𑐡𑐵𑐦𑐵𑐩𑑂𑐫𑐾

– 𑐡𑐷𑐥𑐵 𑐩𑐴𑐬𑑂𑐖𑐣
𑐣𑐾𑐥𑐵𑐮𑐨𑐵𑐲𑐵 𑐖𑐬𑑂𑐣𑐮
𑐎𑐶𑐥𑐵 – youtube

𑐩𑑂𑐴𑐳𑐷𑐎𑐵

𑐣𑐾𑐥𑐵𑑅 𑐡𑐾𑐫𑑂𑐫𑐵 𑐠𑐷𑐠𑐷 𑐖𑐵𑐟𑐶𑐩𑐢𑑂𑐫𑐾 𑐣𑐾𑐰𑐵𑑅 𑐖𑐵𑐟𑐶 𑐣𑑄 𑐠𑑅𑐐𑐸 𑐴𑐾 𑐧𑐶𑐳𑑂𑐎𑑄 𑐥𑐴 𑐡𑐸𑐐𑐸 𑐖𑐵𑐟𑐶 𑐏: 𑑋 𑐠𑑂𑐰 𑐖𑐵𑐟𑐶 𑐠𑑅𑐐𑐸 𑐴𑐾 𑐧𑐶𑐳𑑂𑐎𑑄 𑐂𑐟𑐶𑐴𑐵𑐳, 𑐥𑐬𑐩𑑂𑐥𑐬𑐵, 𑐳𑑄𑐳𑑂𑐎𑐺𑐟𑐶, 𑐳𑑄𑐳𑑂𑐎𑐵𑐬 𑐡𑐸𑐐𑐸 𑐖𑐵𑐟𑐶 𑐏: 𑑋 𑐩𑐾𑐩𑐾𑐐𑐸 𑐖𑐵𑐟𑐶𑐳𑐶𑐧𑐾𑑄 𑐳𑐨𑑂𑐫 𑐖𑐵𑐟𑐶𑐫𑐵 𑐬𑐹𑐥𑐫𑑂‌ 𑐥𑐬𑐶𑐔𑐶𑐟 𑐣𑐾𑐰𑐵𑑅𑐟𑐫𑑂‌𑐐𑐸 𑐳𑐵𑐴𑐶𑐟𑑂𑐫, 𑐎𑐮𑐵, 𑐳𑑄𑐐𑐷𑐟 𑐣𑑄 𑐄𑐟𑑂𑐟𑐶𑐎𑑄 𑐴𑐾 𑐔𑑂𑐰𑐣𑑂𑐴𑑂𑐫𑐵 𑑋 𑐣𑐾𑐥𑐵:𑐡𑐸𑐣𑐾 𑐖𑐎 𑐩𑐖𑐹𑐳𑐾 𑐰𑐶𑐱𑑂𑐰𑐫𑐵 𑐣𑑂𑐴𑑂𑐫𑑅𑐣𑐾 𑐣𑐾𑐥𑐵:𑐫𑐵 𑐳𑐵𑑄𑐳𑑂𑐎𑐺𑐟𑐶𑐎 𑐥𑐬𑐶𑐔𑐫𑐫𑐵 𑐬𑐹𑐥𑐫𑑂‌ 𑐣𑐾𑐰𑐵:𑐟𑐫𑐐𑐸 𑐴𑐾 𑐳𑑄𑐳𑑂𑐎𑐺𑐟𑐶 𑐣𑑂𑐴𑑂𑐫𑐧𑑂𑐰𑐫𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵:𑐟𑐫𑑂𑐳𑑄 𑐣𑐵𑐮𑐵𑐰𑐫𑐵𑐔𑑂𑐰𑑄𑐐𑐸 𑐳𑑄𑐳𑑂𑐎𑐺𑐟𑐶𑐫𑐵 𑐕𑐐𑐹 𑐥𑑂𑐬𑐩𑐸𑐏 𑐀𑑄𑐐 𑐏: 𑐳𑑄𑐐𑐷𑐟 𑑋 𑐢𑐵𑐬𑑂𑐩𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐖𑐷𑐰𑐣𑐫𑑂‌ 𑐳𑑄𑐐𑐷𑐟𑐫𑐵 𑐰𑐶𑐱𑐾𑐲 𑐨𑐹𑐩𑐶𑐎𑐵 𑐡𑐫𑐵𑐔𑑂𑐰𑐣𑐷 𑑋 𑐀𑐗 𑐑𑐵𑐫𑑂‌ 𑐣𑐾𑐰𑐵𑑅𑐟𑐫𑑂‌ 𑐖𑐣𑑂𑐩𑐣𑐶𑐳𑐾𑑄 𑐩𑐺𑐟𑑂𑐫𑐸𑐟𑐎 𑐣𑑄 𑐳𑑄𑐐𑐷𑐟𑐫𑐵 𑐩𑐴𑐟𑑂𑐟𑑂𑐰 𑐄𑐟𑑂𑐟𑐶𑐎𑑄 𑐴𑐾 𑐡𑐸 𑑋

𑐳𑑄𑐐𑐷𑐟 𑐢𑐵𑐫𑐰𑑄 𑐴𑐾 𑐩𑑂𑐫𑐾 𑐴𑐵𑐮𑐾𑐐𑐸 𑐖𑐎 𑐠𑐸𑐂𑐎𑐷 𑐟𑐬 𑐠𑐣 𑐳𑑄𑐐𑐷𑐟 𑐢𑐵𑐫𑐰𑐧𑐮𑐫𑑂‌ 𑐩𑑂𑐫𑐾 𑐴𑐵𑐮𑐾𑐐𑐸 𑐣𑐵𑐥𑐣𑐵𑐥𑑄 𑐧𑐵𑐖𑑄 𑐠𑐵𑐫𑐐𑐸 𑐰 𑐥𑑂𑐫𑐵𑐏𑑄 𑐴𑐸𑐮𑐾𑐐𑐸 𑐣𑑄 𑐏: 𑑋 𑐣𑐾𑐰𑐵𑑅𑐟𑐫𑑂𑐐𑐸 𑐕𑐐𑐹 𑐳𑐵𑑄𑐐𑐷𑐟𑐶𑐎 𑐥𑐎𑑂𑐲𑐫𑐵 𑐬𑐹𑐥𑐫𑑂‌ 𑐠𑐷𑐠𑐷 𑐧𑐵𑐖𑑄 𑐠𑐵𑐣𑐵: 𑐡𑐾𑐐𑐮𑐫𑑂‌ 𑐰𑐵 𑐦𑐮𑑂𑐔𑐵𑐫𑑂‌ 𑐔𑑂𑐰𑐣𑐵: 𑐡𑑂𑐫:𑐥𑐶𑐣𑐶𑐐𑐸 𑐳𑑂𑐟𑐸𑐟𑐶 𑐴𑐵𑐮𑐾𑐐𑐸 𑐣𑑄 𑐏𑑅 𑑋 𑐄𑐐𑐸 𑐩𑑂𑐫𑐾 𑐴𑐵𑐮𑐷𑐐𑐸 𑐣𑑄 𑐆𑐟𑐸, 𑐧𑐵𑐬, 𑐟𑐶𑐠𑐶𑐎𑐠𑑄 𑐣𑐵𑐥𑑄 𑐡𑑂𑐫:𑐀𑐣𑐸𑐳𑐵𑐬 𑐥𑐵𑐣𑐵: 𑐴𑐾 𑐔𑑂𑐰𑐣𑐷 𑑋 𑐠𑐠𑐾 𑐴𑐷𑐮𑐷𑐐𑐸 𑐩𑑂𑐫𑐾𑐫𑐵𑐟 𑐴𑐾 𑐡𑐵𑐦𑐵 𑐨𑐖𑐣 𑐑𑐵𑐂 𑑋 𑐩𑑂𑐫𑐾 𑐴𑐵𑐮𑐷𑐐𑐸 𑐂𑐮𑐫𑑂‌ 𑐳𑐸𑐬 𑐰 𑐟𑐵𑐮𑐫𑐵 𑐣𑐶𑐟𑐶𑑄 𑐠𑐷𑐠𑐷 𑐧𑐵𑐖 𑐣𑑄 𑐠𑐵𑐫𑑂𑐐𑐸 𑐫𑐵𑐂, 𑐐𑐠𑐾𑐎𑐶 𑐏𑐶𑑄, 𑐟𑐵:, 𑐧𑐩𑐹, 𑐣𑐐𑐬𑐵, 𑐩𑐺𑐡𑐒𑐵 𑐁𑐡𑐶 𑑋 𑐡𑐵𑐦𑐵 𑐨𑐖𑐣 𑐴𑐵𑐮𑐾𑐐𑐸 𑐂𑐮𑐫𑑂‌ 𑐣𑐶𑐠𑑂𑐰: 𑐩𑐣𑐹𑐟 𑐣𑐶𑐗𑑂𑐰𑐮𑐫𑑂‌ 𑐂𑐟𑐵𑐠𑐶𑐟𑐵 𑐀𑐬𑑂𑐠𑐵𑐟𑑂‌ 𑐔𑐹𑐮𑑄𑐔𑐹 𑐔𑑂𑐰𑐣𑐷 𑑋 𑐠𑐠𑐾 𑐣𑐶𑐨𑑂𑐰𑐮𑐫𑑂‌ 𑐕𑐏𑐾 𑐬𑐵𑐐 𑐎𑐵𑐂𑐩𑑂𑐴 𑐐𑐸𑐬𑐸 𑐰 𑐏𑐶𑑄 𑐠𑐵𑐂𑐩𑑂𑐴 𑐔𑑂𑐰𑐣𑐷𑐳𑐵 𑐩𑐾𑐏𑐾 𑐩𑑂𑐫𑐾 𑐴𑐵𑐮𑐷𑐥𑐶𑑄 𑐔𑑂𑐰𑐣𑐷 𑑋

𑐳𑐴-𑐥𑑂𑐬𑐵. 𑐨𑐵𑐖𑐸 𑐟𑐸𑐮𑐳𑐷𑐮𑐵𑐮 𑐳𑐶𑑄𑐴𑐫𑐵 𑐢𑐵𑐥𑐹𑐎𑐠𑑄 𑐡𑐵𑐦𑐵 𑐢𑐿𑐐𑐸 𑐴𑐾 𑐏𑐶𑑄 𑐠𑐵𑐣𑐵: 𑐴𑐵𑐮𑐷𑐐𑐸 𑐩𑑂𑐫𑐾 𑐏: 𑑋 𑐀𑐠𑐾 𑐴𑐾 𑐩𑐺𑐡𑐒𑐎𑐵 𑐠𑐵𑐣𑐵: 𑐴𑐵𑐮𑐷𑐐𑐸 𑐩𑑂𑐫𑐾𑐫𑐵𑐟 𑐩𑐺𑐡𑐒𑐵 𑐨𑐖𑐣 𑐑𑐵𑐂, 𑐀𑐮𑐾 𑐣𑐐𑐬𑐵 𑐠𑐵𑐣𑐵: 𑐴𑐵𑐮𑐷𑐐𑐸 𑐩𑑂𑐫𑐾𑐫𑐵𑐟 𑐣𑐐𑐬𑐵 𑐩𑑂𑐫𑐾 𑐑𑐵𑐂 𑑋 𑐠𑑁𑑄𑐎𑐣𑑂𑐴𑐫𑑂‌ 𑐨𑐖𑐣 𑐴𑐵𑐮𑐷𑐐𑐸 𑐂𑐮𑐫𑑂‌ 𑐟𑐧𑐮𑐵 𑐠𑐵𑐫𑑂𑐐𑐸 𑐣𑑄 𑐥𑑂𑐬𑐔𑐮𑐣 𑐀𑐥𑑂𑐰𑐫𑐵𑐰𑑅𑐐𑐸 𑐡𑐸 𑑋 (𑑑 𑐳𑐴𑐥𑑂𑐬𑐵, 𑐟𑐸𑐮𑐳𑐷𑐮𑐵𑐮 𑐳𑐶𑑄𑐴𑐖𑐸𑑄 𑐧𑐶𑐫𑐵𑐡𑐷𑐐𑐸 𑐖𑐵𑐣𑐎𑐵𑐬𑐷𑐫𑐵 𑐁𑐢𑐵𑐬𑐫𑑂‌ [𑐰𑐶𑐳𑑄 𑑒𑑐𑑗𑑒 𑐖𑐾𑐛 𑑒)

𑐡𑐵𑐦𑐵 𑐨𑐖𑐣𑐫𑐵 𑐰𑐶𑐲𑐫𑐳𑑄 𑐠𑐷𑐠𑐷 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑑄𑐳𑑄 𑐠𑐷𑐠𑐷𑐎𑐠𑑄 𑐰𑑂𑐫𑐵𑐏𑑂𑐫𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐢𑐬𑑂𑐩𑐬𑐟𑑂𑐣 𑐱𑐵𑐎𑑂𑐫 ‘𑐟𑑂𑐬𑐶𑐱𑐸𑐮𑐷’𑐫𑐵 𑐧𑐶𑐔𑐵:𑐎𑐠𑑄 𑐣𑐶𑐠𑑂𑐰: (𑐣𑐶𑐐𑐹 𑐡𑐵𑐦𑐵) 𑐕𑐐𑐹 𑐴𑐾 𑐨𑐖𑐣𑐫𑑂‌ 𑐣𑐶𑐏𑐾 𑐔𑑂𑐰𑐣𑐵: 𑐩𑑂𑐫𑐾 𑐴𑐵:𑐳𑐵𑑄 𑐰 𑐴𑐾 𑐬𑐵𑐐, 𑐰 𑐴𑐾 𑐩𑑂𑐫𑐾, 𑐰 𑐴𑐾 𑐟𑐵𑐮𑐫𑑂‌ 𑐥𑐵𑐮𑑄𑐥𑐵: 𑐫𑐵𑐣𑐵: 𑐳𑑂𑐰𑐬 𑐟𑐵𑐮 𑐩𑐥𑐵𑐎𑑂𑐎 𑐴𑐵𑐮𑐵: 𑐖:𑐏: 𑐣𑐶𑐨𑑂𑐰𑑅 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐩𑑂𑐫𑐾 𑐴𑐵𑐮𑐷𑐥𑐶𑑄𑐳𑑄 𑐩𑐶𑐮𑐾 𑐖𑑂𑐰𑐷𑐎 𑐴𑑀𑐱 𑐫𑐵𑐣𑐵: 𑐩𑑂𑐫𑐾𑐫𑐵 𑐟𑑂𑐰𑐵:𑐟𑑂𑐰𑐵:𑐥𑐟𑐶𑐎𑑄 𑐩𑑂𑐫𑐾𑐫𑐵 𑐢𑐸𑐰𑐵 𑐣𑑄 𑐔𑐬𑐞 𑐣𑑄 𑐕𑐟𑑂𑐰𑐵:-𑐕𑐟𑑂𑐰𑐵: 𑐥𑐵𑐮𑑄𑐥𑐵: 𑐫𑐵𑐣𑐵: 𑐟𑐵𑐮𑐫𑑂‌ 𑐩𑐶𑐮𑐾𑐖𑐸𑐂𑐎 𑐴𑐵𑐮𑐷𑐐𑐸𑐮𑐶𑑄 𑐴𑐾 𑐠𑐸𑐎𑐶𑐫𑐵𑐟 ‘𑐡𑐦𑐵 𑐨𑐖𑐣’ 𑐢𑐵:𑐐𑐸 𑐏:, 𑐰 𑐴𑐾 ‘𑐡𑐦𑐵’ 𑐱𑐧𑑂𑐡 𑐮𑐶𑐥𑐵 𑐖𑐹𑐰𑐮𑐫𑑂‌ ‘𑐡𑐵𑐦𑐵’ 𑐖𑐹𑐰𑑄𑐐𑐹 𑐢𑐿𑐐𑐸 𑐁𑐥𑐵𑑅𑐳𑐶𑐫𑐵 𑐰𑐶𑐱𑑂𑐰𑐵𑐳 𑐡𑐸 𑑋 𑐀𑐠𑐾 𑐴𑐾 𑐴𑐾𑐩𑐬𑐵𑐖 𑐱𑐵𑐎𑑂𑐫𑐫𑐵 𑐢𑐵𑐥𑐹𑐎𑐠𑑄 𑐡𑐵𑐦𑐵 𑐰𑐶𑐨𑐶𑐣𑑂𑐣 𑐆𑐟𑐸 𑐰 𑐩𑐴𑐶𑐣𑐵 𑐰𑐶𑐱𑐾𑐲𑑄 𑐬𑐵𑐐 𑐟𑐵𑐮 𑐳𑐸𑐬𑑄 𑐴𑐵𑐮𑐷𑐐𑐸 𑐡𑐾𑐰𑐷, 𑐡𑐾𑐰𑐟𑐵𑐫𑐵 𑐰𑐬𑑂𑐞𑐣 𑐰 𑐰𑐶𑐰𑐶𑐢 𑐢𑐚𑐣𑐵𑐫𑐵 𑐳𑐵𑐬𑐵𑑄𑐱𑐫𑐵 𑐬𑐸𑐥𑐫𑑂‌ 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐐𑐸 𑐥𑐡𑑂𑐫𑐩𑐫 𑐬𑐔𑐣𑐵 𑐏: (𑐜𑑄𑐐𑑀𑐮, 𑑑𑑑𑑒𑑖:𑑓𑑑) 𑑋

𑐂𑐟𑐶𑐴𑐵𑐳

𑐣𑐾𑐰𑐵𑑅 𑐳𑐩𑐵𑐖𑐫𑑂 𑐡𑐵𑐦𑐵𑐩𑑂𑐫𑐾𑐫𑐵 𑐰𑐶𑐎𑐵𑐳 𑐐𑐸𑐧𑐮𑐾𑐣𑐶𑑄𑐳𑐾𑑄 𑐖𑐸𑐮 𑐢𑐎𑐵: 𑐎𑑂𑐰:𑐕𑐶𑐣𑐵: 𑐢𑐵𑐫𑐩𑐦𑐸𑐳𑐵𑑄 𑐀𑐢𑑂𑐫𑐫𑐣 𑐀𑐣𑐸𑐳𑐣𑑂𑐢𑐵𑐣𑐫𑐵 𑐗𑑂𑐰𑐮𑐫𑑂‌ 𑐮𑐸𑐫𑐵𑐰:𑐐𑐸 𑐁:𑐟𑐎𑐫𑐵 𑐟𑐠𑑂𑐫𑐫𑐵 𑐁𑐑𑐵𑐬𑐫𑑂‌ 𑐢𑐵𑐫𑑂‌𑐐𑐸 𑐏:𑐳𑐵 𑐣𑐾𑐥𑐵𑐮𑐩𑐞𑑂𑐜𑐮𑐫𑑂‌ 𑐡𑐵𑐦𑐵 𑐨𑐖𑐣𑐫𑐵 𑐰𑐶𑐎𑐵𑐳 𑐮𑐶𑐔𑑂𑐕𑐰𑐶𑐎𑐵𑐮𑐫𑑂‌ 𑐴𑐾 𑐖𑐸𑐂𑐢𑐸𑑄𑐎𑐹𑐐𑐸 𑐏𑐣𑐾𑐡𑐸 𑑋 𑐟𑐟𑑂𑐎𑐵𑐮𑐷𑐣 𑐀𑐰𑐳𑑂𑐠𑐵𑐫𑑂‌ 𑐰𑐶𑐎𑐵𑐳 𑐖𑐹𑐐𑐸 𑐡𑐵𑐦𑐵 𑐨𑐖𑐣 𑐩𑐮𑑂𑐮𑐎𑐵𑐮𑐫𑑂‌ 𑐰𑐫𑐵: 𑐠𑐸𑐎𑐶𑑄 𑐀𑐗 𑐟𑐷𑐰𑑂𑐬𑐟𑐵 𑐎𑐵𑑅𑐐𑐸 𑐏𑐣𑐾𑐡𑐸 𑑋 𑐩𑐮𑑂𑐮 𑐖𑐸𑐖𑐸 𑐳𑐶𑐡𑑂𑐢𑐶𑐣𑐬𑐳𑐶𑑄𑐴 𑐩𑐮𑑂𑐮 𑐠𑑅𑐩𑑂𑐴𑑄 𑐴𑐾 𑐡𑐵𑐦𑐵𑐩𑑂𑐫𑐾𑐫𑐵 𑐩𑐵𑐢𑑂𑐫𑐩𑑄 𑐴𑐸𑐂𑐎𑐷𑐐𑐸 𑐎𑐵𑐟𑑂𑐟𑐶𑐥𑑂𑐫𑐵𑐏𑑄𑐫𑐵 𑐳𑐺𑐖𑐣𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐠𑐸𑐐𑐸 𑐥𑑂𑐫𑐵𑐏𑑄 𑐠𑑁𑑄𑐟𑐎 𑐣𑑄 𑐫𑐮 𑐮𑐵𑐫𑐎𑐸𑐮𑐷 𑐔𑑂𑐰𑑄𑐐𑐸 𑐎𑐵𑐟𑑂𑐟𑐶𑐡𑐧𑐸𑐮𑐷 𑐴𑐸𑐂𑐎𑐾𑐐𑐸 𑐫𑐵: 𑑋

𑐡𑐵𑐦𑐵 𑐨𑐖𑐣𑐫𑐵 𑐋𑐟𑐶𑐴𑐵𑐳𑐶𑐎𑐟𑐵𑐧𑐵𑐬𑐾 𑐀𑐣𑑂𑐰𑐾𑐲𑐞 𑐫𑐵𑐫𑑂𑐐𑐸 𑐗𑑂𑐰𑐮𑐫𑑂‌ 𑐕𑐟𑑂𑐬𑐧𑐴𑐵𑐡𑐸𑐬 𑐎𑐵𑐫𑐳𑑂𑐠 (𑑑𑑑𑑒𑑔: 𑑒𑑖) 𑐣𑐾𑐳𑑄 𑑘𑑔𑑕 𑐫𑐵 𑐩𑐔𑑂𑐕𑐾𑐐𑐵𑑄𑐫𑐵 𑐕𑐐𑐹 𑐱𑐶𑐮𑐵𑐥𑐟𑑂𑐬𑐫𑑂‌ 𑐣𑐮𑐶𑐎𑑂𑐰𑐵𑐠 𑐡𑐾𑐱𑐫𑐵 𑐡𑐵𑐦𑐵 𑐳𑐩𑐹𑐴𑐥𑐵𑐏𑐾𑑄 𑐨𑐐𑐰𑐵𑐣𑑂‌ 𑐰𑐶𑐲𑑂𑐞𑐸𑐫𑐵𑐟 𑐑𑐞𑑂𑐛 𑐕𑐐: 𑐡𑐾𑐕𑐵𑑅𑐐𑐸 𑐏𑑃 𑐄𑐮𑑂𑐮𑐾𑐏 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐠𑐸𑐎𑐠𑑄 𑐡𑐵𑐦𑐵 𑐨𑐖𑐣𑐫𑐵 𑐰𑐶𑐎𑐵𑐳 𑐮𑐶𑐔𑑂𑐕𑐰𑐶𑐎𑐵𑐮𑐫𑑂‌ 𑐖𑐹𑐐𑐸 𑐏:𑐳𑐵𑑄 𑐠𑐸𑐎𑐶𑐫𑐵 𑐟𑐖𑐶:𑐎 𑐰𑐶𑐎𑐵𑐳 𑐑𑐵:𑐳𑐵 𑐩𑐮𑑂𑐮𑐎𑐵𑐮𑐫𑑂‌ 𑐰𑐫𑐵: 𑐖𑐹𑐐𑐸 𑐏𑐣𑐾𑐡𑐸 𑑋 𑐀𑐠𑐾 𑐴𑐾 𑐱𑐵𑐴𑐎𑐵𑐮𑐫𑑂‌ 𑐣𑑄 𑐠𑑂𑐰 𑐰𑐶𑐢𑐵𑐫𑐵 𑐰𑐶𑐎𑐵𑐳 𑐀𑐗 𑐖𑐸𑐫𑐵𑐰𑑄𑐐𑐸 𑐏𑐣𑐾𑐡𑐸 𑑋 𑐁:𑐟𑐎 𑐣𑑄 𑐣𑐾𑐰𑐵𑑅 𑐧𑐳𑑂𑐟𑐷𑐂 𑐠𑐠𑐾 𑐴𑐾 𑐡𑐵𑐦𑐵 𑐨𑐖𑐣 𑐏𑐮:𑐟𑐫𑐳𑑄 𑐡𑐵𑐦𑐵 𑐨𑐖𑐣 𑐴𑐵𑐮𑐾𑐐𑐸 𑐔𑐮𑐣𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵: 𑐴𑐾 𑐔𑑂𑐰𑑄𑐐𑐸 𑐡𑐣𑐶𑑋

𑐣𑐾𑐰𑐵𑑅𑐟𑐫𑑂‌𑐳𑑄 𑐴𑐵𑐮𑐷𑐐𑐸 𑐕𑐸𑑄 𑐡𑐵𑐦𑐵𑐩𑑂𑐫𑐾

𑐮𑐶𑐔𑑂𑐕𑐰𑐶𑐎𑐵𑐮𑐣𑐶𑐳𑐾𑑄 𑐰𑐶𑐎𑐵𑐳 𑐖𑐸𑐫𑐵𑐰:𑐐𑐸 𑐡𑐵𑐦𑐵 𑐨𑐖𑐣𑐫𑐵 𑐕𑑂𑐫𑐮𑐵𑐧𑐸𑐮𑐵 𑐣𑐾𑐰𑐵𑑅 𑐖𑐵𑐟𑐶𑐡𑐸𑐣𑐾 𑐢𑐵𑐬𑑂𑐩𑐶𑐎, 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐏𑑃𑐣𑐵𑐥𑑄 𑐖𑐣𑑂𑐩𑐣𑐶𑐳𑐾𑑄 𑐩𑐺𑐟𑑂𑐫𑐸 𑐳𑑄𑐳𑑂𑐎𑐵𑐬𑐟𑐎 𑐣𑑄 𑐖𑐸𑐫𑐵: 𑐴𑐾 𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅𑐟𑐫𑑂‌ 𑐣𑑂𑐴𑐶𑐫𑐵 𑐱𑐸𑐬𑐸𑐰𑐵𑐟 𑐴𑐾 𑐡𑐾𑐐𑐮𑐫𑑂‌, 𑐦𑐮𑑂𑐔𑐵𑐫𑑂‌ 𑐔𑑂𑐰𑐣𑐵: 𑐠𑐷𑐠𑐷 𑐡𑑂𑐫𑑅𑐥𑐶𑐣𑐶𑐐𑐸 𑐳𑑂𑐟𑐸𑐟𑐶 𑐫𑐵𑐣𑐵: 𑐡𑐵𑐦𑐵 𑐴𑐵𑐮𑐵: 𑐴𑐾 𑐖𑐸𑐂 𑑋 𑐣𑐾𑐰𑐵𑑅𑐟𑐫𑐳𑑄 𑐴𑐵𑐮𑐷𑐐𑐸 𑐡𑐵𑐦𑐵𑐩𑑂𑐫𑐾𑐫𑐵 𑐕𑐸𑑄 𑐩𑑂𑐫𑐾𑐫𑐵 𑐰𑐶𑐲𑐫𑐳𑑄 𑐠𑐣 𑐔𑐬𑑂𑐔𑐵 𑐫𑐵𑐫𑐐𑐸 𑐖𑐸𑐂 𑑋 𑐡𑐵𑐦𑐵𑐩𑑂𑐫𑐾 𑐴𑐵𑐮𑐾𑐐𑐸 𑐗𑑂𑐰𑐮𑐫𑑂‌ 𑐴𑐵𑐮𑐷𑐥𑐶𑑄𑐳𑑄 𑐔𑐵𑐫𑐎𑑄-𑐩𑐔𑐵𑐫𑑂‌𑐎𑑄 𑐣𑐾𑐰𑐵𑑅𑐨𑐵𑐫𑑂‌ 𑐣𑐵𑐥𑐣𑐵𑐥𑑄 𑐳𑑄𑐳𑑂𑐎𑐺𑐟, 𑐩𑐿𑐠𑐶𑐮𑐷 𑐁𑐡𑐶 𑐨𑐵𑐲𑐵𑐫𑐵 𑐩𑑂𑐫𑐾 𑐣𑑄 𑐴𑐵𑐮𑐵𑐔𑑂𑐰𑐣𑐷 𑑋 𑐥𑑂𑐬𑐵𑐔𑐷𑐣𑐎𑐵𑐮𑐣𑐶𑐳𑐾𑑄 𑐴𑐵𑐮𑐵𑐰𑐫𑐵𑐔𑑂𑐰𑑄𑐐𑐸 𑐡𑐵𑐦𑐵𑐩𑑂𑐫𑐾 𑐕𑐸𑑄 𑐣𑑄 𑐎𑐠𑑄𑐫𑐵 𑐰𑐶𑐱𑐾𑐲 𑐥𑑂𑐬𑐱𑐶𑐎𑑂𑐲𑐞𑐫𑐵 𑐁𑐢𑐵𑐬𑐫𑑂 𑐕𑐐𑐹 𑐥𑐸𑐳𑑂𑐟𑐵𑑄 𑐩𑐾𑐐𑐸 𑐥𑐸𑐳𑑂𑐟𑐵𑐫𑐵𑐟 𑐴𑐳𑑂𑐟𑐵𑐣𑑂𑐟𑐬𑐞 𑐖𑐸𑐫𑐵𑐔𑑂𑐰𑑄𑐐𑐸 𑐩𑐏𑐸𑐳𑐾𑑄 𑐩𑐵𑐟𑑂𑐬 𑐣𑑂𑐫𑐣𑐵𑐐𑐸 𑐀𑐬𑑂𑐠𑐵𑐟𑑂‌ 𑐱𑑂𑐬𑐰𑐞𑐫𑐵 𑐁𑐢𑐵𑐬𑐫𑑂‌ 𑐖𑐎 𑐴𑐳𑑂𑐟𑐵𑐣𑑂𑐟𑐬𑐞 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐕𑐸𑑄 𑐣𑑄 𑐡𑐵𑐦𑐵𑐩𑑂𑐫𑐾 𑐴𑐵𑐮𑐾𑐣𑑂𑐴𑑂𑐫𑑅 𑐣𑐵𑐳:𑐡𑑂𑐫:𑐫𑐵 𑐰𑐣𑑂𑐡𑐣𑐵 𑐀𑐬𑑂𑐠𑐵𑐟𑑂‌ 𑐣𑐩𑐳𑑂𑐎𑐬𑐞 𑐫𑐵𑐂 𑑋 𑐩𑑂𑐫𑐾 𑐱𑐸𑐬𑐸 𑐫𑐵𑐫𑐣𑑂𑐴𑑂𑐫𑑅𑐫𑐵 𑐠𑑂𑐰 𑐕𑐐𑐹 𑐎𑐠𑑄𑐫𑐵 𑐣𑐶𑐫𑐩𑐶𑐟 𑐣𑐶𑐫𑐩 𑐢𑐵:𑐳𑐵 𑐕𑐸𑑄 𑐥𑐵𑐂𑐩𑐏𑐸 𑑋 𑐣𑐾𑐰𑐵𑑅𑐳𑐩𑐵𑐖𑐫𑑂‌ 𑐥𑑂𑐬𑐵𑐔𑐷𑐣𑐂𑐮𑐣𑐶𑐳𑐾𑑄 𑐣𑑂𑐴𑑂𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐵𑐦𑐵𑐫𑐵 𑐕𑐸𑑄 𑐩𑑂𑐫𑐾 𑐠𑐸𑐎𑐠𑑄 𑐡𑐸-

𑑉 𑐣𑐩 𑐱𑑂𑐬𑐷: 𑑋 𑐣𑐶𑐟𑐾𑐣𑐵𑐠𑐵𑐫 𑐣𑐩𑑅 𑑌
𑑉 𑐣𑐩 𑐱𑑂𑐬𑐷: 𑐧𑐖𑑂𑐬𑐳𑐟𑑂𑐰𑐵𑐫 𑐞𑐩𑑅 𑑌
𑑉 𑐣𑐩 𑐱𑑂𑐬𑐷 𑐧𑐖𑐳𑐟𑑂𑐰𑐵𑐫 𑑌
𑐟𑑀𑐬𑐵 𑑑 𑐬𑐸𑐫𑐵 𑐟𑐸𑐎𑐶𑐔𑐵 𑐡𑐫𑐎𑐾𑐐𑐹
𑐐 𑐖𑐹 𑑑𑑖 𑐟𑐥𑐮 𑑒 𑐔𑐟𑐹 𑑒 𑐟𑐥𑐫
𑑉 𑐣𑐩𑑅 𑐱𑑂𑐬𑐷𑐣𑐺𑐟𑑂𑐫𑐣𑐵𑐠𑐵𑐫 𑐣𑐩𑑅 𑑌 𑑓𑑌

𑐩𑑂𑐫𑐾 𑐮𑑂𑐫𑐵: 𑑑
,𑐬𑐵𑐐 𑐬𑐵𑐖𑐰𑐶 (𑑔) 𑐖𑐫 𑑌 𑐟𑐵𑐬 𑐔𑑀 𑑌
𑐖𑐐𑐟𑐳 𑐣𑐶𑐟𑐾𑐣𑐵𑐠 𑐴𑐬𑐏𑐣 𑐫𑐵𑐎 𑐬𑐳,
𑐨(𑑕)𑐖𑐬𑐥𑐾 𑐌𑐩𑑂𑐴𑐟𑐸 𑐴𑐟𑐵𑐳 𑑌𑑑𑑌
𑐀𑐩𑑄𑐐𑐮 𑐦𑐸𑐟𑐎𑐳𑑂𑐫 𑐫𑐵𑐴𑐸 (𑑓𑐎.𑑑 ) 𑐣𑐾 𑐩𑑄𑐐 𑑌 (𑐮)
𑐨𑐐𑐟 𑐏𑐳𑐾 𑐫𑐵𑐎, 𑐌𑐣 𑐥𑐟𑐶𑐥𑐵𑐬 𑑌𑑑𑑌
𑐢𑐸𑐕𑐾𑐐𑐸 (𑑒) 𑐬𑐶𑐖𑐳 𑐴𑐶𑐳𑐵 𑐠𑐵𑐳𑐵 (𑑒)
𑐣𑐵𑐐 𑐟𑐶𑐳𑐵 𑐩𑑀𑐬𑐩𑐵𑐮 𑐐𑐬𑐳 𑐎𑑀𑐏 (𑑓) 𑐳𑐵 𑑌 𑑒𑑌
𑐡𑐧𑐹 𑑒 𑐧𑐮𑐸𑐬𑐸𑐣 𑐠𑐵𑐒𑐵𑐌 𑐬𑐳𑐣 𑑌
𑐳𑑄𑐎𑐬 𑐐𑐌(𑑔)𑐮𑐶𑐌 𑐴𑐬𑐏𑐣 𑐫𑐵𑐎 𑑌 𑑒𑑌
𑐮𑐳𑐶𑐎𑐬 𑐖(𑐐)𑐟𑐥𑑂𑐰𑐬𑐟 𑐟𑐫𑐵𑐌 𑐔𑑄𑐡𑑂𑐬𑐩𑐵𑐰𑐵𑐣 𑑌
𑐩𑐸𑐳𑐵𑐣𑐳 𑐫𑐵𑐟 𑐧𑐵𑐳𑑌 𑑔𑑌
𑐀𑐳𑑄𑐏𑐾 𑐐𑐸𑐣 (𑑔𑐎.𑑑) 𑐫𑐵𑐎 𑐖𑐫𑐥𑑂𑐬𑐬𑐎𑐵𑐳𑐣 𑑌
𑐩𑐡𑐌 𑐌𑐟𑐶 𑐌𑐳 𑐐𑐸𑐣𑐫𑐵 𑐧𑐏𑐵𑐣 (𑑒) 𑐣 𑑌 𑑕 𑑌

𑐩𑑂𑐫𑐾 𑐮𑑂𑐫𑐵:𑑒

, 𑐬𑐵𑐐 𑐎𑐬𑐵 𑑌𑐟𑐵 𑐔𑑀𑑌

𑐧𑐶𑐖𑑂𑐫𑐵𑐢𑐬𑐶 𑐟𑑀𑐴𑐾 𑐖𑐫 𑐩𑐵𑐴𑐵𑑄𑐩𑐵(𑑒)𑐰𑐖𑐬 𑐖𑑀𑐐𑐶𑐣𑐶𑐬𑐳𑑄 𑑌 𑐢𑐸𑑌
𑐧𑐶𑐲𑑂𑐞𑐸𑐩𑐟𑐶𑐟𑐶𑐬 𑐁𑐣𑑄𑐣𑑂𑐡𑑂𑐬 𑐁(𑑓)/𑐣𑐡𑑂𑐬 𑑌
𑐖𑑀𑐐𑑂𑐫𑐨𑑀𑐐𑑂𑐫 𑐳𑐰𑐿𑐠𑐫 𑐩𑐵𑐟𑐵 𑑌𑑑𑑌
𑐎𑑀𑐟𑐶𑐡𑐾𑐰𑐵𑐎𑐵 (𑑔)𑐬 𑐀𑐬𑐹𑐣 𑐳𑐧𑐩𑐸𑐏 𑑌
𑐬𑐎𑑂𑐟𑐰𑐬𑐣 𑐳𑐸𑐟𑐶𑐣𑐶 𑐣𑐫𑐞𑐢𑐬 𑑌 (𑑕) 𑑌 𑑒𑑌
𑐴𑐾 𑐩𑐳𑐸𑐣𑐶𑐩𑐬 𑐳𑐸𑑄𑐢𑐬 𑐧𑑄𑐟𑐵 𑑌
𑐔𑑄𑐡𑑂𑐬𑐎𑐬𑐵 𑐳𑑂𑐰𑐨𑐾 𑐩𑐣𑐶(𑑙𑐎.𑑑 )𑐩𑐫 𑐁𑐬𑑄𑐎𑐶𑐟 𑑌 𑑓𑑌
𑐟𑐶𑐬𑐶𑐨𑐸𑐰𑐣𑐥𑐟𑐶 𑐖𑐣𑐣𑐶 𑐂(𑑒)𑐱𑑂𑐰𑐬𑐷 𑑌
𑐰𑐶𑐱𑑂𑐰𑐰𑑂𑐫𑐵𑐥𑐶𑐟 𑐖𑐐𑐟 𑐩𑑀𑐴𑐶𑐣𑐶 𑑌 𑑔𑑌
𑐰𑐬𑑂𑐖𑑂𑐖 𑐱𑐸𑐏(𑑓)𑐥𑐬 𑐏𑐟𑑂𑐰𑐵𑑄𑐐 𑐴𑐵𑐠𑑂𑐫 𑑌
𑐱𑐸𑐢𑑄𑐬 𑐱𑑂𑐰𑐨𑐵 𑐣𑐬𑐩𑐸𑑄𑐡𑐩𑐵𑐬𑐵 𑑌 𑑕 𑑌(𑑔)

𑐩𑑂𑐫𑐾 𑐮𑑂𑐫𑐵:𑑓

,𑐬𑐵𑐐 𑐱𑑂𑐬𑐷 𑑌 𑐟𑐵𑐬 𑐔𑑀 𑑌

, 𑐩𑐣𑐶𑐔𑐹𑐬 𑐣𑐶𑐰𑐵𑐳𑐶𑐣𑐶 𑐱𑑂𑐬𑐷(𑑕)𑐰𑐖𑑂𑐬𑐖𑐵𑐾𑐐𑐶𑐣𑐶 𑑌
𑐳𑐶𑑄𑐑𑐶𑐣𑐶 𑐬𑐸𑐥𑐶𑐣𑐶 𑐢𑐬𑐶𑐡𑐾𑐰𑐶 𑐰𑑂𑐫𑐵𑐢𑐶𑐣𑐶 (𑑑𑑘𑐎.𑑑) 𑐬𑐸𑐥𑐶𑐣𑐶 𑑌𑑑𑑌
𑐟𑑂𑐬𑐶𑐣𑐫𑐣 𑐱𑐸𑑄𑐢𑐬𑐶 𑐩𑐸𑑄𑐡𑑂𑐬𑐩𑐵𑐬𑐵 (𑑒) 𑑌 𑐏𑐬𑑂𑐐 𑐣𑐶𑐬𑐸𑐥𑐷𑐣𑐶 𑐩𑑂𑐴𑐿𑐏𑐵𑐳𑐸𑐬 𑐎𑐮𑑀 𑐰𑐵𑐳𑐾 𑑌 𑑒𑑌 (𑑓)
𑐥𑑄𑐔𑐎𑐥𑐵𑐟 𑐬𑐵𑐟𑐎 𑐣𑐵𑐐 𑐀𑐲𑑂𑐚 𑐨𑐸𑐏𑐶𑐣𑐶 𑑌
𑐴𑐵𑐡 𑐁(𑑔)𑐨𑐬𑐣 𑐱𑐸𑐖 𑐎𑑂𑐰𑐟𑐶 𑐬𑐎𑑂𑐟𑐰𑐣𑑄 𑑌 𑑓𑑌
𑐟𑐿𑐮𑑀𑐎𑐾 𑐖(𑑑)𑐣𑐣𑐶 𑐂𑐳𑑂𑐰𑐬𑐶 𑐎𑑀𑐴𑐶 𑐣𑐴𑐶 𑐖𑐵𑐣𑐾 𑑌
𑐨𑐿𑐬𑐌 𑐩𑐵𑐟𑐶𑐎𑐵, 𑐐(𑑑𑑙𑐎:𑑑)𑐡𑐾𑐳 𑐎𑐸𑐩𑐵𑐬𑐶 𑐎𑐵𑐬𑐶𑐎𑐵 𑑌 𑑔𑑌
𑐟𑑀𑐴𑐾 𑐡𑐾𑐰𑐵𑑄 𑐳𑐸𑐩𑐬𑐣 (𑑒) 𑐟𑑀𑐴𑐾 𑐄𑐐𑐣𑐵𑐬𑐵 𑑌
𑐳𑑄𑐎𑐟 𑐟𑐵𑐬𑐶𑐣𑐶 𑐎𑐥𑐵 𑐎𑐬𑑀 𑐱𑑂𑐬𑐷 𑐨𑐰𑐵𑐣𑐶 (𑑓) 𑑌𑑕 𑑌
𑐱𑑂𑐬𑐷𑐥𑐬𑐟𑐵𑐥 𑐩𑐬 𑐳𑑄𑐳𑐵𑐬𑐎𑐶 𑐳𑐵𑐬 𑑌
𑐬𑐶𑐥𑐶𑐎𑐸(𑑔)𑐬 𑐣𑐵𑐳𑑂𑐫 𑐎𑐬𑑀𑐴𑐶 𑐡𑐫 𑐄𑐳𑐵𑐳𑑂𑐫 𑑌 𑑖 𑑌 𑑕 )

𑐩𑑂𑐫𑐾 𑐮𑑂𑐫𑐵:𑑔

𑐬𑐵𑐐 𑐖𑐫𑐖𑐩𑑄𑐟𑐶 𑑌 𑐟𑐵𑐬 𑐔𑑀 𑑌
𑐳𑐶𑐰 𑐀𑐰(𑑒𑑐𑐎.𑑑) 𑐟𑐵𑐬 𑐎𑐵𑐬𑐎𑐵𑐬𑐎𑐵𑐬 𑐣॑𑑌𑐢𑐸𑑌
𑐨𑐶𑐩 𑐩𑐵𑐴𑐵𑐰𑐷𑐬 (𑑒) 𑐡𑐸𑐏𑐶𑐫𑐵 𑐡𑐸𑐏 𑐴𑐬𑐣 𑑌
𑐎𑐶𑑄𑐔 𑐦𑐸𑐟𑐎 𑐟𑐬 𑐖𑐸𑐳𑐾 𑐐𑐸𑐥𑐵(𑑓)𑐟𑐣 𑑌𑑑𑑌
𑐬𑐣𑐳 𑐒𑑂𑐴𑐬𑐹𑐫 𑐠𑐵𑐳 𑐀𑐟𑐶 𑐫𑐎 𑐩𑐣𑑌
𑐖(𑑔)𑐬𑐵𑐳𑑄𑐡𑐣𑐶 𑐦𑐵𑐦𑐵𑐬 𑐖𑑀𑐒𑐵𑐌 𑐟𑐩𑐣 𑑌 𑑒𑑌
𑐮𑑂𑐰𑐵𑐮𑐾 (𑑕) 𑐒𑐴𑐏 𑐬𑐸𑐩𑐒𑐵𑐌 𑐬𑐶𑐟 𑐢𑐸 𑐳𑑂𑐰𑐵𑐳𑐣 𑑌
𑐬𑐵𑐒𑐵𑐌 𑐴𑐶 𑐁𑐟𑐶(𑑒𑑑𑐎:𑑑)𑐥𑐟𑐶 𑐥𑐶𑐎𑐵𑐬 𑐥𑑂𑐰𑐵𑐠𑐣 𑑌 𑑓 𑑌
𑐡𑐸𑐖𑑀𑐢𑐣 𑐁𑐡𑐶 𑐳𑑂𑐫𑐵𑐟 𑐠(𑑒)𑐌 𑐰𑐬𑐣 𑑌
𑐧𑐫𑑄𑐬𑐶𑐥𑐣𑐶𑐳 𑐴𑐶 𑐬𑐵𑐣𑑄 𑐨𑐸𑐩𑐶 𑐩𑐠𑐣 𑑌 𑑔 (𑑓) 𑑌
𑐏𑐒𑐵𑐌 𑐬𑐳𑐣 𑐖𑐸𑐬 𑐖𑑀𑐐𑐶𑐣𑐶𑐫𑐵 𑐐𑐣 𑑌
𑐣𑐫𑐵𑐌 𑐩𑑂𑐴𑐶(𑑔)𑐟𑐬 𑐀𑐣 𑐨𑐸𑐟 𑐥𑐾𑐟𑐵𑐬𑐣𑑌 𑑕𑑌
𑐐𑐸𑐬𑐶𑐟 𑐐𑐸𑐣 𑐧𑐏𑐵(𑑕)𑐣 𑐫𑐵𑐫 𑐮𑑂𑐴𑐵𑐎𑐩𑑂𑐴𑐣 𑑌
𑐟𑑀𑐬𑐟𑐫𑐎𑐾 𑐩𑐟𑐾𑐬𑐾 𑐣𑐶𑐥𑐵 𑐕𑐶 𑐔(𑑒𑑒𑐎:𑑑)𑐮𑐣 𑑌 𑐳𑐶𑐧𑑌𑑖𑑌

𑐕𑐸 𑐣𑑄, 𑐩𑑂𑐫𑐾 𑐰𑐶𑐱𑐾𑐲 𑐫𑐵𑐣𑐵: 𑐡𑐵𑐦𑐵𑐩𑑂𑐫𑐾 𑐴𑐵𑐮𑐷𑐧𑐮𑐫𑑂‌ 𑐡𑐎𑐮𑐫 𑐣𑑂𑐴𑐵𑐥𑐵𑑄 𑐣𑐵𑐳𑐡𑑂𑐫:𑐫𑐵 𑐰𑐣𑑂𑐡𑐣𑐵 𑐫𑐵𑐂 𑑋 𑐀𑐮𑐾 𑐟𑐶𑐣𑐶 𑐠𑐷𑐠𑐷 𑐡𑑂𑐫𑑅𑐥𑐶𑐣𑐶𑐐𑐸 𑐁𑐬𑐵𑐢𑐣𑐵 𑐫𑐵𑐳𑐾𑑄 𑐩𑑂𑐫𑐾 𑐴𑐵𑐮𑐷 𑑋 𑐔𑑂𑐰𑐫𑑂‌𑐫𑐵 𑐥𑑂𑐫𑐥𑐸 𑐩𑑂𑐫𑐾𑐫𑐵 𑐨𑐵𑐲𑐵 𑐧𑐶𑐳𑑂𑐎𑑄 𑐖𑐹𑐳𑐵𑑄 𑐮𑐶𑐥𑐶 𑐑𑐵𑑅𑐳𑐵 𑐥𑑂𑐬𑐔𑐮𑐶𑐟 𑐮𑐶𑐥𑐶 𑐴𑐾 𑐏𑑅 𑑋

𑐣𑑂𑐴𑐵𑐥𑐵𑑄𑐐𑐸 𑐩𑑂𑐫𑐾𑐫𑑂‌ 𑐣𑑄 𑐣𑐶𑐟𑑂𑐫𑐣𑐵𑐠𑐫𑐵 𑐧𑐬𑑂𑐞𑐣 𑐫𑐵𑐣𑐵𑐟:𑐐𑐸 𑐡𑐸 𑑋 𑐳𑑄𑐳𑐵𑐬𑐫 𑐰𑑂𑐫𑐵𑐥𑑂𑐟 𑐦𑐸𑐎𑑂𑐎 𑐀𑐩𑑄𑐐𑐮 𑐣𑐵𑐱 𑐫𑐵𑐣𑐵: 𑐩𑑄𑐐𑐮 𑐫𑐵𑐂𑐩𑑂𑐴 𑐕𑐶 𑐣𑐶𑐟𑑂𑐫𑐣𑐵𑐠 𑐕𑐩𑑂𑐴 𑐏: 𑐢𑐎𑐵: 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐣𑐾𑐰𑐵:𑐨𑐵𑐳𑑄 𑐴𑐾 𑐔𑑂𑐰𑐫𑐵𑐟:𑐐𑐸 𑐠𑐸𑐐𑐸 𑐩𑑂𑐫𑐾𑐫𑑂‌ 𑐣𑐶𑐟𑑂𑐫𑐣𑐵𑐠𑐫𑐵 𑐬𑐹𑐥 𑐣𑑄 𑐰𑐬𑑂𑐞𑐣 𑐫𑐵𑐣𑐵𑐟:𑐐𑐸 𑐡𑐸 𑑋 𑐢𑐸𑑃𑐫𑐵 𑐕𑑂𑐫𑑄𑐐𑐹 𑐴𑐶𑐣𑐵𑐟𑐂𑐩𑑂𑐴, 𑐣𑐵𑐐𑐫𑐵𑐟 𑐟𑐶𑐳𑐵𑐎𑐠𑑄 𑐐:𑐥𑐟𑐫𑑂‌ 𑐎𑑂𑐰𑐏𑐵𑐫𑐵𑐟𑐂𑐩𑑂𑐴, 𑐡𑐩𑐡𑐩 𑐜𑐩𑐬𑐸 𑐠𑐵𑐣𑐵𑐖𑐸𑐂𑐩𑑂𑐴, 𑐕𑑂𑐫𑐣𑐫𑑂‌ 𑐖𑐚𑐵 𑐔𑐶𑐣𑐵: 𑐀𑐬𑑂𑐢𑐔𑐣𑑂𑐡𑑂𑐬 𑐟𑐫𑐵: 𑐄𑐎𑐶 𑐐𑑄𑐐𑐵 𑐴𑐵𑐫𑑂𑐎𑐵𑐟𑐂𑐩𑑂𑐴, 𑐣𑐵𑐥𑑄 𑐩𑐳𑐵𑐣𑐫𑑂‌ 𑐧𑐵𑐳 𑐫𑐵𑐂𑐩𑑂𑐴 𑐣𑐶𑐟𑑂𑐫𑐣𑐵𑐠 𑐀𑐬𑑂𑐠𑐵𑐟𑑂‌ 𑐩𑐴𑐵𑐡𑑂𑐫:𑐫𑐵𑐟 𑐧𑐣𑑂𑐡𑐣𑐵 𑐫𑐵𑐣𑐵𑐟:𑐐𑐸 𑐡𑐸 𑑋 𑐡𑐎𑐮𑐾 𑐮𑐶𑐥𑐵 𑐩𑑂𑐫𑐾𑐔𑑂𑐔𑐩𑐶𑑄 𑐠:𑐐𑐸 𑐣𑐵𑑄 ‘𑐖𑐫𑐥𑑂𑐬𑐎𑐵𑐱𑐣’ 𑐢𑐎𑐵: 𑐔𑑂𑐰𑐫𑐵𑐟:𑐐𑐸 𑐡𑐸 𑑋 𑐄𑐎𑐶𑑄 𑐠𑑂𑐰 𑐩𑑂𑐫𑐾 𑐖𑐸𑐖𑐸 𑐖𑐫𑐥𑑂𑐬𑐎𑐵𑐱 𑐩𑐮𑑂𑐮𑑄 𑐔𑑂𑐰𑐫𑐵𑐟:𑐐𑐸 𑐢𑐎𑐵: 𑐳𑑂𑐥𑐲𑑂𑐚 𑐖𑐹 𑑋 𑐠𑑂𑐰 𑐩𑑂𑐫𑐾 𑐬𑐵𑐐 𑐬𑐵𑐖𑐰𑐶𑐖𑐫𑐳 𑐁𑐢𑐵𑐬𑐶𑐟 𑐡𑐸𑑋

𑐣𑐶𑐥𑐸𑐐𑐸 𑐩𑑂𑐫𑐾𑐫𑑂 𑐧𑐖𑑂𑐬𑐖𑑀𑐐𑐶𑐣𑐷𑐡𑐾𑐰𑐷𑐫𑐵 𑐳𑑂𑐟𑐸𑐟𑐶 𑐫𑐵𑐳𑐾𑑄 𑐰𑐫𑐎:𑐫𑐵 𑐬𑐹𑐥𑐫𑐵 𑐰𑐬𑑂𑐞𑐣 𑐫𑐵𑐣𑐵𑐟:𑐐𑐸 𑐡𑐸 𑑋 𑐳𑑄𑐳𑑂𑐎𑐺𑐟 𑐨𑐵𑐲𑐵 𑐣𑑄 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐠𑐸𑐐𑐸 𑐩𑑂𑐫𑐾𑐫𑑂‌ 𑐰𑐶𑐲𑑂𑐞𑐸𑐩𑐟𑐷 𑐏𑐸𑐳𑐶𑐳𑐶𑐠𑐫𑑂‌ 𑐁𑐣𑐣𑑂𑐡 𑐩𑐸𑐡𑑂𑐬𑐵𑐫 𑐰𑐶𑐬𑐵𑐖𑐩𑐵𑐣 𑐖𑐸𑐫𑐵𑐔𑑂𑐰𑐣𑐷𑐩𑑂𑐴 𑐧𑐖𑑂𑐬𑐖𑑀𑐐𑐶𑐣𑐷𑐡𑐾𑐰𑐷 𑐴𑐾 𑐦𑐸𑐎𑑂𑐎𑐳𑐶𑐫𑐵 𑐩𑐵𑐟𑐵 𑐏: 𑐢𑐎𑐵: 𑐢𑐫𑐵𑐟:𑐐𑐸 𑐡𑐸 𑑋 𑐀𑐢𑐾 𑐴𑐾 𑐡𑐾𑐰𑐷𑐫𑐵 𑐬𑐎𑑂𑐟𑐰𑐬𑑂𑐞 𑐀𑐬𑑂𑐠𑐵𑐟 𑐴𑑂𑐫𑐵𑐄𑑃𑐐𑐸 𑐧𑐵𑑃𑐮𑐵𑐐𑐸 𑐩𑐶𑐏𑐵, 𑐧𑐵𑑃𑐮𑐵𑐐𑐸 𑐡𑐣𑑂𑐟 𑐎𑑂𑐫𑐣𑐵 𑐩𑐸𑐳𑐸𑐴𑐸𑑄 𑐣𑑂𑐴𑐶𑐮𑐵𑐔𑑂𑐰𑑄𑐐𑐸 𑐏𑑂𑐰𑐵:𑐫𑐵 𑐳𑐸𑐣𑑂𑐡𑐬𑐟𑐵 𑐣𑐵𑐥𑑄 𑐩𑐣𑐹𑐫𑐵 𑐕𑑂𑐫𑑄 𑐎𑑂𑐰𑐏𑐵𑐫𑐵𑐟:𑐐𑐸 𑐢𑐎𑐵: 𑐡𑐾𑐰𑐷𑐫𑐵 𑐰𑐬𑑂𑐞𑐣 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐳𑑂𑐰𑑄𑐐𑐸𑐮𑐶𑑄 𑐮𑑀𑐎𑐫𑐵 𑐖𑐣𑐣𑐷𑐎𑐠𑑄 𑐰𑐖𑑂𑐬𑐖𑑀𑐐𑐶𑐣𑐷𑐫𑐵𑐟 𑐣𑐵𑐮𑐵𑐎𑐵𑐳𑐾𑑄 𑐦𑐸𑐎𑑂𑐎 𑐖𑐐𑐟𑑂‌ 𑐰 𑐖𑐐𑐟𑐫𑑂‌ 𑐔𑑂𑐰𑐥𑐶𑑄 𑐥𑑂𑐬𑐵𑐞𑐷𑐫𑐵 𑐄𑐡𑑂𑐢𑐵𑐬𑐎𑐫𑐵 𑐬𑐹𑐥𑐫𑑂‌ 𑐣𑑄 𑐰𑐬𑑂𑐞𑐣 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐬𑐵𑐐 𑐎𑐬𑐵𑐫𑑂‌ 𑐁𑐢𑐵𑐬𑐶𑐟 𑐠𑐸𑐐𑐸 𑐩𑑂𑐫𑐾 𑐔𑑀 𑐟𑐵𑐮𑐫𑑂‌ 𑐴𑐵𑐮𑐾𑐐𑐸 𑐏: 𑑋

𑐳𑑂𑐰𑐥𑐸𑐐𑐸 𑐩𑑂𑐫𑐾 𑐖𑐸𑐖𑐸 𑐥𑑂𑐬𑐟𑐵𑐥 𑐩𑐮𑑂𑐮𑑄 𑐔𑑂𑐰𑐫𑐵𑐟:𑐐𑐸 𑐏: 𑑋 𑐩𑐿𑐠𑐮𑐷 𑐨𑐵𑐲𑐵𑑄 𑐔𑑂𑐰𑐫𑐵𑐟:𑐐𑐸 𑐠𑐸𑐐𑐸 𑐩𑑂𑐫𑐾 𑐬𑐵𑐐 𑐱𑑂𑐬𑐷 𑐳𑑄 𑐁𑐢𑐵𑐬𑐶𑐟 𑐏𑑅𑐳𑐵 𑐔𑑀 𑐟𑐵𑐮𑐫𑑂‌ 𑐴𑐵𑐮𑐾𑐐𑐸 𑐏𑑅 𑑋 𑐩𑑂𑐫𑐾𑐫𑑂‌ 𑐩𑐣𑐶𑐔𑐹𑐜𑐫𑑂‌ 𑐔𑑂𑐰𑐣𑐷𑐩𑑂𑐴 𑐡𑐾𑐰𑐷 𑐰𑐖𑑂𑐬𑐖𑑀𑐐𑐶𑐣𑐶𑐫𑐵 𑐳𑐸𑐣𑑂𑐡𑐬𑐟𑐵 𑐰 𑐱𑐎𑑂𑐟𑐶𑐫𑐵 𑐰𑐬𑑂𑐞𑐣 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐳𑑂𑐰𑑄𑐐: 𑐩𑐶𑐏𑐵 𑐡𑐸𑐩𑑂𑐴, 𑐩𑐣𑐹𑐫𑐵 𑐕𑑂𑐫𑑄 𑐎𑑂𑐰𑐏𑐵𑐫𑐵𑐟𑑅𑐩𑑂𑐴 𑐣𑐵𑐥𑑄 𑐏𑐜𑑂𑐐 𑐖𑑂𑐰𑐣𑐵: 𑐩𑐴𑐶𑐲𑐵𑐳𑐸𑐬 𑐬𑐵𑐎𑑂𑐲𑐳𑐫𑐵 𑐧𑐢 𑐫𑐵𑐣𑐵𑐔𑑂𑐔𑑄𑐩𑑂𑐴 𑐡𑐾𑐰𑐷 𑐰𑐖𑑂𑐬𑐖𑑀𑐐𑐶𑐣𑐷𑐫𑐵 𑐎𑐺𑐥𑐵 𑐡𑐺𑐲𑑂𑐚𑐶𑑄 𑐴𑐾 𑐠𑑂𑐰 𑐳𑑂𑐰𑑄𑐐𑐸𑐮𑐶𑑄 𑐮𑑀𑐎𑐫𑐵 𑐄𑐡𑑂𑐢𑐵𑐬 𑐖𑐸𑐫𑐵𑐔𑑂𑐰𑑄𑐐𑐸 𑐏: 𑐢𑐎𑐵: 𑐔𑑂𑐰𑐩𑐶𑑄 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋

𑐀𑐠𑐾 𑐴𑐾 𑐥𑑂𑐫𑐥𑐸𑐐𑐸 𑐩𑑂𑐫𑐾𑐫𑑂 𑐨𑐶𑐣𑑂𑐡𑑂𑐫:𑐫𑐵 𑐱𑐎𑑂𑐟𑐶 𑐰 𑐐𑐸𑐞𑐫𑐵 𑐰𑐬𑑂𑐞𑐣 𑐫𑐵𑐣𑐵𑐟:𑐐𑐸 𑐡𑐸 𑑋 𑐬𑐵𑐐 𑐖𑐫𑐖𑐩𑑄𑐟𑐶𑐳 𑐁𑐢𑐵𑐬𑐶𑐟 𑐠𑐸𑐐𑐸 𑐩𑑂𑐫𑐾 𑐣𑑄 𑐔𑑀 𑐟𑐵𑐮𑐫𑑂‌ 𑐴𑐵𑐮𑐾𑐐𑐸 𑐏𑑅 𑑋 𑐠𑐸𑐐𑐸 𑐩𑑂𑐫𑐾𑐫𑑂‌ 𑐨𑐶𑐣𑑂𑐡𑑂𑐫𑐰𑑄 𑐎𑐶𑐔𑐎𑐫𑐵𑐟 𑐡𑐵𑐫𑐵: 𑐕𑑂𑐫𑑄𑐐𑐹 𑐥𑐶𑐫𑐵: 𑐳𑑂𑐫𑐵:𑐐𑐸 𑐣𑐵𑐥𑑄 𑐡𑐸𑐱𑐵𑐳𑐣𑐫𑐵 𑐁𑐟𑐶𑐥𑐸𑐟𑐶 𑐮𑐶𑐎𑐫𑐵: 𑐳𑑂𑐫𑐵𑑅𑐐𑐸 𑐏𑑃𑐫𑐵 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐣𑐵𑐥𑑄 𑐠𑐸𑐐𑐸 𑐩𑑂𑐫𑐾𑐫𑑂‌ 𑐡𑐸𑐬𑑂𑐫𑑀𑐢𑐣𑐫𑐵𑐟 𑐳𑑂𑐫𑐵:𑐐𑐸 𑐏𑑃 𑐣𑑄 𑐣𑑂𑐴𑑂𑐫𑐠𑐣𑐵𑐟:𑐐𑐸 𑐡𑐸 𑑋 𑐩𑑂𑐫𑐾 𑐔𑑂𑐰𑐩𑐶𑑄 𑐨𑐶𑐣𑑂𑐡𑐫:𑐫𑐵𑐟 𑐴𑐾 𑐡𑐎𑐮𑐾 𑐟𑐑𑑄𑐩𑑂𑐴 𑐡𑑂𑐫: 𑐨𑐵𑑅𑐥𑐶𑐫𑐵 𑐡𑑂𑐫:𑐫𑐵 𑐥𑐵𑐮𑐶𑐂 𑐴𑐾 𑐳𑐡𑐵𑑄 𑐧𑐵𑐳 𑐮𑐵𑐫𑐩𑐵 𑐢𑐎𑐵: 𑐦𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐔𑑂𑐰𑐫𑑂‌ 𑐄𑐮𑑂𑐮𑐾𑐏 𑐖𑐹𑐐𑐸 𑐥𑑂𑐫𑐥𑐸 𑐩𑑂𑐫𑐾 𑐣𑐾𑐰𑐵𑑅𑐟𑐫𑑂‌𑐐𑐸 𑐴𑐾 𑐡𑐵𑐦𑐵𑐫𑑂‌ 𑐴𑐵𑐮𑐷𑐐𑐸 𑐩𑑂𑐫𑐾 𑐏: 𑑋 𑐥𑑂𑐫𑐥𑐸 𑐩𑑂𑐫𑐾𑐩𑐢𑑂𑐫𑐾 𑐩𑑂𑐫𑐾 𑐮𑑂𑐫𑐵: 𑑑 𑐰 𑑔 𑐫𑐵 𑐨𑐵𑐲𑐵 𑐣𑐾𑐰𑐵𑑅 𑐴𑐾 𑐏:𑐳𑐵 𑐩𑑂𑐫𑐾𑐮𑑂𑐫𑐵𑑅 𑑒 𑐰 𑑓 𑐫𑐵 𑐨𑐵𑐲𑐵 𑐑𑐵:𑐳𑐵 𑐩𑐿𑐠𑐶𑐮𑐷 𑐏: 𑑋 𑐠𑐸𑐎𑐶𑑄 𑐫𑐵𑐣𑐵: 𑐣𑐾𑐰𑐵:𑐟𑐫𑑂‌𑐳𑑄 𑐡𑐵𑐦𑐵 𑐴𑐵𑐮𑐾𑐐𑐸 𑐗𑑂𑐰𑐮𑐫𑑂‌ 𑐣𑐾𑐰𑐵: 𑐖𑐎 𑐩𑐏𑐸𑐳𑐾𑑄 𑐩𑐾𑐩𑐾𑐐𑐸 𑐨𑐵𑐲𑐵𑐫𑐵 𑐣𑑄 𑐩𑑂𑐫𑐾 𑐴𑐵𑐮𑐾𑐐𑐸 𑐔𑐮𑐣𑐫𑐵𑐟 𑐳𑑂𑐥𑐲𑑂𑐚 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐥𑐶𑑄 𑐥𑑂𑐫𑐥𑐸𑑄 𑐩𑑂𑐫𑐾𑐫𑐵 𑐬𑐵𑐐 𑐕𑐳𑐶𑑄𑐎𑐠𑑄 𑐬𑐵𑐖𑐰𑐶𑐖𑐫, 𑐎𑐬𑐵, 𑐱𑑂𑐬𑐷 𑐰 𑐖𑐫𑐖𑐩𑑄𑐟𑐷 𑐏𑑅𑐳𑐵 𑐥𑑂𑐫𑐥𑐸𑑄 𑐩𑑂𑐫𑐾 𑐔𑑀 𑐟𑐵𑐮𑐫𑑂‌ 𑐴𑐵𑐮𑐾𑐐𑐸 𑐏: 𑑋

𑐡𑐵𑐦𑐵𑐩𑑂𑐫𑐾𑐫𑐵 𑐬𑐵𑐐 𑐰 𑐟𑐵𑐮
𑐳𑑄𑐐𑐷𑐟 𑐕𑐐𑐹 𑐠𑐖𑐵:𑐐𑐸 𑐳𑐵𑐢𑐣 𑐏: 𑐐𑐸𑐎𑐶𑐫𑐵 𑐩𑐵𑐢𑑂𑐫𑐩𑑄 𑐩𑐣𑐹𑐟𑐫𑐳𑑄 𑐠:𑐐𑐸 𑐩𑐣𑐫𑑂 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐨𑐵𑐰𑐫𑐵𑐟 𑐳𑑅, 𑐟𑐵𑐮, 𑐰 𑐮𑐫𑐫𑐵 𑐬𑐹𑐥𑐫𑑂 𑐰𑑂𑐫𑐎𑑂𑐟 𑐫𑐵𑐣𑐵: 𑐠:𑐐𑐸 𑐩𑐣𑐫𑐵𑐟 𑐁𑐣𑐣𑑂𑐡𑐶𑐟 𑐫𑐵𑐂 𑑋 𑐣𑐵𑐥𑑄 𑐄𑐐𑐸 𑐨𑐵𑐰𑐫𑐵𑐟 𑐣𑑂𑐫𑐣𑐷𑐥𑐶𑑄 𑐣𑑂𑐫𑐩𑐶𑐥𑐶𑐣𑑂𑐟 𑐣𑑄 𑐁𑐣𑐣𑑂𑐡𑐶𑐟 𑐫𑐵𑐂 𑑋 𑐳𑑄𑐐𑐷𑐟 𑐕𑐐𑐹 𑐟𑐳𑐎𑑄 𑐔𑑂𑐰𑐖𑐵:𑐐𑐸 𑐮𑐮𑐶𑐟𑐎𑐮𑐵 𑐏: 𑑋 𑐠𑐸𑐎𑐶𑐫𑐵 𑐩𑐵𑐢𑑂𑐫𑐩𑑄 𑐩𑐵𑐣𑐳𑐶𑐎 𑐊𑐰𑑄 𑐁𑐢𑑂𑐫𑐵𑐟𑑂𑐩𑐶𑐎 𑐣𑐶𑐐𑐹𑐎𑐠𑑄𑐫𑐵 𑐁𑐣𑐣𑑂𑐡 𑐥𑑂𑐬𑐵𑐥𑑂𑐟 𑐫𑐵𑐫𑑂𑐦𑐸 𑑋 𑐳𑐵𑐢𑐵𑐬𑐞𑐬𑐹𑐥𑑄 𑐳𑑄𑐐𑐷𑐟 𑐢𑐵𑐫𑐰𑑄 𑐴𑐾 𑐩𑐵𑐟𑑂𑐬 𑐩𑑂𑐫𑐾𑐫𑐵𑐟 𑐖𑐎 𑐠𑐸𑐂𑐎𑐵𑐔𑑂𑐰𑐣𑐷 𑐟𑐬 𑐰𑐵𑐳𑑂𑐟𑐰𑐫𑑂‌ 𑐱𑐵𑐳𑑂𑐟𑑂𑐬𑐷𑐫 𑐁𑐢𑐵𑐬𑐫𑑂‌ 𑐢𑐵𑐫𑐧𑐮𑐫𑑂‌ 𑐳𑑄𑐐𑐷𑐟 𑐢𑐵𑐮𑐎𑐶 𑐩𑑂𑐫𑐾, 𑐧𑐵𑐖𑑄 𑐟𑐠𑐵 𑐥𑑂𑐫𑐵𑐏𑑄 𑐳𑑂𑐰𑐟𑐵𑑄 𑐖𑐸𑐂 𑑋 𑐳𑑄𑐐𑐷𑐟 𑐳𑐺𑐖𑐣𑐵𑐫𑐵 𑐣𑐶𑐟𑐶𑑄 𑐩𑐡𑐫𑐎 𑐩𑐐𑐵:𑐐𑐸 𑐟𑐟𑑂𑐰 𑐢𑐿𑐐𑐸 𑐢𑑂𑐰𑐣𑐶 𑐏: 𑑋 𑐢𑑂𑐰𑐣𑐶 𑐢𑐿𑐐𑐸 𑐳: 𑐏: 𑑋 𑐠𑐸𑐎𑐶𑐫𑐵 𑐄𑐟𑑂𑐥𑐟𑑂𑐟𑐶 𑐕𑐸𑑄 𑐣𑑄 𑐰𑐳𑑂𑐟𑐸𑐫𑐵 𑐎𑐩𑑂𑐥𑐣𑐥𑐵𑐏𑐾𑑄 𑐖𑐸𑐂 𑑋 𑐱𑐵𑐳𑑂𑐟𑑂𑐬𑐷𑐫 𑐣𑐶𑐫𑐩𑐵𑐣𑐸𑐳𑐵𑐬 𑐣𑑂𑐫𑐣𑐾𑐖𑑂𑐫𑐹𑐐𑐸 𑐳:𑐫𑐵𑐟 𑑒𑑒 𑐐𑐹 𑐥𑑂𑐬𑐎𑐵𑐬𑐫𑑂‌ 𑐰𑐶𑐨𑐵𑐖𑐶𑐟 𑐫𑐵𑐣𑐵𑑅 𑐄𑐎𑐶𑐫𑐵𑐟 𑑗 𑐐𑐹 𑐱𑐸𑐡𑑂𑐢𑐳:𑐫𑐵 𑐬𑐹𑐥𑐫𑑂‌ 𑐣𑐵𑐮𑐵𑐎𑐫𑐵𑐟𑑅𑐐𑐸 𑐡𑐸 𑑋 𑐄𑐎𑐶𑐫𑐵𑐟 𑐴𑐾 𑐳𑐵, 𑐬𑐾, 𑐐, 𑐩, 𑐥, 𑐢, 𑐣𑐶 𑐳𑑂𑐰𑐬𑐎𑐠𑑄 𑐣𑐵𑐮𑐵𑐎𑐫𑐵𑐟𑑅𑐐𑐸 𑐏: 𑑋 𑐀𑐠𑐾 𑐴𑐾 𑐩𑑂𑐫𑐾 𑐴𑐵𑐮𑐾𑐐𑐸 𑐰 𑐧𑐵𑐖𑑄 𑐠𑐵𑐫𑐐𑐸 𑐎𑑂𑐬𑐶𑐫𑐵𑐫𑐵𑐟 ‘𑐰𑐬𑑂𑐞’ 𑐢𑐎𑐵: 𑐑𑐵𑐂 𑑋 𑐐𑐠𑐾𑐎𑐶, 𑐳𑑂𑐠𑐵𑐫𑐷 𑐰𑐬𑑂𑐞 (𑐕𑐐𑐹 𑐴𑐾 𑐳:𑐫𑐵𑐟 𑐧𑐵𑐬𑐩𑑂𑐧𑐵𑐬 𑐴𑐵𑐮𑐾𑐐𑐸), 𑐁𑐬𑑀𑐴𑐷 𑐰𑐬𑑂𑐞, 𑐀𑐰𑐬𑑀𑐴𑐷 𑐰𑐬𑑂𑐞 (𑐩𑐵𑐠𑐾𑐩𑐵, 𑑒𑑐𑑖𑑓: 𑑑𑑑) 𑑋 𑐠𑑂𑐰 𑐴𑐾 𑑗 𑐐𑐹 𑐎𑐠𑑄𑐫𑐵 𑐳𑑅 𑐰 𑐰𑐬𑑂𑐞𑐫𑐵 𑐳𑐩𑑂𑐩𑐶𑐱𑑂𑐬𑐞𑐥𑐵𑐏𑐾𑑄 𑐧𑑂𑐰𑐮𑐣𑐷𑐐𑐸 𑐰𑐶𑐱𑐾𑐲 𑐢𑑂𑐰𑐣𑐶𑐫𑐵𑐟 𑐴𑐾 𑐬𑐵𑐐 𑐢𑐵𑐂 𑑋 𑐬𑐵𑐐 𑐑𑐿𑐐𑐸 𑐕𑐸𑑄 𑐣𑑄 𑐕𑐐𑐹 𑐠𑐵𑐚𑐥𑐵𑐏𑐾𑑄 𑐄𑐟𑑂𑐥𑐣𑑂𑐣 𑐖𑐸𑐂 𑑋 𑐕𑐸𑑄 𑐣𑑄 𑐬𑐵𑐐𑐫𑑂‌ 𑐲𑐜𑐖 (𑐳𑐵) 𑐳𑑅 𑐐𑐧𑐮𑐾𑑄 𑐣𑑄 𑐰𑐬𑑂𑐖𑐶𑐟 𑐖𑐸𑐂𑐩𑐏𑐸𑐳𑐵 𑐩𑐢𑑂𑐫𑐩 (𑐩) 𑐰 𑐥𑑄𑐔𑐩 𑑋𑐥) 𑐐𑐧𑐮𑐾𑑄 𑐣𑑄 𑐣𑐵𑐥𑑄 𑐰𑐬𑑂𑐖𑐶𑐟 𑐖𑐸𑐂𑐩𑐏𑐸 (𑐩𑐵𑐠𑐾𑐩𑐵, 𑑒𑑐𑑖𑑓𑑅𑑑𑑓) 𑑋 𑐬𑐵𑐐𑐫𑐵 𑐁𑐢𑐵𑐬𑐫𑑂‌ 𑐴𑐾 𑐩𑐣𑐹𑐟𑐫𑐳𑑄 𑐳𑑄𑐐𑐷𑐟𑐫𑐵 𑐳𑐺𑐖𑐣𑐵 𑐫𑐵𑐣𑐵𑐔𑑂𑐰𑐣𑐷 𑑋 𑐨𑐵𑐲𑐵 𑐧𑐶𑐳𑑂𑐎𑑄𑐧𑐶𑐳𑑂𑐎𑑄 𑐖𑐸𑐳𑐵𑑄 𑐳𑑄𑐐𑐷𑐟 𑐢𑐵𑑅𑐳𑐵 𑐬𑐵𑐐𑐫𑐵 𑐣𑐶𑐫𑐩𑐡𑐸𑐣𑐾 𑐴𑐾 𑐮𑐵𑐣𑐵𑐔𑑂𑐔𑐣𑐷 𑑋

𑐣𑐾𑐰𑐵𑑅𑐟𑐫𑑂‌ 𑐣𑑄 𑐠𑑅𑐐𑐸 𑐧𑐶𑐳𑑂𑐎𑑄 𑐥𑐴𑐫𑐵𑐐𑐸 𑐳𑑄𑐐𑐷𑐟 𑐡𑐸 𑑋 𑐣𑐾𑐰𑐵: 𑐳𑑄𑐐𑐷𑐟 𑐣𑑄 𑐀𑐣𑑂𑐟𑐬𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵𑐎𑐠𑑄 𑐕𑐐𑐹 𑐴𑐾 𑐖𑐹𑐳𑐵𑑄 𑐄𑐎𑐶𑐫𑐵𑐟 𑐣𑐾𑐥𑐵𑐮𑐨𑐵𑐲𑐵𑑄 𑐩𑑂𑐫𑐾 𑐔𑑂𑐰𑐫𑐵: 𑐴𑐵𑐮𑐾𑐐𑐸 𑐥𑐴 𑐑𑐵𑑅𑐳𑐵 𑐧𑐶𑐳𑑂𑐎𑑄 𑐡𑐸 𑑋 𑐡𑐵𑐦𑐵𑐫𑑂‌ 𑐴𑐵𑐮𑐾𑐐𑐸 𑐩𑑂𑐫𑐾 𑐣𑑄 𑐕𑐸𑑄 𑐣𑑄 𑐕𑐐𑐹 𑐬𑐵𑐐 𑐰 𑐟𑐵𑐮𑐫𑑂‌ 𑐁𑐢𑐵𑐬𑐶𑐟 𑐖𑐸𑐫𑐵𑐔𑑂𑐔𑐣𑐷 𑑋 𑐠𑐣 𑐀𑐢𑑂𑐫𑐫𑐣 𑐖𑐹𑐐𑐸 𑐡𑐵𑐦𑐵𑐩𑑂𑐫𑐾 𑐣𑑄 𑐠𑐷𑐠𑐷 𑐬𑐵𑐐𑐫𑑂‌ 𑐁𑐢𑐵𑐬𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐐𑐹 𑐬𑐵𑐐 𑐠𑐸𑐎𑐠𑑄 𑐡𑐸 –

𑐬𑐵𑐐 𑐱𑑂𑐬𑐷

𑐁𑐬𑑀𑐴 : 𑐳𑐵, 𑐬𑐾 sss 𑐩𑐾 𑐥 𑐣𑐶 𑐳𑐵𑑄
𑐀𑐰𑐬𑑀𑐴 : 𑐳𑐵𑑄,𑐣𑐶 𑐢 𑐥, 𑐩𑐾 𑐐 𑐬𑐾 sss 𑐳𑐵
𑐥𑐎𑐜:𑐳𑐵 𑐬𑐾 s 𑐐 𑐬𑐾 𑐥,𑐥 𑐩𑐾 𑐩𑐾 𑐐 𑐐𑐬𑐾 sss𑐬𑐾 𑐳𑐵
𑐰𑐵𑐡𑐷:𑐬𑐾
𑐳𑑄𑐰𑐵𑐡𑐷 𑑅 𑐥
𑐠𑐵𑐚 𑑅 𑐥𑐹𑐬𑑂𑐰𑐷
𑐴𑐵𑐮𑐶𑐐𑐸 𑐂 𑑅 𑐳𑐣𑐶𑐮

𑐬𑐵𑐐 𑐖𑐫𑐖𑐩𑑄𑐟𑐷
𑐁𑐬𑑀𑐴 :𑐳𑐵 𑐢 𑐣𑐶 𑐩 𑐬𑐾 𑐬𑐾 𑐐 𑐩 𑐥 𑐣𑐶 𑐳𑐵𑑄
𑐀𑐰𑐬𑑀𑐴 :𑐳𑐵𑑄 𑐣𑐶 𑐢 𑐥 𑐩 𑐐 𑐬𑐾 𑐐 𑐬𑐾 𑐳𑐵
𑐥𑐎𑐜 : 𑐳𑐵 𑐣𑐶. 𑐢. 𑐥. 𑐬𑐾 ,𑐐 sss 𑐬𑐾 𑐳𑐵
𑐰𑐵𑐡𑐷 𑐳𑑅:𑐬𑐾
𑐳𑑄𑐰𑐵𑐡𑐷 𑐳𑑅 : 𑐥
𑐠𑐵𑐚 : 𑐏𑐩𑐵𑐖
𑐴𑐵𑐮𑐷𑐐𑐸 𑐃 : 𑐔𑐵𑐣𑑂𑐴𑐳𑐶𑐫𑐵 𑐡𑐎𑐮𑐾 𑐮𑐶𑐥𑐵𑑄𑐐𑐸 𑐥𑑂𑐬𑐴𑐬

𑐀𑐠𑐾 𑐴𑐾 𑐕𑐸𑑄 𑐣𑑄 𑐩𑑂𑐫𑐾 𑐴𑐵𑐮𑐾𑐐𑐸 𑐣𑐶𑐟𑐶𑑄 𑐄𑐎𑐷 𑐳𑐸𑐬 𑐖𑐎 𑐡𑐫𑐵𑑄 𑐩𑐐𑐵: 𑑋 𑐩𑑂𑐫𑐾𑐫𑐵𑐟 𑐣𑑂𑐫𑐣𑐾𑐰𑐴 𑐖𑐸𑐂𑐎𑐾𑐐𑐸 𑐣𑐶𑐟𑐶𑑄 𑐄𑐎𑐷 𑐟𑐵𑐮 𑐣𑑄 𑐁𑐰𑐱𑑂𑐫𑐎 𑐖𑐸𑐂 𑑋 𑐟𑐵𑐮 𑐢𑐿𑐐𑐸 𑐴𑐾 𑐩𑑂𑐫𑐾𑐫𑐵𑐟 𑐣𑐶𑐱𑑂𑐔𑐶𑐟 𑐳𑐩𑐫𑐵𑐰𑐢𑐶𑐡𑐸𑐣𑐾 𑐴𑐵𑐮𑐾𑐐𑐸 𑐩𑐵𑐢𑑂𑐫𑐩 𑐏: 𑑋 𑐟𑐵𑐮 𑐠𑐷𑐠𑐷 𑐎𑐠𑑄𑐫𑐵 𑐖𑐸𑐫𑐵𑐔𑑂𑐔𑐣𑐷 𑑋 𑐟𑐵𑐮𑐫𑑂‌ 𑐩𑑂𑐫𑐾 𑐴𑐵𑐮𑐎𑐶 𑐟𑐶𑐣𑐶 𑐄𑐎𑐶𑐫𑐵 𑐳𑐸𑐬𑐫𑐵 𑐩𑐶𑐛𑐵𑐳 𑐡𑐂 𑑋 𑐔𑑂𑐰𑐫 𑐄𑐮𑑂𑐮𑐾𑐏𑐶𑐟 𑐥𑑂𑐫𑐥𑐸𑑄 𑐩𑑂𑐫𑐾 𑐔𑑀 𑐟𑐵𑐮𑐫𑑂‌ 𑐁𑐢𑐵𑐬𑐶𑐟 𑐖𑐸𑐫𑐵: 𑐴𑐵𑐮𑐷𑐐𑐸 𑐏: 𑑋 𑐡𑐵𑐦𑐵 𑐑𑐿𑐐𑐸 𑐴𑐾 𑐏𑐶𑑄 𑐧𑐵𑐖𑑄 𑐠𑐵𑐣𑐵: 𑐴𑐵𑐮𑐷𑐐𑐸 𑐖𑐹𑐐𑐸𑐮𑐶𑑄 𑐔𑑀 𑐟𑐵𑐮𑐫𑐵 𑐧𑑀𑐮𑐫𑐵 𑐠𑐸𑐎𑐠𑑄 𑐡𑐸 𑑋

𑐔𑑀 𑐟𑐵𑐮
𑐔𑑀 𑐟𑑂𑐰𑐵𑑅𑐮𑑂𑐴𑐵𑐫𑑂‌𑐐𑐸

T T O T O T O
𑐣𑐵𑐟𑐷𑑄 𑐏𑑁𑐡𑐶𑐐𑐶 𑐣𑐵 𑐏𑑁𑐟𑐵 𑐟𑐶𑐣𑐶 𑐣𑐵𑐟𑐶 𑐏𑑁𑐟𑐵
T T O T O T O T
𑐑𑐾𑐣𑐡𑐶𑐐𑐶 𑐣𑐵 𑐑𑐾𑐣𑑂‌𑐡𑐶𑐟𑐶 𑐣𑐵 𑐟𑐶𑑄 𑐑𑐾𑐣𑐡𑐶𑐐𑐶 𑐣𑐵
O T O
𑐑𑐾𑐟𑐶𑐟𑐵 𑐬𑐶𑐑𑐾 𑐟𑐶𑐣𑐶𑐣𑐵
T O T O T O
𑐑𑐾𑐣𑐵𑐟𑐵𑐑𑐾 𑐣𑐵 𑐣𑐵 𑐣𑐵𑐟𑐶𑐏𑐬𑑂𑐐𑐣𑐵 𑐣𑐵𑐟𑐶𑑄𑐏𑐬𑑂𑐐 𑐣𑐵𑐣𑐵
T O T T O T
𑐡𑐶𑐑𑐵𑑃 𑐣𑐵𑐟𑐶𑐏𑐟𑐵 𑐡𑐶𑐑𑐵𑑃𑐡𑐶 𑐑𑐵𑑃𑐑𑐵𑑃 𑐑𑐾𑐣𑐡𑐶𑐐𑐶 𑐣𑐵
O T O
𑐑𑐾𑐟𑐶𑐟𑐵 𑐬𑐶𑐑𑐾 𑐟𑐶𑐣𑐶𑐣𑐵

𑐔𑐵𑐮𑐷

T O T O
𑐏𑐟𑐶𑐏𑐟𑐵 𑐑𑐾𑐣𑐶𑐣𑐵 𑐡𑐶𑐟𑐶𑐏𑐟𑐵 𑐑𑐾𑐣𑐶𑐣𑐵
𑐑𑐾𑐣𑐶𑐣𑐵 𑐟𑐶𑐣𑐶𑐣𑐵 𑐣𑐵𑐬𑐩𑐣𑐵 𑐏𑐟𑐶𑐣𑐵
𑐠𑐵𑑃𑐠𑐵𑑃 𑐠𑐵𑑃𑐠𑐵𑑃 𑐢𑐵𑑃𑐟𑐷 𑐏𑑁𑐡𑐶𑐐𑐶
𑐣𑐵 𑐏𑑁𑐡𑐶𑐐𑐶 𑐣𑐵𑐡𑐶𑐐𑐶 𑐣𑐵𑐡𑐶𑐐𑐶
𑐣𑐵𑐡𑐶𑐐𑐶 𑐣𑐵𑐡𑐶𑐐𑐶 𑐑𑐵𑑃𑐡𑐶𑐐𑐶 𑐣𑐵𑐡𑐶𑐐𑐶
𑐣𑐵𑐡𑐶𑐐𑐶 𑐣𑐵𑐡𑐶𑐐𑐶

𑐐𑑁
T O T O
𑐣𑐵𑐣𑐵 𑐣𑐵𑐟𑐮𑐾 𑐏𑑁 𑐣𑐵
𑐣𑐵𑐣𑐵 𑐣𑐵𑐟𑐮𑐾 𑐏𑐟𑐶𑐣𑐵 𑐟𑐶𑑄
𑐣𑐵𑐏𑐟𑐵 𑐑𑐾𑐣𑐶𑐣𑐵 𑐟𑐵𑐑𑐾𑐣𑐶𑐟𑐵 𑐑𑐾𑐣𑐶𑐣𑐵
𑐑𑐾𑐏𑐬𑑂𑐐 𑐣𑐵𑐏𑐬𑑂𑐐 𑐣𑐵𑐏𑐬𑑂𑐐 𑐣𑐵𑐣𑐵
𑐬𑐢𑐶𑐣𑐶 𑐑𑐶𑐣𑐶𑐟𑐵𑐏𑐟𑐵 𑐏𑐟𑐶𑐎𑑀 𑐑𑐵𑑃𑐑𑐵𑑃𑐡𑐶
𑐑𑐵𑑃 𑐡𑐶𑐐𑐶 𑐣𑐵𑐡𑐶𑐐𑐶 𑐣𑐵
𑐑𑐾𑐟𑐶𑐣𑐶𑐟𑐵 𑐏𑐟𑐶𑐣𑐵 𑐏𑐟𑐶𑐣𑐶𑐟𑐵 𑐏𑐟𑐶𑐢𑐵𑑃
𑐑𑐾𑐣𑐶𑐩𑐣𑐵 𑐎𑐢𑐵𑑃 𑐣𑐵𑐡𑐶𑐎 𑐑𑐵𑑃

T O T O
𑐑𑐵𑑃𑐬𑐐 𑐬𑐐𑐟𑐶 𑐏𑑁𑐟𑐶 𑐣𑐵𑐟𑐶𑐏𑐟𑐵
𑐑𑐾𑐣𑐵 𑐏𑐟𑐵𑐑𑐾𑐣𑐶 𑐣𑐵 𑐑𑐾𑐟𑐶𑐣𑐵

T T
𑐟𑐶𑑄 𑐡𑐶
𑐰𑐶𑐨𑐵𑐐 : 𑑔, 𑐟𑐵𑐮𑐷 (T ) : 𑑒, 𑐏𑐵𑐮𑐷 (0): 𑑒
[𑐳𑑂𑐬𑑀𑐟 : 𑐡𑐵𑐦𑐵𑐐𑐸𑐬𑐸 𑐐𑑀𑐰𑐶𑐣𑑂𑐡 𑐩𑐴𑐬𑑂𑐖𑐣, 𑐰𑐬𑑂𑐲 𑑘𑑔, 𑐥𑐵𑑄𑐐𑐵, 𑐎𑐶𑐥𑐹)

𑐔𑑂𑐰𑐫𑑂 𑐄𑐮𑑂𑐮𑐾𑐏𑐶𑐟 𑐩𑑂𑐫𑐾𑐫𑑂 𑐡𑐸𑐠𑑂𑐫𑐵𑐔𑑂𑐰𑑄𑐐𑐸 𑐏𑑃𑐐𑑂𑐰𑑅 𑐩𑐸𑐣𑐵
𑐀𑐳𑑄𑐏𑐾 𑐀𑐳𑑄𑐏𑑂𑐫, 𑐀𑐣𑐐𑐶𑐣𑑂𑐟𑐷
𑐀𑐵𑐾𑐳 𑐰𑐳𑐥𑐵𑐾𑐮
𑐎𑐵𑐾𑐏 𑐎𑑂𑐰𑐏𑐵𑐫𑐵𑑅
𑐏𑐳𑐾 𑐏𑐣𑐵𑑅
𑐐𑐬 𑐐𑑅𑐥𑑅
𑐐𑐸𑐥𑐟𑐣 𑐐𑐥𑑂𑐟𑐬𑐹𑐥𑑄,𑐳𑐸𑐣𑐵𑑄 𑐣𑑄 𑐩𑐳𑐷𑐎
𑐒𑐴𑐬𑐹𑐫 𑐣𑑂𑐴𑑂𑐫𑐮𑐸𑐫
𑐖𑐳 𑐖𑑃𑐫𑑂
𑐠𑐵𑐒𑐵𑐀𑐵𑐾 𑐠𑐵𑐣𑐵𑑅
𑐢𑐸𑐕𑐾𑐐𑐸𑐬𑐶 𑐢𑐸𑑃𑐫𑐵 𑐕𑑂𑐫𑑄𑐐𑐹

𑐣𑐶𑐟𑐾𑐣𑐵𑐠𑐵𑐫 – 𑐣𑐶𑐟𑑂𑐫𑐣𑐵𑐠, 𑐣𑐵𑐳:𑐡𑑂𑐫:
𑐥𑑂𑐰𑐵𑐠 – 𑐥𑑂𑐰𑐵𑑅
𑐦𑐸𑐟𑐎𑐳𑑂𑐫 – 𑐦𑐸𑐟
𑐨𑐖𑐬𑐥𑐾 – 𑐨𑐵𑐐𑐶 𑐫𑐵𑐫𑑂‌𑐐𑐸
𑐩𑐸𑐳𑐵𑐣 – 𑐩𑐳𑐵𑐣
𑐩𑑀𑐬𑐩𑐵𑐮 – 𑐕𑑂𑐫𑑄𑐫𑐵 𑐩𑐵𑐮𑐵
𑐮𑐳𑐶𑐎𑐬 – 𑐁𑐎𑐬𑑂𑐲𑐎
𑐴𑐟𑐵𑐳 – 𑐴𑐠𑐵𑐫𑑂‌ 𑐔𑐵𑑅𑐐𑐸
𑐴𑐬𑐏 – 𑐴𑐬𑑂𑐲, 𑐏𑐸𑐱𑐷
𑐴𑐶𑐳𑐵 – 𑐴𑐶𑐣𑐵

𑐢𑐵𑐟𑑂𑐠𑐾𑑄 𑐢𑐵𑐫𑑂𑐐𑐸 𑐏𑑅𑐳𑐵 𑐡𑐵𑐦𑐵𑐩𑑂𑐫𑐾 𑐴𑐵𑐮𑐾𑐐𑐸 𑐣𑐾𑐰𑐵𑑅 𑐳𑐩𑐵𑐖𑐡𑐸𑐣𑐾 𑐕𑐐𑐹 𑐟𑐳𑐎𑑄 𑐢𑐶𑐳𑐶𑐮𑐵:𑐐𑐸 𑐥𑐬𑐩𑑂𑐥𑐬𑐵𑐎𑐠𑑄 𑐣𑐴𑑂𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐖𑐵𑐐𑐸 𑐩𑑂𑐫𑐾𑐫𑐵 𑐨𑐵𑐰 𑐰 𑐥𑑂𑐬𑐳𑑂𑐟𑐸𑐟𑐶 𑐣𑑄 𑐃𑐎𑐠𑑄 𑐴𑐾 𑐖𑐸𑐂𑐐𑐸 𑐖𑐹𑐐𑐸𑐮𑐷𑑄 𑐠𑐸𑐎𑐶𑑄 𑐩𑐣𑐹𑐟𑐫𑐐𑐸 𑐖𑐷𑐰𑐣𑐫𑐵𑐟 𑐳𑐸𑐠𑐵𑑄𑐮𑐵𑐎𑑂𑐎 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅𑐟𑐫𑑂‌𑐐𑐸 𑐖𑐷𑐰𑐣 𑐴𑐣𑐷𑐐𑐸 𑐠𑐷𑐠𑐷 𑐩𑐵𑐢𑑂𑐫𑐩𑐩𑐢𑑂𑐫𑐾 𑐡𑐵𑐦𑐵 𑐨𑐖𑐣 𑐣𑑄 𑐕𑐐𑐹 𑐟𑐳𑐎𑑄 𑐩𑐴𑐟𑑂𑐰 𑐖𑐵𑑅𑐐𑐸 𑐩𑐵𑐢𑑂𑐫𑐩 𑐏: 𑑋 𑐕𑐩𑑂𑐴 𑐣𑐾𑐰𑐵𑑅𑐫𑐵 𑐡𑐸𑑅𑐏, 𑐳𑐸𑐏, 𑐳𑑄𑐳𑑂𑐎𑐵𑐬, 𑐥𑐬𑐩𑑂𑐥𑐬𑐵, 𑐂𑐟𑐶𑐴𑐵𑐳, 𑐳𑐩𑐵𑐖 𑐁𑐡𑐶 𑐦𑐸𑐎𑑂𑐎𑑄 𑐡𑐵𑐦𑐵 𑐨𑐖𑐣𑑄 𑐳𑑄𑐐𑐷𑐟 𑐰 𑐩𑑂𑐫𑐾𑐫𑐵 𑐩𑐵𑐢𑑂𑐫𑐩𑑄 𑐣𑑂𑐴𑐧𑑂𑐰𑐫𑑂𑐐𑐸 𑐫𑐵𑐣𑐵𑐔𑑂𑐔𑐣𑐷 𑑋 𑐄𑐎𑐶𑑄 𑐡𑐵𑐦𑐵 𑐨𑐖𑐣𑐫𑐵 𑐩𑐴𑐟𑑂𑐟𑑂𑐰 𑐰 𑐄𑐎𑐶𑐫𑐵 𑐕𑑂𑐫𑐮𑐵𑐧𑐸𑐮𑐵 𑐣𑐾𑐰𑐵: 𑐳𑐩𑐵𑐖𑐡𑐸𑐣𑐾 𑐥𑑂𑐬𑐵𑐔𑐷𑐣𑐎𑐵𑐮𑑄 𑐣𑐶𑐳𑐾𑑄 𑐠𑑁𑑄 𑐟𑐎 𑐣𑑄 𑐄𑐟𑑂𑐟𑐶𑐎 𑐴𑐾 𑐣𑑂𑐴𑑂𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐮𑐾 𑐡𑐵𑐦𑐵 𑐥𑐬𑐩𑑂𑐥𑐬𑐵 𑐳𑐵𑐩𑐵𑐖𑐶𑐎 𑐳𑐡𑐨𑐵𑐰 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐣𑐶𑐢𑐶𑐫𑐵𑐟 𑐩𑑂𑐰𑐵𑐎𑐵𑐟𑐫𑑂𑐟 𑐟:𑐢𑑄𑐐𑐸 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐔𑑂𑐰𑑄𑐐𑐸 𑐡𑐸 𑑋

𑐮𑐶𑐢𑑄𑐳𑐵 𑐖𑑂𑐰𑐮𑑄

• 𑐎𑐳𑐵, 𑐥𑑂𑐬𑐾𑐩𑐧𑐴𑐵𑐡𑐸𑐬, 𑐣𑐾𑐳𑑄 𑑑𑑐𑑘𑑕, 𑐣𑐵𑐳𑐡𑑂𑐫𑐵𑐾𑐫𑐵 𑐩𑑂𑐫𑐾 𑑋 𑐫𑐾𑑃 : 𑐴𑐶𑐩𑐵𑐘𑑂𑐔𑐮 𑐥𑐸𑐳𑑂𑐟𑐎 𑐨𑐰𑐣 𑑋
• 𑐎𑐵𑐫𑐳𑑂𑐠, 𑐕𑐟𑑂𑐬𑐧𑐴𑐵𑐡𑐸𑐬, 𑐣𑐾𑐳𑑄 𑑑𑑑𑑒𑑔, ‘𑐩𑐔𑑂𑐕𑐾 𑐐𑐵𑑄𑐩𑐫𑑂‌ 𑐔𑑂𑐰𑑄𑐐𑐸 𑐣𑐾𑐳 𑑘𑑔𑑕 𑐫𑐵 𑐱𑐶𑐮𑐵𑐥𑐟𑑂𑐬: 𑐕𑐐𑐹 𑐀𑐢𑑂𑐫𑐫𑐣’, 𑐣𑐾𑐥𑐵𑐮 𑐳𑑄𑐳𑑂𑐎𑐺𑐟𑐶, 𑐮𑑂𑐫𑐵 𑑑𑑑: 𑑑𑑖𑑔; 𑑒𑑓-𑑒𑑖 𑑋
• 𑐜𑑄𑐐𑑀𑐮, 𑐎𑐵𑐖𑐷𑐩𑐵𑐣, 𑐣𑐾𑐳𑑄 𑑑𑑑𑑒𑑖, 𑐫𑐮 𑐴𑐎𑐟𑑂𑐰𑐵:𑐫𑐵 𑐡𑐵𑐦𑐵 𑐨𑐖𑐣 : 𑐕𑐐𑑂‌ 𑐀𑐢𑑂𑐫𑐫𑐣 𑑋 𑐳𑑂𑐣𑐵𑐟𑐎𑑀𑐟𑑂𑐟𑐬 𑐱𑑀𑐢-𑐥𑑂𑐬𑐧𑐣𑑂𑐢, 𑐟𑑂𑐬𑐶𑐨𑐸𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑑋
• 𑐩𑐵𑐠𑐾𑐩𑐵, 𑐥𑐬𑐱𑐸𑐬𑐵𑐩𑐨𑐎𑑂𑐟, 𑐰𑐶𑐳𑑄 𑑒𑑐𑑖𑑓, 𑐳𑑄𑐐𑐷𑐟 𑐥𑑂𑐬𑐰𑐾𑐱𑐶𑐎𑐵 𑑋 𑐮𑐮𑐶𑐥𑐸𑐬 : 𑐳𑐵𑐗𑐵 𑐥𑑂𑐬𑐎𑐵𑐱𑐣 𑑋
• 𑐰𑐿𑐡𑑂𑐫,𑐖𑐣𑐎𑐮𑐵𑐮,𑐣𑐾.𑐳𑑄.𑑑𑑑𑑒𑑒, 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑑂𑐬𑐵𑐔𑐷𑐣 𑐎𑐵𑐰𑑂𑐫 𑐳𑐶𑐬𑑂𑐖𑐣𑐵 𑑋 𑐫𑐾𑑃 : 𑐣𑐾𑐥𑐵𑐮 𑐬𑐵𑐖𑐎𑐷𑐫 𑐥𑑂𑐬𑐖𑑂𑐘𑐵-𑐥𑑂𑐬𑐟𑐶𑐲𑑂𑐛𑐵𑐣 𑑋
• 𑐱𑑂𑐬𑐷𑐰𑐵𑐳𑑂𑐟𑐰, 𑐴𑐬𑐶𑐱𑑂𑐔𑐣𑑂𑐡𑑂𑐬, 𑐂𑐳𑑄.𑑒𑑐𑑑𑑔 , 𑐬𑐵𑐐 𑐥𑐬𑐶𑐔𑐫 𑑋 𑐧𑐿𑑄𑐐𑐮𑐵𑐾𑐬 𑑅 𑐳𑑄𑐐𑐷𑐟 𑐳𑐡𑐣 𑐥𑑂𑐬𑐎𑐵𑐱𑐣 𑑋
• Jorgensen, Hans,1936, A Dictionary of the Classical Newari. Kobenhavn: Levin & Munksgaard.