𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐣𑐩𑐹𑐣𑐵 𑐜𑐵𑐎𑑂𑐚𑐬 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐶𑐐𑐸

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐩𑐳𑑂𑐟𑐫𑑂𑐐𑐸 𑐣𑐶𑐬𑑀𑐐𑐵𑐟𑑂𑐩𑐎 𑐳𑑂𑐰𑐵𑐳𑑂𑐠𑑂𑐫 𑐱𑐶𑐎𑑂𑐲𑐵 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐟 𑐰𑐶𑐡𑑂𑐫𑐵𑐮𑐫𑐫𑑂 𑐳𑐵𑐣𑐵 𑐜𑐵𑐎𑑂𑐚𑐬 𑐖𑑂𑐫𑐵𑐗𑑂𑐰𑑅 𑐳𑐘𑑂𑐔𑐵𑐮𑐣 𑐫𑐵𑐫𑐾𑐟𑑂𑐫𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐥𑑂𑐬𑐵𑐬𑐩𑑂𑐨 𑐥𑑂𑐫𑐐𑐹 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐣𑐩𑐹𑐣𑐵 𑐖𑑂𑐫𑐵𑐗𑑂𑐰𑑅𑐥𑐵𑐏𑐾𑑄 𑐖𑐸𑐂𑐐𑐸 𑐫𑐾𑑃𑐩𑐥𑐵𑑄 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐏𑑅 𑑋

𑐫𑐾𑑃𑐩𑐥𑐵 𑐳𑑂𑐰𑐵𑐳𑑂𑐠𑑂𑐫 𑐰𑐶𑐨𑐵𑐐𑐫𑐵 𑐩𑐾𑐜𑐶𑐎𑐮 𑐀𑐢𑐶𑐎𑐺𑐟 𑐜𑐵 𑐡𑐶𑐰𑐱 𑐣𑑂𑐫𑑁𑐥𑐵𑐣𑐾𑑄 𑐢𑐫𑐵𑐡𑐶𑐮, “𑐠𑑂𑐰 𑐖𑑂𑐫𑐵𑐗𑑂𑐰𑐮𑐫𑑂 𑐰𑑂𑐫𑐎𑑂𑐟𑐶𑐐𑐟 𑐳𑐸𑐔𑐸𑐎𑐸𑐔𑐸 𑐰 𑐳𑑂𑐰𑐔𑑂𑐕𑐟𑐵, 𑐥𑑀𑐲𑐞, 𑐖𑐷𑐰𑐣𑐱𑐿𑐮𑐷 𑐰 𑐥𑐸𑐣𑐷 𑐩𑐏𑐹𑐐𑐸 𑐮𑑂𑐰𑐫𑑂, 𑐥𑐸𑐣𑐷𑐐𑐸 𑐮𑑂𑐰𑐫𑑂 𑐰 𑐊𑐣𑑂𑐚𑐶𑐩𑐵𑐂𑐎𑑂𑐬𑑀𑐰𑐶𑐫𑐮 𑐬𑐾𑐳𑐶𑐳𑑂𑐚𑐾𑐣𑑂𑐳, 𑐥𑑂𑐬𑐵𑐠𑐩𑐶𑐎 𑐄𑐥𑐔𑐵𑐬 𑐰 𑐳𑐸𑐬𑐎𑑂𑐲𑐵 𑐮𑐶𑐳𑐾𑑄 𑐩𑐵𑐣𑐳𑐶𑐎 𑐳𑑂𑐰𑐵𑐳𑑂𑐠𑑂𑐫 𑐰 𑐣𑐾𑐟𑐺𑐟𑑂𑐰 𑐫𑐵𑐣𑐵𑑅 𑐣𑑂𑐫𑐵𑐐𑐹 𑐰𑐶𑐲𑐫𑐫𑑂 𑐥𑑂𑐬𑐱𑐶𑐎𑑂𑐲𑐞 𑐧𑐶𑐂 𑑋”

𑐣𑐵𑐥𑑄 𑐧𑑂𑐰𑐣𑐶𑐥𑐶𑑄 𑐩𑐳𑑂𑐟𑐫𑑂 𑐡𑐠𑐸𑐂 𑐠𑐰𑑄𑐠𑑅 𑐳𑐶𑐎𑐵𑐂, 𑐥𑑂𑐬𑐫𑑀𑐐𑐵𑐟𑑂𑐩𑐎 𑐰 𑐨𑐹𑐩𑐶𑐎𑐵 𑐩𑑂𑐴𑐶𑐟𑐾𑐐𑐸, 𑐀𑐨𑐶𑐮𑐾𑐏 𑐰 𑐀𑐣𑐸𑐐𑐩𑐣 𑐳𑐶𑐎𑐵𑐂𑐫𑐵 𑐩𑐸𑐏𑑂𑐫 𑐰𑐶𑐢𑐶 𑐏𑑅 𑑋 𑐥𑐵𑐛𑑂𑐫𑐎𑑂𑐬𑐩𑐫𑑂 𑐁𑐢𑐵𑐬𑐶𑐟 𑐳𑑂𑐰𑐮𑐵𑐫𑐵 𑐟𑐵𑐮𑐶𑐩 𑐧𑐶𑐂𑐢𑐸𑑄𑐎𑐵𑑅 𑐮𑑂𑐫𑑄𑐡𑐣𑐶𑐐𑐸 𑐐𑐸𑐮𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐳𑐩𑐹𑐴𑐐𑐟 𑐬𑐹𑐥𑑄 𑐣𑐶𑐬𑑀𑐐𑐵𑐟𑑂𑐩𑐎 𑐳𑑂𑐰𑐵𑐳𑑂𑐠𑑂𑐫 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐖𑑂𑐫𑐵𑐗𑑂𑐰𑑅 𑐳𑐘𑑂𑐔𑐵𑐮𑐣 𑐫𑐵𑐎𑐾 𑐧𑐶𑐂 𑑋 𑐕𑐐𑐹 𑐳𑑂𑐰𑐵𑐳𑑂𑐠𑑂𑐫 𑐎𑑂𑐮𑐧𑐫𑑂 𑑑𑑕 𑐩𑑂𑐴𑑄𑐣𑐶𑐳𑐾𑑄 𑑒𑑐 𑐩𑑂𑐴𑐟𑐎 𑐕𑐵𑐟𑑂𑐬𑐕𑐵𑐟𑑂𑐬𑐵 𑐟𑐂 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐧𑐵𑐬𑐾 𑐎𑐵𑐬𑑂𑐫𑐰𑐵𑐴𑐎 𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑐒𑑂𑐐𑑀𑐮𑑄, 𑐳𑑂𑐰𑐵𑐳𑑂𑐠𑑂𑐫 𑐳𑐔𑐾𑐟𑐣𑐵 𑐀𑐨𑐶𑐰𑐺𑐡𑑂𑐢𑐶 𑐫𑐵𑐫𑐾𑐟 𑐰 𑐩𑐳𑑂𑐟𑐫𑑂 𑐡𑐠𑐸𑐂 𑐳𑐴𑐳𑐶𑐎𑐵𑐂𑐫𑐵 𑐣𑐶𑑄𑐟𑐶𑑄 𑐠𑑂𑐰 𑐰𑐶𑐢𑐶 𑐥𑐵𑐫𑑂𑐕𑐶 𑐖𑐸𑐂𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐀𑐢𑐶𑐎𑐵𑐬𑐷𑐫𑐵𑐟 𑐢𑐫𑐵𑐡𑐶𑐮, “𑐰𑐶𑐡𑑂𑐫𑐵𑐮𑐫𑐫𑑂 𑐖𑑂𑐫𑐵𑐗𑑂𑐰𑑅 𑐫𑑄𑐎𑐷𑐧𑐮𑐫𑑂 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐂𑐥𑐶𑑄𑐳𑑄 𑐧𑑀𑐗 𑐟𑐵𑐫𑐾𑐎𑐷𑐎𑐠𑑄 𑐫𑑄𑐎𑐾𑐩𑐖𑑂𑐫𑐹 𑑋 𑐣𑑂𑐴𑑂𑐫𑐵𑐠𑐾𑑄 𑐫𑐵𑐣𑐵𑑅 𑐣𑑄 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑑂 𑐰𑐣𑐾𑐩𑐵𑑅 𑐢𑐂𑐐𑐸 𑐟𑐟𑑂𑐥𑐬𑐟𑐵 𑐠𑐣𑐾𑐩𑐵𑑅 𑑋 𑐀𑐮𑐾 𑐖𑐎 𑐖𑑂𑐫𑐵𑐗𑑂𑐰𑑅 𑐡𑐶𑐐𑑀 𑐰 𑐥𑑂𑐬𑐨𑐵𑐰𑐎𑐵𑐬𑐷 𑐖𑐸𑐂 𑑋 𑐠𑐸𑐎𑐶𑐫𑐵 𑐮𑐶𑐔𑑂𑐰𑑅 𑐮𑐶𑐧𑐵𑐎𑑂𑐎 𑐏𑐣𑐾𑐡𑐂 𑑋 𑐟𑐬, 𑐳𑐎𑐵𑐬𑐵𑐟𑑂𑐩𑐎 𑐖𑐸𑐂 𑑋” 𑐰𑐶𑐡𑑂𑐫𑐵𑐮𑐫𑐫𑑂 𑐎𑐶𑐱𑑀𑐬𑐎𑐶𑐱𑑀𑐬𑐷 𑐫𑑁𑐣 𑐰 𑐥𑑂𑐬𑐖𑐣𑐣 𑐳𑑂𑐰𑐵𑐳𑑂𑐠𑑂𑐫𑐳𑐩𑑂𑐧𑐣𑑂𑐢𑐷 𑐖𑑂𑐫𑐵𑐗𑑂𑐰𑑅 𑐣𑑄 𑐩𑐵𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐱𑐶𑐎𑑂𑐲𑐵 𑐰 𑐳𑑂𑐰𑐵𑐳𑑂𑐠𑑂𑐫 𑐳𑐩𑐶𑐟𑐶𑐫𑐵 𑐎𑐖𑐶 𑐔𑐶𑐣𑐷𑐎𑐵𑐖𑐷 𑐩𑐴𑐬𑑂𑐖𑐣𑑄 𑐢𑐫𑐵𑐡𑐶𑐮, “𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐳𑐎𑐵𑐬𑐵𑐟𑑂𑐩𑐎 𑐥𑑂𑐬𑐟𑐶𑐳𑑂𑐥𑐬𑑂𑐢𑐵𑐫𑐵 𑐣𑐶𑑄𑐟𑐶𑑄 𑐁𑐟𑑂𑐩𑐰𑐶𑐱𑑂𑐰𑐵𑐱𑐫𑐸𑐎𑑂𑐟 𑐡𑐫𑐾𑐎𑐾𑐩𑐵𑐮𑐷 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐳𑐦𑐹𑐩𑐸𑐎𑑂𑐟 𑐱𑐸𑐎𑑂𑐬𑐧𑐵𑑅𑐫𑐵 𑐖𑑂𑐫𑐵𑐗𑑂𑐰𑑅𑐡𑐸𑐣𑐾𑐫𑐵 𑐖𑑂𑐫𑐵𑐗𑑂𑐰𑑅𑐫𑐵 𑐥𑑂𑐬𑐨𑐵𑐰𑐎𑐵𑐬𑐷 𑐳𑐶𑐎𑐵𑐂𑐫𑐵 𑐣𑐶𑑄𑐟𑐶𑑄 𑐠𑐥 𑐩𑐶𑐴𑐣𑐾𑐟 𑐫𑐵𑐫𑐾𑐩𑐵𑐮𑐷 𑑋”

𑐎𑐵𑐬𑑂𑐫𑐱𑐵𑐮𑐵𑐫𑑂 𑐳𑑂𑐰𑐵𑐳𑑂𑐠𑑂𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐡𑐷𑐥𑐎𑐎𑐸𑐩𑐵𑐬 𑐎𑐾𑐳𑐷𑑄 𑐣𑐩𑐹𑐣𑐵 𑐖𑑂𑐫𑐵𑐗𑑂𑐰𑐮𑑄 𑐰𑑅𑐐𑐸 𑐥𑐺𑐲𑑂𑐛𑐥𑑀𑐲𑐞𑐫𑐵 𑐁𑐢𑐵𑐬𑐫𑑂 𑐧𑐺𑐴𑐟 𑐖𑑂𑐫𑐵𑐗𑑂𑐰𑑅 𑐟𑐬𑑂𑐖𑐸𑐩𑐵 𑐫𑐵𑐫𑐾𑐐𑐸 𑐢𑐫𑐵𑐡𑐶𑐮 𑑋 “𑐳𑐩𑑂𑐨𑐰𑐟𑑅 𑐠𑑂𑐰 𑐖𑑂𑐫𑐵𑐗𑑂𑐰𑑅 𑐰𑐶𑐡𑑂𑐫𑐵𑐮𑐫𑐫𑑂 𑐣𑑂𑐴𑐵𑐥𑐵𑑄𑐐𑐸 𑐖𑐸𑐂𑐩𑐵𑑅 𑑋 𑐠𑐸𑐎𑐶𑐫𑐵𑐟 𑐮𑐶𑐔𑑂𑐰𑑅 𑐧𑐶𑐂𑐐𑐸 𑐡𑐫𑐾𑐎𑐵𑐫𑑄𑐎𑐾,” 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋 𑐱𑐶𑐎𑑂𑐲𑐵 𑐀𑐢𑐶𑐎𑐺𑐟 𑐎𑐾𑐱𑐰 𑐖𑑂𑐘𑐰𑐵𑐮𑐷𑑄 𑐰𑐶𑐡𑑂𑐫𑐵𑐮𑐫 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶, 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐰 𑐱𑐶𑐎𑑂𑐲𑐎𑐟𑐫𑑂𑐟 𑐖𑑂𑐫𑐵𑐗𑑂𑐰𑑅𑐫𑐵 𑐥𑐎𑑂𑐲 𑐠𑐸𑐂𑐎𑐾 𑐦𑑅𑐳𑐵 𑐖𑐎 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑑂 𑐀𑑅𑐥𑐸𑐂 𑐢𑐫𑐵𑐡𑐶𑐮 𑑋

𑐰𑐶𑐡𑑂𑐫𑐵𑐮𑐫𑐫𑑂 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐕𑐵𑐟𑑂𑐬𑐕𑐵𑐟𑑂𑐬𑐵𑐟𑐫𑑂𑐟 𑐳𑑂𑐰𑐵𑐳𑑂𑐠𑑂𑐫𑐫𑐵 𑐰𑐶𑐲𑐫𑐫𑑂 𑐥𑑂𑐬𑐱𑐶𑐎𑑂𑐲𑐶𑐟 𑐫𑐵𑐣𑐵𑑅 𑐳𑑂𑐰𑐵𑐳𑑂𑐠𑑂𑐫 𑐡𑐹𑐟𑐎𑐠𑑄 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅𑐫𑐵𑐟 𑐳𑐵𑐣𑐵 𑐜𑐵𑐎𑑂𑐚𑐬 𑐣𑐵𑑄 𑐧𑑂𑐫𑐹𑐐𑐸 𑐏𑑅 𑑋 𑐰𑐶𑐡𑑂𑐫𑐵𑐬𑑂𑐠𑐷, 𑐕𑐾𑑃𑐖𑑅𑐥𑐶𑑄 𑐰 𑐳𑐩𑐸𑐡𑐵𑐫𑐫𑑂 𑐳𑑂𑐰𑐵𑐳𑑂𑐠𑑂𑐫 𑐳𑐔𑐾𑐟𑐣𑐵 𑐠𑐣𑐾𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐁𑐖𑑂𑐖𑐸 𑐏𑑅 𑑋