑐵𑐩 𑐥𑐸𑐬𑐷𑑄 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐡𑐸 𑑋

𑐮𑐎𑐜𑐵𑐄𑐣 𑐀𑐰𑐢𑐶𑐫𑐵 𑐣𑑄 𑐱𑐸𑐮𑑂𑐎 𑐎𑐵𑐫𑐾𑐩𑐏𑑄𑐐𑐸 𑐢𑐵𑐳𑐾𑑄 𑐳𑑂𑐎𑐹𑐮 𑐳𑑄𑐔𑐵𑐮𑐎𑐥𑐶𑐣𑑂𑐳𑑄 𑐁𑐣𑑂𑐡𑑀𑐮𑐣𑐫𑐵 𑐖𑑂𑐫𑐵𑐗𑑂𑐰𑑅 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐏𑑅 𑑋 𑐳𑐬𑐎𑐵𑐬𑑄 𑐁𑐢𑐶𑐎𑐵𑐬𑐶𑐎 𑐬𑐸𑐥𑑄 𑐀𑐳𑐵𑐬𑐣𑐶𑐳𑐾𑑄 𑐖𑐎 𑐀𑐣𑐮𑐵𑐂𑐣 𑐎𑐎𑑂𑐲𑐵 𑐣𑑂𑐴𑑂𑐫𑐵𑐎𑐹𑐳𑐵𑑄 𑐣𑑄 𑐥𑑂𑐫𑐵𑐧𑑂𑐳𑐣 𑐰 𑐊𑐣𑐥𑑂𑐫𑐵𑐧𑑂𑐳𑐣 (𑐣𑐷𑐖𑐶 𑐰 𑐳𑑄𑐳𑑂𑐠𑐵𑐐𑐟 𑐳𑑂𑐎𑐹𑐮 𑐀𑐬𑑂𑐐𑐣𑐵𑐂𑐖𑐾𑐳𑐣𑑄) 𑐢𑐵𑑅𑐳𑐵 𑐧𑐿𑐱𑐵𑐏𑐣𑐶𑐳𑐾𑑄 𑐴𑐾 𑐱𑐸𑐮𑑂𑐎 𑐎𑐵𑐫𑐾 𑐡𑐫𑐾𑐩𑐵𑑅𑐐𑐸 𑐩𑐵𑐐 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐎𑑀𑐨𑐶𑐜 𑑑𑑙 𑐩𑐴𑐵𑐩𑐵𑐬𑐷 𑐡𑐠𑐸𑐂 𑐟𑐸𑐬𑐸𑐣𑑂𑐟 𑐴𑐾 𑐰𑐶𑐡𑑂𑐫𑐵𑐬𑑂𑐠𑐷 𑐨𑐬𑑂𑐣𑐵 𑐫𑐵𑐫𑐾𑐡𑐫𑐾𑐩𑐵𑑅𑐐𑐸 𑐂𑐩𑐶𑐐𑐸 𑐩𑐵𑐐 𑐡𑐸 𑑋 𑐳𑐬𑐎𑐵𑐬𑑄 𑐧𑐿𑑄𑐎 𑐧𑑂𑐫𑐵𑐖 𑐰 𑐳𑑂𑐎𑐹𑐮 𑐨𑐰𑐣𑐫𑐵 𑐧𑐵𑐮𑑄 𑐩𑐶𑐣𑐵𑐴𑐵𑐠𑐾𑑄 𑐖𑐵𑑅𑐐𑐸 𑐬𑐵𑐴𑐟 𑐥𑑂𑐫𑐵𑐎𑐾𑐖 𑐴𑐫𑐾𑐩𑐵𑑅𑐐𑐸 𑐥𑐸𑐬𑐷𑐫𑐵 𑐢𑐵𑐥𑐹 𑐡𑐸 𑑋

𑐥𑐝𑐵𑐂 𑐀𑐰𑐬𑐸𑐡𑑂𑐢 𑐩𑐫𑐵𑐫𑐾𑐐𑐸 𑐣𑐶𑐬𑑂𑐞𑐫

𑐀𑐣𑐮𑐵𑐂𑐣, 𑐀𑐦𑐮𑐵𑐂𑐣, 𑐬𑐾𑐜𑐶𑐫𑑀, 𑐚𑐾𑐮𑐶𑐨𑐶𑐖𑐣 𑐰 𑐎𑐾𑐰𑐮 𑐚𑐶𑐨𑐷𑐥𑐵𑐏𑐾𑑄 𑐖𑐸𑐫𑐵𑐔𑑂𑐰𑑄𑐐𑐸 𑐎𑐎𑑂𑐲𑐵 𑐀𑐳𑐵𑐬 𑑒𑑒 𑐐𑐟𑐾𑐣𑐶𑐳𑐾𑑄 𑐀𑐣𑐶𑐱𑑂𑐔𑐶𑐟 𑐎𑐵𑐮𑐫𑐵 𑐣𑐶𑐟𑐶𑑄 𑐬𑑀𑐎𑑂𑐎𑐵 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐥𑑂𑐫𑐵𑐧𑑂𑐳𑐣 𑐰 𑐊𑐣𑐥𑑂𑐫𑐵𑐧𑑂𑐳𑐣𑑄 𑐫𑐵𑑅𑐐𑐸 𑐏𑑅 𑑋 𑐩𑐣𑑂𑐟𑑂𑐬𑐵𑐮𑐫, 𑐱𑐶𑐎𑑂𑐲𑐎 𑐩𑐴𑐵𑐳𑑄𑐑, 𑐀𑐨𑐶𑐨𑐵𑐰𑐎 𑐳𑑄𑐑 𑐰 𑐣𑐷𑐖𑐶 𑐳𑑂𑐎𑐹𑐮𑐫𑑂 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐥𑐶𑑄 𑐱𑐶𑐎𑑂𑐲𑐎𑐥𑐶𑐮𑐶𑐳𑐾𑐫𑐵 𑐩𑑄𑐎𑐵𑑅 𑐳𑐴𑐮𑐴 𑐮𑐶𑐥𑐵 𑐥𑑂𑐫𑐵𑐧𑑂𑐳𑐣𑑄 𑐥𑐝𑐵𑐂 𑐀𑐰𑐬𑐸𑐡𑑂𑐢 𑐩𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐥𑐸𑐬𑐷𑑄 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐡𑐸 𑑋

𑑓𑑑 𑐮𑐏 𑐰𑐶𑐡𑑂𑐫𑐵𑐬𑑂𑐠𑐷 𑐧𑑂𑐰𑐣𑐷𑐐𑐸 𑐣𑐷𑐖𑐶 𑐳𑑂𑐎𑐹𑐮𑐫𑐵 𑐣𑐶𑐟𑐶𑑄 𑐱𑐶𑐎𑑂𑐲𑐵 𑐩𑐣𑑂𑐟𑑂𑐬𑐵𑐮𑐫𑑄 𑐬𑐵𑐴𑐟 𑐰 𑐳𑐴𑐖𑐷𑐎𑐬𑐞 𑐩𑐫𑐵𑑅𑐐𑐸 𑐊𑐣𑐥𑑂𑐫𑐵𑐧𑑂𑐳𑐣𑐫𑐵 𑐣𑐵𑐫𑑅 𑐆𑐟𑐸𑐬𑐵𑐖 𑐳𑐵𑐥𑐎𑑀𑐚𑐵𑑄 𑐡𑑂𑐰𑐥𑑄 𑐧𑑂𑐫𑐹𑐐𑐸 𑐡𑐸 𑑋 𑐰𑐵𑐬𑑂𑐟𑐵𑐥𑐵𑐏𑐾𑑄 𑐳𑐎𑐵𑐬𑐵𑐟𑑂𑐩𑐎 𑐮𑐶𑐔𑑂𑐰𑑅 𑐩𑐰𑑅𑐳𑐵 𑐴𑐵𑐎𑐣𑑄 𑐁𑐣𑑂𑐡𑑀𑐮𑐣 𑐫𑐵𑐫𑐾𑐐𑐸 𑐳𑐵𑐥𑐎𑑀𑐚𑐵𑑄 𑐏𑑂𑐫𑐵𑐔𑑂𑐰𑑅 𑐧𑑂𑐫𑐹𑐐𑐸 𑐡𑐸 𑑋