𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐚𑐥𑐬 𑐏𑑂𑐰𑐥𑐫𑐵 𑐬𑐖𑐣𑐵 𑐟𑑂𑐰𑐵𑐣𑐵𑐧𑐵𑐳𑐸𑐫𑐵𑐟 𑐴𑐣

𑐔𑐶𑐟𑐰𑐣𑐫𑑂 𑐣𑐐𑐡𑐮𑐶𑐳𑐾𑑄 𑐏𑑂𑐰𑐥𑐫𑐵 𑐬𑐖𑐣𑐵 𑐟𑑂𑐰𑐵𑐣𑐵𑐧𑐵𑐳𑐸𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋

𑐳𑑂𑐣𑐵𑐟𑐎 𑐟𑐴 𑐎𑐩𑑂𑐥𑑂𑐫𑐸𑐚𑐬 𑐂𑐣𑑂𑐖𑐶𑐣𑐶𑐫𑐬𑐶𑐒 𑐕𑐿𑐛𑑁𑑄 𑐳𑐾𑐩𑐾𑐳𑑂𑐚𑐬𑐫𑑂 𑑔 𑐖𑐷𑐥𑐷𑐊 𑐴𑐫𑐵𑑅 𑐥𑑀𑐏𑐬𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐚𑐬 𑐖𑐹𑐩𑑂𑐴 𑐏𑑂𑐰𑐥𑐫𑐵 𑐬𑐖𑐣𑐵 𑐟𑑂𑐰𑐵𑐣𑐵𑐧𑐵𑐳𑐸𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐨𑐬𑐟𑐥𑐸𑐬 𑐄𑐥𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑑𑑑 𑐫𑑂 𑐔𑑂𑐰𑑄𑐐𑐸 𑐫𑐸𑐣𑐵𑐃𑐚𑐾𑐜 𑐚𑐾𑐎𑑂𑐣𑐶𑐎𑐮 𑐎𑐮𑐾𑐖𑐫𑐵 𑐱𑐣𑐶𑐰𑐵𑑅 𑐖𑐹𑐐𑐸 𑐮𑐳𑐎𑐸𑐳 𑐰 𑐰𑐶𑐡𑐵𑐃 𑐖𑑂𑐫𑐵𑐗𑑂𑐰𑐮𑐫𑑂 𑐬𑐖𑐣𑐵 𑐟𑑂𑐰𑐵𑐣𑐵𑐧𑐵𑐳𑐸𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐬𑐖𑐣𑐵𑐫𑐵𑐟 𑐖𑑂𑐫𑐵𑐗𑑂𑐰𑑅𑐫𑐵 𑐰𑐶𑐱𑐶𑐲𑑂𑐚 𑐥𑐵𑐴𑐵𑑃 𑐎𑐮𑐾𑐖 𑐳𑑄𑐔𑐵𑐮𑐎 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐔𑐸𑐜𑐵𑐩𑐞𑐶 𑐏𑐣𑐵𑐮𑑄 𑐗𑐶𑐡𑑂𑐰𑑅 𑐟𑐎𑐵 𑐡𑐵𑑄𑐮𑐶𑐳𑐾𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐬𑐖𑐣𑐵 𑐟𑑂𑐰𑐵𑐣𑐵𑐧𑐵𑐳𑐸 𑐳𑑂𑐣𑐵𑐟𑐎 𑐟𑐴 𑐎𑐩𑑂𑐥𑑂𑐫𑐸𑐚𑐬 𑐂𑐣𑑂𑐖𑐶𑐣𑐶𑐫𑐬𑐶𑐒𑐫𑑂 𑐥𑐹𑐬𑑂𑐞 𑐕𑐵𑐟𑑂𑐬𑐰𑐺𑐟𑑂𑐟𑐶𑐂 𑐎𑐮𑐾𑐖𑐫𑑂 𑐧𑑂𑐰𑐣𑐵𑑅 𑐰𑐫𑐵𑐔𑑂𑐰𑑄𑐩𑑂𑐴 𑐏𑑅 𑑋 𑐀𑐢𑑂𑐫𑐫𑐣𑐮𑐶𑐳𑐾𑑄 𑐬𑐖𑐣𑐵𑑄 𑐩𑐾𑐩𑐾𑐐𑐸 𑐠𑐷𑐠𑐷 𑐰𑐶𑐢𑐵𑐫𑑂 𑐣𑑄 𑐣𑑂𑐴𑐵𑐥 𑐳𑐶𑐬𑐥𑐵𑑅 𑐎𑐫𑐵𑑅 𑐰𑐫𑐵𑐔𑑂𑐰𑑄𑐩𑑂𑐴 𑐏𑑅 𑑋

𑐎𑐮𑐾𑐖𑐫𑐵 𑐳𑑄𑐔𑐵𑐮𑐎 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐏𑐣𑐵𑐮𑑄 𑐎𑐮𑐾𑐖𑐥𑐵𑐏𑐾𑑄 𑐀𑐢𑑂𑐫𑐫𑐣𑐬𑐟 𑐰𑐶𑐡𑑂𑐫𑐵𑐮𑐬𑑂𑐠𑐷𑐥𑐶𑐣𑐶𑐐𑐸 𑐨𑐰𑐶𑐲𑑂𑐫 𑐧𑐵𑑄𑐮𑐵𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐹𑐐𑐸 𑐡𑐸 𑑋 𑐨𑐰𑐶𑐲𑑂𑐫𑐫𑑂 𑐣𑑄 𑐕𑐸𑑄 𑐐𑑂𑐰𑐵𑐴𑐵𑐮𑐶 𑐩𑐵𑑅𑐳𑐵 𑐳𑐡𑐵𑑄 𑐟𑐫𑐵𑐬 𑐡𑐹𑐐𑐸 𑐏𑐣𑐵𑐮𑑄 𑐢𑐵𑑅𑐐𑐸 𑐡𑐸 𑑋 𑐣𑑂𑐴𑐹𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐟 𑐂𑐩𑐵𑐣𑑂𑐡𑐵𑐬𑐷 𑐎𑐠𑑄 𑐀𑐢𑑂𑐫𑐫𑐣 𑐫𑐵𑐫𑐾𑐟 𑐰𑑄 𑐳𑐸𑐗𑐵𑐧 𑐧𑑂𑐫𑐹𑐐𑐸 𑐡𑐸 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐳𑑂𑐣𑐵𑐟𑐎𑑀𑐟𑑂𑐟𑐬 𑐰 𑐩𑐾𑐩𑐾𑐐𑐸 𑐰𑐶𑐢𑐵𑐫𑑂 𑑔 𑐖𑐷𑐥𑐷𑐊 𑐴𑑅𑐥𑐶𑐣𑑂𑐟 𑐣𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐱𑐶𑐎𑑂𑐲𑐎𑐥𑐶𑑄 𑐩𑐢𑑂𑐫𑐾𑐫𑑂 𑐰𑐶𑐨𑐵𑐐𑐷𑐫 𑐥𑑂𑐬𑐩𑐸𑐏 𑐃. 𑐣𑐶𑐬𑐖 𑐧𑑀𑐴𑐬𑐵 𑐰 𑐮𑐵𑐂𑐧𑑂𑐬𑐾𑐬𑐶𑐫𑐣 𑐩𑐷𑐬𑐵 𑐥𑑂𑐫𑐵𑐎𑐸𑐬𑐾𑐮𑐫𑐵𑐟 𑐣𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐩𑐾𑐩𑐾𑐐𑐸 𑐠𑐷𑐠𑐷 𑐏𑐾𑐮𑐎𑐸𑐡 𑐎𑐵𑐳𑐵𑐫𑑂 𑐄𑐟𑑂𑐎𑐺𑐲𑑂𑐚𑐥𑐶𑐣𑑂𑐟 𑐣𑑄 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐫𑐾𑐐𑐸 𑐰 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐠𑐸𑐐𑐸 𑐎𑐮𑐾𑐖 𑐥𑑀𑐏𑐬𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐥𑐵𑐏𑐾𑑄 𑐳𑐩𑑂𑐧𑐣𑑂𑐢𑐣 𑐥𑑂𑐬𑐵𑐥𑑂𑐟 𑐎𑐮𑐾𑐖 𑐏𑑅 𑑋