𑐱𑐶𑐎𑑂𑐲𑐵 𑐥𑑂𑐬𑐩𑐵𑐞𑐥𑐟𑑂𑐬𑐫𑑂 𑐖𑐎 𑐳𑐷𑐩𑐶𑐟 𑐖𑐸𑐂𑐩𑐖𑑂𑐫𑐹 : 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐵𑐬𑑂𑐎𑐷

𑐀𑐣𑑂𑐟𑐬𑐶𑐩 𑐳𑐬𑐎𑐵𑐬𑐫𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐳𑐸𑐱𑐷𑐮𑐵 𑐎𑐵𑐬𑑂𑐎𑐷𑑄 𑐱𑐶𑐎𑑂𑐲𑐵 𑐎𑐾𑐰𑐮 𑐍𑐥𑐔𑐵𑐬𑐶𑐎 𑐥𑑂𑐬𑐩𑐵𑐞𑐥𑐟𑑂𑐬𑐫𑑂 𑐖𑐎 𑐳𑐷𑐩𑐶𑐟 𑐖𑐸𑐂𑐩𑐖𑑂𑐫𑐹𑐐𑐸 𑐢𑐵𑑅𑐐𑐸 𑐡𑐸 𑑋 𑐱𑐸𑐎𑑂𑐬𑐰𑐵𑑅 𑐥𑑀𑐏𑐬𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑑒𑑑 𑐎𑑂𑐰𑑅𑐐𑐸 𑐡𑐷𑐎𑑂𑐲𑐵𑐣𑑂𑐟 𑐳𑐩𑐵𑐬𑑀𑐴𑐫𑐵𑐟 𑐳𑐩𑑂𑐧𑑀𑐢𑐣 𑐫𑐵𑐳𑐾𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐵𑐬𑑂𑐎𑐷𑑄 𑐠𑐠𑐾 𑐢𑐵𑑅𑐐𑐸 𑐏𑑅 𑑋

𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐵𑐬𑑂𑐎𑐷𑑄 𑐢𑐵𑑅𑐐𑐸 𑐡𑐸, ‘𑐱𑐶𑐎𑑂𑐲𑐵 𑐳𑐩𑐎𑐵𑐮𑐷𑐣 𑐳𑐩𑐵𑐖𑐫𑐵 𑐁𑐰𑐱𑑂𑐫𑐎𑐟𑐵 𑐎𑐠𑑄 𑐳𑐷𑐥, 𑐬𑑀𑐖𑐐𑐵𑐬𑐷, 𑐄𑐡𑑂𑐫𑐩𑐱𑐷𑐮𑐟𑐵, 𑐣𑐰𑐥𑑂𑐬𑐰𑐬𑑂𑐟𑐣 𑐰 𑐣𑐿𑐟𑐶𑐎𑐰𑐵𑐣 𑐖𑐣𑐱𑐎𑑂𑐟𑐶 𑐄𑐟𑑂𑐥𑐵𑐡𑐣𑐥𑐵𑐏𑐾 𑐄𑐣𑑂𑐩𑐸𑐏 𑐖𑐸𑐂𑐩𑐵𑑅 𑑋’

𑐣𑐰𑐷𑐣 𑐥𑑂𑐬𑐰𑐶𑐢𑐶 𑐰𑐶𑐎𑐵𑐳, 𑐀𑐣𑐸𑐳𑐣𑑂𑐢𑐵𑐣𑐫𑑂 𑐁𑐢𑐵𑐬𑐶𑐟 𑐥𑑂𑐬𑐵𑐖𑑂𑐘𑐶𑐎 𑐎𑑂𑐬𑐶𑐫𑐵𑐎𑐮𑐵𑐥𑐫𑑂 𑐧𑐝𑐵𑐰𑐵 𑐧𑐶𑐂𑐐𑐸 𑐁𑐰𑐱𑑂𑐫𑐎 𑐖𑐹𑐐𑐸 𑐢𑐵𑐳𑐾𑑄 𑐎𑐵𑐬𑑂𑐎𑐷𑑄 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐖𑑂𑐫𑐵𑐗𑑂𑐰𑑅𑐫𑐵𑐟 𑐀𑐬𑑂𑐠𑐟𑐣𑑂𑐟𑑂𑐬 𑐳𑐸𑐡𑐺𑐝𑐷𑐎𑐬𑐞𑐮𑐶𑐳𑐾 𑐟𑐥𑑂𑐫𑑄𑐎 𑐳𑑂𑐰𑐵𑐫𑐾𑐦𑐫𑐾𑐩𑐵𑑅𑐐𑐸𑐮𑐶 𑐧𑑅 𑐧𑑂𑐫𑐹𑐐𑐸 𑐡𑐸 𑑋

𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐵𑐬𑑂𑐎𑐷𑑄 𑐢𑐵𑑅𑐐𑐸 𑐡𑐸, ‘𑐱𑐶𑐎𑑂𑐲𑐵𑐫𑐵𑐟 𑐁𑐬𑑂𑐠𑐶𑐎 𑐳𑐩𑐺𑐡𑑂𑐢𑐶 𑐰 𑐩𑐵𑐣𑐰 𑐎𑐮𑑂𑐫𑐵𑐞𑐮𑐶𑐳𑐾 𑐳𑑂𑐰𑐵𑐫𑐾 𑐩𑐦𑐸𑐟 𑐢𑐵𑑅𑐳𑐵 𑐖𑑂𑐘𑐵𑐣 𑐰𑐵 𑐥𑐵𑐛𑑂𑐫𑐎𑑂𑐬𑐩 𑐳𑐣𑑂𑐡𑐬𑑂𑐨𑐴𑐷𑐣 𑐖𑐸𑐂 𑑋 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐀𑐢𑑂𑐫𑐫𑐣 𑐥𑐹𑐰𑐣𑐾𑐏𑐟𑑄 𑐟𑑅𑐢𑑄𑐐𑐸 𑐮𑑂𑐫𑐵𑐏𑐫𑑂 𑐫𑐸𑐰𑐵 𑐰𑐶𑐡𑐾𑐱𑐥𑐵𑐏𑐾 𑐁𑐎𑐬𑑂𑐲𑐶𑐟 𑐖𑐸𑐂𑐐𑐸 𑐗𑐷𑐐𑐸 𑐩𑑄𑐎𑐵𑑅 𑐔𑐶𑐣𑑂𑐟𑐵𑐫𑐵 𑐰𑐶𑐲𑐫 𑐏𑑅 𑑋’

𑐠𑑂𑐰𑐴𑐾 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐣𑐰𑐷𑐣 𑐥𑑂𑐬𑐰𑐶𑐢𑐶 𑐰 𑐟𑐷𑐰𑑂𑐬 𑐐𑐟𑐶𑐂 𑐴𑐶𑐮𑐵𑐰𑐫𑐵𑐔𑑂𑐰𑑄𑐐𑐸 𑐰𑐶𑐱𑑂𑐰 𑐥𑐬𑐶𑐰𑐾𑐱𑐫𑑂 𑐠𑑅𑐟 𑐐𑐸𑐎𑐠𑑄 𑐀𑐣𑐸𑐎𑐹𑐮 𑐫𑐵𑐫𑐾𑐐𑐸, 𑐐𑐸𑐎𑐠𑑄 𑐥𑑂𑐬𑐟𑐶𑐳𑑂𑐥𑐬𑑂𑐢𑐷 𑐰 𑐳𑐎𑑂𑐲𑐩 𑐫𑐵𑐫𑐾𑐐𑐸𑐥𑐵𑐏𑐾 𑐰𑐶𑐡𑑂𑐫𑐵𑐬𑑂𑐠𑐷 𑐰 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐣𑐶𑐐𑐸𑐮𑐶𑑄 𑐎𑐾𑐣𑑂𑐡𑑂𑐬𑐷𑐟 𑐖𑐸𑐂𑐟 𑐁𑐰𑐱𑑂𑐫𑐎 𑐖𑐹𑐐𑐸 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐳𑐸𑐱𑐷𑐮𑐵 𑐎𑐵𑐬𑑂𑐎𑐷𑑄 𑐢𑐵𑑅𑐐𑐸 𑐡𑐸 𑑋

𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐵𑐬𑑂𑐎𑐷𑑄 𑐢𑐵𑑅𑐐𑐸 𑐡𑐸, ‘𑐁𑑅 𑐐𑐸𑐞𑐳𑑂𑐟𑐬𑐷𑐫𑐟𑐵𑐫𑑂 𑐢𑑂𑐫𑐵𑐣 𑐎𑐾𑐣𑑂𑐡𑑂𑐬𑐷𑐟 𑐫𑐵𑐳𑐾𑑄 𑐰𑐶𑐱𑑂𑐰 𑐧𑐖𑐵𑑅𑐫𑐵 𑐩𑐵𑐐 𑐀𑐮𑐾 𑐥𑑂𑐬𑐟𑐶𑐳𑑂𑐥𑐬𑑂𑐢𑐵𑐫𑑂 𑐡𑐸𑐐𑑂𑐫𑑄𑐎 𑐎𑑂𑐰𑐵𑐴𑐵𑑃 𑐰𑐫𑐾𑐦𑐂𑐐𑐸 𑐖𑐣𑐱𑐎𑑂𑐟𑐶 𑐰 𑐖𑑂𑐘𑐵𑐣𑐫𑐵 𑐄𑐟𑑂𑐥𑐵𑐡𑐣𑐫𑑂 𑐰𑐶𑐱𑐾𑐲 𑐩𑐾𑐴𑐣𑐟 𑐫𑐵𑐫𑐾𑐩𑐵𑑅𑐐𑐸 𑐏𑐣𑐾𑐡𑐸 𑑋’

𑐀𑐠𑐾𑐴𑐾, 𑐎𑐵𑐬𑑂𑐎𑐷𑑄 𑐡𑐷𑐎𑑂𑐲𑐵𑐣𑑂𑐟 𑐖𑐹𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐳𑑄 𑐥𑑂𑐬𑐵𑐥𑑂𑐟 𑐫𑐵𑑅𑐐𑐸 𑐥𑑂𑐬𑐩𑐵𑐞𑐥𑐟𑑂𑐬 𑐬𑑀𑐖𑐐𑐵𑐬𑐷𑐫𑐵 𑐁𑐢𑐵𑐬 𑐖𑐎 𑐩𑐏𑐸, 𑐠𑑂𑐰 𑐣𑐾𑐥𑐵𑑅𑐫𑐵 𑐳𑐩𑐵𑐖 𑐰 𑐬𑐵𑐲𑑂𑐚𑑂𑐬𑐫𑐵 𑐖𑐚𑐶𑐮 𑐳𑐩𑐳𑑂𑐫𑐵 𑐩𑑂𑐴𑐳𑐷𑐎𑐵𑑅 𑐄𑐎𑐶𑐫𑐵 𑐡𑐷𑐬𑑂𑐑𑐎𑐵𑐮𑐷𑐣 𑐳𑐩𑐵𑐢𑐵𑐣 𑐩𑐵𑐮𑐾𑐦𑐹𑐐𑐸 𑐎𑑂𑐲𑐩𑐟𑐵𑐫𑐵 𑐡𑑂𑐫𑑀𑐟𑐎 𑐣𑑄 𑐖𑐸𑐂𑐩𑐵𑑅𑐐𑐸𑐮𑐶 𑐧𑑅 𑐧𑑂𑐫𑐹𑐐𑐸 𑐡𑐸 𑑋